Nǔ e nǔxatɔ́ lɛ́ kanbyɔ́ lɛ́ é

“Linlin” tɛ́ Jexóva ka ná sɔ́ d’ayi mɛ nú akɔta lɛ́ ɖo malínmálín mɛ?

Nǔɖexlɛ́mɛ 17:16, 17 ɖɔ dó bǐbɛ́ wǔvɛ́ ɖaxó ɔ tɔn wú ɖɔ: “Zo wǒ e a mɔ lɛ́ é kpó gběkanlin ɔ kpó ná gbɛ́ wǎn nú tonyatɔ́ ɔ, bo ná bɛ́ nǔ e é ɖó lɛ́ é bǐ, lobo jó è dó nyi mɛ̌; yě ná ɖu lan tɔn, bo ná sɔ́ myɔ dó fyɔ́ ɛ bǐ mlɛ́mlɛ́. Ðó Mawu sɔ́ dó ayi yětɔn mɛ ɖɔ yě ní wa nǔ sɔgbe xá linlin émítɔn, ɛɛn, yě ní wa nǔ sɔgbe xá linlin ɖokpó ɔ e yě ɖó é, gbɔn axɔ́súɖuto yětɔn níná gběkanlin ɔ gblamɛ.” Ð’ayǐ ɔ, wěma mǐtɔn lɛ́ ɖɔ ɖɔ “linlin” e Jexóva ná sɔ́ dó ayi mɛ nú akɔta lɛ́ é wɛ nyí ɖɔ yě ní sú kún dó nú sinsɛn nǔvú.

É ɖo mɔ̌ có, é byɔ́ ɖɔ è ní bló hǔzúhúzú ɖé. “Linlin” e Jexóva ná sɔ́ dó ayi mɛ nú akɔta lɛ́ é wɛ nyí ɖɔ yě ní ‘ná axɔ́súɖuto yětɔn gběkanlin ɔ.’ Bo ná dó mɔ nukúnnú jɛ lěe énɛ́ ná jɛnu gbɔn é mɛ ɔ, mǐ ní gbéjé nǔkanbyɔ́ élɔ́ lɛ́ kpɔ́n.

Mɛ tawun tawun tɛ́ lɛ́ xó nǔɖɔɖayǐ ɔ ka ɖɔ? “Tonyatɔ́ ɔ” wɛ è nɔ lɛ́ ylɔ́ ɖɔ “Babilɔ́nu ɖaxó ɔ”; é nɔ te nú kplékplé sinsɛn nǔvú lɛ́ tɔn. “Gběkanlin vɔvɔ cɛ́cɛ́” ɔ nɔ te nú Gbɛ̌ kplékplé akɔta lɛ́ tɔn. È ɖó tutoblónúnǔ énɛ́ ayǐ azɔn nukɔntɔn ɔ ɖo 1919 bónú é ná xo fífá kan gbɔn gbɛ ɔ bǐ mɛ; Akɔjijɛ akɔta lɛ́ tɔn wɛ è nɔ ylɔ́ ɛ ɖɔ ɖ’ayǐ. (Nǔɖe. 17:3-5) “Zo wǒ” lɛ́ nɔ te nú axɔ́súɖuto e nɔ nɔ gǔdo nú gběkanlin ɔ lɛ́ é bǐ.

Kancícá tɛ́ ka ɖo tonyatɔ́ ɔ kpó gběkanlin vɔvɔ cɛ́cɛ́ ɔ kpó tɛ́ntin? Tonyatɔ́ ɔ ɖo “ayǐjínjɔ́n” ɖo gběkanlin ɔ jí. Tínmɛ énɛ́ tɔn wɛ nyí ɖɔ é nɔ nɔ gǔdo n’i bo nɔ tɛ́n kpɔ́n bo nɔ bló bɔ é ná wa nǔ e éyɛ́ tonyatɔ́ ɔ ba é.

Étɛ́ ka ná jɛ dó tonyatɔ́ ɔ wú? Gběkanlin ɔ kpó zo wǒ e nɔ nɔ gǔdo n’i lɛ́ é kpó “ná gbɛ́ wǎn nú tonyatɔ́ ɔ.” Yě ná bɛ́ dɔkun tɔn lɛ́ bo ná lɛ́ ɖe lě do é nyí mɛ nyanya sɔ é xlɛ́ dó ɖe wǎngbɛ́númɛ yětɔn xlɛ́. Bɔ énɛ́ gúdo ɔ, yě ná sú kún tɔn dó lěe Jexóva ko ɖɔ ɖɔ é ná jɛ gbɔn é pɛ́pɛ́pɛ́. (Nǔɖe. 17:1; 18:8) Lěe sinsɛn nǔvú sín xó ná fó gbɔn é nɛ́. Amɔ̌, cóbónú énɛ́ ná jɛ ɔ, Jexóva ná bló bɔ akɔta lɛ́ ná wa nǔ e ma ko jɛ kpɔ́n ǎ é ɖé.

Étɛ́ Jexóva ka ná sísɛ́ akɔta lɛ́ bɔ yě ná wa? É ná sɔ́ “linlin tɔn” dó ayi mɛ nú zo wǒ lɛ́, énɛ́ wɛ nyí ɖɔ “yě [ní] ná hlɔ̌nhlɔ́n yětɔn kpó acɛ yětɔn kpó gběkanlin [vɔvɔ cɛ́cɛ́] ɔ,” é wɛ nyí Gbɛ̌ kplékplé akɔta lɛ́ tɔn. (Nǔɖe. 17:13) Lin tamɛ dó tínmɛ énɛ́ tɔn jí. Acɛkpikpa lɛ́ ɖésúnɔ ná wá gbeta ɔ kɔn kpowun bo ná zé hlɔ̌nhlɔ́n yětɔn kpó acɛ yětɔn kpó jó nú gběkanlin ɔ wɛ a? Éǒ! Nǔɖɔɖayǐ ɔ xlɛ́ ɖɔ Mawu ɖésúnɔ wɛ ná sísɛ́ yě bɔ yě ná wa mɔ̌. (Nǔx. 21:1; sɔ́ jlɛ́ dó Ezayíi 44:28 wú.) Kpɛɖé kpɛɖé wɛ yě ka ná zé hlɔ̌nhlɔ́n yětɔn jó n’i a? Éǒ! É ɖo wɛn ɖɔ ajijimɛ wɛ hǔzúhúzú énɛ́ ná wá. Énɛ́ gúdo ɔ, gběkanlin e è ná acɛ yɔ̌yɔ́ é ná bló bɔ hwɛ e Jexóva ɖó nú sinsɛn nǔvú é ná jɛnu gbɔn kún súsú dó n’i bǐ mlɛ́mlɛ́ gblamɛ.

Énɛ́ gúdo ɔ, étɛ́ mǐ ka sixú ɖó nukún? É byɔ́ ɖɔ mǐ ní ɖó nukún ɖɔ è ní ɖɔ dó to ɖɔ acɛkpikpa lɛ́ jɛ gǔdo nɔ nú Gbɛ̌ kplékplé akɔta lɛ́ tɔn jí kpɛɖé kpɛɖé hú gǎn ǎ. Nǔ e mǐ sixú ɖó nukún é ɖíe: Ðo ajijimɛ ɔ, Jexóva ná bló bɔ acɛkpikpa lɛ́ bǐ ná zé hlɔ̌nhlɔ́n yětɔn jó nú Gbɛ̌ kplékplé akɔta lɛ́ tɔn. Hwenu e énɛ́ ná jɛ é ɔ, mǐ ná tuun ɖɔ wǔvɛ́ ɖaxó ɔ wɛ ɖo nǎ bɛ́ wɛ nɛ́. Énɛ́ wú ɔ, “mi nú mǐ ní nɔ wunzɛn, bo lɛ́ zán nǔwúkpíkpé tamɛ linlin tɔn mǐtɔn,” ɖó hǔzúhúzú maɖónukún lɛ́ ná wá zaanɖé din!—1 Tɛ. 5:6.