Zǎn nǔgbódodó Jexóva tɔn lɛ́ dó kplɔ́n ayixa towe

1-2. (a) Étɛ́ è ka ná Adámu kpó Ɛvu kpó? (b) Nɛ̌ yě ka ɖó ná ko ɖe nǔsumɛnukúnmɛ xlɛ́ ɖó nǔníná énɛ́ wú gbɔn?

NǓ E wá tamɛ nú kanlin lɛ́ é wɛ yě nɔ wa. È sixú sɔ́ macínu ɖé lɛ́ ɖó alɔ ɖé jí bɔ yě ná nɔ wa nǔ e è zɔ́n yě é. Amɔ̌, gbɛtɔ́ lɛ́ gbɔn vo. È dá mǐ kpó nǔníná bǔnɔ ɖé kpó. Nǔníná ɖé wɛ bo nɔ xɔ akwɛ́ nú klisánwun nǔgbó lɛ́. Nǔníná énɛ́ wɛ nyí mɛɖésúsíninɔ. Nǔwúkpíkpé ɖé wɛ bo nɔ zɔ́n bɔ mǐ nɔ wá gbeta lɛ́ kɔn mǐɖésú. Biblu ɖɔ nú mǐ ɖɔ è bló súnnu nukɔntɔn ɔ, Adámu ɖo akpajlɛ́ Mawu tɔn mɛ. (Bǐb. 1:26, 27) Ðó nǔɖíɖó e ɖó nǔnywɛ́ lɛ́ é wɛ Adámu kpó asi tɔn Ɛvu kpó nyí wútu ɔ, è hun ali nú yě bɔ yě nɔ wá gbeta lɛ́ kɔn yěɖésúnɔ.

² Jexóva dó sɛ́n gbɛ́ɖɛ́ɖɛ́ nú Adámu kpó Ɛvu kpó ǎ. É ɖɔ nú yě kpowun ɖɔ yě ní kpé nukún dó ayǐkúngban ɔ wú, ji vǐ lɛ́ kɔn nyi jí, bo ɖó sísí nú acɛ e émí ɖó bá dó sɛ́n e ɖo jlɛ̌ jí lɛ́ é nú yě dó nǔ e yě ná wa lɛ́ é wú é. (Bǐb. 1:28; 2:16, 17) Nɛ̌ Adámu kpó Ɛvu kpó ka ɖó ná ko ɖe nǔsumɛnukúnmɛ xlɛ́ mɛ e ná yě mɛɖésúsíninɔ é gbɔn? Kpó nǔ e Jexóva ko wa nú yě lɛ́ é bǐ kpó ɔ, yě ɖó ná ko se tónú nú sɛ́n énɛ́ lɛ́, ɖó wǎn e yě yí n’i é kpó jlǒ e yě ɖó bá hɛn xomɛ tɔn hun é kpó wú.—Nǔx. 23:15.

3. Nɛ̌ Adámu kpó Ɛvu kpó ka zán mɛɖésúsíninɔ yětɔn gbɔn?

³ Lěe Biblu xlɛ́ gbɔn é ɔ, Adámu kpó Ɛvu kpó zán mɛɖésúsíninɔ yětɔn kpó nǔnywɛ́ kpó ǎ. É nyɔ́ wa ɔ, yě wá gbeta ɔ kɔn bo tlí tó nú Jexóva. É nyí wǎn yí nú Jexóva kpó nǔsumɛnukúnmɛ ɖiɖexlɛ́ ɛ kpó wɛ sísɛ́ yě bɔ yě wá gbeta yětɔn kɔn ǎ, loɔ, cejɛ́nnábí wɛ. (Bǐb. 3:1-7) Mǐ kpo ɖo xɔxɔ nǔ e gbeta yětɔn ji lɛ́ é tɔn se wɛ káká jɛ égbé.—Hlɔ̌. 5:12.

4. (a) Sɔgbe xá Galátinu lɛ́ 6:5 ɔ, étɛ́ mǐ mɛ bǐ ka ɖó ná wa? (b) Nǔ ɖěvo tɛ́ wú mǐ ka ná ɖɔ xó dó ɖo xóta élɔ́ mɛ?

⁴ Gbɛ vɛ́ wǔ tawun ɖo égbé. Gbeta gěgé kɔn wɛ mǐ ɖó ná nɔ wá gbe bǐ gbe. (Xa Galátinu lɛ́ 6:5.) Ðé lɛ́ kɔn wíwá nɔ vɛ́ wǔ káká ɖé ǎ, có ɖěvo lɛ́ kɔn wíwá ka nɔ vɛ́ wǔ tawun. Nɛ̌ mǐ ka sixú nɔ wá gbeta ɖěɖěe nɔ nyɔ́ Jexóva nukúnmɛ lɛ́ é kɔn gbɔn? Jɛ nukɔn hwɛ̌ ɔ, mǐ ɖó ná tuun ɖɔ mǐ ɖó hudó alɔdó Jexóva tɔn tɔn. (Nǔx. 16:3; Jel. 10:23) Jezu e tlɛ nyí mɛ maɖóblɔ̌ é tuun ɖɔ émí ɖó hudó alɔdó Mawu tɔn tɔn. (Ebl. 5:7) Mǐ mɛ gbɛtɔ́ hwɛhutɔ́ lɛ́ tɔn zun kwínkwín ma kwín. Din ɔ, mi nú mǐ ní ɖɔ xó dó nǔ ɖěvo e Mawu ná mǐ b’ɛ ná d’alɔ mǐ bɔ mǐ ná nɔ wá gbeta ɖagbe lɛ́ kɔn é jí: ayixa mǐtɔn wɛ.

ÉTƐ́ KA NƆ NYÍ AYIXA?

5. (a) Étɛ́ ka nɔ nyí ayixa? (b) Nɛ̌ ayixa mǐtɔn ka nɔ d’alɔ mǐ gbɔn? (Hlɔ̌manu lɛ́ 2:14, 15)

⁵ Ayixa mǐtɔn ɔ, nǔwúkpíkpé jɔwámɔ tɔn e nɔ zɔ́n bɔ mǐ nɔ tuun nǔ ɖagbe kpó nǔ nyanya kpó é wɛ. Mɛ e ma tlɛ tuun nǔtí dó sɛ́n Mawu tɔn lɛ́ wú ǎ é lɔ ɖó ayixa. (2 Kɔ. 4:2) Ayixa mǐtɔn cí hwɛɖɔtɔ́ xomɛ tɔn e sixú dó hwɛ mǐ alǒ jɛ ahwan mǐ jí ɖó linlin kpó nǔwiwa mǐtɔn lɛ́ kpó wú é ɖɔhun. (Xa Hlɔ̌manu lɛ́ 2:14, 15.) Ayixa mǐtɔn sixú gb’akpá nú mǐ dó nǔ e mǐ tuun ɖɔ é nylá é wiwa wú. (1 Sam. 26:8-11) Alǒ é sixú sísɛ́ mǐ dó nǔ e mǐ tuun ɖɔ é sɔgbe é wiwa kɔn. Mɛɖésúsíninɔ ɖíɖó kpowun nɔ xlɛ́ ɖɔ gbeta ɖěbǔ e kɔn mǐ wá é nɔ nyɔ́ Jexóva nukúnmɛ ǎ. Ayixa mǐtɔn ɖó ná d’alɔ mǐ bɔ mǐ ná tuun vogbingbɔn e ɖo gbeta ɖagbe kpó nyanya kpó tɛ́ntin é.

6. Étɛ́wú ayixa mǐtɔn ma ka nɔ d’alɔ mǐ hwebǐnu bónú mǐ nɔ wá gbeta ɖagbe lɛ́ kɔn ǎ?

⁶ Amɔ̌, é blá wǔ ɖɔ ayixa mǐtɔn kún nɔ d’alɔ mǐ hwebǐnu ó. Ðó mǐ nyí hwɛhutɔ́ wútu ɔ, ayixa mǐtɔn ɖó blɔ̌. Kplɔ́n e mǐ yí é, xá e mɛ mǐ su ɖe é kpó jlǒ hwɛhuhu tɔn mǐtɔn lɛ́ kpó sixú wa nǔ dó wǔ tɔn. Biblu ɖɔ ɖɔ ayixa sixú nɔ “ma ɖó gǎn,” “blí,” “cí gan zozo wɛ è dó ɖó wuntun ná ɖɔhun,” bo tlɛ sixú nyí “nyanya.” (1 Kɔ. 8:12; Ti. 1:15; 1 Tim. 4:2; Ebl. 10:22) Ayixa mɔ̌hun sɔ́ nɔ xlɛ́ ali ɖagbe mɛ ǎ. É nɔ cí nǔdagan e ma sɔgbe ǎ, bɔ è ɖó ná bló ɖó é ɖɔhun. Énɛ́ wú ɔ, mǐ ɖó ná nɔ w’azɔ̌ ɖo ayixa mǐtɔn wú ganjí bónú é ná dó sixú kpo ɖo ninɔmɛ ɖagbe mɛ. (1 Pi. 3:16) Nɛ̌ mǐ ka sixú wa mɔ̌ gbɔn?

LĚE MǏ NÁ KPLƆ́N AZƆ̌ AYIXA MǏTƆN GBƆN É

7-8. (a) Étɛ́ ka ná d’alɔ mǐ bɔ mǐ ná kplɔ́n azɔ̌ ayixa mǐtɔn? (b) Nɛ̌ nǔgbódodó Biblu tɔn lɛ́ ka nɔ xlɛ́ ali mǐ gbɔn? Jlɛ̌ dó nǔɖé wú. (Kpɔ́n ɖiɖe ɔ lɔmɔ̌.)

⁷ Nɛ̌ mǐ ka sixú kplɔ́n azɔ̌ ayixa mǐtɔn gbɔn? Mǐ ɖó ná nɔ xa Biblu hwɛhwɛ, bo ná nɔ kplɔ́n bo tuun nǔ e nyí nǔ ɖagbe kpó nǔ nyanya kpó ɖo Jexóva nukúnmɛ é. Sɛ́n Mawu tɔn lɛ́ kplɔ́nkplɔ́n ná d’alɔ mǐ bɔ mǐ ná mɔ nukúnnú jɛ linlin tɔn wú. Amɔ̌, lěe mǐ ɖɔ gbɔn ɖo xóta e wá yi é mɛ é ɔ, ninɔmɛ ɖé lɛ́ mɛ jɛ́n è sixú nyi sɛ́n lɛ́ ɖe. Énɛ́ wú wɛ mǐ ɖó ná nɔ lɛ́ ba nǔgbódodó lɛ́, ɖó yě nɔ zɔ́n bɔ mǐ nɔ ɖó nukúnnúmɔjɛnǔmɛ e gbló ada é dó linlin Jexóva tɔn kpó lěe nǔ nɔ cí n’i é kpó wú.—Eza. 55:9.

⁸ È sixú jlɛ́ gbɛzán mǐtɔn dó zɔnlin zunzun gbɔn gbětótló mɛ wú. Mǐ ní ɖɔ ɖɔ mǐ ɖo zɔnlin zun wɛ gbɔn gbětótló e ma ɖó ali ɖé lě tawun ǎ, alǒ wuntun e nɔ nɔ alita é ɖě ǎ é mɛ. Fí e hwesivɔ́ ɔ kpó sunví lɛ́ kpó ɖe é sixú d’alɔ mǐ bɔ mǐ ná tuun fí e mǐ ná tunta bá yi fí e mǐ xwe é é. Amɔ̌, ɖiɖe to tɔn e xlɛ́ wuntun e ɖo ali ɔ jí é ɖé lɛ́ é ná d’alɔ mǐ hú gǎn. Ðiɖe to tɔn mɔ̌hun ná ná mǐ gǎnjɛwú ɖɔ mǐ ɖo ali ɖagbe ɔ jí, bo ná lɛ́ d’alɔ mǐ bɔ ényí mǐ ko sɔ́ ali ɖěvo wɛ nyí ɔ, mǐ ná lɛ́ tuun. Nǔ e gbé nya wɛ mǐ ɖe ɖo gbɛ mɛ é wɛ nyí ɖɔ nǔ mǐtɔn ná nyɔ́ Jexóva nukúnmɛ. Biblu cí ɖiɖe to tɔn e nɔ xlɛ́ ali mǐ nyi wɛn é ɖɔhun. Nǔgbódodó Biblu tɔn lɛ́ cí wuntun e ɖo ali ɔ jí lɛ́ é ɖɔhun. Nǔgbódodó énɛ́ lɛ́ xwixwedó ná ná mǐ gǎnjɛwú ɖɔ mǐ ná yi fí e mǐ xwe é.

9. Nǔ ɖěvo tɛ́ ka ɖo Hlɔ̌manu lɛ́ 9:1 mɛ bo ná d’alɔ mǐ bɔ mǐ ná kplɔ́n ayixa mǐtɔn?

⁹ Bo ná dó kplɔ́n azɔ̌ ayixa mǐtɔn ganjí ɔ, mǐ ɖó gbigbɔ mímɛ́ Mawu tɔn sín hudó. (Xa Hlɔ̌manu lɛ́ 9:1.) Gbigbɔ mímɛ́ ɔ ná d’alɔ mǐ bɔ mǐ ná mɔ nukúnnú jɛ linlin e Mawu nɔ ɖó dó nǔ lɛ́ wú é wú. É sixú lɛ́ sísɛ́ mǐ, bo lɛ́ ná hlɔ̌nhlɔ́n mǐ bɔ mǐ ná nɔ wa nǔ lěe Jexóva ba gbɔn é. (Filí. 2:13) Amɔ̌, nɛ̌ mǐ ka sixú mɔ alɔdó gbigbɔ mímɛ́ Jexóva tɔn tɔn gbɔn?

10. Nɛ̌ mǐ ka sixú mɔ alɔdó gbigbɔ mímɛ́ ɔ tɔn gbɔn? (Luki 11:10, 13)

¹⁰ Nɔ xo ɖɛ bo nɔ byɔ́ gbigbɔ mímɛ́. (Xa Luki 11:10, 13.) Mǐ sixú kú d’é jí ɖɔ Jexóva nɔ hun alɔ bo nɔ ná gbigbɔ mímɛ́ tɔn mǐ. (Jaan 3:34) É nɔ hun alɔ titewungbe bo nɔ ná mɛ ɖěɖěe nɔ se tónú n’i lɛ́ é. (Nǔx. 1:23; Ja. 1:5) Nǔ ɖěvo tɛ́ ka ná d’alɔ mǐ bɔ mǐ ná kplɔ́n ayixa mǐtɔn?

11. (a) Étɛ́ ka ɖó ná nyí nǔ tají e gbé mǐ ná nya ɖo gbɛ mɛ é? (b) Aniwú mǐ ka ɖó ná mɔ nǔ jɛ wú ɖɔ mǐ kplɔ́n azɔ̌ ayixa mǐtɔn b’ɛ ɖo azɔ̌ wa wɛ ganjí?

¹¹ Nɔ ba ná nyɔ́ ɖo Jexóva sí hwebǐnu. (Nǔx. 8:34, 35) Nǔ nukɔntɔn e gbé mǐ ɖó ná nɔ nya ɖo gbɛ mɛ é nɛ́. Ényí mǐ nɔ hɛn nǔ énɛ́ ayi mɛ ɖo ninɔmɛ e mɛ mǐ nɔ gbɔn ɖo gbɛzán mǐtɔn mɛ lɛ́ é bǐ mɛ ɔ, énɛ́ sixú d’alɔ mǐ bɔ mǐ ná kplɔ́n azɔ̌ ayixa mǐtɔn. Ényí mǐ nɔ lin nǔ lěe Jexóva nɔ lin gbɔn é, bɔ lěe nǔ nɔ cí n’i é nɔ lɛ́ ɖu ayi mɛ nú mǐ hǔn, ayixa e è kplɔ́n ganjí é wɛ mǐ ɖó nɛ́. Ényí mǐ lin tamɛ dó lěe gbɛ vɛ́ wú sɔ ɖo égbé é jí ɔ, mǐ nɔ mɔ lěe ayixa e è kplɔ́n ganjí é ɖo tají sɔ é. Hwɛhwɛ wɛ mǐ nɔ ɖí xwi xá ninɔmɛ e xó Biblu ma ɖɔ tlɔlɔ ǎ lɛ́ é. Ninɔmɛ énɛ́ lɛ́ sixú nyí ayiɖeɖayǐ, azɔ̌ mǐtɔn, wěma kplɔ́nkplɔ́n, alǒ kancícá e mǐ ɖó xá mɛ ɖěvo lɛ́ é. Énɛ́ wú ɔ, nɛ̌ mǐ ka sixú kú d’é jí ɖɔ Jexóva nɔ yí gbe nú gbeta ɖěɖěe kɔn mǐ nɔ wá dó nǔ énɛ́ lɛ́ wú é gbɔn?—2 Kɔ. 1:12.

12. Étɛ́ ka ná d’alɔ mǐ bɔ mǐ ná tuun nú ayixa mǐtɔn ɖo ali xlɛ́ mǐ wɛ ganjí? (Efɛ́zinu lɛ́ 5:10)

¹² Nɔ lin tamɛ dó nǔ e a xa ɖo Xó Mawu tɔn mɛ é jí. (Ðɛh. 49:4) Ényí a ɖo Biblu xa wɛ hǔn, nɔ ba nǔgbódodó ɖěɖěe ná d’alɔ we bɔ a ná mɔ nukúnnú jɛ linlin Mawu tɔn mɛ lɛ́ é. (Xa Efɛ́zinu lɛ́ 5:10.) Ée mǐ ná ɖo xwi ɖí xá ninɔmɛ syɛ́nsyɛ́n lɛ́ wɛ é ɔ, mǐ ɖó ná nɔ ba nǔgbódodó e ɖo Biblu mɛ bo ná d’alɔ mǐ bɔ mǐ ná tuun nú ayixa mǐtɔn nɔ d’alɔ mǐ bɔ mǐ nɔ wá gbeta ɖagbe lɛ́ kɔn alǒ gbɔ a jí lɛ́ é. (Nǔx. 2:4-9, 11-13) Nǔgbódodó énɛ́ lɛ́ sixú d’alɔ mǐ bɔ mǐ ná vɔ́ azɔ̌ wa ɖo ayixa mǐtɔn wú, alǒ jlá ɛ ɖó ényí é byɔ́ ɖó mɔ̌ ɔ nɛ́, bá dó kú d’é jí ɖɔ mǐ kpo ɖo ali ɔ jí.—Ebl. 5:14.

13. Étɛ́ mǐ ma ka ɖó ná wa ǎ? Nǎ kpɔ́ndéwú ɖokpó.

¹³ Ma to wá gbeta ɖé kɔn hwɛ̌ cóbó wá ba nǔgbódodó Biblu tɔn ɖěɖěe ná nɔ gǔdo ná lɛ́ é ó. Mǐ ba ná wa nǔ Izlayɛ́li ví ɖěɖěe kpo ɖo ayǐkúngban Judáa tɔn jí hwenu e è sú Jeluzalɛ́mu sín kún dó ɖo 607 J.H.M. tɔn gúdo lɛ́ é ɖɔhun ǎ. Yě ɖɔ nú Jelemíi ɖɔ: “Jexóva Mawu towe ní ɖɔ ali e mǐ ɖó ná mlɛ́ é kpó nǔ e mǐ ɖó ná wa é kpó nú mǐ.” (Jel. 42:3-6) Amɔ̌, yě ko wá gbeta nǔ e wa gbé yě ja é tɔn kɔn. Ée ali e Jexóva xlɛ́ yě é ma nyɔ́ nukún yětɔn mɛ ǎ é ɔ, yě tɛ́ dó gbeta e kɔn yě ko wá ɖ’ayǐ é wú. Bɔ énɛ́ ka dɔn awěxomɛ wá. (Jel. 42:19-22; 43:1, 2, 4) Énɛ́ wú ɔ, cóbónú mǐ ná wá gbeta ɖé kɔn ɔ, mǐ ɖó ná ba nǔgbódodó Biblu tɔn ɖěɖěe ɖe linlin Jexóva tɔn xlɛ́ lɛ́ é, bo xwedó.

14. Ényí mǐ ɖo gbeta lɛ́ kɔn wá wɛ ɔ, étɛ́wú mǐ ka ɖó ná nɔ xwedó nǔgbódodó Biblu tɔn lɛ́?

¹⁴ Nɔ wá gbeta ɖěɖěe jínjɔ́n nǔgbódodó Biblu tɔn lɛ́ jí lɛ́ é kɔn. (Mat. 7:24-29; Ja. 1:23-25) Ényí mǐ nɔ wá gbeta e jínjɔ́n nǔgbódodó Biblu tɔn lɛ́ jí lɛ́ é kɔn ɔ, mǐ nɔ w’azɔ̌ alɔ ɖo alɔ mɛ xá gbigbɔ mímɛ́ ɔ. Mɔ̌ mɛ ɔ, Jexóva nɔ kpo ɖo gbigbɔ mímɛ́ tɔn ná mǐ wɛ. (Mɛ. 5:32) Amɔ̌, ényí mǐ nɔ wɔn ya nú ali e xlɛ́ mǐ wɛ gbigbɔ Jexóva tɔn ɖe é ɔ, mǐ sixú dɔn gbigbɔ mímɛ́ ɔ dó “aluwɛ mɛ,” alǒ wa nǔ e ma xo nǔ dó akpa ɖokpó ɔ mɛ xá ɛ ǎ é. (Efɛ́. 4:30; Eza. 63:10; Mɛ. 7:51) Jexóva tlɛ sixú tɛ gbigbɔ tɔn mǐ. (Ðɛh. 51:13; 1 Tɛ. 5:19) Énɛ́ ka ná nylá tawun, ɖó mǐ ɖó hudó gbigbɔ mímɛ́ tɔn bá dó mɔ hlɔ̌nhlɔ́n.—Efɛ́. 3:16.

LĚE È SIXÚ MƆ NǓGBÓDODÓ BIBLU TƆN E JƐXÁ NINƆMƐ MƐTƆN É GBƆN É

15-16. (a) Nɛ̌ mǐ ka sixú mɔ nǔgbódodó Biblu tɔn e sɔgbe xá ninɔmɛ mǐtɔn é gbɔn? (b) Nǔgbódodó Biblu tɔn tɛ́ lɛ́ ka sixú d’alɔ nǔkplɔ́ntɔ́ ɖé bɔ é ná mɔ hlɔ̌nhlɔ́n bo ɖó azɔ nunu te?

¹⁵ Nɔ zǎn azɔ̌wanú nǔkplɔ́nkplɔ́n tɔn lɛ́. Cóbónú mǐ ná sixú zán nǔgbódodó Biblu tɔn lɛ́ ɔ, mǐ ɖó ná tuun lěe è nɔ mɔ yě gbɔn ɖo Biblu mɛ é. Ði kpɔ́ndéwú ɔ, ényí Biblu kplɔ́ntɔ́ towe ka ɖo lɛjɛlɛjɛ dán dó azɔ nunu ɖíɖó te wú wɛ ɔ ka lo? É sixú lin nǔ gbɔn lě: ‘È ma ɖɔ xó dó azɔ nunu wú ɖo Biblu mɛ nɛ́. Énɛ́ wú ɔ, nɛ̌ mǐ ka wa gbɔn bo tuun ɖɔ é nylá?’ Nɛ̌ a ka sixú d’alɔ ɛ bɔ é ná mɔ nǔgbódodó Biblu tɔn ɖěɖěe sɔgbe xá ninɔmɛ tɔn lɛ́ é bo lin tamɛ dó yě jí gbɔn? Azɔ̌wanú ɖaaɖagbe e a sixú zán lɛ́ é ɖokpó wɛ nyí Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́. A sixú ɖɔ nú nǔkplɔ́ntɔ́ towe ɖɔ é ní kpɔ́n “Tabagisme” glɔ́. É ná mɔ xóta: “Le tabagisme : qu’en pense Dieu?” ɖo fínɛ́. (Kpɔ́n Atɔxwɛ (Flanségbe) 1^er juin 2014 mɛ.) Ée é ná ɖo xóta énɛ́ xa wɛ é ɔ, wěmafɔ kpó nǔgbódodó kpó tɛ́ lɛ́ é ka ná mɔ?

¹⁶ Nǔgbódodó e é ná mɔ ɖo xóta énɛ́ mɛ é atɔ́ɔ́n ɖíe: (1) Mǐ ɖó ná húzú kannumɔ nú nǔ e ná kplá mɛ jó nú kú é ɖě ǎ. (Hlɔ̌. 6:16) (2) Mǐ ɖó ná nyi alɔ nú nǔ ɖěbǔ e ná wa nǔ dó agbaza mǐtɔn wú é. (2 Kɔ. 7:1) (3) Jexóva ba ɖɔ mǐ ní sɛn émí kpó lǐndɔ̌n mǐtɔn bǐ kpó. (Mat. 22:37) (4) Nǔwiwa mǐtɔn lɛ́ ɖó ná wa nǔ dó mɛ ɖěvo lɛ́ wú ǎ. (Mat. 22:39; 1 Kɔ. 10:24) (5) Jexóva hɛn ɔ, é ná ná mǐ hlɔ̌nhlɔ́n bɔ mǐ ná wa nǔ e sɔgbe é. (Filí. 4:13) È ɖɔ xó dó azɔ nunu wú tlɔlɔ ɖo Biblu mɛ ǎ có, nǔgbódodó énɛ́ lɛ́ sixú d’alɔ nǔkplɔ́ntɔ́ towe bɔ é ná tuun linlin Jexóva tɔn.

17. Nɛ̌ súnnu kpó nyɔ̌nu kpó Kúnnuɖetɔ́ e ɖo linlin wɛ bo ná wlí alɔ lɛ́ é ka sixú mɔ nǔgbódodó Biblu tɔn ɖěɖěe sɔgbe xá ninɔmɛ yětɔn lɛ́ é b’ɛ ná d’alɔ yě gbɔn?

¹⁷ Nɛ̌ súnnu kpó nyɔ̌nu kpó Kúnnuɖetɔ́ e ɖo linlin wɛ bo ná wlí alɔ lɛ́ é ka sixú mɔ nǔgbódodó Biblu tɔn ɖěɖěe sɔgbe xá ninɔmɛ yětɔn bo ná d’alɔ yě bɔ yě ná wá gbeta ɖagbe lɛ́ kɔn é gbɔn? Alixlɛ́mɛwéma dobanúnǔ tɔn nú Kúnnuɖetɔ́ Jexóva tɔn lɛ́ sixú lɛ́ d’alɔ. Ényí è yi “Cérémonie et fête de mariage” glɔ́ ɔ, è nɔ mɔ xóta ɖé lɛ́ ɖo fínɛ́, bɔ nǔgbódodó Biblu tɔn lɛ́ ɖo yě mɛ. Nǔgbódodó e súnnu kpó nyɔ̌nu kpó e ɖo linlin wɛ bá wlí alɔ lɛ́ é sixú gbéjé kpɔ́n é ayizɛ́n ɖíe. (1) Tuto lɛ́ bǐ ɖó ná sɔ́ Jexóva su. (1 Kɔ. 10:31, 32) (2) Nǔsísɔ́ mǐtɔn ɖó ná jɛxá, nɔ jlɛ̌ jí, bo lɛ́ zɛ kpa ǎ. (1 Tim. 2:9; 1 Pi. 3:3, 4) (3) Mǐ ɖó ná jlá ajɔ̌ nú mǐɖée gbɛ Satáan tɔn ɖɔhun ǎ. (Jaan 17:14; Ja. 1:27; 1 Jaan 2:15, 16) (4) Tuto ɖó ná nɔ nǔ lɛ́ kɔn. (1 Kɔ. 14:40) (5) Jǒnɔyíyí lɛ́ ɖó ná nyí agɔ̌ e tɛnmɛ è nɔ wa nǔ gblégblé lɛ́ ɖe, bo nɔ nu ahan mú ɖe lɛ́ é ǎ. (Ga. 5:21) (6) È ɖó ná sɔ́ azɔ̌ d’así nú mɛɖé bɔ nukún tɔn ɖó ná ɖo nǔwiwa ɔ wú.—Jaan 2:8, 9.

18-19. (a) Azɔ̌wanú ɖěvo tɛ́ ka sixú d’alɔ mǐ? (b) Nǔgbódodó tɛ́ lɛ́ azɔ̌wanú énɛ́ zínzán ka sixú zɔ́n bɔ a ná mɔ, bɔ yě ná d’alɔ we bɔ a ná wá gbeta lɛ́ kɔn dó xwe lɛ́ kpó nǔwiwa lɛ́ kpó wú? (Kpɔ́n gbǎví “A ka sixú mɔ nǔgbódodó lɛ́ a?”)

¹⁸ Azɔ̌wanú ɖěvo e mɛ gěgé mɔ ɖɔ é nɔ hɛn le wá tawun é wɛ nyí Wěmafɔ lɛ́ nú klisánwun gbɛ zínzán. Wěma énɛ́ nɔ slɛ́ wěmafɔ lɛ́ dó xóta vovo lɛ́ glɔ́. Ényí a sɔ́ xóta ɖé ɔ, a ná mɔ nǔkanbyɔ́ kpó wěmafɔ kpó vovo e sixú d’alɔ we, bɔ a ná mɔ nǔgbódodó Biblu tɔn lɛ́ é. Ði kpɔ́ndéwú ɔ, klisánwun ɖé sixú kanbyɔ́ éɖée ɖɔ émí ka hɛn ɔ, émí ná yi xwe ɖé alǒ nǔwiwa ɖé domɛ a jí. Ényí é yi “Xwe lɛ́ kpó nǔwiwa lɛ́ kpó” glɔ́ ɔ, é ná mɔ xótala “Xwe kpó nǔwiwa kpó ɖěɖěe klisánwun lɛ́ nɔ nyi alɔ ná lɛ́ é.”

¹⁹ Nǔ e jí è tɛ ɖɛ̌ ɖo akpáxwé énɛ́ é ɖé lɛ́ ɖíe: “Étɛ́wú é ka nylá ɖɔ è ní ɖ’alɔ ɖo xwe ɖěɖěe cá kan xá sinsɛn nǔvú lɛ́ é mɛ? (1 Kɔ. 10:21; 2 Kɔ. 6:14-18; Efɛ́. 5:10, 11).” Énɛ́ gúdo ɔ, è ná kpɔ́ndéwú xwe mɔ̌hun ɖé lɛ́ tɔn. Ðo xótala “Xwe kpó nǔwiwa kpó e nɔ sɔ́ to mɛtɔn su lɛ́ é” glɔ́ ɔ, è slɛ́ nǔgbódodó Biblu tɔn ɖěɖěe sixú d’alɔ klisánwun e ɖo kinkanbyɔ́ éɖée wɛ ɖɔ émí ka sixú ɖ’alɔ ɖo nǔwiwa élɔ́ lɛ́ mɛ wɛ a jí é lɛ́: Nǔ e jɛ ɖo toxóɖiɖɔ linu ɖo to yětɔn mɛ lɛ́ é sín xwe ɖuɖu, ahwan e to yětɔn fun lɛ́ é flínflín sín nǔwiwa, alǒ, nǔwiwa e nɔ wlí yɛ̌yi nú mɛ nukúnɖéjí lɛ́, bɔ é nɔ cí ɖɔ è ɖo yě sɛn wɛ ɖɔhun lɛ́ é. É su nukún mǐtɔn mɛ tawun ɖɔ tutoblónúnǔ Jexóva tɔn ná mǐ azɔ̌wanú mɔ̌hun lɛ́, bɔ yě nɔ d’alɔ mǐ bɔ mǐ nɔ kplɔ́n azɔ̌ ayixa mǐtɔn!

ÐE XLƐ́ ÐƆ ÉMÍ ÐÓ AYIXA E È KPLƆ́N AZƆ̌ GANJÍ É

20. Nɛ̌ mǐ ka sixú ɖe xlɛ́ ɖɔ mǐ kplɔ́n azɔ̌ ayixa mǐtɔn ganjí gbɔn?

²⁰ Mɛɖésúsíninɔ e mǐ ɖó é nɔ su nukún mǐtɔn mɛ tawun. Amɔ̌, mǐ lɛ́ mɔ ɖɔ mǐ ɖó ná kplɔ́n azɔ̌ ayixa mǐtɔn bá dó sixú zán mɛɖésúsíninɔ énɛ́ ganjí. Ayixa e è kplɔ́n azɔ̌ ganjí é ná d’alɔ mǐ bɔ mǐ ná wá gbeta ɖěɖěe ná sɔ́ Jexóva su, bo lɛ́ xo nǔ dó akpa ɖokpó ɔ mɛ xá jlǒ tɔn lɛ́ é kɔn. Bo ná dó kpé énɛ́ wú ɔ, mǐ ɖó hudó gbigbɔ mímɛ́ Jexóva tɔn sín alɔdó. Énɛ́ wú ɔ, mǐ ɖó ná kpo ɖo gbigbɔ mímɛ́ byɔ́ wɛ, bo ná lɛ́ kpo ɖo nǔ wa sɔgbe xá ali e é nɔ xlɛ́ mǐ é wɛ. Nǔgbódodó Biblu tɔn lɛ́ ná lɛ́ d’alɔ bɔ mǐ ná xlɛ́ ali ayixa mǐtɔn. Mi nú mǐ ní zán nǔníná énɛ́ lɛ́ ganjí bá mɔ hlɔ̌nhlɔ́n Xó Mawu tɔn tɔn ɖo gbɛzán mǐtɔn mɛ.—2 Tim. 3:16, 17; Ebl. 4:12.