Nɔ Ni Baptisimɔ Hãa Anaa Yɛ Ohe, Kɛ Nɔ Hewɔ Ni Ehe Miihia

1. Mɛni hãa wɔnaa akɛ, baptisimɔ he miihia waa?

KƐ́ WƆNA ni aabaptisi mɛi lɛ, wɔnáa miishɛɛ waa! Blema Kristofoi lɛ hu ná miishɛɛ waa be ni abaptisi mɛi yɛ klɛŋklɛŋ kpee ni Kristofoi asafo lɛ fee lɛ shishi. Nakai gbi lɛ, bɔfo Petro hã wiemɔ kɛgbala nɔ hewɔ ni baptisimɔ he hiaa waa lɛ mli. (Bɔf. 2:​38, 40, 41) Afii komɛi asɛɛ lɛ, bɔfo Paulo hu wie akɛ, “Kristo lɛ he shishijee tsɔɔmɔi lɛ” ateŋ ekome ji, “tsɔɔmɔi ni kɔɔ baptisimɔi” ahe lɛ. (Heb. 6:​1, 2) Nɔ ni ewie lɛ kɛ nɔ ni Petro wie lɛ hãa wɔnaa akɛ, baptisimɔ fata nibii ni he hiaa waa ni esa akɛ Kristofonyo fɛɛ Kristofonyo ale lɛ ahe, ni esa akɛ wɔnu shishi jogbaŋŋ. Mɛni hewɔ?

2. Mɛni hewɔ ehe miihia ni wɔnu nɔ ni baptisimɔ tsɔɔ lɛ shishi jogbaŋŋ lɛ?

² Bɔ ni kɛ́ wɔma tsũ wɔma faneshi kpakpa nɔ lɛ, tsũ lɛ náa hewalɛ lɛ, nakai nɔŋŋ kɛ́ wɔnu nɔ ni baptisimɔ tsɔɔ shishi jogbaŋŋ lɛ, ebaahã wɔhemɔkɛyeli lɛ mli awa. Enɛ hewɔ lɛ, kɛ́ kpaako obaabaptisi jio, obaptisi etsɛ jio, ehe miihia waa ni onu nɔ ni baptisimɔ tsɔɔ lɛ shishi. No hewɔ lɛ, yɛ nikasemɔ nɛɛ mli lɛ, wɔbaahã sanebimɔi ni nyiɛ sɛɛ nɛɛ hetoo: Kɛ́ abaptisi bo lɛ, mɛni ehãa anaa yɛ ohe? Te esa akɛ baptisimɔ lɛ aya lɛ ahã tɛŋŋ? Ni mɛni hewɔ abaptisiɔ wɔ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli lɛ?

NƆ NI BAPTISIMƆ HÃA ANAA YƐ OHE

3. Kɛ́ abaptisi bo lɛ, mɛni ehãa mɛi naa yɛ ohe?

³ Kɛ́ ohã abaptisi bo lɛ, ehãa mɛi fɛɛ naa akɛ, (1) oheɔ nibii ni okase yɛ Biblia lɛ mli yɛ Yehowa Nyɔŋmɔ kɛ e-Bi Yesu Kristo he lɛ oyeɔ, (2) otsake otsui ni okpa nibii gbohii feemɔ, (3) oomia ohiɛ ni ofee nibii ni sa Yehowa hiɛ, (4) oheɔ oyeɔ akɛ Yesu Kristo nɔ Yehowa baatsɔ ehere oyiwala, ni (5) ojɔɔ ohe nɔ ohã Yehowa akɛ obaafee esuɔmɔnaa nii ni okɛ esafo lɛ baafee ekome. Kɛ́ ojɔɔ ohe nɔ ohã Yehowa, ni ohã abaptisi bo lɛ, okɛ Yehowa ebɔi nyiɛmɔ, ni kɛ́ otee nɔ okɛ lɛ nyiɛ lɛ, obaaná naanɔ wala.

4. Kɛ́ aabaptisi mɔ ko ni akɛ lɛ wo nu mli ni awó enɔ lɛ, mɛni etsɔɔ? (Kwɛmɔ mfoniri lɛ hu.)

⁴ Kɛ́ aabaptisi mɔ ko lɛ, akɛ mɔ lɛ gbɔmɔtso muu lɛ fɛɛ woɔ nu mli ni awóɔ enɔ.a Wɔbaanyɛ wɔkɛ enɛ ato mɔ ko ni egbo ni afu lɛ ni sɛɛ mli lɛ atee lɛ shi lɛ he. (Okɛto Kolosebii 2:12 lɛ he.) Kɛ́ abaptisi mɔ ko lɛ, ehãa anaa akɛ mɔ lɛ etsake ejeŋba kwraa. Mɛni hewɔ wɔkɛɔ nakai? Kɛ́ akɛ lɛ wo nu lɛ mli lɛ, etsɔɔ akɛ, eŋmɛɛ etsutsu jeŋba lɛ he. Kɛ́ awó enɔ kɛje nu lɛ mli lɛ, etsɔɔ akɛ, kɛjɛ nakai gbi lɛ nɔ kɛyaa lɛ, ehiii shi ehãaa ehe dɔŋŋ. Moŋ lɛ, Yehowa suɔmɔnaa nii ni ebaafee lɛ he baahia lɛ fe nɔ fɛɛ nɔ yɛ eshihilɛ mli.

5. Mɛɛ gbɛ nɔ wɔbaanyɛ wɔkɛ nibii ni wɔfeɔ koni wɔshɛ baptisimɔ he lɛ ato nitsumɔ ni Noa tsu kɛkpɛ adeka lɛ he? (1 Petro 3:​18-21)

⁵ Kanemɔ 1 Petro 3:​18-21. Wɔbaanyɛ wɔkɛ nibii ni wɔfeɔ koni wɔshɛ baptisimɔ he lɛ ato nitsumɔ ni Noa tsu kɛkpɛ adeka lɛ he. Be ni akɛɛ Noa akɛ ekpɛ adeka lɛ, ŋwanejee ko bɛ he akɛ ena nitsumɔ nɛɛ akɛ eda waa. Nakai nɔŋŋ kɛ́ akɛ bo bɔi Biblia lɛ kasemɔ ni ona nibii ni esa akɛ ofee dani oshɛ baptisimɔ he lɛ, ekolɛ ohiɛ baanyara bo ni obaanu he tamɔ bɔ ni Noa nu he lɛ. Shi ani ehe miihia ni omia ohiɛ ofee nibii fɛɛ ni ebaabi ni ofee koni oshɛ baptisimɔ he lɛ? Hɛɛ. Ehe bahia ni Noa hu amia ehiɛ waa koni enyɛ etsu nitsumɔ ni Yehowa kɛwo edɛŋ lɛ. Yehowa diɛŋtsɛ ni tsɔɔ Noa bɔ ni ekpɛ adeka lɛ ehã, ni ehe bahia ni Noa anyiɛ sɛɛ pɛpɛɛpɛ koni kɛ́ Nu Afua lɛ ba lɛ, anyɛ abaa wala yi. Mɛni ye ebua Noa ni enyɛ ekpɛ adeka lɛ? Noa nyɛ ekpɛ adeka lɛ, ejaakɛ ekɛ ehiɛ fɔ̃ Yehowa nɔ, ebo lɛ toi, ni Yehowa hu ye ebua lɛ. Noa sane lɛ hãa wɔnaa akɛ, wɔ hu wɔbaanyɛ wɔfee ‘nɔ fɛɛ nɔ ni Nyɔŋmɔ efã wɔ’ akɛ wɔfee lɛ.—1 Mo. 6:22.

6. Mɛɛ gbɛ nɔ baptisimɔ baanyɛ ahere wɔyiwala?

⁶ Yɛ 1 Petro 3:21 lɛ, bɔfo Petro wie akɛ, baptisimɔ ‘miihere wɔyiwala.’ Shi enɛ etsɔɔɔ akɛ, kɛ́ abaptisi mɔ ko lɛ, belɛ, bɔ fɛɛ bɔ ni fee lɛ ebaaná wala. Ni etsɔɔɔ hu akɛ baptisimɔ jieɔ wɔhe eshai kɛyaa; Yesu lá lɛ pɛ ni baanyɛ ajie wɔhe eshai lɛ kɛya. (1 Yoh. 1:7) Kɛ́ nakai lɛ, mɛɛ gbɛ nɔ baptisimɔ ‘hereɔ wɔyiwala’ mɔ? Klɛŋklɛŋ kwraa lɛ, Yehowa efã akɛ wɔhã abaptisi wɔ. No hewɔ lɛ, kɛ́ wɔhã abaptisi wɔ lɛ, wɔmiiye efamɔ lɛ nɔ. Agbɛnɛ hu, wɔtsɔɔ baptisimɔ nɔ wɔkpaa Yehowa fai koni ekɛ wɔhe eshai lɛ ake wɔ ni wɔná henilee kpakpa. Yehowa yɛ he miishɛɛ aahu akɛ ebaadro wɔ nɔ ni wɔbi lɛ lɛ. No hewɔ lɛ, yɛ gbɛ ko nɔ lɛ, baptisimɔ nyiɛɔ wɔhiɛ kɛyaa yiwalaheremɔ mli.

BƆ NI ESA AKƐ BAPTISIMƆ LƐ AYA LƐ AHÃ

7. Kɛ́ ayaabaptisi mɛi lɛ, te esa akɛ afee lɛ tɛŋŋ? Mɛni ji nibii krokomɛi ni Biblia lɛ hãa wɔleɔ yɛ baptisimɔ he?

⁷ Nɔ ko fioo pɛ Biblia lɛ hãa wɔleɔ yɛ bɔ ni esa akɛ abaptisi mɔ ahã lɛ he, ni no ji, esa akɛ akɛ mɔ lɛ gbɔmɔtso muu lɛ fɛɛ awo nu mli ni awó enɔ. Fɛɛ sɛɛ lɛ, Biblia lɛ yeɔ ebuaa wɔ ni wɔnaa nɔ ni kɛ́ wɔfee lɛ, ebaahã bulɛ aba nifeemɔ lɛ he. Akɛ nɔkwɛmɔnɔ lɛ, Biblia mli shishitoo mlai yeɔ ebuaa mɛi ni ayaabaptisi lɛ ni amɛleɔ bɔ ni esa akɛ amɛsaa amɛhe amɛhã, ni agbɛnɛ hu, eyeɔ ebuaa mɛi ni yakwɛɔ baptisimɔ lɛ ni amɛleɔ bɔ ni esa akɛ amɛfee amɛnii amɛhã. (1 Kor. 14:40; 1 Tim. 2:9) Bei pii lɛ, asafoŋ onukpai ni baptisiɔ mɛi, shi esaaa akɛ wɔkɛ woo srɔto ko hãa amɛ yɛ nitsumɔ nɛɛ ni amɛtsuɔ lɛ hewɔ ejaakɛ amɛsumɔɔɔ ni wɔfeɔ nakai. (1 Kor. 1:​14, 15) Ani ja mɛi pii yɛ jɛmɛ dani kɛ́ abaptisi mɔ ko lɛ etsɔɔ akɛ abaptisi lɛ lɛɛlɛŋ? Dabi kwraa. Mɛi pii yɛ jɛmɛ jio, mɛi pii bɛ jɛmɛ jio, abaptisi lɛ.—Bɔf. 8:36.

8. Mɛɛ sanebimɔi enyɔ abiɔ mɛi ni ayaabaptisi amɛ lɛ? Ni mɛni no hãa amɛnáa hegbɛ akɛ amɛbaafee? (Bɔfoi 2:​38-42) (Kwɛmɔ mfoniri lɛ hu.)

⁸ Biblia lɛ kɛɛ kɛ́ wɔjaje wɔhemɔkɛyeli lɛ wɔtsɔɔ lɛ, abaahere wɔyiwala. (Rom. 10:​9, 10) No hewɔ lɛ, ehi waa akɛ, yɛ gbi ni ayaabaptisi wɔ lɛ nɔ lɛ, wɔnáa hegbɛ akɛ wɔbaajaje wɔhemɔkɛyeli lɛ wɔtsɔɔ. Yɛ mɛɛ gbɛ nɔ? Kɛ́ ayaabaptisi mɛi lɛ, abiɔ amɛ sanebimɔi enyɔ komɛi. Klɛŋklɛŋ nɔ lɛ ji, “Ani otsake otsui yɛ ohe eshai lɛ ahe, ni ojɔɔ ohe nɔ ohã Yehowa, ni okpɛlɛ nɔ akɛ Yesu Kristo nɔ etsɔɔ ehereɔ mɛi ayiwala?” Sanebimɔ nɛɛ hãa wɔnaa nibii ni mɔ lɛ efee momo koni enyɛ eshɛ kɛhã baptisimɔ. Enɛ nɔŋŋ ni yɔɔ Petro jwɛŋmɔ mli be ni ekɛɛ mɛi ni ekɛwie yɛ Pentekoste gbi lɛ nɔ lɛ akɛ amɛtsake amɛtsui ni amɛhã abaptisi amɛ lɛ. Sanebimɔ ni ji enyɔ lɛ ji, “Ani onuɔ shishi akɛ obaptisimɔ lɛ baahã ale bo akɛ Yehowa Odasefonyo ni kɛ Yehowa gbɛjianɔtoo lɛ bɔɔ?” Sanebimɔ nɛɛ hãa wɔnaa nɔ ni mɔ lɛ miiwo shi akɛ ebaafee yɛ ebaptisimɔ lɛ sɛɛ. No ji, ebaanyiɛ gbɛtsɔɔmɔi fɛɛ ni Yehowa asafo lɛ kɛbaahã lɛ sɛɛ, ni ekɛ enyɛmimɛi Kristofoi lɛ baafee ekome kɛsɔmɔ Yehowa. Nakai pɛpɛɛpɛ mɛi ni abaptisi amɛ yɛ Pentekoste gbi lɛ nɔ lɛ fee. (Kanemɔ Bɔfoi 2:​38-42.) Mɛi ni hãa sanebimɔi enyɔ nɛɛ fɛɛ hetoo akɛɛ ‘hɛɛ’ lɛ, eshɛ kɛhã baptisimɔ.

9. Mɛni esa akɛ wɔteŋ mɔ fɛɛ mɔ afee koni wekukpaa kpakpa abakã ekɛ Nyɔŋmɔ teŋ?

⁹ Ekolɛ dani akɛ bo baabɔi Biblia lɛ kasemɔ po lɛ, obaa ojeŋ jogbaŋŋ ni ofeee nibii gbohii. Aloo ekolɛ, ofɔlɔi lɛ, Yehowa Odasefoi ji amɛ, ni no hewɔ lɛ, kɛjɛ ogbekɛbiiashi lɛ, amɛye amɛbua bo ni obasumɔ Yehowa. Kɛ́ nakai lɛ, ani ehe miihia ni otsake otsui ni ohã abaptisi bo dani Nyɔŋmɔ baaná ohe miishɛɛ? Hɛɛ. Ekɔɔɔ he eko bɔ ni sane lɛ ji lɛ, esa akɛ wɔhã ehi wɔjwɛŋmɔ mli akɛ, be ni afɔɔ wɔ beebe lɛ, eshafeelɔi ji wɔ ni wekukpaa kpakpa bɛ wɔ kɛ Nyɔŋmɔ teŋ. (Lala 51:5) Shi kɛ́ wɔbale Yehowa lɛ, wɔ diɛŋtsɛ wɔkpɛɔ wɔyiŋ akɛ wɔbaafee esuɔmɔnaa nii. Wɔtsakeɔ wɔtsui ni wɔkpaa nibii gbohii ni wɔfeɔ be ko ni eho lɛ, ni wɔbɔɔ mɔdɛŋ akɛ wɔbaafee nibii ni sa Yehowa hiɛ. Enɛ hãa wekukpaa kpakpa bakãa wɔ kɛ Nyɔŋmɔ teŋ, ni wɔbafeɔ mɛi ni eshɛ kɛhã baptisimɔ.—Bɔf. 3:19.

10. Kɛ́ abaptisi bo yɛ jamɔ ko mli momo dani akɛ bo bɔi Biblia lɛ kasemɔ lɛ, mɛni esa akɛ ofee?

¹⁰ Kɛ́ abaptisi bo yɛ jamɔ ko mli momo dani akɛ bo bɔi Biblia lɛ kasemɔ lɛ, ani esa akɛ ohã abaptisi bo akɛ Yehowa Odasefonyo? Hetoo lɛ ji, hɛɛ. Mɛni hewɔ? Nɔ hewɔ lɛ ji, be ni ohã abaptisi bo lɛ, no mli lɛ, oleee Yehowa Nyɔŋmɔ kɛ Yesu Kristo jogbaŋŋ. Ni kɛ́ ojɔɔ ohe nɔ ohã Nyɔŋmɔ yɛ sɔlemɔ mli po lɛ, shi ni owo lɛ lɛ mɔɔɔ ejaakɛ no mli lɛ, oleee nɔ ni Nyɔŋmɔ suɔmɔnaa nii ji jogbaŋŋ kɛmɔ shi. Be ko lɛ, bɔfo Paulo kɛ hii komɛi ni abaptisi amɛ momo lɛ kpe yɛ Efeso. Ehã amɛle akɛ, esa akɛ abaptisi amɛ ekoŋŋ, ejaakɛ be ni abaptisi amɛ lɛ, amɛleee Yesu jogbaŋŋ.b (Bɔf. 19:​1-5) Nakai nɔŋŋ ŋmɛnɛ lɛ, ja mɔ ko le Biblia mli anɔkwalei lɛ, dani kɛ́ abaptisi lɛ lɛ, Nyɔŋmɔ baakpɛlɛ nɔ.

“YƐ TSƐ LƐ GBƐ́I MLI, KƐ BI LƐ GBƐ́I MLI, KƐ MUMƆ KRƆŊKRƆŊ LƐ GBƐ́I MLI”

11. Kɛ́ abaptisi bo “yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli” lɛ, mɛni no tsɔɔ? (Mateo 28:​18-20)

¹¹ Yesu fã akɛ, kɛ́ mɔ ko batsɔ ekaselɔ lɛ, abaptisi lɛ “yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli.” (Kanemɔ Mateo 28:​18-20.) Mɛni enɛ tsɔɔ? Yɛ Biblia lɛ mli lɛ, bei pii lɛ, kɛ́ akɛ wiemɔ ni ji “gbɛ́i” lɛ tsu nii lɛ, edamɔ shi kɛhã bɔ ni ale mɔ ko ahã. Bei komɛi hu lɛ, edamɔ shi kɛhã gbɛhe loo hegbɛ ni mɔ ko yɔɔ. No hewɔ lɛ, kɛ́ abaptisi bo yɛ Yehowa kɛ Yesu gbɛ́i mli lɛ, etsɔɔ akɛ, ole mɛi ni amɛji, ni ole akɛ amɛyɛ hegbɛ akɛ amɛtsɔɔ bo nɔ ni ofee. Ni kɛ́ abaptisi bo yɛ mumɔ krɔŋkrɔŋ lɛ gbɛ́i mli lɛ, etsɔɔ akɛ, onuɔ bɔ ni Yehowa kɛ mumɔ krɔŋkrɔŋ lɛ tsuɔ nii ehãa lɛ shishi, ni anaa nakai yɛ owiemɔ kɛ onifeemɔ mli. Hã wɔsusu otii nɛɛ ahe fitsofitso wɔkwɛ.

12. Kɛ́ akɛɛ abaptisi wɔ yɛ Tsɛ lɛ gbɛ́i mli lɛ, mɛni etsɔɔ? (Kpojiemɔ 4:11) (Kwɛmɔ mfoniri lɛ hu.)

¹² Yɛ Tsɛ lɛ gbɛ́i mli. Kɛ́ abaptisi wɔ yɛ Tsɛ lɛ gbɛ́i mli lɛ, etsɔɔ akɛ wɔnaa Yehowa akɛ wɔ-Tsɛ ni yɔɔ ŋwɛi, ni wɔkpɛlɛɔ nɔ akɛ lɛ ehã wɔ wala. Etsɔɔ hu akɛ, wɔkpɛlɛɔ nɔ akɛ, lɛ ji Nyɔŋmɔ Ofe, ni lɛ ebɔ nibii fɛɛ. (Kanemɔ Kpojiemɔ 4:11.) Kɛfata he lɛ, etsɔɔ akɛ, wɔle akɛ eboɔ wɔsɔlemɔi toi, ni wɔkɛ egbɛ́i tsuɔ nii kɛ́ wɔmiisɔle, kɛ agbɛnɛ hu kɛ́ wɔmiigba mɛi ehe sane. (Lala 65:2) Shi ani enɛɛmɛi pɛ etsɔɔ? Dabi. Mɛi ni Petro kɛwie yɛ Pentekoste gbi lɛ nɔ lɛ le Yehowa momo, shi ehe bahia ni amɛhe amɛye akɛ, Yehowa baatsɔ Yesu Kristo nɔ ehere adesai ayiwala.—Rom. 5:8.

13. Kɛ́ akɛɛ abaptisi wɔ yɛ Bi lɛ gbɛ́i mli lɛ, mɛni etsɔɔ? (Kwɛmɔ mfoniri lɛ hu.)

¹³ Yɛ Bi lɛ gbɛ́i mli. Kɛ́ abaptisi wɔ yɛ Bi lɛ gbɛ́i mli lɛ, etsɔɔ akɛ wɔkpɛlɛɔ nɔ akɛ Yesu ji Nyɔŋmɔ Bi koome lɛ. Agbɛnɛ hu, etsɔɔ akɛ, wɔheɔ wɔyeɔ akɛ Yesu ji “gbɛ lɛ”; akɛ, lɛ pɛ enɔ wɔbaanyɛ wɔtsɔ wɔkɛ Nyɔŋmɔ abɔ naanyo. (Yoh. 14:6) Kɛfata he lɛ, etsɔɔ hu akɛ, wɔkpɛlɛɔ nɔ akɛ Yesu bagbo kɛkpɔ̃ wɔ. No hewɔ lɛ, kɛjɛ gbi ni abaptisi wɔ lɛ nɔ kɛyaa fɛɛ lɛ, wɔmiaa wɔhiɛ akɛ, wɔbaanyiɛ enɔkwɛmɔnɔ lɛ sɛɛ be fɛɛ be. (1 Yoh. 2:6) Enɛ hewɔ lɛ, wɔkɛ ekãa shiɛɔ tamɔ bɔ ni efee lɛ, ni wɔhãaa nɔ ko nɔ ko ahã wɔkpa shiɛmɔ. (Luka 4:43) Kɛ́ Yesu sɛɛ ni wɔnyiɛ kɛ Yehowa ni wɔsɔmɔɔ hewɔ lɛ abaawa wɔ yi po lɛ, wɔsheee gbeyei. (2 Tim. 3:12) Etsɔɔ hu akɛ, wɔkpɛlɛɔ nɔ akɛ, Yesu ji “asafo lɛ yitso.” No hewɔ lɛ, wɔbaa wɔhe shi wɔhãa mɛi ni ehala koni amɛnyiɛ hiɛ ni amɛkwɛ ewebii lɛ anɔ lɛ.—Efe. 4:​8, 11, 12; 5:23.

14. (a) Kɛ́ akɛɛ abaptisi wɔ yɛ mumɔ krɔŋkrɔŋ lɛ gbɛ́i mli lɛ, mɛni etsɔɔ? (Kwɛmɔ mfoniri lɛ hu.) (b) Mɛɛ baptisimɔi krokomɛi abaptisiɔ mɛi ni afɔ amɛ mu lɛ? (Kwɛmɔ akrabatsa ni ji, “Baptisimɔi Krokomɛi Ni Abaptisiɔ Mɛi Ni Afɔ Amɛ Mu Lɛ.”)

¹⁴ Yɛ mumɔ krɔŋkrɔŋ lɛ gbɛ́i mli. Kɛ́ abaptisi wɔ yɛ mumɔ krɔŋkrɔŋ lɛ gbɛ́i mli lɛ, etsɔɔ akɛ, wɔle akɛ mumɔ krɔŋkrɔŋ lɛ ji Nyɔŋmɔ hewalɛ ni ekɛtsuɔ nii, ni akɛ, jeee gbɔmɔ ni, ni esoro lɛ kwraa yɛ Yehowa kɛ Yesu he. Agbɛnɛ hu, etsɔɔ akɛ, wɔkpɛlɛɔ nɔ akɛ Yehowa tsɔ emumɔ krɔŋkrɔŋ lɛ nɔ etsɔɔ gbalɔi lɛ kɛ mɛi ni ŋmala Biblia lɛ nibii ni amɛwie kɛ nibii ni amɛŋmala. (2 Pet. 1:​20, 21) Kɛfata he lɛ, etsɔɔ akɛ, wɔkwɛɔ jogbaŋŋ ni wɔkafee eshai ni yɔɔ hiɛdɔɔ, ejaakɛ wɔle akɛ kɛ́ wɔfee eshai ni tamɔ nakai lɛ, Nyɔŋmɔ mumɔ krɔŋkrɔŋ lɛ tsuŋ nii yɛ wɔnɔ, ni etsuŋ nii jogbaŋŋ yɛ asafo lɛ hu nɔ.—Efe. 4:30.

15. Kɛ́ abaptisi bo momo lɛ, mɛni esa akɛ ofee?

¹⁵ Ani abaptisi bo momo? Kɛ́ nakai lɛ, bɔɔ mɔdɛŋ ni ohi shi yɛ shi ni owo Yehowa be ni ojɔɔ ohe nɔ ohã lɛ ni ohã abaptisi bo lɛ naa, ni kaahã ohiɛ kpa nɔ hewɔ ni baptisimɔ he hiaa waa lɛ nɔ kɔkɔɔkɔ.c Shi kɛ́ abaptisiko bo hu? Mɛni tsĩɔ onaa? Nikasemɔ ni nyiɛ sɛɛ lɛ baatsɔɔ bo bɔ ni obaafee oya ohiɛ koni oshɛ baptisimɔ he.