Nɔ ɖó sísí nú gbeta e kɔn mɛ ɖěvo lɛ́ nɔ wá é

1-2. Étɛ́wú gbeta e kɔn mǐ nɔ wá lɛ́ é ka nɔ gbɔn vo nú klisánwun ɖěvo lɛ́ tɔn hweɖélɛ́nu?

È KA ko dó hwɛ agɔ we ɖó gbeta e kɔn a wá é ɖé wú kpɔ́n a? A ka ko dó hwɛ nǔɖitɔ́ hǎtɔ́ ɖé, ɖó gbeta e kɔn éa wá é ɖé wú kpɔ́n a? Gěgé mǐtɔn sixú ɖɔ ɛɛn nú nǔkanbyɔ́ énɛ́ lɛ́.

² É ɖó ná kpácá mǐ ɖɔ hweɖélɛ́nu ɔ, gbeta e kɔn mǐ nɔ wá lɛ́ é nɔ gbɔn vo nú klisánwun gbejínɔtɔ́ ɖěvo lɛ́ tɔn ǎ. Étɛ́wú? Ðó mǐ nyí nǔ ɖokpó ɔ lɛ́ ǎ. Linlin e mǐ mɛ ɖokpó ɖokpó nɔ ɖó dó nǔ lɛ́ wú é nɔ gbɔn vovo. Xá e mɛ mǐ su ɖe é, xwédo e mɛ mǐ jɔ ɖe é kpó nǔ e mǐ mɔ kpɔ́n lɛ́ é kpó wɛ nɔ xlɛ́ ali linlin mǐtɔn. Amɔ̌, mǐ ɖó ná lɔn bónú linlin vovo e mǐ nɔ ɖó dó nǔ lɛ́ wú é ná wa nǔ dó fífá kpó bǔninɔ kpó agun ɔ tɔn wú ǎ.—Efɛ́. 4:3.

3. Étɛ́ ka sixú zɔ́n bɔ mǐ ná dó hwɛ klisánwun hǎtɔ́ ɖé ɖó gbeta e kɔn é wá é wú?

³ Ényí nǔɖitɔ́ hǎtɔ́ ɖé wá gbeta e ma jɛjí nú mǐ ǎ é ɖé kɔn ɔ, mǐ sixú mɔ ɖɔ mǐ ɖó ná tɛ́n kpɔ́n bá bló b’ɛ ná húzú linlin, alǒ ɖɔ nǔ e ɖo ado hu nú mǐ wɛ é nú mɛ ɖěvo lɛ́. É sixú nyí alɔ ba ná dó è wɛ mǐ ɖe kpowun. Mǐ yí wǎn nú nɔví súnnu kpó nɔví nyɔ̌nu kpó mǐtɔn lɛ́, bɔ nǔ ɖagbe hú gǎn ɔ wɛ mǐ nɔ ba nú yě. (Nǔx. 17:17) Énɛ́ wú ɔ, mǐ ba ɖɔ yě ní wá gbeta ɖé kɔn, b’ɛ ná wá vɛ́ nú yě ɖo sɔ, alǒ wa nǔ dó yě wú ɖo gbigbɔ lixo ǎ.

4-5. Ényí klisánwun hǎtɔ́ ɖé wá gbeta ɔ kɔn bá wa nǔ e gbɔn vo nú nǔ e mǐdɛɛ ná ko wa é ɖé ɔ, étɛ́ mǐ ka ɖó ná wa?

⁴ Ényí gbeta e kɔn nɔví mǐtɔn wá é ma jɛjí nú mǐ ǎ ɔ, mǐ ɖó ná ɖɔ xó dó nǔ e ɖo linkpɔ́n ɖó nú mǐ wɛ é wú xá ɛ wɛ a? Ninɔmɛ ɔ wɛ ná ɖɔ. Ði kpɔ́ndéwú ɔ, ényí mǐ se ɖɔ é ɖo tamɛ lin dó nǔ e t’afɔ sɛ́n Biblu tɔn ɖé jí é wiwa wú wɛ ɔ, wǎn e mǐ yí n’i é ɖó ná sísɛ́ mǐ bɔ mǐ ná tɛ́n kpɔ́n bá d’alɔ ɛ bɔ é ná jlá linlin tɔn ɖó. (Nǔx. 27:5, 6) Amɔ̌, ényí nɔví ɖé wá gbeta ɔ kɔn bá wa nǔ e ma t’afɔ sɛ́n Mawu tɔn ɖé jí ǎ é, bo ka gbɔn vo nú nǔ e mǐdɛɛ ná ko wa é ɖé kpowun ɔ, étɛ́ mǐ ka ɖó ná wa? Xósin nǔkanbyɔ́ énɛ́ tɔn tɔ́n ɖo wěmafɔ e jí xóta mǐtɔn jínjɔ́n é mɛ. Mǐ ɖó ná “nɔ mɔ xó ɖɔ dó linlin e gbɔn vo nú [mǐtɔn] lɛ́ é wú” ǎ.—Hlɔ̌. 14:1.

⁵ É ɖo mɔ̌ có, é sixú vɛ́ wǔ nú mǐ bɔ mǐ ná ɖó sísí nú gbeta nɔví ɔ tɔn. Ðo xóta élɔ́ mɛ ɔ, mǐ ná ɖɔ xó dó nǔ e wú mǐ ɖó ná ɖó sísí nú gbeta mɛ ɖěvo lɛ́ tɔn lɛ́ é kpó lěe mǐ sixú wa mɔ̌ gbɔn é kpó jí. Jɛ nukɔn hwɛ̌ ɔ, mi nú mǐ ní ɖɔ xó dó ninɔmɛ ɖěɖěe kunkplá gbeta mɛɖésúnɔ tɔn lɛ́ bo sixú zɔ́n bɔ mǐ ná mɔ xó ɖɔ dó nɔví súnnu kpó nɔví nyɔ̌nu kpó mǐtɔn lɛ́ wú é ɖé lɛ́ jí.

GBETA MƐÐÉSÚNƆ TƆN TƐ́ LƐ́ KA SIXÚ ZƆ́N BƆ MǏ NÁ ÐÓ HWƐ NÚ MƐ ÐĚVO LƐ́?

6-7. Ðɔ ninɔmɛ e mɛ mǐ sixú ɖó hwɛ nú mɛ ɖěvo lɛ́ ɖó gbeta e kɔn yě wá lɛ́ é wú ɖe é ɖé lɛ́.

⁶ Lěe mǐ ko ɖɔ gbɔn wá yi é ɔ, mǐ sixú ɖó linlin mɛɖésúnɔ tɔn dó xó ɖé lɛ́ wú b’ɛ syɛ́n tawun, ɖó fí e mǐ jɔ ɖe é, alǒ nǔ e mǐ mɔ kpɔ́n lɛ́ é wú. Mǐ sixú lin ɖɔ mɛ ɖěvo lɛ́ ɖó linlin ɖokpó ɔ mǐɖɔhun. Amɔ̌, nǔ sixú nɔ ma nyí mɔ̌. Ninɔmɛ ɖé lɛ́ ɖíe. Ninɔmɛ 1tɔn: Cóbónú nɔví súnnu ɖé ná wá yí nǔgbó ɔ ɔ, tɔ́ tɔn nɔ nu ahan syɛ́nsyɛ́n zɛ xwé wú. Ðo mɛkplékpɔ́mɛ-núwiwa ɖé domɛ ɔ, nɔví súnnu ɔ mɔ klisánwun ɖěvo lɛ́ bɔ yě ɖo ahan syɛ́nsyɛ́n nu wɛ. É vɛ́ wǔtu tɔn bɔ é ɖɔ nú yě ɖɔ nǔ e wa wɛ yě ɖe é kún sɔgbe ó. Ninɔmɛ 2gɔ́: Nɔví nyɔ̌nu ɖé gán ɖo azɔn syɛ́nsyɛ́n ɖé mɛ. Nukɔnmɛ ɔ, é se ɖɔ nɔví nyɔ̌nu ɖěvo ɖo azɔn ɖokpó ɔ jɛ wɛ. Nɔví nyɔ̌nu nukɔntɔn ɔ ba ná d’alɔ nɔví nyɔ̌nu e ɖo azɔn jɛ wɛ din é, énɛ́ wú ɔ, é ɖɔ n’i ɖɔ é ɖó ná xwedó tuto nukúnkpémɛwú tɔn ɖokpó ɔ émíɖɔhun; bóyá nǔɖuɖu alɔkpa ɖé lɛ́ kɛ́ɖɛ́ wɛ é ná nɔ ɖu, alǒ é ná nɔ nu atínkɛ́n alɔkpa ɖé, alǒ amasin alɔkpa ɖé. Ninɔmɛ 3gɔ́: Nɔví súnnu ɖé ko nɔ sinsɛn nǔvú mɛ ɖ’ayǐ. É gbɛ́ wǎn nú gbɛ e é zán wá yi é. Ée é se ɖɔ nǔɖitɔ́ hǎtɔ́ émítɔn ɖé yi cyɔɖiɖi ɖé domɛ ɖo amǐsa ɖé é ɔ, xomɛ sin i.b

⁷ Ninɔmɛ kléwún ɖěvo lɛ́ lɛ́ ɖíe. Ninɔmɛ 4gɔ́: Hwenu e mɛ gěgé nɔ mɔ ɖɔ é kún sɔgbe bónú súnnu lɛ́ ná jó atán dó, bónú nyɔ̌nu lɛ́ ná nɔ dó cokoto gaga yi nǔwiwa ɖé lɛ́ domɛ ó é wɛ nɔví súnnu ɖé su. Ée nɔví súnnu ɔ se hǔzúhúzú e è bló agaɖanu din dó xó énɛ́ wú é ɔ, é nɔ ɖɔ nú mɛ ɖěvo lɛ́ hwɛhwɛ ɖɔ nɔví súnnu lɛ́ kún ɖó ná hɛn atán gbakɔ, bɔ nɔví nyɔ̌nu lɛ́ ná dó cokoto gaga hwenu e yě ɖo alɔ ɖó wɛ ɖo azɔ̌ tutoblónúnǔ ɔ tɔn lɛ́ mɛ é ó. Ninɔmɛ 5gɔ́: Mɛxó agun tɔn ɖé tuun nɔví súnnu ɖé b’ɛ kplɔ́n wěma d’é jí, bo wá jó nǔgbó ɔ dó ɖo nukɔnmɛ. Din ɔ, nɔví súnnu wínnyáwínnyá ɖé ɖo agun tɔn mɛ, bo wá gbeta ɔ kɔn bá kplɔ́n wěma d’é jí. Nɔví súnnu wínnyáwínnyá ɔ sín nǔ ɖo ayi mɛ ɖu nú mɛxó agun tɔn ɔ wɛ, b’ɛ tɛ́n kpɔ́n bo ná bló bɔ é kpó mɛjitɔ́ tɔn lɛ́ kpó ná húzú linlin.

8. (a) Étɛ́ ka sixú zɔ́n bɔ mɛjitɔ́ ɖé ná jɛ hwɛ ɖó nú mɛjitɔ́ ɖěvo lɛ́ jí? (b) Ényí mǐ nɔ ɖó hwɛ nú mɛ ɖěvo lɛ́ ɔ, nɛ̌ é ka sixú wa nǔ dó agun ɔ wú gbɔn?

⁸ Ninɔmɛ e sixú kan mɛjitɔ́ lɛ́ é ɖé ɖíe. Ninɔmɛ 6gɔ́: Ðó a nyí mɛjitɔ́ wútu ɔ, a nɔ dó gǎn syɛ́nsyɛ́n bo ná kplɔ́n vǐ towe lɛ́ “sɔgbe xá nǔgbódodó Jexóva tɔn lɛ́ kpó wěɖexámɛ tɔn lɛ́ kpó.” (Efɛ́. 6:4) Amɔ̌, é sixú cí ɖɔ alɔ e mɛjitɔ́ klisánwun ɖěvo lɛ́ nɔ hɛn vǐ yětɔn lɛ́ ná é kún syɛ́n sɔ towe ó. Ði kpɔ́ndéwú ɔ, yě nɔ yí gbe bɔ vǐ yětɔn lɛ́ nɔ nɔ toxo mɛ bɔ zǎn nɔ kú, nɔ d’ayihún video jí tɔn e mɛ dǎkaxixo ma ɖe ǎ é, alǒ nɔ ɖo vǔ tawun cóbó ka nɔ ɖó alǒkan. Wǎgbɔ tɔn ɔ, vǐ towe sixú mɔ ɖɔ hwi ɖo kan gli émítɔn hɛn wɛ dín, bo sixú kanbyɔ́ ɖɔ “étɛ́wú hwi ma ka sixú cí xɔ́ntɔn émítɔn sín mɛjitɔ́ lɛ́ ɖɔhun ǎ é jí.” Ninɔmɛ mɔ̌hun sixú zɔ́n bɔ a ná jɛ xó mɔ ɖɔ dó mɛjitɔ́ ɖěvo lɛ́ wú jí. Nǔgbó ɔ wɛ nyí ɖɔ gbeta e kɔn klisánwun ɖěvo lɛ́ nɔ wá lɛ́ é ɖěbǔ sixú gbɔn vo nú mǐtɔn, b’ɛ sixú zɔ́n bɔ akpɔ ɖó mǐ. Ði kpɔ́ndéwú ɔ, mǐ sixú mɔ xó ɖɔ dó lěe é nɔ zán akwɛ́ tɔn gbɔn é, lěe é nɔ yí gbɔjɛ sɔ é, alǒ ayiɖeɖayǐ e é nɔ cyán lɛ́ é wú. Amɔ̌, mǐ ɖó ná lɔn bónú lěe nǔ cí nú mǐ é ná wá ɖo tají hú bǔninɔ agun ɔ tɔn ǎ.

9. Étɛ́ mǐ ka ɖó ná flín? (Kpɔ́n ɖiɖe ɔ lɔmɔ̌.)

⁹ Gbeta e kɔn klisánwun ɖé wá é sixú gbɔn vo nú éé kɔn klisánwun ɖěvo wá é có, énɛ́ ɖo xlɛ́xlɛ́ wɛ dandan ɖɔ mɛ ɖokpó wá gbeta ɖagbe kɔn bɔ mɛ ɖě ɔ wá gbeta nyanya kɔn ǎ. (Hlɔ̌. 14:5) È kplɔ́n klisánwun lɛ́ ɖɔ yě “ní nɔ ɖó linlin ɖokpó ɔ” dó nǔgbódodó Jexóva tɔn lɛ́ wú, amɔ̌, énɛ́ xlɛ́ ɖɔ mǐ ɖó ná nɔ ɖó linlin ɖokpó ɔ dó nǔ e kan mɛɖésúnɔxó lɛ́ é wú ǎ. (2 Kɔ. 13:11) Mǐ sixú jlɛ́ gbeta mɛɖésúnɔ tɔn mǐtɔn lɛ́ dó fí ɖé yiyi wú. Hwɛhwɛ ɔ, ali e è ná gbɔn bo yi fí ɖokpó ɔ é nɔ nyí ɖokpó ɔ lɛ́ ǎ. Mǐ sixú sɔ́ ali e mǐ ba, b’ɛ lɛ́ sɔgbe xá nǔwúkpíkpé mǐtɔn lɛ́ é. Mɔ̌ ɖokpó ɔ, klisánwun lɛ́ sixú wá gbeta vovo lɛ́ kɔn dó mɛɖésúnɔxó lɛ́ wú, amɔ̌, fí ɖokpó ɔ wɛ mǐ ja, énɛ́ wɛ nyí ɖɔ mǐ ba ná nyɔ́ Jexóva nukúnmɛ. Énɛ́ wú ɔ, mǐ nɔ ɖó hwɛ nú mɛ ɖěvo lɛ́ ɖó gbeta e kɔn yě wá dó mɛɖésúnɔxó lɛ́ wú é wú ǎ.—Mat. 7:1; 1 Tɛ. 4:11.

ÉTƐ́WÚ È KA ÐÓ NÁ ÐÓ SÍSÍ NÚ GBETA MƐÐÉSÚNƆ TƆN E KƆN MƐ ÐĚVO LƐ́ WÁ É?

10. Sɔgbe kpó Jaki 4:12 kpó ɔ, étɛ́ mǐ ma ka ɖó acɛ bo ná wa ǎ? Étɛ́wú?

¹⁰ Hwɛjijɔ e wú mǐ ɖó ná ɖó sísí nú gbeta mɛɖésúnɔ tɔn e kɔn mɛ ɖěvo lɛ́ wá é gěgé ɖo Biblu mɛ. Ðé lɛ́ ɖíe. Mǐ ɖó acɛ e ná ɖó hwɛ nú mɛ ɖěvo lɛ́ ɖó gbeta mɛɖésúnɔ tɔn e kɔn yě wá lɛ́ é wú é ǎ. (Xa Jaki 4:12.) Jexóva wɛ nyí Sɛ́nnámɛtɔ́ kpó Hwɛɖɔtɔ́ kpó kpíkpé ɔ. Éɖokpónɔ géé wɛ ɖó acɛ bo ná ɖó nǔgbódodó kpó sɛ́n kpó lɛ́ ayǐ ɖo gbɛ mɛ. Énɛ́ wú ɔ, Jexóva wɛ nɔví súnnu kpó nɔví nyɔ̌nu kpó mǐtɔn lɛ́ ná ɖó gbe ná, é nyí mǐdɛɛ lɛ́ ǎ. (Hlɔ̌. 14:10) Mǐ ɖó acɛ bá zɔn dó nǔgbódodó mǐɖésúnɔ tɔn lɛ́, alǒ linlin mǐɖésúnɔ tɔn lɛ́ jí bá ɖó hwɛ nú mɛ ɖěvo lɛ́, alǒ mɔ xó ɖɔ dó gbeta e kɔn yě wá lɛ́ é wú ǎ.c

11. Nɛ̌ mǐ ka sixú gɔ́ so nú bǔninɔ agun ɔ tɔn gbɔn? (Kpɔ́n ɖiɖe ɔ lɔmɔ̌.)

¹¹ Jexóva nɔ ba ɖɔ mɛsɛntɔ́ émítɔn lɛ́ ní ɖó gbe kpɔ́, é nɔ ba ɖɔ yě mɛ bǐ ní cí ɖokpó ɔ lɛ́ ǎ. Nǔgbó ɔ, Mawu mǐtɔn yí wǎn nú vogbingbɔn! Énɛ́ jɛ wě ɖo nǔɖíɖó lɛ́ mɛ. Ði kpɔ́ndéwú ɔ, ama e ɖo atín jí lɛ́ é we sixú ɖi yěɖée, amɔ̌, yě ná nyí nǔ ɖokpó ɔ pɛ́pɛ́pɛ́ ǎ. Lɛ̌ lin tamɛ dó gbɛtɔ́ lɛ́ jí. Ðo gbɛtɔ́ lǐva tántɔn jɛjí e ɖo ayǐkúngban ɔ jí lɛ́ é mɛ ɔ, mɛ we sixú nyí nǔ ɖokpó ɔ pɛ́pɛ́pɛ́ ǎ. Jexóva dá mǐ bɔ mǐ gbɔn vo nú mǐɖée lɛ́. É nɔ ba ɖɔ mǐ ní nyí nǔ ɖokpó ɔ pɛ́ɛ́ xá mǐɖée lɛ́ ǎ. Amɔ̌, é nɔ ba ɖɔ mǐ ní nɔ bǔ. Énɛ́ wú ɔ, mǐ nɔ lɔn bónú vogbingbɔn mǐtɔn lɛ́ nɔ klán mǐ ǎ, loɔ, mǐ nɔ jɛ hun dó fífá jí. Bǔninɔ agun ɔ tɔn nɔ myá nukún nú mǐ hú gǎn hunjijɛ dó linlin mǐɖésúnɔ tɔn kpó nǔjlómɛ mǐɖésúnɔ tɔn lɛ́ kpó jí.—Hlɔ̌. 14:19.

LĚE È NÁ ÐÓ SÍSÍ NÚ LINLIN MƐ ÐĚVO LƐ́ TƆN GBƆN É

12-13. Ényí mǐ mɔ ɖɔ mɛɖé “ɖe afɔ nyi do” ɔ, étɛ́ mǐ ka ɖó ná flín? (Galátinu lɛ́ 6:1; kpɔ́n gbǎví “Hwenu e gbeta e kɔn mɛɖé wá é ma jɛjí nú we ǎ é” ɔ lɔmɔ̌.)

¹² Hwenu e mɛ ɖěvo lɛ́ wá gbeta lɛ́ kɔn dó mɛɖésúnɔxó lɛ́ wú é. Kanbyɔ́ hwiɖée ɖɔ: ‘‘Afɔ wɛ mɛ ɔ ɖe nyi do’ a, alǒ gbeta ɖé kɔn wɛ é wá b’ɛ gbɔn vo nú cɛ kpowun?’ Ényí afɔ wɛ é ɖe nyi do bo gba sɛ́n Biblu tɔn ɖé hǔn, kanbyɔ́ hwiɖée ɖɔ: ‘Un ka ɖó nǔwúkpíkpé ɖo gbigbɔ lixo bo ná ɖe è ɖ’ali jí a, alǒ mɛ ɖěvo wɛ ɖo tɛn e jɛxá hú gǎn é mɛ bá wa mɔ̌?’ Ényí hwi wɛ jɛxá bá d’alɔ hǔn, tɛ́n kpɔ́n bo ɖɔ xó xá ɛ kpó xomɛfífá kpó, dó zɔ́n tamɛ lin i. (Xa Galátinu lɛ́ 6:1.) É ɖo mɔ̌ có, hwɛhwɛ ɔ, a sixú mɔ ɖɔ gbeta e kɔn é wá é gbɔn vo nú gbeta e kɔn hwɛ ná ko wá é kpowun wɛ, énɛ́ wɛ nyí ɖɔ é xo nǔ d’akpa ɖokpó ɔ mɛ xá linlin t’wɛ ǎ. Ényí mɔ̌ hǔn, ma xo nǔ kpɔ́n dó wǔ tɔn, alǒ ɖɔ xó nyanya dó gbeta e kɔn é wá é wú ó. Ðǒ sísí nú acɛ e é ɖó bá wá gbeta lɛ́ kɔn éɖésú é, bo ma ɖó hwɛ n’i ó.—Hlɔ̌. 14:2-4.

¹³ Lin tamɛ dó nǔjlɛ́dónǔwú élɔ́ jí: Ényí a kplá xɔ́ntɔn towe yi nǔbaɖutɛn ɔ, a ná zín jǐ tɔn ɖɔ é ní zɔ́n nǔɖuɖu ɖokpó ɔ hwiɖɔhun wɛ a? Éǒ. A ná ɖó sísí nú acɛ e é ɖó bá zɔ́n nǔɖuɖu e ba wɛ é ɖe é. È ná ɖɔ ɔ, ényí a na bo ma yí wǎn nú nǔ e é zɔ́n é ǎ ɔ, é ɖó xó ɖé ǎ, ɖó hwi wɛ ja ɖuɖu gbé ǎ. Din ɔ, mǐ ní ɖɔ ɖɔ hwi wɛ è kplá yi nǔbaɖutɛn ɔ; a ná ba ɖɔ xɔ́ntɔn towe ní zɔn dó nǔ e jló è lɛ́ é jí bo zɔ́n nǔ e hwɛ ná ɖu é wɛ a? Mɔ̌ ɖokpó ɔ, ényí mǐ ma nɔ zín mɛ ɖěvo lɛ́ jí ǎ, bo nɔ jó yě dó bɔ yě nɔ wá gbeta yěɖésúnɔ tɔn lɛ́ kɔn hǔn, sísí ɖe xlɛ́ yě wɛ mǐ ɖe mɔ̌ nɛ́.

14. Ényí a ɖo mɛɖésúnɔ sín gbeta lɛ́ kɔn wá wɛ ɔ, nɛ̌ a ka sixú sɔ́ bǔninɔ ɖ’ajo gbɔn? (1 Kɔlɛ́ntinu lɛ́ 8:12, 13)

¹⁴ Hwenu e a ɖo gbeta lɛ́ kɔn wá wɛ dó nǔ mɛɖésúnɔ tɔn lɛ́ wú é. A sixú jɛ hun dó bǔninɔ jí gbɔn nǔ e wú a kpé é bǐ wiwa dó ny’alɔ nú xomɛsin dídó nú mɛ ɖěvo lɛ́ gblamɛ. (Xa 1 Kɔlɛ́ntinu lɛ́ 8:12, 13.) Hweɖélɛ́nu ɔ, a sixú mɔ ɖɔ gbeta e kɔn wá gbé émí ja é ɔ, “sɛ́n ɔ yí gbe ná.” Amɔ̌, ényí é ná dó xomɛsin nú nɔví towe ɔ, é ka ná “hɛn le wá” a?d (1 Kɔ. 10:23, 24) Ðo ninɔmɛ mɔ̌hun lɛ́ mɛ hǔn, ma nɔ tɛ́ dó acɛ e a ɖó é wú ó, é nyɔ́ wa hǔn, nɔ sɔ́ nǔjlómɛ towe lɛ́ ɖó kɛ́n. (Hlɔ̌. 15:1) Amɔ̌, mǐ ɖɔ wá yi zaanɖé din ɖɔ mɛ ɖěvo lɛ́ ɖó ná nɔ ɖó sísí nú gbeta e kɔn mǐ wá dó mɛɖésúnɔxó lɛ́ wú é ǎ cé? Nǔgbó wɛ. Yě ɖó ná ɖó sísí nú gbeta e kɔn mǐ wá lɛ́ é lěe mǐ lɔmɔ̌ nɔ ɖó sísí nú gbeta e kɔn yě nɔ wá lɛ́ é gbɔn é. Amɔ̌, mǐ ɖó ná lɛ́ hɛn wěɖexámɛ Biblu tɔn e ɖo Hlɔ̌manu lɛ́ 12:18 mɛ é ayi mɛ; é ɖɔ: “Mi wa nǔ e wú mi kpé é bǐ, bo nɔ fífá mɛ xá mɛ lɛ́ bǐ.” Énɛ́ wú ɔ, mǐ nɔ nɔ jlɛ̌ jí bo nɔ wa nǔ e wú mǐ kpé é bǐ dó jɛ hun dó fífá mɛ ninɔ xá mɛ ɖěvo lɛ́ jí, bo nɔ ny’alɔ nú xomɛsin dídó nú yě fatáa.

15. Nɛ̌ mɛxó agun tɔn lɛ́ ka sixú jɔ fún dó bǔninɔ agun ɔ tɔn mɛ gbɔn? (1 Kɔlɛ́ntinu lɛ́ 4:6)

¹⁵ Mɛxó agun tɔn lɛ́ nɔ ɖó sísí nú gbeta e kɔn mɛ ɖěvo lɛ́ nɔ wá lɛ́ é. Mɛxó agun tɔn lɛ́ nɔ dó sɛ́n lɛ́ dó nǔ e kan mɛɖésúnɔxó lɛ́ é wú ǎ, yě ka nɔ lɛ́ “wa nǔ zɛ nǔ e è wlán” dó Biblu ɔ mɛ lɛ́ é wú ǎ, dó gɔ́ so nú bǔninɔ e ɖo agun ɔ mɛ é. (Xa 1 Kɔlɛ́ntinu lɛ́ 4: 6.) Yě nɔ lɛ́ wa nǔ zɛ wěɖexámɛ e jínjɔ́n Biblu jí bo ɖo wěma mǐtɔn lɛ́ mɛ lɛ́ é wú ǎ. Gɔ́ ná ɔ, ényí klisánwun hǎtɔ́ ɖé byɔ́ alɔdó ɔ, mɛxó agun tɔn lɛ́ nɔ ɖ’ayi te, bo nɔ gán jɛ nǔ e yě ko mɔ kpɔ́n lɛ́ é wú kpowun dó ɖe wě xá mɛ ǎ. É nyɔ́ wa ɔ, yě nɔ sɔ́ wěɖexámɛ yětɔn lɛ́ jínjɔ́n Xó Mawu tɔn jí.—Eza. 48:17, 18.

16. Nɛ̌ mɛxó agun tɔn ɖé ka sixú ɖó sísí nú gbeta e kɔn kplékplé mɛxó lɛ́ tɔn wá é gbɔn?

¹⁶ Mɛxó agun tɔn ɖé nɔ lɛ́ xlɛ́ ɖɔ émí nɔ ɖó sísí nú gbeta e kɔn kplékplé mɛxó lɛ́ tɔn wá é. Ényí kplékplé mɛxó lɛ́ tɔn ko xo ɖɛ bo byɔ́ gbigbɔ mímɛ́, gbéjé wěɖexámɛ Biblu tɔn lɛ́ kpɔ́n, xwedó, bo wá wá gbeta ɖé kɔn ɔ, mɛxó agun tɔn ɖokpó ɖokpó ɖó ná nɔ gǔdo nú gbeta énɛ́, ényí gěgé mɛ e ɖo kplékplé ɔ mɛ é tɔn ma tlɛ yí gbe nú linlin tɔn ǎ ɔ nɛ́. (Efɛ́. 5:17) Gɔ́ ná ɔ, mɛxó agun tɔn lɛ́ nɔ lɛ́ ɖ’ayi te bo nɔ zán wěɖexámɛ e ɖo Biblu kpó wěma mǐtɔn lɛ́ kpó mɛ lɛ́ é tlélé, bo nɔ tɛ́n kpɔ́n bo nɔ tínmɛ ɖo ali ɖé nu bɔ é nɔ sɔgbe xá linlin yědɛɛ lɛ́ tɔn ǎ. Ði kpɔ́ndéwú ɔ, mɛxó agun tɔn ɖé ná yi sɔ́ nukɛgbe ɖokpó ɖé sín wěma mǐtɔn lɛ́ mɛ bo jó ninɔmɛ e mɛ è zán ɖe é dó bá dó nɔ gǔdo nú linlin éɖésúnɔ tɔn ǎ.

17. Ényí mǐ nɔ ɖó sísí nú gbeta e kɔn mɛ ɖěvo lɛ́ wá lɛ́ é ɔ, nɛ̌ é ka nɔ hɛn le wá nú mǐ gbɔn?

¹⁷ Lěe mǐ ko mɔ gbɔn é ɔ, mǐ gbɔn vovo. Linlin mǐtɔn lɛ́ kpó nǔ e nɔ jló mǐ lɛ́ é kpó nɔ nyí nǔ ɖokpó ɔ lɛ́ ǎ. Amɔ̌, vogbingbɔn énɛ́ lɛ́ nyɔ́ tawun! Fí vovo e mǐ jɔ sín é kpó jijɔ vovo e mǐ ɖó lɛ́ é kpó nɔ zɔ́n bɔ agun ɔ mɛ nɔ nyɔ́ nɔ. Énɛ́ wú ɔ, mǐ nɔ lɔn bónú vogbingbɔn mǐtɔn lɛ́ nɔ klán mǐ ǎ, é nyɔ́ wa ɔ, mǐ nɔ jɛ hun dó fífá jí. Mǐ nɔ nɔ acéjí bo nɔ dó xomɛsin nú mɛ ɖěvo lɛ́ ǎ. Mǐ nɔ ɖó sísí nú gbeta e kɔn mɛ ɖěvo lɛ́ wá dó mɛɖésúnɔxó lɛ́ wú é. Ényí mǐ wa mɔ̌ ɔ, è ná d’ajɔ mǐ ɖó gǎndídó mǐtɔn wú. Énɛ́ ná zɔ́n bɔ agun ɔ ná ɖó awǎjijɛ, bo lɛ́ nɔ bǔ.—Ðɛh. 133:1; Mat. 5:9.