Hetoo ni Biblia lɛ kɛhãa
Mɛi ni yaje shihilɛ ko ni tamɔ amɛgbo mli lɛ ateŋ mɛi komɛi kɛɛ amɛkaiɔ akɛ, atse amɛ kɛje amɛgbɔmɔtso lɛ he, ni amɛna la ko ni miikpɛ loo he ko ni yɔɔ fɛo waa. Wolo ko ni ji, Recollections of Death lɛ wie akɛ, ‘Mɛi komɛi na shihilɛ nɛɛ akɛ hegbɛ ni amɛná ni hã amɛna shihilɛhe kroko.’ Eyɛ mli akɛ Biblia lɛ etsĩko sane ko tamɔ nɛkɛ tã moŋ, shi anɔkwale ko yɛ Biblia lɛ mli ni tsɔɔ akɛ, nibii ni mɛi nɛɛ kɛɔ akɛ amɛna lɛ, jeee gbohii ajeŋ loo hɛvin shihilɛ ko amɛna lɛ.
Gbohii lɛ leee nɔ ko nɔ ko. Biblia lɛ kɛɔ akɛ, mɛi ni egboi lɛ “leee nɔ ko nɔ ko kwraa.” (Jajelɔ 9:5) Kɛ́ wɔgbo lɛ, wɔyahiii he kroko, ni wɔsusuuu nɔ ko he, moŋ lɛ shihilɛ ni wɔyajeɔ mli lɛ, wɔleee nɔ ko nɔ ko kwraa. Nɔ ni mɛi komɛi tsɔɔ akɛ gbɔmɔ yɛ susuma ko ni gbooo yɛ emli, ni kɛ́ mɔ ko gbo lɛ, esusuma lɛ yaa nɔ ehiɔ shi lɛ, jeee tsɔɔmɔ ni jɛ Biblia lɛ mli. (Ezekiel 18:4) No hewɔ lɛ, nibii ni mɛi ni yajeɔ shihilɛ ko ni tamɔ amɛgbo mli lɛ kɛɔ akɛ amɛna lɛ nyɛŋ afee nibii ni amɛna yɛ ŋwɛi (hɛvin), hɛl, loo gbohii ajeŋ.
Mɛni Lazaro kɛɛ yɛ gbohii ajeŋ, hɛvin, loo hɛl he? Amaniɛbɔɔ ni Biblia lɛ kɛhã yɛ Lazaro gbele lɛ he lɛ tsɔɔ faŋŋ akɛ egbo diɛŋtsɛ: Yesu tee lɛ shi be ni egbo gbii ejwɛ sɛɛ. (Yohane 11:38-44) Eji be ni Lazaro gbo lɛ, eyaje shihilɛ kpakpa ko mli loo eyaye wala kulɛ, ani teemɔ ni Yesu tee lɛ shi kɛba wala mli ekoŋŋ yɛ shikpɔŋ lɛ nɔ lɛ etsɔŋ akɛ Yesu yitsoŋ wa? Kɛ̃lɛ, nɔ ko bɛ Biblia lɛ mli ni tsɔɔ akɛ Lazaro wie nɔ ko yɛ shihilɛ ni eyaje mli lɛ he. Eji be ni Lazaro gbo lɛ, ele nɔ ni tee nɔ kulɛ, bɔ fɛɛ bɔ ni fee lɛ ebaawie nibii ni tee nɔ yɛ jɛmɛ lɛ he. Nɔ ni sa kadimɔ ji, be ni Lazaro gbo lɛ, Yesu wie Lazaro he akɛ ewɔ, ni tsɔɔ akɛ be ni Lazaro gbo lɛ, eleee nɔ ko nɔ ko.—Yohane 11:11-14.