Yaa Nɔ Okase Yehowa He Nii Koni Ole Lɛ Jogbaŋŋ

1. Kɛ́ wɔjwɛŋ bɔ ni Yehowa le nɔ fɛɛ nɔ, ni efee nibii pii ni yɔɔ naakpɛɛ lɛ nɔ lɛ, te wɔnuɔ he wɔhãa tɛŋŋ?

YEHOWA, wɔ-Nyɔŋmɔ lɛ, le nɔ fɛɛ nɔ, ehiɛ kã shi fe mɔ fɛɛ mɔ, ni efee nibii pii ni yɔɔ naakpɛɛ. Kɛ́ wɔjwɛŋ enɛɛmɛi fɛɛ ahe lɛ, wɔnaa kpɛɔ wɔhe. Bɔfo Paulo wie akɛ: “Kwɛ bɔ ni nii ni Nyɔŋmɔ yɔɔ lɛ fa kɛteke nɔ hã, kɛ bɔ ni ehiɛ kã shi waa, kɛ bɔ ni enilee lɛ mli kwɔ hã! Eyiŋkpɛi lɛ, anyɛɛɛ naa ana, ni egbɛi lɛ hu, anyɛɛɛ sɛɛ ana!” Ekolɛ bo hu onuɔ he tamɔ bɔ ni Paulo nu he lɛ.—Rom. 11:​33, 34.

2. Mɛni tsɔɔ akɛ wɔbaanyɛ wɔle mɔ ni Yehowa ji?

² Eyɛ mli akɛ, wɔnyɛŋ Yehowa he nɔ fɛɛ nɔ wɔle moŋ, shi wɔbaanyɛ wɔle mɔ ni eji. Mɛni tsɔɔ nakai? Maŋtsɛ David kɛɛ ebinuu Solomon akɛ: “Bɔɔ mɔdɛŋ ni ole otsɛ Nyɔŋmɔ lɛ ni okɛ otsui muu fɛɛ asɔmɔ lɛ . . . Kɛ́ otao esɛɛ gbɛ lɛ, ebaahã ona lɛ.” (1 Kro. 28:9) Afii ohai komɛi asɛɛ lɛ, bɔfo Yohane kɛɛ nyɛmimɛi lɛ akɛ, amɛbaanyɛ amɛná “anɔkwafo lɛ he nilee.” (1 Yoh. 5:20) Yesu diɛŋtsɛ hu wie akɛ, ebaaye ebua mɛi ni ‘amɛle Tsɛ lɛ jogbaŋŋ.’—Mat. 11:27.

3. Mɛni he wɔbaasusu yɛ nikasemɔ nɛɛ mli?

³ Mɛi fɛɛ ni sɔmɔɔ Yehowa bianɛ lɛ ekase ehe nibii pii momo. Fɛɛ sɛɛ lɛ, be fɛɛ be lɛ, nɔ ko yɛ kɛ̃ ni esa akɛ wɔkase yɛ Yehowa he. (Yoh. 17:3; kwɛmɔ shishigbɛ niŋmaa lɛ.) Akɛ nɔkwɛmɔnɔ lɛ, wɔbaanyɛ wɔkase ehe nii koni wɔna nɔ ni hãa enáa miishɛɛ kɛ nɔ ni baaye abua wɔ koni wɔhe lɛ wɔye waa. Yɛ nikasemɔ nɛɛ mli lɛ, wɔbaasusu sanebimɔi etɛ komɛi ahe. Amɛbaaye amɛbua wɔ fɛɛ ekɔɔɔ he eko afii abɔ ni wɔkɛsɔmɔ Yehowa koni wɔle lɛ jogbaŋŋ. Sanebimɔi lɛ ji: Mɛni tsɔɔ akɛ mɔ ko le Yehowa? Mɛni hewɔ esa akɛ wɔya nɔ wɔbɔ mɔdɛŋ wɔle lɛ jogbaŋŋ fe bɔ ni wɔle lɛ lɛ? Ni te wɔbaafee tɛŋŋ wɔle lɛ jogbaŋŋ?

MƐNI TSƆƆ AKƐ MƆ KO LE YEHOWA?

4. Mɛni ji gbɛ kome ni wɔbaanyɛ wɔtsɔ nɔ wɔle Yehowa?

⁴ Mɛni ji gbɛ kome ni wɔbaanyɛ wɔtsɔ nɔ wɔle Yehowa? Yehowa wo Yudafoi ni aŋɔ amɛ nom yɛ Babilon ni baaku amɛsɛɛ kɛba Israel lɛ shi akɛ: “Mahã amɛ tsui ni amɛkɛle mi, akɛ miji Yehowa.” (Yer. 24:7) Yudafoi ni ku amɛsɛɛ kɛjɛ Babilon kɛba Israel lɛ, le Yehowa he nibii pii momo. Shi be ni amɛku amɛsɛɛ kɛjɛ Babilon lɛ, ehe bahia ni amɛkɛ Yehowa abɔ naanyo waa. Nilelɔ ko wie akɛ: “Esoro Nyɔŋmɔ he nii ni abaale lɛ kwraa yɛ le ni abaale lɛ jogbaŋŋ koni akɛ lɛ abɔ naanyo waa lɛ he. Wɔbaanyɛ wɔkɛto srɔto ni yɔɔ mɔ ko ni miikane nuu kɛ yoo teŋ suɔmɔ he sane kɛ mɔ ko ni ená suɔmɔ ehã mɔ ko lɛ teŋ lɛ he.” Le ni wɔbaale akɛ Yehowa yɛ gbɛ́i, ni akɛ, lɛ ji Nyɔŋmɔ lɛ kɛkɛ faaa. Esa akɛ wɔle esui fɛfɛji lɛ hu.

5. Mɛni nɔ ni Maŋtsɛ Yosia fee lɛ hãa wɔnaa yɛ nɔ ni atsɔɔ kɛ́ akɛɛ mɔ ko le Yehowa lɛ he?

⁵ Gbɛ kroko ni wɔbaanyɛ wɔtsɔ nɔ wɔle Yehowa ji, ni wɔbaakase nɔ ni esumɔɔ kɛ nɔ ni esumɔɔɔ. Nɔ ko ni Maŋtsɛ Yosia fee lɛ hãa wɔnaa enɛ. Biblia lɛ wie akɛ: “Yɛ enɔyeli afi ni ji 8 lɛ nɔ, be ni edako lɛ, ebɔi etsɛ David Nyɔŋmɔ lɛ sɛɛgbɛtaomɔ.” (2 Kro. 34:3) Yosia kase Yehowa he nii pii kɛjɛ Ŋmalɛ lɛ mli, shi jeee no pɛ kɛkɛ efee. Ekɛ nibii ni ekase lɛ tsu nii. Ebɛ naakpɛɛ akɛ, Yehowa hã gbalɔ Yeremia ŋma akɛ, Yosia ye “jalɛ sane ni efee jalɛ nii, ni eye mɔ ni naa nɔ kɛ ohiafo sane ehã lɛ” lɛ. Kɛkɛ ni Yehowa kɛshi sɛɛ akɛ: “Ani jeee enɛ ji nɔ ni tsɔɔ akɛ mɔ ko le mi?”—Yer. 22:​15, 16.

6. Kɛ́ wɔbale Yehowa jogbaŋŋ lɛ, mɛni hu wɔbaafee? (Lala 9:10)

⁶ Kanemɔ Lala 9:10. Kɛ́ wɔbale Yehowa jogbaŋŋ lɛ, wɔbaahe lɛ wɔye waa hu. Nakai eba lɛ yɛ bɔfo Paulo gbɛfaŋ. Be ni awo lɛ tsuŋ nɔ ni ji naagbee nɔ ni eshwɛ fioo ni abaagbe lɛ lɛ, etsɔɔ nɔ hewɔ ni ehiɛ gbooo akɛ ebaana amanehulu akɛ Kristofonyo. Eŋma akɛ: “Mihiɛ gbooo. Ejaakɛ mile mɔ ni mihe enɔ miye lɛ.” (2 Tim. 1:12) Paulo he Yehowa eye waa ejaakɛ ekase Yehowa he nii, ni ena akɛ Yehowa ye ebua lɛ yɛ gbɛi pii anɔ. Ehe eye akɛ, bɔ fɛɛ bɔ ni fee lɛ, Yehowa hiɛ kpaŋ enɔ ni ebaatee lɛ shi ejaakɛ eye lɛ anɔkwa.

MƐNI HEWƆ ESA AKƐ WƆYA NƆ WƆBƆ MƆDƐŊ WƆLE YEHOWA JOGBAŊŊ FE BƆ NI WƆLE LƐ LƐ?

7. Kɛ́ wɔsɔmɔ Yehowa afii pii lɛ, mɛni ekolɛ wɔbaafee?

⁷ Be ni wɔkaseɔ Yehowa he nii klɛŋklɛŋ kwraa lɛ, wɔkase nii waa koni wɔle ehe nibii pii bɔ ni wɔbaanyɛ. Shi kɛ́ wɔsɔmɔ Yehowa afii pii lɛ, ekolɛ wɔbɔŋ mɔdɛŋ akɛ wɔbaale lɛ jogbaŋŋ fe bɔ ni wɔle lɛ lɛ. Mɛni hewɔ? Ejaakɛ kɛ́ wɔmiikane Biblia lɛ yɛ shĩa loo yɛ asafoŋ kpee shishi lɛ, bei pii lɛ, wɔsusuɔ bɔ ni wɔbaaná nɔ ni wɔkaneɔ lɛ he sɛɛ, kɛ bɔ ni ebaaye ebua wɔ loo mɛi krokomɛi lɛ he. Kɛ́ wɔfee nakai lɛ ehi, ejaakɛ nakai ji nɔ ni Biblia lɛ woɔ wɔ hewalɛ ni wɔfee. (2 Tim. 3:​16, 17) Shi Biblia lɛ hãa wɔleɔ mɔ ni Yehowa ji hu, ni enɛ ji nɔ ni he hiaa fe fɛɛ ni esa akɛ wɔsusu he. (Lala 25:​8-10) No hewɔ lɛ, kɛ́ wɔmiikane Biblia lɛ, esaaa akɛ wɔsusuɔ bɔ ni wɔ loo mɛi krokomɛi baaná nɔ ni wɔkaneɔ yɛ Biblia lɛ mli lɛ he sɛɛ lɛ pɛ he. Esa akɛ wɔbi wɔhe hu akɛ, ‘Mɛni enɛ hãa mileɔ yɛ Yehowa he?’a

8. Kɛ́ wɔkase Yehowa he nii ni wɔbale lɛ jogbaŋŋ lɛ, te wɔnuɔ he wɔhãa tɛŋŋ? (Lala 73:​24-28)

⁸ Be ni wɔyaa nɔ wɔkaseɔ Yehowa he nii ni wɔbaleɔ lɛ jogbaŋŋ lɛ, naanyobɔɔ ni yɔɔ wɔ kɛ lɛ teŋ lɛ mli waa. Akɛ nɔkwɛmɔnɔ lɛ, kɛ́ onyiɛ gbɛjianɔ ni oto akɛ obaakane Biblia lɛ daa gbi lɛ sɛɛ, okwɛ JW Broadcasting nifeemɔi ni baa daa nyɔɔŋ nɔ lɛ eko, otee kpokpaa nɔ kpee loo kpokpaa wulu nɔ kpee lɛ, te no hãa onuɔ he ohãa tɛŋŋ yɛ Yehowa he? Bei pii lɛ, wɔnuɔ he akɛ, naanyobɔɔ ni yɔɔ wɔ kɛ wɔ-Tsɛ ni yɔɔ ŋwɛi lɛ teŋ lɛ mli ewa fe tsutsu lɛ. Mɛni hewɔ? Ejaakɛ wɔkaseɔ ehe nibii krokomɛi kɛfataa nɔ ni wɔle momo lɛ he, ni no tsirɛɔ wɔ ni wɔjieɔ eyi ni wɔdaa lɛ shi. Asaf susu bɔ ni Yehowa sumɔɔ lɛ waa lɛ he ni ewie akɛ: “Nyɔŋmɔ ji mitsui tɛsaa kɛ migbɛfaŋnɔ kɛmiiya naanɔ.” (Kanemɔ Lala 73:​24-28.) Nakai nɔŋŋ ji bɔ ni wɔ hu wɔnuɔ he. Be fɛɛ be ni wɔbaabɔ mɔdɛŋ ni wɔle Yehowa jogbaŋŋ fe bɔ ni wɔle lɛ lɛ, wɔnaa akɛ eji naanyo ni nɔ bɛ kwraa, ni no hãa wɔhiɛ sɔɔ naanyobɔɔ ni yɔɔ wɔ kɛ lɛ teŋ lɛ waa.

9. Kɛ́ bei pii lɛ, wɔjwɛŋɔ Yehowa he lɛ, mɛɛ yiŋ wɔbaakpɛ? Okɛ nɔkwɛmɔnɔ ko atsɔɔ mli.

⁹ Biblia lɛ kɛɔ wɔ akɛ, wɔjwɛŋ Yehowa he. (Abɛi 3:​5, 6) Mɛni no tsɔɔ? Nɔ ni etsɔɔ ji, esa akɛ wɔsusu nibii ni wɔkase yɛ ehe kɛ bɔ ni enuɔ he ehãa yɛ wɔnifeemɔi ahe lɛ ahe. Kɛ́ wɔfee nakai lɛ, no baahã wɔkpɛ yiŋ kpakpai. Naa nɔ ko ni baanyɛ awa wɔ ni wɔnu enɛ shishi: Bei pii lɛ, nyɛmimɛi pii kɛ amɛwumɛi loo amɛŋamɛi mfonirii maa okpɔlɔ ni amɛtaa sɛɛ yɛ amɛ-ɔfis lɛ nɔ loo amɛkɛwoɔ amɛwalɛtii loo pɛɛsii amli loo amɛfoŋ nɔ. No hãa amɛjwɛŋɔ amɛwumɛi lɛ loo amɛŋamɛi lɛ ahe daa, ni ekaiɔ amɛ akɛ amɛsumɔɔ amɛ waa. Ni no hewɔ lɛ, amɛkpɛɔ yiŋ ni baahã amɛwumɛi lɛ loo amɛŋamɛi lɛ aná miishɛɛ, ni amɛfeŋ nɔ ko ni baadɔ amɛ. Nakai nɔŋŋ kɛ́ wɔfɔɔ Yehowa hesusumɔ lɛ, ewaaa akɛ wɔbaakpɛ yiŋ ni baasa ehiɛ.—Lala 19:​13, 14.

10. Be ni wɔyaa nɔ wɔkaseɔ Yehowa he nii lɛ, mɛni no baahã wɔfee?

¹⁰ Yehowa bɔ wɔ tamɔ bɔ ni eyɔɔ lɛ, no hewɔ lɛ wɔbaanyɛ wɔkase lɛ. (1 Mo. 1:26) Be ni wɔyaa nɔ wɔkaseɔ Yehowa sui lɛ ahe nii lɛ, wɔbaana bɔ ni wɔbaafee wɔkase lɛ jogbaŋŋ. Enɛ ji nɔ ko ni woloŋmalɔi lɛ kɛ Farisifoi lɛ eyafeee. Amɛle Mla lɛ he saji fitsofitso. Shi Yesu kɛɛ, ‘amɛkuɔ amɛhiɛ amɛshwieɔ Mla lɛ mli nibii ni he hiaa titri lɛ anɔ, ni nomɛi ji jalɛsaneyeli kɛ mɔbɔnalɛ kɛ anɔkwayeli.’ (Mat. 23:23) Esaaa akɛ wɔfeɔ wɔnii tamɔ amɛ. Moŋ lɛ, esa akɛ wɔsusu nɔ ni mlai kɛ shishitoo mlai ni wɔkaseɔ yɛ Biblia lɛ mli lɛ hãa wɔleɔ yɛ Yehowa he lɛ he. Kɛ́ wɔfee nakai lɛ, no baahã wɔnyɛ wɔkase Yehowa.—1 Yoh. 4:​8, 11.

TE WƆBAAFEE TƐŊŊ WƆLE YEHOWA JOGBAŊŊ?

11. Namɔ tsɔɔ bo Yehowa he nii?

¹¹ Namɔ tsɔɔ bo Yehowa he nii? Kɛ́ ofɔlɔi ni tsɔɔ bo Yehowa he nii lɛ, ekolɛ amɛgba bo saji komɛi ni yɔɔ Biblia lɛ mli loo amɛtsɔɔ bo nibii ni ebɔ lɛ ekomɛi ahe nii ni no hã ona esui lɛ. Ni kɛ́ Yehowa Odasefoi lɛ ateŋ mɔ ko ni kɛ bo kase Biblia lɛ, ekolɛ ekɛ bo kase Oyi Aná Wala Kɛya Naanɔ! wolo lɛ. Eye ebua bo koni ojwɛŋ Biblia mli saji kɛ nibii ni Yehowa ebɔ lɛ ahe jogbaŋŋ ni no hã ona Yehowa sui fɛfɛji lɛ.b (Neh. 8:8; Bɔf. 14:17) He ni wɔshɛ nɛɛ, wɔbaasusu bɔ ni wɔbaafee wɔya nɔ wɔkase Yehowa he nii.

12-13. Kɛ́ wɔkane Biblia lɛ, mɛni wɔbaanyɛ wɔkase yɛ Yehowa he? Okɛ nɔkwɛmɔnɔ ko atsɔɔ mli. (Yeremia 39:​15-18) (Kwɛmɔ mfoniri lɛ hu.)

¹² Klɛŋklɛŋ lɛ, kɛ́ wɔkase Yehowa Wiemɔ lɛ, no baahã wɔle ehe saji krokomɛi. Bei komɛi lɛ, Biblia lɛ tsĩɔ Yehowa sui lɛ atã. (2 Mo. 34:​6, 7) Shi bei pii lɛ, Biblia lɛ wieɔ saji ni kɔɔ mɛi ahe kɛ yiŋ ni mɛi nɛɛ kpɛ lɛ ahe. Kɛ́ okane saji ni tamɔ nakai lɛ, susumɔ he jogbaŋŋ koni no ahã okase nɔ ko yɛ Yehowa he.

¹³ Hã wɔkɛ amaniɛ ni abɔ yɛ Yeremia 38:​6-13 lɛ afee enɛ he nɔkwɛmɔnɔ. Ŋmalɛ nɛɛ hãa wɔnaa akɛ, Ebed-melek, Etiopianyo lɛ, hã ajie gbalɔ Yeremia kɛje bu ko mli. Ŋwanejee ko bɛ he akɛ, kɛ́ okane sane nɛɛ, ewaaa akɛ obaana akɛ Ebed-melek kɛ ehe shã afɔle, efee ekãa, ni eyɛ suɔmɔ kɛhã Yehowa jálɔi, ni obaasumɔ ni okase lɛ. Shi ani oona Yehowa sui komɛi yɛ Ebed-melek sane lɛ mli? (Kanemɔ Yeremia 39:​15-18.) Akɛ nɔkwɛmɔnɔ lɛ, mɛni yɔɔ Yeremia 39:​15-18 lɛ mli ni hãa onaa akɛ Yehowa hiɛ sɔɔ nɔ ni wɔfeɔ wɔhãa lɛ lɛ, eyeɔ jalɛ sane loo ejieee nii amli? Mɛɛ Yehowa sui krokomɛi sane nɛɛ hãa onaa? Be fɛɛ be ni obaakane sane ko yɛ Nyɔŋmɔ Wiemɔ lɛ mli lɛ, kwɛmɔ akɛ mɛɛ Yehowa sui nakai sane lɛ hãa onaa, ni oda lɛ shi, ni ojie eyi yɛ nakai sui lɛ ahewɔ.

14. Mɛni hewɔ esa akɛ wɔná dekã kɛsusu nibii ni Yehowa ebɔ lɛ ahe jogbaŋŋ lɛ?

¹⁴ Nɔ ni ji enyɔ lɛ, kɛ́ wɔsusu nibii ni Yehowa ebɔ lɛ ahe jogbaŋŋ lɛ, ebaahã wɔkase Yehowa he nɔ ko. (Lala 145:​9, 10) No hewɔ lɛ, esaaa akɛ wɔkwɛɔ nibii ni Yehowa ebɔ lɛ kɛkɛ, moŋ lɛ, esa akɛ wɔsusu amɛhe jogbaŋŋ. Mɛi kɛ afii pii kaseɔ kooloi, tsei, kɛ adebɔɔ nibii krokomɛi ahe nii, shi amɛnaaa akɛ Nyɔŋmɔ ko yɛ, lɛ ebɔ nibii nɛɛ, ni eyɛ sui fɛfɛji. Bɔfo Paulo ŋma akɛ, Nyɔŋmɔ sui ni anaaa lɛ, “kɛjɛ jeŋbɔɔ mli beebe lɛ anaa faŋŋ, ejaakɛ atsɔɔ nibii ni efee lɛ anɔ ayɔseɔ enɛɛmɛi.” (Rom. 1:20) Atsɔɔ ŋmalɛ nɛɛ shishi yɛ Biblia ko mli akɛ, “mɔ ni jwɛŋɔ jogbaŋŋ lɛ baanyɛ ana Nyɔŋmɔ sui lɛ.” No hewɔ ni esa akɛ wɔná dekã kɛsusu nibii ni Yehowa efee ni yɔɔ naakpɛɛ lɛ ahe, ni wɔkwɛ akɛ mɛni amɛhãa wɔnaa yɛ Yehowa he lɛ.

15. Mɛni Patrick feɔ koni no ahã ele Yehowa jogbaŋŋ? Ni te bo hu obaafee tɛŋŋ ofee nɔ ko ni tamɔ nakai? (Kwɛmɔ mfoniri lɛ hu.)

¹⁵ Wɔteŋ mɛi babaoo yɛ maji wuji ni tsei kɛ kooloi pii bɛ amɛmli lɛ amli. Kɛ́ oyɛ maŋ ko ni tamɔ nɛkɛ mli lɛ, te obaafee tɛŋŋ otsɔ adebɔɔ nibii anɔ okase Yehowa he nii? Nyɛmi nuu ko ni atsɛɔ lɛ Patrick, ni yɔɔ Brazzaville, ni ji maŋ wulu ko ni yɔɔ Republic of the Congo lɛ mli lɛ wie akɛ: “Daa gbi lɛ, mibɔɔ mɔdɛŋ akɛ makwɛ nɔ ko ni Yehowa bɔ. Bei pii lɛ, minaa kooloi bibii tamɔ tsatsubii kɛ abɛi loo loofɔji bibii ni miitao niyenii loo he ni amɛbaafee amɛtsũ yɛ. Gbi ko lɛ, mina loofɔji ni amɛmiilo amɛtsũ. Amɛtaoɔ nibii ni sa yɛ akutso lɛ mli ni amɛkɛloɔ tsũ amɛhãa amɛbii bibii lɛ.” Shi Patrick kwɛɛɛ loofɔji nɛɛ kɛkɛ; ejwɛŋ Bɔlɔ lɛ he waa. Ewie akɛ: “Mina akɛ, Yehowa jwɛŋɔ ebɔɔ nii bibii lɛ po ahe. Enɛ wa mi ni mina akɛ, ejwɛŋɔ mi hu mihe, ni be fɛɛ be lɛ, ebaawa mi koni maná nibii ni he hiaa mi lɛ.”

16. Mɛni ye ebua Yesu mami Maria ni ebale Yehowa jogbaŋŋ? Ni mɛɛ gbɛ nɔ wɔbaanyɛ wɔkase lɛ? (Kwɛmɔ mfoniri lɛ hu.)

¹⁶ Nɔ ni ji etɛ lɛ, kɛ́ wɔsusu gbɛi srɔtoi anɔ ni Yehowa eye ebua wɔ lɛ he lɛ, ebaahã wɔle lɛ jogbaŋŋ. Nakai ji bɔ ni Yesu mami Maria fee. No mli lɛ, ele Yehowa jogbaŋŋ ni ‘ehiɛ eba nyam yɛ Yehowa hiɛ.’ (Luka 1:30) Shi be ko lɛ, Yehowa bi lɛ ni etsɔ e-Bi lɛ mami. Enɛ ji nɔ ko ni he hiaa waa ni efeemɔ bɛ mlɛo. Yehowa tsɔ bɔfo Gabriel kɛ Maria wekunyo Elizabet nɔ ehã ena akɛ, eheɔ lɛ eyeɔ ni ebaaye ebua lɛ. Sɛɛ mli lɛ, Maria susu nibii nɛɛ ni Yehowa fee kɛye ebua lɛ kɛ nɔ ni no hãa eleɔ yɛ Yehowa he lɛ ahe, ni ebana faŋŋ akɛ Yehowa yɛ hewalɛ waa, ekɛ mɛi fɛɛ yeɔ jogbaŋŋ, ni eshwɛɛɛ mɛi ni abuuu amɛ lɛ po ahe. (Luka 1:​46-55) Maria hiɛ sɔ nɔ ni Yehowa fee ehã lɛ lɛ. Be fɛɛ be ni Yehowa baaye ebua wɔ lɛ, efeɔ nakai “yɛ be ni sa mli,” ni wɔ hu wɔhiɛ sɔɔ waa. (Heb. 4:16) Kɛ́ Yehowa ye ebua bo lɛ, bi ohe akɛ: ‘Mɛɛ sui Yehowa ejie kpo etsɔɔ mi yɛ sane nɛɛ mli?’

WƆBAAYA NƆ WƆKASE YEHOWA HE NII

17-18. Mɛni hewɔ be fɛɛ be lɛ, nɔ ko kɛ̃ yɛ ni wɔbaanyɛ wɔkase yɛ Yehowa he lɛ?

¹⁷ Yɛ jeŋ hee lɛ mli lɛ, wɔbaakase Yehowa he nii babaoo. Ebaahã wɔ wolokpoi hei ni baahã wɔna bɔ ni esumɔɔ ni wɔhi shi wɔhã. (Kpo. 20:12) Agbɛnɛ hu, wɔkɛ nibii ni ebɔ lɛ baashãra jogbaŋŋ ni no baahã wɔkase ehe nii pii. (Yes. 11:​6-9) Wɔbaale ehe nibii hei hu. Akɛ nɔkwɛmɔnɔ lɛ, wɔbaana be ni eteɔ wɔnanemɛi kɛ wɔwekumɛi lɛ ashi lɛ. Kɛfata he lɛ, wɔbaana bɔ ni ebaafee eye ebua wɔ koni wɔye emuu.

¹⁸ Be fɛɛ be lɛ, nɔ ko kɛ̃ yɛ ni wɔbaanyɛ wɔkase yɛ Yehowa he. Eyɛ kɛjɛ naanɔ, no hewɔ lɛ, “eniiashishinumɔ lɛ, anyɛɛɛ shishi ana.” (Lala 90:2; 147:5) Wɔnyɛŋ wɔná wɔle “nitsumɔ ni anɔkwa Nyɔŋmɔ lɛ tsuɔ kɛjɛɔ shishijee kɛyaa naagbee lɛ.” (Jaj. 3:11) No hewɔ lɛ, ekɔɔɔ he eko afii abɔ ni wɔkɛhi anɔkwale lɛ mli lɛ, esa akɛ wɔya nɔ wɔkase wɔ-Tsɛ ni yɔɔ suɔmɔ lɛ he nii.