Sanebimɔi Ni Biblia Lɛ Ehã Hetoo / Yesu / Ani Yesu Gbo Yɛ Krɔs Nɔ?
Hetoo ni Biblia lɛ kɛhãa
Mɛi babaoo naa krɔs akɛ eji Kristofoi akadimɔ nɔ ni ale waa. Kɛ̃lɛ, Biblia lɛ etsɔɔɔ nɔ pɔtɛɛ nɔ ni Yesu gbo yɛ, no hewɔ lɛ, mɔ ko mɔ ko nyɛŋ ele bɔ ni eji diɛŋtsɛ. Fɛɛ sɛɛ lɛ, Biblia lɛ hãa wɔ nɔdaamɔ nɔ akɛ Yesu gbo yɛ tso jaŋŋ nɔ, shi jeee yɛ krɔs ko nɔ.
Bei pii lɛ, kɛ́ Biblia lɛ miiwie nɔ ni asɛŋ Yesu yɛ nɔ lɛ he lɛ, ekɛ Greek wiemɔ stau·rosʹ tsuɔ nii. (Mateo 27:40; Yohane 19:17) Eyɛ mli akɛ afɔɔ wiemɔ nɛɛ shishitsɔɔmɔ akɛ “krɔs” moŋ, shi nilelɔi pii kpɛ̃lɛɔ nɔ akɛ eshishitsɔɔmɔ diɛŋtsɛ ji “tso jaŋŋ.”a Wolo ni ji A Critical Lexicon and Concordance to the English and Greek New Testament lɛ wie akɛ stau·rosʹ “etsɔɔɔ tsei enyɔ ni akɛ ekome eble ekroko mli kɔkɔɔkɔ.”
Biblia lɛ kɛ Greek wiemɔ xyʹlon hu tsuɔ nii yɛ stau·rosʹ najiaŋ. (Bɔfoi 5:30; 1 Petro 2:24) Wiemɔ nɛɛ shishitsɔɔmɔ ji “tso,” “ŋmoŋmolo,” loo “tso jaŋŋ.”b No hewɔ lɛ, wolo ni ji The Companion Bible lɛ mu sane naa akɛ: “Nɔ ko nɔ ko bɛ Greek wiemɔ ni akɛŋma Kpaŋmɔ Hee lɛ mli ni tsɔɔ tsei enyɔ po.”
Ani Nyɔŋmɔ kpɛ̃lɛɔ krɔs ni akɛtsuɔ nii yɛ jamɔ mli lɛ nɔ?
Akɛ Latin wiemɔ ni ji crux simplex lɛ tsuɔ nii ahãa tso jaŋŋ ni asɛŋɔ ojotswalɔi yɛ nɔ
Ekɔɔɔ he eko bɔ ni nɔ ni asɛŋ Yesu yɛ nɔ lɛ ji lɛ, anɔkwa saji kɛ Biblia mli ŋmalɛi ni nyiɛ sɛɛ nɛɛ hãa wɔnaa akɛ esaaa akɛ wɔ kɛ krɔs tsuɔ ni yɛ jamɔ mli.
Nyɔŋmɔ kpoɔ jamɔi ni akɛ amagai loo okadii, ni krɔs fata he lɛ tsuɔ nii yɛ mli lɛ. Nyɔnmɔ fã Israelbii lɛ akɛ amɛ kɛ “nɔ ko he amaga” akatsu ni yɛ amɛjamɔ mli, ni akɛɛ Kristofoi hu akɛ ‘amɛjo amagajamɔ naa foi.’—5 Mose 4:15-19; 1 Korintobii 10:14.
Blema Kristofoi lɛ kɛ krɔs tsuuu nii yɛ jamɔ mli.c Nibii ni bɔfoi lɛ tsɔɔ kɛ bɔ ni amɛhi shi amɛhã lɛ ji nɔkwɛmɔnɔ ni esa akɛ Kristofoi fɛɛ anyiɛ sɛɛ.—2 Tesalonikabii 2:15.
Krɔs ni akɛtsuɔ nii yɛ jamɔ mli lɛ jɛ wɔŋ jamɔ mli.d Yesu gbele sɛɛ afii ohai komɛi asɛɛ lɛ, be ni sɔlemɔi lɛ ekpalaŋ kɛ je Yesu tsɔɔmɔi lɛ ahe lɛ, aŋmɛ mɛi hee ni baa sɔlemɔi lɛ amli lɛ gbɛ koni amɛya nɔ amɛkɛ amɛwɔŋ jamɔ okadii, ni krɔs fata he lɛ atsu nii yɛ jamɔ lɛ mli. (Wolo ni ji The Expanded Vine’s Expository Dictionary of New Testament Words) Shi Biblia lɛ eŋmɛɛɛ gbɛ ni ahã wɔŋjalɔi ni aatao amɛbatsɔmɔ Kristofoi lɛ akã he amɛkɛ amɛwɔŋ jamɔ okadii atsu nii yɛ Kristofoi ajamɔ lɛ mli.—2 Korintobii 6:17
a Kwɛmɔ woji ni ji New Bible Dictionary, Third Edition, ni D. R. W. Wood fee lɛ, baafa 245; Theological Dictionary of the New Testament, Kpo VII, baafa 572; The International Standard Bible Encyclopedia, Revised Edition, Kpo 1, baafa 825; kɛ The Imperial Bible-Dictionary, Kpo II, baafa 84.
b Kwɛmɔ woji ni ji The Expanded Vine’s Expository Dictionary of New Testament Words, baafa 1165; A Greek-English Lexicon, ni Liddell kɛ Scott fee lɛ, Ninth Edition, baafai 1191-1192; kɛ Theological Dictionary of the New Testament, Kpo V, baafa 37.
c Kwɛmɔ “Cross” yɛ woji ni ji Encyclopædia Britannica, 2003 lɛ mli; agbɛnɛ hu kwɛmɔ wolo ni ji The Cross—Its History and Symbolism, baafa 40; kɛ The Companion Bible, Oxford University Press, appendix 162, baafa 186.
d Kwɛmɔ woji ni ji The Encyclopedia of Religion, Volume 4, baafa 165; The Encyclopedia Americana, Volume 8, baafa 246; kɛ Symbols Around Us, baafa 205-207.