Sanebimɔi ni Jɛ Kanelɔi Adɛŋ

Aŋkroaŋkroi kɛ jarayeli nitsumɔi pii kɛ amɛhe miiwo mla shishi akɛ amɛbɔ nyɔmɔ, yɛ shika-helɛtemɔ bei ni mli wawai nɛɛ amli. Ani esa yɛ Ŋmalɛ naa akɛ Kristofonyo kɛ ehe aaawo mla shishi akɛ ebɔ nyɔmɔ?

Sanebimɔ nɛɛ hetoo kɛ nɔkwɛmɔ nɔ kpakpa ni tsɔɔ bɔ ni Nyɔŋmɔ Wiemɔ lɛ kɛ gbɛtsɔɔmɔ ni anyɛɔ atsuɔ he nii ni kɔɔ saji ni baanyɛ afee ŋmɛnɛŋmɛnɛ beaŋ nɔ he diɛŋtsɛ lɛ haa wɔ. Maji pii yɛ mlai ni kɔɔ nyɔmɔbɔɔ he. Mlai lɛ yɛ sɔrɔto yɛ maji sɔrɔtoi amli, ni Kristofoi asafo lɛ kɛ mla naa ŋaawoo haaa yɛ enɛ he. Shi nyɛhaa wɔnua mla naa gbɛjianɔtoo ni kɔɔ nyɔmɔbɔɔ he nɛɛ shishi.

Yiŋtoo kome hewɔ ni nɔyelii ŋmɛɔ aŋkroaŋkroi kɛ jarayeli nitsumɔi agbɛ ni amɛjaje yɛ mla naa akɛ amɛbɔ nyɔmɔ lɛ ji akɛ, ehaa mɛi ni kɛ shika faa mɛi krokomɛi lɛ naa hebuu ko kɛjɛɔ gbɔmɛi loo jarayeli nitsumɔi ni faa shika kɛjɛɔ mɛi adɛŋ loo amɛhiɛɔ mɛi anyɔmɔ shi amɛwooo nyɔmɔ ni amɛhiɛ lɛ ahe. Kɛha mɛi ni kɛ amɛ shika efa lɛ agbɛfaŋ lɛ, ekolɛ gbɛ kome pɛ ni yɔɔ ji ni akɛ sane lɛ aya saneyeli he koni aha mɔ ni hiɛ nyɔmɔ lɛ ajaje akɛ ebɔ nyɔmɔ koni aja nyɔmɔhiɛlɔ lɛ gboshinii loo enibii ni eyɔɔ lɛ akɛ nɔ ni akɛmiiwo nyɔmɔ ni ehiɛ lɛ fã.

Gbɛ kroko ni nyɔmɔbɔɔ he mla nɛɛ tsuɔ nii lɛ hu tamɔ hebuu nɔ kɛha mɛi ni hiɛ nyɔmɔ ni yɛ anɔkwale mli lɛ amɛnyɛŋ amɛwo nyɔmɔ lɛ. Abaanyɛ aha mɔ ni ebɔ nyɔmɔ lɛ gbɛ koni ekɛ ehe awo nyɔmɔbɔɔ he mla lɛ shishi, koni mɛi ni ehiɛ amɛ nyɔmɔ lɛ nine ashɛ enibii loo egboshinii lɛ ekomɛi anɔ. Ni kɛlɛ, mla lɛ baaŋmɛ lɛ gbɛ koni eshĩa loo enibii bibii komɛi ahi edɛŋ koni enyɛ ehi shi ni esheee gbeyei akɛ mɛi ni ehiɛ amɛ nyɔmɔ tsutsu lɛ aaashɔ̃ enibii fɛɛ kɛaajɛ edɛŋ.

Belɛ eka shi faŋŋ akɛ yiŋtoo ji, ni nɛkɛ mlai nɛɛ kɛ hebuu ko aha afai enyɔ lɛ fɛɛ yɛ shika loo nitsumɔ mli saji amli. Shi, nyɛhaa wɔkadia nɔ ŋaawoo ni yeɔ buaa ni Biblia lɛ kɛhaa.

Ebaawa akɛ mɔ ko aaakane Biblia lɛ kɛaajɛ eshishijee kɛyashi enaagbee ni enuŋ he akɛ, ewooo nyɔmɔbɔɔ ni akɛ he aaawo mli lɛ he hewalɛ. Wɔnaa kɔkɔbɔi ni tamɔ nɛkɛ yɛ Abɛi 22:7: “Niiatsɛ yeɔ ohiafoi anɔ, ni nifalɔ lɛ, mɔ ni fa lɛ lɛ tsulɔ ji lɛ.”

Kaimɔ Yesu nɔkwɛmɔ nɔ ni yɔɔ Mateo 18:23-34 ni kɔɔ tsulɔ ko ni hiɛ nyɔmɔ babaoo lɛ he lɛ. “Enuntsɔ lɛ fã akɛ ahɔɔ lɛ kɛ eŋa kɛ ebii kɛ enii fɛɛ ni eyɔɔ,” shi nuntsɔ lɛ, ni ji maŋtsɛ lɛ ŋmɛɛ he ni ena lɛ mɔbɔ. Beni yɛ sɛɛ mli lɛ nakai tsulɔ lɛ ejieee mɔbɔnalɛ kpo lɛ, maŋtsɛ lɛ fa ‘ni akɛ lɛ awo tsuŋ kɛyashi beyinɔ ni eeewo nyɔmɔ lɛ fɛɛ.’ Eka shi faŋŋ akɛ gbɛ ni hi fe fɛɛ, gbɛ ni ajieɔ yi lɛ ji, ni okwa shika ni oooyafa.

Nyɔŋmɔ tsuji ni hi shi yɛ blema Israel kɛ amɛhe wo jarayeli nitsumɔi sɔrɔtoi amli, ni yɛ bei komɛi amli lɛ amɛyafaa shika ni amɛkɛ shika hu faa mɛi krokomɛi. Mɛni Yehowa fa amɛ ni amɛfee? Kɛ mɔ ko miisumɔ ni eyafa shika koni ekɛje nitsumɔ shishi loo ekɛlɛɛ enitsumɔ mli lɛ, mla ŋmɛɔ gbɛ akɛ Hebrinyo aaahe hekpa ni nakai afeɔ. Shi Nyɔŋmɔ wo ewebii lɛ hewalɛ koni amɛkafee pɛsɛmkunya kɛ amɛkɛ shika miifa Israelnyo ni ehia lɛ; amɛkana shihilɛ ni yɔɔ mɔbɔ he sɛɛ kɛtsɔ hekpa ni amɛaahe nɔ. (2 Mose 22:25) Mose Wolo ni ji Enumɔ lɛ, yitso 15:7, 8 kɛɔ akɛ: “Kɛji ohia hia onyɛmi ko . . . lɛ, onine akpɔ yɛ enɔ, ni ofa lɛ bɔ ni aaashɛ lɛ yɛ efimɔ ni efi lɛ lɛ naa.” (Niŋmaa ni yɔɔ sɔrɔto lɛ ji wɔnɔ)

Mlihilɛ loo mɔ hesusumɔ ni tamɔ nakai nɔŋŋ je kpo yɛ mlai ni tsɔɔ akɛ mɛi ni kɛ shika efa mɔ ko lɛ akashɔ̃ nyɔmɔtsɛ lɛ hiamɔ nii ni ekɛkwɛɔ ehe lɛ kɛmiijɛ edɛŋ, tamɔ weku lɛ wiɛ kɛ wiɛbi loo hebo ni he miihia koni fɛ̃i akaye mɔ lɛ gbɛkɛ lɛ.—5 Mose 24:6, 10-13; Ezekiel 18:5-9.

Shi, jeee Yudafoi fɛɛ kpɛlɛ nɔ akɛ amɛkɛ shishinumɔ diɛŋtsɛ ni yɔɔ nakai mlai ni suɔmɔ yɔɔ mli ni jɛ amɛ-Kojolɔ kɛ Mla-Halɔ kpeteŋkpele lɛ ŋɔɔ lɛ baatsu nii. (Yesaia 33:22) Yudafoi hiɛjoolɔi komɛi kɛ amɛ nyɛmimɛi lɛ ye kɛ joomɔ diɛŋtsɛ. Ŋmɛnɛ hu, mɛi ni kɛ shika faa mɛi krokomɛi lɛ ateŋ mɛi komɛi baanyɛ afee keketee ni kɛ shishinumɔ tsuuu nii yɛ amɛ nyɔmɔbimɔi amli, ni amɛbaafee nakai yɛ Kristofonyo ko ni yeɔ anɔkwa ni yɛ be fioo ko mli lɛ enyɛɛɛ ewo nyɔmɔ ni ehiɛ lɛ yɛ nɔ ko ni ba trukaa ni ekpaaa gbɛ hewɔ lɛ nɔ. (Jajelɔ 9:11) Yɛ bɔ ni amɛyɔɔ keketee kɛ nɔnyɛɛ yɛ nyɔmɔbimɔ mli lɛ hewɔ lɛ, mɛi ni kɛ shika faa mɛi yɛ je lɛŋ lɛ baanyɛ anyɛ nyɔmɔtsɛ ko nɔ awo shihilɛ ko ni baaha enu he akɛ esa akɛ ebu loo efa ehe lɛ mli. Yɛ mɛɛ gbɛ nɔ? Yɛ saji lɛ ekomɛi amli lɛ, nɔ pɛ ni mɛi ni kɛ shika faa mɛi lɛ baakpɛlɛ nɔ ji mla naa jajemɔ akɛ abɔ nyɔmɔ. No hewɔ lɛ, Kristofonyo ni jeee hiɛjoolɔ loo ekuuu ehiɛ eshwieee nyɔmɔ ni ehiɛ lɛ nɔ lɛ baanyɛ ni ekɛ ehe awo mla naa nyɔmɔhiɛmɔ he gbɛjianɔtoo nɛɛ mli.

Esa akɛ wɔyoo sane lɛ fa kroko ni tamɔɔɔ nɔ ni wɔsusu he nɛɛ hu lɛ. Kristofonyo baanyɛ amɔ nyɔmɔ ejaakɛ ekɛ henɔyeli tsuuu nii yɛ shika ni efiteɔ loo ekwɛɛɛ nii kɛyaaa shɔŋŋ yɛ eyiŋkpɛi yɛ enitsumɔ mli lɛ mli. Ani esa akɛ efee mɔ ni nyɔmɔ ni ehiɛ lɛ gbaaa ejwɛŋmɔ naa ni kɛ oyaiyeli taoɔ hejɔlɛ kɛtsɔɔ mla naa nyɔmɔbɔɔ jajemɔ nɔ, koni ekɛye mɛi krokomɛi awui yɛ egbɛjianɔtoo gbonyo hewɔ? Biblia lɛ ekpɛlɛɛɛ akɔntaabuu mli gbɛnaa nii ni mɛi jieɔ amɛhiɛ yɛ nɔ nɛɛ nɔ. Ewoɔ Nyɔŋmɔ tsulɔ lɛ hewalɛ ni eha e-hɛɛ afee hɛɛ. (Mateo 5:37) Kaimɔ nɔ ni Yesu wie yɛ akɔntaa ni esa akɛ abu dani aje mɔɔ ko maa shishi lɛ he lɛ. (Luka 14:28-30) Yɛ enɛ kɛ gbeekpamɔ naa lɛ, esa akɛ Kristofonyo asusu nibii ni eŋɔɔɔ ni baanyɛ aba lɛ fɛɛ he dani ekɛ ehe awo nyɔmɔ ni ahiɛɔ lɛ mli. Kɛ ena ekɛ ehe wo nyɔmɔ lɛ mli pɛ lɛ, esa akɛ enu gbɛnaa nii ni ka enɔ akɛ eeeku sɛɛ ewo aŋkroaŋkroi kɛ nitsumɔ hei ni ehiɛ amɛ nyɔmɔ lɛ he. Kɛ mɛi pii yoo Kristofonyo ko akɛ anyɛɛɛ akɛ he afɔ enɔ loo eyeee anɔkwa lɛ, belɛ efite gbɛi kpakpa ni ebɔ mɔdɛŋ akɛ eeena lɛ ni mɛi ni yɔɔ sɛɛ lɛ yeŋ ehe odase kpakpa dɔŋŋ.—1 Timoteo 3:2, 7.

Kaimɔ nɔ ni Lala 15:4 kɛɔ wɔ yɛ nɔ gbɔmɛi ni Yehowa hereɔ amɛ lɛ he lɛ. Wɔkaneɔ akɛ: “Mɔ [ni Nyɔŋmɔ kpɛlɛɔ enɔ] ni kɛ eka kita ni eeena amane yɛ mli po lɛ, etsakeee.” Hɛɛ, Nyɔŋmɔ kpaa Kristofoi agbɛ akɛ amɛkɛ mɛi ni amɛyafa shika kɛjɛ amɛdɛŋ lɛ aaaye taakɛ amɛaasumɔ ni akɛ amɛ hu aye lɛ.—Mateo 7:12.

Yɛ enaamuu mli lɛ, Biblia lɛ eteee shi ewooo shihilɛ ni mli wa ni baa ni haa Kristofonyo lɛ kɛ ehe yawoɔ hebuu mla ni Kaisare nyɔmɔbɔɔ mla lɛ kɛhaa lɛ shishi lɛ. Shi, esa akɛ Kristofoi afee mɛi ni esoro amɛ kwraa yɛ anɔkwayeli kɛ he ni anyɛɔ akɛfɔɔ amɛnɔ lɛ mli. No hewɔ lɛ esa akɛ amɛfee nɔkwɛmɔ nɔ kpakpa yɛ amɛ shika he gbɛnaa nii ahe nitsumɔ mli.