Mɛni Obaafee Kɛtsɔɔ Akɛ Ohiɛ Sɔɔ Kpɔmɔnɔ Lɛ?

1-2. Mɛni esa akɛ Yesu kpɔmɔ afɔle lɛ anyɛ wɔnɔ ni wɔfee? Ni mɛni hewɔ? (2 Korintobii 5:​14, 15) (Kwɛmɔ mfoniri lɛ hu.)

ŊƆƆ lɛ akɛ tsũ ko kumɔ eshwie onɔ ni mɔ ko bajie bo. Obaanu he akɛ ohiɛ mɔ lɛ owala he nyɔmɔ, aloo jeee nakai? Kɛjeee bo pɛ po ajie lɛ, obaasumɔ ni bo diɛŋtsɛ oya mɔ lɛ ŋɔɔ ni oyafee nɔ ko kɛtsɔɔ akɛ ohiɛ esɔ jiemɔ ni ebajie bo lɛ waa, ni akɛ, ohiɛ kpaŋ nɔ kɔkɔɔkɔ.

² Nikasemɔ ni tsɔ hiɛ lɛ hã wɔna akɛ wɔ diɛŋtsɛ wɔnyɛŋ wɔjie wɔhe kɛje esha ni afɔ wɔ yɛ mli lɛ mli. Shi naa nɔ ni Yehowa fee. Ekɛ e-Bi lɛ hã akɛ kpɔmɔnɔ koni (1) enyɛ ekɛ wɔhe eshai lɛ ake wɔ, (2) wɔsɛɛ lɛ, ejie wɔhe eshai lɛ kɛje wɔhe, ni (3) wɔnyɛ wɔkɛ Yehowa abɔ naanyo. Kpɔmɔnɔ lɛ hewɔ lɛ, wɔyɛ hiɛnɔkamɔ akɛ wɔsɛɛ lɛ, wɔbaahi shi kɛya naanɔ yɛ Yehowa jeŋ hee lɛ mli. Yesu wala ni ekɛfɔ̃ shi ehã wɔ lɛ tsɔɔ akɛ esumɔɔ adesai waa. Shi jeee be ni eba shikpɔŋ lɛ nɔ lɛ pɛ ebatsɔɔ akɛ esumɔɔ adesai, moŋ lɛ, be ni eyɔɔ ŋwɛi ni ebako shikpɔŋ lɛ nɔ po lɛ, esumɔɔ adesai. (Abɛi 8:​30, 31) Bɔfo Paulo ŋma akɛ, “suɔmɔ ni Kristo lɛ yɔɔ lɛ nyɛɔ wɔnɔ.” (Kanemɔ 2 Korintobii 5:​14, 15.) Enɛ tsɔɔ akɛ esa akɛ wɔfee nɔ ko kɛtsɔɔ akɛ wɔhiɛ sɔɔ suɔmɔ ni Yesu jie lɛ kpo lɛ, ni akɛ, wɔhiɛ kpaŋ nɔ kɔkɔɔkɔ.

3. Mɛni hewɔ ekolɛ, ebaasoro nɔ ni wɔteŋ mɔ fɛɛ mɔ baanyɛ afee kɛtsɔɔ akɛ ehiɛ sɔɔ kpɔmɔnɔ lɛ?

³ Mɛni obaanyɛ ofee kɛtsɔɔ akɛ ohiɛ sɔɔ kpɔmɔnɔ lɛ? Ekolɛ esoro nɔ ni obaanyɛ ofee lɛ yɛ mɔ kroko nɔ lɛ he. Mɛni hewɔ wɔkɛɔ nakai? Ŋɔɔ lɛ akɛ mɛi etɛ komɛi yaafã gbɛ kɛya he kome too lɛ nɔŋŋ, shi esoro maŋ ni amɛteŋ mɔ fɛɛ mɔ yɔɔ mli. No hewɔ lɛ, ebaasoro gbɛ ni amɛteŋ mɔ fɛɛ mɔ baatsɔ nɔ kɛya he ni amɛbaaya lɛ. Yɛ nakai gbɛ nɔŋŋ nɔ lɛ, wɔteŋ mɛi komɛi ji (1) Biblia mli nikaselɔi, ni mɛi komɛi hu ji (2) Kristofoi ni abaptisi amɛ, ni mɛi krokomɛi hu ji (3) Kristofoi ni amrɔ nɛɛ amɛkɛ asafo lɛ ebɔɔɔ, ni wɔ fɛɛ wɔhiɛ sɔɔ kpɔmɔnɔ lɛ ni wɔbaasumɔ ni wɔfee nɔ ko kɛtsɔɔ nakai. Shi akɛni esoro shihilɛ ni wɔteŋ mɔ fɛɛ mɔ yɔɔ mli hewɔ lɛ, ebaasoro nɔ ni wɔteŋ mɔ fɛɛ mɔ baanyɛ afee kɛtsɔɔ akɛ ehiɛ sɔɔ kpɔmɔnɔ lɛ. No hewɔ lɛ, yɛ nikasemɔ nɛɛ mli lɛ, wɔbaasusu nɔ ni obaanyɛ ofee kɛtsɔɔ akɛ ohiɛ sɔɔ kpɔmɔnɔ lɛ kɛ́ oji kui etɛ nɛɛ ateŋ mɔ ko lɛ he.

KƐ́ OJI BIBLIA MLI NIKASELƆ LƐ, MƐNI OBAANYƐ OFEE?

4. Te Yehowa naa Biblia mli nikaselɔi ehãa tɛŋŋ?

⁴ Kɛ́ akɛ bo miikase Biblia lɛ, susumɔ sane nɛɛ he okwɛ: Oosumɔ ni okase Yehowa he nii kɛ Biblia lɛ mli anɔkwalei lɛ. Enɛ tsɔɔ akɛ Yehowa miisumɔ ni obatsɔ enaanyo ni eewa bo koni onyɛ ofee nakai. (Yoh. 6:44; Bɔf. 13:48) “Yehowa ji mɔ ni taoɔ tsuii amli.” Ni no tsɔɔ akɛ enaa mɔdɛŋ ni obɔɔ koni okase ehe nii lɛ, ni kɛ́ ena akɛ oofee tsakemɔi koni ofee esuɔmɔnaa nii lɛ, enáa miishɛɛ. (Abɛi 17:3; 27:11) Kpɔmɔnɔ lɛ hewɔ lɛ, obaanyɛ okɛ Yehowa abɔ naanyo waa. (Rom. 5:​10, 11) Kaahã ohiɛ kpa anɔkwa sane nɛɛ nɔ kɔkɔɔkɔ.

5. Mɛni kɛ́ Biblia mli nikaselɔ ko fee lɛ, no baatsɔɔ akɛ ekɛ ŋaawoo ni yɔɔ Filipibii 3:16 lɛ miitsu nii?

⁵ Kɛ́ oji Biblia mli nikaselɔ lɛ, mɛni obaanyɛ ofee kɛtsɔɔ akɛ ohiɛ sɔɔ kpɔmɔnɔ lɛ? Nɔ kome ni obaanyɛ ofee ji ni okɛ ŋaa ni bɔfo Paulo wo Filipibii lɛ baatsu nii. Ekɛɛ amɛ akɛ: “He ni wɔtee hiɛ kɛshɛ lɛ, nyɛhãa wɔyaa nɔ wɔnyiɛa jogbaŋŋ yɛ nɛkɛ gbɛ nɛɛ nɔŋŋ nɔ.” (Fip. 3:16) Atsɔɔ ŋmalɛ nɛɛ shishi yɛ Biblia kroko ko mli akɛ: “Esa akɛ wɔya nɔ wɔnyiɛ gbɛ ni wɔnyiɛ nɔ amrɔ nɛɛ nɔŋŋ nɔ; esaaa akɛ wɔkuɔ wɔsɛɛ.” No hewɔ lɛ, kaahã nɔ ko loo mɔ ko hã okpa wala gbɛ ni onyiɛ nɔ lɛ nɔ nyiɛmɔ.—Mat. 7:14; Luka 9:62.

6. Kɛ́ ewa kɛhã Biblia mli nikaselɔ ko akɛ ebaahe nɔ ko eye loo ebaafee tsakemɔ ko lɛ, mɛni ebaanyɛ efee? (5 Mose 30:​11-14) (Kwɛmɔ mfoniri lɛ hu.)

⁶ Ni kɛ́ ewa kɛhã bo akɛ obaahe nɔ ko ni okase yɛ Biblia lɛ mli nyɛsɛɛ nɛɛ nɔŋŋ oye hu? Kɛ́ nakai lɛ mɛni obaafee? Kasemɔ nakai nii lɛ he nii babaoo ni obi Yehowa ni ewa bo ni onu shishi jogbaŋŋ. (Lala 86:11) Shi kɛ́ fɛɛ sɛɛ lɛ onuuu shishi lɛ, shi ofɔ̃ shi dã, shi kaakpa Biblia lɛ ni akɛ bo kaseɔ lɛ kasemɔ. Ni kɛ́ yɛ ogbɛfaŋ lɛ, ewa kɛhã bo akɛ obaakpa nɔ ko ni Yehowa sumɔɔɔ lɛ feemɔ hu? Kɛ́ nakai ni lɛ, hã ehi ojwɛŋmɔ mli akɛ Yehowa biŋ wɔ kɔkɔɔkɔ ni wɔfee nɔ ko ni wɔnyɛŋ wɔfee. No hewɔ lɛ, obaanyɛ ofee esuɔmɔnaa nii. (Kanemɔ 5 Mose 30:​11-14.) Yehowa ewo shi akɛ ebaawa bo. (Yes. 41:​10, 13; 1 Kor. 10:13) No hewɔ lɛ, onijiaŋ akaje wui. Okɛ ojwɛŋmɔ akama nɔ ni amrɔ nɛɛ ewa kɛhã bo lɛ nɔ tsɔ, moŋ lɛ, susumɔ nibii kpakpai fɛɛ ni Yehowa feɔ ehãa bo lɛ he, titri lɛ, e-Bi lɛ ni etsu koni ebagbo ehã bo lɛ. Be ni suɔmɔ ni oyɔɔ kɛhã Yehowa lɛ daa lɛ, obaana akɛ “ekitãi lɛ anɔyeli waaa.”—1 Yoh. 5:3.a

7. Mɛni oblahii kɛ oblayei ni fɔlɔi miitsɔse amɛ yɛ anɔkwale lɛ mli lɛ baanyɛ asusu he?

⁷ Ni kɛ́ oji oblanyo loo oblayoo ni fɔlɔi miitsɔse bo yɛ anɔkwale lɛ mli lɛ, ani sane nɛɛ kɔɔ ohe? Hɛɛ, ekɔɔ ohe ejaakɛ ofɔlɔi kɛ bo miikase Biblia lɛ. Yɛ anɔkwale mli lɛ, oji ofɔlɔi a-Biblia mli nikaselɔ ni he hiaa waa. Biblia lɛ kɛɛ: “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.” (Yak. 4:8; 1 Kro. 28:9) Kɛ́ ofee nibii ni baahã okɛ Yehowa abɔ naanyo waa lɛ, lɛ hu ebaafee nibii ni baahã ekɛ bo abɔ naanyo waa. Yehowa enaaa bo akɛ mɔ ko ni aatsɔse lɛ yɛ anɔkwale lɛ mli kɛkɛ. Esusuɔ ohe ejaakɛ eesumɔ ni okɛ lɛ abɔ naanyo waa. Ni mɛni Yehowa efee koni onyɛ okɛ lɛ abɔ naanyo waa? Ekɛ e-Bi lɛ hã yɛ ohewɔ. Ohiɛ akakpa nikeenii ni nɔ bɛ nɛɛ nɔ kɔkɔɔkɔ! (Rom. 5:​1, 2) No hewɔ lɛ, dani Kaimɔ lɛ baashɛ lɛ, susumɔ nɔ ni Yehowa kɛ Yesu fee amɛhã bo lɛ he waa. No sɛɛ lɛ, susumɔ nibii ni nyiɛ sɛɛ nɛɛ ahe: nɔ ni obaanyɛ okɛ owala afee kɛtsɔɔ akɛ ohiɛ esɔ nɔ ni Yehowa fee lɛ kɛ otii ni obaanyɛ okɛmamɔ ohiɛ kɛtsɔɔ akɛ ohiɛ esɔ nɔ ni efee lɛ.b

KƐ́ ABAPTISI BO LƐ, MƐNI OBAANYƐ OFEE?

8. Mɛni Kristofoi ni abaptisi amɛ lɛ efee momo ni tsɔɔ akɛ amɛhiɛ esɔ kpɔmɔnɔ lɛ?

⁸ Kɛ́ oji Kristofonyo ni abaptisi lɛ lɛ, no lɛ ofee nibii pii momo ni tsɔɔ akɛ ohiɛ esɔ kpɔmɔnɔ lɛ. Akɛ nɔkwɛmɔnɔ lɛ, ofee tsakemɔi ni baahã Yehowa aná ohe miishɛɛ ni otsɔ enaanyo. Oye Yesu famɔ akɛ ashiɛ atsɔɔ mɛi ni afee mɛi ekaselɔi lɛ nɔ. Ojɔɔ owala nɔ ohã Yehowa ni ohã abaptisi bo. Ni ekolɛ akɛni oosɔmɔ Yehowa hewɔ lɛ, ate shi awo bo loo awa bo yi. (2 Tim. 3:12) Shi otee nɔ ofi shi ejaakɛ osumɔɔ Yehowa ni ohiɛ esɔ kpɔmɔnɔ ni etsɔ e-Bi lɛ nɔ ekɛhã lɛ.—Heb. 12:​2, 3.

9. Mɛɛ sane esa akɛ Kristofoi ni abaptisi amɛ lɛ akwɛ amɛhe nɔ jogbaŋŋ yɛ he?

⁹ Wɔ mɛi ni abaptisi wɔ akɛ Kristofoi lɛ, esa akɛ wɔkwɛ wɔhe nɔ jogbaŋŋ yɛ sane ko he. Mɛɛ sane? Be ni bei shwieɔ mli lɛ, ekolɛ fiofio lɛ wɔnaŋ kpɔmɔnɔ lɛ akɛ nɔ ko ni esa akɛ ekudɔ bɔ ni wɔbaa wɔjeŋ wɔhãa lɛ. Mɛni baahã eba lɛ nakai? Sane ni Yesu kɛmaje Kristofoi ni hi shi yɛ Efeso yɛ Yesu bɔfoi lɛ abeiaŋ lɛ baanyɛ ahã wɔná sanebimɔ nɛɛ hetoo. Kristofoi ni yɔɔ Efeso lɛ fi shi waa ni Yesu jie amɛyi yɛ no hewɔ. Shi ekɛɛ amɛ hu akɛ: “Sane ni miyɔɔ yɛ ohe nɛ, no ji akɛ oŋmɛɛ oklɛŋklɛŋ suɔmɔ lɛ he.” (Kpo. 2:​3, 4) Yesu wiemɔi nɛɛ tsɔɔ akɛ kɛ́ bei shwie mli lɛ, ebaanyɛ eba lɛ akɛ Kristofonyo ko kɛ etsui fɛɛ jáŋ Nyɔŋmɔ. Mɔ lɛ baanyɛ afee mɔ ko ni sɔleɔ, eyaa asafoŋ kpeei, ni eyaa shiɛmɔ hu, shi efeɔ nibii nɛɛ kɛkɛ shi jeee kɛ etsui fɛɛ. Kɛ́ wɔɔkɛɛ lɛ, jeee suɔmɔ ni kudɔɔ lɛ dɔŋŋ. No hewɔ lɛ, kɛ́ oonu he akɛ suɔmɔ ni oyɔɔ kɛhã Yehowa lɛ mli waaa tamɔ tsutsu lɛ, mɛni obaanyɛ ofee?

10. Mɛɛ gbɛ nɔ obaanyɛ okɛ ŋaa ni Paulo wo Timoteo lɛ atsu nii? (1 Timoteo 4:​13, 15)

¹⁰ Bɔfo Paulo kɛɛ Timoteo ni ejwɛŋ nibii ni efeɔ kɛjáa Yehowa lɛ anɔ ni ‘ekɛ ehe awo mli kwraa.’ (Kanemɔ 1 Timoteo 4:​13, 15.) Bo hu obaanyɛ ojwɛŋ nibii ni ofeɔ kɛjáa Yehowa lɛ anɔ, ni okwɛ bɔ ni obaafee ni ‘ofee ekãa yɛ mumɔ lɛ naa.’ (Rom. 12:11) Akɛ nɔkwɛmɔnɔ lɛ, obaanyɛ okɛ be ni fa fe bɔ ni tsutsu ko lɛ okɛsaa ohe kɛhãa asafoŋ kpeei lɛ asaa ohe. Kɛ́ ofee nakai lɛ, kɛ́ otee asafoŋ kpee lɛ, ojwɛŋmɔ baahi nɔ ni yaa nɔ lɛ nɔ jogbaŋŋ. Loo kɛ́ oofee aŋkro nikasemɔ lɛ, obaanyɛ otao he ko ni yɔɔ dioo ni baawa bo koni onyɛ ojwɛŋ nɔ ni okaseɔ lɛ nɔ jogbaŋŋ. Tamɔ bɔ ni akɛ lai woɔ la mli koni eya nɔ etso lɛ, nakai nɔŋŋ esa akɛ oya nɔ ofee nibii nɛɛ koni be fɛɛ be lɛ, ohiɛ asɔ kpɔmɔnɔ lɛ kɛ nibii krokomɛi fɛɛ ni Yehowa feɔ ehãa bo lɛ. Agbɛnɛ hu, obaanyɛ ojwɛŋ nibii kpakpai ni Yehowa efee ehã bo akɛ Yehowa Odasefonyo lɛ nɔ dani Kaimɔ lɛ ashɛ. Ŋwanejee ko bɛ he akɛ kɛ́ ofee nakai lɛ, ohiɛ baasɔ kpɔmɔnɔ lɛ waa, ejaakɛ no hewɔ ni onyɛ okɛ Yehowa miibɔ naanyo lɛ.

11-12. Kɛ́ eshɛ he ko ni oonu he akɛ ojáaa Yehowa kɛ ekãa tamɔ tsutsu lɛ, ani no tsɔɔ akɛ Yehowa mumɔ lɛ bɛ onɔ? Tsɔɔmɔ mli. (Kwɛmɔ mfoniri lɛ hu.)

¹¹ Kɛ́ eshɛ he ko ni oonu he akɛ ojáaa Yehowa kɛ ekãa tamɔ tsutsu lɛ, no etsɔɔɔ akɛ Yehowa mumɔ lɛ bɛ onɔ. Kaimɔ nɔ ni bɔfo Paulo kɛɛ Korintobii lɛ yɛ esɔɔmɔ nitsumɔ lɛ he. Ekɛɛ amɛ akɛ: “Kɛ́ mikɛ mligbigbilimɔ fee lɛ, no hu po lɛ, eji nitsumɔ ni atu awo midɛŋ akɛ shĩa nɔkwɛlɔ.” (1 Kor. 9:17) Mɛni nɔ ni ewie lɛ tsɔɔ?

¹² Bei komɛi lɛ, Paulo nuuu he akɛ eshiɛ. Fɛɛ sɛɛ lɛ, etswa efai shi akɛ ebaaya nɔ eshiɛ ekɔɔɔ he eko bɔ ni enuɔ he ehãa. Bo hu obaanyɛ ofee nakai. Tswaa ofai shi akɛ obaafee nɔ ni ja kɛ́ bei komɛi lɛ onuuu he akɛ ofee nakai po. No hewɔ lɛ, sɔlemɔ obi Yehowa ni ewa bo ni oshwe akɛ obaafee nɔ ni ja, ni ehã bo hewalɛ hu koni onyɛ ofee nakai. (Fip. 2:13) Yaa nɔ ofee nibii ni baahã okɛ Yehowa abɔ naanyo waa. Kɛ́ ofee nakai lɛ, fiofio lɛ, suɔmɔ ni oyɔɔ kɛhã Yehowa lɛ mli baawa ekoŋŋ, ni obaajá lɛ kɛ ekãa.

13. Te wɔbaafee tɛŋŋ wɔpɛi wɔmli wɔkwɛ akɛ ‘wɔyɛ hemɔkɛyeli lɛ mli lo’?

¹³ Awo Kristofoi ŋaa yɛ 2 Korintobii 13:5 lɛ akɛ: “Nyɛyaa nɔ nyɛpɛia nyɛmli nyɛkwɛa akɛ nyɛyɛ hemɔkɛyeli lɛ mli lo.” No hewɔ lɛ, yɛ be kɛ beiaŋ lɛ, wɔbaanyɛ wɔbi wɔhe saji tamɔ: ‘Kɛ́ mijwɛŋ bɔ ni mihiɔ shi mihãa lɛ he lɛ, ani manyɛ makɛɛ akɛ Yehowa sɔɔmɔ lɛ he hiaa mi fe nɔ fɛɛ nɔ?’ (Mat. 6:33) ‘Ani nibii ni mikɛjieɔ mihiɛtserɛ lɛ tsɔɔ akɛ minyɛɔ efɔŋ?’ (Lala 97:10) ‘Ani minifeemɔi hãa toiŋjɔlɛ kɛ ekomefeemɔ hiɔ minyɛmimɛi Kristofoi lɛ ateŋ?’ (Efe. 4:​2, 3) Kaimɔ be lɛ ji be ni hi jogbaŋŋ ni obaanyɛ okɛsusu saji nɛɛ ahe. Kɛ́ wɔsusu nɔ ni Yehowa kɛ Yesu feɔ amɛhãa wɔ lɛ he lɛ, no baatsirɛ wɔ ni wɔfee nɔ ko kɛda Yehowa shi, ni agbɛnɛ hu, wɔkɛtsɔɔ akɛ wɔhiɔ shi wɔhãa Kristo shi jeee wɔ diɛŋtsɛ wɔhe.c

KƐ́ OJI KRISTOFONYO KO NI KƐ ASAFO LƐ EKPA BƆƆ LƐ, MƐNI OBAANYƐ OFEE?

14. Mɛni ekolɛ no hewɔ wɔnyɛmimɛi hii kɛ yei komɛi kɛ asafo lɛ ekpa bɔɔ lɛ?

¹⁴ Wɔnyɛmimɛi hii kɛ yei komɛi ekpa asafoŋ kpeeibaa loo amɛkɛ asafo lɛ ekpa bɔɔ. Mɛi nɛɛ ateŋ mɛi komɛi sɔmɔ Yehowa jogbaŋŋ afii pii dani amɛkpa. Mɛni hewɔ eba lɛ nakai? Amɛteŋ mɛi komɛi lɛ, shihilɛ lɛ mli naagbai lɛ su amɛtsui ni no hã amɛnu he akɛ amɛnyɛŋ amɛsɔmɔ Yehowa dɔŋŋ. (Luka 21:34) Amɛteŋ mɛi komɛi hu lɛ, nɔ ko ni nyɛmi ko fee loo ewie lɛ gba amɛnaa. (Yak. 3:2) Ni amɛteŋ mɛi krokomɛi hu lɛ, amɛfee esha ko ni yɔɔ hiɛdɔɔ ni amɛsumɔɔɔ ni aye abua amɛ. Ekɔɔɔ he eko nɔ ni hã okpa asafoŋ kpeeibaa lɛ, mɛni obaanyɛ ofee? Mɛni kpɔmɔnɔ lɛ kɛ suɔmɔ ni Yehowa kɛ Yesu yɔɔ kɛhã bo lɛ baanyɛ anyɛ onɔ ni ofee?

15. Mɛni Yehowa feɔ kɛtsɔɔ akɛ ejwɛŋɔ Kristofoi ni ekpa asafoŋ kpeeibaa lɛ ahe? (Ezekiel 34:​11, 12, 16)

¹⁵ Susumɔ sane nɛɛ he okwɛ. Kɛ́ okwɛ lɛ, te Yehowa nuɔ he ehãa tɛŋŋ yɛ mɛi ni ekpa asafoŋ kpeeibaa lɛ ahe? Anɔkwa sane lɛ ji, emli fuko amɛ ni ehiɛ kpako amɛnɔ hu. Etaoɔ etoi ni elaaje nɛɛ. Ni kɛ́ ena amɛ lɛ, eyeɔ ebuaa amɛ koni amɛku amɛsɛɛ kɛba etooku lɛ mli, ni elɛɔ amɛ hu. (Kanemɔ Ezekiel 34:​11, 12, 16.) Ani ekolɛ Yehowa miifee nakai yɛ ogbɛfaŋ? Hɛɛ! Akɛni ookane sane nɛɛ hewɔ lɛ, etsɔɔ akɛ loloolo lɛ oosumɔ ni osa Yehowa hiɛ. Tamɔ bɔ ni Yehowa kwɛ otsui mli ni egbala bo kɛba anɔkwale lɛ mli lɛ, eeenyɛ efee akɛ amrɔ nɛɛ eegbala bo koni oku osɛɛ kɛba.

16. Mɛni mɔ ko ni kɛ asafo lɛ ekpa bɔɔ lɛ baanyɛ afee koni enyɛ eku esɛɛ kɛba Yehowa ŋɔɔ ekoŋŋ? (Kwɛmɔ mfoniri lɛ hu.)

¹⁶ Ofainɛ susumɔ wiemɔi komɛi ni woɔ mɔ hewalɛ waa ni yɔɔ broshuɔ ni ji Kuu Osɛɛ Kɛba Yehowa Ŋɔɔ lɛ mli lɛ he. Aŋma yɛ mli akɛ: “Ná nɔmimaa akɛ, Yehowa baaye abua bo ni onyɛ oku osɛɛ kɛba eŋɔɔ. Ebaaye ebua bo ni okafee yeyeeye, okɛ mɛi ni efee bo dɔlɛ nii lɛ ahe ake amɛ, ni ohenilee akayi bo dɔŋŋ. Kɛkɛ lɛ, no baatsirɛ bo ni obafata Yehowa webii lɛ ahe ekoŋŋ kɛsɔmɔ lɛ.” Kaimɔ hu akɛ asafoŋ onukpai lɛ miisumɔ waa ni amɛye amɛbua bo. Amɛbaanyɛ amɛfee “tamɔ teemɔhe be ni kɔɔyɔɔ miitswa, abobaahe be ni nugbɔ miinɛ.” (Yes. 32:2) Wɔle akɛ ohiɛ sɔɔ kpɔmɔnɔ lɛ, ni oosumɔ ni ofee nɔ ko koni Yehowa ana nakai. No hewɔ lɛ, bi ohe akɛ, ‘Mɛɛ nibii manyɛ mafee amrɔ nɛɛ koni mikɛ Yehowa abɔ naanyo ekoŋŋ?’ (Yes. 1:18; 1 Pet. 2:25) Akɛ nɔkwɛmɔnɔ lɛ, obaanyɛ oba asafoŋ kpeei yɛ Maŋtsɛyeli Asa lɛ nɔ. Agbɛnɛ hu lɛ, obaanyɛ otsi obɛŋkɛ asafoŋ onukpai lɛ ateŋ mɔ kome ni eye ebua bo. Ni nibii ni ebaanyɛ efee kɛye ebua bo lɛ eko ji, ebaato gbɛjianɔ koni mɔ ko kɛbo akase nii kɛyashi be ko. Hemɔ oye waa akɛ, kɛ́ ofee nibii nɛɛ fɛɛ koni onyɛ oku osɛɛ oba Yehowa ŋɔɔ ekoŋŋ ni okɛtsɔɔ akɛ ohiɛ sɔɔ kpɔmɔnɔ lɛ, Yehowa baajɔɔ bo.

MƐNI OBAAFEE KƐTSƆƆ AKƐ OHIƐ SƆƆ KPƆMƆNƆ LƐ?

17-18. Mɛni kɛ́ wɔfee dani Kaimɔ lɛ shɛ lɛ, no baatsɔɔ akɛ wɔkɛ wɔbe miitsu nii jogbaŋŋ?

¹⁷ Yesu kɛɛ Yehowa kɛ kpɔmɔnɔ lɛ hã “koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yoh. 3:16) Akɛni Yesu gbo ehã wɔ hewɔ lɛ, Yehowa baanyɛ ajie wɔ kɛje esha kɛ gbele mli. Esaaa akɛ wɔteŋ mɔ ko mɔ ko hiɛ kpaa enɛ nɔ kɔkɔɔkɔ. (Rom. 3:​23, 24; 2 Kor. 6:1) No hewɔ lɛ, dani Kaimɔ lɛ baashɛ lɛ, hemɔ be ni okɛsusu suɔmɔ ni Yehowa kɛ Yesu jie lɛ kpo lɛ he. Ni enɛ baanyɛ onɔ ni ofee nɔ ko kɛtsɔɔ akɛ ohiɛ esɔ nɔ ni amɛfee lɛ.

¹⁸ Mɛni obaanyɛ ofee kɛtsɔɔ akɛ ohiɛ sɔɔ kpɔmɔnɔ lɛ? Ekolɛ ebaasoro nɔ ni obaafee lɛ yɛ mɔ kroko nɔ lɛ he. Shi ná ole akɛ, kɛ́ ofata Yehowa jálɔi akpekpei abɔ krokomɛi lɛ ahe ni nyɛhi shi akɛ mɛi ni ‘hiɛ kãmɔɔɔ kɛhãaa nyɛ diɛŋtsɛ nyɛhe dɔŋŋ, shi moŋ nyɛhiɛ kãmɔ kɛhã mɔ ni gbo kɛhã nyɛ lɛ,’ no lɛ Yehowa baajɔɔ bo yɛ omɔdɛŋbɔɔ lɛ hewɔ.—2 Kor. 5:15.