Sanebimɔi Ni Biblia Lɛ Ehã Hetoo / Sɔlemɔ / Mɛɛ Yiŋtoi Enyɔ Komɛi Ahewɔ Nyɔŋmɔ Hãaa Sɔlemɔi Komɛi Ahetoo Lɛ?

Hetoo ni Biblia lɛ kɛhãa

Sɔlemɔi komɛi yɛ ni Nyɔŋmɔ hãaa hetoo. Naa yiŋtoi enyɔ komɛi ahewɔ ni kɛ́ mɔ ko sɔle lɛ, Nyɔŋmɔ hãŋ hetoo.

1. Kɛ́ sɔlemɔ lɛ kɛ Nyɔŋmɔ suɔmɔnaa nii kpãaa gbee

Nyɔŋmɔ hãaa nibimɔi ni kɛ esuɔmɔnaa nii loo etaomɔ nii ni yɔɔ Biblia lɛ mli lɛ kpãaa gbee lɛ ahetoo. (1 Yohane 5:14) Akɛ nɔkwɛmɔnɔ lɛ, Biblia lɛ kɛɛ wɔkaye amim. Asɔshwɛmɔ hãa ayeɔ amim. (1 Korintobii 6:9, 10) No hewɔ lɛ, kɛ́ osɔle obi koni Nyɔŋmɔ ahã oye loto lɛ, ehãŋ nakai sɔlemɔ lɛ hetoo. Nyɔŋmɔ jeee abaawa ko ni obaafã lɛ ni efee nɔ fɛɛ nɔ kɛkɛ ni otaoɔ lɛ ehã bo. Anɔkwa, esa akɛ oda Nyɔŋmɔ shi yɛ enɛ hewɔ. Ejaakɛ jeee nakai kulɛ, nibii ni mɛi baasɔle amɛbi ni Nyɔŋmɔ afee ahã amɛ lɛ baahã onaa akpɛ ohe ni oshe gbeyei waa.​—Yakobo 4:3.

2. Kɛ́ mɔ lɛ kɛ atuatsemɔ sɔle

Nyɔŋmɔ hãaa mɛi ni etswa amɛfai shi akɛ amɛkɛ amɛnifeemɔi baatsɔɔ akɛ amɛbooo lɛ toi lɛ asɔlemɔi ahetoo. Akɛ nɔkwɛmɔnɔ lɛ, Nyɔŋmɔ kɛɛ mɛi ni kɛɔ akɛ amɛmiijá lɛ, shi amɛfeee esuɔmɔnaa nii lɛ akɛ: “Nyɛsɔleɔ babaoo moŋ, shi mibooo nyɛ toi; lá ewu nyɛniji ahe fɛɛ.” (Yesaia 1:15) Shi eji amɛkpa amɛnifɔji anii lɛ ni ‘amɛsaa amɛ kɛ Nyɔŋmɔ teŋ’ kulɛ, kɛ́ amɛsɔle lɛ ebaabo amɛ toi, ni tsɔɔ akɛ ebaahã amɛ hetoo.​—Yesaia 1:18.