Nǔ e Biblu ɖɔ dó ninɔmɛ ayǐ mɛ tɔn e nɔ húzú é kpó sɔgúdo mǐtɔn kpó wú é

‘Ninɔmɛ ayǐ mɛ tɔn e nɔ ɖo hǔzúhúzú wɛ é ko húzú adla bo nɔ j’ayǐ. Ayǐkúngban ɔ jí ninɔ ko ɖo wǔ vɛ́ wɛ.’—The Guardian.

Tagba syɛ́nsyɛ́n e mɔ wɛ gbɛtɔ́ lɛ́ ɖe lɛ́ é gěgé nɔ sín yěɖésúnɔ wú. Nǔnywɛ́ xwítíxwítízɔ́watɔ́ gěgé yí gbe ɖɔ nǔ e gbɛtɔ́ lɛ́ nɔ wa lɛ́ é wɛ nɔ zɔ́n bɔ zozo ayǐkúngban ɔ tɔn fɔ́n bo ɖo syɛ́nsyɛ́n d’é jí wɛ. Zozo ayǐkúngban ɔ tɔn e fɔ́n bo ɖo jijɛjí wɛ é ko ɖyɔ́ ninɔmɛ ayǐ mɛ tɔn, bo ko dɔn tagba syɛ́nsyɛ́n gěgé nyi ayǐ. Nǔ e bɔ d’é wú lɛ́ é ɖo tagba énɛ́ lɛ́ mɛ:

• Ninɔmɛ ayǐ mɛ tɔn e nɔ ɖo hǔzúhúzú wɛ hwɛhwɛ, bo nɔ syɛ́n tawun lɛ́ é ɖi yǒzo syɛ́nsyɛ́n, akú, kpó jɔhɔn syɛ́nsyɛ́n kpó nɔ zɔ́n bɔ tɔ nɔ gba mɛ alǒ sin nɔ ɖa nǔ.

• Singó e ɖo taligbé ayǐkúngban ɔ tɔn lɛ́ é nɔ sínsín.

• Sin e ɖo xu mɛ é nɔ jɛjí.

Ninɔmɛ ayǐ mɛ tɔn e nɔ ɖo hǔzúhúzú wɛ é nɔ wa nǔ dó fí lɛ́ bǐ wú. Xójláwéma New York Times gbéjé ninɔmɛ to 193 tɔn kpɔ́n bo ɖɔ: “Planɛ́ti ɔ ɖó hudó alɔdó tɔn.” Ðó ninɔmɛ ayǐ mɛ tɔn e nɔ ɖo hǔzúhúzú wɛ é ɖo kú kpó wǔvɛ́ kpó dɔn wá nú mɛ gěgé wɛ wútu ɔ, tutomɛ gbɛ ɔ tɔn e nɔ kpé nukún dó lanmɛ ná nɔ ganjí wú é ɖɔ ɖɔ é wɛ nɔ “sɔ́ gbɛ gbɛtɔ́ lɛ́ tɔn ɖó axɔ́ nu hú gǎn.”

É ɖo mɔ̌ có, mǐ ɖó hwɛjijɔ e wú mǐ ná ɖó nukún sɔgúdo kpó jiɖiɖe kpó lɛ́ é. Biblu ko ɖɔ nǔ e ɖo jijɛ wɛ bɔ mǐ mɔ égbé lɛ́ é sín xó ɖ’ayǐ, bo lɛ́ ɖɔ nǔ e wú mǐ sixú ɖó nukún ɖɔ Mawu ná wa nǔɖé dó d’alɔ é kpó nǔ e é ná wa bá dó nya xɛ ɖo sɔgúdo mǐtɔn jí é kpó.

Ninɔmɛ ayǐ mɛ tɔn e nɔ ɖo hǔzúhúzú wɛ é ka bló bɔ nǔɖɔɖayǐ Biblu tɔn lɛ́ jɛnu wɛ a?

Ganjí. Ninɔmɛ ayǐ mɛ tɔn e nɔ ɖo hǔzúhúzú wɛ bo nɔ bló bɔ zozo nɔ tíin gbɔn gbɛ ɔ bǐ mɛ é ɔ, nǔɖé wɛ bɔ Biblu ko ɖɔ ɖ’ayǐ ɖɔ é ná jɛ ɖo azǎn mǐtɔn gbe.

Nǔɖɔɖayǐ ɔ: “Ðo azǎn gǔdo gúdo tɔn lɛ́ mɛ ɔ, hwenu e syɛ́n bo vɛ́ wǔ bɔ è ná ɖí xwi xá lɛ́ é ná tíin. Ðó gbɛtɔ́ lɛ́ ná nɔ nyí cejɛ́nnábínɔ, yě ná nɔ yí wǎn nú akwɛ́, . . . yě ná nɔ nɔ gbejí ǎ, . . . yě ná nɔ ba ná ɖó gbe kpɔ́ ǎ, . . . yě ná nɔ sa mɛ ɖu, yě ná nɔ syɛ́n ta.”—2 Timɔtée 3:1-4.

Biblu ɖɔ ɖ’ayǐ ɖɔ nǔwalɔ gbɛtɔ́ lɛ́ tɔn lɛ́ ná zɔ́n bɔ ninɔmɛ ayǐ mɛ tɔn syɛ́nsyɛ́n lɛ́ ná tíin. Akwɛ́ nɔ myá nukún nú acɛkpikpa lɛ́ kpó ajɔ̌watɔ́ lɛ́ kpó sɔmɔ̌ bɔ lěe gbɛ ná wá cí nú jijimɛ e kpo lɛ́ é sɔ́ nɔ myá nukún nú yě ǎ. Yě ná bo tlɛ tɛ́n kpɔ́n bá w’azɔ̌ ɖó kpɔ́ bá dó ɖe ɖɛ tagba lɛ́ ɔ, yě nɔ kpé wú bo nɔ ɖó gbe kpɔ́ dó nǔ e yě ɖó ná wa bá ɖó yǒzo syɛ́nsyɛ́n e ɖo gbígbɛ́ wɛ gbɔn gbɛ ɔ bǐ mɛ é te é wú ǎ.

Nǔɖɔɖayǐ énɛ́ ɖo xlɛ́xlɛ́ wɛ ɖɔ mǐ kún ɖó ná ɖó nukún ɖɔ gbɛtɔ́ lɛ́ ná húzú lěe yě nɔ wa nǔ gbɔn é, bo ná nya xɛ ayǐkúngban ɔ jí ó. Biblu tlɛ ɖɔ ɖɔ cejɛ́nnábínú e mɛ lɛ́ nɔ wa é ná nɔ ‘ɖo nylánylá d’é jí wɛ.’—2 Timɔtée 3:13.

Nǔ e wú mǐ sixú kú d’é jí ɖɔ Mawu ná wa nǔɖé dó d’alɔ é

Biblu ɖe xlɛ́ ɖɔ nǔ planɛ́ti mǐtɔn tɔn kpó mǐ mɛ e ɖ’é jí lɛ́ é kpó tɔn nɔ ɖu ayi mɛ nú Jexóvaa Mawu mǐtɔn e dá mǐ é. Mǐ ní kpɔ́n wěmafɔ Biblu tɔn e xlɛ́ ɖɔ Mawu ná wa nǔɖé dó d’alɔ é atɔn.

1. 1. Mawu “bló [ayǐkúngban ɔ] ɖó wǔvɔ́ ǎ, loɔ, bónú gbɛtɔ́ ní dó nɔ jí.”—Ezayíi 45:18.

   Mawu ná bló bɔ linlin e é ɖó nú ayǐkúngban ɔ é ná jɛnu. (Ezayíi 55:11) É ná lɔn nú è ná sú kún tɔn dó alǒ bló bɔ ninɔ jí ná gló ǎ.

2. 2. “To ɔ ka ná nyí mɛ e nɔ sɔ́ yěɖée hwe lɛ́ tɔn, bɔ fífá ma ɖó dogbó e yě ná mɔ ɔ wɛ ná nyí nǔ e ná nɔ víví nú yě é. To ɔ ná nyí hwɛjijɔnɔ lɛ́ tɔn, bɔ yě ná nɔ mɛ káká sɔ́yi.”—Ðɛhan 37:11, 29.

   Mawu d’akpá ɖɔ gbɛtɔ́ lɛ́ ná nɔ ayǐkúngban ɔ jí káká sɔ́yi ɖo fífá mɛ.

3. 3. “Amɔ̌, mɛ nyanya lɛ́ ɔ, è ná ɖe yě sín ayǐkúngban ɔ jí.”—Nǔnywɛ́xó 2:22.

   Mawu d’akpá ɖɔ émí ná ɖe mɛ e nɔ fɔ́n bo nɔ ɖo nǔ nyanya wa wɛ lɛ́ é sín ayǐkúngban ɔ jí, káká jɛ mɛ ɖěɖěe nɔ hɛn ayǐkúngban ɔ gblé lɛ́ é jí.

Nǔ e Mawu ná wa nú sɔgúdo mǐtɔn é

Nɛ̌ Mawu ka ná bló gbɔn bɔ akpá e é dó dó ayǐkúngban ɔ wú é ná jɛnu? É ná bló mɔ̌ gbɔn axɔ́súɖuto e ná kpa acɛ gbɔn gbɛ ɔ bǐ mɛ é ɖé gblamɛ, énɛ́ wɛ nyí Axɔ́súɖuto Mawu tɔn. (Matíe 6:10) Axɔ́súɖuto énɛ́ ná kpa acɛ sín jǐxwé. É ná byɔ́ ɖɔ é ní ɖó gbe kpɔ́ xá acɛkpikpa gbɛtɔ́ tɔn lɛ́ dó tagba e ɖo ayǐkúngban ɔ kpó xá tɔn lɛ́ kpó mɛ lɛ́ é ɖiɖeɖɛ wú ǎ. É nyɔ́ wa ɔ, Axɔ́súɖuto Mawu tɔn ná ɖyɔ́ acɛkpikpa gbɛtɔ́ tɔn lɛ́ bǐ.—Daniyɛ́li 2:44.

Axɔ́súɖuto Mawu tɔn nyí wɛn ɖagbe ɖé nú gbɛtɔ́ lɛ́ bǐ kpó ayǐkúngban ɔ bǐ kpó. (Ðɛhan 96:10-13) Kpɔ́n nǔ e Jexóva Mawu ná wa gbɔn Axɔ́súɖuto tɔn gblamɛ lɛ́ é.

• É ná bló ayǐkúngban ɔ ɖó

  Nǔ e Biblu ɖɔ é: “Gbětótló kpó ayǐkúngban xúxú kpó ná j’awǎ, gbětótló ná j’awǎ, bo ná gba sɛ́ folówa saflán ɖɔhun.”—Ezayíi 35:1.

  Nǔ e sɔgúdo hɛn nu é: Jexóva ná jlá planɛ́ti ɔ ɖó, káká jɛ fí e gbɛtɔ́ lɛ́ hɛn gblé lɛ́ é jí.

• É ná ɖó acɛ dó ninɔmɛ ayǐ mɛ tɔn syɛ́nsyɛ́n lɛ́ jí

  Nǔ e Biblu ɖɔ é: “[Jexóva] ɖó jɔhɔn ɔ te, bɔ xu ɔ hwíhwɛ́ bǐ tótótó.”—Ðɛhan 107:29.

  Nǔ e sɔgúdo hɛn nu é: Jexóva ɖó acɛ dó nǔ énɛ́ lɛ́ jí. Gbɛtɔ́ sɔ́ ná se wǔvɛ́ ɖě ɖó ninɔmɛ ayǐ mɛ tɔn e nɔ húzú é wú ǎ.

• É ná kplɔ́n lěe è ná kpé nukún dó ayǐkúngban ɔ wú ganjí gbɔn é mɛ

  Nǔ e Biblu ɖɔ é: “Un ná ná nukúnnúmɔjɛnǔmɛ we, un ná xlɛ́ ali e a ɖó ná gbɔn ɔ we.”—Ðɛhan 32:8.

  Nǔ e sɔgúdo hɛn nu é: Jexóva sɔ́ azɔ̌ d’así nú gbɛtɔ́ lɛ́ bɔ yě ná kpé nukún dó ayǐkúngban ɔ wú. (Bǐbɛ́mɛ 1:28; 2:15) É ná kplɔ́n mǐ lěe mǐ ná kpé nukún dó nǔɖíɖó tɔn lɛ́ wú gbɔn é kpó lěe mǐ ná zán gbɛ gbɔn bo ma ná hɛn ayǐkúngban ɔ gblé ǎ é kpó.