Mɛɛ Be Aŋmala Yesu He Saji Lɛ?

Hetoo ni Biblia lɛ kɛhãa

Be ni Yohane bɔɔ nibii ni tee nɔ yɛ Yesu wala shihilɛ mli lɛ he amaniɛ lɛ, eŋma akɛ: “Ni mɔ ni na lɛ, lɛ eye he odase nɛɛ, ni edase lɛ anɔkwaŋ, ni ele akɛ anɔkwale ewieɔ, koni nyɛ hu nyɛhe nyɛye.”—Yohane 19:35.

Yiŋtoo kome hewɔ ni esa akɛ wɔhe Sanekpakpai ni Mateo, Marko, Luka, kɛ Yohane ŋmala lɛ wɔye ji akɛ, amɛŋmala saji nɛɛ be ni mɛi ni na nibii ni abɔ he amaniɛ lɛ ateŋ pii yɔɔ wala mli. Mɛi komɛi kɛɛ akɛ, aŋma Mateo Sanekpakpa lɛ mra mli yɛ Yesu gbele sɛɛ afii kpaanyɔ nɔ, ni ji aaafee afi 41 Ŋ.B. Woloŋlelɔi babaoo heɔ amɛyeɔ akɛ aŋmala woji nɛɛ yɛ afi 41 Ŋ.B. sɛɛ mli kwraa, shi mɛi fɛɛ kpɛlɛɔ nɔ akɛ aŋmala Kristofoi A-Hela Ŋmalɛi lɛ amli woji lɛ fɛɛ yɛ klɛŋklɛŋ afii 100 Ŋ.B.

Mɛi ni na Yesu be ni eyɔɔ wala mli yɛ shikpɔŋ lɛ nɔ, be ni agbe lɛ kɛ be ni atee lɛ shi lɛ ji mɛi ni baanyɛ aye Sanekpakpai lɛ mli amaniɛbɔi lɛ ahe odase. Kɛfata he lɛ, eji nibii ni aŋmala lɛ ekomɛi ejaaa kulɛ, ewaaa akɛ mɛi nɛɛ baajie lɛ kpo. Woloŋlelɔ kpanaa F. F. Bruce kɛɛ akɛ: “Nɔdaamɔnɔ titri kome ni yɔɔ bɔfoi lɛ ashiɛmɔ lɛ mli ji bɔ ni gbɛ nɔ ni amɛtsɔɔ amɛgbalaa toibolɔi lɛ ajwɛŋmɔ kɛbaa amɛnɔ kɛ saji tamɔ ni nyiɛ sɛɛ nɛɛ; amɛwieee kɛkɛ akɛ, ‘Wɔna nibii ni tee nɔ nɛɛ kɛ wɔhiŋmɛi,’ shi amɛkɛɔ hu akɛ, ‘Tamɔ bɔ ni nyɛ diɛŋtsɛ nyɛle lɛ’ (Bɔfoi lɛ Asaji 2:22).”