Nɛ̌ a ka ná ɖe xlɛ́ ɖɔ gbɛxixɔ ɔ su nukún towe mɛ gbɔn?

1-2. Jezu sɔ́ gbɛ tɔn jó dó ta mǐtɔn mɛ. Étɛ́ énɛ́ ka ɖó ná sísɛ́ mǐ bɔ mǐ ná wa? Aniwú? (2 Kɔlɛ́ntinu lɛ́ 5:14, 15) (Kpɔ́n ɖiɖe ɔ lɔmɔ̌.)

ÉNYÍ dǒ mu jɛ jǐ towe bónú è hwlɛ́n we ɔ, a ná mɔ ɖɔ émí ɖu nǔɖéxɔ́ dó mɛ e hwlɛ́n we é ǎ cé? Ényí è ná bo tlɛ hwlɛ́n mɛ ɖěvo lɛ́ lɔ ɔ, hwiɖésúnɔ ná ba ná ɖɔ nǔɖé dó ɖe nǔsumɛnukúnmɛ xlɛ́.

² Lěe è tínmɛ gbɔn ɖo xóta e wá yi é mɛ é ɔ, mǐ sixú hwlɛ́n mǐɖée sín nǔ e hwɛhuhugú e mǐ ɖu é nɔ wa dó mǐ wú lɛ́ é mɛ ǎ. Amɔ̌, vɔ̌sísá gbɛxɔnúmɛ tɔn Jezu tɔn sixú hwlɛ́n mǐ. Gbɔn vɔ̌sísá énɛ́ gblamɛ ɔ, mǐ (1) ná mɔ sɔ́kɛ hwɛ mǐtɔn lɛ́ tɔn, (2) ɖó nukún ɖɔ è ná hwlɛ́n mǐ sín hwɛhuhugú e mǐ ɖu é sí bǐ mlɛ́mlɛ́, bo (3) ná lɛ́ dó hwɛ gbɔ xá Mawu. Wǎgbɔ tɔn ɔ, mǐ ɖó nukúnɖíɖó ɔ bo ná nɔ gbɛ káká sɔ́yi ɖo gbɛ yɔ̌yɔ́ Mawu tɔn mɛ. Kú e Jezu kú dó ta mǐtɔn mɛ é ɖe wǎnyíyí e é ɖó nú gbɛtɔ́ lɛ́ cóbɔ è wá ji i, b’ɛ nyí gbɛtɔ́ maɖóblɔ̌ é xlɛ́ nyi wɛn. (Nǔx. 8:30, 31) Mɛsɛ́dó Pɔ́lu wlán ɖɔ “wǎnyíyí Klísu tɔn kp’acɛ dó mǐ jí mlɛ́mlɛ́.” (Xa 2 Kɔlɛ́ntinu lɛ́ 5:14, 15.) Énɛ́ xlɛ́ ɖɔ mǐ ɖó ná ɖe xlɛ́ ɖɔ wǎnyíyí e Jezu ɖó nú mǐ é su nukún mǐtɔn mɛ bo ná wɔn nǔ e é wa nú mǐ é gbeɖé ǎ.

3. Étɛ́wú lěe è nɔ ɖe xlɛ́ ɖɔ gbɛxixɔ ɔ su nukún mɛtɔn mɛ gbɔn é ka sixú gbɔn vo sín mɛɖé jí jɛ mɛ ɖěvo jí?

³ Nɛ̌ a ka ná ɖe xlɛ́ ɖɔ gbɛxixɔ ɔ su nukún towe mɛ gbɔn? Xósin towe sixú gbɔn vo nú xósin e mɛ ɖěvo ná ná é. Mǐ ní ɖɔ ɖɔ mɛ vovo atɔn ɖé lɛ́ xweyǐgbe fí ɖokpó ɔ, amɔ̌, yě ɖo toxo ɖokpó ɔ mɛ ǎ. Énɛ́ wú ɔ, é ɖo wɛn ɖɔ ali vovo wɛ yě ná sɔ́. Ðo ali ɖokpó ɔ nu ɔ, fí e a xwe é alǒ nǔ e gbé nya wɛ a ɖe é wɛ nyí ɖɔ a ná ɖe lěe gbɛxixɔ ɔ su nukún towe mɛ gbɔn é xlɛ́. Amɔ̌, lěe a ná ɖe nǔsumɛnukúnmɛ xlɛ́ gbɔn é sixú gbɔn vo nú mɛ ɖěvo lɛ́ tɔn. Ðo xóta élɔ́ mɛ ɔ, mǐ ná ɖɔ xó dó lěe gbɛtɔ́ gbɛ̌nu atɔn élɔ́ lɛ́ sixú ɖe xlɛ́ ɖɔ gbɛxixɔ ɔ su nukún émítɔn mɛ gbɔn é jí: (1) Biblu kplɔ́ntɔ́ lɛ́, (2) mɛ e bló batɛ́mu lɛ́ é kpó (3) mɛ e jɛ zɔ nú agun ɔ lɛ́ é kpó.

BIBLU KPLƆ́NTƆ́ LƐ́

4. Nɛ̌ nǔ ka nɔ cí nú Jexóva dó Biblu kplɔ́ntɔ́ lɛ́ wú?

⁴ Ényí a ɖo Biblu kplɔ́n wɛ din hǔn, xlɛ́xlɛ́ wɛ é ɖe ɖɔ a ba ná kplɔ́n nǔ dó Jexóva kpó nǔkplɔ́nmɛ Biblu tɔn lɛ́ kpó wú, bo lɛ́ ɖo xlɛ́xlɛ́ wɛ ɖɔ Jexóva ba ɖɔ a ní húzú xɔ́ntɔn émítɔn, bɔ é ka ɖo alɔ dó we wɛ bónú a ná kpé énɛ́ wú. (Jaan 6:44; Mɛ. 13:48) É nɔ ɖ’ayi wǔ we. Nǔgbó ɔ, é nɔ ɖ’ayi gǎn ɖěɖěe dó wɛ a ɖe bo ná kplɔ́n nǔ dó wǔ tɔn lɛ́ é wú. Bɔ ényí a lɛ́ ɖo hǔzúhúzú lɛ́ bló wɛ ɖo gbɛzán towe mɛ, bá dó nyɔ́ nukún tɔn mɛ ɔ, é nɔ víví n’i. (Nǔx. 17:3; 27:11) Gbɛxixɔ ɔ hun ali nú we, bɔ a ná zun xɔ́ntɔn vívɛ́ xá Jexóva. (Hlɔ̌. 5:10, 11) Ma wɔn énɛ́ gbeɖé ó.

5. Nɛ̌ Biblu kplɔ́ntɔ́ lɛ́ ka sixú zán wěɖexámɛ e ɖo Filípunu lɛ́ 3:16 mɛ é gbɔn?

⁵ Ényí Biblu kplɔ́ntɔ́ ɖé wɛ nú we ɔ, nɛ̌ a ka sixú xlɛ́ ɖɔ gbɛxixɔ ɔ su nukún émítɔn mɛ gbɔn? Ali e nu a ná wa mɔ̌ ɖe é ɖokpó wɛ nyí ɖɔ a ná xwedó wě élɔ́ e Pɔ́lu ɖe xá Filípunu lɛ́ é: “Ényí bǎ ɖěbǔ mɛ wɛ mǐ ná bo yi nukɔn yi ɖó hǔn, mi nú mǐ ní kpo ɖo zɔnlin ɖi wɛ tlélé ɖo ali ɖokpó énɛ́ ɔ jí.” (Filí. 3:16) Sɔgbe xá wěɖexámɛ énɛ́ ɔ, ma lɔn bónú nǔ ɖěbǔ, alǒ mɛ ɖěbǔ zɔ́n bónú a gɔn nukɔn yi ɖo gbɛli ɔ jí ó.—Mat. 7:14; Luk. 9:62.

6. Ényí Biblu kplɔ́ntɔ́ lɛ́ mɔ ɖɔ hǔzúhúzú lɛ́ bíbló vɛ́ wǔ nú émí ɔ, étɛ́ yě ka sixú wa? (Sɛ́nflínmɛ 30:11-14) (Kpɔ́n ɖiɖe ɔ lɔmɔ̌.)

⁶ Ényí é vɛ́ wǔ nú we bónú a ná ɖi nǔ nú nǔ e a kplɔ́n ɖo Biblu mɛ agaɖanu din é ɖé ɔ, nɛ̌ a ka sixú wa nǔ gbɔn? Ba do nú nǔ dó nǔ e a kplɔ́n é wú, bo byɔ́ Jexóva ɖɔ é ní d’alɔ we bónú a ná ɖó nukúnnúmɔjɛnǔmɛ e za wě é dó nǔ ɔ wú. (Ðɛh. 86:11) Ényí a wa mɔ̌ có nukúnnú mimɔ jɛ mɛ lɛ́ kpo ɖo wǔ vɛ́ nú we wɛ jɛ́n wɛ hǔn, gbɔ bo jó dó hwɛ̌, amɔ̌, é ní ma sín énɛ́ wú bónú a ɖó Biblu kplɔ́nkplɔ́n te ó. Din ɔ, mǐ ní ɖɔ ɖɔ walɔ e Jexóva gbɛ́ wǎn ná é ɖé jíjódó wɛ ɖo wǔ vɛ́ nú we wɛ. Nɛ̌ a ka ná wa nǔ gbɔn? Flín ɖɔ Jexóva kún nɔ byɔ́ nǔ e zɛ nǔwúkpíkpé mǐtɔn wú é mǐ gbeɖé ó. A hɛn ɔ, a ná wa nǔ e nɔ nyɔ́ nukún tɔn mɛ lɛ́ é. (Xa Sɛ́nflínmɛ 30:11-14.) Gɔ́ ná ɔ, Jexóva d’akpá ɖɔ émí ná d’alɔ we. (Eza. 41:10, 13; 1 Kɔ. 10:13) Énɛ́ wú ɔ, ma jó gbe ó. Ma nɔ ɖo tamɛ lin dó nǔ e ɖo wǔ vɛ́ nú we wɛ é jí magbokɔ ó, é nyɔ́ wa hǔn, nɔ sɔ́ ayi ɖó nǔ tootóbú e Jexóva wa nú we lɛ́ é jí, káká jɛ gbɛxixɔ ɔ jí, bónú yě ní nɔ su nukún towe mɛ. Ée wǎn e a yí nú Jexóva é ná ɖo jijɛjí wɛ é ɔ, a ná wá mɔ ɖɔ ‘sɛ́n tɔn lɛ́ kún vɛ́ nyi ó.’—1 Jaan 5:3.a

7. Étɛ́ jí mɛ ɖěɖěe è ji dó agun mɛ lɛ́ é ka sixú lin tamɛ dó?

⁷ È ka hɛn ɔ, è ná ylɔ́ mɛ e è ji dó agun mɛ lɛ́ é lɔ ɖɔ Biblu kplɔ́ntɔ́ a? Ganjí. È ná ɖɔ ɔ, mi wɛ nyí Biblu kplɔ́ntɔ́ nukɔn nukɔntɔn mɛjitɔ́ mitɔn lɛ́ tɔn. Biblu ɖɔ: “Mi sɛkpɔ́ Mawu, énɛ́ ɔ, é ná sɛkpɔ́ mi.” (Ja. 4:8; 1 Tan 28:9) Ényí mi wá gbeta ɔ kɔn bá sɛkpɔ́ Jexóva ɔ, é lɔ ná sɛkpɔ́ mi. Jexóva nɔ mɔ ɖɔ a nyí mǐ ɖo yě mɛ ǎ. É nɔ sɛkpɔ́ mɛ ɖokpó ɖokpó, káká jɛ mɛ ɖěɖěe è ji dó agun mɛ lɛ́ é jí. Étɛ́ ka zɔ́n bɔ hwiɖésúnɔ mɛtún ɔ sixú zun xɔ́ntɔn xá Jexóva? Gbɛxixɔ ɔ wɛ. Ma wɔn nǔníná xɔ akwɛ́ énɛ́ e é ná we é gbeɖé ó. (Hlɔ̌. 5:1, 2) Cóbónú a ná yi kú Klísu tɔn flínflín xwe élɔ́ mɛ tɔn domɛ ɔ, aniwú a ma ka ná lin tamɛ dó nǔ e Jezu wa nú we é jí ǎ? Linlin énɛ́ ní sísɛ́ we bónú a ní w’azɔ̌ dó nǔ e gbé a ná nya ɖo gbigbɔ lixo bɔ d’é wú é jí, dó xlɛ́ ɖɔ gbɛxixɔ e sín tuto Jexóva bló gbɔn Vǐ tɔn jí é su nukún émítɔn mɛ.b

MƐ E BLÓ BATƐ́MU LƐ́ É

8. Nɛ̌ mɛ e bló batɛ́mu lɛ́ é ka ko xlɛ́ ɖɔ gbɛxixɔ ɔ su nukún émítɔn mɛ gbɔn?

⁸ Batɛ́mu e a bló é xlɛ́ ɖɔ a ko ɖe xlɛ́ ɖɔ gbɛxixɔ ɔ su nukún émítɔn mɛ ɖo ali gěgé nu. Ði kpɔ́ndéwú ɔ, a ɖe afɔ ɖé lɛ́ dó zán gbɛ sɔgbe xá nǔgbódodó Jexóva tɔn lɛ́, bo lɛ́ vɛ́ xá ɛ. A jlá wɛn ɖagbe ɔ mɛ ɖěvo lɛ́, bo lɛ́ kplɔ́n nǔ yě dó Jexóva kpó Jezu kpó wú. A zé hwiɖée jó nú Jexóva bo bló batɛ́mu. Mɛ ɖěvo lɛ́ sixú ko klán gbe xá we, ɖó Jexóva e sɛn wɛ a ɖe é wú. (2 Tim. 3:12) Amɔ̌, a kpo ɖo Jexóva sɛn wɛ kpó gbejíninɔ kpó, bɔ énɛ́ xlɛ́ ɖɔ a yí wǎn nú Jexóva, bɔ gbɛxixɔ ɔ lɛ́ su nukún towe mɛ.—Ebl. 12:2, 3.

9. Awǒvinú tɛ́ wú mɛ e ko bló batɛ́mu lɛ́ é ka ɖó ná cɔ́ yěɖée dó?

⁹ É byɔ́ ɖɔ mɛ e ko bló batɛ́mu lɛ́ é ní nɔ acéjí dó awǒvinú ɖé wú. Ényí hwenu ɖo yiyi wɛ ɔ, mǐ sixú jɛ gbɛxixɔ ɔ sɔ́ dó mɔ nǔ e sín acɛ mǐ ɖó é jí. Nɛ̌ nǔ ka sixú nyí mɔ̌ gbɔn? Lin tamɛ dó klisánwun xwe kanweko nukɔntɔn ɔ tɔn e ɖo agun Efɛ́zi tɔn mɛ lɛ́ é jí. Jezu kpa yě ɖó didɛ yětɔn wú. Amɔ̌, é ɖɔ nú agun ɔ ɖɔ: “Nǔ towe e vɛ́ wǔ ce é ɖíe: a sɔ́ ɖó wǎnyíyí e a ɖó ɖo bǐbɛ́mɛ é ǎ.” (Nǔɖe. 2:3, 4) Lěe xó Jezu tɔn lɛ́ xlɛ́ gbɔn é ɔ, kpɛɖé kpɛɖé ɔ, klisánwun ɖé sixú wá jɛ Mawu sɛn jí mɔ̌tɔn mɔ̌tɔn. Klisánwun énɛ́ sixú nɔ xo ɖɛ, nɔ yi kplé lɛ́, bo nɔ lɛ́ ɖ’alɔ ɖo sinsɛnzɔ́ ɔ mɛ, amɔ̌, é nɔ wa mɔ̌ kpowun, ɖó é ɖó ná wa mɔ̌ wútu wɛ. É sɔ́ nyí wǎnyíyí wɛ nɔ sísɛ́ ɛ b’ɛ nɔ wa mɔ̌ ǎ. Ényí a mɔ ɖɔ wǎnyíyí e émí ɖó nú Jexóva é ɖe kpo ɔ, étɛ́ a ka sixú wa?

10. Nɛ̌ a ka sixú wa nǔ sɔgbe xá wě e Pɔ́lu ɖe xá Timɔtée é gbɔn? (1 Timɔtée 4:13, 15)

¹⁰ Mɛsɛ́dó Pɔ́lu ɖe wě xá Timɔtée ɖɔ é ní nɔ lin tamɛ dó sinsɛnzɔ́ e wa nú Jexóva wɛ é ɖe é jí hwebǐnu, bo nɔ lɛ́ sɛn ɛ lěe é kpé wú gbɔn é bǐ hwebǐnu. (Xa 1 Timɔtée 4:13, 15.) Hwi lɔ sixú lin tamɛ dó nǔ e a sixú wa bɔ akpakpa ná kpo ɖo sísɔ́ we dó Jexóva sinsɛn wú wɛ é jí. (Hlɔ̌. 12:11) Ði kpɔ́ndéwú ɔ, a sixú dó hwenu hwenu e a nɔ zán dó sɔ́ nǔ nú kplé lɛ́ é jí, énɛ́ ná d’alɔ we bɔ a ná nɔ ɖ’ayi te hú gǎn ɖo kplé lɛ́ jí. Ényí a ja Biblu kplɔ́n gbé ɔ, a hɛn ɔ a ná nɔ yi fí e ɖo tóó bɔ a ná nɔ hwiɖokpó ɖe é, énɛ́ ɔ, é ná bɔ wǔ nú we hú gǎn bɔ a ná lin tamɛ dó nǔ e kplɔ́n wɛ a ɖe é jí; énɛ́ ná lɛ́vɔ́ d’alɔ we bɔ a ná ɖu le nǔ e kplɔ́n wɛ a ɖe é tɔn hú gǎn. È fɔ nakí dó myɔ mɛ ɔ, é nɔ zɔ́n bɔ myɔ ɔ nɔ kpo ɖo jiji wɛ, mɔ̌ ɖokpó ɔ, azɔ̌ wiwa ɖo hwiɖée wú ɖo akpá énɛ́ lɛ́ xwé sixú zɔ́n bɔ nǔ e Jexóva wa nú we lɛ́ é bǐ, káká jɛ gbɛxixɔ ɔ jí ná kpo ɖo nukún towe mɛ su wɛ. Gɔ́ ná ɔ, ɖo aklúnɔzángbla ɖěɖěe jɛ nukɔn nú kú Klísu tɔn flínflín ɔ lɛ́ é mɛ ɔ, a hɛn ɔ, a ná lin tamɛ dó nyɔ̌ná ɖěɖěe sín vǐví mǐ mɛ Kúnnuɖetɔ́ Jexóva tɔn lɛ́ nɔ ɖu b’ɛ ma kpé we ǎ lɛ́ é jí. É ɖo wɛn ɖɔ, énɛ́ ná d’alɔ we bɔ gbɛxixɔ ɔ ná su nukún towe mɛ; gbɛxixɔ ɔ wɛ zɔ́n bɔ hwi kpó Jexóva kpó vɛ́.

11-12. Ényí akpakpa gɔn sísɔ́ we nú hwenu ɖé ɔ, xlɛ́xlɛ́ wɛ énɛ́ ka ɖe ɖɔ gbigbɔ Mawu tɔn kún sɔ́ ɖo ali xlɛ́ we wɛ ó a? Tínmɛ. (Kpɔ́n ɖiɖe ɔ lɔmɔ̌.)

¹¹ Nú hwenu ɖé ɔ, nú a mɔ ɖɔ akpakpa kún sɔ́ nɔ sɔ́ émí dó mawusinsɛn nǔgbó ɔ wú lěe émí ba gbɔn é ó hǔn, ma nú awakanmɛ kú we ó, ma ka lɛ́ lin ɖɔ gbigbɔ Mawu tɔn kún sɔ́ ɖo ali xlɛ́ émí wɛ ó wɛ zɔ́n ó. Flín nǔ élɔ́ e mɛsɛ́dó Pɔ́lu wlán sɛ́dó Kɔlɛ́ntinu lɛ́ dó sinsɛnzɔ́ tɔn wú é: “Ényí é ná bo ma tlɛ jló mì cóbónú un jlá ǎ ɔ, azɔ̌ wɛ é ka nyí bɔ è zɔ́n mì.” (1 Kɔ. 9:17) Étɛ́ ɖɔ gbé é ka ja?

¹² Mawuxóɖiɖɔ nɔ jló Pɔ́lu hwebǐnu ǎ. É ɖo mɔ̌ có, é kán ɖ’é jí bo ɖó kan dó nǔ wú ɖo sinsɛnzɔ́ tɔn mɛ ɖo hwe mɔ̌hun lɛ́ nu. Hwi lɔ sixú kán ɖ’é jí bá wa nǔ ɖokpó ɔ. Akpakpa ná bo ma tlɛ sɔ́ we ǎ hǔn, kán ɖ’é jí bá wa nǔ e sɔgbe é. Énɛ́ wú ɔ, xo ɖɛ bá ɖó ‘jlǒ kpó hlɔ̌nhlɔ́n kpó bá wa nǔ.’ (Filí. 2:13) Kpo ɖo nǔ e a nɔ wa dó sɛn Mawu lɛ́ é wa wɛ kpó kanɖódónǔwú kpó. Ényí a wa mɔ̌ ɔ, a sixú ɖeji ɖɔ hwenu ɖé gúdo ɔ, wǎnyíyí e a ɖó nú Jexóva é ná lɛ́ syɛ́n.

13. Nɛ̌ mǐ ka sixú ɖo kpínkpɔ́n wɛ ɖɔ mǐ “ɖo nǔɖiɖi ɔ mɛ” a jí gbɔn?

¹³ Sín hweɖénu jɛ hweɖénu ɔ, é ná nyɔ́ ɖɔ mǐ ní nɔ lin tamɛ dó lěe zán gbɛ gbɔn wɛ mǐ ɖe é wú, lěe Pɔ́lu ɖɔ gbɔn ɖo 2 Kɔlɛ́ntinu lɛ́ 13:5 mɛ é; fínɛ́ ɖɔ: “Mi ní nɔ ɖo kpínkpɔ́n wɛ ɖɔ émí ka ɖo nǔɖiɖi ɔ mɛ a jí; mi ní nɔ ɖo nǔ e miɖésúnɔ nyí é gbéjé kpɔ́n wɛ.” Nǔ lěhun lɛ́ wɛ mǐ sixú nɔ kanbyɔ́ mǐɖée sín hweɖénu jɛ hweɖénu dó gbéjé mǐɖée kpɔ́n: ‘Un ka ɖo nǔ Axɔ́súɖuto ɔ tɔn lɛ́ sɔ́ ɖó tɛn nukɔntɔn ɔ mɛ wɛ ɖo gbɛzán ce mɛ a?’ (Mat. 6:33) ‘Nǔ e un nɔ sɔ́ dó ɖe ayi ɖ’ayi ná lɛ́ é ka nɔ xlɛ́ ɖɔ un gbɛ́ wǎn nú nǔnyanyawiwa a?’ (Ðɛh. 97:10) ‘Un ka nɔ jɛ hun dó fífá kpó bǔninɔ kpó e ɖo nɔví lɛ́ tɛ́ntin é jí a?’ (Efɛ́. 4:2, 3) Hwenu ɖagbe ɖé wɛ kú Klísu tɔn flínflín sín táan nyí, bónú mǐ ná gbéjé mǐɖée kpɔ́n, bá kpɔ́n ɖɔ Klísu wɛ mǐ ɖo gbɛ ná a jí, alǒ mǐɖésúnɔ.c

MƐ E JƐ ZƆ NÚ AGUN Ɔ LƐ́ É

14. Étɛ́ lɛ́ ka sixú zɔ́n bɔ klisánwun ɖé lɛ́ jɛ zɔ nú agun ɔ?

¹⁴ Mɛ e kpó mǐ kpó ko sɛn Jexóva kpó gbejíninɔ kpó nú xwe ɖé lɛ́ é ɖé lɛ́ wá ɖó Jexóva sinsɛn te. Aniwú? “Adohu adohu gbɛ ɔ tɔn” wɛ ɖí bú mɛɖé lɛ́. (Luk. 21:34) Xó e nɔví ɖé ɖɔ é, alǒ nǔ e nɔví ɖé wa é wɛ nyí afɔklɛ́nnú nú mɛ ɖěvo lɛ́. (Ja. 3:2) Mɛɖé lɛ́ ka tíin bɔ hwɛ syɛ́nsyɛ́n wɛ yě hu, bo ka dán lɛjɛlɛjɛ dó alɔdó byɔ́byɔ́ wú. É ná bo nyí nǔ ɖěbǔ wú wɛ é sín bɔ a jó agun ɔ dó ɔ, étɛ́ a ka sixú wa? Étɛ́ gbɛxixɔ e nyí tuto wǎnyíyínɔ ɖé bɔ Jexóva bló é ka sixú sísɛ́ we bɔ a ná wa?

15. Nɛ̌ Jexóva ka nɔ xlɛ́ ɖɔ mɛ e jó agun ɔ dó lɛ́ é sín nǔ nɔ ɖu ayi mɛ nú émí gbɔn? (Ezekiyɛ́li 34:11, 12, 16)

¹⁵ Lin tamɛ dó lěe nǔ nɔ cí nú Jexóva dó mɛ ɖěɖěe jɛ zɔ nú agun ɔ lɛ́ é wú é wú. É wɔn ya nú yě ǎ. É nyɔ́ wa ɔ, é nɔ ba lɛ̌ngbɔ́ ɖěɖěe bú lɛ́ é mɔ, nɔ ná nǔɖuɖu yě, bo nɔ d’alɔ yě bónú yě ní lɛ́ kɔ wá gɔ̌n tɔn. (Xa Ezekiyɛ́li 34:11, 12, 16.) Jexóva ka ɖo nǔ ɖokpó ɔ bló nú hwi lɔ wɛ a? Ganjí! Xóta élɔ́ e gbéjé kpɔ́n wɛ a ɖe é xlɛ́ ɖɔ a kpo ɖo biba ná wa nǔ e sɔgbe é wɛ. É mɔ nǔ e ɖo ayi towe mɛ é, bo dɔn we wá nǔgbó ɔ mɛ; é lɛ́ kpo ɖo jijɔ ɖagbe towe lɛ́ wú ɖ’ayi wɛ, bo ba ɖɔ a ní lɛ́ lɛ́ kɔ wá agun ɔ mɛ.

16. Étɛ́ ka sixú d’alɔ mɛ ɖěɖěe jɛ zɔ nú agun ɔ lɛ́ é bɔ yě ná lɛ́ kɔ wá Jexóva gɔ́n? (Kpɔ́n ɖiɖe ɔ lɔmɔ̌.)

¹⁶ Wǔsyɛ́n dó lanmɛ nú mɛ xó élɔ́ lɛ́ ɖo alɔnuwéma Lɛ̌ kɔ wá Jexóva gɔ́n mɛ: “Ðǒ gǎnjɛwú ɖɔ ényí a lɛ́ kɔ wá Jexóva gɔ́n ɔ, é ná nɔ kpɔ́ xá we. É ná d’alɔ we bɔ a ná ɖí xwi xá linkpɔ́n, ɖu ɖo akpɔ mimɔ jí, bo ná mɔ fífá ayi mɛ tɔn e ayixa mímɛ́ ɖé ɖíɖó nɔ ná mɛ é. Énɛ́ ɔ, a ná lɛ́ ɖó jlǒ bo ná sɛn Jexóva ɖó kpɔ́ xá mɛsɛntɔ́ tɔn hǎtɔ́ lɛ́.” Lɛ̌ flín ɖɔ mɛxó agun tɔn lɛ́ nɔ ba vɛ́návɛ́ná bo ná d’alɔ we. Yě ná “cí fí e è nɔ hɔn hwlá cí bo nɔ gló jɔhɔn é ɖɔhun, yě ná cí fí e è nɔ bɛ sin ɖe ɖo jǐ syɛ́nsyɛ́n mɛ é ɖɔhun” nú we. (Eza. 32:2) Bo ná dó ɖe xlɛ́ ɖɔ gbɛxixɔ ɔ su nukún towe mɛ hǔn, kan nǔ élɔ́ byɔ́ hwiɖée: ‘Afɔ tɛ́ lɛ́ un ka sixú ɖe din bɔ nyi kpó Jexóva kpó “ná ɖe ɖɛ nǔ lɛ́ ɖo mǐɖée lɛ́ tɛ́ntin”?’ (Eza. 1:18; 1 Pi. 2:25) Ði kpɔ́ndéwú ɔ, a sixú wá gbeta ɔ kɔn bo ná yi kplé ɖo kpléxɔ Axɔ́súɖuto ɔ tɔn mɛ. A sixú ɖɔ xó xá mɛxó agun tɔn ɖé, bo ɖɔ n’i ɖɔ émí ba ɖɔ è ní d’alɔ émí bónú émí ní lɛ́ kɔ wá Jexóva gɔ́n. É sixú bló tuto bɔ mɛɖé ná kplɔ́n Biblu xá we nú hwenu ɖé. Kú d’é jí ɖɔ Jexóva ná kɔn nyɔ̌ná dó jǐ we, ɖó gǎn e dó wɛ a ɖe bo ná lɛ́ kɔ wá gɔ̌n tɔn, bo lɛ́ ɖe xlɛ́ ɖɔ gbɛxixɔ ɔ su nukún émítɔn mɛ lɛ́ é bǐ wú.

ÉTƐ́ A KA NÁ WA?

17-18. Nɛ̌ mǐ ka sixú zán hwenu mǐtɔn kpó nǔnywɛ́ kpó jɛ nukɔn nú kú Klísu tɔn flínflín xwe élɔ́ mɛ tɔn gbɔn?

¹⁷ Jezu ɖɔ ɖɔ è sɔ́ nǔ nú gbɛxixɔ ɔ “bónú mɛ ɖěbǔ e ná ɖe xlɛ́ ɖɔ émí ɖi nǔ [nú émí] é ní ma dɔn ó, loɔ, é ní mɔ gbɛ mavɔmavɔ.” (Jaan 3:16) Nǔgbó ɔ, gbɛxixɔ ɔ gblamɛ wɛ Jexóva gbɔn bo hwlɛ́n mǐ sín nǔ e hwɛhuhu kpó kú kpó wa dó mǐ wú lɛ́ é mɛ. Mǐ mɛ ɖěbǔ ɖó ná lin ɖɔ mǐ jɛxá ǎ. (Hlɔ̌. 3:23, 24; 2 Kɔ. 6:1) Azǎn ɖěɖěe jɛ nukɔn nú kú Klísu tɔn flínflín ɔ lɛ́ é hun ali nú mǐ bónú mǐ ná lin tamɛ dó wǎnyíyí e Jexóva kpó Jezu kpó ɖe xlɛ́ mǐ é jí; wǎnyíyí énɛ́ ɖó ná sísɛ́ mǐ bɔ mǐ ná ɖe nǔsumɛnukúnmɛ xlɛ́.

¹⁸ Étɛ́ gbɛxixɔ ɔ ka ná sísɛ́ we bɔ a ná wa? Nǔ e a ná wa é sixú gbɔn vo nú nǔ e mɛ ɖěvo ná wa é. Amɔ̌, kú d’é jí ɖɔ, Jexóva ná kɔn nyɔ̌ná dó gǎn ɖěɖěe a ná dó bo ná xo kpóɖó nú mawusɛntɔ́ lǐvi mɔ̌kpán e ma sɔ́ nɔ ‘nɔ gbɛ nú yěɖésúnɔ ɖě ǎ, loɔ, nɔ nɔ gbɛ nú éyɛ́ mɛ e kú dó yě tamɛ’ lɛ́ é jí.—2 Kɔ. 5:15.