Okɛ Biblia Mli Shishitoo Mlai Atsɔse Ohenilee

1-2. (a) Mɛɛ nikeenii Yehowa kɛdro Adam kɛ Hawa? (b) Mɛni kulɛ esa akɛ amɛfee kɛtsɔɔ akɛ amɛhiɛ sɔɔ nikeenii nɛɛ?

YEHOWA edro adesai fɛɛ nikeenii ko ni nɔ bɛ, ni wɔ akɛ anɔkwa Kristofoi lɛ, wɔshwɛɛɛ nikeenii nɛɛ he kwraa. Ani ole nɔ ni ji? No ji, heyeli. Heyeli nɛɛ hewɔ lɛ, wɔ diɛŋtsɛ wɔnyɛɔ wɔkpɛɔ wɔyiŋ yɛ saji ahe. Wɔtamɔɔɔ kooloi; amɛ lɛ, amɛsusuuu nii ahe dani amɛfeɔ. Ni wɔtamɔɔɔ robɔt ni atsɔɔ lɛ nɔ ni esa akɛ efee. Biblia lɛ kɛɛ, Yehowa fee gbɔmɔ tamɔ bɔ ni eyɔɔ lɛ, ni tsɔɔ akɛ, Yehowa bɔ Adam kɛ Hawa bɔ ni amɛ diɛŋtsɛ amɛbaanyɛ amɛkpɛ amɛyiŋ yɛ saji ahe.—1 Mo. 1:​26, 27.

² Yehowa wooo Adam kɛ Hawa mlai pii. Nɔ pɛ ni ekɛɛ amɛ ji, amɛfɔ ni amɛyi shikpɔŋ lɛ nɔ obɔ ni amɛkwɛ nɔ, ni agbɛnɛ hu, amɛbu hegbɛ ni eyɔɔ akɛ etsɔɔ amɛ nɔ ni amɛbaanyɛ amɛfee kɛ nɔ ni amɛnyɛŋ amɛfee. (1 Mo. 1:28; 2:​16, 17) Mɛni kulɛ Adam kɛ Hawa baanyɛ afee kɛtsɔɔ akɛ amɛhiɛ sɔɔ Yehowa, mɔ ni dro amɛ nikeenii ni ji heyeli lɛ? Kulɛ esa akɛ amɛjɛ amɛtsuiŋ fɛɛ amɛbo famɔ ni waaa ni ekɛhã amɛ lɛ toi. No baatsɔɔ akɛ amɛsumɔɔ Yehowa, ni amɛsumɔɔɔ ni amɛbaafee nɔ ko ni hãŋ ená miishɛɛ. Kɛfata he lɛ, ebaatsɔɔ akɛ amɛhiɛ sɔɔ nɔ fɛɛ nɔ ni Yehowa efee ehã amɛ lɛ.—Abɛi 23:15.

3. Te Adam kɛ Hawa kɛ hegbɛ ni amɛyɔɔ akɛ amɛbaakpɛ amɛyiŋ yɛ saji ahe lɛ tsu nii amɛhã tɛŋŋ?

³ Tamɔ Biblia lɛ ehã wɔle lɛ, Adam kɛ Hawa kɛ hegbɛ ni amɛyɔɔ akɛ amɛbaakpɛ amɛyiŋ yɛ saji ahe lɛ eyatsuuu nii jogbaŋŋ. Amɛkpɛ amɛyiŋ akɛ amɛbaagbo Yehowa nɔ toi. Amɛfee nakai, ejaakɛ amɛsumɔɔ amɛ diɛŋtsɛ amɛhe fe Yehowa. (1 Mo. 3:​1-7) Yiŋ gbonyo ni amɛkpɛ nɛɛ hewɔ adesai kɛ naagbai kpeɔ lɛ.—Rom. 5:12.

4. (a) Yɛ nɔ ni aŋma yɛ Galatiabii 6:5 lɛ naa lɛ, mɛni esa akɛ wɔ fɛɛ wɔfee? (b) Mɛɛ nikeenii kroko wɔbaasusu he yɛ nikasemɔ nɛɛ mli?

⁴ Daa gbi lɛ, ehe bahiaa ni wɔteŋ mɔ fɛɛ mɔ akpɛ eyiŋ yɛ saji pii ahe. Biblia lɛ tsɛ enɛ akɛ jatsu ni esa akɛ mɔ fɛɛ mɔ atere. (Kanemɔ Galatiabii 6:5.) Saji lɛ ekomɛi yɛ ni ewaaa kɛhãaa wɔ akɛ wɔbaakpɛ wɔyiŋ yɛ he, shi ekomɛi hu yɛ ni ewaa waa kɛhãa wɔ. Mɛni baaye abua wɔ ni kɛ́ wɔkɛ shihilɛi nɛɛ eko kpe lɛ, wɔnyɛ wɔkpɛ yiŋ ni baasa Yehowa hiɛ? Esa akɛ wɔkpɛlɛ nɔ akɛ ja Yehowa eye ebua wɔ dani wɔbaanyɛ wɔkpɛ yiŋ ni baasa ehiɛ. (Abɛi 16:3; Yer. 10:23) Yesu ni eye emuu lɛ po sɔle ebi Yehowa ni eye ebua lɛ. (Heb. 5:7) Enyiɛ nɔŋŋ wɔ ni wɔyeee emuu? Anɔkwa, Yehowa yelikɛbuamɔ he miihia wɔ kwraa fe bɔ ni ehe hiaa Yesu. Yɛ hegbɛ ni wɔyɔɔ akɛ wɔ diɛŋtsɛ wɔkpɛɔ wɔyiŋ yɛ saji ahe lɛ sɛɛ lɛ, Yehowa edro wɔ nikeenii kroko, ni no ji, henilee. No hewɔ lɛ, he ni wɔshɛ lɛ, wɔbaasusu bɔ ni wɔhenilee lɛ baaye abua wɔ ni wɔkpɛ yiŋ kpakpai.

MƐNI JI HENILEE?

5. (a) Mɛni ji henilee? (b) Mɛɛ gbɛ nɔ wɔhenilee lɛ baanyɛ aye abua wɔ? (Romabii 2:​14, 15)

⁵ Yehowa hã adesai fɛɛ, ni mɛi ni leee emlai lɛ po fata he lɛ, henilee. Henilee ji henumɔ ko ni hãa wɔleɔ nɔ ni ja kɛ nɔ ni ejaaa. (2 Kor. 4:2) Wɔhenilee lɛ tamɔ kojolɔ; kɛ́ wɔsusu nɔ ko ni ehiii he loo wɔfee nɔ ko ni ehiii lɛ, ebuɔ wɔ fɔ. Shi kɛ́ nɔ ni wɔsusuɔ he lɛ loo nɔ ni wɔfeɔ lɛ hi lɛ, ebuɔ wɔ bem. (Kanemɔ Romabii 2:​14, 15.) Wɔhenilee lɛ bɔɔ wɔ kɔkɔ koni wɔkafee nɔ ko ni wɔle akɛ ejaaa. (1 Sam. 26:​8-11) Ni ebaanyɛ etsirɛ wɔ ni wɔfee nibii ni wɔle akɛ eja. Hegbɛ ni wɔyɔɔ akɛ wɔ diɛŋtsɛ wɔbaakpɛ wɔyiŋ yɛ saji ahe lɛ pɛ kɛkɛ etsɔɔɔ akɛ kɛ́ wɔkpɛ yiŋ ko lɛ, ebaasa Yehowa hiɛ. Wɔhenilee lɛ baanyɛ aye abua wɔ ni wɔna kɛji yiŋ ko ni wɔkpɛ lɛ ja loo ejaaa.

6. Mɛni hewɔ bei komɛi lɛ wɔhenilee lɛ nyɛɛɛ aye abua wɔ lɛ?

⁶ Shi dɔlɛ sane ji, akɛni wɔyeee emuu hewɔ lɛ, wɔhenilee lɛ hu yeee emuu, ni no hewɔ lɛ, jeee be fɛɛ be eyeɔ ebuaa wɔ. Akɛ nɔkwɛmɔnɔ lɛ, weku mli ni wɔjɛ, maŋ nɔ ni wɔda yɛ, loo nibii gbohii ni wɔshweɔ lɛ baanyɛ asa wɔhenilee lɛ he ni ehãŋ etsu nii jogbaŋŋ. Biblia lɛ wie akɛ, henilee lɛ eko yɛ ni “he waaa,” “abule,” ‘ehe eshã tamɔ akɛ dade ni edɔ ekadi he,’ loo akɛ, eji “henilee fɔŋ.” (1 Kor. 8:12; Tito 1:15; 1 Tim. 4:2; Heb. 10:22) Kɛ́ nɛkɛ ji bɔ ni wɔhenilee lɛ yɔɔ lɛ, no lɛ, enyɛŋ eye ebua wɔ ni wɔkpɛ yiŋ kpakpai. Etamɔ watsi ko ni ekpe sɛɛ ni no hewɔ lɛ ehe baahia ni atsi kɛyafɔ he ni esa akɛ ekã lɛ. Bɔ ni afee ni ekaba lɛ nakai lɛ, esa akɛ wɔya nɔ wɔfee nibii ni baahã wɔhenilee lɛ atsu nii jogbaŋŋ. (1 Pet. 3:16) Mɛɛ gbɛ nɔ wɔbaanyɛ wɔtsɔ wɔfee nakai?

BƆ NI WƆBAAFEE WƆTSƆSE WƆHENILEE

7-8. (a) Mɛni baaye abua wɔ ni wɔtsɔse wɔhenilee? (b) Mɛɛ gbɛ nɔ Biblia mli shishitoo mlai tsɔɔ wɔ gbɛ? Okɛ nɔkwɛmɔnɔ ko atsɔɔ mli. (Kwɛmɔ mfoniri lɛ hu.)

⁷ Te wɔbaafee tɛŋŋ wɔtsɔse wɔhenilee lɛ? Esa akɛ wɔkane Biblia lɛ daa, ni wɔjwɛŋ nɔ koni wɔna nɔ ni sa Yehowa hiɛ kɛ nɔ ni esaaa ehiɛ. Kɛ́ wɔkase mlai ni Nyɔŋmɔ ewo lɛ, ebaaye ebua wɔ ni wɔna esusumɔ yɛ saji ahe. Shi tamɔ wɔna yɛ nikasemɔ ni tsɔ hiɛ lɛ mli lɛ, awoko mlai yɛ shihilɛ fɛɛ shihilɛ he. Enɛ hewɔ lɛ, esa akɛ wɔtao shishitoo mlai ni hɔ mlai ni Yehowa ewo lɛ asɛɛ, ejaakɛ no baaye abua wɔ ni wɔna esusumɔ yɛ saji ahe jogbaŋŋ, ni wɔna bɔ ni enuɔ he ehãa.—Yes. 55:9.

⁸ Hã wɔkɛ nɔkwɛmɔnɔ ko atsɔɔ naa. Ŋɔɔ lɛ akɛ oofã gbɛ kɛmiitsɔ ŋa kpataa ko ni agbáko gbɛ ko kwraa yɛ nɔ lɛ nɔ, ni okadii ni baatsɔɔ bo he ni otsɔ lɛ hu eko bɛ nɔ. Kɛ́ okwɛ lɛ, mɛni baaye abua bo ni oyashɛ he ni oyaa lɛ shweshweeshwe? Ekã shi faŋŋ akɛ, kɛ́ ohiɛ map ni tsɔɔ bo nibii pɔtɛɛ komɛi ni okɛbaakpe yɛ gbɛ lɛ nɔ lɛ, ebaaye ebua bo ni ona kɛji gbɛ lɛ nɔŋŋ nɔ onyiɛ lɛ loo olaaje. Wɔbaanyɛ wɔkɛ Yehowa suɔmɔnaa nii ni wɔbaafee lɛ ato gbɛfãa he. Biblia lɛ ji nakai map lɛ ni baaye abua wɔ ni wɔyashɛ he ni wɔyaa lɛ shweshweeshwe. Ni Biblia mli shishitoo mlai lɛ tamɔ nibii ni map lɛ tsɔɔ akɛ wɔbaana yɛ gbɛ lɛ nɔ lɛ. Kɛ́ wɔhã Biblia mli shishitoo mlai kudɔ wɔ lɛ, wɔbaanyɛ wɔná nɔmimaa akɛ wɔnyiɛ gbɛ lɛ nɔ, ni tsɔɔ akɛ, wɔmiifee nɔ ni Yehowa sumɔɔ.

9. Mɛɛ nɔ kroko baaye abua wɔ ni wɔtsɔse wɔhenilee lɛ jogbaŋŋ? (Romabii 9:1)

⁹ Nɔ kroko ni baaye abua wɔ ni wɔtsɔse wɔhenilee lɛ jogbaŋŋ ji, Nyɔŋmɔ mumɔ krɔŋkrɔŋ lɛ. (Kanemɔ Romabii 9:1.) Mumɔ krɔŋkrɔŋ lɛ baaye abua wɔ ni wɔna Yehowa susumɔ yɛ saji ahe. Kɛfata he lɛ, ebaanyɛ ekanya wɔ, ni agbɛnɛ hu, ehã wɔ hewalɛ koni wɔnyɛ wɔfee nibii ni sa Yehowa hiɛ. (Fip. 2:13) Shi mɛni kɛ́ wɔfee lɛ, ebaahã mumɔ krɔŋkrɔŋ lɛ aye abua wɔ?

10. Mɛni kɛ́ wɔfee lɛ, ebaahã mumɔ krɔŋkrɔŋ lɛ aye abua wɔ? (Luka 11:​10, 13)

¹⁰ Sɔlemɔ ni Yehowa ahã bo emumɔ krɔŋkrɔŋ lɛ. (Kanemɔ Luka 11:​10, 13.) Wɔbaanyɛ wɔhe wɔye akɛ, kɛ́ wɔbi Yehowa ni ehã wɔ emumɔ krɔŋkrɔŋ lɛ, ebaahã wɔ aahu. (Yoh. 3:34) Anɔkwa, be fɛɛ be ni mɔ ko ni feɔ Yehowa suɔmɔnaa nii lɛ baabi lɛ ni ehã lɛ emumɔ krɔŋkrɔŋ lɛ, ebaajɛ etsui mli ehã lɛ. (Abɛi 1:23; Yak. 1:5) Shi mɛɛ nɔ kroko hu baaye abua wɔ ni wɔtsɔse wɔhenilee lɛ?

11. (a) Mɛni esa akɛ wɔhã ehe ahia wɔ fe nɔ fɛɛ nɔ yɛ wɔshihilɛ mli? (b) Mɛni hewɔ ehe miihia waa ni wɔtsɔse wɔhenilee lɛ koni etsu nii jogbaŋŋ?

¹¹ Bɔɔ mɔdɛŋ akɛ obaafee nɔ ni sa Yehowa hiɛ be fɛɛ be. (Abɛi 8:​34, 35) Esa akɛ wɔhã Yehowa suɔmɔnaa nii ni wɔbaafee lɛ he ahia wɔ fe nɔ fɛɛ nɔ yɛ wɔshihilɛ mli. Kɛ́ wɔhã enɛ hi wɔjwɛŋmɔ mli yɛ shihilɛ fɛɛ shihilɛ ni wɔkɛbaakpe lɛ mli lɛ, no baahã wɔtsɔse wɔhenilee lɛ jogbaŋŋ. Kɛ́ wɔsusumɔ yɛ saji ahe lɛ kɛ Yehowa nɔ lɛ kpãa gbee, ni agbɛnɛ hu, wɔsumɔɔɔ ni wɔfeɔ nɔ ko ni baahã ewerɛ aho ehe lɛ, no tsɔɔ akɛ wɔhenilee lɛ miitsu nii jogbaŋŋ. Kɛ́ wɔkwɛ bɔ ni je lɛ shihilɛ efee ahuntoo lɛ, ehãa wɔnaa akɛ, ehe miihia ni wɔtsɔse wɔhenilee lɛ koni etsu nii jogbaŋŋ. Daa gbi lɛ, wɔkpɛɔ yiŋ yɛ saji komɛi ni Biblia lɛ ejeko gbɛ ewieko nɔ ko pɔtɛɛ yɛ he lɛ ahe. Akɛ nɔkwɛmɔnɔ lɛ, ehe bahiaa ni wɔkpɛ wɔyiŋ yɛ nibii ni wɔbaafee kɛjie wɔhiɛtserɛ, nitsumɔ ni wɔbaatsu, skul abɔ ni wɔbaaya, kɛ mɛi ni wɔkɛbaabɔ naanyo lɛ ahe. Te wɔbaafee tɛŋŋ wɔle akɛ yiŋ ni wɔkpɛɔ yɛ saji nɛɛ ahe lɛ sa Yehowa hiɛ lɛ?—2 Kor. 1:12.

12. Mɛni baaye abua wɔ ni wɔna kɛji wɔhenilee miitsu nii jogbaŋŋ loo etsuuu nii jogbaŋŋ? (Efesobii 5:10)

¹² Jwɛŋmɔ nibii ni okaneɔ yɛ Biblia lɛ mli lɛ anɔ. (Lala 49:3) Kɛ́ wɔkane Biblia lɛ, esa akɛ wɔtao shishitoo mlai ni yɔɔ mli ni baaye abua wɔ ni wɔna Yehowa susumɔ yɛ saji ahe. (Kanemɔ Efesobii 5:10.) Shishitoo mlai nɛɛ baaye abua wɔ ni wɔna kɛji wɔhenilee lɛ miiye eebua wɔ ni wɔkpɛ yiŋ kpakpai yɛ saji ni mli wala ni ehe bahiaa ni wɔkpɛ wɔyiŋ yɛ he lɛ ahe. (Abɛi 2:​4-9, 11-13) Kɛfata he lɛ, ebaaye ebua wɔ ni wɔtsɔse wɔhenilee lɛ koni etsu nii jogbaŋŋ, ni wɔfee nibii ni Yehowa sumɔɔ.—Heb. 5:14.

13. Kɛ́ wɔyaakpɛ yiŋ yɛ sane ko he lɛ, mɛni esaaa akɛ wɔfeɔ? Okɛ enɛ he nɔkwɛmɔnɔ ahã.

¹³ Kaakpɛ yiŋ yɛ sane ko he dani sɛɛ mli lɛ, otao Yehowa susumɔ yɛ nakai sane lɛ he. Be ni akpãtã Yerusalem hiɛ yɛ afi 607 D.Ŋ.B. lɛ sɛɛ lɛ, Israelbii ni shwɛ yɛ Yuda maŋ lɛ mli lɛ yakɛɛ Yeremia akɛ: “Yehowa, o-Nyɔŋmɔ lɛ atsɔɔ wɔ gbɛ ni wɔnyiɛ nɔ, kɛ nɔ ni esa akɛ wɔfee.” (Yer. 42:​3-6) Shi no mli lɛ, amɛkpɛ amɛyiŋ yɛ nɔ ni amɛbaafee lɛ he momo. Be ni gbɛtsɔɔmɔ ni Yehowa kɛhã amɛ lɛ kɛ yiŋ ni amɛkpɛ lɛ kɔɔɔ lɛ, amɛbooo Yehowa toi. Moŋ lɛ, amɛtee nɔ amɛfee nɔ ni amɛkpɛ amɛyiŋ akɛ amɛbaafee lɛ. Enɛ hã amɛkɛ naagbai babaoo kpe. (Yer. 42:​19-22; 43:​1, 2, 4) Esaaa akɛ wɔfeɔ wɔnii tamɔ Israelbii nɛɛ. No hewɔ lɛ, kɛ́ wɔyaakpɛ yiŋ ko yɛ sane ko he lɛ, esa akɛ wɔtao Biblia mli shishitoo mlai ni baaye abua wɔ ni wɔna Yehowa susumɔ yɛ sane lɛ he, koni wɔdamɔ nɔ ni wɔna lɛ nɔ wɔkpɛ wɔyiŋ.

14. Mɛni hewɔ be fɛɛ be ni wɔbaakpɛ yiŋ yɛ sane ko he lɛ, esa akɛ wɔhã Biblia mli shishitoo mlai akudɔ wɔ lɛ?

¹⁴ Hã Biblia mli shishitoo mlai akudɔ bo be fɛɛ be ni obaakpɛ oyiŋ. (Mat. 7:​24-29; Yak. 1:​23-25) Kɛ́ wɔyaakpɛ yiŋ yɛ sane ko he ni wɔhã Biblia mli shishitoo mlai kudɔ wɔ lɛ, no tsɔɔ akɛ wɔmiihã mumɔ krɔŋkrɔŋ lɛ miitsɔɔ wɔ gbɛ. Kɛ́ Yehowa na akɛ wɔhãa emumɔ lɛ tsɔɔ wɔ gbɛ lɛ, be fɛɛ be ni wɔbaabi lɛ emumɔ lɛ, ekɛbaadro wɔ. (Bɔf. 5:32) Shi kɛ́ wɔhãaa Yehowa mumɔ lɛ akudɔ wɔ, loo wɔje gbɛ wɔfee nibii ni kɛ Biblia mli shishitoo mlai kpãaa gbee lɛ, wɔbaahã mumɔ krɔŋkrɔŋ lɛ ‘werɛ aho ehe.’ (Efe. 4:30; Yes. 63:10; Bɔf. 7:51) Kɛ́ wɔkwɛɛɛ ni ahi po lɛ, Yehowa baajie emumɔ lɛ yɛ wɔnɔ kwraa. (Lala 51:11; 1 Tes. 5:19) Yehowa mumɔ lɛ ni hiɛ wɔ, no hewɔ lɛ, kɛ́ ejie yɛ wɔnɔ lɛ, wɔgbe wɔjeŋ naa.—Efe. 3:16.

BƆ NI OBAAFEE ONA BIBLIA MLI SHISHITOO MLAI NI KƆƆ SANE KO HE

15-16. (a) Te obaafee tɛŋŋ ona Biblia mli shishitoo mlai? (b) Mɛɛ Biblia mli shishitoo mlai baanyɛ aye abua Biblia mli nikaselɔ ko ni ekpa shɛremɔ?

¹⁵ Taomɔ nii amli yɛ woji ni asafo lɛ efee lɛ amli. Dani wɔbaanyɛ wɔkɛ Biblia mli shishitoo mlai atsu nii jogbaŋŋ lɛ, esa akɛ wɔyɔse amɛ yɛ Biblia lɛ mli. Akɛ nɔkwɛmɔnɔ lɛ, ŋɔɔ lɛ akɛ o-Biblia mli nikaselɔ ko shɛreɔ ni esumɔɔɔ ni ekpaa. Ekolɛ kɛ́ okɛ lɛ wie he lɛ, ebiɔ bo akɛ, ‘Nɛgbɛ aŋma yɛ Biblia lɛ mli akɛ akashɛre?’ Te obaafee tɛŋŋ oye obua lɛ ni ena Biblia mli shishitoo mlai ni kɔɔ sane nɛɛ he ni ejwɛŋ nɔ? Yehowa asafo lɛ efee wolo ko, ni ji, Niiamlitaomɔ Wolo Kɛhã Yehowa Odasefoi lɛ. Obaanyɛ okɛ wolo nɛɛ aye abua lɛ. Obaanyɛ okɛ lɛ aya saneyitso ni ji, ‘Satan Je Lɛ.’ Ehiɛ saneyitso fioo ni kɛɛ “Tawa, Zigaret Kɛ Ehenɔi Lɛ Shɛremɔ.” Yɛ nakai yitso lɛ shishi lɛ, ebaana sane ko ni yitso ji “Mɛni Ji Nyɔŋmɔ Susumɔ yɛ Tawa Shɛremɔ He?” (Kwɛmɔ June 1, 2014, Buu-Mɔɔ lɛ.) Be ni ekaneɔ sane nɛɛ, mɛɛ ŋmalɛi kɛ shishitoo mlai ebaana?

¹⁶ Naa shishitoo mlai enumɔ komɛi ni je kpo yɛ nakai sane lɛ mli. (1) Esaaa akɛ wɔtsɔɔ nyɔŋ wɔhãa nɔ ko ni baanyɛ agbe wɔ. (Rom. 6:16) (2) Esa akɛ wɔtsi wɔhe kɛje nɔ fɛɛ nɔ ni baanyɛ aye wɔgbɔmɔtso lɛ awui lɛ he. (2 Kor. 7:1) (3) Yehowa miisumɔ ni wɔkɛ wɔsusuma muu fɛɛ asɔmɔ lɛ. (Mat. 22:37) (4) Esaaa akɛ wɔfeɔ nɔ ko ni baaye mɛi awui. (Mat. 22:39;1 Kor. 10:24) (5) Yehowa baanyɛ aye abua wɔ ni wɔfee nɔ ni ja. (Fip. 4:13) Eyɛ mli akɛ Biblia lɛ ewieko tɛ̃ɛ akɛ shɛremɔ ehiii moŋ, shi shishitoo mlai ni yɔɔ mli lɛ baanyɛ aye abua o-Biblia mli nikaselɔ lɛ ni ena Yehowa susumɔ yɛ he.

17. Te mɛi ni miito gbɛjianɔ ni amɛbote gbalashihilɛ mli lɛ baafee tɛŋŋ amɛna Biblia mli shishitoo mlai ni baaye abua amɛ ni amɛto amɛyookpeemɔ lɛ he gbɛjianɔ jogbaŋŋ?

¹⁷ Te mɛi enyɔ ni yaabote gbalashihilɛ mli lɛ baafee tɛŋŋ amɛna Biblia mli shishitoo mlai ni baaye abua amɛ ni amɛto amɛyookpeemɔ he gbɛjianɔ jogbaŋŋ? Shi kome ekoŋŋ lɛ, Niiamlitaomɔ Wolo Kɛhã Yehowa Odasefoi lɛ baanyɛ aye abua. Nyɛyaa saneyitso ni ji “Weku Shihilɛ,” ni nyɛtao saneyitso fioo ni kɛɛ, “Yookpeemɔ Kɛ Esɛɛ Okpɔlɔŋmɛɛ.” Saji ni nyɛbaana yɛ saneyitso fioo nɛɛ shishi lɛ baaye abua nyɛ ni nyɛna Biblia mli shishitoo mlai ni baaye abua nyɛ ni nyɛto nyɛyookpeemɔ he gbɛjianɔ jogbaŋŋ. Naa emli ekpaa komɛi. (1) Esa akɛ nyɛhã nɔ fɛɛ nɔ ni baaya nɔ yɛ nyɛyookpeemɔ lɛ shishi lɛ awo Yehowa hiɛnyam. (1 Kor. 10:​31, 32) (2) Esa akɛ atadei ni nyɛbaawo lɛ afee nɔ ni sa, ni yɔɔ hiŋmɛi nɔ, ni etɔ̃tɔŋ mɛi anane. (1 Tim. 2:9; 1 Pet. 3:​3, 4) (3) Esaaa akɛ nyɛfeɔ lɛ gbidii koni mɛi ana nyɛ tamɔ mɛi krokomɛi feɔ lɛ. (Yoh. 17:14; Yak. 1:27; 1 Yoh. 2:​15, 16) (4) Nyɛtoa nibii ahe gbɛjianɔ jogbaŋŋ. (1 Kor. 14:40) (5) Esaaa akɛ nyɛyookpeemɔ okpɔlɔŋmɛɛ lɛ feɔ hoo ni mɛi banu dãa babaoo yɛ shishi. (Gal. 5:21) (6) Esa akɛ nyɛhala mɔ ko ni baakwɛ ni nɔ fɛɛ nɔ aya lɛ jogbaŋŋ yɛ nifeemɔ lɛ shishi.—Yoh. 2:​8, 9.

18-19. (a) Mɛɛ wolo kroko Yehowa asafo lɛ efee ni baanyɛ aye abua wɔ? (b) Te obaafee tɛŋŋ okɛ wolo nɛɛ atsu nii kɛtao Biblia mli shishitoo mlai ni baahã okpɛ yiŋ kpakpa yɛ gbi jurɔ ko he? (Kwɛmɔ akrabatsa ni ji, “Taomɔ Yehowa Susumɔ Yɛ Saji Ni Nyiɛ Sɛɛ Nɛɛ Lɛ Ahe.”)

¹⁸ Wolo kroko ni Yehowa asafo lɛ efee ni eye ebua mɛi pii ji, Ŋmalɛi Ni Waa Wɔ Ni Wɔhi Shi Akɛ Kristofoi lɛ. Saneyitsei pii yɛ wolo nɛɛ mli, ni obaana ŋmalɛi srɔtoisrɔtoi yɛ eko fɛɛ eko shishi. Naa bɔ ni etsuɔ nii ehãa. Halamɔ saneyitsei lɛ ateŋ eko. Yɛ saneyitso ni ohala lɛ shishi lɛ, obaana sanebimɔi kɛ ŋmalɛi ni baaye abua bo ni ona shishitoo mlai ni kɔɔ he. Hã wɔfee enɛ he nɔkwɛmɔnɔ. Ŋɔɔ lɛ akɛ, ootao ole kɛji esa akɛ Kristofoi aye gbi jurɔ ko. Taomɔ saneyitso ni ji “Gbijurɔyelii.” Yɛ nakai saneyitso lɛ shishi lɛ, obaana sane fioo ni kɛɛ, “Gbijurɔyelii ni esaaa akɛ Kristofoi kɛ amɛhe woɔ mli.”

¹⁹ Sanebimɔi ni yɔɔ sane fioo nɛɛ shishi lɛ eko ji: “Mɛni hewɔ esaaa akɛ wɔkɛ wɔhe woɔ gbijurɔyelii ni kɛ amale jamɔ yɔɔ tsakpaa lɛ amli? (1 Kor. 10:21; 2 Kor. 6:​14-18; Efe. 5:​10, 11).” Kɛfata he lɛ, awie gbi juji ni esaaa akɛ wɔyeɔ lɛ ahe yɛ saneyitso nɛɛ shishi. Kɛ́ okwɛ saneyitso fioo ni kɛɛ, “Maŋ gbijurɔyelii” lɛ, obaana Biblia mli shishitoo mlai ni baaye abua bo ni ona akɛ, esaaa akɛ Kristofoi yeɔ gbii juji ni akɛkaiɔ nibii ni tee nɔ yɛ maŋ lɛ yinɔsane mli ni kɛ maŋkwramɔ saji yɔɔ tsakpaa, gbii juji ni ayeɔ kɛwoɔ mɛi ni ewu ta amɛhã amɛmaŋ lɛ hiɛnyam, loo gbii juji ni hãa akɛ jamɔ loo woo krɛdɛɛ hãa hiɛnaanɔbii. Eŋɔɔ wɔnaa waa akɛ Yehowa asafo lɛ efee woji ni baaye abua wɔ ni wɔtsɔse wɔhenilee lɛ jogbaŋŋ!

NƆ NI BAAHÃ WƆNA AKƐ WƆTSƆSE WƆHENILEE LƐ JOGBAŊŊ

20. Mɛni baahã wɔna akɛ wɔtsɔse wɔhenilee lɛ jogbaŋŋ?

²⁰ Eŋɔɔ wɔnaa waa akɛ Yehowa ehã wɔ hegbɛ ni wɔ diɛŋtsɛ wɔkpɛ wɔyiŋ yɛ saji ahe. Shi wɔle akɛ, ja wɔtsɔse wɔhenilee jogbaŋŋ dani wɔbaanyɛ wɔkɛ hegbɛ nɛɛ atsu nii bɔ ni baahã Yehowa aná miishɛɛ. Kɛ́ wɔtsɔse wɔhenilee lɛ jogbaŋŋ lɛ, ebaaye ebua wɔ ni wɔkpɛ yiŋ kpakpai ni baawo Yehowa hiɛnyam ni ehã etsui anyɔ emli. Yehowa mumɔ krɔŋkrɔŋ lɛ ni baaye abua wɔ ni wɔnyɛ wɔfee enɛ. No hewɔ lɛ, esa akɛ wɔya nɔ wɔbi lɛ ni edro wɔ emumɔ krɔŋkrɔŋ lɛ, ni agbɛnɛ hu, wɔŋmɛ gbɛ ni mumɔ lɛ atsɔɔ wɔ gbɛ. Biblia mli shishitoo mlai hu baanyɛ aye abua wɔ ni wɔtsɔse wɔhenilee lɛ jogbaŋŋ. Nyɛhãa wɔkɛ nikeenii nɛɛ ni Yehowa ehã wɔ lɛ, ni ji wɔhenilee lɛ kɛ hegbɛ ni wɔyɔɔ akɛ wɔbaakpɛ wɔyiŋ yɛ saji ahe lɛ atsu nii jogbaŋŋ. Kɛ́ wɔfee nakai lɛ, wɔbaaná Nyɔŋmɔ Wiemɔ lɛ he sɛɛ jogbaŋŋ kɛmɔ shi.—2 Tim. 3:​16, 17; Heb. 4:12.