Sanebimɔi Ni Biblia Lɛ Ehã Hetoo / Je Lɛŋ-Naagbai / Shika He Naagbai Kɛ Nyɔmɔ​—⁠Ani Biblia Lɛ Baanyɛ Aye Abua Bo?

Hetoo ni Biblia lɛ kɛhãa

Hɛɛ. Biblia mli shishitoo mlai ejwɛ ni nyiɛ sɛɛ nɛɛ baanyɛ aye abua bo kɛ́ oyɛ shika he naagba loo ohiɛ nyɔmɔ:

1. Too bɔ ni oheɔ nii ohãa lɛ he gbɛjianɔ. “Mɔdɛŋbɔlɔ gbɛjianɔtoi baaye omanye kɛ̃, shi mɛi fɛɛ ni yeɔ amɛhe oyai lɛ, amɛbaaye ohia kɛ̃.” (Abɛi 21:5) Ohe akatswa shi ni ohe nɔ ko akɛni aahɔ̃ɔ lɛ hewɔ. Susumɔ nɔ ni he hiaa bo lɛ he jogbaŋŋ, kɛ shika falɛ ni yɔɔ onyɛmɔ mli ni obaanyɛ okɛhe, ni okɛ nakai shika falɛ pɛ ahe.

2. Kaamɔ nyɔmɔ ni he ehiaaa. “Mɔ ni yafaa nii lɛ, eji nyɔŋ kɛhã mɔ ni faa lɛ nii lɛ.” (Abɛi 22:7) Kɛ́ ohiɛ nyɔji ni onyɛko owo lɛ, bɔɔ mɔdɛŋ ni okɛ mɛi ni ohiɛ amɛ nyɔji lɛ asusu nii ahe kɛkwɛ gbɛjianɔ kroko ni obaanyɛ oto kɛwo nyɔmɔ lɛ. Miamɔ ohiɛ ni okɛtsu nii. Biblia lɛ wo mɔ ko ni mɔ nyɔmɔ akɛni eyasusuuu nii ahe jogbaŋŋ dani eyadamɔ mli ehã mɔ ko ni hiɛ nyɔmɔ lɛ ŋaa akɛ: “Yaa ni oyabi onaanyo lɛ veveeve ni otutuu ohiɛ owo lɛ. Kaahã ohiŋmɛii miiná wɔ miiwɔ, ni kaahã wɔ miiba ohiɛsɛɛ.” Okɛ ŋaawoo nɛɛ atsu nii. (Abɛi 6:1-5, Ga Biblia) Kɛ́ oklɛŋklɛŋ nibimɔ lɛ yeee omanye lɛ, yaa nɔ obi koni atsake mli ahã bo.

3. Ná jwɛŋmɔ ni ja yɛ shika he. “Kaaye amim kɛná nii, ni ohe akatswa shi hu kɛná nii, kɛ́ jeee nakai lɛ, oshihilɛ lɛ mli baawo wu kwraa fe tsutsu lɛ.” (Abɛi 28:22, Contemporary English Version) Jeee ohia pɛ hiɛkɔ̃ɔ kɛ amimyeli baahã oye, shi ebaanyɛ efite okɛ Yehowa teŋ wekukpãa lɛ hu.

4. Omii ashɛ nɔ ni oyɔɔ lɛ he. “Kɛ́ wɔyɛ niyenii kɛ atade lɛ, wɔmii baashɛ nibii nɛɛ ahe.” (1 Timoteo 6:8) Kɛ́ mɔ ko yɛ shika lɛ, no etsɔɔɔ akɛ no baahã ená miishɛɛ loo etsui anyɔ emli yɛ shihilɛ mli. Mɛi ni yɔɔ miishɛɛ waa yɛ je lɛ mli lɛ, amɛteŋ mɛi pii lɛ, jeee shikatsɛmɛi ji amɛ. Nɔ ni hãa amɛnáa miishɛɛ ji, suɔmɔ ni yɔɔ amɛ kɛ amɛwekumɛi kɛ amɛ kɛ amɛnanemɛi ateŋ, kɛ wekukpãa ni yɔɔ amɛ kɛ Nyɔŋmɔ teŋ lɛ.​—Abɛi 15:17; 1 Petro 5:6, 7.