Miishɛjemɔ Ni Wɔɔna Kɛjɛ Nyɔŋmɔ Wiemɔ Lɛ Mli
YEHOWA ji “musuŋtsɔlɔi a-Tsɛ kɛ miishɛjemɔ fɛɛ Nyɔŋmɔ lɛ, mɔ ni shɛjeɔ wɔmii yɛ amanehului lɛ fɛɛ mli.” (2 Korintobii 1: 3, 4) No hewɔ lɛ, esa ni wɔtsɔ wɔhiɛ wɔba lɛ kɛ e-Wiemɔ lɛ kɛha miishɛjemɔ diɛŋtsɛ kɛ jiemɔ yɛ fimɔ bei amli—Romabii 15:4.
Kɛ́ wɔyeɔ anɔkwale wɔhaa Nyɔŋmɔ lɛ, belɛ, ‘ekwaŋ wɔ gbi ko gbi ko.’ Wɔbaanyɛ wɔwie kɛ nɔmimaa akɛ: “Yehowa ji miyelikɛbualɔ, ni misheŋ gbeyei; mɛni gbɔmɔ aaafee mi?” (Hebribii 13:5, 6; Lala 37:3, 40; 145:20, NW) No hewɔ lɛ, eji anɔkwale akɛ esaaa ni wɔfeɔ wɔhe mɛi ni ehao aloo mɛi ni nijiaŋ eje wui beni wɔnaa nɔ̃ yɛ fimɔ babaoo mli lɛ po.
Yesu wie kɛfata egbalɛ kpeteŋkpele ni miiba mli yɛ wɔbe nɛɛ mli Iɛ he akɛ: “Shi fɔlɔi tete kɛ nyɛmimɛi kɛ wekumɛi kɛ shieŋtsɛmɛi aaaŋɔnyɛ aha, ni amɛaaha agbe nyɛteŋ mɛi komɛi; ni mɛi fɛɛ aaanyɛnyɛ yɛ migbɛi hewɔ:” Shi enɛ sɛɛ nɔŋŋ kɛkɛ ni Yesu kɛfata he akɛ: “Shi nyɛyiteŋ tsɔi kome nɛkɛ elaajeŋ.” (Luka 21:16-18) Yɛ mɛɛ gbɛ nɔ? Yɛ gbohiiashitee, nɔ hiɛnɔkamɔ ni waje Paulo lɛ nɔŋŋ nɔ. (Yohane 5:28, 29; 2 Korintobii 1: 9, 10) Ani ejeee nɔ ni shɛjeɔ wɔmii akɛ wɔɔle akɛ gbele po nyɛŋ ajie hiɛnɔkamɔ ni wɔyɔɔ kɛha wɔsɛɛ lɛ kɛjɛ jɛmɛ?
Susumɔ miishɛjemɔ ni hiɛnɔkamɔ nɛɛ kɛ Nyɔŋmɔ yelikɛbuamɔ he shiwoo baanyɛ ekɛha Kristofoi ni awaa amɛyi ni apiiɔ amɛ lɛ, mɛi ni etsɔmɔ Obubuafoi kɛ kpajelɔi yɛ yiwaa hewɔ, yei ni sheɔ Nyɔŋmɔ gbeyei ni amɔmɔ amɛ ekaa naa akɛ amɛ ewɔ, fɔlɔi ni akɛ nɔnyɛɛ egbala amɛkɛ amɛbii ateŋ lɛ he okwɛ. Hɛɛ, wɔnaa miishɛjemɔ wiemɔi kɛ shiwooi pii yɛ Yehowa Wiemɔ lɛ mli ni baanyɛ aha wɔna miishɛɛ beni wɔnaa amanehulu lɛ.—Mateo 5:10-12.
Ha Nyɔmɔwoo Lɛ Ahi Ojwɛŋmɔ Mli
Beni efiwɔ ni wɔhao lɛ, kaimɔ akɛ nɔ ko bɛ ni eba wɔnɔ ni nakai nɔ ko bako Yehowa tsuji anɔkwafoi krokomɛi anɔ pɛŋ. Wɔbaanyɛ wɔte shi wɔwo mɔdɛŋ ni Abonsam bɔɔ bɔni afee ni eha wɔkpa Yehowa sɔɔmɔ lɛ kɛji akɛ wɔfee nɔ ni bɔfo Petro woɔ wɔ ŋaa yɛ he nɛɛ: “Nyɛdamɔa shi shiŋŋ yɛ hemɔkɛyeli lɛ mli, nyɛtsia [Abonsam] lɛ gbɛ, ejaakɛ nyɛle akɛ nakai amanehului lɛ nɔŋŋ nyɛnyɛmimɛi ni yɔɔ je lɛŋ lɛ hu naa.” (1 Petro 5:9) Hɛɛ, Kristofoi krokomɛi hu hiɛ mli nakai nɔŋŋ yɛ kaai amli yɛ sanekpakpa lɛ hewɔ ni amɛfeɔ enɛ ni amɛkuuu amɛ emuuyeli mli. Wɔ hu wɔbaanyɛ wɔfee nakai nɔŋŋ.
Esa ni wɔkadi nyɔmɔwoo ni amɛnine shɛ nɔ lɛ hu kɛfata amɛshidaamɔ Shiŋŋ lɛ he. Kɛ́ wɔɔfee enɛ he nɔkwɛmɔ nɔ lɛ: Beni Satan tsɔɔ akɛ pɛsɛmkunya sɛɛnamɔi ahewɔ Hiob jaa Yehowa lɛ, ekɛ amanehului ni eko nyiɛ eko sɛɛ ba nɛkɛ Nyɔŋmɔ gbɔmɔ nɛɛ nɔ. Klɛŋklɛŋ kwraa lɛ, akpata ekooloi ahiɛ, no sɛɛ lɛ etsuji, ni yɛ naagbee mli lɛ ebii nyɔŋma Satan mii shɛɛɛ enɛ he, shi eha “asanei ni jaraa tsɛ̃rɛ̃ Hiob kɛjɛ enaneshi aaahu kɛyashi eyiteŋ pampam.” (Hiob, yitsei 1 kɛ 2) Ani Hiob ku emuuyeli mli ni ehiɛ eha Nyɔŋmɔ lɛ mli yɛ amanehului nɛɛ ahewɔ?
Dabida, efeee nakai. Shi enyɔmɔwoo lɛ hu? Ojogbaŋŋ, Yehowa ha Hiob na hewalɛ, ni eha nii fɛɛ ni eyɔɔ sa lɛ ‘ku bɔ he toi enyɔ’ eha lɛ, ni etsa ewala nɔ eha lɛ kɛ shihilɛ yɛ miishɛɛ mli. (Hiob 42:10-17) Yɛ nɛkɛ jweremɔ nii nɛɛ esɛɛ lɛ, eyɛ nyɔmɔwoo ko hu ni da fe enɛ, ni ji gbohiiashitee kɛ naanɔ wala he hiɛnɔkamɔ yɛ paradeiso shikpɔŋ nɔ. (Hiob 14:13-15) Yɛ anɔkwale mli lɛ, Hiob niiashikpamɔ lɛ woɔ Kristofoi ni naa nɔ ŋmɛnɛ lɛ hewalɛ ni eshɛjeɔ amɛmii.
[Mfoniri ni yɔɔ baafa 30]
Hiob niiashikpamɔ Iɛ haa Kristofoi ni naa amanehulu ŋmɛnɛ Iɛ naa hewalɛwoo
[Baafa 31]August Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)