Gběkanlin lɛ́ sín kɛ́n ɖe kpo dɔɔ 73 ɖo 100 jí ɖo xwe 50 mɛ: Étɛ́ Biblu ka ɖɔ?

Ðo 9 octobre 2024 ɔ, Fonds mondial pour la nature ɖe gbeɖíɖó e hu ado é ɖé tɔ́n dó nǔ e azɔ̌ gbɛtɔ́ lɛ́ tɔn nɔ wa dó gběkanlin lɛ́ wú é wú. É ɖe xlɛ́ ɖɔ “ɖo xwe 50 e wá yi lɛ́ é mɛ, énɛ́ wɛ nyí sín 1970 jɛ 2020 ɔ, kɛ́n gběkanlin lɛ́ tɔn ɖe kpo 73 ɖo 100 jí.” Gbeɖíɖó ɔ gb’akpá nú mɛ ɖɔ: “Ényí è ɖɔ ɖɔ nǔ e ná jɛ ɖo xwe atɔ́ɔ́n e ja lɛ́ é mɛ é ná ɖɔ lěe gbɛ ná cí ɖo ayǐkúngban jí ɖo sɔgúdo é ɔ, é ko nyí sin dó xó jí ǎ.”

É sɔgbe ɖɔ gbeɖíɖó mɔ̌hun ní gba ayi dó nú mɛ gěgé. Mǐ yí wǎn nú planɛ́ti ɖɛkpɛ ɖɛkpɛ mǐtɔn, bo nɔ ba ɖɔ gběkanlin lɛ́ ní se wǔvɛ́ ǎ. Nǔ nɔ cí mɔ̌ nú mǐ ɖó Mawu bló mǐ bónú mǐ ná kpé nukún dó kanlin lɛ́ wú.—Bǐbɛ́mɛ 1:27, 28; Nǔnywɛ́xó 12:10.

Énɛ́ wú ɔ, a sixú kanbyɔ́ ɖɔ: ‘Mǐ ka ná kpé wú bo ná cyɔ́n alɔ gběkanlin e ɖo ayǐkúngban ɔ jí lɛ́ é jí a? Étɛ́ Biblu ka ɖɔ?’

Nukúnɖíɖó ɖé nú sɔgúdo

Mǐ ná bo tlɛ dó gǎn gbɔn ɖěbǔ bá hwlɛ́n kanlin lɛ́ gán ɔ, Mawu kɛ́ɖɛ́ jɛ́n sixú cyɔ́n alɔ yě jí nǔgbó nǔgbó tɔn. Sɔgbe xá Nǔɖexlɛ́mɛ 11:18 ɔ, Biblu ɖɔ ɖ’ayǐ ɖɔ Mawu ná “sú kún dó nú mɛ ɖěɖěe nɔ hɛn ayǐkúngban ɔ gblé lɛ́ é.” Wěmafɔ énɛ́ kplɔ́n nǔ we mǐ:

1. 1. Mawu ná sú ali dó gbɛtɔ́ lɛ́ bɔ yě ná hɛn ayǐkúngban ɔ gblé bǐ mlɛ́mlɛ́, alǒ sú kún tɔn dó ǎ.

2. 2. Mawu ná wa nǔ zaanɖé din. Nɛ̌ mǐ ka wa gbɔn bo tuun? Ðó égbé ɔ, awǒvinú ɖaxó wɛ é nyí ɖɔ gbɛtɔ́ lɛ́ nɔ sú kún dó nú kanlin lɛ́ tawun din hú ɖ’ayǐ tɔn.

Étɛ́ Mawu ka ná wa dó ɖe ɖɛ tagba énɛ́? É ná bló bɔ acɛkpikpa tɔn e ɖo jǐxwé é alǒ Axɔ́súɖuto tɔn ná kp’acɛ dó ayǐkúngban ɔ bǐ jí. (Matíe 6:10) Acɛkpikpa énɛ́ ná kplɔ́n nǔ e sín hudó gbɛtɔ́ tónúsetɔ́ lɛ́ ɖó bá dó kpé nukún dó gběkanlin lɛ́ wú ɖo ayǐkúngban ɔ jí lobo cyɔ́n alɔ yě jí é yě.—Ezayíi 11:9.