Yesaia Wolo Lɛ Mli Ŋmalɛi Lɛ Baanyɛ Ashɛje Omii

1-2. Kɛ́ wɔwerɛ ho wɔhe loo wɔhao lɛ, mɛɛ gbɛ nɔ Yehowa yeɔ ebuaa wɔ?

ŊƆƆ LƐ AKƐ, gbekɛ ko werɛ eho ehe ni eefó waa. Mɛni hewɔ ni ewerɛ eho ehe ni eefó lɛ? Ekolɛ, amɛmiifã kɛyahi he kroko ni no hewɔ lɛ, ebaashi enanemɛi lɛ ni enaŋ amɛ dɔŋŋ. Aloo ekolɛ, eyafeee nɔ ko jogbaŋŋ ni no ehã ewerɛ eho ehe lɛ. Mɛni nyɛ ni yɔɔ suɔmɔ lɛ baafee yɛ shihilɛ ni tamɔ nɛkɛ mli? Ebaafua ebi lɛ lɛ, ebaabi lɛ nɔ ni feɔ lɛ, ni ebaahã ele akɛ esumɔɔ esane waa.

² Yɛ Biblia lɛ mli lɛ, Yehowa kɛ ehe toɔ nyɛ ni yɔɔ suɔmɔ ni shɛjeɔ ebii amii lɛ he. Ewie akɛ: “Bɔ ni bi nyɛ shɛjeɔ ebi mii lɛ, nakai maya nɔ mashɛje nyɛmii.” (Yes. 66:13) Yehowa sumɔɔ wɔ kwraa fe wɔfɔlɔi. (Yes. 49:15) Ehã aŋmala saji yɛ e-Wiemɔ ni ji Biblia lɛ mli koni kɛ́ wɔwerɛ ho wɔhe loo wɔhao lɛ, amɛshɛje wɔmii ni amɛwo wɔ hewalɛ hu.—Rom. 15:4.

3. Mɛni he wɔbaasusu yɛ nikasemɔ nɛɛ mli?

³ Yehowa naawiemɔi pii yɛ Yesaia wolo lɛ mli ni baanyɛ ashɛje wɔmii. (Yes. 40:1) Be ko yɛ Yuda shikpɔŋ lɛ nɔ lɛ, Yehowa webii lɛ tsɔmɔ shihilɛi babaoo ni mli wawai amli. No hewɔ lɛ, Yehowa hã Yesaia ŋma wolo kɛshɛje amɛmii. Wɔ hu ŋmɛnɛ lɛ, wɔyɛ “bei krɛdɛi ni mli shihilɛ wa” amli, ni miishɛjemɔ he ehia wɔ. (2 Tim. 3:1) Yɛ wɔnikasemɔ nɛɛ mli lɛ, wɔbaasusu ŋmalɛi komɛi ni yɔɔ Yesaia wolo lɛ mli lɛ ahe. Ŋmalɛi nɛɛ baanyɛ ashɛje wɔmii ni amɛwo wɔ hewalɛ kɛ́ (1) wɔshihilɛ tsake be ni wɔkpaaa gbɛ, (2) wɔhenilee miiyi wɔ waa yɛ esha ko ni wɔfee be ko ni eho lɛ hewɔ, kɛ (3) be ni mɔ ko ni wɔsumɔɔ esane lɛ egbo.

KƐ́ WƆSHIHILƐ TSAKE BE NI WƆKPAAA GBƐ

4. Kɛ́ wɔshihilɛ tsake be ni wɔkpaaa gbɛ lɛ, te ekolɛ wɔbaanu he wɔhã tɛŋŋ?

⁴ Wɔshihilɛ baanyɛ atsake be ni wɔkpaaa gbɛ. (Jaj. 9:11; 1 Kor. 7:31) Hela baanyɛ amɔ wɔ, wɔhe baanyɛ afi wɔ, basabasafeemɔ baanyɛ aba he ni wɔyɔɔ lɛ, aloo abaanyɛ atsake nɔ ni wɔtsuɔ yɛ Yehowa sɔɔmɔ lɛ mli lɛ. Kɛ́ eba lɛ nakai lɛ, ebaanyɛ ehã wɔye wɔtsui loo wɔfee basaa. Ekolɛ wɔbaabi wɔhe akɛ: ‘Mɛni mafee?’ Be ni nyɛmi nuu ko ni atsɛɔ lɛ Joseph lɛ esɔmɔ yɛ Betel aaafee afii 17 sɛɛ lɛ, ahã eyasɔmɔ akɛ gbɛgbalɔ. Ewie akɛ: “Mifee basaa. No mli lɛ, mileee he ni miyaje shishi kɛjɛ loo nɔ ni baaba minɔ, ejaakɛ misɔmɔ yɛ Betel afii pii.” Kɛ́ wɔshihilɛ tsake be ni wɔkpaaa gbɛ lɛ, mɛɛ saji Yehowa ehã aŋma yɛ Yesaia wolo lɛ mli ni baanyɛ ashɛje wɔmii?

5. Yɛ Yesaia 42:16 lɛ, mɛni Yehowa ewo shi akɛ ebaafee ehã wɔ? (Kwɛmɔ mfoniri lɛ hu.)

⁵ Kanemɔ Yesaia 42:16. Yehowa ewo shi akɛ, ebaanyiɛ mɛi ni yɛ gbɛ ko nɔ lɛ amɛtamɔ shwilafoi lɛ ahiɛ kɛtsɔmɔ gbɛi ni amɛtsɔmɔ ko nɔ dã lɛ anɔ, ni ebaahã amɛhiɛ duŋ lɛ atsɔ la. Kɛ́ wɔshihilɛ tsake be ni wɔkpaaa gbɛ lɛ, ekolɛ wɔbaanu he tamɔ “shwilafoi” ni yaatsɔ ‘gbɛ ni nɔ ewo duŋ ni yɔɔ gɔŋ kɛ jɔɔ gɔŋ kɛ jɔɔ ni amɛtsɔko nɔ dã’ lɛ nɔ. Wɔbaanyɛ wɔnu he hu tamɔ nɔ ni wɔnyiɛ koo hayii ko mli ni wɔnaaa gbɛ ni esa akɛ wɔtsɔ nɔ. Shi Yehowa ewo shi akɛ, ekɔɔɔ he eko shihilɛ ni wɔkɛbaakpe lɛ, eshiŋ wɔ ni ebaatsɔɔ wɔ gbɛ hu. Ebaamɔ wɔnine mli ni enyiɛ wɔhiɛ kɛtsɔ duŋ lɛ mli, ni ehã gbɛ ni wɔnyiɛ nɔ lɛ nɔ akpɛ́. Agbɛnɛ hu, ebaahã gbɛ ni yɔɔ gɔŋ kɛ jɔɔ gɔŋ kɛ jɔɔ ni wɔnyiɛ nɔ lɛ afee trɛnɛɛ. Mɛɛ gbɛ nɔ ebaatsɔ efee enɛ? Ebaatsɔ e-Wiemɔ lɛ kɛ esafo lɛ nɔ ewo wɔ ŋaa kpakpa. (Lala 119:105; Yes. 30:21) Kɛfata he lɛ, ebaatsɔ wɔnyɛmimɛi lɛ anɔ eye ebua wɔ. No hewɔ lɛ, kɛ́ wɔshihilɛ tsake be ni wɔkpaaa gbɛ ni wɔleee gbɛ ni esa akɛ wɔtsɔ nɔ loo etamɔ nɔ ni gbɛ ni esa akɛ wɔnyiɛ nɔ lɛ nɔ nyiɛmɔ baawa po lɛ, wɔbaanyɛ wɔhe wɔye akɛ, Yehowa baaye abua wɔ. Mɛni hewɔ? Ejaakɛ esumɔɔ wɔ ni enuɔ bɔ ni wɔnuɔ he wɔhãa lɛ shishi.—Yes. 41:10; 1 Pet. 5:​6, 7.

6. Kɛ́ wɔshihilɛ tsake be ni wɔkpaaa gbɛ lɛ, mɛni esaaa akɛ wɔhiɛ kpaa nɔ kɔkɔɔkɔ?

⁶ Joseph, ni wɔtsĩ etã yɛ kuku ejwɛ lɛ mli lɛ wie bɔ ni Yehowa tsɔɔ akɛ esumɔɔ lɛ kɛ eŋa lɛ ehãa, kɛ bɔ ni eye ebua amɛ be ni amɛshi Betel lɛ he. Ewie akɛ: “Be ni wɔshiɔ Betel lɛ, wɔna akɛ Yehowa sumɔɔ wɔ, ni eye ebua wɔ. Etsɔ wɔnyɛmimɛi ni nɔ bɛ lɛ anɔ eye ebua wɔ. Ehã wɔná nibii ni he baahia wɔ lɛ, ni eshɛje wɔmii hu yɛ be ni sa mli, ni eeya nɔ eefee nakai lolo.” Bo hu kɛ́ oshihilɛ tsake be ni okpaaa gbɛ lɛ, ná ole akɛ, Yehowa baawaje bo ni etsɔɔ bo gbɛ kɛ́ etamɔ nɔ ni tsakemɔ lɛ naa wa po. (Yes. 54:10; 58:11) Joseph wie hu akɛ: “Misumɔɔ asafo lɛ lalai krokomɛi lɛ ekome ko waa. Emli wiemɔi lɛ eko kɛɛ, ‘Gbɔmɔ ko bɛ ni le wɔsɛɛ sane. Shi Nyɔŋmɔ kɛ mi yɛ; mitsui efaŋ.’a Yɛ anɔkwale mli lɛ, ekolɛ nibii eyaŋ lɛ bɔ ni wɔbaakpa gbɛ lɛ moŋ, shi sane ko yɛ ni tsakeee, no ji akɛ: Ekɔɔɔ he eko shihilɛ ni wɔkɛbaakpe lɛ, Yehowa shiŋ wɔ kɔkɔɔkɔ!”

KƐ́ WƆHENILEE MIIYI WƆ WAA YƐ ESHA KO NI WƆFEE BE KO NI EHO LƐ HEWƆ

7. Te mɛi komɛi ni fee esha be ko ni eho lɛ nuɔ he amɛhãa tɛŋŋ?

⁷ Kɛ́ wɔhã asafoŋ onukpai lɛ le esha ko ni yɔɔ hiɛdɔɔ ni wɔfee lɛ, amɛbaaye amɛbua wɔ ejaakɛ amɛsumɔɔ wɔ. No sɛɛ lɛ, wɔfeɔ bɔ fɛɛ bɔ ni wɔbaanyɛ koni wɔkayafee nakai esha lɛ ekoŋŋ. (Abɛi 28:13; Yak. 5:​14-16; 1 Yoh. 1:9) Kɛ́ Yehowa kɛ esha ni wɔfee lɛ ke wɔ lɛ, ekolɛ fɛɛ sɛɛ lɛ, wɔhenilee baaya nɔ ayi wɔ. Ekolɛ wɔbaakɛɛ wɔhe akɛ, ‘Nɔ ni mifee nɛɛ Yehowa kɛkeŋ mi kɔkɔɔkɔ.’ (2 Kor. 2:7) Naagba bɛ he akɛ wɔbaanu he nakai, ejaakɛ ebaawa waa akɛ wɔhiɛ baaje esha ni wɔfee be ko ni eho lɛ nɔ, ni ekolɛ no baahã wɔhenilee ayi wɔ be kpalaŋŋ. Maŋtsɛ David tsɔ shihilɛ ni tamɔ nakai mli; ewie akɛ: “Miwui lɛ amli ejɔɔɔ mi yɛ mihe esha lɛ hewɔ.” Ekɛfata he akɛ: “Mihe ejɔ ni mikumɔ kwraa.” (Lala 38:​3, 8) Kɛ́ nakai ji bɔ ni onuɔ he bei komɛi lɛ, no lɛ, ŋmalɛi komɛi ni yɔɔ Yesaia wolo lɛ mli lɛ baanyɛ ashɛje omii.

8-9. Mɛni Yesaia 1:18 lɛ hãa wɔnaa yɛ bɔ ni Yehowa kɛ eshai keɔ lɛ he?

⁸ Kanemɔ Yesaia 1:18. Kɛ́ Yehowa kɛ wɔhe eshai ke wɔ lɛ, ekɛkeɔ wɔ kwraa ni ekaiii dɔŋŋ. Ekɛ nɔkwɛmɔnɔ ko tsɔɔ mli yɛ Yesaia wolo lɛ mli. Ekɛɛ kɛ́ wɔhe eshai lɛ “tsuɔ tamɔ lá po,” ebaahã amɛyɛ “tamɔ snoo.” Kɛ́ nɔ ko ni tsuɔ tamɔ lá ka wɔtade yɛŋ mli lɛ, ejiemɔ bɛ mlɛo kwraa. Kɛ̃lɛ, Yehowa kɛɛ, kɛ́ wɔhe eshai lɛ tsuɔ tamɔ lá po lɛ, ebaahã amɛyɛ tamɔ snoo; ebaajie wɔhe eshai lɛ yɛ wɔhe kwraa, ni ebaafee tamɔ nɔ ni wɔfeko esha po.

⁹ Bɔ ni Yehowa fee enii ehã yɛ Maŋtsɛ David he be ni etɔ̃ tɔmɔi komɛi lɛ maa anɔkwa sane nɛɛ nɔ mi ehãa wɔ. Eyɛ mli akɛ Maŋtsɛ David fite gbãla, ni egbe gbɔmɔ moŋ, shi be ni etsake etsui lɛ, Yehowa kɛ ehe ke lɛ. Sɛɛ mli lɛ, ewie akɛ David kɛ tsui krɔŋŋ já lɛ. (2 Sam. 11:​3, 4, 14, 15; 12:13; 1 Maŋ. 9:​4, 5) Kɛ́ David ba Yehowa jwɛŋmɔ mli lɛ, nɔ ni ekaiɔ ji bɔ ni eye lɛ anɔkwa lɛ, shi jeee etɔmɔi lɛ. Nakai nɔŋŋ wɔ hu kɛ́ wɔfee esha ni wɔtsake wɔtsui lɛ, Yehowa kɛkeɔ wɔ, ni eyeɔ ebuaa wɔ ni wɔya nɔ wɔsɔmɔ lɛ kɛ henilee ni he tse. Mɛni ekoŋŋ awie yɛ Yesaia wolo lɛ mli ni baanyɛ ashɛje wɔmii kɛ́ wɔhenilee miiyi wɔ waa yɛ esha ko ni wɔfee be ko ni eho lɛ hewɔ?

10. Mɛɛ sane ni shɛjeɔ mɔmii waa wɔbaanyɛ wɔna yɛ Yesaia 38:17?

¹⁰ Kanemɔ Yesaia 38:17 kɛ shishigbɛ niŋmaa. Abaanyɛ atsɔɔ wiemɔ ni ji “oshɛrɛ mihe eshai lɛ fɛɛ oshwie osɛɛ” lɛ shishi hu akɛ, “ojie mihe eshai lɛ fɛɛ kɛje ohiɛ.” Yɛ ŋmalɛ nɛɛ mli lɛ, wɔnaa akɛ, kɛ́ mɔ ko ni efee esha lɛ tsake etsui lɛ, Yehowa shɛrɛɔ mɔ lɛ he eshai lɛ eshwieɔ he ko ni enaŋ loo ejwɛŋmɔ baŋ nɔ dɔŋŋ. Wolo ko tsɔɔ wiemɔ nɛɛ shishi akɛ: “Ohã efee tamɔ nɔ ni mifeko esha ko.” Enɛ tsɔɔ akɛ, kɛ́ Yehowa kɛ wɔhe eshai ke wɔ lɛ, enaa wɔ tamɔ nɔ ni wɔfeko esha ko. No hewɔ lɛ, egbalaaa wɔtoi yɛ he ejaakɛ ekaiii dɔŋŋ. Ewo shi akɛ, ‘ekaiŋ wɔhe eshai lɛ dɔŋŋ.’ (Yes. 43:25) Enɛ shɛjeɔ mɔmii waa, aloo jeee nakai? Kɛ́ Yehowa, Kojolɔ Ni Fe Fɛɛ lɛ, kaiii wɔhe eshai lɛ, no lɛ, esa akɛ wɔ hu wɔjie yɛ wɔjwɛŋmɔ mli, ni esaaa akɛ wɔhãa wɔhenilee yiɔ wɔ yɛ he.

11. Mɛni Yehowa kɛ ejwɛŋmɔ maa nɔ ekɔɔɔ he eko eshai ni wɔfee be ko ni eho? (Kwɛmɔ mfoniri lɛ hu.)

¹¹ Kɛ́ wɔhenilee yi wɔ waa yɛ esha ko ni wɔfee be ko ni eho lɛ he lɛ, esa akɛ wɔkai shi ni Yehowa ewo wɔ lɛ. Kɛ́ ekɛ wɔhe eshai ke wɔ lɛ, ekɛke wɔ kwraa. Yehowa enaaa wɔ akɛ mɛi ni hiɛ eshwie shi yɛ esha ko ni wɔfee be ko ni eho lɛ hewɔ, ni efeee enii tamɔ adesai ni yeee emuu ni bɛɔ mɔ amɛwoɔ amɛmli lɛ. (Yes. 57:16) Jeee bɔ ni wɔji be ko ni eho lɛ he hiaa Yehowa, moŋ lɛ, nɔ titri ni he hiaa lɛ ji bɔ ni wɔji bianɛ kɛ nɔ gbɔmɛi ni wɔmiibɔ mɔdɛŋ ni wɔtsɔmɔ wɔsɛɛ lɛ. (Yes. 55:7) Yehowa sumɔɔ wɔ waa, ni eesumɔ ni ekɛ wɔhe ake wɔ kɛ́ wɔtɔ̃. No hewɔ lɛ, nyɛhãa wɔkaia bɔ ni Yehowa sumɔɔ wɔ lɛ, ni wɔkahã tɔmɔi komɛi ni wɔtɔ̃ be ko ni eho lɛ hã wɔmiishɛɛ tã loo ehã wɔkpa Yehowa sɔɔmɔ ni no hã naanɔ wala ŋmɛɛ wɔ.

BE NI MƆ KO NI WƆSUMƆƆ ESANE EGBO

12. Kɛ́ mɔ ko ni wɔsumɔɔ esane gbo lɛ, te ekolɛ wɔbaanu he wɔhã tɛŋŋ?

¹² Kɛ́ mɔ ko ni wɔsumɔɔ esane gbo lɛ, wɔwerɛ hoɔ wɔhe ni edɔɔ wɔ waa, ni ekolɛ wɔbaanu he nakai be kpalaŋŋ. Bei komɛi lɛ, ekolɛ wɔbaabi wɔhe akɛ, ‘Mɛni hewɔ Yehowa ŋmɛ gbɛ ni egbo?’ Nyɛmi nuu ko ni atsɛɔ lɛ Michael lɛ nu he nakai be ni la shã efɔlɔi ni amɛgboi lɛ. Ewie akɛ: “Mitsui kumɔ, ni mimli fu Yehowa waa akɛ eŋmɛ gbɛ ni amɛgboi. Mile akɛ jeee lɛ ehã amɛgboi moŋ, shi esaaa naa hu.” Ekolɛ bo hu onu he tamɔ bɔ ni enu he lɛ pɛŋ. Mɛni Yehowa efee koni ekɛshɛje wɔmii ni wɔná hiɛnɔkamɔ kɛ́ mɔ ko ni wɔsumɔɔ esane gbo?

13. Mɛɛ shi Yehowa ewo wɔ yɛ Yesaia 25:8 lɛ?

¹³ Kanemɔ Yesaia 25:8. Yehowa ewo shi akɛ, “ebaami gbele kɛbaaya naanɔ.” Feemɔ ohe mfoniri ni oyɛ jeŋ hee lɛ mli ni mɔ ko mɔ ko gbooo dɔŋŋ. Nakai be lɛ mli lɛ, mɔ ko ni osumɔɔ esane gboŋ ni baahã oye awerɛho. (Yes. 35:10) Ebaŋ lɛ akɛ obaana ni akɛ mɔ ko ni osumɔɔ esane lɛ ewo adeka mli ni akɛ lɛ miiwo gbonyo bu mli ni no hewɔ lɛ owerɛ eho ohe waa. Moŋ lɛ, obaaná hiɛnɔkamɔ akɛ, mɛi ni osumɔɔ amɛsane lɛ baaná gbɔmɔtsoŋ hewalɛ kpakpa, ni okɛ amɛ baahi shi kɛya naanɔ. Enɛ jeee sanehewoo. Eji nɔ ko ni baaba mli lɛɛlɛŋ, ejaakɛ Yehowa ni wo shi nɛɛ, ni lɛ pɛ ji mɔ ni baanyɛ ahã eba mli.—Kpo. 21:​4, 5.

14. Kɛ́ ofee gbohiiashitee lɛ he mfoniri lɛ, te ehãa onuɔ he ohãa tɛŋŋ? (Yesaia 26:19) (Kwɛmɔ mfoniri lɛ hu.)

¹⁴ Kanemɔ Yesaia 26:19. Jeee gbele sɛɛ pɛ kɛkɛ Yehowa baafo, shi moŋ ebaahã mɛi ni wɔsumɔɔ amɛsane ni egboi lɛ aba wala mli ekoŋŋ. Naa nɔ ni ewie yɛ mɛi ni egboi lɛ ahe. Ewie akɛ: “Migbohii lɛ baate shi.” Enɛ tsɔɔ akɛ, Yehowa naa amɛ akɛ enii, ehiɛ kpaŋ amɛnɔ, ni yɛ ebe ni eto lɛ mli lɛ, ebaatee amɛ shi kɛba wala mli. Bɔ ni nu hãa tsei ni egboi lɛ tsɛ̃ɔ ekoŋŋ lɛ, nakai nɔŋŋ Yehowa, Wala Fɛɛ Jɛɛhe lɛ, baatsĩɛ mɛi ni wɔsumɔɔ amɛsane ni egboi lɛ ahiɛ kɛba wala mli ekoŋŋ. Kwɛ bɔ ni wɔmii baashɛ wɔhe waa wɔhã be ni wɔhereɔ amɛ atuu lɛ!—Okɛto Marko 5:42 lɛ he.

15. Kɛ́ mɔ ko ni wɔsumɔɔ esane gbo lɛ, mɛɛ gbɛ nɔ shi ni Yehowa ewo akɛ ebaatee gbohii ashi lɛ shɛjeɔ wɔmii?

¹⁵ Eyɛ mli akɛ wɔheɔ shi ni Nyɔŋmɔ ewo akɛ ebaatee gbohii ashi lɛ wɔyeɔ moŋ, shi kɛ́ mɔ ko ni wɔsumɔɔ esane lɛ gbo lɛ, edɔɔ wɔ waa. Shi wɔle akɛ Yehowa hiɛ kpako amɛnɔ, ni enɛ shɛjeɔ wɔmii waa. Hiɛnɔkamɔ nɛɛ shɛje Michael ni wɔtsĩ etã yɛ kuku 12 lɛ mli lɛ mii. Ewie akɛ: “Yesaia 26:19 lɛ ye ebua mi ni mina akɛ Yehowa shwɛɛɛ mifɔlɔi lɛ ahe kwraa. Ehiɛ kpaŋ amɛnɔ, ni ebaatee amɛ shi wɔsɛɛ. Enɛ woɔ mi hewalɛ ni eshɛjeɔ mimii.” No hewɔ lɛ, ehi waa akɛ yɛ be kɛ beiaŋ lɛ, wɔbaafee gbohiiashitee lɛ he mfoniri yɛ wɔjwɛŋmɔ mli. Kɛ́ wɔfee nakai lɛ, ebaashɛje wɔmii.

16. Kɛ́ oyaje shihilɛ ko ni mli wa mli lɛ, mɛɛ ŋmalɛ ona akɛ eshɛjeɔ omii?

¹⁶ Yɛ nikasemɔ nɛɛ mli lɛ, wɔna ŋmalɛi fioo komɛi yɛ Yesaia wolo lɛ mli ni baanyɛ ashɛje wɔmii kɛ́ wɔshihilɛ tsake be ni wɔkpaaa gbɛ, wɔhenilee miiyi wɔ waa yɛ esha ko ni wɔfee be ko ni eho lɛ hewɔ, kɛ be ni mɔ ko ni wɔsumɔɔ esane lɛ egbo. Eŋɔɔ wɔnaa waa akɛ Yehowa tsɔɔ Biblia lɛ nɔ eshɛjeɔ wɔmii! (Lala 94:19) Ani oyɛ ŋmalɛ ko ni ona akɛ eshɛjeɔ omii kɛ́ ohao? Kɛ́ nakai lɛ, kpe owo oyitsoŋ loo ŋmaa owo wolo ko nɔ ni okɛkpɛtɛ he ko ni ewaaa akɛ obaana. Eba akɛ, wiemɔi nɛɛ ni jɛ Yehowa, wɔ-Tsɛ ni yɔɔ ŋwɛi ni sumɔɔ wɔ lɛ, ŋɔɔ lɛ baaya nɔ ashɛje omii.