Un ka ɖó ná ɖó mɔ̌to kunkun te wɛ a?

A ɖo ninɔmɛ mɔ̌hun mɛ wɛ a? Ényí mɔ̌ wɛ ɔ, étɛ́ ka sixú d’alɔ we bɔ a ná wá gbeta ɔ kɔn ɖɔ émí ɖó ná ɖó mɔ̌to kunkun te alǒ gbɔ?

Ðo to ɖé lɛ́ mɛ ɔ, dotóo ɖé wɛ ɖó ná ná gbe hǔnkuntɔ́ ɖěɖěe xwe yětɔn ko sɛ yi lɛ́ é hwɛ̌ cóbɔ yě ná kpo ɖo mɔ̌to kun wɛ. Klisánwun ɖěɖěe nɔ nɔ to énɛ́ lɛ́ mɛ lɛ́ é nɔ se tónú nú sɛ́n. (Hlɔ̌. 13:1) Amɔ̌, é ná bo nyí ɖɔ fí ɖěbǔ wɛ a nɔ nɔ ɔ, wlɛnwín lɛ́ ɖe bɔ a sixú zán dó gbéjé nǔwúkpíkpé hǔn kunkun ɖo ayijayǐ mɛ tɔn towe kpɔ́n.

GBĚJÉ KPƆ́N ÐƆ ÉMÍ KA SIXÚ KPO ÐO MƆ̌TO KUN WƐ A JÍ

Tutomɛ e nɔ kpé nukún dó mɛxómɔ lɛ́ wú é ɖé lin ɖɔ yě sixú kan nǔ élɔ́ lɛ́ byɔ́ yěɖée:

• Wuntun e nɔ nɔ ali kpá lɛ́ é mimɔ xa alǒ nǔ mimɔ zǎnmɛ ka nɔ vɛ́ wǔ nú mì wɛ a?

• É ka nɔ vɛ́ wǔ nú mì nú má nɔ lílɛ́ kɔ bo kpɔ́n gǔdokpɔ́nnú mɛ, bo nɔ lɛ́ kpɔ́n fí e nukún ma nɔ yá wǔ mɔ ǎ lɛ́ é wɛ a?

• É ka nɔ vɛ́ wǔ nú mì nú má nɔ yá wǔ wa nǔ, ɖi kpɔ́ndéwú ɔ, hwenu e é byɔ́ ɖɔ má ɖe afɔ sín asyatɛ́ɛ́ jí bo ɖ’afɔ flɛ́ɛn jí é wɛ a?

• Ényí un jɛ ali jí ɔ, yiyi nɔ zun kpɛtɛ nú mì, b’ɛ nɔ zɔ́n bɔ ali ɔ nɔ ján wɛ a?

• Un ka ko ɖibla bló alitawoví ɖé lɛ́, alǒ mɔ̌to ce bǐ ko wló abǐ sún glǒ ɖó un nɔ gba dó nǔ wú wútu wɛ a?

• Kponɔ ɖé ka ko ɖó mì te kpɔ́n ɖó mɔ̌to kunkun walɔ ce wú wɛ a?

• Un ka ɖo mɔ̌to kun wɛ bo jɛ kɔmlɔgɔ́ sa jí kpɔ́n a?

• Un ka ɖo atínkɛ́n ɖé zán wɛ b’ɛ sixú wa nǔ dó hǔn kunkun walɔ ce wú wɛ a?

• Ado nɔ hu mɛ e ɖo xwédo ce mɛ lɛ́ é alǒ xɔ́ntɔn ce lɛ́ dó hǔn kunkun walɔ ce wú wɛ a?

Ényí a ɖɔ ɛɛn nú nǔkanbyɔ́ énɛ́ lɛ́ ɖokpó alǒ we ɔ, é ná nyɔ́ ɖɔ a ní gbéjé kpɔ́n ɖɔ émí ka ná bló hǔzúhúzú ɖé lɛ́ wɛ a jí. Ði kpɔ́ndéwú ɔ, a sixú ɖó dogbó nú azɔn nabí e a ná nɔ kun hǔn é, tají ɔ, zǎnmɛ. Nɔ gbéjé hǔn kunkun walɔ towe kpɔ́n hwɛhwɛ. A sixú byɔ́ mɛ e ɖo xwédo towe mɛ é alǒ xɔ́ntɔn towe ɖé ɖɔ é ní ɖɔ nǔ e é nɔ lin dó hǔn kunkun walɔ towe wú é nú we. A sixú lɛ́ lin tamɛ dó lěe a ná kun hǔn ɖo ayijayǐ mɛ gbɔn é kplɔ́nkplɔ́n jí. Amɔ̌, ényí a ɖɔ ɛɛn nú nǔkanbyɔ́ énɛ́ lɛ́ gěgé ɔ, é ná ɖibla nyɔ́ hú gǎn ɖɔ a ní ɖó hǔn kunkun te.a

NǓ NǓGBÓDODÓ BIBLU TƆN LƐ́ NÍ XLƐ́ ALI WE

Mǐ sixú nɔ ma ɖ’ayi wú ɖɔ nǔwúkpíkpé hǔn kunkun tɔn mǐtɔn ɖo ɖiɖekpo wɛ. Tamɛ linlin dó hǔn kunkun ɖíɖó te jí sixú nɔ ɖó akpɔ nú we. Énɛ́ wú ɔ, nǔgbódodó Biblu tɔn tɛ́ lɛ́ ka sixú d’alɔ we bɔ a ná ɖó linlin e sɔgbe é dó ninɔmɛ towe wú, bo wá gbeta e nǔnywɛ́ kpé é ɖé kɔn? Mǐ ní ɖɔ xó dó we wú.

Kpo ɖo jlɛ̌ jí nɔ wɛ. (Nǔx. 11:2) Ényí mɛxóxwe jɛ wǐwá jí ɔ, mǐ sɔ́ nɔ mɔ nǔ ganjí ǎ, mǐ ka sɔ́ nɔ se nǔ ganjí ǎ, bɔ agbaza mǐtɔn nɔ lɛ́ ba gǎn kpo. Ði kpɔ́ndéwú ɔ, gěgé mɛ lɛ́ tɔn nɔ ɖó lanmɛ biba kpɔ́n alɔkpa ɖé lɛ́ te, ɖó yě nɔ mɔ ɖɔ ée émí ɖo mɛxó nyí wɛ é ɔ, é sixú zɔ́n bɔ émí yá wǔ gblé wǔ. Nǔgbódodó mɔ̌hun kunkplá hǔn kunkun. Hweɖénu sixú wá su bɔ mɛɖé wá gbeta ɔ kɔn bá ɖó hǔn kunkun te ɖó ayijayǐ mɛ ninɔ éɖésúnɔ tɔn wú. (Nǔx. 22:3) Bɔ ényí mɛ ɖěvo lɛ́ ɖɔ nǔ e ɖo ado hu nú yě wɛ é ɔ, mɛ e nɔ nɔ jlɛ̌ jí é ɖé ná yí gbe bo ɖótó yě.—Sɔ́ jlɛ́ dó 2 Samuwɛ́li 21:15-17 wú.

Nyi alɔ nú hunxɔ́ ɖuɖu. (Sɛ́n. 22:8) Ényí è ma kun mɔ̌to ɖo ayijayǐ mɛ ǎ ɔ, awǒvinú ɖaxó ɖé wɛ é ná nyí. Ényí nǔwúkpíkpé hǔn kunkun tɔn mɛɖé tɔn ko ɖe kpo có, é ka kpo ɖo mɔ̌to kun wɛ ɔ, é sixú sɔ́ gbɛ éɖésúnɔ tɔn kpó mɛ ɖěvo lɛ́ tɔn kpó ɖó axɔ́ nu. Ényí é bló alitawoví e è ma ɖó ná bló ǎ é ɖé ɔ, é sixú wá ɖu hunxɔ́.

Ényí é byɔ́ ɖɔ a ní wá gbeta syɛ́nsyɛ́n e kunkplá mɔ̌to kunkun ɖíɖó te alǒ gbɔ é tɔn kɔn hǔn, ma lin ɖɔ wi émítɔn ná kɔ́n alǒ émí kún sɔ́ ná xɔ akwɛ́ ó ó. Jexóva yí wǎn nú we ɖó jijɔ towe ɖaaɖagbe lɛ́ wú; jlɛ̌ jí e a nɔ nɔ é, hwiɖée e a nɔ sɔ́ hwe é kpó ganjíninɔ mɛ ɖěvo lɛ́ tɔn e nɔ ɖu ayi mɛ nú we é kpó ɖo yě mɛ. Bɔ é dó akpá bo ná nɔ gǔdo nú we, bo ná lɛ́ dó gbɔ nú we. (Eza. 46:4) É ná jó we dó gbeɖé ǎ. Énɛ́ wú ɔ, byɔ̌ ɛ ɖɔ é ní d’alɔ we bónú a ní zán nǔnywɛ́ e nyɔ́ zán é kpó nukúnnúmɔjɛnǔmɛ gbigbɔ tɔn kpó hwenu e a ná ɖo dida kpɔ́n wɛ ɖɔ émí ná ɖó mɔ̌to kunkun te alǒ gbɔ wɛ a jí é.