Blǒ hǔzúhúzú e ɖo dandan lɛ́ é bá dó bló batɛ́mu

1. (a) Le tɛ́ lɛ́ mɔ̌ batɛ́mu bíbló ka nɔ hɛn wá? (b) Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

A KA ko sɔ́ hwiɖée jó nú Jexóva bo bló batɛ́mu a? Ényí mɔ̌ wɛ ɔ, a ko byɔ́ ayixa mímɛ́ ɖé Mawu. (1 Pi. 3:21) Mɔ̌ mɛ ɔ, a sɔ́ kpɔ́ndéwú ɖagbe ɖ’ayǐ nú mɛ wínnyáwínnyá lɛ́ kpó mɛ e jɛ gbɛ̌ dó xá agun ɔ jí yɔ̌yɔ́ lɛ́ é kpó. Hǔn, gbeta ɖagbe tawun kɔn wɛ a wá! Amɔ̌, nú a ma ko bló batɛ́mu ǎ ɔ ka lo? É ɖo wɛn ɖɔ a yí wǎn nú Jexóva bo ba ná wa jlǒ tɔn. A tuun ɖɔ batɛ́mu bíbló ɖo tají nú we cóbɔ è ná sɔ́ hwɛ towe lɛ́ kɛ we, bɔ nǔ towe ná nyɔ́ Jexóva nukúnmɛ. (Mɛ. 2:38-40) Amɔ̌, a sixú kpo ɖo yonu dɔn dó gǔdo wɛ. Étɛ́ ka sixú d’alɔ we? Ðo xóta élɔ́ mɛ ɔ, mǐ ná gbéjé nǔ élɔ́ lɛ́ kpɔ́n: (1) Nǔ e wú mɛ ɖé lɛ́ nɔ dán lɛjɛlɛjɛ dó batɛ́mu bíbló wú é, (2) nǔ e wú é nyí nǔnywɛ́nú ɖɔ è ní hɛn vivɔnu ɔ dó ayi mɛ é, (3) ényí a ma dán lɛjɛlɛjɛ dó gǎndídó bá bló batɛ́mu wú ǎ ɔ, lěe a ná ɖu le tɔn gbɔn é.

NǓ E WÚ MƐ ÐÉ LƐ́ NƆ DÁN LƐJƐLƐJƐ DÓ BATƐ́MU BÍBLÓ WÚ É

2. Étɛ́wú mɛ ɖé lɛ́ ka nɔ dán lɛjɛlɛjɛ dó batɛ́mu bíbló wú?

² Mɛ ɖé lɛ́ nɔ dán lɛjɛlɛjɛ dó batɛ́mu bíbló wú ɖó xɛsi wú. Ði kpɔ́ndéwú ɔ, yě ba ná sɛn Jexóva, amɔ̌, yě nɔ ɖi xɛsi ɖɔ émí kún ná kpé wú bo nyɔ́ ɖo así tɔn gbeɖé ó. Ényí nǔ nɔ cí mɔ̌ nú we hǔn, gbějé wěmafɔ Biblu tɔn ɖěɖěe sixú ná we jiɖe ɖɔ Jexóva kún nɔ ɖó nukún ɖɔ a ní nyí mɛ maɖóblɔ̌ ó lɛ́ é kpó ɖěɖěe xlɛ́ ɖɔ a ní sɛn ɛ lěe a kpé wú gbɔn é wɛ nɔ víví n’i lɛ́ é kpó kpɔ́n. (Ðɛh. 103:13, 14; Koló. 3:23) Ényí a nɔ ɖi xɛsi nú gbeklánxámɛ hǔn, byɔ̌ Jexóva ɖɔ é ní d’alɔ we nú a ná ɖó jiɖe e ɖɛhanwlántɔ́ e wlán xó élɔ́ lɛ́ é ɖó é: “[Jexóva] ɖo jǐ ce, un ɖi xɛsi ǎ. Étɛ́ gbɛtɔ́ ka sixú wa nú mì?”—Ðɛh. 118:6.

3. Linlin tɛ́ ka sixú dɔn mɛ ɖé lɛ́ dó gǔdo bɔ yě ná gɔn batɛ́mu bló? (Kpɔ́n ɖiɖe ɔ lɔmɔ̌.)

³ Mɛ ɖé lɛ́ yí wǎn nú Jexóva, amɔ̌, yě nɔ ɖó nǎ nǎ nú batɛ́mu bíbló, ɖó yě nɔ lin ɖɔ yě kún tuun nǔ káká ɖé ó. Amɔ̌, bǎ tɛ́ mɛ a ka ɖó ná tuun nǔ yi ɖó? Ð’ayi nǔ élɔ́ e jɛ bɔ è ɖɔ xó tɔn ɖo Biblu mɛ é wú. Hwenu e ayǐkúngban dán wǔ ɖo gankpá e mɛ è wlí mɛsɛ́dó Pɔ́lu kpó Silási kpó dó é ɔ, yě ɖe kúnnu nú gantɔ́cɔ́tɔ́ ɔ kpó xwédo tɔn kpó. Nya ɔ kpó xwédo tɔn kpó ná ko mɔ ɖɔ nǔjíwǔ ɖé wɛ jɛ. Gɔ́ ná ɔ, yě lɛ́ kplɔ́n nǔ tají tají ɖé lɛ́ ɖo zǎn énɛ́ mɛ. Wǎgbɔ tɔn ɔ, yě “bló batɛ́mu . . . azɔn ɖokpó.” (Mɛ. 16:25-33) Ényí a tuun Jexóva, yí wǎn n’i kpó ayi towe bǐ kpó, kplɔ́n nǔ bǐbɛ́mɛ tɔn Biblu tɔn lɛ́, hwɛ towe lɛ́ ko vɛ́ nú we, bɔ a kú d’é jí bá kpo ɖo gbɛ zán sɔgbe xá nǔgbódodó tɔn lɛ́ wɛ hǔn, a ko ɖo gbesisɔmɛ nú batɛ́mu.—Mak. 12:30.

4. Étɛ́ lɛ́ jí mɛ ɖé lɛ́ ka nɔ sɔ́ ayi ɖó bɔ é nɔ zɔ́n bɔ yě nɔ dán lɛjɛlɛjɛ dó batɛ́mu bíbló wú? (Kpɔ́n ɖiɖe ɔ lɔmɔ̌.)

⁴ Mɛ e nɔ ba ná nyɔ́ ɖo Mawu sí é ɖé lɛ́ nɔ sɔ́ ayi ɖó nǔ e énɛ́ ná byɔ́ ɖo yě sí lɛ́ é jí. É ɖo wɛn ɖɔ nǔnywɛ́nú wɛ é nyí ɖɔ è ní gbéjé nǔ e gbeta ɖěbǔ e kɔn ná wá wɛ è ɖe é ná byɔ́ ɖo mɛ sí é kpɔ́n. (Luk. 14:27-30) Amɔ̌, ado nɔ hu mɛ ɖé lɛ́ dó vɔ̌ ɖěɖěe yě ɖó ná sá cóbá sɛn Mawu lɛ́ é wú. Lěe nǔ cí nú Candace e kplɔ́n nǔgbó ɔ ɖo vǔ, bo ma ka sɔ́ dó ɖó étɔn ǎ, bɔ è lɛ́ wá xwlé è Biblu kplɔ́nkplɔ́n hwenu e é ko nyí mɛxó é nɛ́. É ɖɔ: “Un tuun nǔ e un ɖó ná wa nú Jexóva é, amɔ̌, un nɔ dɔn yonu dó gǔdo ɖó nǔ e wa wɛ un ɖe ɖo gbɛ ɔ mɛ é nɔ dó xomɛhunhun nú mì. Un tuun ɖɔ nǔ énɛ́ lɛ́ jíjódó kún ná bɔ wǔ ó.” Ado nɔ hu mɛ ɖěvo lɛ́ dó nǔgbódodó walɔ ɖagbe tɔn e yi jǐ bɔ mɛ e bló batɛ́mu lɛ́ é ɖó ná xwedó lɛ́ é wú. Xɛsi nɔ ɖi yě ɖɔ ɖo batɛ́mu yětɔn gúdo ɔ, yě ná hu hwɛ syɛ́nsyɛ́n bɔ è ná ɖe yě sín agun mɛ. Ényí nǔ mɔ̌hun lɛ́ wɛ ɖo dindɔn we dó gǔdo wɛ ɔ, étɛ́ a ka sixú wa?

5. Ényí mǐ ɖo dida kpɔ́n wɛ ɖɔ mǐ ka ná bló batɛ́mu alǒ gbɔ a jí ɔ, étɛ́ jí mǐ ka ɖó ná sɔ́ ayi ɖó? (Matíe 13:44-46)

⁵ Ényí mǐ jló ná xɔ nǔɖé ɔ, lě do nǔ ɔ vɛ́ axi sɔ é kɛ́ɖɛ́ jí wɛ mǐ nɔ sɔ́ ayi ɖó ǎ, loɔ, mǐ nɔ lɛ́ sɔ́ ɖó lě do é xɔ akwɛ́ sɔ é jí. Ényí lěe nǔ ɔ xɔ akwɛ́ sɔ é zɛ nabí e ná dó xɔ wɛ mǐ ɖe é wú flaflá tɔn ɔ, mǐ ná xo nǔ kpɔ́n cóbó xɔ ǎ. Mɔ̌ ɖokpó ɔ, ényí mǐ ɖo dida kpɔ́n wɛ ɖɔ mǐ ná bló batɛ́mu alǒ gbɔ a jí ɔ, hǔzúhúzú e mǐ ná bló lɛ́ é kɛ́ɖɛ́ jí wɛ mǐ ná sɔ́ ayi ɖó ǎ, loɔ, mǐ ɖó ná lɛ́ sɔ́ ɖó lě do xɔ́ntɔn zunzun xá Jexóva xɔ akwɛ́ sɔ é jí. Jezu zán nǔjlɛ́dónǔwú we dó ɖe énɛ́ xlɛ́. (Xa Matíe 13:44-46.) Ðo nǔjlɛ́dónǔwú lɛ́ ɖokpó ɖokpó mɛ ɔ, nya ɖé sa nǔɖókan tɔn lɛ́ bǐ kpó xomɛhunhun kpó bá dó xɔ nǔ xɔ akwɛ́ e é mɔ é. Hwi lɔ mɔ nǔ e xɔ akwɛ́ tawun é ɖé, énɛ́ wɛ nyí nǔgbó e kunkplá Axɔ́súɖuto ɔ é. Ényí a ɖo yonu dɔn dó gǔdo wɛ dó hǔzúhúzú lɛ́ bíbló bá dó bló batɛ́mu wú hǔn, lin tamɛ dó nǔjlɛ́dónǔwú Jezu tɔn lɛ́ wú ganjí. A sixú kanbyɔ́ hwiɖée ɖɔ: ‘Un ka kú d’é jí nǔgbó nǔgbó ɖɔ nǔ e un mɔ é xɔ akwɛ́ a? Xɔ́ntɔn e un zun xá Jexóva é, nukúnɖíɖó e é ná mì é kpó kplékplé nɔví lɛ́ tɔn wǎnyíyínɔ ɔ kpó ka xɔ akwɛ́ nú mì a?’ Xósin e a ná ná nú nǔkanbyɔ́ énɛ́ lɛ́ é ná d’alɔ we bɔ a ná tuun nǔ e a ɖó ná wa bá dó bló batɛ́mu é.

6. Nɛ̌ mǐ ka sixú tɛ́n kpɔ́n bo ɖó ninɔmɛ ayi mɛ tɔn ɖagbe gbɔn?

⁶ Ðo nǔjlɛ́dónǔwú nǔdótɔ́ ɔ tɔn mɛ ɔ, Jezu ɖɔ xó dó ninɔmɛ ayi mɛ tɔn e sixú sú ali dó mɛɖé, bɔ é ma ná yi nukɔn ɖo gbigbɔ lixo ǎ lɛ́ é wú. É ɖo mɔ̌ có, Jezu lɛ́ xlɛ́ ɖɔ mɛ ɖé lɛ́ ná se wɛn Axɔ́súɖuto ɔ tɔn “kpó ayi ɖagbe kpó” bo lɛ́ wa nǔ sɔgbe xá. (Luk. 8:5-15) Ényí ado nɔ hu we ɖó ayi towe ko má wútu hǔn, ma jó gbe ó. Kpó alɔdó Mawu tɔn kpó ɔ, a hɛn ɔ “a ná ɖó ayi yɔ̌yɔ́” e ná xwedó wěɖexámɛ tɔn lɛ́ é. Byɔ̌ Jexóva ɖɔ é ní bló bónú ayi towe ní bɔ bónú nǔgbó Axɔ́súɖuto ɔ tɔn ní su ɖ’é mɛ.—Ezek. 18:31; 36:26.

7-8. Étɛ́wú mɛ wínnyáwínnyá ɖé lɛ́ ma ka nɔ yi nukɔn bo bló batɛ́mu ǎ? (Kpɔ́n ɖiɖe ɔ lɔmɔ̌.)

⁷ Mɛ wínnyáwínnyá e yí wǎn nú Jexóva é ɖé lɛ́ nɔ kpé wú bo nɔ bló batɛ́mu ǎ ɖó mɛ ɖěvo lɛ́ wú. Ði kpɔ́ndéwú ɔ, mɛ̌si ɖé lɛ́ sixú tɛ́n kpɔ́n bá bló bɔ wěmaxɔmɛví lɛ́ ná mɔ ɖɔ walɔ ɖé lɛ́ kún nylá ó, ényí yě ná bo ma tlɛ nyɔ́ Jexóva nukúnmɛ ǎ ɔ nɛ́. Amɔ̌, wěɖexámɛ mɔ̌hun lɛ́ sixú dɔn mɛ dó hɔzɔ mɛ. (Ðɛh. 1:1, 2; Nǔx. 7:1-5) A sixú nyi alɔ nú awǒvinú énɛ́ gbɔn ɖɛhanwlántɔ́ e ɖɔ xó élɔ́ nú Jexóva é sín kpɔ́ndéwú xwixwedó gblamɛ: “Un tuun nǔ hú mɛ̌si ce lɛ́ bǐ, ɖó sɛ́n towe lɛ́ wú wɛ un nɔ lin tamɛ dó.”—Ðɛh. 119:99.

⁸ Gbeɖíɖó ɖé lɛ́ xlɛ́ ɖɔ mɛjitɔ́ Kúnnuɖetɔ́ ɖé lɛ́ zɔ́n bɔ vǐ yětɔn lɛ́ dán lɛjɛlɛjɛ dó batɛ́mu bíbló wú. Mɛjitɔ́ lɛ́ sɔ́ ayi ɖó wěma kplɔ́nkplɔ́n vǐ yětɔn lɛ́ tɔn kpó azɔ̌ e yě ná wá wa lɛ́ é kpó jí zɛ xwé wú, alǒ yě kpé wú bo d’alɔ vǐ yětɔn lɛ́ nú yě nya nǔ gbigbɔ tɔn lɛ́ gbé ǎ wútu. Ényí a mɔ ɖɔ mɛjitɔ́ émítɔn lɛ́ sixú nɔ gǔdo nú émí hú gǎn bónú émí ná yi nukɔn ɖo gbigbɔ lixo hǔn, ɖɔ xó d’é wú xá yě. Kú d’é jí ɖɔ xwe towe kún ná gbo kpo nyi ali jí nú we bɔ a ná gɔn xɔ́ntɔn zun xá Jexóva ó.—Nǔx. 20:11.

9. Étɛ́wú mɛ ɖé lɛ́ ka sixú dán lɛjɛlɛjɛ dó batɛ́mu bíbló wú?

⁹ Mɛ ɖěɖěe jɛxá bá bló batɛ́mu é ɖé lɛ́ sixú dán lɛjɛlɛjɛ dó mɔ̌ wiwa wú ɖó kɔgbídínúmɛ hǎgbɛ́ lɛ́ tɔn, alǒ vlafo yě ɖo te kpɔ́n mɛɖé bónú é ná wa mɔ̌ hwɛ̌ wútu. Ði kpɔ́ndéwú ɔ, yě sixú ɖo nukún ɖó wɛ ɖɔ émí kpó xɔ́ntɔn émítɔn alǒ mɛ e émí yí wǎn ná é ɖé kpó wɛ ná bló batɛ́mu gbe ɖokpó ɔ. É nylá ɖɔ hwi kpó mɛ e a yí wán ná lɛ́ é kpó ní bló batɛ́mu gbe ɖokpó ɔ ǎ, amɔ̌, nǔ mɔ̌hun lɛ́ ka ná zɔ́n bɔ a ná gɔn batɛ́mu bló din dóó a? Flín ɖɔ mɛɖée sísɔ́ jó nú Mawu ɔ, akpá mɛɖésúnɔ tɔn wɛ. A ɖó ná kpɔ́n dó mɛɖé wú bo bló batɛ́mu ǎ.—Hlɔ̌. 14:12.

NǓ E WÚ È ÐÓ NÁ HƐN VIVƆNU Ɔ AYI MƐ É

10. Étɛ́wú mɛ ɖé lɛ́ ka sixú dán lɛjɛlɛjɛ dó nukɔnyiyi ɖo gbigbɔ lixo wú?

¹⁰ Gbɔn vo nú nǔ ɖěɖěe xó mǐ ɖɔ wá yi lɛ́ é ɔ, mɛ ɖé lɛ́ sixú dán lɛjɛlɛjɛ dó nukɔnyiyi ɖo gbigbɔ lixo wú, ɖó yě nɔ lin ɖɔ vivɔnu ɔ kún ko ɖo tófí ó. Linlin mɔ̌hun ka sɔgbe a? Jezu gb’akpá nú ahwanvú tɔn lɛ́ ɖɔ: “Mi ɖo gbesisɔmɛ, ɖó gan e mɛ mi ma lin dó ɖěbǔ ǎ é wɛ Gbɛtɔ́ví ɔ ná wá.”—Luk. 12:40.

11. Sɔgbe xá Ðɛhan 119:60 ɔ, ényí mǐ kplɔ́n bo tuun Jexóva ɔ, nɛ̌ nǔ ka nɔ cí nú mǐ dó sɛ́n tɔn lɛ́ wú?

¹¹ Wǎnyíyí wɛ ɖó ná sísɛ́ mǐ bɔ mǐ ná sɔ́ mǐɖée jó nú Jexóva. Lě do mǐ kplɔ́n bo tuun Jexóva sɔ é ɔ, mɔ̌ do wɛ mǐ nɔ mɔ ɖɔ é yí wǎn nú mǐ bɔ sɛ́n tɔn lɛ́ nɔ lɛ́ wa ɖagbe nú mǐ sɔ. (Xa Ðɛhan 119:60.) Ahwanvú Jaki tɛ ɖɛ̌ hwɛjijɔ tají ɖěvo e wú mǐ ɖó ná nɔ yá wǔ se tónú nú sɛ́n Jexóva tɔn lɛ́ é jí: Mǐ ɖě tuun sɔ e ja é ǎ. Bóyá kéze ɖokpó jɛ́n kpo nú mǐ bɔ mǐ ná wa “nǔ e sɔgbe é,” énɛ́ wú ɔ, mǐ ɖó ná wa nǔ e mǐ tuun ɖɔ Jexóva ba ɖɔ mǐ ní wa é.—Ja. 4:13-17.

12. Étɛ́ kpɔ́ndéwú e Jezu ná dó vǐwungle wú é ka sixú kplɔ́n mǐ?

¹² Lin tamɛ dó nǔjlɛ́dónǔwú e Jezu ná dó vǐwungle wú é wú? Jezu ma ko kplɔ́n mɛ ɖɔ mɛ e wa azɔ̌ nú ganxixo ɖokpó lɛ́ é kpó mɛ e wa azɔ̌ nú kéze ɔ bǐ lɛ́ é kpó ná ɖu azɔ̌kwɛ́ ɖokpó ɔ ǎ cé? Nǔgbó wɛ. Amɔ̌, ɖ’ayi hwɛjijɔ e wú mɛ e w’azɔ̌ nú ganxixo ɖokpó lɛ́ é ma yá wǔ bɛ́ azɔ̌ ǎ é wú. Yě ɖɔ: “Ðó mɛ ɖěbǔ yí mǐ dó azɔ̌mɛ ǎ.” É nyí nǔwa wɛ azɔ̌watɔ́ énɛ́ lɛ́ gbɛ́ ǎ, loɔ, è yí yě d’azɔ̌ mɛ ǎ kpowun wɛ. Azɔ̌ sín ali hun nú yě tlóló é jɛ́n yě yí gbe nú azɔ̌. (Mat. 20:1-16) Égbé ɔ, Jezu ylɔ́ mǐ ɖɔ mǐ ní wá nyí ahwanvú émítɔn lɛ́ bo xo kpóɖó nú émí ɖo Axɔ́súɖuto ɔ sín azɔ̌ kɔn. Mǐ se tlóló ɔ, mǐ ɖó ná sɔ ylɔ̌ tɔn.

13. Étɛ́ kpɔ́ndéwú Lɔti sín asi tɔn ka sixú kplɔ́n mǐ?

¹³ Mɛ ɖěbǔ e ɖo afɔ dɔn dó gǔdo wɛ dó nukɔnyiyi ɖo gbigbɔ lixo wú é sixú wá mɔ ɖɔ hǔzúhúzú lɛ́ bíbló táan kpɛɖé jɛ nukɔn nú vivɔnu gbɛ ɔ tɔn vɛ́ wǔ tawun. Jezu tuun énɛ́, énɛ́ wú wɛ é gb’akpá élɔ́ nú ahwanvú tɔn lɛ́: “Mi flín asi Lɔti tɔn.” (Luk. 17:31-35) Lɔti sín asi tuun ganjí ɖɔ hwɛ e ná ɖó nú Sodɔ́mu kpó Gomɔ́ɔ kpó wɛ Mawu ɖe é ko ɖo kɛ́nnɛ́kɛ́nnɛ́, amɔ̌, é cí ɖɔ é kún ko ɖo gbesisɔmɛ bá jó nǔ e é dó gǔdo lɛ́ é dó ó. (Bǐb. 19:23-26) Nǔ e jɛ dó jǐ tɔn é lɛ́ flín mǐ ɖɔ hwlɛngán sín hɔn ɔ kún ná nɔ hunhun káká sɔ́yi ó. Ényí gan e Mawu ɖó é xo ɔ, hɔn énɛ́ ná sú bǐ gbídígbídí.—Luk. 13:24, 25.

14. Étɛ́wú a ka ɖó ná nɔ ɖ’ayi jijɛnu nǔɖɔɖayǐ Biblu tɔn lɛ́ tɔn wú?

¹⁴ Nǔ ɖěɖěe ɖo jijɛ wɛ ɖo gbɛ ɔ mɛ lɛ́ é nɔ xlɛ́ ɖɔ nǔɖɔɖayǐ Biblu tɔn e kunkplá vivɔnu gbɛ élɔ́ tɔn lɛ́ é ɖo jijɛnu wɛ. Ényí nǔ énɛ́ lɛ́ ɖě ma tlɛ ko wa nǔ dó wǔ we tlɔlɔ ǎ ɔ, mɔ e mɔ wɛ a ɖe bɔ yě ɖo jijɛ wɛ ɖo xá ɖé mɛ alǒ ɖěvo mɛ é ɖó ná zɔ́n bɔ a ná yá wǔ ɖe afɔ e jɛxá é bo bló batɛ́mu. Lin tamɛ dó kpɔ́ndéwú klisánwun xwe kanweko nukɔntɔn ɔ tɔn lɛ́ tɔn jí. Mɛsɛ́dó Piyɛ́ɛ dó wǔsyɛ́n lanmɛ nú klisánwun lɛ́ ɖɔ yě ní “nɔ acéjí,” alǒ “nɔ wunzɛn,” ɖó “vivɔnu nǔ lɛ́ bǐ tɔn ko sɛkpɔ́.” (1 Pi. 4:7; tínmɛ e ɖo do é.) Ðo wěmafɔ élɔ́ mɛ ɔ, é cí ɖɔ kún e è ná sú dó nú Jeluzalɛ́mu kpó sinsɛnxɔ tɔn kpó é dó gesí wɛ “vivɔnu” ɔ ɖe. Fí e lín dó Jeluzalɛ́mu tawun lɛ́ é wɛ mɛ e Piyɛ́ɛ wlán nǔ sɛ́ dó lɛ́ é ɖe, énɛ́ wú ɔ, kún e è ná sú dó nú toxo énɛ́ é sixú nɔ ma wa nǔ dó yě wú tlɔlɔ. (1 Pi. 1:1) Amɔ̌, mɔ e yě mɔ bɔ nǔɖɔɖayǐ énɛ́ jɛnu é ná ko ná hlɔ̌nhlɔ́n kán e yě kán ɖ’é jí ɖɔ akpá Jexóva tɔn e kpo lɛ́ é bǐ ná jɛnu é. Mɔ̌ ɖokpó ɔ, ée a ná mɔ bɔ nǔɖɔɖayǐ e kunkplá vivɔnu ɔ lɛ́ é ná ɖo jijɛnu wɛ é ɔ, é ná sísɛ́ we bɔ a ná nɔ acéjí bo dó gǎn bo bló batɛ́mu.

15. Linlin tɛ́ mǐ ka ɖó ná nɔ ɖó dó azǎn Jexóva tɔn wú? (2 Piyɛ́ɛ 3:10-13)

¹⁵ Ðo wěma wegɔ́ e Mawu sɔ́ d’ayi mɛ nú Piyɛ́ɛ bɔ é wlán é mɛ ɔ, é tínmɛ linlin e mǐ ɖó ná nɔ ɖó dó hwɛɖɔzán Jexóva tɔn wú é. Ðo klisánwun xwe kanweko nukɔntɔn ɔ tɔn lɛ́ hwenu ɔ, azǎn énɛ́ kpo ɖo nukɔn tawun, amɔ̌, Piyɛ́ɛ ɖɔ nú yě ɖɔ yě ní “hɛn azǎn énɛ́ ayi mɛ ganjí,” alǒ “jló vɛ́návɛ́ná ɖɔ azǎn énɛ́ ní wá.” (Xa 2 Piyɛ́ɛ 3:10-13; tínmɛ e ɖo do é.) Bo ná dó xlɛ́ ɖɔ mǐ hɛn azǎn énɛ́ ayi mɛ ɔ, mǐ lɔ ɖó ná ɖo gbesisɔmɛ bo ba vɛ́návɛ́ná ɖɔ é ní wá. Mǐ “ɖó ná ɖó walɔ mímɛ́, bo ná nɔ wa gbejí nɔ nú Mawu sín nǔ lɛ́” dó xlɛ́ ɖɔ mǐ ɖo gbesisɔmɛ. Kpɔ́n lě do énɛ́ wiwa ná víví nú Jexóva sɔ hwenu e é ná mɔ we bɔ a ná ɖo “gbejí nɔ nú Mawu sín nǔ lɛ́” wa wɛ é! Ényí é mɔ we bɔ a sɔ́ hwiɖée jó n’i bo bló batɛ́mu ɔ, é ɖo wɛn ɖɔ é ná víví n’i tawun.

LE ÐĚÐĚE ÐO BATƐ́MU BÍBLÓ DIN MƐ LƐ́ É

16. Hwetɛ́nu ka nyí hwenu ɖagbe hú gǎn e è ná dó gǎn bo bló batɛ́mu é? (2 Kɔlɛ́ntinu lɛ́ 6:1, 2) (Kpɔ́n ɖiɖe lɛ́ lɔmɔ̌.)

¹⁶ Din wɛ nyí hwenu ɖagbe hú gǎn e è ɖó ná dó gǎn bá jɛxá bo bló batɛ́mu é. (Xa 2 Kɔlɛ́ntinu lɛ́ 6:1, 2.) Agooɖojǐe Etiopíinu e Filípu xo go é mɔ ɖɔ émí ɖó ná yá wǔ wa nǔ. Ée é mɔ nukúnnú jɛ wɛn ɖagbe ɔ wú bɔ ali hun n’i bɔ é ná bló batɛ́mu é ɔ, é lin nǔ gbɔn lě ǎ: ‘Un ba ná kplɔ́n nǔ dó wɛn ɖagbe ɔ wú d’é jí hwɛ̌. Sindo ɖěvo ná kpo ɖo nukɔn.’ É nyɔ́ wa ɔ, é kanbyɔ́ Filípu ɖɔ: “Étɛ́ ka gbɛ́ ɖɔ nyi ní ma bló batɛ́mu ó?” (Mɛ. 8:26, 27, 35-39) Kpɔ́ndéwú ɖagbe ɖé nɛ́! Ée agooɖojǐe ɔ bló batɛ́mu gúdo é ɔ, é “ɖidó kpó xomɛhunhun kpó.”

17. Jiɖe tɛ́ mǐ ka sixú ɖó?

¹⁷ Ényí a ɖo lɛjɛlɛjɛ dán dó batɛ́mu bíbló wú wɛ hǔn, ɖeji ɖɔ Jexóva ɖo gbesisɔmɛ bá d’alɔ we bɔ a ná zun xɔ́ntɔn vívɛ́ xá ɛ. (Hlɔ̌. 2:4) É hɛn ɔ, é ná d’alɔ we bɔ a ná ɖu ɖo xɛsi ɖěbǔ, adohu adohu ɖěbǔ, alǒ nǔ ɖěvo ɖěbǔ e sixú gbo kpo nyi ali jí nú nukɔnyiyi towe é jí. Ényí a ɖó ayi mímɛ́ gbɔn batɛ́mu towe gblamɛ ɔ, a ná ɖibla mɔ ɖɔ “nǔ e ɖo gǔdo lɛ́ é” kún sɔ́ ɖo tají nú émí ó. (Filí. 3:8, 13) Énɛ́ gúdo ɔ, a hɛn ɔ, a ná ɖó nukún “nǔ e ɖo nukɔn lɛ́ é,” yě wɛ nyí: Akpá ɖěɖěe Jexóva dó nú mɛ ɖěɖěe sɔ́ yěɖée jó n’i bo bló batɛ́mu lɛ́ é sín jijɛnu.—Mɛ. 3:19.