Wɔ̌nxixogbɛwu ka Na Wá Nɔte Gbeɖé À?

Enyi wɔ̌nxogbɛwutɔ́ lɛ dó nǔ sin ɔ, a sixu kanbyɔ ɖɔ: ‘É ka ɖɔ nǔɖe nú Mawu à? Etɛwu nǔ elɔ lɛ ka jɛ? Wɔ̌nxixogbɛwua ka na wá nɔte gbeɖé à? Nɛ̌ un ka sixu nɔ gbɛ̀ kpo xɛsi elɔ kpo gbɔn?’ Biblu na xósin e jɛmɛ nú mɛ lɛ é nú nǔkanbyɔ enɛ lɛ.

Nɛ̌ wɔ̌nxixogbɛwu ka nɔ cí nú Mawu?

Mawu gbɛ́ wǎn nú alǎnnúwiwa kpo wɔ̌nxixogbɛwu kpo. (Ðɛhan 11:5; Nǔnywɛxó 6:16, 17) Bɔ Jezu, ee nyí afɔsɔ́ɖótetɔ́ Mawu tɔn é, gbɛ́ nǔ nú ahwanvu tɔn lɛ hwenu e ye wà alǎnnú é. (Matie 26:50-52) Mɛɖé lɛ tíìn bɔ enyi ye wà alǎnnú ɔ, ye nɔ ɖɔ ɖɔ Mawu sín nyikɔ mɛ wɛ emi wà mɔ̌ ɖè, loɔ, é wɛ nɔ zɔ́n axi enɛ ye ǎ. È na ɖɔ lɔ ɔ, é tlɛ nɔ ɖótó ɖɛ yetɔn lɛ ǎ.—Ezayíi 1:15.

Mɛ ɖěɖee ɖò wuvɛ̌ sè wɛ lɛ é bǐ, kaka jɛ mɛ ɖěɖee wu wɔ̌nxixogbɛwu ko wà nǔ dó lɛ é jí, sín nǔ nɔ ɖu ayi mɛ nú Mawu. (Ðɛhan 31:8; 1 Piyɛ́ɛ 5:7) Biblu lɛ́vɔ ɖexlɛ́ ɖɔ Mawu na wá ɖó alǎnnúwiwa te.—Ezayíi 60:18.

Wɔ̌nxixogbɛwu sín ɖɔ

Biblu kɔ́n sɛ̀ sín hwɛjijɔ taji e wu wɔ̌nxixogbɛwu dó tíìn é jí: “Gbɛtɔ́ ɖě nɔ kpa acɛ gannaganna nú nɔzo tɔn, bo nɔ wà nǔ dó wǔ tɔn.” (Nǔnywɛtɔ́xó 8:9) Sín dò ɔ, mɛ e ɖò tɛn acɛkpikpa tɔn mɛ lɛ é nɔ zán wlɛnwín xɛsidómɛ tɔn lɛ dó gbidí kɔ nú mɛ ɖevo lɛ. Bɔ ɖó è nɔ gbidí kɔ nú mɛ ɖevo lɛ wutu ɔ, ye nɔ xò wɔ̌n gbɛ̀ wu dó s’axɔ́ ɖó axɔ́ tɛnmɛ.—Nǔnywɛtɔ́xó 7:7.

Vivɔnu wɔ̌nxixogbɛwu Tɔn

Mawu d’akpá ɖɔ emi na sú kún dó nú xɛsidómɛ kpo alǎnnúwiwa kpo, bo na bló bɔ fífá na lɛ́ tíìn ɖò ayikúngban jí. (Ezayíi 32:18; Micée 4:3, 4) É na:

• Hɔn ɖɔ nú wɔ̌nxixogbɛwu. Mawu na kp’acɛ gbɔn gbɛ̀ ɔ bǐ mɛ, bɔ acɛkpikpa éyɛtɔn na ɖyɔ gbɛtɔ́ lɛ tɔn. Jezu Klisu, ee nyí Axɔ́su nú acɛkpikpa enɛ é, na wà nǔ jlɔjlɔ xá mɛ bǐ, lobo na sú kún dó nú kɔgbidínúmɛ kpo alǎnnúwiwa kpo. (Ðɛhan 72:2, 14) Ðò hwe enɛ nu ɔ, mɛ ɖebǔ sɔ́ na nɔ xò wɔ̌n gbɛ̀ wu ǎ. “Fífá ma ɖó dogbó e [gbɛtɔ́ lɛ] na mɔ ɔ wɛ na nyí nǔ e na nɔ víví nú ye é.”—Ðɛhan 37:10, 11.

• Jlá nǔ e wɔ̌nxixogbɛwu ko hɛn gblé lɛ é bǐ ɖó. Nǔ ɖěɖee wɔ̌nxixogbɛwu ko hɛn gblé dó gbɛtɔ́ lɛ wu ɖò agbaza kpo lee nǔ nɔ cí nú mɛ é kpo lixo lɛ é ɔ, Mawu na jlá bǐ ɖó. (Ezayíi 65:17; Nǔɖexlɛ́mɛ 21:3, 4) É tlɛ d’akpá ɖɔ emi na fɔ́n mɛkúkú lɛ, bɔ ye na lɛ́ wá nɔ gbɛ̀ ɖò ayikúngban jí ɖò fífá mɛ.—Jaan 5:28, 29.

Biblu na mǐ hwɛjijɔ ɖagbe e wu mǐ na ɖi nǔ ɖɔ Mawu na wà nǔ ɖò malin-malin mɛ lɛ é. Amɔ̌, a sixu kanbyɔ ɖɔ: ‘Etɛwu Mawu ma ka ko ɖó wɔ̌nxixogbɛwu te à?’ Nú a na mɔ xósin ɔ hǔn, kpɔ́n video Aniwu Mawu ka Tin Bɔ Wuvɛ̌ Mimɔ Ðè?