Kpo ɖo hlɔ̌nhlɔ́n ná xɔ́ntɔn e a zun xá Jexóva é wɛ

1. Ðɔ nǔ e sín hudó gbɛtɔ́ ɖó é ɖé lɛ́. (Matíe 5:3)

JEXÓVA dá gbɛtɔ́ lɛ́ kpó hudó tawun tawun ɖé lɛ́ kpó. Ði kpɔ́ndéwú ɔ, mǐ ɖó hudó nǔɖuɖu, nǔzínzán kpó xwé kpó tɔn cóbá nɔ gbɛ. Ényí mǐ ba dandannú énɛ́ lɛ́ ɖě kpo, é ná bo tlɛ nyí nú hwenu kléwún ɖé ɔ, gbɛ nɔ vɛ́ wǔ dó mǐ. Gbɔn vo nú dǎ e Jexóva dá mǐ kpó hudó agbaza tɔn énɛ́ lɛ́ kpó é ɔ, é lɛ́ dá mǐ kpó hudó gbigbɔ tɔn ɖé kpó. (Xa Matíe 5:3.) Ényí mǐ ba ná ɖó awǎjijɛ nǔgbó ɔ ɔ, mǐ ɖó ná ɖe xlɛ́ ɖɔ mǐ tuun ɖɔ mǐ ɖó hudó énɛ́ bo ná kpo ɖo do tɔn sú wɛ.

2. Étɛ́ wú è ka sixú sɔ́ tuun e è “tuun ɖɔ” è “ɖó hudó Mawu tɔn” é jlɛ́ dó?

² Étɛ́ ka nyí tínmɛ mǐ ní “tuun ɖɔ” mǐ “ɖó hudó Mawu tɔn” tɔn? Xógbe e è zán ɖo gbe dodó ɔ mɛ é sín tínmɛ wɛ nyí è ní nyí nǔbyɔ́ɖutɔ́ ɖo gbigbɔ lixo. Lin tamɛ dó mɛ e nyí hɛ̌ntɔ́nɔ klókló bo nɔ byɔ́ nǔ ɖu é ɖé jí. Nǔzínzán tɔn lɛ́ vún bɔ é jínjɔ́n kɔ́mɛ ɖo alitó. Nǔɖuɖuhwedómɛ zɔ́n bɔ gǎn vɔ ɖo wǔ tɔn, lěe é cí ɖo wěxo é zɔ́n bɔ mɛ lɛ́ nɔ gbɔn kɛ́nkɛ́n n’i, é nɔ ɖo hwesivɔ́ syɛ́nsyɛ́n nu ɖo kéze lobo nɔ ɖo jɔhɔn syɛ́nsyɛ́n nu ɖo zǎnmɛ. Nǔbyɔ́ɖutɔ́ ɔ tuun ganjí ɖɔ cóbónú ninɔmɛ émítɔn ná kpɔ́n te ɔ, alɔ jɛ́n è ná dó émí. Ðo ali ɖokpó ɔ nu ɔ, mɛ e tuun ɖɔ émí ɖó hudó Mawu tɔn é ɖé, énɛ́ wɛ nyí, mɛ e nyí nǔbyɔ́ɖutɔ́ ɖo gbigbɔ lixo é ɖé ná ɖó hudó alɔdó tɔn cóbɔ ninɔmɛ tɔn ná kpɔ́n te. Énɛ́ wú ɔ, nǔɖuɖu gbigbɔ tɔn tootóbú e Jexóva sɔ́ nǔ ná nú mɛ e yí wǎn n’i lɛ́ é ɖuɖu nɔ sɔ́ akpakpa ɛ.

3. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo xóta élɔ́ mɛ ɔ, mǐ ná gbéjé nǔ e kpɔ́ndéwú nyɔ̌nu Fenisíinu e byɔ́ Jezu ɖɔ é ní d’alɔ émí é tɔn sixú kplɔ́n mǐ é kpɔ́n jɛ nukɔn. Tan énɛ́ tɛ ɖɛ̌ jijɔ ɖěɖěe mɛ e tuun ɖɔ émí ɖó hudó Mawu tɔn lɛ́ é ɖó ná ɖó lɛ́ é atɔn jí. Énɛ́ gúdo ɔ, mǐ ná ɖɔ xó dó kpɔ́ndéwú e súnnu élɔ́ lɛ́ e gbigbɔ nɔ xlɛ́ ali é sɔ́ ɖ’ayǐ é jí: mɛsɛ́dó Piyɛ́ɛ, mɛsɛ́dó Pɔ́lu kpó axɔ́sú Davídi kpó.

KPƆ́NDÉWÚ MƐÐÉESƆ́HWE, KANÐÓDÓNǓWÚ KPÓ NǓÐIÐI KPÓ TƆN

4. Étɛ́ ba wɛ nyɔ̌nu Fenisíinu ɖé ka ɖe ɖo Jezu gɔ́n?

⁴ Nyɔ̌nu Fenisíinu ɖé yi Jezu gɔ́n gbe ɖokpó. Vǐ nyɔ̌nu tɔn “ɖo wǔvɛ́ se wɛ tawun ɖó awǒvi ɖé ɖo jǐ tɔn.” (Mat. 15:21-28) Nyɔ̌nu ɔ jɛ kpo bo sa vo nú Jezu ɖɔ é ní d’alɔ émí. Nyɔ̌nu Fenisíinu énɛ́ ɖe jijɔ tají ɖé lɛ́ xlɛ́ hwenu e é yi Jezu gɔ́n é. Mǐ ní ɖɔ xó dó yě jí.

5. Jijɔ tɛ́ lɛ́ nyɔ̌nu ɔ ka ɖe xlɛ́? Nɛ̌ Jezu ka wa nǔ gbɔn? (Kpɔ́n ɖiɖe ɔ lɔmɔ̌.)

⁵ Nyɔ̌nu Fenisíinu ɔ ɖe xlɛ́ ɖɔ émí nɔ sɔ́ émíɖée hwe nǔgbó nǔgbó. Étɛ́wú mǐ ka sixú ɖɔ mɔ̌? Ðó é sin xomɛ hwenu e Jezu zán nǔjlɛ́dónǔwú e é cí ɖɔ é sɔ́ ɛ jlɛ́ dó cukúví ɖé wú é ɖɔhun é ǎ, bóyá, énɛ́ sixú nyí xwégbe kanlin e è nɔ mɔ ɖo kosi ɖé sín xwégbe é. Nɛ̌ hwɛ ka ná ko wa nǔ gbɔn ɖó xó e Jezu ɖɔ lɛ́ é kpó nǔ e é wa lɛ́ é kpó wú? A nǎ ko mɔ ɖɔ é zun émí bo gɔn alɔdó tɔn ba wɛ a? Nyɔ̌nu Fenisíinu ɔ wa nǔ gbɔn mɔ̌ ǎ. Ényí mɛɖéesɔ́hwe kɛ́ɖɛ́ wɛ é ɖe xlɛ́ ǎ, amɔ̌, é lɛ́ ɖe kanɖódónǔwú xlɛ́. Énɛ́ jɛ wě ɖo lěe é kpo ɖo vo sa nú Jezu wɛ ɖɔ é ní d’alɔ émí gbɔn é mɛ. Étɛ́ ka sísɛ́ ɛ b’ɛ wa nǔ gbɔn mɔ̌? Nǔɖiɖi e é ɖó nú Jezu é wɛ. Bɔ ée Jezu mɔ nǔɖiɖi ɖaxó e é ɖó é ɔ, é wá gbeta ɔ kɔn bo ná d’alɔ ɛ. Jezu ɖɔ ɖɔ “togun Izlayɛ́li tɔn e cí lɛ̌ngbɔ́ búbú ɖɔhun é” kɛ́ɖɛ́ wú wɛ è sɛ́ émí dó, có é ka nya gbigbɔ nyanya ɔ sín nyɔ̌nu kosi énɛ́ sín vǐ nyɔ̌nu jí.

6. Étɛ́ tan e ɖɔ xó dó nyɔ̌nu Fenisíinu ɔ wú é ka kplɔ́n mǐ?

⁶ Bo ná dó sú hudó gbigbɔ tɔn mǐtɔn lɛ́ sín do ɔ, mǐ lɔ ɖó ná tɛ́n kpɔ́n bo ɖó jijɔ ɖokpó ɔ lɛ́. Mǐ ɖó ná nɔ sɔ́ mǐɖée hwe, nɔ ɖó kan dó nǔ wú, bo lɛ́ ɖó nǔɖiɖi syɛ́nsyɛ́n. Mɛ e nɔ sɔ́ éɖée hwe é jɛ́n ná fɔ́n bo ná nɔ ɖo alɔdó Mawu tɔn byɔ́ wɛ. Mǐ ɖó ná lɛ́ ɖó nǔɖiɖi syɛ́nsyɛ́n nú Klísu Jezu, bo ná nɔ ɖeji dó mɛ ɖěɖěe zán wɛ é ɖe bo ɖo ali xlɛ́ ahwanvú tɔn lɛ́ wɛ é wú. (Mat. 24:45-47) Xomɛ nɔ hun Jexóva kpó Vǐ tɔn kpó dó hudó gbigbɔ tɔn mɛ ɖěɖěe nɔ ɖe jijɔ énɛ́ lɛ́ xlɛ́ lɛ́ é tɔn sín do súsú wú. (Sɔ́ jlɛ́ dó Jaki 1:5-7 wú.) Din ɔ, mi nú mǐ ní gbéjé ali e nu Jexóva nɔ ná nǔɖuɖu, nǔzínzán kpó xwé kpó mǐ ɖo gbigbɔ lixo ɖe é kpɔ́n. Mǐ ná mɔ nǔ e mǐ ɖó ná wa bá mɔ dandannú énɛ́ lɛ́ é, gbɔn kpɔ́ndéwú mɛsɛ́dó Piyɛ́ɛ kpó Pɔ́lu kpó tɔn, gɔ́ nú axɔ́sú Davídi tɔn gbígbéjé kpɔ́n gblamɛ.

KPO ÐO NǓ ÐU WƐ GANJÍ ÐO GBIGBƆ LIXO PIYƐ́Ɛ ÐƆHUN

7. Gbe tɛ́ Jezu ka ɖe nú Piyɛ́ɛ? Étɛ́ Piyɛ́ɛ ka ɖó ná lɛ́ wa? (Eblée lɛ́ 5:14–6:1)

⁷ Lin tamɛ dó kpɔ́ndéwú mɛsɛ́dó Piyɛ́ɛ tɔn jí. É ɖo Jwifu nukɔn nukɔntɔn ɖěɖěe tuun ɖɔ Jezu wɛ nyí Mɛsíya ɔ lɛ́ é mɛ. É tuun ɖɔ Jexóva ɖo Jezu zán dó kplɔ́n nǔ mɛ dó gbɛ mavɔmavɔ ɔ wú wɛ. (Jaan 6:66-68) Jezu fɔ́n sín kú é ɔ, cóbónú é ná yi jǐxwé ɔ, é ɖe gbe élɔ́ nú Piyɛ́ɛ: “Nǎ nǔɖuɖu lɛ̌ngbɔ́ví ce lɛ́.” (Jaan 21:17) Piyɛ́ɛ wa azɔ̌ énɛ́ kpó gbejíninɔ kpó, bɔ Jexóva tlɛ zán ɛ bɔ é wlán wěmasɛ́dómɛ we bɔ yě ɖo Biblu mɛ. Amɔ̌, Piyɛ́ɛ ɖésú ɖó ná ɖu nǔ ɖo gbigbɔ lixo. Ði kpɔ́ndéwú ɔ, é kplɔ́n wěma ɖěɖěe Mawu sɔ́ dó ayi mɛ nú mɛsɛ́dó Pɔ́lu bɔ é wlán wá yi lɛ́ é. Piyɛ́ɛ yí gbe ɖɔ nǔ e Pɔ́lu wlán é ɖé lɛ́ “vɛ́ wǔ bɔ è ná mɔ nukúnnú jɛ mɛ.” (2 Pi. 3:15, 16) Amɔ̌, é ɖo wɛn ɖɔ Piyɛ́ɛ ɖó kan dó nǔ wú bo ɖeji ɖɔ Jexóva ná d’alɔ émí bɔ émí ná mɔ nukúnnú jɛ “nǔɖuɖu syɛ́nsyɛ́n” e Mawu sɔ́ dó ayi mɛ nú Pɔ́lu bɔ é xwlé mɛ ɖo wěmasɛ́dómɛ tɔn lɛ́ mɛ é mɛ bo lɛ́ zán.—Xa Eblée lɛ́ 5:14–6:1.

8. Hwenu e wɛnsagun Jexóva tɔn ɖé ɖɔ nú Piyɛ́ɛ ɖɔ é ní bló hǔzúhúzú ɖé é ɔ, étɛ́ Piyɛ́ɛ ka wa?

⁸ Piyɛ́ɛ ɖe xlɛ́ ɖɔ émí ɖi nǔ nú Jexóva gbɔn ali e è xlɛ́ ɛ é xwixwedó gblamɛ. Ði kpɔ́ndéwú ɔ, gbe ɖokpó ɔ, Piyɛ́ɛ mɔ nǔmimɔ ɖé bɔ wɛnsagun ɖé ɖɔ n’i ɖɔ é ní ɖu kanlin ɖěɖěe Mɔyízisɛ́n ɔ ma ná gbe ɖɔ Jwifu lɛ́ ní ɖu ǎ lɛ́ é. Ali énɛ́ e è xlɛ́ mɛ é ná ko cí ɖě nú Jwifu lɛ́. Ðo bǐbɛ́mɛ ɔ, Piyɛ́ɛ yí gbe ɖɔ: “Gbeɖé kpɔ́n Aklúnɔ, ɖó un ɖu nǔ e sɛ́n gbɛ́ é kpó nǔ e nyí nǔblíblí é kpó ɖě kpɔ́n ǎ.” Énɛ́ gúdo ɔ, è ɖɔ n’i ɖɔ: “Nǔ e Mawu ko slá wǔ ná lɛ́ é ɔ, ma sɔ́ ɖɔ ɖɔ sɛ́n gbɛ́ nǔ énɛ́ lɛ́ ɖě ó.” (Mɛ. 10:9-15) Piyɛ́ɛ wlí nǔkplɔ́nmɛ ɔ. Nɛ̌ mǐ ka wa gbɔn bo tuun? Ée é mɔ nǔmimɔ ɔ gúdo tlóló é ɔ, nya atɔn e kosi e nɔ nyí Kɔnɛ́yi é sɛ́ dó lɛ́ é wá Piyɛ́ɛ gɔ́n bo byɔ́ ɛ ɖɔ é ní xwedó émí bá yi ɖɔ xó nú gǎn émítɔn. Ð’ayǐ wɛ ɔ, Piyɛ́ɛ ná yí gbe bo byɔ́ kosi ɖě xwé gbeɖé ǎ. Jwifu lɛ́ nɔ mɔ ɖɔ kosi lɛ́ ɔ, mɛ blíblí wɛ yě nyí. (Mɛ. 10:28, 29) Amɔ̌, afɔjíafɔjí wɛ Piyɛ́ɛ húzú linlin tɔn, bo se tónú nú Jexóva. (Nǔx. 4:18) É jlá wɛn ɔ Kɔnɛ́yi kpó mɛ e ɖo xwé tɔn gbe lɛ́ é kpó, bɔ mɔ e é mɔ bɔ yě yí nǔgbó ɔ, bɔ gbigbɔ mímɛ́ jɛ te dó yě jí lobɔ yě bló batɛ́mu é dó awǎjijɛ n’i.—Mɛ. 10:44-48.

9. Ényí mǐ nɔ kplɔ́n nǔ ɖěɖěe é sixú vɛ́ wǔ bɔ mǐ ná mɔ nukúnnú jɛ mɛ lɛ́ é ɔ, ɖɔ ali e nu mǐ sixú ɖu le tɔn ɖe é we.

⁹ Piyɛ́ɛ ɖɔhun ɔ, mǐ ɖó ná nɔ nu anɔ̌sin alǒ kplɔ́n nǔgbó bǐbɛ́mɛ tɔn e ɖo Xó Mawu tɔn mɛ lɛ́ é hwɛhwɛ. Nǔɖuɖu syɛ́nsyɛ́n gbigbɔ tɔn lɛ́ lɔmɔ̌ sín xovɛ́ ɖó ná nɔ sin mǐ, yě wɛ nyí nǔgbó ɖěɖěe é sixú vɛ́ wǔ bɔ è ná mɔ nukúnnú jɛ mɛ lɛ́ é. Mǐ ɖó ná nɔ ɖe hwenu ɖó vo, bo ná nɔ lɛ́ ɖo gbesisɔmɛ bá dó gǎn bá ɖó nukúnnúmɔjɛnǔmɛ e gɔ́ngɔ́n é dó Xó Mawu tɔn wú, bɔ mɔ̌ wiwa ka sɔ mɔ̌ kɔ. Étɛ́wú? É hwe bǐ ɔ, mǐ nɔ ɖu le tɔn ɖo ali we nu: Nukɔntɔn ɔ, mǐ nɔ kplɔ́n nǔ dó Jexóva wú, bɔ énɛ́ nɔ zɔ́n bɔ wǎnyíyí e mǐ ɖó n’i é kpó sísí e mǐ ɖó n’i é kpó nɔ gɔ́ngɔ́n d’é jí; bɔ wegɔ́ ɔ, akpakpa nɔ sɔ́ mǐ hú gǎn nú mǐ ná ɖɔ xó nú mɛ ɖěvo lɛ́ dó Tɔ́ mǐtɔn jǐxwé tɔn hlɔ̌nhlɔ́nnɔ ɔ wú. (Hlɔ̌. 11:33; Nǔɖe. 4:11) Kpɔ́ndéwú Piyɛ́ɛ tɔn lɛ́ kplɔ́n nǔ ɖěvo mǐ: Ényí è jlá nukúnnúmɔjɛnǔmɛ e mǐ ɖó dó Xó Mawu tɔn wú é ɖé lɛ́ ɖó ɔ, mǐ ɖó ná yá wǔ húzú linlin mǐtɔn kpó lěe mǐ nɔ wa nǔ gbɔn é kpó. Mɔ̌ jɛ́n mǐ ná wa cóbó ná kpo ɖo nǔ ɖu wɛ ganjí ɖo gbigbɔ lixo bá lɛ́ kpo ɖo nyǐnyɔ́ zán nú Jexóva wɛ.

KPO ÐO GBƐTƆ́ YƆ̌YƆ́ Ɔ SƆ́ DÓ WƐ PƆ́LU ÐƆHUN

10. Sɔgbe xá Kolósinu lɛ́ 3:8-10 ɔ, étɛ́ mǐ ka ɖó ná wa bá dó dó awǎjijɛ nú Jexóva?

¹⁰ Bo ná dó nyɔ́ Mawu nukúnmɛ ɔ, mǐ ɖó ná nɔ ɖu nǔ ɖěvo ɖěɖěe Jexóva nɔ sɔ́ nǔ tɔn lɛ́ é sín le, yě wɛ nyí nǔzínzán gbigbɔ tɔn lɛ́. Étɛ́ xó ɖɔ gbé mǐ ka ja? Mɛsɛ́dó Pɔ́lu wlán ɖɔ mǐ ɖó ná “ɖe gbɛtɔ́ xóxó ɔ . . . nyi ayǐ, bo sɔ́ gbɛtɔ́ yɔ̌yɔ́ ɔ dó.” (Xa Kolósinu lɛ́ 3:8-10.) Mɔ̌ wiwa ka nyí gbe ɖokpó nú ɖé ǎ. Lin tamɛ dó kpɔ́ndéwú Pɔ́lu ɖésú tɔn jí. Sín hwenu e é ɖo dɔ̌nkpɛ mɛ é wɛ é ko dó gǎn syɛ́nsyɛ́n bónú nǔ tɔn ná nyɔ́ Mawu nukúnmɛ. (Ga. 1:14; Filí. 3:4, 5) Amɔ̌, é tuun lěe é ná sɛn Mawu ɖo ali e sɔgbe é nu gbɔn é tawun ǎ. Tuun e é ma tuun nǔkplɔ́nmɛ Klísu tɔn lɛ́ ǎ é kpó go e é nɔ yí é kpó zɔ́n bɔ é nɔ “sí mɛ ǎ,” bɔ walɔ nyanya lɛ́ lɛ́ ɖo fɛn tɔn nu.—1 Tim. 1:13.

11. Gǎnmaɖó tɛ́ jí Pɔ́lu ka dó gǎn syɛ́nsyɛ́n bo ɖu ɖe? Tínmɛ.

¹¹ Cóbónú Pɔ́lu ná húzú klisánwun ɔ, é nɔ yá wǔ sin xomɛ tawun. Tan e ɖo mɛsɛ́dó mɛ é ɖé ɖɔ ɖɔ Pɔ́lu sin xomɛ tawun dó ahwanvú Jezu tɔn lɛ́, bo ‘kán ɖ’é jí bo ná dó ya nú yě, lobo hu yě.’ (Mɛ. 9:1) Ée Pɔ́lu húzú klisánwun gúdo é ɔ, é ɖo wɛn ɖɔ é dó gǎn syɛ́nsyɛ́n bo jó jijɔ énɛ́ dó. (Efɛ́. 4:22, 31) É ɖo mɔ̌ có, hwenu e Pɔ́lu kpó Baanabási kpó sɔ́ ɖɛ̌ ɖɛ̌ mɛ é ɔ, Pɔ́lu “sin xomɛ bo dɔn nǔ syɛ́nsyɛ́n.” (Mɛ. 15:37-39) Énɛ́ kú awakanmɛ nú Pɔ́lu, amɔ̌, é jó gbe ǎ. É kpo ɖo ‘nǔ dó agbaza tɔn wɛ,’ énɛ́ wɛ nyí ɖɔ é kpo ɖo xwi ɖí xá gǎnmaɖó tɔn lɛ́ wɛ, bónú nǔ tɔn ní kpo ɖo Jexóva nukúnmɛ nyɔ́ wɛ.—1 Kɔ. 9:27.

12. Étɛ́ ka d’alɔ Pɔ́lu bɔ é jó jijɔ nyanya e é ɖó lɛ́ é dó?

¹² Pɔ́lu kpé wú bo ɖe jijɔ nyanya e ɖo fɛn tɔn nu lɛ́ é nyi ayǐ, énɛ́ gúdo ɔ, é sɔ́ gbɛtɔ́ yɔ̌yɔ́ ɔ dó, ɖó é ɖeji dó hlɔ̌nhlɔ́n éɖésú tɔn wú ǎ wútu. (Filí. 4:13) Piyɛ́ɛ ɖɔhun ɔ, Pɔ́lu gán jɛ “hlɔ̌nhlɔ́n e Mawu nɔ ná mɛ é” wú. (1 Pi. 4:11) É ɖo mɔ̌ có, hweɖélɛ́nu ɔ, Pɔ́lu nɔ ɖe afɔ nyi do bɔ awakanmɛ nɔ kú i. Amɔ̌, ényí awakanmɛ kú i ɔ, é nɔ lin tamɛ dó nǔ ɖagbe ɖěɖěe Tɔ́ tɔn jǐxwé tɔn ɔ ko wa n’i lɛ́ é jí, bɔ énɛ́ nɔ ná hlɔ̌nhlɔ́n kán e é kán ɖ’é jí bá kpo ɖo gǎn dó wɛ é.—Hlɔ̌. 7:21-25.

13. Nɛ̌ mǐ ka sixú xwedó kpɔ́ndéwú Pɔ́lu tɔn gbɔn?

¹³ Mǐ sixú xwedó kpɔ́ndéwú Pɔ́lu tɔn gbɔn gbeyíyí ɖɔ ényí mǐ ná bo ko ɖo Jexóva sɛn wɛ sín hwenu línlín ɖíe ɔ, mǐ ɖó ná kpo ɖo gǎn dó wɛ bá ɖe gbɛtɔ́ xóxó ɔ nyi ayǐ lobo sɔ́ gbɛtɔ́ yɔ̌yɔ́ ɔ dó gblamɛ, énɛ́ wɛ nyí nǔzínzán gbigbɔ tɔn e Mawu nɔ ná mɛ é. Ényí awakanmɛ kú mǐ, ɖi kpɔ́ndéwú ɔ, ɖó mǐ kpé wú bo ɖu ɖo mǐɖée jí ǎ alǒ mǐ kpé wú bo ɖɔ xó nú mɛɖé kpó xomɛnyínyɔ́ kpó ǎ wútu ɔ, mǐ ɖó ná mɔ ɖɔ nukúnɖíɖó ɖě kún sɔ́ ɖe nú mǐ ó ǎ. É nyɔ́ wa ɔ, mǐ ɖó ná kpo ɖo nǔ e gbé nya wɛ mǐ ɖe é, énɛ́ wɛ nyí tɛ́n e tɛ́n kpɔ́n wɛ mǐ ɖe bo ná w’azɔ̌ ɖo lěe mǐ nɔ lin nǔ gbɔn é kpó lěe mǐ nɔ wa nǔ gbɔn é kpó wú é gbé nya wɛ. (Hlɔ̌. 12:1, 2; Efɛ́. 4:24) É ɖo mɔ̌ có, ée mǐ ná ɖo mɔ̌ wa wɛ é ɔ, mǐ ɖó ná flín nǔgbó tají élɔ́: Ényí mǐ ba ɖɔ mɛ alɔkpa e mǐ nyí é ní ɖo te kpɔ́n d’é jí wɛ ɔ, mǐ ɖó ná kpo ɖo nukúnnú mɔ jɛ nǔ e Jexóva byɔ́ mǐ lɛ́ é mɛ d’é jí wɛ.

XWEDÓ KPƆ́NDÉWÚ DAVÍDI TƆN, BO YÍ GBE NÚ JEXÓVA NÍ NYA XƐ ÐO JǏ TOWE

14-15. Ali tɛ́ nu Jexóva ka nɔ ná xwé gbigbɔ tɔn togun tɔn ɖe? (Ðɛhan 27:5) (Kpɔ́n ɖiɖe ɔ lɔmɔ̌.)

¹⁴ Bo ná dó ɖó awǎjijɛ adodwé ɔ ɔ, ényí nǔɖuɖu gbigbɔ tɔn kpó nǔzínzán gbigbɔ tɔn kpó kɛ́ɖɛ́ sín hudó wɛ mǐ ɖó ǎ. Mǐ lɛ́ ɖó xwé gbigbɔ tɔn sín hudó. Étɛ́ ka nɔ nyí mɔ̌? Nɛ̌ mǐ ka sixú kú d’é jí ɖɔ mǐ kpo ɖo bibɛtɛn ba wɛ ɖo glɔ̌ tɔn gbɔn?

¹⁵ Axɔ́sú Davídi ɖɔ xó dó xwé gbigbɔ tɔn e Jexóva nɔ ná mɛ é wú. (Xa Ðɛhan 27:5.) Jexóva nɔ nya xɛ ɖo togun tɔn jí bɔ mɛ ɖěbǔ alǒ nǔ ɖěbǔ sixú wa nǔ dó nǔɖiɖi e togun tɔn ɖó n’i é wú káká sɔ́yi ǎ. Nɛ̌ Jexóva ka nɔ nya xɛ ɖo mɛsɛntɔ́ tɔn lɛ́ jí sín nǔ e nɔ gosín zɔ bo sixú wa nǔ dó yě wú lɛ́ é sí gbɔn? É d’akpá ɖɔ alyánnú e è ná sɔ́ dó yě jí é ɖěbǔ kún ná ɖó ɖuɖéjí ó. (Ðɛh. 34:8; Eza. 54:17) Satáan kpó awǒvi tɔn lɛ́ kpó ɖó hlɔ̌nhlɔ́n có, yě sixú kpé wú bo wa nǔ e ná hɛn nǔ gblé dó mǐ wú káká sɔ́yi é ɖě dó mǐ wú ǎ. Yě ná bo tlɛ hu mǐ ɔ, Jexóva ná fɔ́n mǐ ɖo fínfɔ́n sín kú hwenu. (1 Kɔ. 15:55-57; Nǔɖe. 21:3, 4) Jexóva nɔ lɛ́ d’alɔ mǐ bɔ mǐ nɔ ɖí xwi xá linkpɔ́n ɖěɖěe sixú wa nǔ dó mǐ wú káká sɔ́yi lɛ́ é. (Nǔx. 12:25; Mat. 6:27-29) Gɔ́ ná ɔ, Tɔ́ wǎnyíyínɔ mǐtɔn ná mǐ xwédo gbigbɔ tɔn e mɛ nɔví súnnu kpó nɔví nyɔ̌nu kpó e nɔ nɔ gǔdo nú mǐ lɛ́ é ɖe é ɖé. Mɛxó agun tɔn lɛ́ lɔ ɖo xwédo énɛ́ mɛ, bo nɔ nya xɛ ɖo mǐ jí. (Eza. 32:1, 2) Ényí mǐ kplé ɔ, hwɛhwɛ wɛ è nɔ flín mǐ ali tawun tawun ɖěɖěe nu mǐ sixú ɖu xɛnyaɖomɛjí Jexóva tɔn sín le ɖe lɛ́ é.—Ebl. 10:24, 25.

16. Ali tɛ́ lɛ́ nu Jexóva ka nya xɛ Davídi jí ɖe?

¹⁶ Hwenu e Davídi se tónú nú Jexóva é ɔ, é nya xɛ ɖo jǐ tɔn sín nǔ e sixú wa nǔ dó wǔ tɔn bɔ mɛ ɖěɖěe nɔ sɔ́ jlǒ dó hu hwɛ lɛ́ é nɔ se xɔxɔ tɔn lɛ́ é sí. (Sɔ́ jlɛ́ dó Nǔnywɛ́xó 5:1, 2 wú.) Amɔ̌, hwenu e Davídi xo nǔgbódodó Mawu tɔn lɛ́ nyi kɛ́n é ɔ, Jexóva nya xɛ ɖo jǐ tɔn bónú é gɔn xɔxɔ nǔ e é wa lɛ́ é tɔn se ǎ. (2 Sam. 12:9, 10) Bɔ hwe ɖěɖěe nu Davídi se wǔvɛ́ nǔ ɖěɖěe éɖésúnɔ ma wa ǎ lɛ́ é tɔn é ka lo? Davídi ɖɔ nǔ e ɖo ayi tɔn mɛ é nú Jexóva ɖo ɖɛ mɛ, bɔ Jexóva ɖe linkpɔ́n e mɛ Davídi ɖe é kpo, gbɔn jiɖe e é vɔ́ ná ɛ ɖɔ émí yí wǎn n’i tawun bɔ nǔ tɔn nɔ lɛ́ ɖu ayi mɛ nú émí é gblamɛ.—Ðɛh. 23:1-6.

17. Nɛ̌ mǐ ka sixú xwedó kpɔ́ndéwú Davídi tɔn gbɔn?

¹⁷ Mǐ sixú xwedó kpɔ́ndéwú Davídi tɔn gbɔn wěɖexámɛ Jexóva tɔn biba hwenu e mǐ ja gbeta lɛ́ kɔn wá gbé é gblamɛ. Mǐ nɔ lɛ́ yí gbe ɖɔ mǐ sixú se wǔvɛ́ hweɖélɛ́nu, b’ɛ kún ka nyí ɖɔ Jexóva gɔn xɛ nya ɖo mǐ jí wɛ ó, loɔ, ɖó mǐ wá gbeta nyanya lɛ́ kɔn wútu wú wɛ. (Ga. 6:7, 8) Gɔ́ ná ɔ, ényí mǐ ma wa nǔɖé nyi do ǎ, bo ka ɖo mɛtɛ́nkpɔ́n lɛ́ ɖí xwi xá wɛ ɔ, mǐ nɔ ɖɔ nǔ e ɖo ayi mǐtɔn mɛ lɛ́ é nú Jexóva ɖo ɖɛ mɛ, bo nɔ ɖeji ɖɔ é ná nya xɛ ɖo ayi mǐtɔn kpó linlin mǐtɔn kpó jí.—Filí. 4:6, 7.

KPO ÐO HUDÓ MAWU TƆN E A ÐÓ É SÍN DO SÚ WƐ

18. Wǔvɛ́ tɛ́ mǐ ka nɔ ɖí xwi xá? Nɛ̌ mǐ ka sixú kpo ɖo hudó Mawu tɔn e mǐ ɖó é sín do sú wɛ gbɔn? (Kpɔ́n ɖiɖe lɛ́ lɔmɔ̌.)

¹⁸ Xóta xwe 2026 tɔn mǐtɔn wɛ nyí: “Awǎjijɛnɔ wɛ nyí mɛ e tuun ɖɔ émí ɖó hudó Mawu tɔn lɛ́ é.” É ɖo tají tawun ɖɔ è ní wa nǔ e Jezu ɖɔ é, bo ɖeji dó ali e Jexóva nɔ xlɛ́ mɛ é wú ɖo égbé. Étɛ́wú? Ðó mɛ e ma ɖó awǎjijɛ ǎ, bo nɔ gbɛ́ ɖɔ émí kún ɖó hudó mɔ̌hun ɖé ó alǒ nɔ tɛ́n kpɔ́n bo ná sú hudó énɛ́ sín do nú yěɖée gbɔn sinsɛn nǔvú alǒ tamɛ-núkplɔ́nmɛ lɛ́ gblamɛ lɛ́ é wɛ lɛ́ lɛ̌ dó mǐ wútu. Mǐ ɖó ná lɔn nú walɔ yětɔn ná byɔ́ fɛnnu nú mǐ ǎ. Gbɔn nɛ̌ é? Mǐ ɖó ná kpo ɖo Xó Jexóva tɔn kplɔ́n wɛ, kpo ɖo lěe mǐ ná ɖe jijɔ ɖěɖěe nɔ nyɔ́ nukún tɔn mɛ lɛ́ é xlɛ́ gbɔn é kplɔ́n wɛ, bo ná nɔ se tónú n’i lobo ná nɔ lɛ́ yí gbe bɔ é ná nɔ nya xɛ ɖo mǐ jí.