Nɔ Hewɔ ni Hewalɛ ni Akɛtsuɔ Nii yɛ Gbɛ Fɔŋ Nɔ Iɛ Baaba Naagbee kɛ̃
BLEMA Maŋtsɛ Salomo yoo hewalɛ ni akɛtsuɔ nii yɛ gbɛ fɔŋ nɔ yɛ egbii lɛ amli lɛ: “Kɛkɛ ni misaa mina yiwalɛi fɛɛ ni awaa mɛi ayi [hewalɛ ni akɛtsuɔ nii yɛ gbɛ fɔŋ nɔ] yɛ hulu shishi nɛɛ: ni naa mɛi ni awaa amɛ yi lɛ yaafonui, ni amɛbɛ miishɛjelɔ ko, ni amɛyiwalɔi lɛ anineshi wa yɛ amɛnɔ, shi amɛbɛ miishɛjelɔ ko.”—Jajelɔ 4:1.
Shi obaabi lɛlɛŋ akɛ, ‘Akɛni hewalɛ ni akɛtsuɔ nii yɛ gbɛ fɔŋ nɔ lɛ ehi shi kɛjɛ blema hewɔ lɛ, ani ekɛ wɔ baahi shi kɛya naanɔ? Dabi, ebaŋ lɛ nakai. Ejaakɛ, taakɛ Salomo diɛŋtsɛ ŋma yɛ mumɔ naa lɛ, Mɔ ko yɛ ni eyoo enɛɛmɛi fɛɛ: “Kɛ ona akɛ aawa ohiafo ko yi, ni aatsɔ kojomɔ kɛ jalɛsane hiɛ aabu shi yɛ shikpɔŋ ko nɔ lɛ, kaaha nakai sane lɛ miifeeo naakpɛɛ, ejaakɛ mɔ ni da lɛ, mɔ ni da fe lɛ lɛ miikwɛ lɛ, ni mɔ yɛ ni da fe amɛ fɛɛ.”—Jajelɔi 5:7.
Nyɔŋmɔ Wiemɔ, Ŋmalɛ Krɔŋkrɔŋ lɛ ni ji Biblia lɛ tsɔɔ akɛ, Yehowa, Ŋwɛi Flooflonyo lɛ hewalɛ kɛ nilee bɛ naagbee, ni agbɛnɛ eyeɔ emuu yɛ jalɛsaneyeli mli, ni eji suɔmɔ ni ajie lɛ kpo yɛ gbɔmɔtso su mli diɛŋtsɛ. Akɛni eji Nyɔŋmɔ ni tamɔ nɛkɛ hewɔ lɛ, eŋmɛŋ gbɛ ni shihilɛi ni ejaaa nɛɛ aya nɔ kɛya naanɔ. Lalatsɛ David ŋma akɛ: “Kaawo otsui la hu, efɔŋfeemɔ mli kɛkɛ ekɛ mɔ yaa. Ejaakɛ efɔŋfeelɔi lɛ, aaafolɔ amɛ ashwie; shi mɛi ni kwɛɔ Yehowa gbɛ lɛ shikpɔŋ lɛ aaatsɔ amɛnɔ.”—Lala 37:8, 9.
Wɔnaa nɔmimaa lolo kɛjɛɔ gbalɔ Yesaia wiemɔi lɛ amli: “Ni mawo je lɛ nyɔmɔ yɛ amɛnɔfɔŋ lɛ hewɔ, kɛ mɛi fɔji hu yɛ amɛnɔsha lɛ hewɔ, ni maha hewolɔi ahetsɔɔmɔ lɛ sɛɛ afo,ni maba yiwalɔi [mɛi ni kɛ hewalɛ tsuɔ nii yɛ gbɛ fɔŋ nɔ lɛ] ahenɔwomɔ lɛ shi.”—Yesaia 13:11.
Shi afii ohai abɔ nɛ ni aŋmala nɛkɛ wiemɔi nɛɛ. No hewɔ lɛ mɛni hewɔ wɔbaanyɛ wɔna nɔmimaa akɛ Yehowa Nyɔŋmɔ baatsu eshiwoo akɛ ebaaha hewalɛ ni akɛtsuɔ nii yɛ gbɛ fɔŋ nɔ lɛ aba naagbee lɛ he nii? Ejaakɛ etsu hewalɛ ni eyɔɔ akɛ eeenyɛ efee nakai lɛ he nii pɛŋ yɛ blema bei lɛ amli. Dani Noa Nu Afua lɛ aaashɛ lɛ, no mli Iɛ akɛ hewalɛ miitsu nii yɛ gbɛ fɔŋ nɔ waa. Wɔkaneɔ akɛ “awo shikpɔŋ lɛ nɔ obɔ kɛ yiwalɛ.” (1 Mose 6:5, 11) Ni mɛni ji yiwalɛ nɛɛ fe hewalɛ ni akɛtsuɔ nii yɛ gbɛ fɔŋ nɔ? Nakai nɔŋŋ eji anɔkwale yɛ Sodom kɛ Gomora yiwalɛ maji ni yɔɔ Lot gbii lɛ amli lɛ ahe. (1 Mose 18:20, 21; 19:4-29) Yehowa kɛ hewalɛ ni akɛtsuɔ nii yɛ gbɛ fɔŋ nɔ nɛɛ fɛɛ ba naagbee. No hewɔ lɛ wɔnaa akɛ Yehowa Nyɔŋmɔ jeee mɔ ni ŋmɛɔ hewalɛ ni akɛtsuɔ nii yɛ gbɛ fɔŋ nɔ lɛ gbɛ kɛyaa naanɔ.
Bɔni afee ni akɛ nɔ ko afata he ni akɛma nɔ mi akɛ Yehowa Nyɔŋmɔ baatsu he nii lɛ ji anɔkwasane ni tsɔɔ akɛ eji Nyɔŋmɔ ni yeɔ egbɛi Iɛ he awuŋa lɛ, ni hewalɛ ni akɛtsuɔ nii yɛ gbɛ fɔŋ nɔ lɛ fɛɛ teɔ shi ewoɔ enɔyeli. Kadimɔ bɔ ni enɛ kɔɔ sane nɛɛ he lɛ yɛ nɛkɛ ŋmalɛi nɛɛ amli: “Mɔ ni waa ohiafo yi lɛ, eebɔ e-Feelɔ lɛ ahora.” “Mɔ ni yeɔ ohiafo he fɛo lɛ, eebɔ e-Feelɔ lɛ ahora.”—Abɛi 14:31; 17:5, NW.
Belɛ wɔbaanyɛ wɔna miishɛɛ akɛ Ŋwɛi Flooflonyo lɛ eŋmɛŋ gbɛ ni abɔ lɛ ahora kɛya naanɔ. Nɔ ni shwɛɔ pɛ ji sanebimɔ kome: Mɛɛ be hewalɛ ni akɛtsuɔ nii yɛ gbɛ fɔŋ nɔ nɛɛ baaba naagbee?
Mɛɛ Be Ebaaba Naagbee?
Nyɔŋmɔ Wiemɔ lɛ kɛɔ wɔ akɛ: “Nɔ fɛɛ nɔ yɛ ebe ni ato, ni nitsumɔ fɛɛ nitsumɔ ni yɔɔ ŋwɛi shishi nɛɛ yɛ ebe.” (Jajelɔ 3:1) Mɛi komɛi yɛ ni amɛnaaa tsui kwraa yɛ be ni Nyɔŋmɔ eto kɛha ehe lɛ hewɔ. Shi akɛɔ wɔ akɛ: “Jeee tsɛ Nuŋtsɔ [Yehowa] lɛ haa eshiwoo lɛ sɛɛ tsɛɔ, . .. shi moŋ etsui shi etoɔ ehaa wɔ, ejaakɛ esumɔɔɔ akɛ mɛi komɛi alaaje.”—2 Petro 3:9.
Biblia gbalɛ mlibaa tsɔɔ akɛ yiwalɛ je nɛɛ, aloo nibii agbɛjianɔtoo nɛɛ naagbee be mli wɔyɔɔ nɛɛ. Nɛkɛ yinɔ nɛɛ ena Yesu gbalɛ kpeteŋkpele ni kɔɔ ba ni eba lɛ kɛ nibii agbɛjianɔtoo nɛɛ naagbee lɛ he lɛ mlibaa: shikpɔŋhosomɔi, hɔmɔ, tsɛŋemɔ helai, mlakwamɔ ni faa babaoo, kɛ Nyɔŋmɔ Maŋtsɛyeli lɛ he sanekpakpa lɛ ni ashiɛɔ. (Mateo 24:1-35; Luka 21:10, 11) Enɛ tsɔɔ wɔbe nɛɛ akɛ yiwalɛ je nɛɛ naagbee gbii.
Akɛni nɛkɛ gbii nɛɛ ji naagbee gbii lɛ hewɔ lɛ, wɔmiikpa gbɛ akɛ etsɛŋ ni wɔbaana Zefania 3:8 gbalɛ lɛ mlibaa: “No hewɔ lɛ nyɛkwɛa mi gbɛ, Yehowa kɛɛ, kɛyashi gbi nɔ ni mate shi akɛ Odasefonyo! Ejaakɛ miyiŋtoo ji akɛ mabua jeŋmaji lɛ anaa, ni makpee maŋtsɛyelii lɛ kɛaakpe, koni mafɔse mimlila kɛ mimlifu ni naa wa lɛ fɛɛ mashwie amɛnɔ; ejaakɛ miwuŋayeli la lɛ aaasha shikpɔŋ muu lɛ fɛɛ.”
Yɛ anɔkwale mli lɛ, nakai wiemɔ lɛ maa nɔ mi kɛhaa wɔ akɛ Yehowa Nyɔŋmɔ kɛ hewalɛ ni akɛtsuɔ nii yɛ gbɛ fɔŋ nɔ lɛ baaba naagbee.