Katoleknyo ko Na He Miishɛɛ

Yehowa Odasefoi lɛ ateŋ mɔ ko lɔle tai jwa yɛ Virginia, U.S. Amerika akrowa ko. Shia ko bɛŋkɛ jɛmɛ, ni etswa shinaa lɛ sɛɛ. Yoo ni ena lɛ lɛ ha eba tsu lɛ mli koni ebatswa tɛlifon ni tsɔne aba abaye ebua lɛ. Yɛ sɛɛ mli lɛ Odasefonyo nɛɛ kɛ shidaa wolo maje yoo nɛɛ ni ekɛ wolo ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ maje lɛ akɛ enikee nii. Nɔ ni nyiɛ sɛɛ ji ehetoo ni eŋma emaje nyɛminuu lɛ fa ko:

“Masumɔ ni mikɛ bo ewie anɔkwale yɛ faŋŋ mli. Katoleknyo jimi. Ni be fɛɛ be ni mɔ ko aaaba shinaa nɛɛ naa kɛ Buu-Mɔɔ lɛ loo woji krokomɛi lɛ, mihereee amɛ hiɛmɛɛ, kɛ́ amɛnyɛ mi nɔ ni mihe lɛ, mishɛrɛɔ mishwieɔ jwɛi niiaŋ. Migbekɛbiiashi tɔŋŋ ajɛ akɛ Katolek jamɔ tsɔse mi.

Shi, nɔ ko gbala mijwɛŋmɔ kɛtee owolo lɛ he ejaakɛ ehiɛ wiemɔ ‘Paradeiso’ yɛ eyitso lɛ mli ni ekanemɔ hu yɛ faŋŋ ni ewaaa. Sanebimɔi ni yɔɔ baafai lɛ ashishigbɛ lɛ woɔ nikanemɔ hewalɛ, ni mfonirii lɛ feɔ mi fɛo. Misumɔɔ baafa 11 lɛ titri, ejaakɛ miibɔ mɔdɛŋ ni mafee paradeiso ko ni tamɔ nɛkɛ yɛ biɛ maha loofɔji kɛ kooloi. Miyɛ ofrote, kpɛŋkpɛlɛi, aduji, sɔnei, osɔŋsɔi kɛ loofɔji sɔrɔtoi . . .

“Nyɛfee nɔ ko diɛŋtsɛ yɛ Katoleknyo ni miji ni nyɛha mikane jamɔ kroko mli wolo lɛ hewɔ. Ha! Mikpaaa shi akɛ abaanyɛ atsake mi kɛya jamɔ kroko mli. Shi mikaneɔ wolo lɛ ni miwu hu miikane enɛ bianɛ. Miidanyɛ shi shikome ekoŋŋ!”

Nɛkɛ wolo fɛfɛo nɛɛ hiɛ baafai 256 ni elɛɛmɔ tamɔ wolo tɛtrɛɛ ni ohiɛ nɛɛ, mfonirii ni shɛɔ 150 ji nɔ ni yɔɔ mli, akala yɛ sui sɔrɔtoi amli. Obaanyɛ okɛ ₵250.00 amɛje ni onine baashɛ ekome nɔ.

Nyɛfainɛ nyɛkɛ wolo Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ekome amajea mi. Mikɛ ₵150.00 ewo mli kɛfata he kɛmiiwo nyɔmɔ.