Kpo ɖo awǎjijɛ ɖó wɛ hwenu e a nyí mɛxómɔ é

1-2. Linlin tɛ́ Jexóva ka nɔ ɖó dó mɛxómɔ gbejínɔtɔ́ lɛ́ wú? (Ðɛhan 92:13-15; kpɔ́n ɖiɖe ɔ lɔmɔ̌.)

LINLIN vovo wɛ mɛ lɛ́ nɔ ɖó dó mɛxómɔ nyínyí wú ɖo gbɛ ɔ mɛ. Dǒ nukún nǔ élɔ́ mɛ kpɔ́n: A ka flín hwenu e a ɖó ayi wú ɖɔ hwa tɔ́n ɖo ɖa émítɔn lɛ́ mɛ azɔn nukɔntɔn ɔ é a? A sixú ko tɛ́n kpɔ́n bá sun síin bónú mɛ ɖěbǔ ní ma mɔ ó. Amɔ̌, a ɖó ayi wú ɖɔ é kún nyí sun e sun wɛ a ɖe é wɛ ná zɔ́n bɔ hwa ɖěvo lɛ́ ná gɔn tíntɔ́n ó. Kpɔ́ndéwú énɛ́ xlɛ́ lě do mɛ gěgé nɔ dó gǎn bo ma ná nyí mɛxómɔ ǎ sɔ é.

² É ɖo mɔ̌ có, linlin vo sésé wɛ Tɔ́ mǐtɔn jǐxwé tɔn ɔ nɔ ɖó dó mɛsɛntɔ́ tɔn ɖěɖěe xwe ɖo xwe jí jɛ ná wɛ lɛ́ é wú. (Nǔx. 16:31) É sɔ́ yě jlɛ́ dó atín e nɔ sɛ́n lɛ́ é wú. (Xa Ðɛhan 92:13-15.) Étɛ́wú nǔjlɛ́dónǔwú énɛ́ ka sɔgbe? Hwɛhwɛ ɔ, atín ɖěɖěe ko ɖó xwe mɔ̌kpán lɛ́ é nɔ nyɔ́ ɖɛkpɛ tawun, nǔ e wú wɛ é wɛ nyí ɖɔ ama alǒ folówa gěgé nɔ ɖo ta nú yě. Ði kpɔ́ndéwú ɔ, atín alɔkpa ɖé tíin bɔ è nɔ mɔ ɖo Japon b’ɛ nɔ dɔ́ ji tawun. Atín ɖɛkpɛ ɖɛkpɛ mɔ̌hun ɖé lɛ́ nɔ ɖó xwe afatɔ́n jɛjí. Atín énɛ́ lɛ́ e nɔ dɔ́ ji tawun lɛ́ é ɖɔhun ɔ, gbejínɔtɔ́ ɖěɖěe xwe yětɔn ko sɛ yi lɛ́ é nɔ nyɔ́ ɖɛkpɛ tawun, ɖo tají ɔ, ɖo Mawu nukúnmɛ. Jexóva nɔ mɔ nǔ zɛ hwa ɔ wú. Jijɔ ɖaaɖagbe mɛxómɔ lɛ́ tɔn nɔ su nukún tɔn mɛ tawun, ɖi didɛ yětɔn kpó gbejíninɔ yětɔn kpó káká jɛ xwe tootóbú e yě zán dó wa sinsɛnzɔ́ n’i kpó gbejíninɔ kpó lɛ́ é jí.

3. Nǎ lěe Jexóva zán mɛxómɔ lɛ́ dó bló bɔ linlin tɔn jɛnu gbɔn é sín kpɔ́ndéwú ɖé.

³ Lěe mɛɖé sín xwe ko sɛ yi sɔ é nɔ ɖe lěe é xɔ akwɛ́ nú Jexóva sɔ é kpo ǎ.a Nǔgbó ɔ, Jexóva nɔ zán mɛxómɔ lɛ́ hwɛhwɛ dó bló bɔ linlin tɔn nɔ jɛnu. Ði kpɔ́ndéwú ɔ, Sala sín xwe ko sɛ yi tawun có, Jexóva ɖɔ n’i ɖɔ é ná nyí nɔ akɔta hlɔ̌nhlɔ́nnɔ ɖé tɔn, bo ná lɛ́ nyí Mɛsíya ɔ sín nɔgbó. (Bǐb. 17:15-19) Mɔyízi sín xwe ko sɛ yi cóbɔ Jexóva zɔ́n ɛ ɖɔ é ní kplá Izlayɛ́li ví lɛ́ tɔ́n sín Ejípu. (Tín. 7:6, 7) Gɔ́ ná ɔ, mɛsɛ́dó Jaan ko nyí mɛxómɔ cóbɔ Jexóva sɔ́ dó ayi mɛ n’i bɔ é wlán wěma Biblu tɔn atɔ́ɔ́n.

4. Sɔgbe xá Nǔnywɛ́xó 15:15 ɔ, étɛ́ ka sixú d’alɔ mɛxómɔ lɛ́ bɔ yě ná dɛ ɖo wǔvɛ́ e yě nɔ mɔ lɛ́ é nu? (Kpɔ́n ɖiɖe ɔ lɔmɔ̌.)

⁴ Mɛxómɔ lɛ́ nɔ mɔ wǔvɛ́ gěgé ɖó xwe yětɔn e ɖo sisɛ yi wɛ é wú. Nɔví nyɔ̌nu ɖé nɔ ɖɔ nǔ élɔ́ dó ɖɔ fanfún: “Mɛxómɔ nyínyí nyí nǔ e è sɔ́ nyi ado jí bɔ yɔkpɔ́vú sɛ myɔ dó é ǎ.” Amɔ̌, awǎjijɛb sixú d’alɔ mɛxómɔ lɛ́ bɔ yě ná dɛ ɖo tagba ɖěɖěe mɛxóxwe nɔ dɔn wá lɛ́ é nu. (Xa Nǔnywɛ́xó 15:15.) Ðo xóta élɔ́ mɛ ɔ, mǐ ná ɖɔ xó dó nǔ tawun tawun e mɛxómɔ lɛ́ sixú wa bá dó kpo ɖo awǎjijɛ ɖó wɛ lɛ́ é jí. Mǐ ná lɛ́ gbéjé lěe mɛ ɖěvo lɛ́ sixú d’alɔ nɔví súnnu kpó nɔví nyɔ̌nu kpó mɛxómɔ e ɖo agun yětɔn mɛ lɛ́ é gbɔn é kpɔ́n. Jɛ nukɔn hwɛ̌ ɔ, mi nú mǐ ní ɖɔ xó dó nǔ e wú é sixú vɛ́ wǔ bɔ mǐ ná kpo ɖo awǎjijɛ ɖó wɛ hwenu e xwe mǐtɔn ɖo sisɛ yi wɛ é jí.

LĚE MƐXÓXWE SIXÚ WA NǓ DÓ AWǍJIJƐ TOWE WÚ GBƆN É

5. Étɛ́ ka sixú zɔ́n bɔ awakanmɛ ná kú mɛxómɔ ɖé lɛ́?

⁵ Étɛ́ ka sixú zɔ́n bɔ awakanmɛ ná kú we? Bóyá akpɔ nɔ ɖó we, ɖó a sɔ́ sixú nɔ wa nǔ e a ko nɔ wa ɖ’ayǐ lɛ́ é ǎ. Hwenu e a ɖo wǐnnyáwínnyá mɛ é kpó hwenu e lanmɛ towe ɖo jógúnjógún é kpó sixú nɔ lɛ́ jló we. (Nǔt. 7:10) Ði kpɔ́ndéwú ɔ, nɔví nyɔ̌nu ɖé nɔ nyí Ruby bo ɖɔ: “Awu dídó nɔ vɛ́ wǔ nú mì tawun, ɖó wǔvɛ́ syɛ́nsyɛ́n e se wɛ un nɔ ɖe ɖo lanmɛ é kpó tɛn e un ma sixú nɔ sɛ ǎ é kpó wú. Afɔgwedé yǎyá dídó nɔ fá dó mì ǎ. Alɔ ce lɛ́ nɔ vɛ́ káká bɔ un nɔ sixú wa nǔtí ǎ, nǔ e bɔ wǔ lɛ́ é wiwa tlɛ nɔ vɛ́ wǔ nú mì.” Gɔ́ ná ɔ, Harold e wa sinsɛnzɔ́ ɖo Betɛ́li é ɖɔ: “Un sɔ́ wá tuun mɛ alɔkpa e un húzú é ǎ, bɔ akpɔ nɔ ɖó mì hweɖélɛ́nu. Un nɔ ba lanmɛ kpɔ́n tawun ɖ’ayǐ. Bɔ̌lu-alɔsɔ́xo e nɔ nyí baseball é wɛ nyí nǔ e un nɔ sɔ́ dó ɖe ayi ɖ’ayǐ ná tawun é. Mɛ ɖěvo lɛ́ nɔ ɖɔ: ‘Zě bɔ̌lu ɔ jó nú Harold kpowun, é nɔ xo kpo gbeɖé ǎ.’ Amɔ̌, égbé din ɔ, un tlɛ sɔ́ ɖó gǎn e ná nyi bɔ̌lu é ǎ.”

6. (a) Hwɛjijɔ ɖěvo tɛ́ lɛ́ ka sixú zɔ́n bɔ awakanmɛ ná kú mɛxómɔ ɖé lɛ́? (b) Étɛ́ ka sixú d’alɔ mɛxómɔ lɛ́ bɔ yě ná wá gbeta ɔ kɔn ɖɔ émí ná ɖó mɔ̌to kunkun te alǒ gbɔ? (Kpɔ́n xóta “Un ka ɖó ná ɖó mɔ̌to kunkun te wɛ a?” ɖo Atɔxwɛ élɔ́ mɛ.)

⁶ Awakanmɛ sixú nɔ kú we, ɖó a sɔ́ nɔ kpé nǔɖé wú bo nɔ wa hwiɖésúnɔ ǎ. Nǔ sixú nyí mɔ̌, ɖo tají ɔ, ényí a ɖó hudó nukúnkpémɛwútɔ́ ɖé tɔn, alǒ a ɖó ná yi jɛ vǐ towe lɛ́ ɖě kpá ɔ nɛ́. Alǒ, bóyá wǔ kú we tawun, ɖó lanmɛ towe fɔ́n ɔ gblěgblé wɛ jɛ́n é nɔ ɖe, abǐ nukún towe lɛ́ sɔ́ nɔ mɔ nǔ káká ɖé ǎ, b’ɛ zɔ́n bɔ a sɔ́ sixú nɔ yi fí ɖé hwiɖésú ǎ, kabǐ a sɔ́ sixú nɔ kun mɔ̌to ǎ. É vɛ́ wǔ tawun! Mǐ sixú kú d’é jí ɖɔ Jexóva nɔ mɔ nukúnnú jɛ lěe nǔ cí nú mǐ é mɛ. Jexóva tuun lě do mǐ yí wǎn nú é kpó nɔví mǐtɔn lɛ́ kpó sɔ é, bɔ énɛ́ nɔ zɔ́n bɔ mǐ nɔ xɔ akwɛ́ n’i tawun.—1 Sam. 16:7.

7. Étɛ́ ka sixú d’alɔ mɛ ɖěɖěe awakanmɛ kú ɖó é cí ɖɔ vivɔnu gbɛ élɔ́ tɔn kún ɖo ná wá ɖo gbɛhwenu yětɔn wɛ ó lɛ́ é?

⁷ Bóyá wǔ kú we ɖó é sixú cí ɖɔ vivɔnu gbɛ élɔ́ tɔn kún ná wá ɖo gbɛhwenu towe ó. Ényí nǔ nɔ cí mɔ̌ nú we ɔ, étɛ́ ka sixú d’alɔ we? Tɛ́n kpɔ́n bo flín ɖɔ Jexóva ɖo te kpɔ́n hwenu e é ná ɖó nǔ gbɛ nyanya élɔ́ nu é kpó suúlu kpó. (Eza. 30:18) Amɔ̌, yǎyá wú wɛ é ɖo suúlu ɖó wɛ ǎ. Suúlu tɔn ɖo ali hun nú gbɛtɔ́ lǐvi mɔ̌kpán wɛ bónú yě ná mɔ hwenu bo kplɔ́n nǔ dó wǔ tɔn lobo sɛn ɛ. (2 Pi. 3:9) Énɛ́ wú ɔ, ényí awakanmɛ kú we hǔn, tɛ́n kpɔ́n bo lin tamɛ dó lěe gbɛtɔ́ gěgé ná ɖu suúlu Jexóva tɔn sín le cóbɔ vivɔnu ɔ ná wá gbɔn é jí. Mɛ e ɖo xwédo hwiɖésúnɔ tɔn mɛ é ɖé lɛ́ sixú ɖo mɛ énɛ́ lɛ́ mɛ wɛ a?

8. Nɛ̌ mɛxóxwe sín wǔvɛ́ lɛ́ ka sixú wa nǔ dó mɛxómɔ lɛ́ wú gbɔn?

⁸ Mǐ ná bo ɖó xwe ɖěbǔ ɔ, ényí lanmɛ mǐtɔn ma ɖo ganjí ǎ ɔ, mǐ sixú ɖɔ alǒ wa nǔɖé lɛ́ b’ɛ wá vɛ́ nú mǐ. (Nǔt. 7:7; Ja. 3:2) Ði kpɔ́ndéwú ɔ, hwenu e nya gbejínɔtɔ́ Jɔbu ɖo wǔvɛ́ se wɛ é ɔ, xó tɔn lɛ́ wá cí “nǔwláɖɔ” ɖɔhun. (Jɔb. 6:1-3) Gɔ́ ná ɔ, lanmɛ ma ɖo ganjí sixú zɔ́n bɔ mɛxómɔ lɛ́ wa alǒ ɖɔ nǔ ɖěɖěe è ma dó tuun yě ná ǎ lɛ́ é. É ɖo wɛn ɖɔ, mǐ mɛ ɖě kún ná tuun gaan bo ná gbɔn xwe mǐtɔn sín yɛkan mɛ alǒ lanmɛ mǐtɔn e ma ɖo ganjí ǎ é sín yɛkan mɛ bo ná gɔn xomɛ nyɔ́ alǒ ɖó nǔ nukún ɖo mɛ ɖěvo lɛ́ sí zɛ xwé wú ó. Ényí mǐ ɖ’ayi wú ɖɔ mǐ ɖɔ nǔɖé nú mɛɖé b’ɛ kún ɖe xomɛnyínyɔ́ xlɛ́ ó ɔ, mǐ ɖó ná dán lɛjɛlɛjɛ cóbó byɔ́ hwɛsɔ́kɛ ǎ.—Mat. 5:23, 24.

LĚE È NÁ KPO ÐO AWǍJIJƐ ÐÓ WƐ GBƆN É

9. Étɛ́wú a ka ɖó ná yí gbe bɔ mɛ ɖěvo lɛ́ ná nɔ d’alɔ we? (Kpɔ́n ɖiɖe lɛ́ lɔmɔ̌.)

⁹ Yǐ gbe nú mɛ ɖěvo lɛ́ ní nɔ d’alɔ we. (Ga. 6:2) Énɛ́ sixú vɛ́ wǔ nú we ɖo bǐbɛ́mɛ. Nɔví nyɔ̌nu ɖé nɔ nyí Gretl bo ɖɔ: “Hweɖélɛ́nu ɔ, é nɔ vɛ́ wǔ nú mì nú má yí gbe nú mɛ ɖěvo lɛ́ ná d’alɔ mì ɖó un nɔ mɔ ɖɔ un ná húzú agban ɖo kɔ jí nú yě. É byɔ́ hwenu ɖo así ce bónú má ɖyɔ́ linlin ce bo ná sɔ́ nyiɖée hwe bo yí gbe ɖɔ un ɖó hudó alɔdó tɔn.” Ényí a nɔ yí gbe nú mɛ ɖěvo lɛ́ ná d’alɔ we hǔn, ali hun nú yě wɛ a ɖe bónú yě ná mɔ awǎjijɛ e nɔ tɔ́n sín nǔnámɛ mɛ é nɛ́. (Mɛ. 20:35) B’ɛ ɖo wɛn ɖɔ lě do mɛ ɖěvo lɛ́ yí wǎn nú we bɔ nǔ towe nɔ lɛ́ ɖu ayi mɛ nú yě sɔ é mimɔ ná su nukún towe mɛ.

10. Étɛ́wú a ka ɖó ná nɔ flín bo ɖe nǔsumɛnukúnmɛ xlɛ́? (Kpɔ́n ɖiɖe lɛ́ lɔmɔ̌.)

¹⁰ Nɔ ɖe xlɛ́ ɖɔ nǔ nɔ su nukún émítɔn mɛ. (Koló. 3:15; 1 Tɛ. 5:18) Ényí mɛ ɖěvo lɛ́ wa nǔ ɖagbe lɛ́ nú mǐ ɔ, é nɔ su nukún mǐtɔn mɛ, amɔ̌, mǐ sixú wɔn bo gɔn ɖiɖexlɛ́. Amɔ̌, ényí mǐ ko nǔ yɛ́sɛ́ɛ́ bo ɖɔ é ná cɛ nú we ɔ, é sixú zɔ́n bɔ xɔ́ntɔn mǐtɔn lɛ́ ná mɔ ɖɔ émí xɔ akwɛ́ bɔ nǔ e émí wa é lɛ́ su nukún mǐtɔn mɛ. Leah e nyí nukúnkpémɛwútɔ́ nú mɛxómɔ lɛ́ ɖo Betɛ́li é ɖɔ: “Nɔví nyɔ̌nu e wú un nɔ kpé nukún dó lɛ́ é ɖokpó nɔ zé wěma kpɛví ɖé ɖ’ayǐ nú mì bɔ kúdónúmɛxó lɛ́ nɔ ɖ’é jí. Nǔ kléwún ɖé jɛ́n é nɔ wlán, amɔ̌, é nɔ ɖe xomɛnyínyɔ́ xlɛ́ tawun. Wěmaví énɛ́ lɛ́ yíyí nɔ víví nú mì tawun, bɔ tuuntuun ɖɔ alɔ e dó è wɛ un ɖe é nɔ su nukún tɔn mɛ nɔ ná mì awǎjijɛ.”

11. Nɛ̌ a ka sixú d’alɔ mɛ ɖěvo lɛ́ gbɔn? (Kpɔ́n ɖiɖe lɛ́ lɔmɔ̌.)

¹¹ Tɛ́n kpɔ́n bo nɔ d’alɔ mɛ ɖěvo lɛ́. Ényí a nɔ lin tamɛ dó mɛ ɖěvo lɛ́ jí, bo nɔ tɛ́n kpɔ́n bá d’alɔ yě ɔ, a ná ɖibla ɖe ayi sín tagba hwiɖésúnɔ tɔn lɛ́ jí hú gǎn. Lǒ Aflíka tɔn ɖé jlɛ́ mɛxómɔ lɛ́ dó wěmasɛxwetɛn e mɛ wěma e mɛ nǔnywɛ́ ɖe lɛ́ é gɔ́ é wú. Amɔ̌, ényí è ma xa wěma lɛ́ ǎ ɔ, yě sixú kplɔ́n nǔ mɛ ǎ. Ðo ali ɖokpó ɔ nu ɔ, ényí a ma ɖɔ nǔ e a tuun é ɖé lɛ́ nú mɛ wínnyáwínnyá lɛ́ ǎ ɔ, yě sixú kplɔ́n nǔ xɔ akwɛ́ lɛ́ ɖo gɔ̌n towe ǎ. Nɔ kan nǔ byɔ́ yě, énɛ́ gúdo hǔn, nɔ ɖótó yě. Kplɔ́n yě nǔ e wú gbɛ zínzán sɔgbe xá nǔgbódodó Jexóva tɔn lɛ́ nɔ nyɔ́ hú gǎn hwebǐnu é kpó lěe é ná zɔ́n bɔ yě ná ɖó awǎjijɛ gbɔn é kpó. É ɖo wɛn ɖɔ, ényí a dó gbɔ nú xɔ́ntɔn wínnyáwínnyá towe lɛ́ bo lɛ́ ná hlɔ̌nhlɔ́n yě ɔ, é ná zɔ́n bɔ a ná ɖó awǎjijɛ.—Ðɛh. 71:18.

12. Sɔgbe kpó Ezayíi 46:4 kpó ɔ, étɛ́ Jexóva ka dó akpá ɖɔ émí ná wa nú mɛxómɔ lɛ́? (Kpɔ́n ɖiɖe lɛ́ lɔmɔ̌.)

¹² Nɔ xo ɖɛ sɛ́dó Jexóva bá dó mɔ hlɔ̌nhlɔ́n. Gǎn sixú vɔ ɖo wǔ we ɖo agbaza, alǒ ɖo lěe nǔ nɔ cí nú mɛ é linu, amɔ̌, “nǔ nɔ ci kɔ [nú Jexóva], alǒ gǎn nɔ vɔ ɖo wǔ tɔn gbeɖé ǎ.” (Eza. 40:28) Nɛ̌ Jexóva ka nɔ zán hlɔ̌nhlɔ́n tɔn ma ɖó dogbó ɔ gbɔn? Ali e nu é nɔ wa mɔ̌ ɖe é ɖokpó wɛ nyí ɖɔ é nɔ ná hlɔ̌nhlɔ́n mɛxómɔ gbejínɔtɔ́ lɛ́. (Eza. 40:29-31) Nǔgbó ɔ, é d’akpá ɖɔ émí ná d’alɔ yě. (Xa Ezayíi 46:4.) Jexóva ka nɔ ɖe akpá tɔn lɛ́ hwebǐnu. (Joz. 23:14; Eza. 55:10, 11) Ényí a xo ɖɛ, bɔ énɛ́ gúdo ɔ, hwiɖésúnɔ mɛtún ɔ mɔ ɖɔ Jexóva yí wǎn nú émí, bo nɔ lɛ́ nɔ gǔdo nú émí ɔ, a ná ɖó awǎjijɛ tawun.

13. Sɔgbe xá 2 Kɔlɛ́ntinu lɛ́ 4:16-18 ɔ, étɛ́ mǐ ka ɖó ná nɔ flín? (Kpɔ́n ɖiɖe lɛ́ lɔmɔ̌.)

¹³ Nɔ flín hwiɖée ɖɔ hwenu kléwún ɖé sín nǔ wɛ ninɔmɛ towe nyí. Ényí a nɔ flín hwiɖée ɖɔ hwenu kléwún ɖé sín nǔ wɛ ninɔmɛ syɛ́nsyɛ́n e ɖí xwi xá wɛ a ɖe é nyí ɔ, é sixú bɔ wǔ nú we hú gǎn bɔ a ná dɛ ɖ’é nu. Gɔ́ ná ɔ, Biblu ná gǎnjɛwú mǐ ɖɔ hwenu kléwún ɖé sín nǔ wɛ mɛxóxwe kpó lanmɛ ma ɖo ganjí kpó nyí. (Jɔb. 33:25; Eza. 33:24) Énɛ́ wú ɔ, a sixú ɖó awǎjijɛ, ɖó a tuun ɖɔ ɖo sɔgúdo ɔ, lanmɛ towe ná ɖo ganjí hú gǎn, a ná ɖó hlɔ̌nhlɔ́n hú gǎn, bo lɛ́ nyɔ́ ɖɛkpɛ lěe é ma ko nyí gbɔn kpɔ́n ǎ é. (Xa 2 Kɔlɛ́ntinu lɛ́ 4:16-18.) Amɔ̌, étɛ́ mɛ ɖěvo lɛ́ ka sixú wa dó d’alɔ?

LĚE MƐ ÐĚVO LƐ́ SIXÚ D’ALƆ GBƆN É

14. Étɛ́wú é ka ɖo tají ɖɔ è ní nɔ yi ba mɛxómɔ lɛ́ kpɔ́n, bo nɔ lɛ́ ylɔ́ yě?

¹⁴ Nɔ yi ba nɔví súnnu kpó nɔví nyɔ̌nu kpó mɛxómɔ lɛ́ kpɔ́n hwɛhwɛ, bo nɔ lɛ́ ylɔ́ yě hwɛhwɛ. (Ebl. 13:16) Mɛxómɔ lɛ́ sixú mɔ ɖɔ émí zun émíɖokpó. Nɔví súnnu e è glɔ́n ɖó xwégbe é ɖé nɔ nyí Camille, bo ɖɔ: “Un ɖó ná nɔ ɖo xɔ mɛ sín zǎnzǎn káká jɛ gbada. Énɛ́ wú ɔ, é wá ci akpɔ nú mì bǐ. Hweɖélɛ́nu ɔ, un nɔ mɔ ɖɔ un cí kinnikínní e ko kpo bo ɖo aja mɛ é ɖɔhun. Akpɔ nɔ ɖó mì, bɔ xomɛ nɔ lɛ́ sin mì.” Ényí mǐ yi ba mɛxómɔ lɛ́ kpɔ́n ɔ, mǐ nɔ ná jiɖe yě ɖɔ yě xɔ akwɛ́ ɖo nukún mǐtɔn mɛ, bɔ mǐ lɛ́ yí wǎn nú yě. Mǐ bǐ sixú flín ɖɔ, ɖo hweɖénu ɔ, mǐ lin bo ná ylɔ́ mɛxómɔ e ɖo agun mǐtɔn mɛ é ɖé, alǒ yi ba ɛ kpɔ́n, bo ka sɔ́ wá kpé wú ǎ. Mǐ bǐ sín alɔnu wɛ nɔ ján. Énɛ́ wú ɔ, étɛ́ ka sixú d’alɔ mǐ bɔ mǐ ná nɔ “tuun nǔ e nyí nǔ tají hú gǎn lɛ́ é,” ɖi mɛxómɔ lɛ́ biba kpɔ́n? (Filí. 1:10) A sixú wlán nyǐkɔ mɛxómɔ ɖěɖěe ɖo agun towe mɛ lɛ́ é tɔn kpó azǎn e jí a ná wa mɔ̌ é kpó ɖ’ayǐ. A sixú lɛ́ bló tuto bo ná yi ba yě kpɔ́n; ma ɖɔ é ko yá ɔ, un ná bló ó.

15. Étɛ́ mɛ wínnyáwínnyá lɛ́ kpó mɛxómɔ lɛ́ kpó ka sixú wa ɖó kpɔ́?

¹⁵ Ényí mɛ wínnyáwínnyá ɖé wɛ nú we ɔ, a sixú kan nǔ e jí a ná ɖɔ xó ɖó kpɔ́ xá mɛxómɔ lɛ́ dó é, alǒ nǔ e a sixú wa ɖó kpɔ́ xá yě lɛ́ é byɔ́ hwiɖée. Amɔ̌, ma ɖo nǔ kanbyɔ́ hwiɖée wɛ dín ó. Wa nǔ xɔ́ntɔn ɖagbe ɖé ɖɔhun kpowun. (Nǔx. 17:17) Nɔ nɔ te bo nɔ ɖɔ xó xá mɛxómɔ lɛ́ jɛ nukɔn nú kplé lɛ́, alǒ ɖo kplé lɛ́ gúdo. Bóyá a sixú byɔ́ yě ɖɔ yě ní má wěmafɔ e yě yí wǎn ná tawun é xá émí, alǒ kpi vǔhwenu yětɔn sín tan e hwɛ́n é ɖé nú émí. A sixú lɛ́ byɔ́ yě ɖɔ émí kpó yě kpó ná kpɔ́n tuto sunmɛ sunmɛ tɔn ɖé ɖó kpɔ́. A sixú lɛ́ kpé wú bo wa nǔ tawun tawun lɛ́ dó d’alɔ mɛxómɔ lɛ́. Ði kpɔ́ndéwú ɔ, a sixú d’alɔ yě bɔ yě ná bló mise à jour alǒkan, alǒ tablɛ́ti yětɔn tɔn, kabǐ yí wěma nǔkplɔ́nkplɔ́n tɔn e tɔ́n gbɔn gǔdo lɛ́ é nú yě. Nɔví nyɔ̌nu ɖé nɔ nyí Carol, bo ɖɔ: “Zě hwiɖée jó bá wa nǔ ɖěɖěe yě wiwa nɔ víví nú we lɛ́ é xá mɛxómɔ lɛ́. Xwe ko ɖo ta ce jɛ wɛ có, un kpo ɖo biba wɛ bo ná ɖu gbɛ sín vǐví. Un yí wǎn nú axi xwléxwlé, tíntɔ́n bo yi ɖu nǔ ɖó kpɔ́ xá xɔ́ntɔn lɛ́ kpó sa ɖiɖi bo kpɔ́n nǔɖíɖó Jexóva tɔn lɛ́ kpó.” Nɔví nyɔ̌nu ɖé nɔ nyí Maira bo ɖɔ: “Xɔ́ntɔn ce lɛ́ ɖokpó ko ɖó xwe 90. É nyí mɛxó nú mì nú xwe 57. Amɔ̌, hwɛhwɛ ɔ, un nɔ wɔn ɖɔ é nyí mɛxó nú mì, ɖó mǐ nɔ ko nǔ ɖó kpɔ́, bo nɔ kpɔ́n fímu lɛ́ ɖó kpɔ́. Ényí mɛ ɖě ɖo tagba lɛ́ ɖí xwi xá wɛ ɔ, mɛ ɖě ɔ nɔ ɖe wě xá ɛ.”

16. Étɛ́wú mɛxómɔ lɛ́ kplákplá yi dotóoxwé ka sixú d’alɔ yě?

¹⁶ Nɔ xwedó yě yi dotóoxwé. Gɔ́ nú sɔ́ e a nɔ sɔ́ mɛxómɔ lɛ́ yi dotóoxwé é ɔ, a sixú lɛ́ tɛ́n kpɔ́n bo kú d’é jí ɖɔ dotóo lɛ́ ɖo azɔ̌ wa nú yě wɛ ganjí, bo lɛ́ ɖo nukún kpé dó yě wú wɛ lěe é jɛxá gbɔn é. (Eza. 1:17) A sixú lɛ́ d’alɔ mɛxómɔ ɖé gbɔn nǔ e ɖɔ wɛ dotóo ɔ ɖe é sín kɛ́n sísɔ́ gblamɛ. Nɔví nyɔ̌nu mɛxómɔ ɖé nɔ nyí Ruth bo ɖɔ: “Hwɛhwɛ ɔ, ényí nyiɖokpónɔ yi dotóoxwé ɔ, dotóo ɔ nɔ ɖi nǔ e ɖɔ n’i wɛ un ɖe é ǎ. Dotóo lɛ́ sixú nɔ ɖɔ nǔ lěhun: ‘Azinzɔnnɔ vlɛ́ wɛ a ɖe, a ɖo azɔn ɖě jɛ wɛ ǎ.’ Amɔ̌, ényí mɛɖé xwedó mì ɔ, é nɔ zɔ́n bɔ lěe dotóo ɔ nɔ wa nǔ xá mì gbɔn é nɔ húzú bǐ mlɛ́mlɛ́. Un dó kú nú nɔví súnnu kpó nɔví nyɔ̌nu kpó ɖěɖěe nɔ ba hwenu bo nɔ kplá mì hɛn yi lɛ́ é.”

17. Akpáxwé sinsɛnzɔ́ ɔ tɔn tɛ́ lɛ́ sín vǐví a ka sixú ɖu xá mɛxómɔ lɛ́?

¹⁷ Nɔ w’azɔ̌ xá yě ɖo sinsɛnzɔ́ ɔ mɛ. Mɛxómɔ ɖé lɛ́ sixú nɔ ma ɖó hlɔ̌nhlɔ́n bo ná jlá wɛn ɔ sín hɔn ɖé kɔn jɛ hɔn ɖé kɔn. Énɛ́ wú ɔ, a ka ná sixú byɔ́ nɔví nyɔ̌nu mɛxómɔ ɖé ɖɔ é ní wá gɔ́ nú we bónú mi ná zán kɛkɛ́ví dó ɖɔ mawuxó a? A tlɛ sixú hɛn zinkpo ɖé dó jǐ tɔn bónú é ná jínjɔ́n kɛkɛ́ví ɔ kpá. Kabǐ a ná sixú sɔ́ nɔví súnnu mɛxómɔ ɖé yi Biblu kplɔ́nkplɔ́n ɖé domɛ, kabǐ tlɛ kpé nukún dó nǔkplɔ́nkplɔ́n ɖé wú ɖo xwé tɔn gbe a? Mɛxó agun tɔn lɛ́ sixú bló kplé kúnnuɖegbé tɔn lɛ́ ɖo mɛxómɔ lɛ́ sín xwégbe bónú é ná dó sixú bɔ wǔ nú yě hú gǎn nú yě ná ɖ’alɔ ɖ’é mɛ. É jɛxá ɖɔ mǐ ní wa nǔ e wú mǐ kpé é bǐ dó wlí yɛ̌yi nú mɛxómɔ lɛ́.—Nǔx. 3:27; Hlɔ̌. 12:10.

18. Étɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁸ Xóta élɔ́ flín mǐ ɖɔ Jexóva yí wǎn nú mɛxómɔ lɛ́, bɔ yě lɛ́ xɔ akwɛ́ n’i. Bɔ mɔ̌ wɛ mǐ mɛ e kpo ɖo agun ɔ mɛ lɛ́ é nɔ wa! Mɛxómɔ nyínyí d’ayihún ǎ, amɔ̌, kpó alɔdó Jexóva tɔn kpó ɔ, a sixú kpo ɖo awǎjijɛ ɖó wɛ. (Ðɛh. 37:25) Tuuntuun ɖɔ azǎn ɖagbe hú gǎn lɛ́ ɖo nukɔn mɛtɔn, b’ɛ kún nyí gǔdo mɛtɔn ó, nɔ dó wǔsyɛ́n lanmɛ nú mɛ kpɔ́n! Bɔ mɛ ɖěɖěe ka ɖo nukún kpé dó hɛ̌nnumɔ yětɔn mɛxómɔ ɖé, vǐ ɖé alǒ xɔ́ntɔn e ɖo azɔn jɛ wɛ é ɖé wú ɖo tɛ́ntin mǐtɔn lɛ́ é ka lo? Nɛ̌ mi ka sixú kpo ɖo awǎjijɛ ɖó wɛ gbɔn? Mǐ ná mɔ xósin nǔkanbyɔ́ énɛ́ tɔn ɖo xóta e bɔ d’é wú é mɛ.