Dǎkaxixo ɖó wǎngbɛ́númɛ wú ka ná wá nɔ te a?: Étɛ́ Biblu ka ɖɔ?

É blá wǔ ɖɔ wǎngbɛ́númɛ e nɔ flɔ́ zo dó glɔ̌ nú dǎkaxixo é wá gba kpé. È nɔ xo dǎka mɛ lɛ́ wú kpowun ɖó sinmɛ agbaza tɔn yětɔn, sinsɛn yětɔn, akɔ yětɔn, mɛ̌ yětɔn alǒ ɖó hwɛjijɔ ɖěvo lɛ́ wú. Dǎkaxixo mɔ̌hun lɛ́ ko zɔ́n bɔ mɛɖé lɛ́ nɔ ɖi xɛsi tawun bo lɛ́ wa nǔ dó yě wú ɖo agbaza kpó lěe nǔ nɔ cí nú mɛ é kpó lixo. Mɛɖé lɛ́ tlɛ ko kú ɖó nǔ mɔ̌hun lɛ́ wú.

Biblu ɖɔ ɖ’ayǐ ɖɔ ɖo hwe mǐtɔn nu ɔ gbɛtɔ́ lɛ́ “ná nɔ nylá hun, ná nɔ yí wǎn nú ɖagbewiwa ǎ,” bo “ná nɔ ɖó wǎnyíyí jɔwámɔ tɔn ɖěbǔ ǎ.” (2 Timɔtée 3:1-5) Dǎkaxixo énɛ́ lɛ́ ka ná wá nɔ te a? Étɛ́ Biblu ka ɖɔ?

Lěe è ná ɖó nǔ dǎkaxixo ɖó wǎngbɛ́númɛ wú nu gbɔn é

Biblu ná jiɖe mǐ ɖɔ Mawu sixú ɖó nǔ dǎkaxixo nu, bɔ é ka ná wa mɔ̌.

• “È ná sú mɛdídá lɛ́ kún dó sín to ɔ mɛ . . . To ɔ ká ná nyí mɛ e nɔ sɔ́ yěɖée hwe lɛ́ tɔn, bɔ fífá ma ɖó dogbó e yě ná mɔ ɔ wɛ ná nyí nǔ e ná nɔ́ víví nú yě é.” (Ðɛhan 37:9-11) Mawu ná lɔn bónú dǎkaxotɔ́ lɛ́ ná kpo ɖo nǔ wa dó gbɛtɔ́ lɛ́ wú wɛ ǎ.

• “[Mawu] ná súnsún ɖasin bǐ sín nukún yětɔn mɛ, kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́.” (Nǔɖexlɛ́mɛ 21:4) Mawu ná ɖe wǔvɛ́ e gbɛtɔ́ lɛ́ nɔ mɔ ɖo agbaza, taglomɛ kpó lěe nǔ nɔ cí nú mɛ é kpó linu é bǐ síin.

• “È ná fɔ́n [mɛ] lɛ́ sín kú.” (Mɛsɛ́dó 24:15) Mawu ná fɔ́n gbɛtɔ́ lǐvi mɔ̌kpán wá gbɛ káká jɛ mɛ ɖěɖěe wú è xo dǎka ɖó wǎngbɛ́númɛ wú bɔ yě kú lɛ́ é jí.

Lěe mǐ sixú ɖí xwi xá wǎngbɛ́númɛ gbɔn ɖo égbé é

Biblu ná mǐ nukúnɖíɖó kɛ́ɖɛ́ kpowun ǎ, é nɔ lɛ́ d’alɔ mǐ bɔ mǐ nɔ ɖi xwí xá wǎngbɛ́númɛ e gba kpé tawun ɖo égbé é. Mǐ byɔ́ we kpó akpakpa sɔ́ mɛ kpó ɖɔ a ní ba xósin nú nǔkanbyɔ́ tají élɔ́ lɛ́ ɖo Biblu mɛ:

• Étɛ́ mǐ ka sixú wa bo ɖu ɖo dǎkaxixo ɖó wǎngbɛ́númɛ wú jí din? Kpɔ́n xósin e Biblu ná é ɖo Atɔxwɛ e xóta tɔn nyí “Ðu ɖo wǎngbɛ́númɛ jí” é mɛ.

• Aniwú Mawu ka tin bɔ wǔvɛ́ mimɔ ka tíin sɔmɔ̌? Kpɔ́n xósin e za wě bo jínjɔ́n Biblu jí é ɖo video élɔ́ e xóta tɔn nyí Aniwú Mawu ka tin bɔ wǔvɛ́ mimɔ ɖe? é mɛ