October

Asafoŋ onukpai lɛ, kpokpaa nɔkwɛlɔ lɛ, nitsumɔhe nine lɛ, loo Gbɛtsɔɔmɔ Kuu lɛ hãa wɔ gbɛtsɔɔmɔi be fɛɛ be koni wɔnyɛ wɔjá Yehowa jogbaŋŋ. Shi bei komɛi lɛ, wɔnuuu nɔ hewɔ ni amɛkɛ gbɛtsɔɔmɔi komɛi hãa lɛ shishi. Ekolɛ wɔbaanu he akɛ gbɛtsɔɔmɔ ni akɛhã lɛ, yeŋ ebuaŋ wɔ, loo ekolɛ wɔkɛ wɔjwɛŋmɔ baama nyɛmimɛi ni kɛ gbɛtsɔɔmɔ lɛ hã lɛ afatɔi anɔ. Kɛ́ wɔnyiɛ yɛ hemɔkɛyeli naa lɛ, no tsɔɔ akɛ wɔheɔ wɔyeɔ akɛ Yehowa ni tsɔɔ esafo lɛ gbɛ ni ele shihilɛi fɛɛ ni wɔkɛkpeɔ lɛ. Enɛ hewɔ lɛ, kɛ́ amɛkɛ gbɛtsɔɔmɔ hã lɛ, wɔjɛɔ wɔtsui muu fɛɛ mli wɔboɔ toi oya. (Heb. 13:17) Wɔle akɛ kɛ́ wɔbo gbɛtsɔɔmɔ toi lɛ, ehãa ekomefeemɔ hiɔ asafo lɛ mli. (Efe. 4:​2, 3) Wɔle akɛ nyɛmimɛi ni nyiɛɔ wɔhiɛ lɛ yeee emuu moŋ, shi wɔheɔ wɔyeɔ akɛ kɛ́ wɔbo amɛ toi lɛ, Yehowa baajɔɔ wɔ. (1 Sam. 15:22) Ni wɔheɔ wɔyeɔ hu akɛ, kɛ́ Yehowa na akɛ esa akɛ atsake gbɛtsɔɔmɔ ko lɛ, bɔ fɛɛ bɔ ni fee lɛ, yɛ be ni sa mli lɛ, ebaahã afee nakai. w25.03 23-24 kk. 13-14

Be ni wɔyɔɔ mli nɛɛ sa kadimɔ waa diɛŋtsɛ! Daa gbi lɛ, wɔnaa nibii ni tsɔɔ akɛ Biblia mli gbalɛi miiba mli. Akɛ nɔkwɛmɔnɔ lɛ, wɔmiina bɔ ni “kooyigbɛ maŋtsɛ lɛ” kɛ “wuoyigbɛ maŋtsɛ lɛ” kɛ amɛhe miitswa koni amɛye jeŋ muu lɛ fɛɛ nɔ. (Dan. 11:40) Wɔmiina akɛ, aashiɛ Nyɔŋmɔ Maŋtsɛyeli lɛ he sane kpakpa lɛ yɛ shikpɔŋ lɛ nɔ fɛɛ, ni mɛi akpekpei abɔ ehala akɛ amɛbaasɔmɔ Yehowa. (Yes. 60:22; Mat. 24:14) Agbɛnɛ hu, aalɛ wɔ kɛ mumɔŋ niyenii babaoo yɛ “be ni sa mli.” (Mat. 24:​45-47) Yehowa miiya nɔ eeye eebua wɔ ni wɔnu nibii ni sa kadimɔ waa ni etsɛŋ kwraa ebaaba lɛ ashishi jogbaŋŋ. (Abɛi 4:18) Wɔbaanyɛ wɔná nɔmimaa akɛ, be ni amanehulu kpeteŋkpele lɛ baaje shishi lɛ, atsɔɔ wɔ nibii fɛɛ ni esa akɛ wɔle koni wɔnyɛ wɔye Yehowa anɔkwa ni wɔkɛ wɔnyɛmimɛi lɛ afee ekome yɛ nakai be ni mli shihilɛ wa lɛ mli. Shi esa akɛ wɔhã ehi wɔjwɛŋmɔ mli akɛ, nibii ni etsɛŋ ebaaba lɛ ahe saji komɛi yɛ ni wɔleee. w24.05 8 kk. 1-2

Lalatsɛ lɛ tsĩ mɔ he efɔŋ ni awieɔ lɛ tã. Kɛ́ akɛɛ aawie mɔ ko he efɔŋ lɛ, te atsɔɔ tɛŋŋ? Bei pii lɛ, etsɔɔ akɛ aawie nɔ ko ni bɛ mli yɛ mɔ ko he ni baanyɛ afite mɔ lɛ gbɛ́i. Lala 15:3 lɛ hu hãa wɔleɔ akɛ, mɛi ni yɔɔ Yehowa mfonirifeemɔŋ mama tsũ lɛ mli lɛ efeee mɛi ni bɛŋkɛ amɛ kpaakpa lɛ efɔŋ, ni amɛwooo amɛnanemɛi hiɛgbele. (Lala 15:1) Mɛɛ nibii nɛkɛ kɛ́ wɔfee lɛ, ebaatsɔɔ akɛ wɔmiiwo wɔnanemɛi hiɛgbele? Wɔbaanyɛ wɔwo mɔ ko hiɛgbele ni wɔleee kɛji wɔwie nibii gbohii yɛ ehe. Akɛ nɔkwɛmɔnɔ lɛ: (1) ekolɛ nyɛmi yoo ko ekpa sɔɔmɔ akɛ gbɛgbalɔ, (2) nyɛmi nuu ko kɛ eŋa eshi Betel, loo (3) nyɛmi nuu ko sɔmɔɔɔ akɛ asafoŋ onukpa loo asafoŋ sɔɔlɔ dɔŋŋ. Ani ebaafee nɔ ni hi akɛ wɔbaaka wɔyiŋ wɔkɛɛ mɛi akɛ nyɛmimɛi nɛɛ efee nɔ ko gbonyo ni no hewɔ amɛsɔɔmɔ hegbɛi lɛ eŋmɛɛ amɛ lɛ? Ekolɛ yiŋtoi krokomɛi ni wɔleee kwraa hewɔ afee tsakemɔi nɛɛ. Mɔ fɛɛ mɔ ni miisumɔ ni eya nɔ ehi Yehowa mfonirifeemɔŋ mama tsũ lɛ mli lɛ “efeee mɔ ni bɛŋkɛ lɛ kpaakpa lɛ efɔŋ, ni ewooo enanemɛi hiɛgbele.” w24.06 11 kk. 11-13

Mɛni baaye abua wɔ ni wɔya nɔ wɔshe Yehowa gbeyei moŋ fe gbɔmɛi? Nɔ kome ni baaye abua wɔ ji, ni be fɛɛ be lɛ wɔbaabi wɔhe akɛ, ‘Mɛɛ yiŋ kɛ́ mikpɛ lɛ, ebaasa Yehowa hiɛ?’ Kɛ́ okane sane ko yɛ Biblia lɛ mli lɛ, bi ohe akɛ, ‘Eji mi ni miyaje shihilɛ nɛɛ mli kulɛ, mɛni mafee?’ Akɛ nɔkwɛmɔnɔ lɛ, ŋɔɔ lɛ akɛ oyɛ jɛmɛ be ni Israel wekuyitsei nyɔŋma lɛ ni atsu amɛ ni amɛyakpá shikpɔŋ ni Yehowa ewo shi akɛ ebaahã Israelbii lɛ bawie akɛ Israelbii lɛ nyɛŋ aye Kanaanbii lɛ anɔ kunim lɛ. Ani kulɛ obaahe amɛ oye? Ani amɛwiemɔi lɛ baahã Kanaanbii lɛ ahe ŋmiŋmi amɔ bo? Aloo suɔmɔ ni oyɔɔ kɛhã Yehowa kɛ bɔ ni osumɔɔ waa akɛ osa ehiɛ lɛ baahã okɛ ohiɛ afɔ̃ enɔ? Yoshua kɛ Kaleb yinɔbii lɛ eyayɔseee akɛ nɔ ni Yoshua kɛ Kaleb wieɔ lɛ ji anɔkwale. Enɛ hewɔ lɛ, Yehowa hãaa amɛteŋ mɔ ko mɔ ko aya Shiwoo Shikpɔŋ lɛ nɔ.—4 Mo. 14:​10, 22, 23. w24.07 10 kk. 7

Gomer je ewu Hosea sɛɛ ni ekɛ nuu kroko yahi shi. Shi mɛni Yehowa fee? Yehowa, mɔ ni naa adesai atsui mli lɛ, kɛɛ Hosea akɛ: “Yaa shi kome ekoŋŋ ni oyasumɔ yoo lɛ ní nuu kroko sumɔɔ lɛ ní eji gbalafitelɔ lɛ, tamɔ bɔ pɛ ni Yehowa sumɔɔ Israelbii lɛ, be mli ni amɛ lɛ amɛyanyiɛɔ nyɔŋmɔi krokomɛi asɛɛ.” (Hos. 3:1; Abɛi 16:2) Kadimɔ akɛ, no mli lɛ, Hosea ŋa lɛ efeko nɔ ko ni tsɔɔ akɛ etsake etsui. Shi Yehowa kɛɛ Hosea akɛ, ekɛ esha ni yɔɔ hiɛdɔɔ ni eŋa lɛ efee lɛ ake lɛ ni ehã eku esɛɛ eba. Yehowa tsɔ Hosea kɛ eŋa lɛ sane lɛ nɔ ehã Israelbii lɛ na akɛ, ekpooko amɛjeŋ ehãko amɛ. Eyɛ mli akɛ eshai ni amɛfeɔ lɛ yɛ hiɛdɔɔ moŋ, shi Yehowa sumɔɔ amɛ lolo, ni eesumɔ ni eye ebua amɛ ni amɛtsake amɛtsui ni amɛkpa nibii fɔji ni amɛfeɔ lɛ. Sane nɛɛ tsɔɔ akɛ Yehowa, mɔ ni le adesa fɛɛ adesa tsui mli lɛ, baaye abua mɔ ko ni kã he eefee esha ni yɔɔ hiɛdɔɔ lɛ koni etsake etsui. w24.08 10 kk. 7

Ehe bahia ni Yudafoi ni ebatsɔmɔ Kristofoi lɛ afee tsakemɔi wuji komɛi, ni amɛnáaa enɛ feemɔ mlɛo kwraa. Be ko ni eho lɛ, Yudafoi nɛɛ ji Nyɔŋmɔ webii ni ehala amɛ. No mli lɛ, Yerusalem ji he ko ni he hiaa waa, ejaakɛ jɛmɛ maŋtsɛ ni yeɔ nɔ yɛ Yehowa najiaŋ lɛ yeɔ nɔ kɛjɛɔ. Ni agbɛnɛ hu, kɛ́ mɔ ko miitao ni ejá Yehowa lɛ, ja eba sɔlemɔ shĩa ni yɔɔ Yerusalem lɛ. Yudafoi anɔkwafoi lɛ fɛɛ yeɔ Mose Mla lɛ nɔ ni amɛkɛ nibii ni Yudafoi ajamɔŋ hiɛnyiɛlɔi lɛ tsɔɔ amɛ lɛ tsuɔ nii. Mlai nɛɛ ekomɛi kɔɔ niyenii, ketiafoo, kɛ bɔ ni esa akɛ amɛkɛ mɛi ni jɛ maji krokomɛi anɔ aye ahã lɛ he. Shi yɛ Yesu gbele sɛɛ lɛ, Yehowa biii ni etsuji anɔkwafoi ashã afɔlei yɛ sɔlemɔ shĩa lɛ dɔŋŋ. Enɛ bafee kaa wulu diɛŋtsɛ kɛhã Yudafoi ni ebatsɔmɔ Kristofoi ni amɛye Mose Mla lɛ nɔ afii babaoo lɛ. (Heb. 10:​1, 4, 10) Ebawa kɛhã Kristofoi ni he wa yɛ hemɔkɛyeli lɛ mli, tamɔ bɔfo Petro po, akɛ amɛkɛ tsakemɔi nɛɛ baatsu nii. (Bɔf. 10:​9-14; Gal. 2:​11-14) Tsakemɔi nɛɛ ahewɔ lɛ, jamɔŋ hiɛnyiɛlɔi lɛ wa Kristofoi nɛɛ ayi. w24.09 9 kk. 4

Be fɛɛ be ni Yehowa baahã ewebii lɛ nitsumɔ lɛ, eesumɔ ni amɛto he gbɛjianɔ jogbaŋŋ. (1 Kor. 14:33) Akɛ nɔkwɛmɔnɔ lɛ, Yehowa miisumɔ ni ewebii lɛ ashiɛ sane kpakpa lɛ yɛ shikpɔŋ lɛ nɔ fɛɛ. (Mat. 24:14) Ehala Yesu akɛ ekwɛ nitsumɔ nɛɛ nɔ. Ni Yesu hu miikwɛ koni ato nitsumɔ nɛɛ he gbɛjianɔ jogbaŋŋ ni atsu. Yɛ blema Kristofoi lɛ abeiaŋ lɛ, ato asafoi ashishi yɛ heihei, ni ahole asafoŋ onukpai yɛ asafoi nɛɛ amli koni amɛnyiɛ nitsumɔ lɛ hiɛ ni amɛkɛ gbɛtsɔɔmɔi ahã nyɛmimɛi lɛ. (Bɔf. 14:23) Agbɛnɛ hu, bɔfoi lɛ kɛ onukpai lɛ ni yɔɔ Yerusalem lɛ fee ekome ni amɛkpɛ yiŋ komɛi ni ehe bahia ni asafoi fɛɛ ni yɔɔ nakai beiaŋ lɛ kɛtsu nii. (Bɔf. 15:2; 16:4) Nyɛmimɛi lɛ kɛ gbɛtsɔɔmɔi ni amɛnine shɛ nɔ lɛ tsu nii, ni no hã “asafoi lɛ tee nɔ amɛhe wa yɛ hemɔkɛyeli lɛ mli ni amɛyibɔ lɛ tee nɔ efa daa gbi.”—Bɔf. 16:5. w24.04 8 kk. 1

Leebi maŋkpa yɛ Nisan 16 lɛ nɔ lɛ, yei komɛi tee Yesu gbonyobu lɛ naa. (Luka 24:​1, 10) Yei nɛɛ ateŋ mɔ kome ji Maria Magdalena. Be ni eyashɛ Yesu gbonyobu lɛ naa lɛ, ena akɛ Yesu gbonyo lɛ bɛ mli. Ejo foi eyakɛɛ Petro kɛ Yohane, ni enyiɛ amɛsɛɛ be ni amɛwo foi akɛ amɛmiiya gbonyobu lɛ naa lɛ. Be ni hii nɛɛ tee ni amɛna akɛ Yesu gbonyo lɛ bɛ gbonyobu lɛ mli lɛ, amɛku amɛsɛɛ kɛtee shĩa. Shi Maria ekuuu esɛɛ. Etee nɔ edamɔ jɛmɛ ni eefó. Asomoaŋ, no mli fɛɛ lɛ, Yesu miikwɛ lɛ, shi eleee. Yesu na akɛ lɛ ehewɔ efóɔ lɛ, ni enu he akɛ esa akɛ eshɛje emii. No hewɔ lɛ, ejie ehe kpo etsɔɔ Maria, ni efee nɔ ko ni wo lɛ hewalɛ waa. Ekɛ lɛ wie, ni ekɛ nitsumɔ ko ni he hiaa waa wo edɛŋ, no ji, eyakɛɛ enyɛmimɛi hii lɛ akɛ atee lɛ shi.—Yoh. 20:​17, 18. w24.10 13 kk. 7

Mose sɔmɔ akɛ gbalɔ, kojolɔ, tatsɛ, kɛ yinɔsaneŋmalɔ. Enyiɛ Israelbii lɛ ahiɛ kɛje nyɔŋyeli mli yɛ Ejipt, ni ekɛ lɛ diɛŋtsɛ ehiŋmɛii na naakpɛɛ nii ni Yehowa fee lɛ ateŋ pii. Yehowa hã eŋmala klɛŋklɛŋ woji enumɔ ni yɔɔ Biblia lɛ mli lɛ, Lala 90, kɛ ekolɛ Lala 91 lɛ. Agbɛnɛ hu, ekolɛ, lɛ eŋma Hiob wolo lɛ. Be ni Mose eye afii 120 ni eshwɛ fioo ebaagbo lɛ, ebua Israelbii lɛ anaa koni ekai amɛ nibii ni amɛna ni Yehowa efee ehã amɛ lɛ. Israelbii lɛ na naakpɛɛ nii ni Yehowa fee lɛ kɛ bɔ ni egbala Ejiptbii lɛ toi lɛ. (2 Mo. 7:4) Yehowa gbá Ŋshɔ Tsuru lɛ mli yɛ amɛhiɛ ni amɛnyiɛ shikpɔŋ gbiŋ nɔ kɛfo, ni be ni ekpãtã Farao kɛ esraafoi lɛ fɛɛ ahiɛ lɛ, amɛna. (2 Mo. 14:​29-31) Ni be ni amɛnyiɛ ŋa lɛ nɔ lɛ, Yehowa kwɛ amɛ ni ebu amɛhe. (5 Mo. 8:​3, 4) No mli lɛ, etsɛŋ ni Israelbii lɛ baaya Shiwoo Shikpɔŋ lɛ nɔ, no hewɔ lɛ, Mose miisumɔ ni ewo amɛ hewalɛ dani egbo. w24.11 8-9 kk. 3-4

Nɔ ni Yesu kɛɛ ebɔfoi lɛ yɛ Galilea lɛ kɔɔɔ Nuŋtsɔ Lɛ Gbɛkɛ Niyeli lɛ he. Sane ni ewie yɛ Galilea lɛ kɔɔ mɛi babaoo ahe, shi nɔ ni ewie yɛ Nuŋtsɔ Lɛ Gbɛkɛ Niyeli lɛ shishi lɛ kɔɔ mɛi fioo pɛ ahe. Mɛi ni Yesu kɛwie yɛ Galilea yɛ afi 32 Ŋ.B. lɛ ateŋ mɛi pii nyiɛ esɛɛ yɛ niyenii hewɔ. Shi ebɔ mɔdɛŋ akɛ ebaaye ebua amɛ ni amɛna akɛ nɔ ko yɛ ni he yɛ sɛɛnamɔ kwraa fe niyenii, ni nakai nɔ lɛ baanyɛ ahã amɛná naanɔ wala. Ehã amɛle po akɛ, kɛ́ amɛgboi lɛ, abaatee amɛ shi yɛ naagbee gbi lɛ nɔ, ni amɛbaahi shi kɛya naanɔ. Jɔɔmɔi ni Yesu wie he yɛ Nuŋtsɔ Lɛ Gbɛkɛ Niyeli lɛ shishi lɛ, mɛi fioo pɛ baaná, shi jɔɔmɔi ni ewie he yɛ Galilea lɛ, no lɛ, jeee mɛi fioo pɛ baaná; mɔ fɛɛ mɔ baanyɛ aná. w24.12 11 kk. 10-11

Yehowa nyɛɔ mɔ fɛɛ mɔ ni feɔ yiwalɛ nii. (Lala 11:5) Eehi kwraa ni mɔ ko baayi eŋa. (Mal. 2:16) Kɛ́ nuu ko kɛ eŋa yeee jogbaŋŋ lɛ, no baafite nuu lɛ kɛ Yehowa teŋ. Ekolɛ Yehowa boŋ esɔlemɔi toi po. (1 Pet. 3:7) Hii komɛi yɛ ni kɛ́ amɛmli fu lɛ, amɛkɛ amɛŋamɛi wieɔ bɔ ni esaaa, ni amɛwieɔ nibii ni dɔɔ amɛ waa. Shi Yehowa miihi “mlila, kɛ mlifu, kɛ bolɔmɔ, kɛ jɛmɔi.” (Efe. 4:​31, 32) Kɛ́ nuu ko kɛ eŋa wieɔ bɔ ni esaaa lɛ, eefite ekɛ eŋa lɛ teŋ, ni eefite ekɛ Yehowa teŋ hu. (Yak. 1:26) Nakai nɔŋŋ hu kɛ́ nuu ko kwɛɔ ponografi lɛ, eefite ekɛ Yehowa teŋ, ni eetsɔɔ hu akɛ ebuuu eŋa lɛ ehãaa nɔ ko. Yehowa miisumɔ ni hii aye amɛŋamɛi anɔkwa. Bɔ ni enuɔ he ehãa kɛ́ nuu ko je eŋa sɛɛ lɛ, nakai nɔŋŋ enuɔ he kɛ́ nuu ko kwɛ ponografi. Yesu wie akɛ, kɛ́ nuu ko kwɛ yoo ko ni ená ehe akɔnɔ lɛ, ekɛ lɛ efite gbãla momo “yɛ etsui mli.”—Mat. 5:​28, 29. w25.01 9 kk. 6-8

Kɛ́ Biblia lɛ kɛɛ Yehowa ebu wɔ jalɔi lɛ, etsɔɔ akɛ ebuuu wɔhe eshai lɛ ahe akɔntaa eshiii wɔ. Ani enɛ tsɔɔ akɛ, agbɛnɛ lɛ, Yehowa enaaa esha akɛ nɔ ko dɔŋŋ? Dabi, etsɔɔɔ nakai. Yehowa sumɔɔɔ esha kwraa. Kɛ̃lɛ, efee klalo akɛ ekɛ wɔhe eshai baake wɔ, ejaakɛ wɔyɛ hemɔkɛyeli akɛ nɔ ni lɛ kɛ Yesu efee amɛhã wɔ lɛ hewɔ lɛ, ekɛbaake wɔ. (Rom. 3:24) Mɛɛ gbɛ nɔ wɔnáa bu ni Yehowa buɔ wɔ akɛ jalɔi lɛ he sɛɛ? Yɛ Yehowa tsuji lɛ ateŋ mɛi komɛi agbɛfaŋ lɛ, bu ni ebu amɛ akɛ jalɔi lɛ hewɔ lɛ, Yehowa eŋɔ amɛ akɛ ebii ni amɛkɛ Yesu baaye maŋtsɛ yɛ ŋwɛi. (Tito 3:7; 1 Yoh. 3:1) Yehowa kɛ amɛhe eshai lɛ eke amɛ, ni yɛ ehiɛ lɛ, etamɔ nɔ ni amɛfeko esha dã. Enɛ hewɔ lɛ, ebuɔ amɛ akɛ mɛi ni abaanyɛ ahã amɛ hegbɛ akɛ amɛbote Maŋtsɛyeli lɛ mli. (Rom. 8:​1, 2, 30) Yɛ Yehowa tsuji lɛ ateŋ mɛi komɛi hu agbɛfaŋ lɛ, bu ni ebu amɛ akɛ jalɔi lɛ hewɔ lɛ, ekɛ amɛhe eshai eke amɛ ni eŋɔ amɛ akɛ enanemɛi. Mɛi nɛɛ baahi shikpɔŋ lɛ nɔ kɛya naanɔ.—Yak. 2:​21-23. w25.02 5 kk. 17-18

Be ko lɛ, jwɛŋmɔ ni bɔfo Petro ná yɛ sane ko he lɛ kɛ Yehowa nɔ lɛ eyakpãaa gbee. Naa bɔ ni eba lɛ. No mli lɛ, Yesu ekɛɛ ebɔfoi lɛ akɛ esa akɛ eya Yerusalem, ni akɛ, kɛ́ etee lɛ, jamɔŋ hiɛnyiɛlɔi lɛ baamɔ lɛ, amɛbaapiŋ lɛ, ni amɛbaagbe lɛ. (Mat. 16:21) Shi Petro le akɛ Yesu ji Mesia ni awo shi akɛ ebaaba ni ebahere Nyɔŋmɔ webii lɛ, ni ekolɛ eyanu he akɛ Yehowa eŋmɛŋ gbɛ kɔkɔɔkɔ ni agbe Yesu. (Mat. 16:16) No hewɔ lɛ, Petro ŋɔ Yesu kɛtee afã ni ekɛɛ lɛ akɛ: “Nuŋtsɔ, kaatsɛ efɔŋ ohã ohe; enɛ baŋ onɔ kɔkɔɔkɔ.” (Mat. 16:22) Petro kɛ Yesu eyakpãaa gbee, ejaakɛ jwɛŋmɔ ni Petro hiɛ yɛ sane nɛɛ he lɛ kɛ Yehowa nɔ lɛ kpãaa gbee. No mli lɛ, nɔ ni Yehowa miitao ni Yesu afee ji ni ekɛ ewala ashã afɔle, shi jeee ni ena ehe mɔbɔ. No hewɔ lɛ, eyɛ mli akɛ ekolɛ, jwɛŋmɔ kpakpa Petro kɛwie nɔ ni ewie lɛ moŋ, shi Yesu booo eŋaawoo lɛ toi. Petro kase nii waa yɛ sane nɛɛ mli. Ena akɛ, esa akɛ ehã jwɛŋmɔ ni ehiɛ yɛ saji ahe lɛ kɛ Yehowa nɔ lɛ akpã gbee. Enɛ ji nɔ ko ni he hiaa waa ni esa akɛ wɔ hu wɔkase. w25.03 9 kk. 5-6

Ani mɔ ko ni oheɔ lɛ oyeɔ waa lɛ efee nɔ ko ni ehã otsui ekumɔ? Ekɔɔɔ he eko bɔ ni adesa ko kɛ bo eye ehã lɛ, Yehowa, o-Tsɛ ni yɔɔ ŋwɛi lɛ, sumɔɔ bo waa. Kɛ́ mɔ ko efee wɔ nɔ ko ni edɔ wɔ waa lɛ, wiemɔi ni David wie ni yɔɔ ŋmɛnɛ ŋmalɛ lɛ mli lɛ baanyɛ ashɛje wɔmii. Wolo ko wie akɛ, “mɛi ni werɛ eho amɛhe” ni akɛtsu nii yɛ ŋmalɛ nɛɛ mli lɛ baanyɛ akɔ “mɛi ni hiɛnɔkamɔ fɛɛ etã lɛ ahe.” Mɛni Yehowa feɔ kɛyeɔ ebuaa mɛi ni miiye awerɛho yɛ mɔ ko ni yeee amɛ anɔkwa lɛ hewɔ? Bɔ ni fɔlɔ ko wóɔ ebi ni miifó ni eshɛjeɔ emii lɛ, nakai Yehowa hu yɛ mɛi ni tsui ekumɔ lɛ amasɛi. Enuɔ he ehãa mɛi ni ayeee amɛ anɔkwa ni no hewɔ lɛ amɛtsui ekumɔ lɛ, ni eesumɔ ni eye ebua amɛ. Kɛ́ wɔtsui ekumɔ loo wɔmiinu he akɛ wɔhe bɛ sɛɛnamɔ lɛ, eesumɔ waa ni eshɛje wɔmii. Ehã wɔ hiɛnɔkamɔ ni baaye abua wɔ ni wɔya nɔ wɔfi shi yɛ naagbai ni wɔkpeɔ bianɛ lɛ amli.—Yes. 65:17. w24.12 23 kk. 13-14

Ŋmɛnɛ lɛ, asafoŋ onukpai lɛ baanyɛ ahe aye akɛ Yehowa naa nitsumɔi kpakpai ni amɛtsuɔ lɛ ni ehiɛ sɔɔ waa. Asafoŋ onukpai lɛ saraa nyɛmimɛi lɛ ni amɛwoɔ amɛ hewalɛ, amɛtsɔɔ nii yɛ asafo lɛ mli, ni amɛkɛ amɛhe woɔ shiɛmɔ nitsumɔ lɛ mli. Shi yɛ nitsumɔi nɛɛ asɛɛ lɛ, asafoŋ onukpai babaoo yayeɔ amɛbuaa kɛmamɔɔ asafo lɛ tsũi, ni agbɛnɛ hu, amɛyayeɔ amɛbuaa kɛ́ oshãra nina wɔnyɛmimɛi lɛ ekomɛi. Amɛteŋ mɛi komɛi hu fata Helatsɛmɛi Asaramɔ Kui loo Ajinafoi Akui Ni Kɛ Helatsamɔhei Shãraa lɛ ahe. Asafoŋ onukpai ni kɛ amɛhe shãa afɔle kɛtsuɔ nitsumɔi nɛɛ naa asafo lɛ akɛ Yehowa nɔ. Amɛjɛɔ amɛtsui muu fɛɛ mli amɛtsuɔ nitsumɔ ni akɛwo amɛdɛŋ lɛ, ni amɛheɔ amɛyeɔ akɛ Nyɔŋmɔ baajwere amɛ yɛ nɔ ni amɛtsuɔ lɛ hewɔ. (Kol. 3:​23, 24) Jeee wɔteŋ mɔ fɛɛ mɔ ji asafoŋ onukpa, shi wɔteŋ mɔ fɛɛ mɔ yɛ nɔ ko ni ebaanyɛ ekɛhã Yehowa. Kɛ́ Yehowa na akɛ wɔnyɛmɔ fɛɛ mli wɔjɛɔ wɔsɔmɔɔ lɛ lɛ, enáa miishɛɛ waa. Ehiɛ sɔɔ onia ni wɔtsuɔ kɛfiɔ jeŋ muu fɛɛ nitsumɔ lɛ sɛɛ, kɛ́ nɔ ni wɔtsuɔ lɛ faaa po. Ni kɛ́ mɔ ko fee wɔ nɔ ko ni edɔ wɔ ni wɔkɛke mɔ lɛ, enáa miishɛɛ waa. Ná nɔmimaa akɛ Yehowa hiɛ sɔɔ nɔ ni onyɛɔ otsuɔ lɛ waa. Esumɔɔ bo waa yɛ nɔ ni otsuɔ lɛ hewɔ, ni ebaajwere bo.—Luka 21:​1-4. w24.06 23 kk. 12-13

Nɔ ni nina oblanyo lɛ ni awie ehe yɛ Abɛi awolo lɛ mli lɛ baanyɛ anina wɔteŋ mɔ fɛɛ mɔ. Bei pii lɛ, kɛ́ mɔ ko yafee esha ko ni yɔɔ hiɛdɔɔ ni abi lɛ bɔ ni eba lɛ lɛ, ewieɔ nii lɛ tamɔ nɔ ni ekɛ kaa lɛ kpe trukaa ni ehiɛ bɛ ehe nɔ ni egbee mli. Ekolɛ ebaawie po akɛ, “Mileee bɔ ni fee kwraa ni eba lɛ nakai.” Shi ekolɛ kɛ́ mɔ lɛ ta shi diŋŋ ni esusu nɔ ni tee nɔ lɛ he jogbaŋŋ lɛ, ebaana akɛ ekpɛ yiŋ gbohii komɛi ni no hã eyafee esha lɛ. Ekolɛ ekɛ nanemɛi gbohii bɔi bɔɔ, ekɛ nibii ni esaaa bɔi ehiɛtserɛjiemɔ, etee wɛbsaiti komɛi ni esaaa lɛ anɔ, loo etee hei komɛi ni esaaa akɛ Kristofonyo yaa. Kɛfata he lɛ, eeenyɛ efee akɛ ekpa sɔlemɔ, ekpa Biblia lɛ kanemɔ, ekpa asafoŋ kpeeiyaa, loo ekpa shiɛmɔyaa. No hewɔ lɛ, kɛ́ abote mli aahu lɛ, esane lɛ tamɔ oblanyo lɛ sane lɛ nɔŋŋ. Eshigbeemɔ lɛ baaa lɛ trukaa. Mɛni wɔkaseɔ yɛ sane nɛɛ mli? Kɛ́ wɔsumɔɔɔ ni wɔfeɔ esha lɛ, esa akɛ wɔtsi wɔhe kɛje nibii ni baanyɛ ahã wɔyafee esha lɛ ahe. Enɛ pɛpɛɛpɛ Solomon wie be ni egba oblanyo lɛ kɛ yoo ni bɛ jeŋba lɛ he sane lɛ egbe naa lɛ.—Mat. 5:​29, 30. w24.07 16 kk. 10-11

Mɛni ji jwetri ni awie he yɛ ŋmɛnɛ ŋmalɛ lɛ mli lɛ? No ji, Maŋtsɛyeli lɛ he sane ni ashiɛɔ ni baanyɛ ahere mɛi ayiwala lɛ. (2 Kor. 4:1) Ni sũ nii lɛ ni ewie he lɛ hu? No damɔ shi kɛhã Nyɔŋmɔ tsuji ni shiɛɔ sane kpakpa lɛ. Yɛ Paulo beiaŋ lɛ, jarayelɔi kɛ nibii ni he hiaa waa, tamɔ niyenii, wain, kɛ shika woɔ sũ nii amli kɛfãa gbɛ. Nakai nɔŋŋ Yehowa hu kɛ nɔ ko ni he hiaa waa, ni ji sane kpakpa lɛ ewo wɔdɛŋ. Ni ebaaye ebua wɔ ni wɔnyɛ wɔkɛ sane kpakpa lɛ ayahã mɛi. Bei komɛi lɛ, wɔnuɔ he akɛ mɛi boŋ wɔ toi, loo amɛbaate shi amɛwo wɔ po. Mɛni baaye abua wɔ ni wɔye gbeyeishemɔ nɛɛ nɔ? Wɔbaanyɛ wɔkase Yesu bɔfoi lɛ. Be ko be ni afã amɛ ni amɛkpa shiɛmɔ lɛ, amɛhãaa gbeyei amɔ amɛ. Moŋ lɛ, amɛsɔle amɛbi Yehowa ni eye ebua amɛ koni amɛya nɔ amɛwie kɛ ekãa. Yehowa bo amɛsɔlemɔ lɛ toi amrɔ nɔŋŋ. (Bɔf. 4:​18, 29, 31) Kɛ́ bei komɛi lɛ, osheɔ gbeyei akɛ mɛi boŋ bo toi, loo amɛbaate shi amɛwo bo lɛ, sɔlemɔ ohã Yehowa ni obi lɛ ni ehã ojwɛŋ suɔmɔ ni oyɔɔ kɛhã mɛi lɛ he koni okashe gbeyei. w24.04 16 kk. 8-9

Suɔmɔ ni wɔyɔɔ kɛhã Yehowa lɛ tsirɛɔ wɔ ni wɔtse egbɛ́i lɛ he. (Mat. 6:9) Nɔ ni enɛ tsɔɔ ji, wɔhãa mɛi leɔ akɛ, nibii gbohii ni Satan ewie yɛ Yehowa he lɛ ji amale. (1 Mo. 3:​1-5; Hiob 2:4; Yoh. 8:44) Kɛ́ wɔtee shiɛmɔ lɛ, wɔtsui tsirɛɔ wɔ ni wɔtsɔɔ mɛi mɔ ni Yehowa ji, kɛ sui ni eyɔɔ. Wɔmiisumɔ ni mɛi fɛɛ ale akɛ, esui lɛ ateŋ nɔ ni fe fɛɛ ji suɔmɔ, ni akɛ eyeɔ jalɛsane ni enɔyeli lɛ ja. Wɔmiisumɔ ni amɛle hu akɛ, etsɛŋ e-Maŋtsɛyeli lɛ baahã nɔnaa fɛɛ sɛɛ afo koni adesai ahi shi yɛ miishɛɛ kɛ toiŋjɔlɛ mli. (Lala 37:​10, 11, 29; 1 Yoh. 4:8) Kɛ́ wɔtsɔɔ mɛi nibii ni tamɔ nɛkɛ lɛ, belɛ wɔmiitse Yehowa gbɛ́i lɛ he. Agbɛnɛ hu, etsɔɔ akɛ wɔmiihi shi yɛ wɔgbɛ́i lɛ naa, ni enɛ hãa wɔnáa miishɛɛ waa. w24.05 18 kk. 12

Kɛ́ oji mɔ ko ni jeee mɛi ni okɛbɔɔ naanyo waa lɛ pɛ ofeɔ nibii kpakpai ohãa, shi ofeɔ ohãa mɛi krokomɛi hu lɛ, belɛ oji “gbɔfeelɔ.” (1 Pet. 4:9) Wolo ko tsɔɔ mli akɛ, gbɔfeelɔ feɔ mɛi ni eleee amɛ lɛ po ejurɔ ni eyɛ he miishɛɛ akɛ ebaafɔ̃ amɛ nine kɛba eshĩa. Bi ohe akɛ, ‘Ani ale mi akɛ mɔ ni feɔ mɛi ni basaraa misafo lɛ ejurɔ?’ (Heb. 13:​2, 16) Gbɔfeelɔ feɔ mɛi srɔtoi fɛɛ ejurɔ. Akɛ nɔkwɛmɔnɔ lɛ, efeɔ ohiafoi, mɛi ni ejɛ asafo kroko mli amɛbahã wiemɔ, kɛ mɛi ni bɔɔ mɔdɛŋ koni amɛwo nyɛmimɛi lɛ hewalɛ, tamɔ kpokpaa nɔkwɛlɔi nɛkɛ lɛ ejurɔ.—1 Mo. 18:​2-8; Abɛi 3:27; Bɔf. 16:15; Rom. 12:13. w24.11 21 kk. 6

Yɛ nɔkwɛmɔnɔ ni kɔɔ oblayei froi lɛ ahe lɛ mli lɛ, Yesu wie akɛ oblayei froi nyɔŋma tee koni amɛkɛ ayemforo wu ko ayakpe. (Mat. 25:​1-4) No mli lɛ, amɛ fɛɛ amɛmiishwe ni amɛfata ayemforo wu lɛ he kɛya eyookpeemɔ okpɔlɔŋmɛɛ lɛ shishi. Yesu wie akɛ oblayei froi lɛ ateŋ mɛi enumɔ lɛ, “hiɛshikalɔi” ji amɛ, shi mɛi enumɔ lɛ, “kwashiai” ji amɛ. Oblayei froi ni hiɛ kã shi lɛ saa amɛhe amɛto. Amɛto amɛnibii ahe gbɛjianɔ bɔ ni kɛ́ ayemforo wu lɛ sɛɛ tsɛ po lɛ, amɛbaanyɛ amɛmɛ lɛ ni amɛfata ehe kɛya okpɔlɔŋmɛɛ lɛ shishi. Amɛkɛ kanei ni akɛ mu woɔ mli ba koni amɛsu kɛ́ duŋ wo. Amɛkɛ mu lɛ eko po wo tɔi amli kɛba, koni aleenɔ, kɛ́ ayemforo wu lɛ sɛɛ yagbala shi lɛ, amɛná eko kɛwo amɛkanei lɛ amli. (Mat. 25:​6-10) Be ni ayemforo wu lɛ bashɛ shi lɛ, oblayei froi ni hiɛ kã shi lɛ kɛ lɛ tee yookpeemɔ okpɔlɔŋmɛɛ lɛ shishi. Nakai nɔŋŋ kɛ́ Yesu, ni ji Ayemforo Wu lɛ ba lɛ, Kristofoi ni afɔ amɛ mu ni kɛ amɛnifeemɔ tsɔɔ akɛ amɛhiɛ yɛ amɛhe nɔ ni amɛyeɔ lɛ anɔkwa lɛ anine baashɛ amɛjweremɔnɔ lɛ nɔ; amɛbaayafata Yesu he yɛ ŋwɛi yɛ e-Maŋtsɛyeli lɛ mli.—Kpo. 7:​1-3. w24.09 21 kk. 6

Kɛ́ wɔkwɛ bɔ ni sane ni wɔshiɛɔ lɛ miiye eebua mɛi yɛ je lɛŋ he fɛɛ he lɛ, no baanyɛ awo wɔ hewalɛ ni wɔya nɔ wɔshiɛ kɛ ekãa. Daa afi lɛ, mɛi akpekpei abɔ baa Kaimɔ lɛ ni amɛhãa wɔkɛ amɛ kaseɔ Biblia lɛ. Abaptisiɔ mɛi akpei abɔ hu ni amɛkɛ wɔ fɛɛ feɔ ekome kɛtsuɔ shiɛmɔ nitsumɔ lɛ. Wɔleee mɛi abɔ ni yɔɔ lolo ni baanyɛ abamɔ anɔkwale lɛ mli kɛ́ wɔshiɛ wɔhã amɛ. Shi Yehowa ewie akɛ asafoku babaoo ko baafo amanehulu kpeteŋkpele lɛ. (Kpo. 7:​9, 14) Yehowa, ni ji nikpamɔ Nuŋtsɔ lɛ le akɛ mɛi pii yɛ lolo, no hewɔ lɛ esa akɛ wɔya nɔ wɔshiɛ. (Luka 10:2) Nɔ kome ni akɛyɔseɔ mɛi tuuntu ni ji Yesu kaselɔi lɛ ji, amɛkɛ ekãa shiɛɔ sane kpakpa lɛ. Be ni mɛi na bɔ ni bɔfoi lɛ wieɔ kɛ ekãa lɛ, ‘amɛyɔse akɛ amɛkɛ Yesu hi shi.’ (Bɔf. 4:13) Nyɛhãa wɔ hu wɔshiɛa sane kpakpa lɛ kɛ ekãa, koni mɛi fɛɛ ana akɛ Yesu kaselɔi ji wɔ. w25.03 18 kk. 15; 19 kk. 17-18

Biblia lɛ hãa wɔleɔ akɛ, Yehowa jwɛŋɔ mɛi ni abuuu amɛ lɛ po ahe. Akɛ nɔkwɛmɔnɔ lɛ, be ko lɛ, Yehowa tsu gbalɔ Samuel ni eya Yishai shĩa lɛ ni eyafɔ ebihii lɛ ateŋ mɔ kome mu akɛ mɔ ni baaye Israel nɔ maŋtsɛ wɔsɛɛ. Yishai tsɛ ebihii lɛ fɛɛ ehã Samuel, shi eshi David, ni ji amɛteŋ gbekɛ kwraa lɛ. Shi David moŋ ji mɔ ni Yehowa hala. (1 Sam. 16:​6, 7, 10-12) Yehowa le nɔ ni yɔɔ David tsui mli. Ele akɛ oblanyo nɛɛ sumɔɔ lɛ waa. Yɛ anɔkwale mli lɛ, Yehowa efee nɔ ko momo ni tsɔɔ akɛ ejwɛŋɔ ohe. Ekwɛɔ shihilɛ ni oyɔɔ mli lɛ ni ewoɔ bo ŋaa ni hi fe fɛɛ. (Lala 32:8) Enɛ tsɔɔ akɛ Yehowa le bo jogbaŋŋ. (Lala 139:1) Kɛ́ okɛ Yehowa ŋaawoo lɛ tsu nii, ni ona akɛ no miiwa bo lɛ, ebaahã ohe oye akɛ ejwɛŋɔ ohe. (1 Kro. 28:9; Bɔf. 17:​26, 27) Yehowa naa nibii fɛɛ ni ofeɔ koni onyɛ ojá lɛ ni obo lɛ toi lɛ. Enaa sui kpakpai ni oyɔɔ lɛ, ni eesumɔ ni otsɔ enaanyo.—Yer. 17:10. w24.10 25-26 kk. 7-9

Ekã shi faŋŋ akɛ osumɔɔ Yehowa, ni oosumɔ ni osɔmɔ onyɛmimɛi lɛ. No hewɔ lɛ, mɛni baawa bo ni osumɔ akɛ osɔmɔ akɛ asafoŋ sɔɔlɔ? Susumɔ miishɛɛ ni obaaná kɛ́ osɔmɔ onyɛmimɛi lɛ he. Yesu kɛɛ: “Nɔhãmɔ hãa mɔ náa miishɛɛ fe hemɔ.” (Bɔf. 20:35) Yesu hi shi yɛ nɔ ni etsɔɔ lɛ naa. Emii shɛ ehe waa akɛni esɔmɔ mɛi lɛ hewɔ. Enɛ he nɔkwɛmɔnɔ ko yɛ Marko 6:​31-34. No mli lɛ, Yesu kɛ ekaselɔi lɛ etsɔɔ mɛi nii ni etɔ amɛ. No hewɔ lɛ, amɛkpɛ amɛyiŋ akɛ amɛbaaya he ko banee ni amɛyajɔɔ amɛhe. Shi mɛi babaoo komɛi tsɔ amɛhiɛ ni amɛyashɛ he ni Yesu kɛ ekaselɔi lɛ yaajɔɔ amɛhe yɛ lɛ klɛŋklɛŋ. Mɛi nɛɛ miikpa gbɛ akɛ Yesu baatsɔɔ amɛ nii. Kulɛ Yesu baanyɛ ekɛɛ akɛ etsɔŋ amɛ nii. Ejaakɛ ekɛ ekaselɔi lɛ fɛɛ lɛ, “amɛnáaa dekã kɛye nii po.” Loo Yesu baanyɛ etsɔɔ amɛ nibii enyɔoo ko ni ewo amɛ gbɛ. Shi suɔmɔ tsirɛ lɛ ni “ebɔi amɛ nibii pii tsɔɔmɔ.” Ni etsɔɔ amɛ nii aahu kɛyashi ‘je na.’—Mar. 6:35. w24.11 16 kk. 9-10

Fɔlɔi nyɛyea nyɛbuaa nyɛbi lɛ ni ena gbɛi anɔ ni ebaanyɛ etsɔ eye odase. (Rom. 10:10) Wɔbaanyɛ wɔkɛ enɛ ato saŋkutswaa he. Kɛ́ mɔ ko miikase bɔ ni atswaa saŋku lɛ, ejeɔ shishi kɛ lalai ni tswaa waaa. Kɛkɛ lɛ, fiofio lɛ, ehe ebasa. Nakai nɔŋŋ kɛ́ gbekɛ ko miitao ekɛ mɛi abɔi nibii ni eheɔ eyeɔ lɛ ahe sanegbaa lɛ, ebaanyɛ ewie nɔ ko kuku ni ekɛje sanegbaa lɛ shishi. Akɛ nɔkwɛmɔnɔ lɛ, kɛ́ eetao eye mɔ ko ni ekɛyaa skul lɛ odase lɛ, ebaanyɛ ebi lɛ akɛ: “Ani ole akɛ jeŋ shikpalɔi kwɛɔ nibii ni abɔ lɛ anɔ amɛfeɔ tsɔji kɛ nibii krokomɛi? Hã mikɛ enɛ he vidio ko atsɔɔ bo.” Ebaanyɛ ejie vidioi srɔtoi ni yitso ji, Ani Mɔ Ko Ni Fee? lɛ eko etsɔɔ mɔ lɛ, ni ebi lɛ akɛ: “Kɛ́ ajieɔ jeŋ shikpalɔi ni kwɛɔ adebɔɔ nibii anɔ amɛfeɔ nibii lɛ ayi lɛ, ani esaaa akɛ ajieɔ mɔ ni bɔ nibii nɛɛ yi klɛŋklɛŋ?” Enɛ baanyɛ atsirɛ mɔ lɛ ni esumɔ akɛ ekase Yehowa he nii babaoo. w24.12 19 kk. 17-18

Yehowa to gbɛjianɔ koni Yesu abakpɔ̃ wɔ kɛje esha kɛ gbele mli. Shi te tɛŋŋ ni gbɔmɔ kome ni eye emuu lɛ gbele baanyɛ akpɔ̃ mɛi babaoo lɛ? Bɔfo Paulo tsɔɔ mli akɛ: “Bɔ ni gbɔmɔ kome lɛ [Adam] toigbele lɛ hã mɛi pii tsɔmɔ eshafeelɔi lɛ, nakai nɔŋŋ hu gbɔmɔ kome lɛ [Yesu] toiboo lɛ baahã mɛi pii atsɔmɔ jalɔi.” (Rom. 5:19; 1 Tim. 2:6) Nɔ ni Paulo tsɔɔ lɛ ji, gbɔmɔ kome ni eye emuu ni gbo Nyɔŋmɔ nɔ toi lɛ hewɔ wɔ fɛɛ wɔtsɔmɔ eshafeelɔi ni wɔgboiɔ lɛ. No hewɔ lɛ, nakai nɔŋŋ gbɔmɔ kome ni eye emuu ni boɔ Nyɔŋmɔ toi lɛ hu baanyɛ ahere wɔ kɛje esha kɛ gbele dɛŋ. Mɛni hewɔ Yehowa eŋmɛɛɛ gbɛ ni Adam bii ni baaye lɛ anɔkwa lɛ ahi shi kɛya naanɔ kɛkɛ? Ekolɛ ewaaa akɛ wɔbaanu he akɛ eji Yehowa tsu sane lɛ he nii yɛ nɛkɛ gbɛ nɔ kulɛ ebaahi. Shi kɛhã Yehowa lɛ, enaa lɛ akɛ kɛ́ etsu he nii yɛ nakai gbɛ nɔ lɛ ejaaa. Mɛni hewɔ? Ejaakɛ no baafee tamɔ nɔ ni esha ni Adam fee lɛ bɛ hiɛdɔɔ tsɔ, ni esha ni efee lɛ esaaa ebii lɛ ahe. w25.01 20-21 kk. 3-4

Bɔfo Paulo le akɛ etsɛŋ, abaagbe lɛ, shi kɛ́ esusu bɔ ni ehi shi ehã lɛ he lɛ, no hãa etsui nyɔɔ emli waa. Ewie akɛ: “Foidamɔ lɛ, mida migbe naa; hemɔkɛyeli lɛ, mihiɛ mli.” (2 Tim. 4:​6-8) Paulo kpɛ yiŋ kpakpa yɛ eshihilɛ mli; ekpɛ eyiŋ akɛ ekɛ ewala afii ni eshwɛ lɛ baasɔmɔ Yehowa, ni enɛ hewɔ lɛ, enu he akɛ Yehowa yɛ ehe miishɛɛ. Wɔ hu wɔmiisumɔ ni wɔkpɛ yiŋ kpakpai koni Yehowa aná wɔhe miishɛɛ. Te wɔbaafee tɛŋŋ wɔfee nakai? Paulo wie yɛ lɛ diɛŋtsɛ kɛ enyɛmimɛi Kristofoi anɔkwafoi lɛ ahe akɛ: “Wɔnyiɛɔ yɛ hemɔkɛyeli naa, jeee nɔ ni wɔnaa lɛ naa.” Yɛ Biblia lɛ mli lɛ, bei komɛi lɛ, akɛ ‘nyiɛmɔ’ tsuɔ nii kɛtsɔɔ bɔ ni mɔ ko hiɔ shi ehãa. No hewɔ lɛ, kɛ́ akɛɛ mɔ ko nyiɛɔ yɛ hemɔkɛyeli naa lɛ, belɛ mɔ lɛ susuɔ nɔ ni Yehowa miisumɔ ni efee lɛ he, ni edamɔɔ no nɔ ekpɛɔ eyiŋ. Ekɛ enifeemɔi tsɔɔ akɛ, eheɔ eyeɔ waa akɛ kɛ́ ekɛ Yehowa ŋaawoi ni yɔɔ Biblia lɛ mli lɛ tsu nii lɛ, ebaaná he sɛɛ waa, ni Yehowa hu baajɔɔ lɛ.—Lala 119:66; Heb. 11:6. w25.03 20 kk. 1-2

Nyɔŋmɔ mumɔ lɛ eye ebua mɛi babaoo ni tsutsu ko lɛ amɛhiɛ yɔɔ laŋlaŋ loo amɛjeŋba ekpɔtɔ lɛ ni amɛtsake kwraa. (Yes. 65:25) Amɛmia amɛhiɛ waa amɛjie sui gbohii ni tsutsu ko lɛ amɛyɔɔ lɛ. (Efe. 4:​22-24) Shi akɛni wɔyeee emuu hewɔ lɛ, yɛ be kɛ beiaŋ lɛ wɔbaatɔ̃. Fɛɛ sɛɛ lɛ, Yehowa efee wɔ fɛɛ ekome, eyɛ mli akɛ wɔjɛ hei srɔtoi, ni suɔmɔ kɛ toiŋjɔlɛ yɛ wɔteŋ. (Tito 2:11) Nyɔŋmɔ Ofe lɛ pɛ ni baanyɛ afee nɔ ko ni tamɔ nɛkɛ! Yehowa wiemɔi lɛ baa mli be fɛɛ be. (Yes. 55:​10, 11) Mfonirifeemɔŋ paradeiso ni wɔyɔɔ mli bianɛ lɛ po yeɔ enɛ he odase. Bɔ ni Yehowa ehã wɔfee ekome akɛ nyɛmimɛi lɛ nɔ bɛ kwraa. Akɛni wɔyɛ mfonirifeemɔŋ paradeiso lɛ mli hewɔ lɛ, wɔyɛ toiŋjɔlɛ ni wɔnuɔ he akɛ wɔyɛ shweshweeshwe eyɛ mli akɛ wɔyɛ jeŋ fɔŋ mli moŋ. (Lala 72:7) Yiŋtoi nɛɛ ahewɔ lɛ, wɔmiisumɔ ni wɔye wɔbua mɛi babaoo ni amɛbafata wɔhe. Gbɛ ni wɔbaatsɔ nɔ wɔfee nakai ji, ni wɔbaafee mɛi kaselɔi.—Mat. 28:​19, 20. w24.04 23 kk. 13, 15

Yesu sumɔɔ Yehowa kɛ ejwɛŋmɔ muu fɛɛ. Yesu le nɔ ni Yehowa miisumɔ ni lɛ Yesu lɛ efee, ni etswa efai shi akɛ ebaafee nakai pɛpɛɛpɛ eyɛ mli akɛ no baahã epiŋ waa moŋ. Yesu kɛ ejwɛŋmɔ fɛɛ ma e-Tsɛ lɛ suɔmɔnaa nii ni ebaafee lɛ nɔ, ni ehãaa nɔ ko nɔ ko he ahia lɛ yɛ eshihilɛ mli fe no. Petro kɛ bɔfoi krokomɛi lɛ ná hegbɛ amɛkɛ Yesu bɔ bei saŋŋ, no hewɔ lɛ, amɛbale jwɛŋmɔ ni ehiɛ yɛ saji ahe. Enɛ hewɔ lɛ, be ni Petro ŋma eklɛŋklɛŋ wolo lɛ, ewo Kristofoi hewalɛ ni amɛkɛ Kristo jwɛŋmɔ lɛ nɔŋŋ awaje amɛhe tamɔ tawuu nii. (1 Pet. 4:1) Wiemɔ ni Petro kɛtsu nii ni atsɔɔ shishi akɛ “awajea nyɛhe tamɔ tawuu nii” lɛ, ji wiemɔ ni akɛtsuɔ nii yɛ asraafoi anitsumɔ mli. No hewɔ lɛ, nɔ ni Petro tsɔɔ ji akɛ, kɛ́ Kristofonyo ko le Kristo jwɛŋmɔ lɛ, ená tawuu nii ko ni yɔɔ hewalɛ waa ni ebaanyɛ ekɛwu eshi akɔnɔi ni baanyɛ ahã efee esha, kɛ Satan, jeŋ nɛɛ nɔyelɔ lɛ.—2 Kor. 10:​3-5; Efe. 6:12. w25.03 8 kk. 1-3

Mɛɛ nibii esa akɛ ole yɛ mɔ ni okɛ nyiɛ lɛ he? Saji komɛi yɛ ni he hiaa waa ni esa akɛ ole dani suɔmɔ ni oyɔɔ kɛhã mɔ lɛ mli awa. Saji nɛɛ ateŋ ekome ji otii ni ekɛmamɔ ehiɛ yɛ shihilɛ mli. Te obaafee tɛŋŋ ole bɔ ni mɔ lɛ ji jogbaŋŋ diɛŋtsɛ lɛ? Gbɛ kome ni hi fe fɛɛ ji, ni obaabi mɔ lɛ saji ni obo lɛ toi jogbaŋŋ, ni esa akɛ kɛ́ nyɛmiigba sane lɛ, nyɛjɛ nyɛtsui mli nyɛwie. (Yak. 1:19) Enɛ hewɔ lɛ, ebaahi waa akɛ nyɛbaafee nibii ni tsɛɔ sanegbaa kɛbaa, tamɔ ni nyɛbaafee ekome kɛye nii, nyɛbaayashara shi yɛ he ko, loo ni nyɛbaafee ekome kɛya shiɛmɔ. Agbɛnɛ hu, kɛ́ okɛ lɛ kɛ enanemɛi loo lɛ kɛ ewekumɛi shãra lɛ, no hu baanyɛ ahã ole lɛ jogbaŋŋ. Kɛfata he lɛ, nyɛfea nibii krokomɛi ni baahã ona bɔ ni mɔ lɛ feɔ enii ehãa yɛ shihilɛi srɔtoi amli, kɛ agbɛnɛ hu kɛ́ eyɛ mɛi srɔtoisrɔtoi ateŋ. w24.05 28 kk. 6-7

Etsɛŋ, wɔkɛ shihilɛi ni mli wa waa baakpe, ni ehe baahia ni wɔkɛ wɔhiɛ afɔ̃ Yehowa nɔ fe bei fɛɛ ni eho. Nɔ ni baaye abua wɔ ji ni wɔbaakane mɛi ni awie amɛhe yɛ Biblia lɛ mli kɛ Yehowa tsuji ni yɔɔ ŋmɛnɛ lɛ ahe saji. Kɛ́ ookane saji nɛɛ eko lɛ, okɛ ojwɛŋmɔ ama bɔ ni Nyɔŋmɔ eye ebua ewebii nɛɛ kɛtsɔɔ akɛ lɛ ji amɛ-Tɛsaa lɛ nɔ. Jwɛŋmɔ nɔ ni obaakase yɛ saji nɛɛ amli lɛ nɔ jogbaŋŋ. Kɛ́ ofee nakai lɛ, no baaye abua bo ni okɛ Yehowa afee o-Tɛsaa. Agbɛnɛ hu, no baahã onyɛ otswa onyɛmimɛi Kristofoi lɛ oma shi. Akɛ nɔkwɛmɔnɔ lɛ, Yesu wo Simon, Kefa (loo “Petro”), ni shishi ji, “Tɛ.” (Yoh. 1:42) Ewo Petro nakai gbɛ́i lɛ, ejaakɛ ena akɛ Petro baashɛje mɛi amii yɛ asafo lɛ mli, ni ebaahã amɛhemɔkɛyeli lɛ mli awa. Biblia lɛ kɛ asafoŋ onukpai lɛ toɔ “hɔɔŋ ni tɛsaa agbo hãa” lɛ he. Enɛ hãa wɔnaa akɛ, asafoŋ onukpai lɛ buɔ asafoŋbii lɛ ahe. (Yes. 32:2) Kɛ́ nyɛmimɛi fɛɛ ni yɔɔ asafo lɛ mli lɛ hu bɔ mɔdɛŋ akɛ amɛbaakase Yehowa lɛ, asafo lɛ he baawa yɛ hemɔkɛyeli lɛ mli. w24.06 28 kk. 10-11

Israel maŋtsɛmɛi ni Yehowa bu amɛ akɛ anɔkwafoi lɛ ji mɛi ni já lɛ yɛ gbɛ ni etsɔɔ akɛ ajá lɛ lɛ nɔ lɛ. Maŋtsɛmɛi ni Yehowa bu amɛ akɛ amɛyeee anɔkwa lɛ je Yehowa Mla lɛ sɛɛ ni amɛbɔi amale nyɔŋmɔi jamɔ. (1 Maŋ. 21:​25, 26; 2 Kro. 12:1) Mɛni hewɔ Yehowa bu jamɔ ni maŋtsɛmɛi nɛɛ yajá amale nyɔŋmɔi lɛ akɛ nɔ ko ni yɔɔ hiɛdɔɔ waa lɛ? Yiŋtoo kome ji akɛ, Yehowa kpa gbɛ akɛ maŋtsɛmɛi lɛ baaye amɛbua amɛshishibii lɛ koni amɛjá lɛ yɛ gbɛ ni etsɔɔ akɛ ajá lɛ lɛ nɔ. Agbɛnɛ hu, kɛ́ mɛi bɔi amale nyɔŋmɔi jamɔ lɛ, amɛfeɔ eshai ni yɔɔ hiɛdɔɔ, ni amɛkɛ mɛi yeee jogbaŋŋ. (Hos. 4:​1, 2) Nɔ kroko hu ji akɛ, no mli lɛ maŋtsɛmɛi lɛ kɛ amɛshishibii lɛ fɛɛ ejɔɔ amɛhe nɔ amɛhã Yehowa. Enɛ hewɔ lɛ, Biblia lɛ kɛ Yehowa sɛɛ ni amɛje ni amɛyajá amale nyɔŋmɔi lɛ to gbalafitemɔ he. (Yer. 3:​8, 9) Kɛ́ mɔ ko fite gbãla lɛ, ekumɔɔ ehefatalɔ lɛ tsui. Nakai nɔŋŋ kɛ́ Yehowa tsulɔ ko ni ejɔɔ ehe nɔ ehã lɛ lɛ yajá amale nyɔŋmɔi lɛ, ekumɔɔ Yehowa tsui.—5 Mo. 4:23. w24.07 22-23 kk. 12-15