Nɔ kplɔ́n nǔgbó ɔ mɛ kpó xomɛnyínyɔ́ kpó

1. Étɛ́ mǐ ka ɖó ná wa bo ná nɔ xwédo Jexóva tɔn mɛ?

ÉNYÍ mǐ xo go nǔɖitɔ́ hǎtɔ́ mǐtɔn ɖé azɔn nukɔntɔn ɔ, nǔ e mǐ nɔ yá wǔ kanbyɔ́ mǐɖée lɛ́ é ɖokpó wɛ nyí: “Nɛ̌ a ka mɔ nǔgbó ɔ gbɔn?” Mɛɖé lɛ́ nɔ ná xósin nú nǔkanbyɔ́ énɛ́ gbɔn lě: “Nǔgbó ɔ mɛ wɛ è ji mì dó.” Mɛ ɖěvo lɛ́ sixú ɖɔ ɖɔ agaɖanu din jɛ́n émí “mɔ nǔgbó ɔ.” Mǐ nɔ ná xósin gbɔn mɔ̌, ɖó nǔgbó e ɖo Xó Mawu tɔn mɛ é nɔ xlɛ́ ali lěe mǐ nɔ zán gbɛ gbɔn é wútu. Bɔ aniwú mǐ ka nɔ jó nǔgbó e ɖo Xó Mawu tɔn mɛ lɛ́ é dó bɔ yě nɔ xlɛ́ ali gbɛzán mǐtɔn? Ðó mǐ tuun ɖɔ cóbónú mǐ ná nɔ xwédo Jexóva tɔn mɛ ɔ, xlɛ́ jɛ́n mǐ ná to xlɛ́ hwɛ̌ ɖɔ mǐ yí wǎn nú nǔgbó ɔ, bo nɔ lɛ́ zán gbɛ sɔgbe xá. Ali e nu mǐ sixú wa mɔ̌ ɖe é ɖokpó wɛ nyí ɖɔ mǐ ná nɔ ɖɔ nǔgbó ɖo nǔ e mǐ nɔ ɖɔ lɛ́ é kpó nǔ e mǐ nɔ wa lɛ́ é kpó mɛ.—Ðɛh. 15:1-3.

2. (a) Gbɛtɔ́ alɔkpa tɛ́ Jezu ka nyí bɔ mɛ lɛ́ tuun? (b) Nɛ̌ mɛ lɛ́ ka ná yí nǔgbó ɖěɖěe Jezu kplɔ́n mɛ dó Mawu wú lɛ́ é gbɔn?

² Hwebǐnu wɛ Jezu nɔ ɖɔ nǔgbó. Kɛntɔ́ tɔn lɛ́ tuun ɖɔ ényí émí ná bo ma tlɛ yí wǎn nú nǔ e é nɔ ɖɔ lɛ́ é hwebǐnu ǎ ɔ, é nɔ sín mɔ̌ wú bónú é nɔ gɔn nǔgbó ɖɔ ǎ. (Mat. 22:16) Jezu ɖɔ lěe mɛ lɛ́ ná wa nǔ gbɔn dó nǔ e kplɔ́n mɛ wɛ é ɖe lɛ́ é wú é nú ahwanvú tɔn lɛ́. É ɖɔ: “Kínklán dɔn wá gbé wɛ un tɔ́n bo wá, bɔ vǐ súnnu ná sí te dó tɔ́ tɔn jí, vǐ nyɔ̌nu ná sí te dó nɔ tɔn jí, lobɔ vǐsi ná sí te dó asú tɔn nɔ jí.” (Mat. 10:35) Jezu ba ɖɔ mɛ lɛ́ ní gbɛ́ wɛn e é kpó ahwanvú tɔn lɛ́ kpó ɖo jlǎjlá wɛ é ǎ, amɔ̌, é tuun ɖɔ nǔ mɔ̌hun sixú jɛ. (Mat. 23:37) É tuun ɖɔ wɛn émítɔn ná klán gbɛ ɔ, tínmɛ énɛ́ tɔn wɛ nyí ɖɔ mɛɖé lɛ́ ná yí wǎn nú nǔgbó Biblu tɔn lɛ́, bɔ mɛ ɖěvo lɛ́ ka ná gbɛ́ wǎn ná.—2 Tɛ. 2:9-11.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Jezu ɖɔhun ɔ, mǐ nɔ dó gǎn bo nɔ ɖɔ nǔgbó hwebǐnu, ényí mɛ lɛ́ ná bo ma tlɛ nɔ ba ǎ ɔ nɛ́. Gɔ́ ná ɔ, mǐ nɔ jlá wɛn ɔ, bo nɔ lɛ́ kplɔ́n nǔgbó Biblu tɔn lɛ́ mɛ lɛ́, ényí nǔ e ɖɔ wɛ mǐ ɖe é ná bo tlɛ ná dó xomɛsin nú mɛɖé lɛ́ ɔ nɛ́. Xlɛ́xlɛ́ wɛ énɛ́ ka ɖe ɖɔ mǐ kún ɖó ná nɔ ɖ’ayi te dó lěe mǐ ná nɔ má nǔgbó Biblu tɔn lɛ́ xá mɛ lɛ́ gbɔn é kpó hwenu e mǐ ná nɔ wa mɔ̌ dó é kpó wú ó a? Cɛ́nnyícɛ́nnyí ɖé lɔ ǎ! Ðo xóta élɔ́ mɛ ɔ, mǐ ná to ba xósin nú nǔkanbyɔ́ élɔ́ hwɛ̌: Fítɛ́ mǐ ka sixú mɔ nǔgbó ɔ ɖe? Énɛ́ gúdo ɔ, mǐ ná ná xósin nú nǔkanbyɔ́ élɔ́ lɛ́ e cá kan xá nǔkanbyɔ́ énɛ́ é: Aniwú mǐ ka ɖó ná nɔ má nǔgbó e ɖo Biblu mɛ é xá mɛ ɖěvo lɛ́? Nɛ̌ mǐ ka ɖó ná nɔ wa mɔ̌ gbɔn? Hwetɛ́nu? Xósin nǔkanbyɔ́ énɛ́ lɛ́ tɔn ná d’alɔ mǐ bɔ mǐ ná lɛ́ nyɔ́ nǔgbó ɔ jlá kpó yɛ̌yi kpó ganjí b’ɛ ná lɛ́ jɛ gan hú gǎn.

FÍTƐ́ MǏ KA SIXÚ MƆ NǓGBÓ Ɔ ÐE?

4. Étɛ́wú mǐ ka sixú ɖɔ ɖɔ Jexóva nyí Jɔtɛn nǔgbó ɔ tɔn?

⁴ Jexóva wɛ nyí Jɔtɛn nǔgbó ɔ tɔn. Nǔ e é nɔ ɖɔ lɛ́ é bǐ wɛ nɔ nyí nǔgbó. Ði kpɔ́ndéwú ɔ, nǔgbó wɛ nyí nǔ e é ɖɔ nú mǐ dó nǔ ɖagbe kpó nǔ nyanya kpó wú é. (Ðɛh. 19:9; 119:142, 151) Nǔ e é nɔ ɖɔ dó sɔgúdo wú lɛ́ é bǐ wɛ nɔ jɛnu. (Eza. 55:10, 11) É dó akpá ɖé bo gɔn ɖiɖe gbeɖé ǎ. (Kɛ́n. 23:19) Énɛ́ wú ɔ, adingban gló Jexóva! (Ebl. 6:18) Yǎyá wú wɛ Biblu ylɔ́ Jexóva ɖɔ “Mawu gbejínɔtɔ́,” alǒ Mawu nǔgbóɖɔtɔ́ ǎ.—Ðɛh. 31:6.

5. Étɛ́wú Mawu nǔgbóɖɔtɔ́ ɔ biba mɔ ma ka vɛ́ wǔ ǎ? Tínmɛ. (Mɛsɛ́dó 17:27)

⁵ Mɛɖé lɛ́ nɔ ɖɔ ɖɔ Jexóva Mawu nǔgbóɖɔtɔ́ ɔ biba mɔ vɛ́ wǔ. Nǔvú séé ka wɛ. Nǔ e lɛ́ lɛ̌ dó mǐ lɛ́ é xlɛ́ ɖɔ é tíin. (Hlɔ̌. 1:20) Hwenu e mɛsɛ́dó Pɔ́lu ɖo xó ɖɔ nú akɔwé Glɛ̌ki tɔn lɛ́ sín gbɛ̌ta ɖé wɛ ɖo Atɛ́ni é ɔ, é ɖɔ ɖɔ Mawu ba ɖɔ mǐ ní ‘mɔ émí,’ é kún ka “lín dó ɖokpó ɖokpó mǐtɔn [ó].” (Xa Mɛsɛ́dó 17:27.) È ná ɖɔ xójɔxó ɔ, Jexóva nɔ dɔn mɛɖéesɔ́hwetɔ́ ɖěɖěe ɖo nǔgbó ɔ ba wɛ lɛ́ é.—Jaan 6:44.

6. Ðɔ nǔgbó e ɖo Biblu mɛ é ɖé lɛ́. Aniwú nǔgbó énɛ́ lɛ́ tuuntuun ka nɔ su nukún towe mɛ?

⁶ Ali e nu mǐ sixú mɔ Jexóva ɖe é ɖokpó wɛ nyí gbɔn Biblu kplɔ́nkplɔ́n gblamɛ. Gbigbɔ mímɛ́ Mawu tɔn wɛ sɔ́ nǔ ɖěɖěe ɖo wěma énɛ́ mɛ lɛ́ é d’ayi mɛ nú mɛ lɛ́ bɔ yě wlán. (2 Pi. 1:20, 21) Hǔn, nǔ e ɖo Biblu ɔ mɛ lɛ́ é bǐ wɛ nyí nǔgbó bɔ mǐ sixú ɖeji dó yě wú. Ði kpɔ́ndéwú ɔ, nǔ e é ɖɔ dó lěe è dá wɛ̌kɛ́ ɔ kpó nǔɖogbɛ e ɖo ayǐkúngban ɔ jí lɛ́ é kpó gbɔn é wú é ɔ, mǐ sixú ɖeji d’é wú. (Bǐb. 1:1, 26) Nǔ e é ɖɔ dó nǔ e wú mǐ mɛ bǐ nyí hwɛhutɔ́ é wú é kpó nǔ e wú wǔvɛ́ mimɔ kpó kú kpó sukpɔ́ sɔmɔ̌ é kpó wú é ɔ, mǐ hɛn ɔ mǐ ná ɖeji d’é wú. (Hlɔ̌. 5:12; 6:23) Mǐ hɛn ɔ mǐ ná ɖeji dó ɖɔ e é ɖɔ ɖɔ Jexóva ná gbɔn Vǐ súnnu tɔn jí, bo ná vɔ́ nǔ e Satáan, éé “dó adingban wá” é hɛn gblé lɛ́ é bǐ jlá ɖó é wú mlɛ́mlɛ́. (Jaan 8:44; Hlɔ̌. 16:20) Gɔ́ ná ɔ, mǐ hɛn ɔ mǐ ná ɖeji dó akpá e Biblu dó ɖɔ Jezu ná sú mɛ nyanya ɔ sín kún dó, fɔ́n mɛ lɛ́ sín kú, vɔ́ ayǐkúngban ɔ jlá ɖó, lobo d’alɔ mǐ bɔ mǐ ná húzú mɛ maɖóblɔ̌ é wú. (Jaan 11:25, 26; 1 Jaan 3:8) Ali jí wǔ ɖé wɛ nyí énɛ́ bɔ Jexóva hun nú mǐ! É kplɔ́n nǔgbó ɔ mǐ, bo hun ali nú mǐ bónú mǐ ná kplɔ́n mɛ ɖěvo lɛ́.—Mat. 28:19, 20.

NǓ E WÚ MǏ NƆ MÁ NǓGBÓ Ɔ XÁ MƐ ÐĚVO LƐ́ É

7-8. Nǔ e nɔ sísɛ́ mǐ bɔ mǐ nɔ jlá nǔgbó ɔ mɛ ɖěvo lɛ́ é ka ɖo tají wɛ a? Nǎ kpɔ́ndéwú ɖé. (Maki 3:11, 12) (Kpɔ́n ɖiɖe lɛ́ lɔmɔ̌.)

⁷ Lěe mǐ ko ɖɔ gbɔn wá yi é ɔ, ényí mǐ ba bo ná nɔ xwédo Jexóva tɔn mɛ ɔ, mǐ ɖó ná nɔ ɖɔ nǔgbó. Amɔ̌, ényí nǔ mǐtɔn ná nyɔ́ nukún tɔn mɛ ɔ, mǐ ɖó ná wa nǔ hú nǔgbóɖiɖɔ kpowun. Hwɛjijɔ e wú mǐ nɔ jlá nǔgbó ɔ é ɖo tají nú Jexóva. Ð’ayi nǔ e jɛ ɖo sinsɛnzɔ́ ayǐkúngban jí tɔn Jezu tɔn hwenu é wú. (Xa Maki 3:11, 12.) Hwenu e é ɖo wɛn ɖagbe ɔ jlá wɛ ɖo malínmálín dó Galilée xu ɔ é ɔ, ahwan ɖaxó ɖé wá lɛ́ lɛ̌ dó è. Mɛɖé lɛ́ ɖo ahwan ɔ mɛ bɔ awǒvi ɖo yě jí, bɔ yě wá jɛ kpoli ɖo Jezu nukɔn bo sú xó ɖɔ: “Hwi wɛ nyí Vǐ Mawu tɔn ɔ.” Hwɛjijɔ tɛ́ wú awǒvi lɛ́ ka ɖɔ nǔgbó ɔ dó Jezu wú? É sixú nyí ɖɔ yě ba ɖɔ mɛ e ɖo tó ɖó émí wɛ lɛ́ é ní ɖeji dó émí wú, énɛ́ ka sixú zɔ́n bɔ yě ná ɖó Jexóva sinsɛn te. Nǔ e awǒvi lɛ́ ɖɔ é ɔ, nǔgbó wɛ, amɔ̌, cejɛ́nnábí wɛ sísɛ́ yě. Jezu tuun mɔ̌, énɛ́ wú ɔ, é nyɔ́ nukún tɔn mɛ ǎ. Nǔ e wú é ɖe gbe nú awǒvi lɛ́ ɖɔ yě ní ma sɔ́ ɖe kúnnu dó émí wú ɖě ó é nɛ́.

⁸ Nǔ tɛ́ tan élɔ́ ka sixú kplɔ́n mǐ? Nǔ e nɔ sísɛ́ mǐ bɔ mǐ nɔ jlá nǔgbó ɔ mɛ ɖěvo lɛ́ é ɖo tají nú Jexóva. Énɛ́ wú ɔ, é ɖo tají tawun ɖɔ mǐ ní kplɔ́n nǔgbó ɔ mɛ ɖěvo lɛ́ dó Jexóva wú, ɖó mǐ yí wǎn nú Jexóva wútu, bɔ ényí mɛ ɖěvo lɛ́ tɛ́n kpɔ́n bá xɔ susu nú mǐ ɖó wɛn e mǐ jlá é wú ɔ, mǐ nɔ dɔn ayi yětɔn yi Jexóva jí!—Mat. 5:16; sɔ́ jlɛ́ dó Mɛsɛ́dó 14:12-15 wú.

9. Étɛ́ mǐ ma ka ɖó ná nɔ wa ǎ? Aniwú?

⁹ Lin tamɛ dó ninɔmɛ ɖěvo e mɛ mǐ ɖó ná nyi alɔ nú susu mǐɖésúnɔ tɔn biba ɖe é jí. Mǐ ní ɖɔ ɖɔ nɔví agbanɖotanánɔ ɖé ɖɔ kpáxó ɖé lɛ́ nú we bɔ a yi ɖɔ nú mɛ ɖěvo lɛ́. Ényí mɛ e mǐ ɖɔ xó ɔ ná lɛ́ é wá mɔ nǔ jɛ wú ɖo nukɔnmɛ ɖɔ nǔgbó wɛ nyí xó e mǐ ɖɔ é ɔ, é sixú jí wǔ nú yě, bɔ yě ná mɔ ɖɔ kpáxó kún nɔ hán ɖo gɔ̌n mǐtɔn ó. Énɛ́ sixú zɔ́n bɔ mɛ lɛ́ ná nɔ ké ya nú mǐ zɛ xwé wú, bɔ énɛ́ ka ná nyɔ́ Mawu nukúnmɛ ǎ. (Nǔx. 11:13) Aniwú? Ðó nǔgbó wɛ ɖɔ nǔ e mǐ ɖɔ é sɔgbe, amɔ̌, mǐ ɖó acɛ e ná ɖɔ xó ɔ nú mɛ ɖěvo é ǎ, bɔ linlin e wú mǐ ɖɔ é lɛ́ nyí linlin masɔgbe.

LĚE MǏ ÐÓ NÁ NƆ MÁ NǓGBÓ E ÐO BIBLU MƐ É XÁ MƐ ÐĚVO LƐ́ GBƆN É

10. Étɛ́ ka nyí tínmɛ xó e “nyɔ́ se” é tɔn? (Kolósinu lɛ́ 4:6)

¹⁰ Xa Kolósinu lɛ́ 4:6. Mɛsɛ́dó Pɔ́lu flín klisánwun e ɖo Kolósi lɛ́ é ɖɔ xó yětɔn lɛ́ ɖó ná “nɔ nyɔ́ se hwebǐnu.” Étɛ́ ka nyí tínmɛ énɛ́ tɔn? Xógbe e è zán ɖo gbe dodó ɔ mɛ é xlɛ́ ɖɔ é kún nyí ɖagbe kɛ́ɖɛ́ wɛ xó mǐtɔn ɖó ná wa nú sisetɔ́ ó, loɔ, é ɖó ná lɛ́ nyí xó e è ɖɔ kpó xomɛnyínyɔ́ kpó b’ɛ lɛ́ dɔn mɛ é.

11-12. Étɛ́wú mǐ ka ɖó ná kú hǔn dó kplɔ́n nǔgbó ɔ mɛ? Nǎ kpɔ́ndéwú ɖokpó. (Kpɔ́n ɖiɖe lɛ́ lɔmɔ̌.)

¹¹ Ényí mǐ ɖo nǔgbó e ɖo Biblu mɛ é kplɔ́n mɛ ɖěvo lɛ́ wɛ ɔ, mǐ ɖó ná zán wě e Pɔ́lu ɖe xá mǐ é bo ná bló bɔ xó mǐtɔn ná nyɔ́ se. Biblu ɖésú tlɛ jlɛ́ nǔgbó e ɖo Xó Mawu tɔn mɛ lɛ́ é dó jivǐ ɖíɖá, éé sixú má lǐndɔ̌n kpó gbigbɔ kpó ɖó vovo é ɖé wú. Ðo xógbe ɖěvo mɛ ɔ, é sixú ɖe lěe nǔ cí nú mǐ ɖo ayi gɔngɔn mǐtɔn mɛ é kpó nǔ e nɔ sísɛ́ mǐ bɔ mǐ nɔ wa nǔ lɛ́ é kpó xlɛ́. (Ebl. 4:12) Amɔ̌, ényí mǐ ma nɔ zán Biblu ɔ kpó azɔ̌tuuntuun kpó ǎ ɔ, mǐ sixú dó xomɛsin nú mɛ ɖěvo lɛ́, alǒ dɔn nǔ xá yě. Nɛ̌ nǔ mɔ̌hun ka sixú jɛ gbɔn?

¹² Dǒ nukún nǔ élɔ́ mɛ kpɔ́n. Ðo sinsɛnzɔ́ ɔ mɛ ɔ, a xo go nya ayijlɔ́jlɔ́nɔ e nɔ zán ɖiɖe lɛ́ dó xo ɖɛ sɛ́dó Mawu é ɖé bɔ é kpódó xwédo tɔn kpó nɔ ɖu Natáaxwe kpó Paskwa kpó. Mǐ sixú zán Biblu dó xlɛ́ nya ɔ ɖɔ ɖiɖe lɛ́ zínzán dó xo ɖɛ sɛ́ dó Mawu ɔ xlonɔnú wɛ, bo lɛ́ ɖe xlɛ́ ɛ ɖɔ Natáaxwe kpó Paskwa kpó kún sɔgbe xá nǔkplɔ́nmɛ Biblu tɔn lɛ́ ó. (Eza. 44:14-20; 2 Kɔ. 6:14-17) Ényí mǐ wa mɔ̌ ɖo xóɖɔɖókpɔ́ nukɔntɔn ɔ hwenu ɔ, mǐ ná kplɔ́n ɛ nǔgbó ɔ, amɔ̌, é ná ɖe xlɛ́ ɖɔ mǐ kún zán Xó Mawu tɔn kpó azɔ̌tuuntuun kpó ó.

13. Nɛ̌ mǐ ka sixú bló bɔ jɛ ná nɔ kpé xó mǐtɔn lɛ́ gbɔn?

¹³ Pɔ́lu lɛ́ ɖɔ nú mɛ e ɖo tó ɖó è wɛ lɛ́ é ɖɔ yě ɖó ná bló bɔ jɛ ná nɔ kpé xó e yě nɔ ɖɔ lɛ́ é. É nyí ɖiɖɔ wɛ é ɖe ɖɔ mǐ ɖó ná tɛ́n kpɔ́n bá bló bɔ nǔgbó ɔ ná d’ablu ǎ, mɔ̌ jɛ́n é ma ka lɛ́ ɖo ɖiɖɔ wɛ ɖɔ mǐ ná zé hwlá ǎ é nɛ́. É nyɔ́ wa ɔ, byɔ̌byɔ́ mǐ wɛ é ɖe ɖɔ “jɛ ní nɔ kpé” xó e mǐ nɔ ɖɔ lɛ́ é, mɔ̌ mɛ ɔ, mǐ ná xwlé nǔgbó ɔ tóɖómǐtɔ́ lɛ́ ɖo ali ɖé nu bɔ é ná dɔn yě bɔ yě ná ɖu vǐví tɔn. (Jɔb. 12:11) Mɔ̌ wiwa ka sixú vɛ́ wǔ. Mǐ mɛ bǐ kpaa sixú lin ɖɔ nǔ e nyɔ́ ɖu nú mǐ é ná nyɔ́ ɖu nú mɛ ɖěvo lɛ́ lɔmɔ̌. Mɔ̌ ɖokpó ɔ, mǐ sixú lin ɖɔ lěe mǐ nɔ ɖɔ xó gbɔn é sixú dɔn mɛ lɛ́ bǐ. Amɔ̌, nǔ sixú gɔn mɔ̌ nyí. Ði kpɔ́ndéwú ɔ, mɛ e gosín xá ɖé lɛ́ mɛ lɛ́ é sixú nɔ ɖɔ linlin yětɔn tlɔlɔ, ényí yě ná bo tlɛ ɖo xó ɖɔ nú mɛ e hú xwe yě wɛ é ɔ nɛ́. Mɛ e gosín xá ɖěvo lɛ́ mɛ lɛ́ é sixú mɔ ɖɔ xó ɖiɖɔ gbɔn mɔ̌ ɔ, mɛmasí wɛ bɔ énɛ́ tlɛ sixú dó xomɛsin nú yě. Pɔ́lu ɖɔ ɖɔ mǐ ɖó ná tuun lěe mǐ “ɖó ná nɔ ná xósin mɛ ɖokpó ɖokpó gbɔn é.” Énɛ́ byɔ́ ɖɔ jɛ ɖó ná nɔ kpé xó mǐtɔn lɛ́, é ɖó ná nyí xó e nɔ nyɔ́ nukún mǐtɔn mɛ lɛ́ é, alǒ lěe è nɔ ɖɔ xó gbɔn ɖo xá mǐtɔn mɛ é ǎ, loɔ, nǔ e ná jɛmɛ nú tóɖómǐtɔ́ ɔ é.

HWENU E MǏ ÐÓ NÁ NƆ MÁ NǓGBÓ E ÐO BIBLU MƐ É XÁ MƐ ÐĚVO LƐ́ É

14. Hwenu e Jezu ɖo ayǐkúngban jí é ɔ, nǔ e é tuun lɛ́ é bǐ wɛ é kplɔ́n ahwanvú tɔn lɛ́ a? Tínmɛ.

¹⁴ Hwebǐnu wɛ Jezu nɔ ɖɔ xó e nɔ nyɔ́ se lɛ́ é nú ahwanvú tɔn lɛ́, bo lɛ́ kplɔ́n nǔ gěgé yě kpó xomɛnyínyɔ́ kpó. (Mak. 6:34) Amɔ̌, é lɛ́ kpo nǔ gěgé bɔ yě ná kplɔ́n. Jezu tɛ́n kpɔ́n bo kplɔ́n nǔ e é tuun lɛ́ é bǐ yě ǎ. É hɛn nǔwúkpíkpé yě mɛ ɖokpó ɖokpó tɔn ayi mɛ. É mɔ ɖɔ é kún nyí hwenu ɖagbe ɔ nɛ́ bónú émí ná kplɔ́n nǔgbó Biblu tɔn ɖé lɛ́ yě ó. Énɛ́ wú ɔ, é ɖɔ ɖɔ yě kún ná kpé wú bo mɔ nukúnnú jɛ nǔgbó énɛ́ lɛ́ mɛ ó. (Jaan 16:12) Étɛ́ énɛ́ ka kpɔ́n mǐ?

15. Nǔ e mǐ tuun lɛ́ é bǐ wɛ mǐ ná kplɔ́n Biblu kplɔ́ntɔ́ mǐtɔn lɛ́ zɛ̌ɛ́n a? Tínmɛ. (Nǔnywɛ́xó 25:11) (Kpɔ́n ɖiɖe ɔ lɔmɔ̌.)

¹⁵ Kpɔ́ndéwú Jezu tɔn xlɛ́ ɖɔ nǔgbó ɔ tuuntuun sín tínmɛ kún nyí ɖɔ è ní kplɔ́n nǔ e è tuun lɛ́ é bǐ mɛ hwaa ó. Nɛ̌ mǐ ka sixú xwedó kpɔ́ndéwú Jezu tɔn gbɔn? É byɔ́ ɖɔ mǐ ní nɔ lin tamɛ dó ninɔmɛ mɛ lɛ́ tɔn jí. Lɛ̌ lin tamɛ dó nya e nɔ ɖu Natáaxwe kpó Paskwa kpó xá xwédo tɔn é jí. Mǐ tuun ɖɔ xwe énɛ́ lɛ́ ɔ, mɛ e ma nɔ sɛn Mawu ǎ lɛ́ é gɔ́n wɛ é gosín, bɔ Mawu ka yí gbe nú yě ǎ. Amɔ̌, mǐ ní ɖɔ ɖɔ a bɛ́ Biblu kplɔ́nkplɔ́n xá nya ɔ aklúnɔzángbla ɖokpó, alǒ we jɛ nukɔn nú Natáaxwe. Ényí mǐ xlɛ́ ɛ nǔ e Biblu ɖɔ dó xwe énɛ́ lɛ́ wú é bo ɖó nukún ɖo así tɔn ɖɔ é ní ɖó Natáaxwe ɖuɖu te afɔjíafɔjí hǔn, xó e nyɔ́ se lɛ́ é ɖɔ wɛ jɛ́n mǐ ɖe nɛ́ a? Nǔgbó wɛ ɖɔ Biblu kplɔ́ntɔ́ ɖé lɛ́ sixú yá wǔ zán nǔ e yě kplɔ́n ɖo Biblu mɛ lɛ́ é bǐ. Amɔ̌, é sixú byɔ́ hwenu ɖo mɛ ɖěvo lɛ́ sí hú gǎn bónú yě ná húzú linlin yětɔn kpó nǔwalɔ yětɔn lɛ́ kpó. Ényí mǐ nɔ ɖɔ nǔ e Biblu kplɔ́ntɔ́ mǐtɔn lɛ́ ɖó ná tuun é nú yě ɖo hwenu e yě ɖó ná se dó é, énɛ́ wɛ nyí hwenu e yě ná kpé wú bo mɔ nukúnnú jɛ mɛ dó é ɔ, mǐ ná kpé wú bo d’alɔ yě bɔ yě ná yi nukɔn.—Xa Nǔnywɛ́xó 25:11.

16. Nɛ̌ mǐ ka sixú d’alɔ Biblu kplɔ́ntɔ́ mǐtɔn lɛ́ bɔ yě ná kpo ɖo ‘nǔgbó ɔ sín ali xwedó wɛ gbɔn’?

¹⁶ Nǔ e nɔ dó awǎjijɛ nú mǐ sɔ alɔ dídó mɛ lɛ́ bónú yě ná kplɔ́n nǔgbó ɔ dó Jexóva wú é kpítí ǎ. Ényí mǐ nɔ wa nǔ élɔ́ lɛ́ ɔ, mǐ sixú d’alɔ yě bɔ yě ná ‘xwedó nǔgbó ɔ sín ali’: Kpo ɖo kpɔ́ndéwú ɖagbe nyí nú yě wɛ. (3 Jaan 3, 4) Kpo ɖo xlɛ́xlɛ́ wɛ gbɔn lěe a nɔ zán gbɛ gbɔn é gblamɛ ɖɔ émí ɖi nǔ nú akpá ɖěɖěe ɖo Xó Mawu tɔn mɛ lɛ́ é. Linlin ɖagbe ní nɔ sísɛ́ we bónú a ní nɔ ɖɔ nǔgbó. Ényí a ɖo nǔgbó e ɖo Biblu mɛ é kplɔ́n mɛɖé wɛ hǔn, nɔ ɖɔ xó e nɔ nyɔ́ se lɛ́ é; nɔ ɖɔ kpó sísí kpó, kpó xomɛnyínyɔ́ kpó ɖo hwenu e jɛxá dó é. Gɔ́ ná ɔ, nɔ dɔn ayi mɛ lɛ́ tɔn yi Jexóva jí hweɖébǔnu e è kpa susu nú we é. Ényí a nɔ wa mɔ̌ ɔ, a ná xlɛ́ ɖɔ émí nɔ sɛn Jexóva, Mawu nǔgbóɖɔtɔ́ ɔ.