Lěe a sixú ɖí xwi xá linlin masɔgbe lɛ́ b’ɛ ná kpa we gbɔn é

1-2. Nɛ̌ nǔ ka nɔ cí nú mɛsɛ́dó Pɔ́lu hweɖélɛ́nu? Étɛ́wú kpɔ́ndéwú tɔn ka sixú d’alɔ mǐ? (Hlɔ̌manu lɛ́ 7:21-24)

ÉNYÍ a lin tamɛ dó mɛsɛ́dó Pɔ́lu jí ɔ, étɛ́ ka nɔ wá ayi towe mɛ? A nɔ lin ɖɔ é nyí mɛsɛ́dó akɔ́nkpantɔ́ ɖé, nǔkplɔ́nmɛtɔ́ alɔsekpɛ́nnánɔ ɖé, alǒ mɛ e wlán wěma Biblu tɔn gěgé é ɖé wɛ a? É ɖo wɛn ɖɔ nǔ énɛ́ lɛ́ bǐ wɛ sɔgbe. É ɖo mɔ̌ có, wǔ nɔ lɛ́ kú i, awakanmɛ nɔ kú i, alǒ é nɔ ɖó linkpɔ́n hweɖélɛ́nu. Mǐ mɛ gěgé ɖɔhun ɔ, é nɔ ɖí xwi xá linlin masɔgbe lɛ́ hweɖélɛ́nu.

² Xa Hlɔ̌manu lɛ́ 7:21-24. Ðo wěma e Pɔ́lu wlán sɛ́ dó Hlɔ̌manu lɛ́ é mɛ ɔ, é ɖɔ lěe nǔ cí n’i é ɖé lɛ́ xó, bɔ gěgé mǐtɔn wɛ nǔ nɔ cí mɔ̌ ná. Klisánwun gbejínɔtɔ́ ɖé wɛ n’i có, é ka ɖo ahwan ɖé fun wɛ ɖo ayi mɛ, énɛ́ wɛ nyí ɖɔ é nɔ ba vɛ́návɛ́ná bo ná wa jlǒ Mawu tɔn, có nǔnyanyawiwa sín zɛn e ka nɔ sɔ́ ɛ é lɔ ɖo fínɛ́. Gɔ́ nú ahwan énɛ́ e fun wɛ Pɔ́lu ɖe ɖo ayi mɛ é ɔ, é lɛ́ ɖí xwi xá linlin masɔgbe lɛ́ dó nǔ e é ko wa wá yi lɛ́ é kpó tagba magbokɔ e ɖí xwi xá wɛ é ɖe é ɖé kpó wú hweɖélɛ́nu.

3. Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ? (Kpɔ́n “Tínmɛ ɖé lɛ́” ɔ lɔmɔ̌.)

³ Ahwan e fun wɛ Pɔ́lu ɖe ɖo ayi mɛ é ɖo fínɛ́ có, é lɔn bónú lěe nǔ nɔ cí n’i éa ɖu ɖo linlin tɔn lɛ́ jí ǎ. Ðo xóta élɔ́ mɛ ɔ, mǐ ná gbéjé nǔkanbyɔ́ élɔ́ lɛ́ kpɔ́n: Étɛ́ ka zɔ́n bɔ Pɔ́lu ɖɔ “gbɛ ce blá wǔ” hweɖélɛ́nu? Nɛ̌ é ka ɖí xwi xá linlin masɔgbe lɛ́ gbɔn? Nɛ̌ mǐ ka sixú ɖí xwi xá linlin masɔgbe mǐɖésúnɔ tɔn lɛ́ b’ɛ ná kpa mǐ gbɔn?

NǓ ÐĚÐĚE ZƆ́N BƆ PƆ́LU ÐÓ LINLIN MASƆGBE LƐ́ É

4. Étɛ́ ka zɔ́n bɔ Pɔ́lu ɖó linlin masɔgbe lɛ́?

⁴ Nǔ e é wa wá yi lɛ́ é. Cóbónú Pɔ́lu e nyí Sólu ɖ’ayǐ é ná wá húzú klisánwun ɔ, é wa nǔ ɖěɖěe wá vɛ́ n’i ɖo nukɔnmɛ lɛ́ é. Ði kpɔ́ndéwú ɔ, é ɖo te bo ɖo kpínkpɔ́n wɛ hwenu e è nyi awǐnnya dó gbejínɔtɔ́ Etyɛ́ni bo hu i é, bo yí gbe ná. (Mɛ. 7:58; 8:1) Gɔ́ ná ɔ, Pɔ́lu nɔ nukɔn tɔ́ntlɔ́ngbɔ́n, bo klán gbe xá klisánwun lɛ́ dó nǔjɔnǔ mɛ.—Mɛ. 8:3; 26:9-11.

5. Nɛ̌ nǔ e Pɔ́lu wa nyi do wá yi lɛ́ é ka wa nǔ dó wǔ tɔn gbɔn?

⁵ Ée mɛsɛ́dó Pɔ́lu húzú klisánwun gúdo é ɔ, nǔ e é dó sin wá yi lɛ́ é nɔ wá ɖó linkpɔ́n n’i hweɖélɛ́nu. Xwe lɛ́ ko wá yi có, gbe e é klán xá klisánwun lɛ́ majómájó é sixú ko dó ayimɛya n’i tawun. Ði kpɔ́ndéwú ɔ, hwenu e é wlán wěma tɔn nukɔntɔn ɔ sɛ́ dó Kɔlɛ́ntinu lɛ́ ɖo 55 H.M. tɔn mɔ̌ é ɔ, é ɖɔ: “Un jɛxá bónú è ná ylɔ́ mì ɖɔ mɛsɛ́dó ǎ, ɖó un ko dó ya nú agun Mawu tɔn ɖ’ayǐ.” (1 Kɔ. 15:9) Xwe atɔ́ɔ́n mɔ̌ gúdo ɔ, é ɖɔ dó éɖée wú ɖo wěma e é wlán sɛ́ dó Efɛ́zinu lɛ́ é mɛ ɖɔ émí wɛ nyí “mɛ e hwe hú mɛ kpɛví bǐ e ɖo mɛ mímɛ́ lɛ́ mɛ é.” (Efɛ́. 3:8) Hwenu e Pɔ́lu wlán nǔ sɛ́ dó Timɔtée é ɔ, é ɖɔ dó éɖésúnɔ wú ɖɔ émí ko nɔ wa nǔ élɔ́ lɛ́ ɖ’ayǐ: “Un nɔ nylá nu, un nɔ dó ya nú mɛ, bɔ un nɔ lɛ́ sí mɛ ǎ.” (1 Tim. 1:13) Dǒ nukún lěe nǔ ná ko cí nú Pɔ́lu hwenu e é yi ba agun ɖé kpɔ́n, bo xo go mɛ ɖěɖěe é ko dó ya ná, alǒ hǎgbɛ́ xwédo mɛ ɖěɖěe é ko dó ya ná lɛ́ é tɔn é mɛ kpɔ́n.

6. Nǔ ɖěvo tɛ́ ka zɔ́n bɔ Pɔ́lu ɖó linkpɔ́n tawun? (Kpɔ́n tínmɛ e ɖo do é lɔmɔ̌.)

⁶ Wun e ɖo lanmɛ é ɖé. Nǔɖé zɔ́n bɔ Pɔ́lu ɖo wǔvɛ́ se wɛ tawun, bɔ é sɔ́ jlɛ́ dó ‘wun e ɖo lanmɛ é ɖé’ wú. (2 Kɔ. 12:7) Mɛsɛ́dó ɔ ɖɔ nǔ e ɖo wun ɔ nyí wɛ é ǎ, amɔ̌, lěe é tínmɛ gbɔn é xlɛ́ ɖɔ nǔɖé wɛ bo ɖo wǔvɛ́ dó n’i wɛ; é sixú nyí lanmɛzɔn ɖé, tagba ɖé ɖo lěe nǔ nɔ cí nú mɛ é linu, alǒ nǔ ɖěvo.b

7. Nɛ̌ hwɛhuhu gbaza Pɔ́lu tɔn ka wa nǔ dó wǔ tɔn gbɔn? (Hlɔ̌manu lɛ́ 7:18, 19)

⁷ Hwɛhuhu gbaza tɔn. Pɔ́lu ɖí xwi xá hwɛhuhu gbaza tɔn. (Xa Hlɔ̌manu lɛ́ 7:18, 19.) É nɔ ba ná wa nǔ e sɔgbe é, amɔ̌, hwɛhuhu gbaza tɔn nɔ gbo kpo nyi ali jí nú kán e é kán ɖ’é jí bá wa mɔ̌ é. É yí gbe ɖɔ émí ɖo ahwan gbe bǐ gbe tɔn ɖé fun wɛ ɖo hwɛhuhu gbaza émítɔn kpó jlǒ e émí ɖó bo ná wa nǔ ɖagbe é kpó tɛ́ntin. É ɖo mɔ̌ có, Pɔ́lu w’azɔ̌ syɛ́nsyɛ́n bá dó kpɔ́n te d’é jí. (1 Kɔ. 9:27) Kpɔ́n lě do akpɔ ná nɔ ɖó è sɔ hweɖébǔnu e walɔ tɔn nyanya lɛ́ lɛ́vɔ́ wá xwetɔ́n é!

LĚE PƆ́LU ÐÍ XWI XÁ LINLIN MASƆGBE LƐ́ GBƆN É

8. Étɛ́ wěmasɛ́dómɛ Pɔ́lu tɔn lɛ́ ka xlɛ́ dó lěe é ɖí xwi xá gǎnmaɖó tɔn lɛ́ gbɔn é wú?

⁸ Lěe wěmasɛ́dómɛ Pɔ́lu tɔn lɛ́ xlɛ́ gbɔn é ɔ, Pɔ́lu lin tamɛ dó lěe é kpó nǔɖitɔ́ hǎtɔ́ tɔn lɛ́ kpó sixú ɖí xwi xá hwɛhuhu gbaza, bɔ kpó alɔdó gbigbɔ Mawu tɔn tɔn kpó ɔ, yě ná ɖu ɖ’é jí gbɔn é jí. (Hlɔ̌. 8:13; Ga. 5:16, 17) Pɔ́lu nɔ ɖɔ xó dó walɔ kpó jlǒ kpó masɔgbe ɖěɖěe klisánwun lɛ́ ɖó ná tɔ́n ahwan lɛ́ é wú hwɛhwɛ. (Ga. 5:19-21, 26) É ɖo wɛn ɖɔ, Pɔ́lu nɔ lin tamɛ dó gǎnmaɖó éɖésúnɔ tɔn lɛ́ jí, nɔ ba wěɖexámɛ ɖo Mawuxówéma ɔ mɛ, bo nɔ lɛ́ tuun afɔ tawun tawun ɖěɖěe é ná ɖe bá dó ɖí xwi xá hwɛhuhu gbaza tɔn lɛ́ é. Mǐ hɛn ɔ, mǐ ná kú d’é jí ɖɔ é nɔ zán wě e é nɔ ɖe xá mɛ ɖěvo lɛ́ é.

9-10. Étɛ́ ka d’alɔ Pɔ́lu b’ɛ ɖí xwi xá linlin nyanya lɛ́? (Efɛ́zinu lɛ́ 1:7) (Kpɔ́n ɖiɖe ɔ lɔmɔ̌.)

⁹ Awakanmɛ nɔ kú Pɔ́lu hweɖélɛ́nu có, é ka nɔ kpo ɖo linlin ɖagbe ɖó wɛ. Ði kpɔ́ndéwú ɔ, gbe ɖagbe e tomɛyitɔ́ gbɛ̌ tɔn lɛ́ nɔ wá ɖó n’i é nɔ víví n’i. (2 Kɔ. 7:6, 7) Xɔ́ntɔn e é zun xá nǔɖitɔ́ hǎtɔ́ tɔn lɛ́ é nɔ dó awǎjijɛ n’i. (2 Tim. 1:4) Gɔ́ ná ɔ, é tuun ɖɔ nǔ émítɔn nyɔ́ Jexóva nukúnmɛ. Nǔgbó ɔ, Pɔ́lu nɔ j’awǎ, ɖó é hɛn ɔ é ná sɛn Mawu “kpó ayixa mímɛ́ kpó.” (2 Tim. 1:3) É ná bo tlɛ nyí hwenu e Pɔ́lu ɖo gankpá mɛ ɖo Hlɔ̌ma é ɔ, é byɔ́ nǔɖitɔ́ hǎtɔ́ tɔn lɛ́ ɖɔ yě ní “nɔ j’awǎ ɖo Aklúnɔ mɛ.” (Filí. 4:4) Xó tɔn lɛ́ cí mɛ e ɖo xwi ɖí xá linlin masɔgbe lɛ́ wɛ é ɖé tɔn ɖɔhun kpálíkpálí ǎ. É ɖo wɛn ɖɔ, ényí linlin masɔgbe lɛ́ wá ayi mɛ nú Pɔ́lu ɔ, é nɔ kpé wú bo nɔ w’azɔ̌ ɖo yě wú bá dó sixú lɛ́ ɖó linlin ɖagbe.

¹⁰ Pɔ́lu lɛ́ kpé wú bo ɖí xwi xá linlin nyanya lɛ́ b’ɛ kpa ɛ, ɖó é ɖi nǔ ɖɔ gbɛxixɔ ɔ nǔníná ɖé wɛ é nyí nú émíɖésúnɔ mɛtún ɔ. (Ga. 2:20; xa Efɛ́zinu lɛ́ 1:7.) Wǎgbɔ tɔn ɔ, é hɛn ɔ, é ná ɖeji dó hwɛ e Jexóva nɔ sɔ́ kɛ mɛ gbɔn Jezu Klísu jí é wú bǐ mlɛ́mlɛ́. (Hlɔ̌. 7:24, 25) Nǔ e Pɔ́lu wa nyi do wá yi lɛ́ é kpó hwɛhutɔ́ e é nyí é kpó ɖo fínɛ́ có, é ka kpé wú bo “wa sinsɛnzɔ́ mímɛ́” nú Mawu kpó awǎjijɛ kpó.—Ebl. 9:12-14.

11. Étɛ́wú kpɔ́ndéwú Pɔ́lu tɔn ka nɔ dó wǔsyɛ́n lanmɛ nú mǐ?

¹¹ Pɔ́lu ɖɔhun ɔ, é sixú cí nú mǐ ɖɔ mǐ nɔ ɖo ahwan ɖé fun wɛ ɖo ayi mɛ hwebǐnu ɖɔhun. É sixú kunkplá nǔ e jí mǐ nɔ lin tamɛ dó é, nǔ e mǐ nɔ wa é, alǒ nǔ e mǐ nɔ ɖɔ é. Mǐ lɔ sixú ɖɔ nǔ lěhun: ‘Gbɛ ce blá wǔ lóóo!’ Nɔví nyɔ̌nu e nɔ nyí Eliza,c bo ɖo xwe 20 mɔ̌ ɖó wɛ é ɖɔ nǔ élɔ́ dó nǔ e ɖí xwi xá wɛ é ɖe é wú: “Tamɛ linlin dó ninɔmɛ Pɔ́lu tɔn jí nɔ dó wǔsyɛ́n lanmɛ nú mì. Tuun e un tuun ɖɔ é kún nyí nyiɖokpónɔ wɛ nǔ nɔ cí mɔ̌ ná ó é zɔ́n bɔ agbɔ̌n ce jɛ do. Nǔflínmɛ ɖěvo wɛ énɛ́ nyí ɖɔ Jexóva tuun nǔ e mɛ gbɔn dín wɛ togun tɔn ɖe é.” Nɛ̌ mǐ ka sixú bló gbɔn, bɔ Pɔ́lu ɖɔhun ɔ, ényí linlin nyanya lɛ́ ná bo ɖo fínɛ́ ɔ, mǐ ná ɖó ayixa mímɛ́, bo lɛ́ j’awǎ?

LĚE MǏ SIXÚ ÐÍ XWI XÁ LINLIN MASƆGBE LƐ́ GBƆN É

12. Nɛ̌ tuto gbigbɔ tɔn ɖagbe ɖé ɖíɖó ka nɔ d’alɔ mǐ ɖo xwi e ɖí xá linlin nyanya lɛ́ wɛ mǐ ɖe é kpáxwé gbɔn?

¹² Kpo ɖo tuto gbigbɔ tɔn ɖagbe ɖé xwedó wɛ. Ényí mǐ tɛ́n kpɔ́n bo ɖó tuto gbigbɔ tɔn ɖagbe ɖé ɔ, mǐ ná kpé wú hú gǎn bo ná nɔ sɔ́ ayi ɖó nǔ ɖagbe lɛ́ jí. Mǐ sixú sɔ́ tuto mɔ̌hun jlɛ́ dó walɔ ɖěɖěe mǐ ɖó ná ɖó bá dó kpo ɖo ganjí ɖo agbaza mɛ lɛ́ é wú. Ényí mǐ nɔ ɖu nǔ ganjí, nɔ ba lanmɛ kpɔ́n ɖo gbesisɔmɛ, bo nɔ lɛ́ d’amlɔ ganjí ɔ, hwɛhwɛ ɔ, mǐ nɔ nɔ ganjí. Mɔ̌ ɖokpó ɔ, mǐ bǐ ko ɖu Xó Mawu tɔn xixa hwɛhwɛ, nǔ sísɔ́ nú kplé mǐtɔn lɛ́, do yětɔn mɛ yiyi kpó alɔ ɖíɖó ɖo yě mɛ kpó, gɔ́ nú alɔ ɖíɖó ɖo sinsɛnzɔ́ ɔ mɛ sín vǐví kpɔ́n. Wǔsyɛ́n dó lanmɛ nú mɛ sín nǔ mɔ̌hun lɛ́ nɔ d’alɔ mǐ bɔ mǐ nɔ ɖí xwi xá linlin nyanya lɛ́.—Hlɔ̌. 12:11, 12.

13-14. Nɛ̌ tuto gbigbɔ tɔn ɖagbe ɖé xwixwedó ka ko hɛn le wá nú klisánwun gbejínɔtɔ́ ɖé lɛ́ gbɔn?

¹³ Lin tamɛ dó kpɔ́ndéwú John éé ɖó xwe 39, bɔ è mɔ kansɛ́ɛzɔn e è ma nɔ yá wǔ mɔ nú mɛ mɔ̌ ǎ é ɖé ná é tɔn jí. Ðo bǐbɛ́mɛ ɔ, é ɖí xwi xá linlin masɔgbe lɛ́. É nɔ kanbyɔ́ éɖée ɖɔ: ‘Nɛ̌ un ka sixú ɖó xwe élɔ́ bo jɛ azɔn mɔ̌hun gbɔn?’ Xwe atɔn géé ɖó wɛ vǐ súnnu tɔn ɖe hwe ɔ nu. Étɛ́ ka d’alɔ John b’ɛ ɖí xwi xá linlin masɔgbe tɔn lɛ́? É ɖɔ: “Nǔ nɔ ci kɔ nú mì có, un nɔ tɛ́n kpɔ́n bo nɔ bló bɔ xwédo ce nɔ xwedó tuto gbigbɔ tɔn ɖé ɖo gbesisɔmɛ. Mǐ nɔ yi kplé lɛ́ bǐ, nɔ yi sinsɛnzɔ́ ɔ mɛ ɖo aklúnɔzángbla lɛ́ bǐ mɛ, bo nɔ lɛ́ sɛn Mawu ɖo xwédo mɛ ɖo gbesisɔmɛ, ényí mɔ̌ wiwa ná bo tlɛ vɛ́ wǔ ɔ nɛ́.” Ée John kpɔ́n gǔdo sɛ́ dó é ɔ, é ɖɔ gɔ́ ná ɖɔ: “Ðo ninɔmɛ syɛ́nsyɛ́n lɛ́ mɛ ɔ, wǔ sixú kú mǐ ɖo bǐbɛ́mɛ. Amɔ̌, un kplɔ́n ɖɔ é kún ná lín cóbɔ mǐ ná mɔ lěe Jexóva nɔ ná mǐ hlɔ̌nhlɔ́n e sín hudó mǐ ɖó é kpó lě do é yí wǎn nú mǐ sɔ é kpó ó. Jexóva ná d’alɔ we ɖo ali ɖokpó ɔ nu lěe é ko d’alɔ mì gbɔn é.”

¹⁴ Eliza e xó mǐ ɖɔ wá yi é ɖɔ: “Ényí un yi kplé, bo lɛ́ xwedó tuto nǔkplɔ́nkplɔ́n mɛɖésúnɔ tɔn tɔn ce hweɖébǔnu ɔ, é nɔ flín mì ɖɔ Jexóva nɔ ɖótó mì, bo lɛ́ yí wǎn nú mì tawun. Énɛ́ nɔ zɔ́n bɔ un nɔ ɖ’awǎjijɛ.” Nolan e nyí nukúnkpénǔwútɔ́ lɛ̌dó tɔn ɖé ɖo Aflíka é ɖɔ dó éɖésúnɔ kpó asi tɔn Diane kpó wú ɖɔ: “Ényí awakanmɛ ná bo tlɛ kú mǐ ɔ, mǐ nɔ tɛ́ dó tuto gbigbɔ tɔn mǐtɔn wú. Jexóva nɔ xlɛ́ nyi wɛn hwebǐnu ɖɔ émí ɖo alɔ dó mǐ wɛ bónú mǐ ná ɖó linlin ɖagbe. Mǐ nɔ tɛ́n kpɔ́n bo nɔ flín ɖɔ Jexóva ná d’alɔ mǐ, bo lɛ́ kɔn nyɔ̌ná dó mǐ jí; mǐ tuun lěe é ná wa mɔ̌ gbɔn é ǎ, amɔ̌, mǐ tuun ɖɔ é ná wa mɔ̌.”

15. Étɛ́ é ka sixú byɔ́ ɖɔ mǐ ní wa bá dó ɖu ɖo linlin nyanya lɛ́ jí? Nǎ kpɔ́ndéwú ɖé.

¹⁵ Ényí awakanmɛ kpo ɖo kúkú mǐ wɛ ɔ, nǔ ɖěvo ɖé lɛ́ kpo bɔ é sixú byɔ́ ɖɔ mǐ ní bló. Ði kpɔ́ndéwú ɔ, mǐ ní ɖɔ ɖɔ nɛgbé ɖo nǔ wa xá we wɛ. Bónú é ná xwɛ nú we ɔ, é sixú byɔ́ ɖɔ a ní wa nǔ hú zɔnlin ɖiɖi kpowun gbe bǐ gbe. Bo ná dó tuun nǔ e zɔ́n bɔ a ɖo wǔvɛ́ ɔ mɔ wɛ é ɔ, é sixú byɔ́ ɖɔ a ní ba do nú nǔ, alǒ é tlɛ sixú byɔ́ ɖɔ a ní ɖɔ xó xá dotóo ɖé. Mɔ̌ ɖokpó ɔ, é sixú byɔ́ ɖɔ mǐ ní ba do nú nǔ ɖo Biblu kpó wěma mǐtɔn lɛ́ kpó mɛ, bo tlɛ ɖɔ xó xá klisánwun e zin é ɖé bá dó kplɔ́n lěe mǐ ná ɖí xwi xá linlin nyanya e nɔ fɔ́n bo nɔ ɖo xwixwe tɔ́n wɛ lɛ́ é gbɔn é. Wěɖexámɛ e sixú d’alɔ é ɖěvo lɛ́ ɖíe.

16. Étɛ́ ka sixú d’alɔ we bɔ a ná tuun nǔ e nɔ zɔ́n bɔ a nɔ ɖó linlin masɔgbe lɛ́ é? (Ðɛhan 139:1-4, 23, 24)

¹⁶ Xo ɖɛ, bo gbéjé hudó hwiɖésúnɔ tɔn lɛ́ kpɔ́n. Axɔ́sú Davídi tuun ɖɔ Jexóva tuun émí ganjí. Énɛ́ wú ɔ, Davídi byɔ́ Jexóva ɖɔ é ní d’alɔ émí bónú émí ná tuun nǔ e zɔ́n “nǔ e ɖo gbigbo [émí] wɛ ɖo ayi mɛ é.” (Xa Ðɛhan 139:1-4, 23, 24.) Hwi lɔ sixú byɔ́ Jexóva ɖɔ é ní d’alɔ we bónú a ná tuun nǔ e zɔ́n bɔ a ɖo linlin masɔgbe lɛ́ ɖó wɛ é, bo lɛ́ mɔ nukúnnú jɛ lěe a ná ɖu ɖo yě jí gbɔn é mɛ. A sixú lɛ́ kan nǔ lěhun lɛ́ byɔ́ hwiɖée: ‘Étɛ́ ka sixú ko zɔ́n tawun bɔ ado nɔ hu mì? Nǔɖé ka ɖo fínɛ́ bo nɔ zɔ́n bɔ ado nɔ hu mì wɛ a? Ényí ado jɛ huhu mì jí ɔ, un ka nɔ tɛ́n kpɔ́n bo nɔ lin tamɛ dó nǔ ɖěɖěe nɔ ná mì awǎjijɛ lɛ́ é jí a?’

17. Xóta tɛ́ lɛ́ a ka sixú ba do ná ɖo nǔkplɔ́nkplɔ́n mɛɖésúnɔ tɔn towe hwenu bɔ yě sixú d’alɔ we bɔ a ná nɔ sɔ́ ayi ɖó linlin e nɔ ná hlɔ̌nhlɔ́n mɛ lɛ́ é jí? (Kpɔ́n ɖiɖe ɔ lɔmɔ̌.)

¹⁷ Blǒ bónú tuto Biblu kplɔ́nkplɔ́n tɔn mɛɖésúnɔ tɔn towe ní sɔgbe xá hudó towe lɛ́. Ényí a nɔ kplɔ́n nǔ dó jijɔ Jexóva tɔn ɖé lɛ́ wú sín hweɖénu jɛ hweɖénu ɔ, a ná ɖu le tɔn. Ði kpɔ́ndéwú ɔ, tamɛ linlin dó gbɛxixɔ ɔ kpó hwɛsɔ́kɛmɛ Jexóva tɔn kpó jí hɛn le wá nú mɛsɛ́dó Pɔ́lu tawun. Hwi lɔ sixú wa nǔ ɖokpó ɔ. A sixú zán Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́, Index des publications des Témoins de Jéhovah, alǒ azɔ̌wanú Biblu kplɔ́nkplɔ́n tɔn ɖěvo e tíin ɖo gbe towe mɛ lɛ́ é dó ba do nú nǔ dó xóta lěhun lɛ́ jí: nǔbláwǔkúnúmɛ Mawu tɔn, hwɛsɔ́kɛmɛ Mawu tɔn kpó wǎnyíyí Mawu tɔn e ma nɔ sɛ do ǎ é kpó. Ényí a mɔ xóta ɖěɖěe ná d’alɔ we lɛ́ é hǔn, slɛ́ yě ɖó wěma ɖé jí. Sɔ́ wěma ɔ ɖó fí e é ná nɔ bɔ a ná mɔ é, bo nɔ kplɔ́n xóta lɛ́ hwenu e linlin masɔgbe lɛ́ jɛ xwixwe tɔ́n jí é. Tɛ́n kpɔ́n bo zán nǔ ɖěɖěe a xa lɛ́ é ɖo ninɔmɛ hwiɖésúnɔ tɔn mɛ.—Filí. 4:8.

18. Étɛ́ lɛ́ kplɔ́nkplɔ́n ka ko d’alɔ klisánwun ɖé lɛ́?

¹⁸ Eliza e xó mǐ ɖɔ wá yi é ba do nú nǔ dó Jɔbu jí. É ɖɔ: “Un mɔ nyiɖée ɖo ninɔmɛ Jɔbu tɔn mɛ tawun. Mɛtɛ́nkpɔ́n ɖě jɛ ɖě gúdo wɛ é mɔ, bɔ awakanmɛ kú i tawun. É tlɛ tuun nǔ e wú é ɖo wǔvɛ́ se wɛ é ǎ có, é ka kpo ɖo ji ɖe dó Jexóva wú wɛ.” (Jɔb. 42:1-6) Diane e xó mǐ ɖɔ wá yi é ɖɔ: “Nyi kpó asú ce kpó nɔ zán wěma Dọnsẹpọ Jehovah dó kplɔ́n nǔ. É su nukún mǐtɔn mɛ ɖɔ Jexóva nɔ w’azɔ̌ ɖo mǐ wú lěe zɛ̌nmɛtɔ́ ɖé nɔ bló gbɔn nú ko é ɖɔhun. Mǐ nɔ sɔ́ ayi ɖó lě do awakanmɛ kú mǐ sɔ é jí ǎ, é nyɔ́ wa ɔ, mǐ nɔ tɛ́n kpɔ́n bo nɔ dó nukún lěe Jexóva ɖo azɔ̌ wa ɖo mǐ wú wɛ, bo ɖo tíntɛ́nkpɔ́n wɛ, bónú mǐ ná kpɔ́n te d’é jí gbɔn é wú. Énɛ́ nɔ zɔ́n bɔ mǐ nɔ sɛkpɔ́ ɛ d’é jí.”—Eza. 64:8.

MǏ SIXÚ KÚ D’É JÍ ÐƆ JEXÓVA NÁ D’ALƆ MǏ, BO LƐ́ D’AJƆ MǏ

19. Nɛ̌ nǔ ka sixú wá cí nú mǐ hweɖélɛ́nu? Amɔ̌, étɛ́ jí mǐ ka sixú kú dó?

¹⁹ Ényí mǐ ná bo tlɛ xwedó wěɖexámɛ e ɖo xóta élɔ́ mɛ lɛ́ é bǐ ɔ, é sixú wá jɛ hweɖélɛ́nu bɔ wǔ ná kú mǐ, alǒ ado ná hu mǐ. Ayǐ ɖé lɛ́ sixú wá hɔ́n bɔ awakanmɛ ná kú mǐ tawun. É ɖo mɔ̌ có, Jexóva sixú d’alɔ mǐ bɔ mǐ ná li fɛn nú linlin masɔgbe lɛ́ hwenu e yě wá xwetɔ́n é. Mǐ sixú kú d’é jí ɖɔ mǐ ná ɖó awǎjijɛ ɖo gbɛzán mǐtɔn mɛ, ɖibla nyí ɖo hwelɛ́bǐnu, ɖó mǐ zun xɔ́ntɔn vívɛ́ xá Jexóva, bo lɛ́ tuun ɖɔ nǔ e wa n’i wɛ mǐ ɖe é nyɔ́ nukún tɔn mɛ wútu.

20. Étɛ́ jí a ka kú dó?

²⁰ Mi nú mǐ ní kán ɖ’é jí, bo ma lɔn nú tagba mǐtɔn lɛ́, nǔ e jɛ dó mǐ jí wá yi lɛ́ é, alǒ nǔwanyido mǐtɔn lɛ́ ní zɔ́n bónú mǐ ní gɔn gbɛ sín vǐví ɖu ó. Jexóva hɛn ɔ, é ná d’alɔ mǐ bɔ agbɔ̌n mǐtɔn ná jɛ do hwenu e linlin masɔgbe lɛ́ wá xwetɔ́n é. (Ðɛh. 143:10) Gbe ɖokpó ná wá su bɔ linlin ɖagbe lɛ́ ɖíɖó sɔ́ ná vɛ́ wǔ nú mǐ ɖě ǎ. Hwenɛ́nu ɔ, nǔtí sɔ́ ná nɔ hu ado nú mǐ ǎ, bɔ mǐ fɔ́n tɛgbɛ ɔ, mǐ ná nɔ sɛn Jexóva Mawu wǎnyíyínɔ mǐtɔn kpó awǎjijɛ kpó.