Ná “Anɔkwa Wala Lɛ” Mli Ŋɔɔmɔ

YEHOWA NYƆŊMƆ kɛ naanɔ wala henumɔ ewo gbɔmɔ mli. (Jajelɔ 3:​11) Enɛ haa adesai nuɔ he akɛ amɛhe waaa kɛ́ gbele nina amɛ, shi yɛ nakai beaŋ nɔŋŋ lɛ, amɛnuɔ he waa akɛ amɛmiisumɔ ni amɛhi wala mli.

Ŋmalɛ Krɔŋkrɔŋ ni ji Nyɔŋmɔ Wiemɔ ni jɛ mumɔŋ lɛ, kɛ hiɛnɔkamɔ kpele haa wɔ. (2 Timoteo 3:​16) Yehowa ni jieɔ suɔmɔ kpo waa lɛ nyɛŋ abɔ gbɔmɔ kɛ nyɛmɔ ni eeeha ená akɛ eesumɔ waa koni ehi shi kɛya naanɔ koni no sɛɛ lɛ ebu lɛ fɔ́ ní ehi shi afii fioo ko pɛ. Ákɛ Nyɔŋmɔ aaabɔ wɔ koni wɔná hejaramɔ babaoo yɛ wɔshihilɛ hewɔ lɛ kɛ esubaŋ lɛ kpãaa gbee kwraa. Abɔɔɔ wɔ tamɔ “kooloi ni leee wiemɔ ni afɔ́ amɛ aha mɔmɔ kɛ gbee yɛ amɛfɔmɔsu lɛ naa” lɛ.​—⁠2 Petro 2:⁠12.

Beni Yehowa Nyɔŋmɔ kɛ fɔmɔ mli henumɔ kɛha naanɔ wala bɔɔ Adam kɛ Hawa lɛ, efee nɔ ko ni ‘hi naakpa’; efee amɛ yɛ gbɛ ni aaaha amɛhi shi kɛya naanɔ. (1 Mose 1:​31) Shi mɔbɔ sane ji akɛ, klɛŋklɛŋ adesai enyɔ lɛ kɛ amɛ heyeli hegbɛ lɛ tsu nii yɛ gbɛ fɔŋ nɔ, ni amɛku amɛhiɛ amɛshwie nɔ ko ni Bɔlɔ lɛ gu lɛ nɔ, ni emuu ni amɛ́ye yɛ shishijee mli lɛ je amɛdɛŋ. Beni amɛkɛ emuu ni ayeee kɛ gbele eha amɛseshibii lɛ sɛɛ lɛ, amɛgboi.​—⁠1 Mose 2:​17; 3:​1-24; Romabii 5:⁠12.

Biblia lɛ etsɔɔɔ teemɔŋ sane he nɔ ko ni kɔɔ wala yiŋtoo he kɛ nɔ ni gbele tsɔɔ. Ekɛɔ akɛ, yɛ gbele mli lɛ “nitsumɔ loo yiŋshwiemɔ loo nilee loo ŋaa ko bɛ,” ni ákɛ gbohii lɛ ‘leee nɔ ko nɔ ko.’ (Jajelɔ 9:​5, 10) Yɛ gbɛ kroko nɔ lɛ, gbohii lɛ egboi. Susuma ni gbooo tsɔɔmɔ lɛ damɔɔɔ Biblia nɔ, no hewɔ lɛ sane ni shishinumɔ wa ko kwraa bɛ ni esa akɛ ana naa yɛ gbohii lɛ ashihilɛ he.​—⁠1 Mose 3:​19; Lala 146:⁠4; Jajelɔ 3:​19, 20; Ezekiel 18:⁠4.a

Nyɔŋmɔ yɛ yiŋtoo; ebɔɔɔ shikpɔŋ lɛ “efolo.” Eshɔ̃ lɛ “ni” adesai ni yeɔ emuu ni yɔɔ paradeiso shihilɛi ashishi lɛ “ahi nɔ,” ni Nyɔŋmɔ tsakeko eyiŋtoo lɛ. (Yesaia 45:​18; Maleaki 3:⁠6) Bɔni afee ni eba mli lɛ, etsu e-Bi lɛ kɛba shikpɔŋ lɛ nɔ. Akɛni Yesu Kristo hi shi akɛ anɔkwafo kɛtee gbele mli hewɔ lɛ, ekɛ gbɛ ni aaatsɔ nɔ akpɔ̃ adesai kɛjɛ esha kɛ gbele mli lɛ ha. Yɛ anɔkwale mli lɛ, Yesu kɛɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”​—⁠Yohane 3:⁠16.

Nyɔŋmɔ ewo shi jeeŋmɔ akɛ, ebaabɔ “ŋwɛi hee kɛ shikpɔŋ hee.” (Yesaia 65:​17; 2 Petro 3:​13) Nɔ ni baafata he ji Kristofoi anɔkwafoi akuu fioo ko ni eeehala amɛ koni amɛhi wala mli yɛ ŋwɛi. Amɛbaafata Yesu Kristo he kɛye nɔ. Biblia lɛ wieɔ enɛ he akɛ “ŋwɛi maŋtsɛyeli lɛ,” aloo “Nyɔŋmɔ maŋtsɛyeli” ni baaye “nii ni yɔɔ shikpɔŋ lɛ nɔ” lɛ nɔ. (Mateo 4:​17; 12:​28; Efesobii 1:​10; Kpojiemɔ 5:​9, 10; 14:​1, 3) Beni Nyɔŋmɔ ejie efɔŋfeemɔ fɛɛ kɛjɛ wɔ shikpɔŋ lɛ nɔ kɛtee ni etsuu he egbe naa lɛ, ekɛ adesai ashihilɛ hee ni ja, aloo “shikpɔŋ hee” baaba. Nɔ ni baafata enɛ he ji gbɔmɛi ni Nyɔŋmɔ baabaa amɛyi kɛjɛ nibii agbɛjianɔtoo fɔŋ nɛɛ hiɛkpatamɔ ni baa lɛ mli lɛ. (Mateo 24:​3, 7-14, 21; Kpojiemɔ 7:​9, 13, 14) Mɛi ni baafata he ji mɛi ni akɛ amɛ baaba wala mli kɛtsɔ gbohiiashitee ni awo shi yɛ he lɛ nɔ.​—Yohane 5:​28, 29; Bɔfoi lɛ Asaji 24:⁠15.

“Anɔkwa Wala lɛ” Baaba Agbɛnɛ

Beni Nyɔŋmɔ maa bɔ ni wɔsɛɛ be mli Paradeiso shikpɔŋ nɔ shihilɛ baafee miishɛɛ aha lɛ nɔ mi lɛ, ekɛɛ: “Naa, miifee nii fɛɛ ehee.” (Kpojiemɔ 21:⁠5) Ewa akɛ adesai kɛ amɛjwɛŋmɔ aaanu naakpɛɛ nitsumɔi ni Nyɔŋmɔ aaatsu eha amɛ lɛ shishi jogbaŋŋ kɛmɔ shi. Nyɔŋmɔ baafee jeŋ muu fɛɛ paradeiso tamɔ Eden nɔ̃ lɛ pɛpɛɛpɛ. (Luka 23:​43) Taakɛ eji yɛ Eden lɛ, abaana nibii fɛfɛji, sui fɛfɛji babaoo, kɛ gbɛɛmɔi, ni nibii ni ŋɔɔ hu baafa babaoo. Ohia kɛ hɔmɔ sɛɛ baafo, ejaakɛ Biblia lɛ kɛɔ yɛ nakai be lɛ he akɛ: “Tsutsu nii lɛ eho etee.” (Kpojiemɔ 21:⁠4; Lala 72:​16) Mɔ ko mɔ ko ekɛŋ dɔŋŋ akɛ, “migbɔjɔ,” ejaakɛ abaajie hela yɛ jɛmɛ kɛya naanɔ. (Yesaia 33:​24) Hɛɛ, abaajie nɔ fɛɛ nɔ ni kɛ piŋmɔ baa lɛ kɛya kwraa, agbɛnɛ hu abaajie adesai ahenyɛlɔ ni ji gbele ni ehi shi aahu lɛ kɛya. (1 Korintobii 15:​26) Yɛ “shikpɔŋ hee” lɛ he ninaa ni yɔɔ naakpɛɛ, ni ji adesai ashihilɛ hee ni yɔɔ Kristo nɔyeli shishi lɛ mli lɛ, bɔfo Yohane nu gbee ko miikɛɛ akɛ: “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ.” Yɛ ŋwɛi shiwoo nɛɛ sɛɛ lɛ, ani shiwoo ko yɛ ni baanyɛ ekɛ miishɛjemɔ babaoo kɛ mlifilimɔ aba?

Be mli ni Biblia lɛ tsɔɔ nɔ ni baaba yɛ wɔsɛɛ be mli lɛ, ema shihilɛi pɔtɛɛ ni baaha adesai ajeŋba kɛ mumɔŋ otii aya hiɛ lɛ nɔ mi waa. Nine baashɛ otii kpakpai fɛɛ ni adesai egbo he deŋme yakatswaa kɛtao aahu kɛbashi amrɔ nɛɛ lɛ nɔ kwraa kɛmɔ shi. (Mateo 6:​10) Nɔ ni fata enɛɛmɛi ahe ji bɔ ni ashweɔ akɛ aaaná jalɛsaneyeli ni nine shɛko nɔ aahu kɛbashi amrɔ nɛɛ lɛ, ejaakɛ yiwalɛ nɔyelɔi ni eye mɛi ni he waaa lɛ anɔ lɛ epiŋ adesai aahu. (Jajelɔ 8:⁠9) Lalatsɛ lɛ ŋma shihilɛi ni yaa nɔ yɛ Kristo nɔyeli shishi lɛ he sane yɛ gbalɛ naa akɛ: “Jalɛ aaashwere yɛ egbii lɛ amli, ni toiŋjɔlɛ baafá.”​—Lala 72:​7, The New Jerusalem Bible.

Egbɔyeli ji nɔ kroko hu ni mɛi babaoo kɛ amɛhe eshã afɔlei kɛtao. Nyɔŋmɔ baajie hetsɛ̃ kɛya kwraa yɛ “jeŋ hee” lɛ mli. (Mateo 19:​28) Mɔ fɛɛ mɔ baaná woo kome too lɛ nɔŋŋ. Enɛ efeŋ egbɔyeli ni yiwalɛ nɔyeli ko kɛbaaba. Nɔ ni tamɔɔɔ nakai lɛ, abaajie nibii ni kɛ hetsɛ̃ baa lɛ kɛya kwraa, ni nɔ ni fata he ji hiɛjoomɔ kɛ henɔwomɔ ni haa mɛi sumɔɔ koni amɛye mɛi krokomɛi anɔ loo koni amɛbua nibii babaoo anaa lɛ. Yesaia gba akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye.”​—Yesaia 65:⁠21, 22.

Kwɛ bɔ ni gbɔmɔ ena amanehulu yɛ láshishwiemɔ ni baa yɛ ta ni lɛ diɛŋtsɛ ewuɔ lɛ kɛ ta ni kuu muu fɛɛ wuɔ lɛ mli! Enɛ etee nɔ kɛjɛ Habel ni agbe lɛ lɛ nɔ aahu kɛbashi ŋmɛnɛ yɛ tai ni awuɔ lɛ amli. Kwɛ bɔ ni adesai kɛ be babaoo eshwe ni amɛmɛ aahu koni ato toiŋjɔlɛ shishi yɛ nɔ ni tamɔ yakatswaa nifeemɔ mli! Toiŋjɔlɛ baahi gbɔmɛi fɛɛ ateŋ, ni amɛbaafee mɛi ni he jɔ yɛ Paradeiso ni akɛbaaba ekoŋŋ lɛ mli; “amɛmii aaashɛ amɛhe yɛ hejɔlɛ babaoo mli.”​—Lala 37:⁠11.

Yesaia 11:⁠9 kɛɛ: “Shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” Yɛ emuu ni ayeee ni aná akɛ gboshinii lɛ hewɔ lɛ, kɛfata nibii krokomɛi ahe lɛ, ewa kɛha wɔ ŋmɛnɛ akɛ wɔɔnu nɛkɛ wiemɔi nɛɛ ashishi jogbaŋŋ. Ekolɛ kpaako wɔbaakase bɔ ni Nyɔŋmɔ he nilee ni eye emuu lɛ baafee wɔ kɛ lɛ fɛɛ ekome kɛ bɔ ni no kɛ mlifilimɔ babaoo baaba. Shi akɛni Ŋmalɛi lɛ kɛɔ wɔ akɛ Yehowa ji Nyɔŋmɔ ni he yɔɔ naakpɛɛ yɛ hewalɛ, nilee, jalɛsaneyeli, kɛ suɔmɔ mli hewɔ lɛ, wɔbaanyɛ wɔná nɔmimaa akɛ ebaabo sɔlemɔi fɛɛ ni “shikpɔŋ hee” lɛ nɔ bii sɔleɔ lɛ toi.

“Anɔkwa Wala lɛ” Baaba Mli Lɛɛlɛŋ​—Mɔ́ Mli Jogbaŋŋ!

Yɛ mɛi babaoo agbɛfaŋ lɛ, naanɔ wala ni baaba mli yɛ jeŋ kpakpa mli lɛ ji yiŋsusumɔ ko loo lakamɔ ko kɛkɛ. Shi kɛlɛ, yɛ mɛi babaoo ni yɔɔ Biblia mli shiwoo lɛ mli anɔkwa hemɔkɛyeli lɛ agbɛfaŋ lɛ, nɛkɛ hiɛnɔkamɔ nɛɛ baaba mli lɛɛlɛŋ. Etamɔ nɔ ni akɛŋmɛ amɛshihilɛi sɛkɛ. (Hebribii 6:​19) Taakɛ sɛkɛ mɔɔ lɛlɛ ko mli kpɛŋŋ ni ehaaa eya lɛ, nakai nɔŋŋ naanɔ wala he hiɛnɔkamɔ lɛ hu haa gbɔmɛi feɔ shiŋŋ kɛ nɔmimaa ni ehaa amɛkɛ shihilɛ mli naagbai ni hiɛdɔɔ yɔɔ mli lɛ kpeɔ ni amɛyeɔ nɔ kunim.

Wɔbaanyɛ wɔná nɔmimaa akɛ Nyɔŋmɔ baaye eshiwoi anɔ. Ekã kita po ni ekɛma nɔ mi, shiwoo ni enyɛŋ etsake. Bɔfo Paulo ŋma akɛ: “Beni Nyɔŋmɔ tao akɛ etsɔɔ shiwoo lɛ yelɔi lɛ akɛ eyiŋtoo lɛ tsakeee kwraa lɛ, ekɛ kita damɔ mli; koni wɔtsɔ saji enyɔ ni tsakeee ni Nyɔŋmɔ nyɛŋ emale yɛ mli lɛ anɔ, wɔná miishɛjemɔ ni wa, ni . . . wɔkɛmɔ nɔhiɛkamɔ ni kã wɔhiɛ lɛ mli.” (Hebribii 6:​17, 18) “Saji enyɔ ni tsakeee” ni Nyɔŋmɔ nyɛŋ ajie kɛya kwraa lɛ ji eshiwoo kɛ ekitakamɔ ni wɔhiɛnɔkamɔ lɛ damɔ nɔ lɛ.

Nyɔŋmɔ shiwoo lɛ mli hemɔkɛyeli kɛ miishɛjemɔ kɛ mumɔŋ hewalɛ babaoo haa. Yoshua ni ji Israelbii ahiɛnyiɛlɔ lɛ ná hemɔkɛyeli ni tamɔ nɛkɛ. Beni Yoshua kɛ Israelbii lɛ wie ni ekɛ amɛ ye shɛɛ lɛ, no mli lɛ egbɔ ni ele akɛ etsɛŋ ni ebaagbo. Ni kɛlɛ, ejie hewalɛ kɛ anɔkwayeli ni ekaaa ni jɛ hekɛnɔfɔɔ kwraa ni ayɔɔ yɛ Nyɔŋmɔ shiwoi amli lɛ kpo. Beni Yoshua kɛɛ akɛ ebaaya “jeŋjeŋ fɛɛ yaahe lɛ,” ni ji gbɛ ni kɛ adesai fɛɛ yaa gbele mli lɛ, ekɛɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛ hewɔ lɛ, emli ekome folo ekaaa shi, fɛɛ eba mli eha nyɛ, emli ekomefolo ekaaa shi.” Hɛɛ, Yoshua tĩ mli shii etɛ sɔŋŋ akɛ Nyɔŋmɔ yeɔ eshiwoi fɛɛ nɔ.​—Yoshua 23:⁠14.

Bo hu obaanyɛ oná hemɔkɛyeli ni tamɔ nakai nɔŋŋ yɛ jeŋ hee ni etsɛŋ ni akɛbaaba lɛ he shiwoo ni Nyɔŋmɔ kɛha lɛ mli. Kɛ okɛ ekãa kase Biblia lɛ, obaanu mɔ ni Yehowa ji lɛ shishi kɛ nɔ hewɔ ni esumɔɔ ni okɛ ohe afɔ̃ enɔ kwraa lɛ. (Kpojiemɔ 4:​11) Abraham, Sara, Isak, Yakob, kɛ blema anɔkwafoi krokomɛi yɛ hemɔkɛyeli ni ekaaa ni damɔ anɔkwa Nyɔŋmɔ Yehowa lɛ he nilee ni mli wa ni amɛyɔɔ lɛ nɔ. Amɛtee nɔ amɛná hemɔkɛyeli ni mli wa, yɛ anɔkwale ni eji akɛ “amɛnine shɛko nii ni awo shi lɛ anɔ” lɛ fɛɛ sɛɛ beni amɛyɔɔ wala mli lɛ. Ni kɛlɛ, “shɔŋŋ kɛkɛ amɛna yɛ, ni amɛkɛshɛje amɛmii, ni amɛnyã he.”​—Hebribii 11:⁠13.

Akɛni wɔnuɔ Biblia gbalɛi ashishi hewɔ lɛ, amrɔ nɛɛ wɔnaa bɔ ni “Nyɔŋmɔ Ofe lɛ gbi wulu lɛ” bɛŋkɛɔ yɛ be mli ni abaajie efɔŋfeemɔ fɛɛ kɛjɛ shikpɔŋ lɛ nɔ lɛ. (Kpojiemɔ 16:​14, 16) Taakɛ blema hii anɔkwafoi ji lɛ, esa akɛ wɔya nɔ wɔkɛ nɔmimaa akpa nibii ni baaba wɔsɛɛ lɛ gbɛ, yɛ be mli ni hemɔkɛyeli kɛ suɔmɔ ni wɔyɔɔ kɛha Nyɔŋmɔ kɛ suɔmɔ kɛha “anɔkwa wala lɛ” kanyaa wɔ lɛ. Bɔ ni jeŋ hee lɛ ebɛŋkɛ lɛ woɔ mɛi ni náa Yehowa mli hemɔkɛyeli ni amɛsumɔɔ lɛ lɛ hewalɛ waa. Ehe miihia ni aha hemɔkɛyeli kɛ suɔmɔ ni tamɔ nɛkɛ ada bɔni afee ni aná Nyɔŋmɔ hiɛ duromɔ kɛ hebuu yɛ egbi kpeteŋkpele ni ebɛŋkɛ lɛ mli.​—Zefania 2:⁠3; 2 Tesalonikabii 1:⁠3; Hebribii 10:​37-⁠39.

No hewɔ lɛ, ani osumɔɔ wala? Ni ani osumɔɔ “anɔkwa wala lɛ” waa diɛŋtsɛ​—ni ji wala ni oooná akɛ Nyɔŋmɔ sɔɔlɔ ni akpɛlɛ enɔ kɛ hiɛnɔkamɔ akɛ oooná wɔsɛɛ shihilɛ ni miishɛɛ yɔɔ mli, hɛɛ, kɛ naanɔ wala? Kɛ no ji nɔ ni otaoɔ lɛ, no lɛ bó bɔfo Paulo ni ŋma akɛ esaaa akɛ ‘wɔŋɔɔ wɔhiɛ hu wɔfɔ̃ɔ nifálɛ ni bɛ shweshweeshwe lɛ nɔ, shi moŋ Nyɔŋmɔ nɔ lɛ’ ŋaawoo lɛ toi. Paulo tee nɔ akɛ: ‘Nyɛtsɔmɔa niiatsɛmɛi yɛ ejurɔfeemɔi agbɛfaŋ,’ nɔ ni woɔ Nyɔŋmɔ hiɛ nyam lɛ, bɔni afee ni ‘wɔmɔ anɔkwa wala lɛ mli.’​—1 Timoteo 6:​17-⁠19.

Kɛ okpɛlɛ nɔ akɛ Yehowa Odasefoi kɛ bo afee Biblia mli nikasemɔ lɛ, obaanyɛ oná anɔkwa nilee ni ‘tsɔɔ naanɔ wala.’ (Yohane 17:⁠3) Ajɛ suɔmɔ mli aŋma ninefɔɔ ni tamɔ tsɛ nɔ̃ nɛɛ afɔ̃ shi yɛ Biblia lɛ mli, ni ji akɛ: “Mibi, ohiɛ akakpa mimla lɛ nɔ, shi ha otsui ato mikitai lɛ! Ejaakɛ gbii asɛɛjɛkɛmɔ kɛ wala afii kɛ hejɔlɛ amɛaaŋɔfata he amɛhao.”​—Abɛi 3:​1, 2.

[Shishigbɛ niŋmai]