Ani Esa Akɛ Wɔjá Amagai Kɛ Amɛhenɔi?

Hetoo ni Biblia lɛ kɛhãa

Dabi, esaaa akɛ wɔjáa amagai. Be ni wolo ko (New Catholic Encyclopedia) wieɔ Nyɔŋmɔ mla ni ekɛhã Israel maŋ lɛ he lɛ, etsɔɔ akɛ: “Kɛ́ apɛi Biblia mli amaniɛbɔi srɔtoi lɛ amli lɛ, anaa faŋŋ akɛ anɔkwa jálɔi kɛ amagai tsuuu nii yɛ Nyɔŋmɔ jamɔ mli. Susumɔ Biblia ŋmalɛi nɛɛ ahe okwɛ:

• “Kaafee amaga ko loo nɔ ko ní tamɔ nii ni yɔɔ ŋwɛi, loo nii ní yɔɔ shikpɔŋ lɛ nɔ, loo nii ní yɔɔ nu mli yɛ shikpɔŋ lɛ shishi lɛ oha ohe. Kaajá amɛ, ni kaasɔmɔ amɛ hu; ejaakɛ mi, Yehowa, o-Nyɔŋmɔ lɛ, mi ji Nyɔŋmɔ awuŋayelɔ.” (2 Mose 20:4, 5) Akɛni Nyɔŋmɔ yeɔ ‘awuŋa’ loo esumɔɔ ni ajá lɛ pɛ hewɔ lɛ, enaaa he miishɛɛ akɛ wɔkɛ yijiemɔ baahã amagai, mfonirii, wɔji, loo nibii ni mɛi fee.

• “Miŋmɛŋ gbɛ koni amagai aŋɔ yijiemɔ ni esa akɛ akɛhã mi lɛ.” (Yesaia 42:8, Easy-to-Read Version) Nyɔŋmɔ kpoɔ jamɔi ni atsɔɔ amagai kɛ ehenɔi anɔ akɛhãa lɛ lɛ. Be ni Israelbii komɛi ka akɛ amɛbaatsɔ tsinabi amaga ko nɔ amɛjá lɛ lɛ, Nyɔŋmɔ kɛɛ akɛ amɛfee “esha ni yɔɔ hiɛdɔɔ.”—2 Mose 32:7-9, Easy-to-Read Version.

• “Esaaa akɛ wɔsusuɔ akɛ Mɔ ni ji Nyɔŋmɔ lɛ tamɔ shika tsuru loo jwiɛtɛi loo tɛ, tamɔ nɔ ko ni gbɔmɛi kɛ amɛŋaa kɛ amɛjwɛŋmɔ fee.” (Bɔfoi 17:29) Nɔ ni tamɔɔɔ wɔŋjamɔ ni bei pii lɛ akɛ amagai “ni gbɔmɛi kɛ amɛŋaa kɛ amɛjwɛŋmɔ fee” lɛ tsuɔ nii yɛ mli lɛ, taakɛ Biblia lɛ tsɔɔ, esa akɛ Kristofoi ‘anyiɛ yɛ hemɔkɛyeli naa, jeee nɔ ni amɛnaa lɛ naa.’—2 Korintobii 5:7.

• “Nyɛkwɛa nyɛhe nɔ jogbaŋŋ yɛ amagai ahe.” (1 Yohane 5:​21) Yɛ famɔi ni akɛhã Israel maŋ lɛ kɛ Kristofoi lɛ fɛɛ mli lɛ, Biblia lɛ kpaa tsɔɔmɔ akɛ Nyɔŋmɔ kpɛlɛɔ amagai kɛ wɔji ni akɛjáa lɛ lɛ he mama.