April

Kɛ́ wɔmiitao wɔná Yesu heloo lɛ kɛ elá lɛ he sɛɛ, ni tsɔɔ akɛ wɔmiitao wɔná naanɔ wala lɛ, esa akɛ wɔhe wɔye akɛ ekɛ ewala bashã afɔle ehã wɔ. (Efe. 1:7) “Gwantɛŋi krokomɛi” lɛ yaa Nuŋtsɔ Lɛ Gbɛkɛ Niyeli lɛ shishi daa afi, shi amɛyeee blodo lɛ eko ni amɛnuuu wain lɛ hu eko, ejaakɛ esaaa akɛ amɛfeɔ nakai. (Yoh. 10:16) Fɛɛ sɛɛ lɛ, amɛyeɔ Yesu heloo lɛ ni amɛnuɔ elá lɛ kɛ̃ yɛ mfonirifeemɔŋ gbɛ nɔ, ejaakɛ amɛheɔ amɛyeɔ akɛ, ekɛ ewala bashã afɔle ehã wɔ, ni akɛ, nakai afɔleshaa lɛ hewɔ lɛ, wɔnáa jɔɔmɔi pii. (Yoh. 6:53) Mɛi ni esa akɛ amɛye eko ji mɛi ni yɔɔ kpaŋmɔ hee lɛ mli lɛ, ni ji mɛi ni yɔɔ hiɛnɔkamɔ akɛ amɛkɛ Yesu baaye nɔ yɛ ŋwɛi lɛ. Kɛ́ wɔhiɛnɔkamɔ ji wɔbaaya ŋwɛi jio, wɔbaahi shikpɔŋ nɔ jio, esa akɛ wɔ fɛɛ wɔhe wɔye akɛ, Yesu kɛ ewala bashã afɔle ehã wɔ koni wɔná naanɔ wala. w24.12 12 kk. 14; 13 kk. 16

Be ni Yesu kɛ ebɔfoi lɛ yeɔ Nuŋtsɔ Lɛ Gbɛkɛ Niyeli lɛ, ekumɔ blodo ni ashikishaŋ-sha bɛ mli mli ni ekɛhã amɛ, ni ekɛɛ amɛ akɛ edamɔ shi kɛhã egbɔmɔtso lɛ. No sɛɛ lɛ, ewó kɔɔpoo kɛ wain ni ekɛhã amɛ ni ekɛɛ amɛ akɛ edamɔ shi kɛhã “kpaŋmɔ lɛ nɔ lá” lɛ. (Mar. 14:​22-25; Luka 22:20; 1 Kor. 11:24) Kpaŋmɔ nɛɛ ji kpaŋmɔ hee lɛ. Yehowa kɛ “Israel shĩa lɛ,” ni ji mɛi ni kɛ Yesu baaye nɔ akɛ maŋtsɛmɛi “yɛ Nyɔŋmɔ Maŋtsɛyeli lɛ” mli lɛ pɛ ni fee kpaŋmɔ nɛɛ. (Heb. 8:​6, 10; 9:15) Nɔ ni Yesu wie yɛ Nuŋtsɔ Lɛ Gbɛkɛ Niyeli lɛ shishi lɛ kɔɔ “tooku bibioo” lɛ he. Yesu bɔfoi anɔkwafoi lɛ, ni ji mɛi ni ekɛyɔɔ tsũ lɛ mli be ni ewie nakai sane lɛ, ji mɛi ni ekɛje kuu nɛɛ shishi. Kuu nɛɛ mli bii lɛ pɛ ni baaná hegbɛ amɛkɛ Yesu aye nɔ yɛ ŋwɛi. w24.12 11 kk. 9-10

Yesu nanemɛi ni bɛŋkɛ lɛ kpaakpa lɛ ateŋ mɔ kome tsɔɔ esɛɛgbɛ, kɛkɛ ni Yesu henyɛlɔi lɛ mɔ lɛ, amɛjɛ lɛ, amɛkɛ sane fɔ̃ enɔ, amɛbu lɛ fɔ, ni amɛpiŋ lɛ. No sɛɛ lɛ, akɛ lɛ wo asraafoi adɛŋ ni amɛkala lɛ amɛkpɛtɛ tso jaŋŋ nɔ koni egbo. Anɔkwa, Yesu piŋ waa diɛŋtsɛ, shi emia ehiɛ efi shi. Ni kɛ̃lɛ, mɔ ko yɛ ni piŋ waa fe lɛ po. Lɛ ji, Yehowa Nyɔŋmɔ. Yehowa sumɔɔ e-Bi lɛ waa, ni wɔle hu akɛ, eyɛ hewalɛ ni kulɛ ebaanyɛ ehã aŋmɛɛ Yesu he ni akagbe lɛ, shi efeee nakai. Mɛni hewɔ? Ejaakɛ esumɔɔ wɔ. Yesu wala ni ekɛshã afɔle lɛ ji nɔ ni fe fɛɛ ni tsɔɔ akɛ Yehowa sumɔɔ bo waa diɛŋtsɛ. Ekɛ e-Bi ni esumɔɔ waa lɛ hã yɛ ohewɔ. Etsui kumɔ waa be ni agbeɔ e-Bi lɛ, shi emia ehiɛ edamɔ naa koni enyɛ ehere bo kɛje esha kɛ gbele mli. (1 Yoh. 4:​9, 10) Enɛ hãa wɔnaa akɛ, eesumɔ ni eye ebua wɔteŋ mɔ fɛɛ mɔ koni ewu eshi esha ni eye nɔ kunim! w24.08 6 kk. 13-14

Kɛ́ wɔsusu nɔ ni Yehowa tsɔ mli be ni ekɛ kpɔmɔnɔ lɛ hãa lɛ he lɛ, no baahã wɔna bɔ ni Yehowa sumɔɔ wɔ waa hã. Satan kɛɛ Yehowa tsulɔ ko Yehowa tsulɔ ko bɛ ni kɛ́ ekɛ shihilɛi ni mli wawai miikpe lɛ, ebaaya nɔ eye Yehowa anɔkwa. Enɛ hewɔ lɛ, Yehowa ŋmɛ gbɛ ni Yesu na nɔ dani egbo, koni no ahã ana akɛ nɔ ni Satan wie lɛ bɛ mli. (Hiob 2:​1-5) Be ni mɛi ye Yesu he fɛo, ni asraafoi lɛ gwao lɛ, ni akala lɛ akpɛtɛ tso jaŋŋ lɛ he lɛ fɛɛ lɛ, Yehowa miina. Agbɛnɛ hu, ena bɔ ni e-Bi lɛ piŋ aahu kɛyashi egbo lɛ. (Mat. 27:​28-31, 39) Yehowa yɛ hewalɛ ni kulɛ ebaanyɛ ekɛfo enɛɛmɛi fɛɛ sɛɛ. (Mat. 27:​42, 43) Shi eji efee nakai kulɛ, Yesu nyɛŋ ekɛ ewala ashã afɔle kɛkpɔ̃ wɔ, ni anyɛŋ ajie wɔ kɛje esha kɛ gbele dɛŋ. Enɛ hewɔ lɛ, Yehowa ŋmɛ gbɛ ni e-Bi lɛ piŋ aahu kɛyashi egbo. w25.01 22 kk. 7

Yesu gbo nɛɛ, gbii etɛ nɛ. Ekaselɔi lɛ fɛɛ awerɛ eho amɛhe waa ni gbeyei emɔmɔ amɛ. Yɛ gbi nɛɛ, ni ji Nisan 16, 33 Ŋ.B. lɛ nɔ lɛ, ekaselɔi lɛ ateŋ mɛi enyɔ shi Yerusalem akɛ amɛmiiya Emao. Be ni amɛnyiɛ gbɛ kɛyaa lɛ, nuu ko bafata amɛhe yɛ gbɛ lɛ nɔ ni ekɛ amɛ bɔi nyiɛmɔ. Kaselɔi lɛ gba nuu nɛɛ nɔ ni eba Yesu nɔ ni ehã amɛwerɛ eho amɛhe waa lɛ. Kɛkɛ ni nuu nɛɛ kɛ amɛ susu nibii komɛi ni amɛhiɛ kpaŋ nɔ kɔkɔɔkɔ lɛ ahe. “Eje shishi kɛjɛ Mose kɛ Gbalɔi lɛ fɛɛ anɔ,” ni etsɔɔ amɛ nɔ hewɔ ni esa akɛ Mesia ana nɔ ni egbo. Be ni amɛyi etɛ lɛ fɛɛ amɛyashɛ Emao lɛ, nuu lɛ jie ehe shi etsɔɔ amɛ ni amɛna akɛ, asomoaŋ Yesu ni! (Luka 24:​13-35) Yɛ Yesu shitee lɛ sɛɛ lɛ, eye gbii 40 yɛ shikpɔŋ lɛ nɔ dani etee ŋwɛi. Yɛ be nɛɛ mli lɛ, ejie ehe kpo shii abɔ etsɔɔ ekaselɔi lɛ. Yesu wo ekaselɔi ni no mli lɛ amɛwerɛ eho amɛhe ni gbeyei emɔmɔ amɛ lɛ hewalɛ waa. Enɛ hã amɛná miishɛɛ ni amɛná ekãa kɛshiɛ Nyɔŋmɔ Maŋtsɛyeli lɛ he sane kpakpa lɛ, ni amɛtsɔɔ mɛi nii. w24.10 12 kk. 1-3

Bɔ fɛɛ bɔ ni fee lɛ, gbekɛbii baadara amɛbatsɔmɔ onukpai, shi ebɛ lɛ nakai yɛ da ni mɔ ko daa yɛ mumɔŋ lɛ gbɛfaŋ. Akɛ nɔkwɛmɔnɔ lɛ, nyɛmimɛi ni yɔɔ Korinto lɛ mɔ sane kpakpa lɛ mli, abaptisi amɛ, amɛná mumɔ krɔŋkrɔŋ lɛ, ni bɔfo Paulo tsɔɔ amɛ nibii pii. (Bɔf. 18:​8-11) Fɛɛ sɛɛ lɛ, amɛbaptisimɔ lɛ sɛɛ afii pii po lɛ, amɛteŋ mɛi babaoo darako yɛ mumɔŋ lolo. (1 Kor. 3:2) Ja mɔ ko miishwe waa ni eda yɛ mumɔŋ dani ebaanyɛ eda yɛ mumɔŋ. ‘Mɛi ni sumɔɔ buulufeemɔ,’ ni ji mɛi ni sumɔɔɔ ni amɛyaa amɛhiɛ yɛ mumɔŋ lɛ, nyɛŋ adara yɛ mumɔŋ kɔkɔɔkɔ. (Abɛi 1:22) Wɔsumɔɔɔ ni wɔfeɔ wɔnii tamɔ mɔ ko ni eda ebatsɔ onukpa shi loloolo lɛ ehãa efɔlɔi kpɛɔ yiŋ amɛhãa lɛ, ejaakɛ esumɔɔɔ ni etereɔ sɔ̃ ko. Moŋ lɛ, wɔmiisumɔ ni wɔna da ni wɔbaada yɛ mumɔŋ lɛ akɛ wɔ diɛŋtsɛ wɔsɔ̃, ni wɔtsu he nii. No hewɔ lɛ, kɛ́ ootao oda yɛ mumɔŋ lɛ, sɔlemɔ ni Yehowa ahã ‘oshwe ni ehã bo hewalɛ ni okɛaafee’ nibii ni baahã oshɛ nakai oti lɛ he.—Fip. 2:13. w24.04 4 kk. 9-10

Yehowa ehã wɔle bɔ ni enuɔ he ehãa kɛ́ eekojo adesai. (Eze. 33:11) Ehãa wɔleɔ akɛ, Yehowa eteee shi kɛkɛ ni ebaakpãtã mɔ ko hiɛ kɛya naanɔ. Shi moŋ, be fɛɛ be ni ebaakpãtã mɔ ko hiɛ lɛ, efeɔ nakai yɛ yiŋtoo kpakpa ko hewɔ. Wɔ-Nyɔŋmɔ lɛ naa mɔbɔ waa. Be fɛɛ be ni ebaana akɛ ebaanyɛ ena mɔ ko mɔbɔ lɛ, enaa lɛ mɔbɔ. Mɛni wɔle yɛ mɛi ni ateŋ amɛ shi lɛ ahe? Mɛi fioo ko pɛ Biblia lɛ ewie nɔ ko ni tsɔɔ akɛ, ateŋ amɛ shi. Mɛi nɛɛ ateŋ mɔ kome ji, Yuda Iskariot. Yesu wie nɔ ko ni tsɔɔ akɛ, ateŋ Yuda shi. (Mar. 14:21; Yoh. 17:12) Yuda hiɛ kã he waa ni efee esha ni efee lɛ, ejaakɛ ele faŋŋ akɛ nɔ ni eyaafee lɛ teɔ shi ewoɔ Yehowa Nyɔŋmɔ kɛ e-Bi lɛ, shi efee. (Mar. 3:29) Agbɛnɛ hu, Yesu wie akɛ jamɔŋ hiɛnyiɛlɔi ni te shi amɛwo lɛ lɛ ateŋ mɛi komɛi yɛ ni kɛ́ amɛgboi lɛ, ateŋ amɛ shi. (Mat. 23:33; Yoh. 19:11) Bɔfo Paulo hu wie akɛ, kɛ́ mɛi ni ekwa anɔkwa jamɔ lɛ tsakeee amɛtsui lɛ, no lɛ kɛ́ amɛgboi lɛ, ateŋ amɛ shi.—Heb. 6:​4-8; 10:29. w24.05 4 kk. 10-11

Kɛ́ wɔhi Yehowa masɛi daa lɛ, Satan nyɛŋ afee wɔ nɔ ko ni baahã naanɔ wala aŋmɛɛ wɔ. (1 Yoh. 3:8) Yɛ jeŋ hee lɛ mli lɛ, Yehowa baaya nɔ ebu enanemɛi anɔkwafoi lɛ ahe koni nɔ ko akafite ekɛ amɛ teŋ, shi jeee no pɛ, ebaahã amɛhi shi kɛya naanɔ. (Kpo. 21:4) Eji hegbɛ kpele ni wɔná akɛ Yehowa efɔ̃ wɔ nine kɛba emama tsũ lɛ mli, ni tsɔɔ akɛ ehã wɔ hegbɛ ni wɔkɛ lɛ abɔ naanyo kpaakpa kɛya naanɔ. (Eze. 37:27) Shi kɛ́ wɔmiitao wɔya nɔ wɔhi emama tsũ lɛ mli lɛ, mɛni esa akɛ wɔfee? Ekã shi faŋŋ akɛ, kɛ́ mɔ ko fɔ̃ bo nine kɛtee eshĩa lɛ, osumɔŋ ni ofee nɔ ko ni baagba enaa. No hewɔ lɛ, kɛ́ ekɛɛ bo nɔ ko lɛ, obaafee. Nakai nɔŋŋ kɛ́ wɔmiitao wɔya nɔ wɔhi Yehowa mama tsũ lɛ mli lɛ, esa akɛ wɔle nibii ni kɛ́ wɔfee lɛ ebaagba enaa koni wɔtsi wɔhe kɛje he. Wɔmiisumɔ ni wɔfee bɔ fɛɛ bɔ ni wɔbaanyɛ koni ‘wɔsa Yehowa hiɛ kwraa’ ejaakɛ wɔsumɔɔ lɛ. (Kol. 1:10) Esa akɛ wɔhã anɔkwa sane nɛɛ ahi wɔjwɛŋmɔ mli be fɛɛ be, ni wɔkɛ bulɛ kpele ahã Yehowa. Enɛ baaye abua wɔ ni wɔkafee nɔ ko ni esumɔɔɔ. Wɔmiisumɔ ni wɔkɛ wɔ-Nyɔŋmɔ lɛ anyiɛ yɛ “heshibaa mli” be fɛɛ be.—Mika 6:8. w24.06 4 kk. 8-9

Yehowa kɛɛ Abraham akɛ ekɛ ebinuu Isak ashã afɔle ehã lɛ. Ŋwanejee ko bɛ he akɛ, enɛ gba Abraham naa waa diɛŋtsɛ. Fɛɛ sɛɛ lɛ, ekpɛlɛ nɔ akɛ ebaafee nɔ ni Yehowa ekɛɛ lɛ lɛ. Shi be ni ewó kakla lɛ nɔ ni eyaagbe ebinuu lɛ, Yehowa kɛɛ lɛ akɛ ekagbe lɛ. Abraham sane lɛ yeɔ ebuaa mɛi fɛɛ ni yɔɔ hemɔkɛyeli lɛ ni amɛnuɔ nɔ ni Yehowa fee sɛɛ mli lɛ shishi jogbaŋŋ. Yehowa jɛ esuɔmɔ mli ehã ebi ni esumɔɔ lɛ lɛ kɛ ewala shã afɔle ehã adesai. Enɛ hãa wɔnaa akɛ, Yehowa sumɔɔ adesai asane waa diɛŋtsɛ. (1 Mo. 22:​1-18) Be ni Yehowa kɛ Mla lɛ hã Israelbii lɛ, ehã amɛle akɛ kɛ́ amɛfee esha lɛ, esa akɛ amɛkɛ kooloi abashã afɔle amɛhã lɛ koni ekɛ amɛhe eshai lɛ ake amɛ. (3 Mo. 4:​27-29; 17:11) Yehowa tsɔ afɔlei nɛɛ ni ehã amɛshã lɛ anɔ ehã ana akɛ, ekɛ afɔle kome ni hi kwraa fe nomɛi baahã ni ekɛhere adesai kɛje esha mli shi kome nyɔŋlo. Nyɔŋmɔ kɛ emumɔ lɛ tsirɛ egbalɔi lɛ ni amɛwie akɛ, seshi ni awo ehe shi lɛ, ni ji Nyɔŋmɔ Bi ni eshwɛɛɛ ehe kwraa lɛ, baapiŋ ni abaagbe lɛ koni ekɛhere adesai, ni bo hu ofata he lɛ, kɛje esha kɛ gbele mli!—Yes. 53:​1-12. w24.08 4 kk. 7-8

Kɛ́ ookane Biblia lɛ, bɔɔ mɔdɛŋ ni osusu bɔ ni obaafee okɛ nɔ ni okaneɔ lɛ atsu nii lɛ he. Kɛ́ okane ŋmalɛ ko lɛ, bi ohe akɛ, ‘Te mafee tɛŋŋ mikɛ sane nɛɛ atsu nii bianɛ loo wɔsɛɛ lɛ?’ Ŋɔɔ lɛ akɛ, ekolɛ oofee o-Biblia kanemɔ lɛ, ni oshɛ 1 Tesalonikabii 5:​17, 18 lɛ. Kɛ́ okane ŋmalɛ lɛ otã lɛ, obaanyɛ obi ohe akɛ, ‘Ani mifɔɔ sɔlemɔ?’ ni ‘Ani mikɛ hiɛdɔɔ sɔleɔ?’ Agbɛnɛ hu, obaanyɛ ojwɛŋ nibii ni Yehowa efee ehã bo ni ohiɛ sɔɔ waa lɛ ahe. Ekolɛ obaakpɛ oyiŋ akɛ obaada Yehowa shi yɛ nibii etɛ pɔtɛi komɛi ahe. Minitii fioo ni okɛbaajwɛŋ sane nɛɛ nɔ lɛ baanyɛ ahã otsɔ mɔ ni kɛ Nyɔŋmɔ Wiemɔ lɛ tsuɔ nii, moŋ fe enulɔ kɛkɛ. Kɛ́ ofeɔ nɛkɛ gbi fɛɛ gbi ni obaakane Biblia lɛ, ni okɛ nɔ ni okaseɔ lɛ tsuɔ nii lɛ, kɛ́ okwɛ lɛ, mɛɛ gbɔmɔ nɛkɛ obaatsɔ? Obaatsɔ mɔ ko ni jáa Yehowa jogbaŋŋ. w24.09 4-5 kk. 9-10

Yehowa bɔ wɔ bɔ ni kɛ́ wɔfee mɛi ejurɔ lɛ wɔnáa miishɛɛ waa fe kɛ́ mɛi fee wɔ ejurɔ. Kɛ́ wɔnyɛ wɔye wɔbua wɔnyɛmi Kristofonyo ko lɛ, wɔnáa miishɛɛ waa. Ni wɔnáa miishɛɛ hu kɛ́ amɛjie hiɛsɔɔ kpo. Shi kɛ́ amɛjie hiɛsɔɔ kpo jio, amɛjieee lɛ kpo jio, wɔnáa miishɛɛ waa, ejaakɛ wɔle akɛ wɔfee nɔ ni ja. Be fɛɛ be lɛ, kaimɔ akɛ ekɔɔɔ he eko nɔ ni okɛbaafee mɛi ejurɔ lɛ, “Yehowa baanyɛ ahã bo nɔ ni fe nakai aahu.” (2 Kro. 25:9) Wɔnyɛŋ wɔfee mɛi ejurɔ fe bɔ ni Yehowa baafee wɔ ejurɔ. Ni kɛ́ Yehowa jwere wɔ lɛ, nɔ ko nɔ ko bɛ ni fe no. No hewɔ lɛ, nyɛhãa wɔtswaa wɔfai shi akɛ, wɔbaaya nɔ wɔkase Yehowa, wɔ-Tsɛ ni yɔɔ ŋwɛi lɛ, ni wɔfee mɛi ejurɔ. w24.09 30-31 kk. 20-21

Yehowa naa mɔbɔ ni emusuŋ tsɔɔ lɛ. (Lala 103:13; Yes. 49:15) Enuɔ he ehãa wɔ; kɛ́ nɔ ko hã wɔwerɛ ho wɔhe lɛ, lɛ hu ewerɛ hoɔ ehe. (Zak. 2:8) Eyeɔ ebuaa wɔ ni wɔle lɛ jogbaŋŋ koni wɔbatsɔmɔ enanemɛi. (Lala 25:14; Bɔf. 17:27) Agbɛnɛ hu, ebaa ehe shi. Ŋmalɛ lɛ kɛɛ: “Emaa ehiɛ shi ni ekwɛɔ ŋwɛi kɛ shikpɔŋ, ewóɔ mɔ ni abuuu lɛ lɛ nɔ kɛjeɔ mulu mli.” (Lala 113:​6, 7) Enɛɛmɛi fɛɛ ahewɔ esa akɛ wɔkɛ anunyam ahã wɔ-Nyɔŋmɔ ni je agbo lɛ. Wɔkɛ anunyam hãa Yehowa ejaakɛ wɔmiisumɔ ni mɛi ale lɛ. Mɛi pii leee mɔ tuuntu ni Yehowa ji. Mɛni hewɔ? Nɔ hewɔ lɛ ji, Satan etsɔ Yehowa he amalei ni egbɛ eshwã lɛ anɔ eshwila amɛjwɛŋmɔ. (2 Kor. 4:4) Satan ehã mɛi pii ehe amɛye akɛ Yehowa yitsoŋ wa, esusuuu mɔ he, ni akɛ, je nɛŋ naagbai lɛ pii jɛ lɛ. Shi wɔ lɛ, wɔle akɛ enɛ ji amale agbo! Wɔná hegbɛ akɛ wɔbaajaje mɛi ajwɛŋmɔ ni wɔhã amɛle mɔ tuuntu ni Nyɔŋmɔ ji.—Yes. 43:10. w25.01 3-4 kk. 6-7

Be ni Yesu ba shikpɔŋ lɛ nɔ lɛ, no mli lɛ eye emuu, ni efee naakpɛɛ nii babaoo. Fɛɛ sɛɛ lɛ, Satan tsɔ mɛi komɛi anɔ egbɛ ehe amalei pii eshwã. Akɛ nɔkwɛmɔnɔ lɛ, jamɔŋ hiɛnyiɛlɔi lɛ kɛɛ mɛi akɛ, “daimonioi anɔyelɔ lɛ” hewalɛ Yesu kɛfamɔɔ daimonioi lɛ. (Mar. 3:22) Agbɛnɛ hu, be ni ayeɔ Yesu sane lɛ, jamɔŋ hiɛnyiɛlɔi lɛ kɛɛ ewie wiemɔ fɔŋ eshi Nyɔŋmɔ, ni amɛwo maŋbii lɛ ayiŋ koni amɛbi ni agbe lɛ. (Mat. 27:20) Sɛɛ mli be ni Kristo sɛɛnyiɛlɔi lɛ shiɛɔ sane kpakpa lɛ, mɛi ni teɔ shi amɛwoɔ amɛ lɛ “wo jeŋmajiaŋbii lɛ ayiŋ ni amɛfite amɛjwɛŋmɔ” koni amɛwa Kristofoi lɛ ayi. (Bɔf. 14:​2, 19) Be ni agbálaa Bɔfoi 14:2 lɛ mli yɛ December 1, 1998 Buu-Mɔɔ lɛ mli lɛ, awie akɛ: “Akɛni shɛɛ sane lɛ ni amɛ diɛŋtsɛ amɛkpoo lɛ kɛkɛ hãaa amɛtsui anyɔ amɛmli hewɔ lɛ, Yudafoi shiteekɛwolɔi lɛ je amale naafolɔmɔ wiemɔi ahe tafaa shishi, ni amɛbɔ mɔdɛŋ ní amɛhã Jeŋmajiaŋbii lɛ aná Kristofoi ahe jwɛŋmɔ fɔŋ.” Ŋmɛnɛ lɛ, Satan miiyanɔ ‘eelaka shikpɔŋ muu lɛ fɛɛ.’ w24.04 11 kk. 15; 13 kk. 16

Kɛ́ abaatee mɔ ko shi jio, ateŋ lɛ shi jio, ani be ni ekɛgbo lɛ ni baatsɔɔ? Dabi. Yehowa ji Kojolɔ ni yeɔ emuu; eyeɔ jalɛsane ni efeɔ nɔ ni ja be fɛɛ be. (Lala 33:​4, 5) Lɛ ji “shikpɔŋ lɛ fɛɛ Kojolɔ,” ni wɔbaanyɛ wɔmu wɔfɔ̃ enɔ akɛ ebaafee nɔ ni ja. Ni he ni mɔ ko yɔɔ yɛ shikpɔŋ lɛ nɔ hu? Ani no baatsɔɔ bɔ ni Yehowa baakojo lɛ ehã wɔsɛɛ? Wɔbaanyɛ wɔhã hetoo akɛ, dabi. Mɛi pii yɛ ni maji anɔ ni amɛyɔɔ lɛ hewɔ lɛ, amɛnáaa hegbɛ amɛnu Maŋtsɛyeli lɛ he sane. Wɔle akɛ, Yehowa, shikpɔŋ lɛ fɛɛ Kojolɔ ni feɔ nɔ ni ja be fɛɛ be lɛ, ebuŋ mɛi nɛɛ fɛɛ akɛ “abotiai” akɛni amɛnáaa hegbɛ nɛɛ hewɔ. (Mat. 25:46) Amɛsane kã etsui nɔ waa fe bɔ ni amɛsane kã wɔtsui nɔ lɛ po. Wɔleee bɔ ni Yehowa baatsu saji ahe nii ehã yɛ amanehulu kpeteŋkpele lɛ mli. Shi ekolɛ, nibii ni baaya nɔ lɛ baatsirɛ mɛi nɛɛ ateŋ mɛi komɛi ni amɛhe Yehowa nɔ amɛye kɛ́ ehã jeŋmaji lɛ fɛɛ le akɛ, lɛ ji Yehowa lɛ.—Eze. 38:16. w24.05 12 kk. 14-15

Wɔ, Yehowa tsuji lɛ, wɔsumɔɔ ni wɔye wɔbua wɔhe. (2 Kor. 8:4) Shi bei pii lɛ, ja wɔyɛ ekãa dani wɔbaanyɛ wɔfee nakai. Akɛ nɔkwɛmɔnɔ lɛ, kɛ́ aawu ta yɛ he ko lɛ, asafoŋ onukpai ni yɔɔ jɛmɛ lɛ woɔ nyɛmimɛi lɛ hewalɛ, ni amɛyeɔ amɛbuaa amɛ ni amɛná Biblia kɛ asafo lɛ woji kɛ amɛheloonaa hiamɔ nii. Akɛni asafoŋ onukpai lɛ sumɔɔ nyɛmimɛi lɛ hewɔ lɛ, amɛkɛ amɛwala woɔ oshãra mli koni nyɛmimɛi lɛ anine ashɛ nibii ni he hiaa amɛ lɛ anɔ. Yɛ shihilɛi ni tamɔ nɛkɛ amli lɛ, ehe baahia waa ni wɔbo gbɛtsɔɔmɔ toi koni wɔya nɔ wɔfee ekome. Agbɛnɛ hu, esa akɛ wɔkɛ gbɛtsɔɔmɔi fɛɛ ni jɛɔ nitsumɔhe nine lɛ kɛbaa lɛ atsu nii. (Heb. 13:17) Yɛ be kɛ beiaŋ lɛ, esa akɛ asafoŋ onukpai lɛ asusu gbɛtsɔɔmɔi ni asafo lɛ kɛhã yɛ nɔ ni esa akɛ afee dani oshãra aba kɛ nɔ ni esa akɛ afee be ni oshãra eba lɛ he lɛ ahe. (1 Kor. 14:​33, 40) Feemɔ ekãa, shi kwɛmɔ ohe nɔ jogbaŋŋ. (Abɛi 22:3) Dani obaafee nɔ ko lɛ, susumɔ he dã. Kaafee nɔ ko ni kɛ owala baawo oshãra mli. Okɛ ohiɛ afɔ̃ Yehowa nɔ. Ebaaye ebua bo koni oye obua onyɛmimɛi lɛ. w24.07 4 kk. 8; 5 kk. 11

Maŋtsɛ David le Yehowa jogbaŋŋ ni ekɛ ehiɛ fɔ̃ enɔ. Be ni mɛi tamɔ Maŋtsɛ Saul taoɔ agbe David lɛ, David sɔle ebi Yehowa ni eye ebua lɛ. Yehowa bo lɛ toi ni ehere lɛ. Enɛ tsirɛ David ni ewie akɛ: “Yehowa hiɛ kã!” (Lala 18:46) Be ni David wie nakai lɛ, ani eetsɔɔ kɛkɛ akɛ Yehowa yɛ? Dabi. Niiamlitaomɔ wolo ko wie akɛ, no mli lɛ, David miitsɔɔ akɛ eheɔ Yehowa eyeɔ waa ni ele akɛ eji “Nyɔŋmɔ ni hiɛ kã ni yeɔ ebuaa ewebii be fɛɛ be.” David yɔse akɛ Nyɔŋmɔ naa shihilɛ mli ni etsɔɔ lɛ ni efee klalo akɛ ebaawa lɛ. Enɛ wo lɛ hewalɛ ni etee nɔ esɔmɔ Yehowa ni ejie eyi. (Lala 18:​28, 29, 49) Kɛ́ wɔhe wɔye akɛ Yehowa ji Nyɔŋmɔ ni hiɛ kã lɛ, no baaye abua wɔ ni wɔsɔmɔ lɛ kɛ ekãa. Agbɛnɛ hu, no baaye abua wɔ ni wɔfi shi kɛ́ wɔkɛ shihilɛi ni mli wawai kpe, ni no baatsirɛ wɔ ni wɔya nɔ wɔtsu nii waa yɛ esɔɔmɔ lɛ mli. Kɛfata he lɛ, no baahã wɔtswa wɔfai shi akɛ wɔbaahi Yehowa masɛi daa. w24.06 20-21 kk. 3-4

Mɛni wɔbaanyɛ wɔkase yɛ nɔ ni bɔfo Paulo kɛɛ Tesalonikabii lɛ mli? Kɛ́ wɔnu sane ko ni kɛ nibii ni wɔkase yɛ Biblia lɛ mli lɛ kpãaa gbee loo sane ko ni hãa mɔ he jɔ̃ɔ ehe waa lɛ, esa akɛ wɔkɛ hiɛshikamɔ atsu nii. Yɛ blema Soviet Union lɛ, nyɛmimɛi lɛ anine shɛ lɛta ko ni akɛɛ ejɛ nitsumɔhe yitso lɛ nɔ. Yɛ lɛta lɛ mli lɛ, awo nyɛmimɛi lɛ ekomɛi hewalɛ ni amɛtse amɛhe kɛje asafo lɛ he ni amɛyatse amɛ diɛŋtsɛ amɛkuu. Kɛ́ okwɛ lɛta lɛ, etamɔ nɔ ni ejɛ nitsumɔhe yitso lɛ lɛɛlɛŋ. Shi nyɛmimɛi anɔkwafoi lɛ na sɛɛ. Amɛna akɛ nɔ ni lɛta lɛ woɔ amɛ hewalɛ ni amɛfee lɛ kɛ nibii ni amɛkase lɛ kpãaa gbee. Ŋmɛnɛ lɛ, Yehowa webii lɛ ahenyɛlɔi lɛ bɔɔ mɔdɛŋ akɛ amɛbaatsɔ nibii tamɔ Intanɛt lɛ kɛ social media nɔ amɛhã wɔyiŋ afutu wɔ ni mligbalamɔi aba wɔteŋ. Nɔ najiaŋ ni wɔbaahã saji ni tamɔ nɛkɛ ni wɔnuɔ loo wɔkaneɔ lɛ ‘ahoso wɔ oya kɛje wɔsusumɔ lɛ he’ lɛ, esa akɛ wɔkɛto nibii ni wɔkase momo lɛ ahe. Kɛ́ wɔfee nakai lɛ, ebaabu wɔhe.—2 Tes. 2:2; 1 Yoh. 4:1. w24.07 12 kk. 14-15

Yiŋ ni he hiaa fe fɛɛ ni mɔ ko baanyɛ akpɛ ji, ni ejɔɔ ehe nɔ ehã Yehowa ni ebafata etsuji ni yɔɔ jeŋ fɛɛ ni efee ekome akɛ weku kɛmiijá lɛ lɛ ahe. Yehowa miisumɔ ni mɔ fɛɛ mɔ akpɛ yiŋ kpakpa nɛɛ. Mɛni hewɔ? Eesumɔ ni wɔbatsɔmɔ enanemɛi, ni agbɛnɛ hu, wɔhi shi kɛya naanɔ. (5 Mo. 30:​19, 20; Gal. 6:​7, 8) Shi Yehowa enyɛɛɛ wɔnɔ ni wɔsɔmɔ lɛ. Ehã wɔteŋ mɔ fɛɛ mɔ hegbɛ ni ekpɛ eyiŋ kɛji ebaasɔmɔ lɛ aloo esɔmɔŋ lɛ. Kɛ́ mɔ ko kpɛ eyiŋ akɛ ebaasɔmɔ Yehowa, shi yɛ ebaptisimɔ sɛɛ lɛ, eyafee esha ko ni yɔɔ hiɛdɔɔ lɛ, te esa akɛ asafoŋ onukpai lɛ atsu he nii amɛhã tɛŋŋ? Kɛ́ mɔ lɛ tsakeee etsui lɛ, esa akɛ ajie lɛ kɛje asafo lɛ mli. (1 Kor. 5:13) Shi kɛ́ eba lɛ nakai po lɛ, nɔ ni Yehowa shweɔ ji, ni mɔ lɛ atsake etsui ni eku esɛɛ kɛba eŋɔɔ. Anɔkwa, yiŋtoi ahewɔ ni ehã e-Bi lɛ bagbo kɛkpɔ̃ adesai lɛ ateŋ ekome ni he hiaa waa ji, koni enyɛ ekɛ mɛi ni efee esha ni amɛtsake amɛtsui lɛ ahe eshai ake amɛ. Yehowa, wɔ-Nyɔŋmɔ lɛ, sumɔɔ wɔ waa, ni no hewɔ lɛ, ewoɔ mɛi fɛɛ ni efee eshai ni yɔɔ hiɛdɔɔ lɛ hewalɛ ni amɛtsake amɛtsui.—Zak. 1:3; Rom. 2:4; Yak. 4:8. w24.08 14 kk. 1-2

Be ni Yohane ŋma 3 Yohane lɛ, no mli lɛ, mɛi komɛi miigbɛ amale tsɔɔmɔi amɛmiishwã ni enɛ kɛ mligbalamɔ miiba asafo lɛ mli. Shi mɛi krokomɛi tee nɔ ‘amɛnyiɛ yɛ anɔkwale lɛ mli.’ Amɛbo Yehowa toi ni amɛtee nɔ ‘amɛnyiɛ yɛ ekitãi lɛ anaa.’ (2 Yoh. 4, 6) Kristofoi anɔkwafoi nɛɛ hã Yohane kɛ Yehowa fɛɛ ná miishɛɛ waa. (Abɛi 27:11) Mɛni wɔkaseɔ yɛ nɔ ni Yohane ŋma lɛ mli? Anɔkwayeli hãa anáa miishɛɛ. (1 Yoh. 5:3) Akɛ nɔkwɛmɔnɔ lɛ, wɔyɛ miishɛɛ, ejaakɛ wɔle akɛ wɔhãa Yehowa náa miishɛɛ. Kɛ́ Yehowa na akɛ wɔtsi wɔhe kɛje efɔŋ he ni wɔmiiye ekitãi lɛ anɔ lɛ, enáa miishɛɛ. Kɛ́ ŋwɛibɔfoi lɛ na enɛ lɛ, amɛ hu amɛnáa miishɛɛ. (Luka 15:10) Wɔ hu kɛ́ wɔna akɛ wɔnyɛmimɛi lɛ miiya nɔ amɛmiiye anɔkwa lɛ, wɔnáa miishɛɛ. (2 Tes. 1:4) Ni kɛ́ akpãtã Satan je lɛ hiɛ lɛ, wɔbaaná miishɛɛ ejaakɛ wɔtee nɔ wɔye Yehowa anɔkwa. w24.11 12-13 kk. 17-18

Be enyiɛ esa akɛ okɛkwɛ mɔ lɛ dani agbɛnɛ lɛ, obi lɛ suɔmɔ? Kɛ́ oyabi mɔ lɛ suɔmɔ oya lɛ, mɔ lɛ baanyɛ ana bo akɛ osusuuu nii ahe kɛyaaa shɔŋŋ dani okpɛɔ yiŋ. (Abɛi 29:20) Shi kɛ́ ekolɛ mɔ lɛ ena akɛ oosumɔ lɛ, ni ohã osɛɛ gbala shi fe nine hu lɛ, ebaanyɛ enu he akɛ onyɛɛɛ okpɛ oyiŋ yɛ saji ahe. (Jaj. 11:4) Kaaná jwɛŋmɔ lɛ akɛ, ja oná nɔmimaa akɛ yoo nɛɛ okɛbaahi shi, dani obaayabi lɛ suɔmɔ. Shi esa akɛ oná nɔmimaa akɛ osaa ohe kɛhã gbalashihilɛ, ni onaa nakai mɔ lɛ akɛ ebaanyɛ efee hefatalɔ ni sa bo. Shi kɛ́ ona akɛ mɔ ko miisumɔ bo hu? Mɛni esa akɛ ofee? Kɛ́ osumɔɔɔ lɛ lɛ, hã onifeemɔi ahã ena faŋŋ akɛ osumɔɔɔ lɛ. Kɛ́ ofee onii tamɔ nɔ ni oosumɔ lɛ, tsɛbelɛ osumɔɔɔ lɛ lɛ, ogba enaa, ni nakai feemɔ ehiii kwraa.—Efe. 4:25. w24.05 23 kk. 9-10

Mɛi ni afɔ amɛ mu lɛɛlɛŋ ni baaye Yehowa anɔkwa lɛ, amɛ pɛ Yesu baaŋɔ kɛya ŋwɛi Maŋtsɛyeli lɛ mli. Kɛ́ mɛi ni afɔ amɛ mu lɛ ateŋ mɔ ko eyaaa nɔ ebuuu lɛ, no lɛ, kɛ́ Yesu ba ni ebabua “ehalamɔbii lɛ” anaa lɛ, akɛ lɛ fataŋ he. (Mat. 24:31) Nakai nɔŋŋ hu esa akɛ Nyɔŋmɔ webii ni yɔɔ hiɛnɔkamɔ akɛ amɛbaahi shikpɔŋ lɛ nɔ kɛya naanɔ lɛ abo Yesu kɔkɔbɔɔ lɛ toi, ni amɛya nɔ amɛbu ni amɛye Yehowa anɔkwa. Wɔle akɛ, nɔ fɛɛ nɔ ni Yehowa feɔ lɛ ja. No hewɔ lɛ, kɛ́ Yehowa ekpɛ mli akɛ ebaafɔ mɛi komɛi mu yɛ wɔbei nɛɛ amli lɛ, wɔhãaa no agba wɔnaa. Wɔkaiɔ Yesu nɔkwɛmɔnɔ ni kɔɔ nitsulɔi ni abɔ amɛ apaa yɛ ŋmɛlɛtswaa ni ji 11 lɛ nɔ lɛ ahe lɛ. (Mat. 20:​1-16) Sɛɛkpeebii nɛɛ kɛ mɛi ni tsu nii yɛ ŋmɔ lɛ mli kɛjɛ leebi lɛ fɛɛ ná nyɔmɔwoo kome. Nakai nɔŋŋ mɛi fɛɛ ni afɔ amɛ mu lɛ baaya ŋwɛi kɛ́ amɛye Yehowa anɔkwa, ekɔɔɔ he eko be ni afɔ amɛ mu. w24.09 24 kk. 15-17

Yesu fee nɔkwɛmɔnɔ kpakpa yɛ bɔ ni esa akɛ wɔfee wɔnii wɔhã kɛ́ aye wɔ sane fɔŋ lɛ he. Ewekumɛi kɛ mɛikpɔji fɛɛ kɛ lɛ yeee jogbaŋŋ. Ewekumɛi lɛ kɛɛ ejwɛŋmɔ tsuuu nii jogbaŋŋ, ni jamɔŋ hiɛnyiɛlɔi lɛ kɛɛ ekɛ daimonioi shãraa, ni Roma asraafoi lɛ ye ehe fɛo, amɛfee lɛ yiwalɛ nii ni amɛgbe lɛ. (Mar. 3:​21, 22; 14:55; 15:​16-20, 35-37) Yesu fi shi yɛ shihilɛi nɛɛ fɛɛ mli, ni etɔɔɔ ehe owele kɔkɔɔkɔ. Mɛni wɔbaanyɛ wɔkase yɛ esane lɛ mli? (1 Pet. 2:​21-23) Bɔ ni Yesu fee enii ehã be ni aye lɛ sane fɔŋ lɛ ji nɔkwɛmɔnɔ ni hi fe fɛɛ. Ele be ni esa akɛ efee diŋŋ kɛ be ni esa akɛ ewie. (Mat. 26:​62-64) Bei komɛi lɛ, kɛ́ mɛi wie sane ko ni ejaaa yɛ ehe lɛ, ewieee nɔ ko. (Mat. 11:19) Shi kɛ́ ekpɛ eyiŋ akɛ ebaafã enaa lɛ, ejɛɛɛ mɛi ni waa lɛ yi lɛ ni ewieee akɛ ebaafee amɛ nɔ ko hu. w24.11 4-5 kk. 9-10

Ŋɔɔ lɛ akɛ, oke mɔ ko ni osumɔɔ esane waa lɛ nɔ ko ni yɔɔ fɛo ni he yɔɔ sɛɛnamɔ waa. Kɛ́ mɔ lɛ kɛ nikeenii lɛ yato he ko ni ejwɛŋŋ he kwraa lɛ, te obaanu he ohã tɛŋŋ? Ekolɛ ebaadɔ bo waa! Shi kɛ́ mɔ lɛ kɛ nikeenii nɛɛ tsu nii ni eda bo shi yɛ he lɛ, ŋwanejee ko bɛ he akɛ, obaaná miishɛɛ waa. Mɛɛ gbɛ nɔ nɔkwɛmɔnɔ nɛɛ kɔɔ kpɔmɔnɔ lɛ he? Yehowa kɛ e-Bi lɛ hã koni egbo kɛkpɔ̃ wɔ. Kɛ́ Yehowa na akɛ wɔhiɛ sɔɔ enikeenii nɛɛ kɛ esuɔmɔ, ni ji nɔ ni tsirɛ lɛ ni ekɛ kpɔmɔnɔ nɛɛ hã lɛ, ebaaná miishɛɛ waa! (Yoh. 3:16; Rom. 5:​7, 8) Shi be ni be shwieɔ mli lɛ, ekolɛ wɔnaŋ kpɔmɔnɔ lɛ akɛ nɔ ko ni jara wa dɔŋŋ. Kɛ́ eba lɛ nakai lɛ, ebaafee tamɔ nɔ ni wɔkɛ Nyɔŋmɔ nikeenii nɛɛ eyato he ko ni wɔnaaa dɔŋŋ ni wɔjwɛŋŋ he hu dɔŋŋ. Bɔ ni afee ni ekaba lɛ nakai lɛ, esa akɛ wɔsusu nibii ni Nyɔŋmɔ kɛ Kristo efee amɛhã wɔ lɛ ahe be fɛɛ be. w25.01 26 kk. 1-2

Jeee mɔ ni batsɔ Kristo kaselɔ etsɛko ni awoɔ lɛ asafoŋ onukpa. Enɛ tsɔɔ akɛ, kɛ́ abaptisi nyɛmi nuu ko lɛ, esa akɛ ewaje wekukpaa ni yɔɔ ekɛ Yehowa teŋ lɛ ni ekase bɔ ni akɛ Biblia lɛ tsuɔ nii kɛkpɛɔ yiŋ kpakpai dani awó lɛ asafoŋ onukpa, ni enɛ baahe be ko shi jeee afii pii. Dani abaawo bo asafoŋ onukpa lɛ, esa akɛ ana yɛ onifeemɔi amli akɛ obaa ohe shi tamɔ Yesu, ni egbaaa onaa akɛ obaamɛ Yehowa kɛyashi ekɛ nitsumɔi baawo odɛŋ yɛ be ni sa mli. (Mat. 20:23; Fip. 2:​5-8) Kɛ́ ohiɔ shi yɛ Yehowa gbɛtsɔɔmɔi ni ja lɛ anaa, ni okɛ gbɛtsɔɔmɔi ni esafo lɛ kɛhãa lɛ tsuɔ nii lɛ, no lɛ oji anɔkwafo. Biblia lɛ hãa efeɔ faŋŋ akɛ esa akɛ asafoŋ onukpa afee mɔ ni baanyɛ atsɔɔ nii. Ani enɛ tsɔɔ akɛ esa akɛ ofee mɔ ko ni hãa maŋshiɛmɔ ni nɔ bɛ kwraa? Dabi. Jeee asafoŋ onukpai fɛɛ hãa maŋshiɛmɔ ni nɔ bɛ kwraa, shi kɛ́ amɛmiishiɛ, amɛyasara nyɛmi ko koni amɛwo lɛ hewalɛ lɛ, esa akɛ amɛkɛ Biblia lɛ atsu nii jogbaŋŋ kɛtsɔɔ nyɛmimɛi lɛ nii ni amɛwo amɛ hewalɛ. w24.11 23-24 kk. 14-15

Kɛ́ wɔna nɔ ko yɛ Biblia lɛ mli ni wɔnuuu shishi lɛ, esa akɛ wɔtao mli. Kɛ́ okase nɔ ko lɛ, jwɛŋmɔ nɔ gbi muu lɛ fɛɛ ni osusu nɔ ni etsɔɔ bo yɛ Yehowa, e-Bi lɛ, kɛ suɔmɔ ni amɛyɔɔ kɛhã bo lɛ he. (Lala 119:​97, shn.) Jeee be fɛɛ be kɛ́ okase nii loo otao nii amli lɛ obaana nɔ ko hee, shi kaahã onijiaŋ je wui. Yɛ gbɛ ko nɔ lɛ, otamɔ mɔ ko ni miitao shika tsuru. Bei pii lɛ, eheɔ mɛi ni taoɔ shika tsuru lɛ ŋmɛlɛtswai loo gbii abɔ dani amɛnáa bibioo. Shi amɛkpaaa, amɛyaa nɔ amɛtaoɔ, ejaakɛ kɛ́ amɛná bibioo po lɛ, ejara wa kɛhã amɛ. Nibii hei ni wɔnáa kɛjɛɔ Biblia lɛ mli lɛ ajara wa kwraa fe shika tsuru! (Abɛi 8:10) No hewɔ lɛ, yaa nɔ okase Biblia lɛ, ni oya nɔ okase nibii hei kɛjɛ nɔ ni okaseɔ lɛ mli.—Lala 1:2. w25.01 24-25 kk. 14-15

Yehowa kpaa gbɛ akɛ wɔkɛ mɛi ni etɔ wɔ nɔ lɛ ahe eshai lɛ ake amɛ. (Lala 86:5; Luka 17:4; Efe. 4:32) Kɛ́ mɔ ko, titri lɛ, wɔnaanyo loo wɔwekunyo ko wie nɔ ko loo efee nɔ ko ni wɔsumɔɔɔ lɛ, edɔɔ wɔ waa. (Lala 55:​12-14) Bei komɛi lɛ, efeɔ tamɔ nɔ ni atsu wɔ kakla. (Abɛi 12:18) Ekolɛ wɔbaabɔ mɔdɛŋ akɛ wɔbaajie wɔjwɛŋmɔ yɛ bɔ ni edɔɔ wɔ ehãa lɛ nɔ, loo wɔku wɔhiɛ wɔshwie nɔ. Shi kɛ́ wɔfee nakai lɛ, ebaafee tamɔ nɔ ni atsu wɔ kakla ni wɔshi kakla lɛ yɛ fala lɛ mli. Bɔ ni ewaa wɔhe lɛ naa baŋ shi. Nakai nɔŋŋ, kɛ́ wɔku wɔhiɛ wɔshwie bɔ ni edɔɔ wɔ ehãa lɛ nɔ lɛ, dɔlɛ lɛ ejeŋ wɔmli. Kɛ́ mɔ ko fee wɔ nɔ ko ni edɔ wɔ lɛ, bei pii lɛ, wɔmli fuɔ amrɔ nɔŋŋ. Biblia lɛ kɛɔ akɛ tɔmɔ bɛ he akɛ wɔmli baafu. Shi ebɔɔ wɔ kɔkɔ ni wɔkahã nakai henumɔ lɛ kudɔ wɔ. (Lala 4:4; Efe. 4:26) Mɛni hewɔ? Ejaakɛ bei pii lɛ, kɛ́ wɔmli fu lɛ, ehãaa wɔfee nibii kpakpai. (Yak. 1:20) Kaimɔ akɛ, kɛ́ mɔ ko fee wɔ nɔ ko ni edɔ wɔ lɛ, wɔmli fuɔ, ni nɔ ko bɛ ni wɔbaanyɛ wɔfee yɛ he. Shi kɛ́ wɔbaaya nɔ wɔhiɛ mlifu lɛ mli loo wɔŋmɛɛ he lɛ, no lɛ edamɔ wɔnɔ. w25.02 15 kk. 4-6

Yesu gba nɔkwɛmɔnɔ ko ni tsɔɔ akɛ kɛ́ mɔ ko bua shika naa ehã ehe shi “ejeee niiatsɛ yɛ Nyɔŋmɔ hiɛ lɛ,” eeefee buulu. (Luka 12:​16-21) Mɔ ko mɔ ko leee wɔ́ sane. (Abɛi 23:​4, 5; Yak. 4:​13-15) Agbɛnɛ hu, Yesu wie akɛ kɛ́ mɔ ko miitao ebatsɔ ekaselɔ lɛ, esa akɛ esaa ejwɛŋmɔ akɛ, ‘ebaashi nibii ni eyɔɔ lɛ fɛɛ.’ (Luka 14:33) Nɔ ko ni tamɔ nɛkɛ ba blema Kristofoi ni hi shi yɛ Yudea lɛ anɔ; amɛnibii fɛɛ ŋmɛɛ amɛ, shi no fiteee amɛmiishɛɛ. (Heb. 10:34) Yɛ wɔbei nɛɛ amli hu lɛ, nyɛmimɛi babaoo kɛ amɛnitsumɔ, shika, kɛ amɛnibii eshã afɔle akɛni amɛkɛ amɛhe wooo pɔlitis mli lɛ hewɔ. (Kpo. 13:​16, 17) Mɛni ye ebua amɛ ni amɛnyɛ amɛfee nakai? Amɛhe amɛye waa akɛ Yehowa baaye shi ni ewo akɛ: “Mishiŋ bo, ni mikwaŋ bo kɔkɔɔkɔ” lɛ nɔ. (Heb. 13:5) Wɔbaanyɛ wɔkɛ nɔ ko ato kɛhã wɔsɛɛ, shi wɔheɔ wɔyeɔ waa akɛ kɛ́ nɔ ko ni wɔkpaaa gbɛ ba lɛ, Yehowa baaye ebua wɔ. w25.03 29 kk. 13-14

Yehowa le akɛ, ja eye ebua wɔ dani wɔbaanyɛ wɔtsɔmɔ mɛi ni edara yɛ mumɔŋ. Yehowa ehã wɔ tookwɛlɔi kɛ tsɔɔlɔi yɛ asafo lɛ mli koni amɛye amɛbua wɔ ni ‘wɔda kɛshɛ Kristo lɛ dalɛ lɛ he.’ (Efe. 4:​11-13) Agbɛnɛ hu, ehãa wɔ emumɔ krɔŋkrɔŋ lɛ koni no aye abua wɔ ni wɔná “Kristo jwɛŋmɔ lɛ” eko. (1 Kor. 2:​14-16) Kɛfata he lɛ, Nyɔŋmɔ hã aŋma Sanekpakpai ejwɛ lɛ koni no aye abua wɔ ni wɔna bɔ ni Yesu susu nii ahe ehã, nibii ni ewie, kɛ bɔ ni efee enii ehã be ni eyɔɔ shikpɔŋ lɛ nɔ. Kɛ́ wɔhã wɔsusumɔ kɛ Yesu nɔ lɛ kpã gbee, ni wɔfee wɔnii tamɔ lɛ lɛ, wɔbaada yɛ mumɔŋ. Shi kɛ́ wɔmiitao wɔdara yɛ mumɔŋ lɛ, nɔ kroko ni esa akɛ wɔfee ji, “wɔfo mli yɛ Kristo lɛ he shishijee tsɔɔmɔi lɛ ahe.” w24.04 4-5 kk. 11-12

Daa gbi lɛ, wɔkpɛɔ wɔyiŋ yɛ saji ahe. Saji nɛɛ ekomɛi yɛ ni ewaaa akɛ wɔbaakpɛ wɔyiŋ yɛ he. Ekomɛi ji nɔ ni wɔbaaye leebi loo be ni wɔkɛbaawɔ nɛkɛ. Shi ekomɛi hu yɛ ni ewa waa akɛ wɔbaakpɛ wɔyiŋ yɛ he. Nɔ hewɔ lɛ ji, yiŋkpɛi nɛɛ baanyɛ asa wɔgbɔmɔtsoŋ hewalɛnamɔ, wɔmiishɛɛ, wɔweku, kɛ jamɔ ni wɔkɛhãa Yehowa lɛ po he. Agbɛnɛ hu, wɔmiisumɔ ni yiŋ ni wɔbaakpɛ lɛ, wɔ, kɛ wɔweku lɛ fɛɛ aná he sɛɛ. Nɔ ni fe fɛɛ lɛ, wɔmiisumɔ ni yiŋ ni wɔkpɛɔ lɛ asa Yehowa hiɛ. (Rom. 12:​1, 2) Nɔ ko ni he hiaa waa ni esa akɛ wɔfee kɛ́ wɔmiitao ni wɔkpɛ yiŋ kpakpa ji, ni wɔbaale nɔ ni wɔyaakpɛ yiŋ yɛ he lɛ he saji fitsofitso. Mɛni hewɔ ehe hiaa ni wɔfee nakai? Ŋɔɔ lɛ akɛ, mɔ ko bɛ hewalɛ ni etee eyana datrɛfonyo. Kɛ́ okwɛ lɛ, ani datrɛfonyo lɛ baaŋmala tsofai ehã mɔ lɛ be ni ebiko lɛ nɔ ni feɔ lɛ kɛ saji krokomɛi? Ekã shi faŋŋ akɛ, datrɛfonyo kpakpa fɛɛ datrɛfonyo kpakpa efeŋ nakai. Nakai nɔŋŋ wɔ hu, kɛ́ wɔmiisumɔ ni wɔkpɛ yiŋ kpakpa lɛ, esa akɛ wɔbɔ mɔdɛŋ akɛ wɔbaale nɔ ni wɔyaakpɛ yiŋ yɛ he lɛ he saji klɛŋklɛŋ. w25.01 14 kk. 1-3

Yehowa naa mɔbɔ waa, ni “esumɔɔɔ akɛ akpãtã mɔ ko mɔ ko hiɛ.” (2 Pet. 3:9) Biblia lɛ wieɔ mɛi komɛi ni fee eshai ni yɔɔ hiɛdɔɔ waa shi Yehowa na amɛ mɔbɔ lɛ ahe. Amɛteŋ mɔ kome ji, Maŋtsɛ David. David fee eshai ni yɔɔ hiɛdɔɔ waa. Ekomɛi ji, efite gbãla ni egbe gbɔmɔ. Shi be ni etsake etsui lɛ, Yehowa na lɛ mɔbɔ ni ekɛ ehe eshai lɛ ke lɛ. (2 Sam. 12:​1-12) Mɔ kroko hu ji, Maŋtsɛ Manase. Manase kɛ ewala afii lɛ pii fee nibii gbohii. Shi lɛ po be ni etsake etsui lɛ, Yehowa na lɛ mɔbɔ ni ekɛ ehe eshai lɛ ke lɛ. (2 Kro. 33:​9-16) Hii nɛɛ asane lɛ hãa wɔnaa akɛ, kɛ́ Yehowa na akɛ nɔ ko yɛ ni ebaanyɛ edamɔ nɔ ena mɔ ko mɔbɔ lɛ, enaa lɛ mɔbɔ. Yehowa baatee mɛi tamɔ David kɛ Manase shi, ejaakɛ amɛyɔse akɛ nibii ni amɛfee lɛ ehiii, ni amɛtsake amɛtsui. w24.05 4 kk. 12