November

Bɔ ni Yehowa musuŋ tsɔɔ lɛ lɛ, nakai nɔŋŋ asafoŋ onukpai lɛ amusuŋ tsɔɔ amɛ yɛ mɛi ni ajie amɛ kɛje asafo lɛ mli lɛ ahe. Akɛ nɔkwɛmɔnɔ lɛ, Yehowa musuŋtsɔlɛ lɛ hewɔ lɛ, emɛɛɛ ni Israelbii lɛ atsake amɛtsui dani eye ebua amɛ. Moŋ lɛ, be ni amɛfeko nɔ ko nɔ ko ni tsɔɔ akɛ amɛtsake amɛtsui po lɛ, etsu egbalɔi lɛ kɛtee amɛŋɔɔ. Yehowa kɛɛ Hosea ni ekɛ eŋa lɛ he ake lɛ ni eyaŋɔ lɛ kɛba, eyɛ mli akɛ no mli lɛ yoo lɛ miiya nɔ eefee esha. Yehowa tsɔ enɛ nɔ etsɔɔ ewebii lɛ akɛ emusuŋ tsɔɔ lɛ waa yɛ amɛhe. (Hos. 3:1; Mal. 3:7) Asafoŋ onukpai lɛ kaseɔ Yehowa, no hewɔ lɛ, yɛ amɛtsui mli tɔ̃ɔ lɛ, amɛ hu amɛmiisumɔ ni mɔ ni efee esha lɛ aku esɛɛ kɛba asafo lɛ mli, ni amɛfeɔ bɔ fɛɛ bɔ ni amɛbaanyɛ koni enɛ feemɔ akawa kɛhã mɔ lɛ. Yɛ Yesu nɔkwɛmɔnɔ ni kɔɔ bi ni laaje lɛ he lɛ mli lɛ, tsɛ lɛ sha foi “ni eyafua [ebinuu] lɛ atuu ni ekɛ suɔmɔ shɔ enaa.” (Luka 15:20) Kadimɔ akɛ, tsɛ lɛ emɛɛɛ ni ebi lɛ akpa lɛ fai akɛ ekɛ ehe eshai ake lɛ dã. Moŋ lɛ, lɛ klɛŋklɛŋ esha foi kɛtee ebi lɛ ŋɔɔ, ejaakɛ esumɔɔ lɛ. w24.08 28 kk. 7-8

Wiemɔi ni yɔɔ ŋmɛnɛ ŋmalɛ lɛ mli lɛ hãa wɔnaa akɛ, Yehowa efeee kpɛkpɛi. Ehãa mɔ fɛɛ mɔ ni biɔ lɛ hiɛshikamɔ lɛ eko. Agbɛnɛ hu, kadimɔ akɛ, kɛ́ Yehowa hã mɔ ko hiɛshikamɔ lɛ, ‘ewieee mɔ lɛ hiɛ,’ loo ‘etaooo tɔmɔ yɛ mɔ lɛ he.’ Enɛ hewɔ lɛ, kɛ́ wɔbi lɛ gbɛtsɔɔmɔ lɛ, ewooo wɔ hiɛgbele. Anɔkwa, eesumɔ ni wɔbi edɛŋ gbɛtsɔɔmɔ moŋ. (Abɛi 2:​1-6) Ni wɔ hu? Mɛɛ gbɛ nɔ wɔbaanyɛ wɔkase Yehowa? (Lala 32:8) Akɛ Yehowa webii lɛ, wɔyɛ hegbɛi babaoo ni wɔbaanyɛ wɔhã mɛi ale nibii ni wɔle lɛ. Akɛ nɔkwɛmɔnɔ lɛ, bei pii lɛ wɔyeɔ wɔbuaa mɛi hei ni ebatsɔmɔ shiɛlɔi lɛ koni amɛle bɔ ni ashiɛɔ jogbaŋŋ. Agbɛnɛ hu, asafoŋ onukpai lɛ toɔ amɛtsui shi ni amɛyeɔ amɛbuaa asafoŋ sɔɔlɔi kɛ nyɛmimɛi hii ni abaptisi amɛ lɛ koni amɛnyɛ amɛtsu nitsumɔi ni akɛwo amɛdɛŋ yɛ asafo lɛ mli lɛ. Kɛfata he lɛ, nyɛmimɛi ni le tsumaa kɛ ekuramɔ lɛ yeɔ amɛbuaa nyɛmimɛi ni he esako tsɔ lɛ koni amɛnyɛ amɛye amɛbua kɛmamɔ asafo lɛ tsũi. w24.09 28-29 kk. 11-12

Dani abaawo bo asafoŋ onukpa lɛ, esa akɛ ofee “mɔ ko ni anáŋ ehe sane fɔŋ ko awie,” ni tsɔɔ akɛ akɛni obaa ojeŋ jogbaŋŋ hewɔ lɛ, ofee gbɛ́i kpakpa yɛ asafo lɛ mli. (1 Tim. 3:2) Agbɛnɛ hu, esa akɛ mɛi ni yɔɔ sɛɛ lɛ hu aye ohe odase kpakpa. Yɛ anɔkwale mli lɛ, mɛi ni sɔmɔɔɔ Yehowa lɛ baanyɛ awie ashi nibii ni oheɔ oyeɔ lɛ, shi esaaa akɛ amɛnáa nɔ ko amɛdamɔɔ nɔ amɛkɛɔ akɛ oyeee anɔkwa loo obaaa ojeŋ jogbaŋŋ. (Dan. 6:​4, 5) Bi ohe akɛ, ‘Ani mifee gbɛ́i kpakpa yɛ asafo lɛ mli kɛ asafo lɛ sɛɛ?’ Kɛ́ okɛ ojwɛŋmɔ yaa sui kpakpai ni mɛi yɔɔ lɛ anɔ ni ojieɔ amɛyi yɛ nomɛi ahewɔ lɛ, belɛ oji “mɔ ni sumɔɔ ekpakpa.” (Tito 1:8) Mɔ ni sumɔɔ ekpakpa lɛ yɛ he miishɛɛ hu akɛ ebaafee nibii kpakpai ehã mɛi, ni efeɔ nibii kpakpai ni akpaaa gbɛ akɛ efee lɛ po. Mɛni hewɔ ehe hiaa ni asafoŋ onukpai ‘asumɔ ekpakpa’? Ejaakɛ no baahã amɛná he miishɛɛ akɛ amɛbaakwɛ nyɛmimɛi ni yɔɔ asafo lɛ mli lɛ anɔ ni amɛtsu nitsumɔi ni akɛwo amɛdɛŋ lɛ hu. (1 Pet. 5:​1-3) Eyɛ mli akɛ enɛ baabi ni amɛtsu nii waa moŋ, shi amɛnáa miishɛɛ waa fe amɛhe ni amɛkɛshãa afɔle lɛ.—Bɔf. 20:35. w24.11 20-21 kk. 3-5

Asafoŋ sɔɔlɔi tsuɔ nitsumɔi ni he hiaa waa yɛ asafo lɛ mli. Bɔfo Paulo shwɛɛɛ hii anɔkwafoi nɛɛ ahe. Akɛ nɔkwɛmɔnɔ lɛ, be ni eŋma asafo ni yɔɔ Filipi lɛ wolo lɛ, jeee asafoŋ onukpai ni yɔɔ asafo nɛɛ mli lɛ kɛkɛ eŋa, shi moŋ eŋa asafoŋ sɔɔlɔi lɛ hu. (Fip. 1:1) Ekɔɔɔ he eko afii abɔ ni nyɛmimɛi hii ni abaptisi amɛ ni sɔmɔɔ akɛ asafoŋ sɔɔlɔi lɛ eye lɛ, amɛnáa miishɛɛ waa akɛ amɛmiisɔmɔ nyɛmimɛi ni yɔɔ asafo lɛ mli lɛ. Akɛ nɔkwɛmɔnɔ lɛ, be ni awó nyɛmi nuu ko ni atsɛɔ lɛ Devan lɛ asafoŋ sɔɔlɔ lɛ, no mli lɛ eye afii 18. Shi be ni awó nyɛmi nuu ko ni atsɛɔ lɛ Luis lɛ asafoŋ sɔɔlɔ lɛ, no mli lɛ eye afii 50 kɛ sɛɛ. Te Luis nuɔ he ehãa tɛŋŋ yɛ sɔɔmɔ hegbɛ ni ena nɛɛ he? Ewie akɛ, “Eŋɔɔ minaa waa akɛ miisɔmɔ akɛ asafoŋ sɔɔlɔ. Nyɛmimɛi lɛ efee nibii pii kɛtsɔɔ akɛ amɛsumɔɔ mi, ni amrɔ nɛɛ mi hu miná hegbɛ ni mikɛbaatsɔɔ akɛ misumɔɔ amɛ!” Nakai nɔŋŋ asafoŋ sɔɔlɔi babaoo nuɔ he. Kɛ́ oji nyɛmi nuu ni abaptisi lɛ, shi amrɔ nɛɛ, ojeee asafoŋ sɔɔlɔ lɛ, ani obaanyɛ okɛfee oti ni ma ohiɛ akɛ obaasɔmɔ akɛ asafoŋ sɔɔlɔ? w24.11 14 kk. 1-3

Be ni Yuda maŋtsɛ Hezekia ye afii 39 lɛ, hela ko ni naa wa waa mɔ lɛ. Yehowa tsu gbalɔ Yesaia ni eyakɛɛ Hezekia akɛ hela lɛ baagbe lɛ. (2 Maŋ. 20:1) Be ni Hezekia nu enɛ lɛ, ewerɛ ho ehe aahu akɛ efó waa. Esɔle ekpa Yehowa fai koni eye ebua lɛ. Be ni Yehowa nu Hezekia sɔlemɔ lɛ, ni ena ehiɛ yaafonui lɛ, enu he ehã lɛ, ni ekɛɛ lɛ akɛ: “Minu osɔlemɔ lɛ. Ni mina oyaafonui lɛ hu. Mibatsa bo.” Yehowa tsɔ gbalɔ Yesaia nɔ ehã Hezekia le akɛ ena lɛ mɔbɔ, ni ewo lɛ shi akɛ ekɛ afii komɛi baafata ewala afii lɛ ahe ehã lɛ ni ebaajie lɛ kɛ Yerusalem kɛje Asiriabii lɛ adɛŋ. (2 Maŋ. 20:​4-6) Ani ooye hela ko ni ofee he eko aahu shi ehiii tsamɔ? Kɛɛmɔ Yehowa bɔ ni onuɔ he ohãa lɛ yɛ sɔlemɔ mli; obaanyɛ ofó oshwie enɔ po. Biblia lɛ hãa wɔleɔ akɛ, “musuŋtsɔlɛi a-Tsɛ lɛ kɛ miishɛjemɔ fɛɛ Nyɔŋmɔ lɛ,” baashɛje wɔmii yɛ wɔmanehului fɛɛ amli.—2 Kor. 1:​3, 4. w24.12 23-24 kk. 15-17

Kɛ́ okwɛ lɛ, te obaanu he ohã tɛŋŋ kɛ́ ona ni atee mɛi ni egboi lɛ ashi? Ŋwanejee ko bɛ he akɛ, okɛ miishɛɛ baahere amɛ! Agbɛnɛ hu, kwɛ bɔ ni omii baashɛ ohe waa ohã be mli ni okaseɔ nibii ni Yehowa ebɔ lɛ ahe nii ni no hãa oleɔ lɛ jogbaŋŋ lɛ. (Lala 104:24; Yes. 11:9) Ni nɔ ni fe fɛɛ lɛ, ofeŋ esha dɔŋŋ, no hewɔ lɛ obaanyɛ osɔmɔ Yehowa jogbaŋŋ ni ehe ehiaaa ni obi lɛ ni ekɛ ohe eshai ake bo. Bianɛ lɛ, ani obaasumɔ ni ofee nɔ ni bo diɛŋtsɛ osumɔɔ koni shihilɛ kpakpa nɛɛ ni obaaná yɛ Paradeiso lɛ mli lɛ aŋmɛɛ bo? (Heb. 11:25) Ekã shi faŋŋ akɛ, osumɔŋ ni ofee nakai! Jɔɔmɔi ni wɔbaaná yɛ Paradeiso lɛ mli lɛ hi kwraa fe nibii ni wɔbaanyɛ wɔná yɛ je nɛɛ mli amrɔ nɛɛ. Kaimɔ akɛ, be ko baashɛ ni ehe ebahiaŋ ni wɔkwɛ Paradeiso lɛ gbɛ dɔŋŋ, ejaakɛ no mli lɛ wɔyɛ Paradeiso lɛ mli. Ni nɔ hewɔ ni enɛ fɛɛ baaba lɛ nakai ji suɔmɔ ni Yehowa yɔɔ kɛhã wɔ ni ehã e-Bi lɛ bagbo kɛkpɔ̃ wɔ lɛ! w25.01 29 kk. 12

Hebribii awolo lɛ wie mɛi pii ni he Yehowa amɛye lɛ ahe. Amɛteŋ mɔ kome ni hemɔkɛyeli sa kadimɔ waa ji, Mose. (Heb. 3:​2-5; 11:​23-25) Mose hemɔkɛyeli lɛ efeee efolo, ejaakɛ Yehowa tsɔ naakpɛɛ gbɛ nɔ ehã Israelbii lɛ nu kɛ niyenii yɛ ŋa kpataa lɛ nɔ. (2 Mo. 15:​22-25; Lala 78:​23-25) Eyɛ mli akɛ Mose heɔ Yehowa eyeɔ waa moŋ, shi aaafee afi sɛɛ be ni Yehowa etsɔ naakpɛɛ gbɛ nɔ ekpɔ̃ Israelbii lɛ, eyiŋ fee lɛ enyɔnyɔɔnyɔ kɛji Yehowa baanyɛ ahã amɛ loo tamɔ bɔ ni ekɛɛ lɛ. No mli lɛ, Israelbii lɛ ayi fa waa, no hewɔ lɛ ewa kɛhã Mose akɛ ebaahe eye akɛ Yehowa baanyɛ ehã amɛ loo bɔ ni baashɛ amɛ fɛɛ yɛ ŋa kpataa lɛ nɔ. Shi Yehowa bi lɛ akɛ: “Ani Yehowa nine yɛ kuku tsɔ?” (4 Mo. 11:​21-23) Yɛ gbɛ ko nɔ lɛ, etamɔ nɔ ni Yehowa miibi Mose akɛ, ‘Ani osusuɔ akɛ minyɛŋ mafee nɔ ni mikɛɛ mafee lɛ?’ w25.03 26 kk. 1-2

Ani eja akɛ wɔbaawie akɛ nɔ fɛɛ nɔ ni awie he yɛ Nu Afua lɛ he sane lɛ mli lɛ damɔ shi kɛhã nɔ ko ni baaya nɔ yɛ wɔbeiaŋ? Hetoo lɛ ji, dabi. Mɛni hewɔ? Nɔ hewɔ lɛ ji, Biblia lɛ ewieko akɛ nɔ fɛɛ nɔ ni awie he yɛ Nu Afua lɛ he sane lɛ mli lɛ damɔ shi kɛhã nɔ ko. Eyɛ mli akɛ Yesu kɛ be ni eba lɛ to “Noa gbii lɛ” ahe moŋ, shi ewieee akɛ nɔ fɛɛ nɔ ni tee nɔ yɛ nakai beiaŋ, tamɔ shinaa lɛ ni Yehowa ŋa lɛ nɛkɛ lɛ, damɔ shi kɛhã nɔ ko ni baaba wɔsɛɛ. (Mat. 24:​37-39) Be ni Yehowa bɔ Noa kɔkɔ akɛ ekɛ nu afua baakpãtã je lɛ hiɛ ni no hewɔ lɛ, ekpɛ adeka lɛ, te Noa fee enii ehã tɛŋŋ? Ekpɛ adeka lɛ, ni no hãa wɔnaa akɛ ehe Nyɔŋmɔ nɔ eye. (Heb. 11:7; 1 Pet. 3:20) Nakai nɔŋŋ ŋmɛnɛ lɛ, kɛ́ wɔshiɛ Nyɔŋmɔ Maŋtsɛyeli lɛ he sane kpakpa lɛ wɔhã mɛi lɛ, esa akɛ amɛfee nɔ ko yɛ nɔ ni amɛnu lɛ he kɛtsɔɔ akɛ amɛheɔ amɛyeɔ. (Bɔf. 3:​17-20) Petro tsɛ Noa akɛ, “jalɛ shiɛlɔ.” Ŋmɛnɛ lɛ, wɔmiibɔ mɔdɛŋ ni wɔshiɛ wɔhã mɛi yɛ je lɛŋ he fɛɛ he, ni wɔkɛ ekãa tsuɔ nitsumɔ nɛɛ. Fɛɛ sɛɛ lɛ, wɔle akɛ, wɔnyɛŋ wɔshiɛ wɔhã mɛi fɛɛ ni yɔɔ shikpɔŋ lɛ nɔ dani naagbee lɛ aba. w24.05 9-10 kk. 3-5

Esa akɛ, be fɛɛ be lɛ, wɔkwɛ akɛ mɛni wɔbaanyɛ wɔfee kɛtsɔɔ Yehowa nanemɛi lɛ akɛ wɔbuɔ amɛ ni wɔsusuɔ amɛhe. (Rom. 12:10) Mɛni ji nibii nɛɛ ekomɛi? Eko ji nɔ ni awie he yɛ Lala 15:4 lɛ; no ji ni wɔbaaye wɔshiwoo nɔ kɛ́ ‘nibii eyaaa lɛ jogbaŋŋ kɛhãaa wɔ po.’ Kɛ́ wɔyeee wɔshiwoi anɔ lɛ, ebaanyɛ egba mɛi anaa waa. (Mat. 5:37) Akɛ nɔkwɛmɔnɔ lɛ, Yehowa miisumɔ ni wumɛi kɛ ŋamɛi aye shi ni amɛwo amɛhe be ni amɛboteɔ gbalashihilɛ mli lɛ nɔ. Agbɛnɛ hu, kɛ́ fɔlɔi wo amɛbii shi akɛ amɛbaafee nɔ ko amɛhã amɛ lɛ, eesumɔ ni amɛmia amɛhiɛ waa ni amɛye amɛshiwoo lɛ nɔ. Wɔsumɔɔ Nyɔŋmɔ ni wɔsumɔɔ wɔnaanyo gbɔmɔ, ni enɛ ji nɔ ni tsirɛɔ wɔ ni wɔfee bɔ fɛɛ bɔ ni wɔbaanyɛ koni wɔye wɔshiwoi anɔ. Nɔ kroko ni wɔbaanyɛ wɔfee kɛtsɔɔ akɛ wɔwoɔ Nyɔŋmɔ nanemɛi lɛ ahiɛ nyam ji, ni wɔbaafee amɛ gbɔ ni wɔfee amɛ ejurɔ. (Rom. 12:13) Kɛ́ wɔsaraa wɔnyɛmimɛi loo wɔkɛ amɛ feɔ ekome kɛjieɔ wɔhiɛtserɛ lɛ, no hãa naanyobɔɔ ni yɔɔ wɔ kɛ amɛ teŋ lɛ mli waa, ni ehãa naanyobɔɔ ni yɔɔ wɔ kɛ Yehowa teŋ lɛ hu mli waa. Agbɛnɛ hu, kɛ́ wɔfee amɛ gbɔ lɛ, wɔmiikase Yehowa. w24.06 12 kk. 15-16

Yehowa jieɔ anɔkwale lɛ kpo etsɔɔ mɛi ni baa amɛhe shi. (Mat. 11:25) Wɔba wɔhe shi ni wɔhã akɛ wɔ kase nii ni no ye ebua wɔ ni wɔba anɔkwale lɛ mli. (Bɔf. 8:​30, 31) No hewɔ lɛ, esa akɛ wɔya nɔ wɔba wɔhe shi ni wɔkwɛ jogbaŋŋ ni wɔkawó wɔhe nɔ. Henɔwomɔ baanyɛ ahã wɔnu he akɛ, yɛ Biblia mli shishitoo mlai kɛ gbɛtsɔɔmɔi ni Yehowa asafo lɛ kɛhãa lɛ sɛɛ lɛ, wɔbaanyɛ wɔfee nɔ ni wɔ diɛŋtsɛ hu wɔsusuɔ akɛ eja. Nɔ kome ni baaye abua wɔ ni wɔya nɔ wɔba wɔhe shi ji, ni wɔbaahã ehi wɔjwɛŋmɔ mli akɛ, kɛ́ akɛ wɔ to Yehowa he lɛ, wɔjeee nɔ ko kwraa. (Lala 8:​3, 4) Nɔ kroko ni baaye abua wɔ ji, ni wɔbaabi Yehowa ni eye ebua wɔ ni wɔba wɔhe shi be fɛɛ be ni wɔŋmɛ gbɛ ni etsɔɔ wɔ nii. Kɛ́ wɔfee nakai lɛ, Yehowa baaye ebua wɔ ni wɔkɛ esusumɔi ni ejieɔ lɛ kpo etsɔɔ wɔ kɛtsɔ e-Wiemɔ lɛ kɛ esafo lɛ nɔ lɛ atsu nii moŋ fe wɔ diɛŋtsɛ wɔsusumɔi. Be ni okaneɔ Biblia lɛ, kwɛmɔ akɛ obaana nibii ni tsɔɔ akɛ Yehowa sumɔɔ mɛi ni baa amɛhe shi, shi eehi mɛi ni wóɔ amɛhe nɔ lo. Ni kɛ́ oná sɔɔmɔ hegbɛ ko ni baahã mɛi ale bo waa lɛ, kwɛmɔ jogbaŋŋ ni okawó ohe nɔ, shi moŋ oya nɔ oba ohe shi. w24.07 10 kk. 8-9

Kɛjɛ afi 1919 kɛbaa nɛɛ, Yesu miitsɔ hii fioo komɛi ni afɔ amɛ mu ni miisɔmɔ akɛ kuu lɛ anɔ eeto shiɛmɔ nitsumɔ lɛ he gbɛjianɔ ni eejɛ Nyɔŋmɔ Wiemɔ lɛ mli eehã ewebii lɛ gbɛtsɔɔmɔi yɛ be ni sa mli. (Luka 12:42) Ni wɔmiina faŋŋ akɛ, Yehowa miijɔɔ amɛnitsumɔ lɛ nɔ. (Yes. 65:​13, 14) Eji atoko wɔhe gbɛjianɔ kulɛ, wɔnyɛŋ wɔtsu nitsumɔ ni Yesu kɛwo wɔdɛŋ lɛ. (Mat. 28:​19, 20) Akɛ nɔkwɛmɔnɔ lɛ, eji asafoŋ onukpai lɛ etoko asafo lɛ shikpɔŋkuku lɛ he gbɛjianɔ ni mɔ fɛɛ mɔ nyɛɔ eshiɛɔ yɛ he ni esumɔɔ kulɛ, mɛni baaba? Kulɛ shikpɔŋkuku lɛ fãi komɛi yɛ ni shiɛlɔi srɔtoi baatsu mli nii shii abɔ, ni efãi komɛi hu yɛ ni ekolɛ ayashiɛŋ yɛ jɛmɛ kwraa. Kɛ́ okwɛ lɛ, mɛɛ gbɛi krokomɛi anɔ wɔnáa wɔhe gbɛjianɔ ni ato lɛ he sɛɛ? Bɔ ni Yesu to esɛɛnyiɛlɔi lɛ ahe gbɛjianɔ be ni eyɔɔ shikpɔŋ lɛ nɔ lɛ, nakai nɔŋŋ ŋmɛnɛ lɛ, etoɔ Nyɔŋmɔ webii lɛ ahe gbɛjianɔ. w24.04 8-9 kk. 2-4

Kain, ni ji Adam kɛ Hawa kromɔbi lɛ, ná esha kɛjɛ efɔlɔi aŋɔɔ. Shi Kain miaaa ehiɛ koni eye esha nɔ kunim. Biblia lɛ kɛɛ: “Lɛ diɛŋtsɛ enitsumɔi lɛ, nitsumɔi fɔji ni.” (1 Yoh. 3:12) Eeenyɛ efee akɛ, no hewɔ Yehowa “náaa Kain kɛ efɔle lɛ he miishɛɛ” lɛ. Shi nɔ najiaŋ ni Kain baatsake egbɛi lɛ, ‘emli fu waa ni ehao.’ No hewɔ lɛ, mɛni Yehowa fee? Ekɛ Kain wie. (1 Mo. 4:​3-7) Ŋmalɛ nɛɛ hãa wɔnaa akɛ, Yehowa jɛ naajɔlɛ mli ekɛ Kain susu nii ahe ni ekɛɛ lɛ akɛ kɛ́ efee ekpakpa lɛ ebaajɔɔ lɛ. Agbɛnɛ hu, ebɔ lɛ kɔkɔ akɛ, bɔ ni emli efu lɛ, kɛ́ ekwɛɛɛ ni ahi lɛ, ebaafee nɔ ko gbonyo. Dɔlɛ sane ji, Kain booo Yehowa toi. Yehowa bɔ mɔdɛŋ akɛ ebaaye ebua lɛ koni etsake, shi ekpɛlɛɛɛ. Ani bɔ ni Kain fee enii lɛ hewɔ lɛ, Yehowa kpɛ eyiŋ akɛ eyeŋ ebuaŋ efɔŋfeelɔ ko dɔŋŋ koni etsake etsui? Dabi, efeee nakai! w24.08 10 kk. 8

Mose hã Israelbii lɛ le akɛ amɛbaaná shihilɛ kpakpa wɔsɛɛ. Akɛni amɛji maŋ ni Yehowa ejɔɔ hewɔ lɛ, amɛbaanyɛ amɛtsɛ waa yɛ shikpɔŋ ni ewo shi akɛ ekɛbaahã amɛ lɛ nɔ. Shikpɔŋ nɛɛ nɔ yɛ fɛo waa ni ebaa nii diɛŋtsɛ! Mose tsɔɔ bɔ ni shikpɔŋ lɛ ji hã. Ewie akɛ: “Maji wuji ni yɔɔ fɛo ni jeee bo oto, shĩai ni amɛmli eyimɔ obɔbɔ kɛ nibii kpakpai srɔtoi ni jeee bo otsu owo mli, bui ni atsatsai ni akɛtoɔ nu ni jeee bo otsa, kɛ wain ŋmɔji ni jeee bo ofee, kɛ oliv tsei ni jeee bo odu.” (5 Mo. 6:​10, 11) Mose bɔ Israelbii lɛ kɔkɔ hu. Bɔ ni afee ni amɛya nɔ amɛhi shikpɔŋ fɛfɛo ni Yehowa kɛhã amɛ lɛ nɔ lɛ, ehe baahia ni amɛbo ekitãi lɛ atoi. No hewɔ lɛ, Mose kɛɛ amɛ ni ‘amɛkɔ wala,’ ni tsɔɔ akɛ amɛbo Yehowa toi ni ‘amɛkpɛtɛ ehe.’ (5 Mo. 30:20) Shi Israelbii lɛ eyabooo Yehowa toi. Hewɔ lɛ, sɛɛ mli lɛ, Yehowa hã Asiriabii lɛ kɛ Babilonbii lɛ ye amɛnɔ kunim ni amɛŋɔ amɛ nom.—2 Maŋ. 17:​6-8, 13, 14; 2 Kro. 36:​15-17, 20. w24.11 9 kk. 5-6

Ŋmɛnɛ lɛ, mɛi pii susuɔ akɛ kɛ́ amɛhe Yesu nɔ amɛye ni amɛna lɛ akɛ amɛkpɔ̃lɔ kɛkɛ lɛ, no baahã amɛná naanɔ wala. (Yoh. 6:29) Shi no pɛ kɛkɛ faaa. Mɛni hewɔ? Ejaakɛ no mli lɛ, mɛi ni Yesu kɛwieɔ yɛ Galilea lɛ ateŋ mɛi komɛi heɔ enɔ amɛyeɔ, shi amɛkpa esɛɛnyiɛmɔ. Mɛni hã amɛkpa esɛɛnyiɛmɔ? Mɛi ni Yesu kɛwie yɛ Galilea lɛ ateŋ mɛi pii nyiɛ esɛɛ yɛ nɔ ni ehã amɛ lɛ hewɔ. Nɔ ni amɛtaoɔ ji, ni etsa amɛ, ehã amɛ niyenii, ni ekɛɛ amɛ nibii ni baaŋɔɔ amɛtoi naa. Shi Yesu hã amɛle faŋŋ akɛ, jeee nɔ ni amɛtaoɔ lɛ hewɔ eba shikpɔŋ lɛ nɔ. Eba ni ebatsɔɔ amɛ nɔ ni esa akɛ amɛfee koni amɛtsɔmɔ ekaselɔi diɛŋtsɛ. Esa akɛ ‘amɛba eŋɔɔ,’ ni tsɔɔ akɛ amɛbo nɔ fɛɛ nɔ ni etsɔɔ amɛ lɛ toi ni amɛkɛtsu nii.—Yoh. 5:40. w24.12 12 kk. 12-13

Kɛ́ nuu ko feɔ nibii ni hãa eŋa lɛ nuɔ he akɛ esumɔɔɔ lɛ ni ebuuu lɛ lɛ, mɛni baaye abua lɛ ni ekpa? Nɔ ni baaye abua lɛ ji, ni ebaamia ehiɛ ekase Yesu. Bɔ ni ekɛ esɛɛnyiɛlɔi lɛ ye ehã lɛ ji nɔkwɛmɔnɔ kpakpa ni wumɛi baanyɛ akase. Hã wɔkwɛ nɔ ni wumɛi baanyɛ akase yɛ bɔ ni Yesu kɛ ebɔfoi lɛ ye ehã kɛ bɔ ni ekɛ amɛ wie ehã lɛ mli. Yesu kɛ ebɔfoi lɛ ye jogbaŋŋ be fɛɛ be, ni efee nibii ni hã amɛna akɛ ebuɔ amɛ. Eyitsoŋ waaa yɛ amɛnɔ, ni efeee nɔ ko ni baaye amɛ awui. Yesu yeee ekaselɔi lɛ anɔ nuŋtsɔmɛi asane koni amɛshe lɛ gbeyei. Moŋ lɛ, eba ehe shi ni esɔmɔ amɛ. (Yoh. 13:​12-17) Ekɛɛ ekaselɔi lɛ akɛ: “Nyɛkasea mi, ejaakɛ mihe jɔ, ni mibaa mihe shi yɛ mitsuiŋ, ni nyɛhe baajɔ nyɛ.” (Mat. 11:​28-30) Kadimɔ akɛ, Yesu he jɔ. Kɛ́ mɔ ko he jɔ lɛ, no etsɔɔɔ akɛ elu. Moŋ lɛ, etsɔɔ akɛ enyɛɔ eyeɔ ehe nɔ. Kɛ́ mɔ ko wo emli la lɛ, emɔɔ etsui mli ni emli fuuu. w25.01 10 kk. 10-11

Be ni jeŋ fɔŋ nɛɛ naagbee lɛ bɛŋkɛɔ lɛ, nibii amli baawa. Basabasafeemɔ ni baa yɛ maŋkwramɔŋ saji ahewɔ, tai, oshãrai, loo tsɛŋemɔ helai ni baa yɛ maji amli lɛ baanyɛ ahã wɔnitsumɔ loo wɔnibii aŋmɛɛ wɔ, loo ehã wɔfã kɛshi he ni wɔyɔɔ lɛ. Mɛni baaye abua wɔ ni wɔkpɛ yiŋ ni baatsɔɔ akɛ wɔheɔ wɔyeɔ waa akɛ Yehowa nine efoko kuku? Nɔ titri ni baaye abua bo waa ji ni obaakɛɛ Yehowa nibii ni yeɔ otsui lɛ. Sɔlemɔ obi Yehowa koni ehã bo hiɛshikamɔ ni onyɛ okpɛ yiŋ kpakpai, ni agbɛnɛ hu, eye ebua bo ni ‘okaye otsui babaoo’ yɛ shihilɛ ni oyaje mli lɛ he. (Luka 12:​29-31) Yaa nɔ osɔle ni obi Yehowa ni eye ebua bo ni ohiɛ asɔ nibii ni he hiaa yɛ shihilɛ mli, tamɔ niyenii kɛ atade ni onáa bianɛ lɛ. (1 Tim. 6:​7, 8) Taomɔ nii amli yɛ asafo lɛ woji ni kɛ ŋaawoi komɛi hãa yɛ nibii ni obaanyɛ ofee kɛ́ okɛ shika he naagbai miikpe lɛ amli. Saji ni yɔɔ jw.org lɛ nɔ ni tsɔɔ nibii ni wɔbaanyɛ wɔfee kɛ́ wɔkɛ shika he naagbai miikpe lɛ eye ebua mɛi babaoo. w25.03 28-29 kk. 10-11

Be ni be bashɛ ni Yehowa baaŋmɛ Jeŋmajiaŋbii ni afolɔko amɛ ketia lɛ gbɛ ni amɛbafata ewebii lɛ ahe lɛ, ehala bɔfo Petro koni eyashiɛ ehã Jeŋmajiaŋnyo ko ni atsɛɔ lɛ Kornelio. Kornelio fata klɛŋklɛŋ Jeŋmajiaŋbii ni batsɔmɔ Kristofoi lɛ ahe. Nakai beiaŋ lɛ, Yudafoi lɛ kɛ Jeŋmajiaŋbii lɛ tseee loo. No hewɔ lɛ, dani Petro baanyɛ eshiɛ ehã Jeŋmajiaŋbii lɛ, esa akɛ etsake jwɛŋmɔ ni ehiɛ lɛ. Shi be ni ena akɛ no ji nɔ ni Nyɔŋmɔ miisumɔ ni efee lɛ, etsake jwɛŋmɔ ni ehiɛ lɛ. Enɛ hewɔ lɛ, be ni Kornelio tsu ni ayatsɛ lɛ kɛba lɛ, ‘ejieee enaa,’ etee. (Bɔf. 10:​28, 29) Petro shiɛ ehã Kornelio kɛ eshĩabii lɛ, ni abaptisi amɛ. (Bɔf. 10:​21-23, 34, 35, 44-48) Afii komɛi asɛɛ lɛ, Petro wo enyɛmimɛi Kristofoi lɛ hewalɛ ni ‘amɛná jwɛŋmɔ kome.’ (1 Pet. 3:8) Kɛ́ wɔbɔ mɔdɛŋ akɛ wɔbaahã jwɛŋmɔ ni wɔhiɛ yɛ saji ahe lɛ kɛ Yehowa jwɛŋmɔ ni wɔkase yɛ e-Wiemɔ lɛ mli lɛ akpã gbee lɛ, no baahã wɔ fɛɛ wɔná jwɛŋmɔ kome. w25.03 9 kk. 7-8

Bɔ ni mɛi susuɔ nii ahe yɛ je lɛ mli lɛ kɛ Yehowa susumɔi yɛ saji ahe lɛ kpãaa gbee kwraa. (Abɛi 17:15) Enɛ hewɔ lɛ, ehe miihia waa ni wɔyɔse susumɔi gbohii nɛɛ ni wɔtsi wɔhe kɛje he kwraa, kɛjeee nakai lɛ, ekãa ni wɔkɛsɔmɔɔ Yehowa lɛ naa baaba shi loo wɔbaakpa lɛ sɔɔmɔ kwraa. Ehe miihia waa ni wɔbo ŋaa ni bɔfo Paulo wo Yudafoi ni ebatsɔmɔ Kristofoi lɛ toi, ni wɔ hu wɔya wɔhiɛ kɛshɛ dalɛ he. Enɛ biɔ ni wɔkase Biblia lɛ jogbaŋŋ koni wɔle Yehowa ni wɔsusu nii ahe tamɔ lɛ. Ni esa akɛ wɔya nɔ wɔfee enɛ be ni wɔjɔɔ wɔhe nɔ wɔhã Yehowa ni abaptisi wɔ lɛ sɛɛ po. Ekɔɔɔ he eko afii abɔ ni wɔkɛsɔmɔ Yehowa lɛ, esa akɛ wɔya nɔ wɔkane Nyɔŋmɔ Wiemɔ lɛ daa gbi ni wɔjwɛŋ nɔ. (Lala 1:2) Kɛ́ wɔfee nakai lɛ, ebaaye ebua wɔ ni wɔná su ko ni Paulo wie he waa yɛ wolo ni eŋma eyahã Kristofoi ni yɔɔ Yudea kɛ Yerusalem lɛ mli; nakai su lɛ ji, hemɔkɛyeli.—Heb. 11:​1, 6. w24.09 10 kk. 7-8

Kɛ́ wɔnaa Yehowa akɛ mɔ ko ni yɔɔ lɛɛlɛŋ lɛ, ewaaa kwraa akɛ wɔbaaya nɔ wɔye lɛ anɔkwa. Nakai Yosef fee. Ekpɛ mli akɛ ebɔŋ ajwamaŋ. Ena Yehowa akɛ mɔ ko ni yɔɔ diɛŋtsɛ, ni esumɔɔɔ ni efeɔ nɔ ko ni baahã Yehowa mli afu lɛ. (1 Mo. 39:9) Kɛ́ wɔ hu wɔmiitao wɔna Yehowa akɛ mɔ ko ni yɔɔ diɛŋtsɛ lɛ, esa akɛ wɔhe be ni wɔsɔle wɔhã lɛ ni wɔkase e-Wiemɔ lɛ. Kɛ́ wɔfee nakai lɛ, naanyobɔɔ ni yɔɔ wɔ kɛ Yehowa teŋ lɛ mli baawa. Ni kɛ́ naanyobɔɔ ni yɔɔ wɔ kɛ Yehowa teŋ lɛ mli wa tamɔ Yosef kɛ Yehowa nɔ lɛ, wɔfeŋ nɔ ko ni esaaa Yehowa hiɛ. Mɛi ni hiɛ kpaa nɔ akɛ Yehowa hiɛ kã lɛ, ewaaa kwraa akɛ amɛbaatsi amɛhe kɛje ehe. Nakai eba lɛ yɛ Israelbii lɛ agbɛfaŋ be ni amɛyɔɔ ŋa lɛ nɔ lɛ. Amɛle akɛ Yehowa yɛ, shi amɛyaheee amɛyeee akɛ ebaahã amɛ nɔ ni he hiaa amɛ lɛ. (2 Mo. 17:​2, 7) Enɛ hã amɛtse Yehowa hiɛ atua. Ekã shi faŋŋ akɛ, wɔsumɔŋ ni wɔkase amɛ.—Heb. 3:12. w24.06 24 kk. 14-15

Wɔyɛ naagbee gbii lɛ anaagbee kwraa lɛ mli, no hewɔ lɛ, wɔbaanyɛ wɔkpa gbɛ akɛ nibii ni hãa wɔyeɔ awerɛho lɛ baafa. Yehowa naa wɔhiɛ yaafonui lɛ ni enuɔ he waa ehãa wɔ. Esumɔɔ wɔ waa yɛ shihilɛ ni mli wa ni wɔkɛmiikpe shi wɔmiifi shi lɛ hewɔ, ni ehiɛ kpaaa wɔhiɛ yaafonui lɛ anɔ. No hewɔ lɛ, kɛ́ wɔkɛ shihilɛ ni mli wa waa ko miikpe lɛ, nyɛhãa wɔsɔlea wɔhãa Yehowa ni wɔkɛɛ lɛ bɔ ni wɔnuɔ he wɔhãa. Esaaa akɛ wɔtseɔ wɔhe kɛjeɔ wɔnyɛmimɛi ni yɔɔ asafo lɛ mli ni sumɔɔ wɔ waa lɛ ahe. Ni nyɛhãa wɔyaa nɔ wɔkanea Nyɔŋmɔ Wiemɔ lɛ koni eshɛje wɔmii. Wɔbaanyɛ wɔná nɔmimaa akɛ, kɛ́ wɔtee nɔ wɔfi shi lɛ, Yehowa baajɔɔ wɔ. Nɔ ni fata jɔɔmɔ nɛɛ he ji shi ni ewo akɛ etsɛŋ, ebaatsumɔ wɔhiŋmɛiiaŋ yaafonui fɛɛ, ni mɔ ko efeŋ wɔ nɔ ko ni baadɔ wɔ, ni wɔkɛ shihilɛ ko ekpeŋ ni baahã wɔnu he akɛ wɔhiɛnɔkamɔ fɛɛ etã. (Kpo. 21:4) Nakai be lɛ, miishɛɛ ni wɔbaaná lɛ sɔŋŋ pɛ baahã yaafonui atsere kɛjɛ wɔhiŋmɛiiaŋ. w24.12 20 kk. 3; 24-25 kk. 19

Yehowa kɛɛ wɔji e-Dasefoi, ni ewo shi akɛ ebaaye ebua wɔ ni wɔfee ekãa. (Yes. 43:​10, 11) Naa gbɛi ni Yehowa tsɔɔ nɔ efeɔ nakai lɛ ateŋ ejwɛ. Klɛŋklɛŋ lɛ, be fɛɛ be ni wɔbaashiɛ sane kpakpa lɛ, Yesu fata wɔhe. (Mat. 28:​18-20) Nɔ ni ji enyɔ lɛ, Yehowa tsɔɔ ŋwɛibɔfoi lɛ anɔ eyeɔ ebuaa wɔ. (Kpo. 14:6) Nɔ ni ji etɛ lɛ, Yehowa kɛ emumɔ krɔŋkrɔŋ lɛ yeɔ ebuaa wɔ koni wɔkai nibii ni wɔkase lɛ. (Yoh. 14:​25, 26) Nɔ ni ji ejwɛ lɛ, Yehowa edro wɔ nyɛmimɛi ni fataa wɔhe kɛyaa shiɛmɔ. Yelikɛbuamɔ ni Yehowa kɛhãa wɔ nɛɛ kɛ bɔ ni wɔnyɛmimɛi ni sumɔɔ wɔ lɛ hu yeɔ amɛbuaa wɔ lɛ hewɔ lɛ, wɔbaanyɛ wɔfee ekãa ni wɔya nɔ wɔshiɛ. Shi kɛ́ otee shiɛmɔ ni onaaa mɔ ko yɛ shĩa ni no hãa omiishɛɛ tãa lɛ, bi ohe akɛ: ‘Nɛgbɛ manyɛ mana mɛi lɛ yɛ bianɛ?’ (Bɔf. 16:13) ‘Ani benɛ amɛtee nitsumɔ loo amɛtee amɛmiiye jara?’ Kɛ́ nakai ni lɛ, ekolɛ ebaafee nɔ ni hi moŋ akɛ obaayaye odase yɛ shwapoi anaa kɛ nitsumɔhei. w24.04 17 kk. 10-11

Kɛ́ oji wu, ni oosumɔ ni otsɔ asafoŋ onukpa lɛ, no lɛ ehe miihia ni oweku lɛ hu afee gbɛ́i kpakpa. No hewɔ lɛ, esa akɛ ofee “mɔ ni kwɛɔ lɛ diɛŋtsɛ eshĩa nɔ jogbaŋŋ.” Enɛ tsɔɔ akɛ esa akɛ ojɛ suɔmɔ mli okwɛ oweku lɛ nɔ, ni okpɛ yiŋ kpakpai ohã oweku lɛ. Enɛ baabi ni oye obua oweku lɛ mli bii lɛ fɛɛ ni amɛkɛ amɛhe awo Nyɔŋmɔjamɔ nifeemɔi fɛɛ amli jogbaŋŋ. Kɛ́ oji tsɛ lɛ, no lɛ esa akɛ obii ni yeko afii 18 ni yɔɔ okwɛmɔ shishi lɛ, afee mɛi ni “boɔ [bo] toi ni amɛkɛ nibii efeee shwɛmɔ.” (1 Tim. 3:4) Esa akɛ ojɛ suɔmɔ mli otsɔɔ amɛ nii ni otsɔse amɛ. Yɛ anɔkwale mli lɛ, obaasumɔ ni obii lɛ aná miishɛɛ ni amɛshwɛ ni amɛŋmɔ tamɔ bɔ ni gbekɛbii fɛɛ feɔ lɛ. Shi esa akɛ otsɔse amɛ ni amɛbo bo toi, amɛbu mɛi, ni amɛba amɛjeŋ jogbaŋŋ. Agbɛnɛ hu, esa akɛ ofee bɔ fɛɛ bɔ ni obaanyɛ ni owa amɛ ni wekukpaa kpakpa ahi amɛ kɛ Yehowa teŋ, amɛhi shi yɛ Biblia mli ŋaawoi lɛ anaa, ni amɛbɔ mɔdɛŋ ni amɛya amɛhiɛ kɛshɛ baptisimɔ he. w24.11 22 kk. 10-11

Kɛ́ wɔkɛ wɔhe wo shiɛmɔ nitsumɔ lɛ mli waa lɛ, wɔbaana Yehowa nine, ni no baahã wɔkɛ wɔhiɛ afɔ̃ enɔ waa fe tsutsu lɛ po. (1 Kor. 3:9) Kaimɔ akɛ, Yehowa kɛ bo etooo mɔ ko mɔ ko he. Enaa otsuiŋ ni ele akɛ osumɔɔ lɛ. Enaa nɔ fɛɛ nɔ ni ofeɔ kɛtsɔɔ akɛ ohiɛ sɔɔ kpɔmɔnɔ lɛ, ni ji nikeenii ni nɔ bɛ ni ekɛhã wɔ lɛ, ni enáa he miishɛɛ waa. (1 Sam. 16:7; Mar. 12:​41-44) Kpɔmɔnɔ lɛ hewɔ lɛ, Yehowa baanyɛ ekɛ wɔhe eshai ake wɔ, wɔbaanyɛ wɔkɛ lɛ abɔ naanyo, ni wɔyɛ hiɛnɔkamɔ akɛ wɔbaanyɛ wɔhi shi kɛya naanɔ. No hewɔ lɛ, be fɛɛ be lɛ, nyɛhãa wɔkɛ wɔnifeemɔi atsɔa akɛ wɔhiɛ sɔɔ suɔmɔ ni Yehowa yɔɔ kɛhã wɔ lɛ, ejaakɛ no tsirɛ lɛ ni efee nibii kpakpai nɛɛ fɛɛ ehã wɔ. (1 Yoh. 4:19) Agbɛnɛ hu, nyɛhãa wɔkɛ wɔnifeemɔi atsɔa akɛ wɔhiɛ sɔɔ bɔ ni Yesu sumɔɔ wɔ aahu akɛ, ekɛ ewala shã afɔle ehã wɔ lɛ! w25.01 31 kk. 16-18

Mɔ ni fo Lala 73 lɛ na mɛi komɛi ni sɔmɔɔɔ Yehowa, shi kɛ̃lɛ amɛyɛ gbɔmɔtsoŋ hewalɛ kpakpa, amɛná nii, ni etamɔ nɔ ni nɔ ko nɔ ko gbaaa amɛnaa. (Lala 73:​3-5, 12) Be ni ena bɔ ni nibii yaa lɛ jogbaŋŋ kɛhãa amɛ lɛ, enu he akɛ sɛɛnamɔ ko bɛ mɔdɛŋ ni ebɔɔ koni enyɛ esɔmɔ Yehowa lɛ he. ‘Ehao gbi muu fɛɛ’ yɛ sane nɛɛ hewɔ, ni no je enijiaŋ wui. (Lala 73:​13, 14) Mɛni efee koni ekanu he nakai dɔŋŋ? Lalatsɛ lɛ tee Yehowa jamɔhe lɛ. (Lala 73:​16-18) Be ni etee jɛmɛ lɛ, enyɛ ejwɛŋ saji anɔ jogbaŋŋ. Ebana akɛ eyɛ mli akɛ etamɔ nɔ ni efɔŋfeelɔi komɛi ená shihilɛ kpakpa moŋ, shi wɔsɛɛ lɛ nibii ehiŋ ehãŋ amɛ. No hewɔ lɛ ehaooo dɔŋŋ, ni ená nɔmimaa akɛ yiŋ ni ekpɛ akɛ ekɛ Yehowa sɔɔmɔ baaye klɛŋklɛŋ gbɛhe lɛ ji nɔ ni hi fe fɛɛ. Etswa efai shi akɛ ebaaya nɔ esɔmɔ Yehowa.—Lala 73:​23-28. w24.10 26-27 kk. 11-12

Yehowa ehala wɔ akɛ ‘edasefoi.’ (Yes. 43:​10-12) Afii komɛi ni eho nɛ lɛ, awie yɛ wolo ko ni jɛ Gbɛtsɔɔmɔ Kuu lɛ dɛŋ lɛ mli akɛ: “Woo ni fe fɛɛ ni wɔteŋ mɔ ko baanyɛ aná ji ni atsɛ lɛ akɛ Yehowa Odasefonyo.” Mɛni hewɔ eja akɛ abaawie nakai? Hã wɔkɛ nɔkwɛmɔnɔ nɛɛ atsɔɔ mli. Ŋɔɔ lɛ akɛ, afolɔ onaa akɛ oyafee nɔ ko gbonyo, ni no hewɔ lɛ, ootao mɔ ko abafã ohe ni ehã ale akɛ nɔ ni awie yɛ ohe lɛ ji amale, ni akɛ gbɔmɔ kpakpa ji bo ni onyɛŋ ofee nɔ ko ni tamɔ nakai kɔkɔɔkɔ. Namɔ obaahala? Ekã shi faŋŋ akɛ, obaahala mɔ ko ni ole ni omuɔ ofɔ̃ɔ enɔ ni mɛi buɔ lɛ ni kɛ́ ewie lɛ, mɛi baahe lɛ amɛye. Nakai nɔŋŋ halamɔ ni Yehowa ehala wɔ akɛ e-Dasefoi lɛ tsɔɔ akɛ, ele wɔ jogbaŋŋ, ni eheɔ eyeɔ waa akɛ, wɔbaahã mɛi ale akɛ lɛ pɛ ji anɔkwa Nyɔŋmɔ koome lɛ. Wɔbuɔ hegbɛ ni wɔná akɛ wɔji e-Dasefoi lɛ akɛ eji hegbɛ kpele, ni wɔŋɔɔ hegbɛ fɛɛ hegbɛ ni wɔbaaná lɛ kɛtsɔɔ mɛi egbɛ́i lɛ ni wɔhãa aleɔ akɛ, nibii gbohii pii ni awie yɛ ehe lɛ bɛ mli. Enɛ ni wɔfeɔ lɛ tsɔɔ akɛ wɔmiihi shi yɛ wɔgbɛ́i lɛ naa; wɔmiitsɔɔ akɛ, Yehowa Odasefoi ji wɔ lɛɛlɛŋ!—Rom. 10:​13-15. w24.05 18 kk. 13

Yesu náa miishɛɛ waa kɛ́ eesɔmɔ mɛi. Yɛ shihilɛ kome ko mli po lɛ, jeee nii pɛ Yesu tsɔɔ mɛi babaoo ni boɔ lɛ toi lɛ. Ehã amɛ amɛhiamɔ nii hu. Etsɔ naakpɛɛ gbɛ nɔ ehã niyenii fioo fee pii ni ekɛhã ekaselɔi lɛ ni amɛja amɛhã mɛi lɛ. (Mar. 6:41) Etsɔ nɔ ni efee lɛ nɔ etsɔɔ ekaselɔi lɛ bɔ ni asɔmɔɔ mɛi. Ehã amɛna akɛ nitsumɔ ni ebiɔ ni akɛ hewalɛ atsu lɛ he hiaa waa. Be ni bɔfoi lɛ kɛ Yesu fee ekome ni amɛja niyenii ni Yesu tsɔ naakpɛɛ gbɛ nɔ ehã efee pii lɛ, ni “amɛ fɛɛ amɛye ni amɛtɔrɔ” lɛ, no hã bɔfoi lɛ ná miishɛɛ waa! (Mar. 6:42) Yɛ anɔkwale mli lɛ, jeee be nɛɛ pɛ mli Yesu fooo lɛ pɛ enɔ mli. Efee nakai yɛ ewala shihilɛ mli fɛɛ. (Mat. 4:23) Yesu ná he miishɛɛ waa akɛ ebaatsɔɔ mɛi nii, ni ejɛ heshibaa mli ehã mɛi amɛhiamɔ nii hu. w24.11 16 kk. 10-11

Akɛni wɔyɛ “naagbee gbii lɛ amli” hewɔ lɛ, nibii amli baawa ni ehe baahia ni wɔye wɔbua wɔnyɛmimɛi lɛ. Agbɛnɛ hu, wɔbaanyɛ wɔshɛje wɔnyɛmimɛi ni tsui ekumɔ lɛ amii ni wɔhã amɛna akɛ wɔsumɔɔ amɛ. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaajɛ wɔtsui mli wɔkɛ amɛ agba sane ni wɔhã amɛná miishɛɛ kɛ́ wɔtee asafoŋ kpeei. No hewɔ lɛ kɛ́ amɛba asafoŋ kpeei lɛ, esa akɛ wɔfee bɔ fɛɛ bɔ ni wɔbaanyɛ ni wɔwo amɛ hewalɛ ni wɔhã amɛna akɛ wɔsumɔɔ amɛsane. Asafoŋ onukpai, nyɛbaanyɛ nyɛtsɔmɔ abobaahe nyɛhã nyɛnyɛmimɛi Kristofoi ni kɛ naagbai miikpe lɛ. Kɛ́ adebɔɔ naa oshãra ko ba loo nɔ ko fee nyɛmi ko trukaa ni esa akɛ akɛ lɛ aya helatsamɔhe lɛ, asafoŋ onukpai lɛ toɔ gbɛjianɔ oya nɔŋŋ ni amɛyeɔ amɛbuaa lɛ. Agbɛnɛ hu, asafoŋ onukpai lɛ jɛɔ Biblia lɛ mli amɛwoɔ wɔ ŋaa ni amɛwoɔ wɔ hewalɛ. Kɛ́ asafoŋ onukpai lɛ kɛ nyɛmimɛi lɛ wieɔ kɛ naajɔlɛ, amɛboɔ amɛ toi, ni amɛmiaa amɛhiɛ akɛ amɛbaanu amɛ shishi jogbaŋŋ lɛ, ewaŋ kɛhãŋ nyɛmimɛi lɛ akɛ amɛbaabɛŋkɛ amɛ. Anɔkwa, kɛ́ asafoŋ onukpai lɛ jie sui ni tamɔ nɛkɛ kpo lɛ, nyɛmimɛi lɛ naa akɛ amɛsane kã amɛtsui nɔ, ni no hewɔ lɛ, kɛ́ amɛjɛ Biblia lɛ mli amɛwo nyɛmimɛi lɛ ŋaa lɛ, amɛmiaa amɛhiɛ ni amɛkɛtsuɔ nii.—1 Tes. 2:​7, 8, 11. w24.06 29 kk. 12-13

Biblia lɛ hãa wɔleɔ akɛ, Yehowa ji Nyɔŋmɔ Ofe. Shi ani no tsɔɔ akɛ enuuu nii ahe? Wɔle akɛ Nyɔŋmɔ bɔ wɔ yɛ esubaŋ nɔ; ebɔ wɔ bɔ ni wɔbaanyɛ wɔnu nii ahe. No hewɔ lɛ, ekã shi faŋŋ akɛ, lɛ hu enuɔ nii ahe. Biblia lɛ tsɔɔ akɛ, kɛ́ afee lɛ nɔ ko lɛ, ‘edɔɔ lɛ’ ni ‘ewerɛ hoɔ ehe.’ (Lala 78:​40, 41) No hewɔ lɛ, ŋwanejee ko bɛ he akɛ, Yehowa hao waa diɛŋtsɛ ni etsui kumɔ be ni apiŋ e-Bi lɛ aahu kɛyashi egbo lɛ. Kpɔmɔnɔ lɛ hãa wɔnaa akɛ, mɔ ko bɛ ni sumɔɔ wɔ fe Yehowa—wɔwekunyo kpaakpa jio, wɔnaanyo kpaakpa jio. (Rom. 8:​32, 38, 39) Yehowa sumɔɔ wɔ fe bɔ ni wɔ diɛŋtsɛ wɔsumɔɔ wɔhe po. Ani oosumɔ ni ohi shi kɛya naanɔ? Yehowa miisumɔ ni eba mli nakai fe bɔ ni bo diɛŋtsɛ osumɔɔ po. Ani oosumɔ ni Yehowa kɛ ohe eshai ake bo? Eesumɔ ni ekɛke bo fe bɔ ni bo po osumɔɔ. Nɔ ni etaoɔ nɔŋŋ ji, ni ohe lɛ oye ni obo lɛ toi ni okɛ no atsɔɔ akɛ ohiɛ sɔɔ nikeenii ni nɔ bɛ ni ekɛdro wɔ, ni ji kpɔmɔnɔ lɛ. Kpɔmɔnɔ lɛ ji nikeenii ni nɔ bɛ ni hãa wɔnaa akɛ Yehowa sumɔɔ wɔ lɛɛlɛŋ.—Jaj. 3:11. w25.01 22 kk. 8-9

Bei komɛi lɛ, wɔ fɛɛ wɔdamɔɔ nɔ ni wɔkɛ wɔhiŋmɛi naa, nɔ ni wɔnuɔ, kɛ bɔ ni wɔnuɔ he wɔhãa lɛ nɔ wɔkpɛɔ yiŋ. Shi bei komɛi lɛ, nɔ ni wɔnaa kɛ nɔ ni wɔnuɔ lɛ baanyɛ alaka wɔ. Kɛ́ ebaaa lɛ nakai po lɛ, yɛ naagbee lɛ, ebaanyɛ ehã wɔfee nɔ ni wɔ diɛŋtsɛ wɔsumɔɔ, moŋ fe nɔ ni Yehowa sumɔɔ. (Jaj. 11:9; Mat. 24:​37-39) Shi kɛ́ wɔnyiɛ yɛ hemɔkɛyeli naa lɛ, ekã shi faŋŋ akɛ, wɔbaakpɛ yiŋ ni “sa Nuŋtsɔ lɛ hiɛ.” Agbɛnɛ hu, kɛ́ wɔkɛ ŋaa ni Yehowa woɔ wɔ lɛ tsu nii lɛ, wɔtsui baanyɔ wɔmli ni wɔbaaná miishɛɛ waa. (Lala 16:​8, 9; Yes. 48:​17, 18) Kɛfata he lɛ, kɛ́ wɔtee nɔ wɔnyiɛ yɛ hemɔkɛyeli naa lɛ, wɔsɛɛ lɛ, wɔbaaná naanɔ wala. (2 Kor. 4:18) Te wɔbaafee tɛŋŋ wɔna akɛ wɔmiinyiɛ yɛ hemɔkɛyeli naa loo nɔ ni wɔnaa lɛ naa? Nɔ ni baaye ebua wɔ ji, ni wɔbaabi wɔhe akɛ: Mɛni nɔ midamɔɔ mikpɛɔ miyiŋ? Ani midamɔɔ nibii ni mihiŋmɛi naa lɛ pɛ anɔ? Aloo midamɔɔ ŋaawoi ni Yehowa kɛhãa lɛ anɔ? w25.03 20-21 kk. 3-4

Wɔteŋ mɔ fɛɛ mɔ baanyɛ agbala mɛi kɛba mfonirifeemɔŋ paradeiso lɛ mli. Nɔ ni baawa wɔ ni wɔnyɛ wɔfee nakai ji, ni wɔbaakase Yehowa. Yehowa enyɛɛɛ mɛi anɔ ni amɛba esafo lɛ mli. Moŋ lɛ, ‘egbalaa’ amɛ blɛoo. (Yoh. 6:44; Yer. 31:3) Kɛ́ mɛi ni yɔɔ tsui kpakpa lɛ kase Yehowa sui kpakpai lɛ ahe nii ni amɛbale bɔ ni efeɔ enii ehãa lɛ, amɛbasumɔɔ lɛ waa, ni no gbalaa amɛ kɛbaa eŋɔɔ. Ni wɔ hu? Wɔ hu wɔbaanyɛ wɔtsɔ wɔsui kpakpai kɛ wɔjeŋba kpakpa lɛ nɔ wɔgbala mɛi kɛba mfonirifeemɔŋ paradeiso lɛ mli. Te wɔbaafee lɛ wɔhã tɛŋŋ? Nɔ kome ni wɔbaanyɛ wɔfee ji, ni wɔkɛ wɔnyɛmimɛi lɛ baaye yɛ suɔmɔ kɛ mlihilɛ mli. Yɛ blema lɛ, be ni mɛi ni jeee Kristofoi lɛ tee Kristofoi ni yɔɔ Korinto lɛ asafoŋ kpee ko shishi lɛ, amɛwie akɛ: “Nyɔŋmɔ yɛ nyɛteŋ lɛɛlɛŋ.” Nakai nɔŋŋ wɔ hu wɔsumɔɔ ni mɛi hei ni baaba wɔsafoŋ kpeei lɛ anu he. (1 Kor. 14:​24, 25; Zak. 8:23) Enɛ hewɔ lɛ, esa akɛ wɔya nɔ wɔbo ŋaa ni awoɔ wɔ yɛ ŋmɛnɛ ŋmalɛ lɛ mli lɛ toi. w24.04 23-24 kk. 16-17