Alɔdó nú nyɔ̌nu ɖěɖěe wú è xo dǎka lɛ́ é

Lěe xóta “Hihọ́-Bibasina Yọnnu Lẹ—Nuhe Biblu Dọ” éé ɖo jw.org jí é bɛ́ gbɔn é nɛ́. Ðo vivɔnu xóta énɛ́ tɔn ɔ, fí ɖé ɖo fínɛ́ bo sixú d’alɔ we (lien) bɔ a ná yí xóta ɔ ɖó PDF sín alɔ jí, bo zín lobo nyɛ́ b’ɛ ná nyí tláti wěxwɛ ɛnɛnɔ ɖé. Nɔví nyɔ̌nu ɖé nɔ nɔ États-Unis bo nɔ nyí Stacy bo ɖɔ: “Un zín xóta ɔ ɖé lɛ́ bɔ nyi kpó nɔví nyɔ̌nu ɖěvo kpó yi má ɖo fí e nyɔ̌nu lɛ́ nɔ ba bibɛtɛn ɖe ɖo xá e mɛ agun mǐtɔn nɔ ɖɔ mawuxó gbɔn é ɖé.”

Mɛ e nɔ w’azɔ̌ ɖo fínɛ́ é ɖé kanbyɔ́ ɖɔ émí ka ná sixú mɔ ɖěvo lɛ́ bá má nú mɛ e nɔ nɔ bibɛtɛnkpá ɔ mɛ lɛ́ é a jí. Wǎgbɔ tɔn ɔ, tláti énɛ́ lɛ́ 40 jɛjí, gɔ́ nú káti jw.org tɔn 30 wɛ è má. Nukɔnmɛ e yě lɛ́ lɛ́ kɔ yi é ɔ, mɛ e nɔ kpé nukún dó bibɛtɛnkpá ɔ wú é ɖɔ ɖɔ émí ba ɖɔ è ní xlɛ́ lěe Biblu kplɔ́nkplɔ́n nɔ yi gbɔn é mɛ e nɔ nɔ fínɛ́ lɛ́ é.

Nǔ mɔ̌hun lɛ́ jɛ dó Stacy kpó nɔví nyɔ̌nu we ɖěvo lɛ́ kpó jí ɖo bibɛtɛnkpá ɖěvo mɛ, fí e yě má tláti ɔ atɔ́ɔ́n ɖe bɔ mɛ lɛ́ lɛ́vɔ́ byɔ́ ɖěvo lɛ́ ɖe é. Mɛ e nɔ w’azɔ̌ ɖo fínɛ́ lɛ́ é ɖokpó ɖɔ: “Tláti élɔ́ ná d’alɔ nyɔ̌nu e ɖo fí lɛ́ é.” É ɖɔ gɔ́ ná ɖɔ, “Mǐ ɖó hudó tɔn.” Nukɔnmɛ e mǐ lɛ́ kɔ yi é ɔ, mɛ e nɔ nɔ fínɛ́ lɛ́ é gěgé kplé bá kpɔ́n lěe Biblu kplɔ́nkplɔ́n ɖé nɔ nyí gbɔn é, bɔ yě mɛ we ɖe xlɛ́ ɖɔ émí ba ná wá kplé aklúnɔzángbla fífó tɔn e ja é ɖo kpléxɔ Axɔ́súɖuto ɔ tɔn ɖé mɛ.

Stacy ɖɔ: “Lěe mɛ lɛ́ yí xóta ɖaaɖagbe énɛ́ gbɔn é jí wǔ nú mǐ. Ényí è zín bo nyɛ́ ɔ, wɛn Axɔ́súɖuto ɔ tɔn nɔ dɔn mɛ bǔnɔ énɛ́ lɛ́. Lěe mɛ lɛ́ nɔ yí wɛn ɔ gbɔn é mimɔ nɔ byɔ́ lanmɛ nú mǐ tawun, bɔ akpakpa ɖo mǐ sɔ́ wɛ nú mǐ ná mɔ lěe Jexóva ná d’alɔ mǐ bónú mǐ ná kpo ɖo wɛn ɖagbe ɔ jlá nyɔ̌nu énɛ́ lɛ́ wɛ gbɔn é.”