Ani Yesu Ji Gbɔmɔ Kpakpa Ko Kɛkɛ?

Hetoo ni Biblia lɛ kɛhãa

Yesu jeee gbɔmɔ kpakpa ko kɛkɛ. Kɛ́ hooo kwraa lɛ, ehã ana akɛ eji mɔ ko ni náa mɛi anɔ hewalɛ fe fɛɛ yɛ adesai ayinɔsaji amli fɛɛ. Kadimɔ nɔ ni yinɔsaneŋmalɔi kɛ woloŋmalɔi ni ehe gbɛ́i waa ewie yɛ Yesu he:

“Yesu ni jɛ Nazaret lɛ . . . ji mɔ ko ni ená adesai anɔ hewalɛ waa yɛ yinɔsane mli.”—H. G. Wells, Ŋleshi yinɔsaneŋmalɔ.

“[Yesu’] wala shihilɛ ená adesai anɔ hewalɛ waa fe mɛi fɛɛ ni ehi shikpɔŋ nɛɛ nɔ pɛŋ, ni eená mɛi anɔ hewalɛ lolo.”—Kenneth Scott Latourette, Amerika yinɔsaneŋmalɔ kɛ niŋmalɔ.

Biblia lɛ hãa wɔnaa nɔ hewɔ ni Yesu ená mɛi hewalɛ waa fe gbɔmɛi kpakpai fɛɛ ni ehi shi pɛŋ lɛ. Be ni Yesu bi esɛɛnyiɛlɔi kpaakpa lɛ mɔ ni amɛsusuɔ akɛ eji lɛ, amɛteŋ mɔ kome hã hetoo ni ja akɛ: “Bo ji Kristo lɛ, Nyɔŋmɔ, hiɛkãlɔ lɛ, bi lɛ.”—Mateo 16:16.