Amɛbaanyɛ Amɛye Amɛbua Bo Ni Oshiɛ
BENI Yesu kɛɛ ekaselɔi lɛ akɛ amɛya ni amɛyashiɛ lɛ, no mli lɛ eka shi faŋŋ akɛ amɛleee bɔ ni nitsumɔ ni ekudɔɔ amɛ ewoɔ mli lɛ ji pɔtɛɛ. (Mateo 10:7) Amɛkɛ toiboo nyiɛ enɔkwɛmɔ nɔ lɛ sɛɛ ni amɛtee ‘ni amɛyakpa maji kɛ akrowai amli amɛshiɛ Nyɔŋmɔ maŋtsɛyeli lɛ he sanekpakpa lɛ amɛtsɔɔ mɛi.’ (Luka 8:1) No ji shiɛmɔ he mɔdɛŋbɔɔ ni je shishi fioo ni etee nɔ eda aahu ni eha gbɔmɛi ni yɔɔ shikpɔŋ muu lɛ fɛɛ nɔ lɛ ebanu Maŋtsɛyeli lɛ he sanekpakpa lɛ.
Yɛ Kristofoi asafo lɛ shishijee gbii lɛ amli lɛ naabu pɛ akɛshiɛ wiemɔ lɛ. Yesu kaselɔi lɛ kɛ mɔ fɛɛ mɔ ni baabo toi lɛ wieɔ. “Ni amɛfɔɔɔ nitsɔɔmɔ kɛ Yesu Kristo shiɛmɔ yɛ sɔlemɔ we lɛ kɛ shiai be fɛɛ be.”—Bɔfoi lɛ Asaji 5:42.
Ŋwɛi sɛɛfimɔ je kpo ejaakɛ amɛnyɛ amɛfee okadii. (Bɔfoi lɛ Asaji 14:3) Amɛtsa gbɔmɛi pii ahelai ni amɛhi shi koni amɛbo mumɔŋ tsamɔ wiemɔi atoi. Nɔ ni jɛ mli ba ji akɛ “akɛ mɛi ni heɔ Nuŋtsɔ lɛ nɔ yeɔ, hii kɛ yei babaoo bafata amɛhe.”—Bɔfoi lɛ Asaji 5:14-16.
Sanekpakpa lɛ Gbɛɛ kɛ Shwamɔ Ŋmɛnɛ
Beni bɔfoi lɛ gboi sɛɛ lɛ, helatsamɔ kɛ lilɛi ni ji nikeenii lɛ sɛɛ fo. Shi ani enɛ tsake nitsumɔ ni Yesu kɛha ekaselɔi lɛ yɛ gbɛ ko nɔ? Dabi! Ekɛɛ amɛ akɛ “nyɛyafea jeŋmaji fɛɛ mikaselɔi” ni yɛ be mli ni amɛfeɔ nakai lɛ, ekɛ amɛ baahi shi “kɛyashi jeŋ naagbee lɛ.” (Mateo 28:19, 20) Ŋmɛnɛ, Ŋmalɛ mli odaseyeli yɛ faŋŋ akɛ je lɛ naagbee lɛ mli wɔyɔɔ lɛ. Ani Yesu eha eshiwoo akɛ ekɛ ekaselɔi lɛ baahi shi yɛ kaselɔ-feemɔ nitsumɔ lɛ mli lɛ eba mli? Odaseyeli lɛ kɛɔ akɛ hɛɛ!
Bɔni afee ni nine ashɛ shikpɔŋ lɛ nɔ bii akpekpei toi akpe akpei abɔ lɛ anɔ kɛtsɔ naabu ni akɛaashiɛ wiemɔ lɛ nɔ kɛkɛ lɛ baafee adesa nitsumɔ ni ehiŋ feemɔ. No hewɔ lɛ, akɛ yelikɛbuamɔ eha yɛ Biblia he woji ni gbɔmɛi lɛ baanyɛ akane yɛ amɛ diɛŋtsɛ amɛshiai amli lɛ mli. Akɛ nɔkwɛmɔ nɔ lɛ, yɛ afi 1879, beni Biblia Kaselɔi mɔdɛŋbɔlɔi akuu ko miisumɔ ni amɛkɛ Nyɔŋmɔ Maŋtsɛyeli lɛ sane lɛ aha mɛi krokomɛi lɛ, amɛje shishi akɛ amɛaafee woji, tamɔ Biblia he wolo ni amrɔ nɛɛ ale akɛ Buu-Mɔɔ lɛ, kɛ agbɛnɛ dɛhiɛmɔ woji bibii ni kɔɔ Biblia mli saji ahe. Klɛŋklɛŋ lɛ, amɛkɛ woji akalalɔi ni he amɛ shika dani amɛkala amɛwoji amɛba amɛ tsu nii. Beni shɛɔ afi 1920 lɛ, amɛna amɛ diɛŋtsɛ amɛ woji akalamɔ tsɔnei yɛ tsu ni amɛwoɔ he nyɔmɔ ko mli, ni beni shɛɔ 1927 lɛ, amɛma amɛ diɛŋtsɛ amɛ nitsumɔ he tsu ni amɛkalaa Bibliai, woji, woji bibii, woji tɛtrɛbii kɛ dɛhiɛmɔ woji yɛ mli koni mɔ fɛɛ mɔ ni sumɔɔ ni eye ebua ni akɛtsu nitsumɔ ni Yesu kɛwo ekaselɔi lɛ adɛŋ lɛ he nii lɛ kɛtsu nii.
Akɛni amɛhaaa shitee-kɛ-wolɔi ni kɛɛ akɛ nɛkɛ woji akalamɔ nɛɛ baafee yaka lɛ aje amɛnijiaŋ wui hewɔ lɛ, Buu Mɔɔ Asafo lɛ ebana woji akalamɔ tsɔnei yɛ shikpɔji sɔrɔtoi anɔ yɛ jeŋ muu fɛɛ. Yɛ nyɛsɛɛ afii lɛ pɛ mli lɛ, amɛfee Bibliai, woji, kɛ woji bibii fe 63,000,000, kɛ woji tɛtrɛbii fe 582,000,000 yɛ wiemɔi fe 200 mli.
Woji ni amɛfee lɛ eye ebua babaoo yɛ gbɔmɛi lɛ amumɔŋ hiamɔ nii ni akɛhaa amɛ lɛ mli. Akala woji aha gbɔmɛi ni hiɛ jwɛŋmɔi sɔrɔtoi kɛ hemɔkɛyelii sɔrɔtoi. Obalaŋtai akpekpei abɔ ahiɛ esɔ My Book of Bible Stories kɛ Your Youth-Getting the Best out of It lɛ. Agbɛnɛ Making Your Family Life Happy lɛ efee sɛɛnamɔ kpele ni ewaje wekukpaa ni etsɔɔ wumɛi kɛ ŋamɛi gbɛ ni esa akɛ amɛtsɔ nɔ ni amɛjie suɔmɔ babaoo kpo amɛtsɔɔ amɛhe. Nɔ ni ye ebua mɛi hee ni sumɔɔ ni amɛfee anɔkwale lɛ amɛ diɛŋtsɛ amɛnɔ hu ji Ekome ni Afee Kɛmiija Anɔkwa Nyɔŋmɔ Kome Lɛ. Gbɔmɛi ni kaneɔ wolo nɛɛ ena akɛ ahaa amɛjwɛŋɔ ni amɛsusuɔ wekukpaa ni ka amɛkɛ Nyɔŋmɔ teŋ lɛ he kɛyaa shɔŋŋ.
Wolo ni afɔɔ lɛ tsɛmɔ akɛ “blue bombshell” ni ji Anɔkwale ni kɛ Mɔ Yaa Naanɔ Wolo Mli Lɛ ena hewalɛ yɛ gbɔmɛi akpekpei abɔ ashihilɛ nɔ yɛ naakpɛɛ gbɛ nɔ. Ni mɛi krokomɛi abɔ ni enɛ baatsirɛ amɛ ni amɛsɔmɔ Nyɔŋmɔ yɛ Biblia mli anɔkwalei ni amɛkaseɔ kɛjɛɔ nɛkɛ wolo nɛɛ mli lɛ, be pɛ baatsɔɔ.
Amrɔ nɛɛ, mɛi ni tsuɔ nii yɛ sanekpakpa lɛ shiɛmɔ mli yɛ Yesu gbɛtsɔɔmɔ shishi lɛ ena yelikɛbuamɔ kɛtsɔ wolo ni ji Obaanyɛ Ohi Shi Kɛyaa Naanɔ yɛ Paradeiso yɛ Shikpɔŋ Nɔ lɛ nɔ. Akɛ gbɔmɛi akpekpei abo miikase Biblia lɛ, ni amɛteŋ mɛi pii miitsake amɛ shihilɛ koni ekɛ Biblia mli shishitoo tɛi akpa gbee.
Akɛ nɔkwɛmɔ nɔ lɛ, nuu ko ni eye afii 68 ni yɔɔ New York State lɛ nyɛminuu ni yɔɔ Colorado lɛ maje lɛ Buu Mɔɔ Asafo lɛ woji lɛ eko koni ekane. Nuu nɛɛ kane woji lɛ fɛɛ ni akɛmaje lɛ lɛ ni ena miishɛɛ akɛ eeeje nikasemɔ shishi yɛ Obaanyɛ Ohi Shi Kɛya Naanɔ wolo lɛ mli beni Odasefonyo ko ba eshia lɛ. Nuu nɛɛ ebua tui sɔrɔtoi sɔrɔtoi ni ena gbɛi yɛ yinɔsane mli lɛ anaa yɛ ewala shihilɛ be mli, shi heni ekane ni enu akɛ mɛi ni sɔmɔɔ Yehowa lɛ ekaseŋ tawuu dɔŋŋ lɛ, amrɔ nɔŋŋ pɛ kɛkɛ ni ehɔɔ nɛkɛ tui nɛɛ fɛɛ yɛ jara ni ha emɔ nyɔmɔ kwraa naa. (Yesaia 2:4) Kɛfata he lɛ, beni eshɛre zigaret waa afii 53 sɛɛ lɛ, ekpa zigaret lɛ shɛremɔ yɛ be mli ni ekane akɛ enɛ esaaa Yehowa hiɛ lɛ. (2 Korintobii 7:1) Beni ekase kɛtsɔ nikasemɔi lɛ amli akɛ esa akɛ ekɛ mɛi krokomɛi aja sanekpakpa lɛ, ekɛ hekpokpomɔ fioo saa ehe koni eyasara ebinuu kɛ eshaayoo koni ekɛ amɛ kɛ enabii lɛ awie. Beni ebote gbɔi atsu lɛ mli pɛ kɛkɛ ni ehiɛ kpɛ kɛ miishɛɛ ejaakɛ ena Obaanyɛ Ohi Shi Kɛya Naanɔ wolo lɛ ekome yɛ okpɔlɔ lɛ nɔ. Eshaayoo lɛ miikase wolo nɛɛ, shi elé bɔ ni eeefee ni eha eshaanuu nɛɛ ale wolo nɛɛ mli sane. Mɛi enyɔ lɛ fɛɛ etee hiɛ fɛfɛo yɛ mumɔŋ.
Ama Yehowa Odasefoi akpee he tsu ko kɛbɛŋkɛ Katolek sɔlemɔ tsu ko yɛ Spain. Osɔfo lɛ mli fu waa. Ekɛɛ akɛ eji ele akɛ Odasefoi lɛ baama tsu yɛ jɛmɛ kulɛ, ebaahe shikpɔŋ lɛ koni amɛnine akashɛ nɔ ni amɛma tsu yɛ nɔ. Nɛkɛ Maŋtsɛyeli Asa nɛɛ yɛ samfɛlɛ ko ni anaa Obaanyɛ Ohi Shi Kɛya Naanɔ wolo lɛ yɛ mli. Asafo lɛ mli nyo ko gbeleɔ baafa kome daa gbi. Maŋ lɛ mli bii lɛ baa ni amɛwaa jɛmɛ kɛkɛ lɛ amɛkane baafa hee lɛ. Nɔ ni jɛ mli ba ji akɛ, mɛi pii na he miishɛɛ, ni akɛ amɛ to Biblia kasemɔ he gbɛjianɔ. Hɛɛ, wolo lɛ fee odasefonyo ni ewieee, kɛlɛ enitsumɔ mɔɔ shi.
Gbɛfaŋnɔ ni Woji Tɛtrɛbii Naa yɛ Sanekpakpa lɛ Gbɛɛ kɛ Shwamɔ Mli
Beni akala klɛŋklɛŋ Buu-Mɔɔ lɛ yɛ July 1879 mli lɛ, yibɔ ni akala lɛ ji ekomekomei 6,000 pɛ. Ni kɛlɛ, kuu fioo ni kaneɔ lɛ kɛ miishɛɛ gbaa mɛi krokomɛi saji ni yɔɔ mli lɛ. Ŋmɛnɛ, Yehowa Odasefoi fe 3,500,000 kɛ ekomekomei 13,000,000 ni akalaa be fɛɛ be lɛ tsuɔ nii koni amɛkɛjaje Nyɔŋmɔ Maŋtsɛyeli lɛ amɛtsɔɔ akɛ adesai fɛɛ ahiɛnɔkamɔ kome pɛ.
Wolo tɛtrɛɛ lɛ eye ebua babaoo yɛ ŋmalɛ mli saji ashishitsɔɔmɔ mli. Sane kome ni yaa nɔ yɛ Buu-Mɔɔ lɛ mli bianɛ ji Yesu shihilɛ kɛ esɔɔmɔ nitsumɔ lɛ. Enɛ eye ebua akpekpei abɔ koni amɛna ni amɛnu sanekpakpai lɛ amli saji lɛ ashishi jogbaŋŋ.
Buu-Mɔɔ lɛ kɛ Awake! lɛ amli nɔ krɛdɛɛ ni ajeɔ gbɛ akalaa lɛ fɛɛ ji nɔ ni atoɔ he gbɛjianɔ koni eshɛ obalaŋtai atsuii amli. Nɔ ni akalaa kɛtsaraa nɔ ni ji “Nyɔŋmɔ Wiemɔ lɛ Hiɛ Ka” lɛ etsɔɔ shishitoo taomɔ nii pii ni etsɔɔ saji pii amli yɛ gbɔmɛi ajwɛŋmɔi amli. Ekroko ni akalaa kɛtsaraa nɔ ni ji “Obalaŋtai Biɔ Akɛ . . .” lɛ hu eye ebua sanebimɔi diɛŋtsɛ ni kɔɔ shihilɛ he, kɛkɛ lɛ ekɛ hetoi ni anyɛɔ atsuɔ he nii ni ŋmalɛi lɛ fiɔ sɛɛ koni ekudɔ obalaŋtai ajwɛŋmɔi kɛ amɛ nifeemɔi yɛ nɛkɛ haomɔ gbii nɛɛ amli lɛ eha. Kɛ Yehowa Odasefoi jɛ amɛ woji tɛtrɛbii lɛ amli amɛkɛ enɛ tsɔɔ lɛ, akɛ miishɛɛ heɔ.
Shi kɛfata nɛkɛ saji krɛdɛɛi nɛɛ ahe lɛ, nɔ ni ji sane oti loo agugu ni yɔɔ Buu-Mɔɔ lɛ mli lɛ efee emli saji titrii ni woɔ hemɔkɛyeli kɛ anɔkwa Kristofoi fɛɛ ahekɛnɔfɔɔ mli hewalɛ lɛ. Nɛkɛ saji ni damɔ Ŋmalɛi lɛ nɔ lɛ kɛ odaseyeli ni tsɔɔ mɔ yiŋ haa akɛ nibii agbɛjianɔtoo lɛ naagbee ebɛŋkɛ diɛŋtsɛ, ni egbaa Biblia gbalɛ mlibaa he saji, ni ekɛ ŋaawoo ni jɛ tsui mli haa yɛ gbɛ ni esa akɛ Kristofoi atsɔ nɔ aba amɛjeŋ yɛ be ni wɔyɔɔ mli nɛɛ hewɔ. Akɛni nilee ni tamɔ nɛkɛ yimɔɔ amɛ obɔbɔ hewɔ lɛ, Kristofoi etswa amɛfai shi akɛ amɛkɛ nibii ni amɛkase lɛ baatsu nii yɛ amɛ shiɛmɔ nitsumɔ lɛ mli.
Bei abɔ lolo ni nɛkɛ shiɛmɔ nitsumɔ nɛɛ baaya nɔ dani nibii agbɛjianɔtoo nɛɛ naagbee aba lɛ, wɔleee. Ni kɛlɛ, wɔbaanyɛ wɔna nɔmimaa akɛ woji ni Yehowa Odasefoi kalaa ni amɛjaa lɛ baaya nɔ afee yelikɛbuamɔ nɔ kpele aha Kristofoi yɛ be mli ni amɛtsuɔ nitsumɔ ni amɛ Hiɛnyiɛlɔ, Yesu kɛwo amɛdɛŋ lɛ he nii lɛ.