Tínmɛ batɛ́mu tɔn kpó nǔ e wú é ɖo tají é kpó

1. Étɛ́ ka xlɛ́ ɖɔ batɛ́mu nyí ɖokpó ɖo nǔkplɔ́nmɛ tají Biblu tɔn lɛ́ mɛ?

ÉNYÍ mɛ lɛ́ bló batɛ́mu ɔ, é nɔ víví nú mǐ kpɔ́n! A ka tuun ɖɔ è hɛn ɔ, è ná sɔ́ awǎjijɛ énɛ́ jlɛ́ dó ée mɛ lɛ́ ɖó ɖo kplé nukɔn nukɔntɔn e klisánwun lɛ́ bló é domɛ é wú a? Ðo kplé énɛ́ jí ɔ, mɛsɛ́dó Piyɛ́ɛ xwlé xóɖiɖɔ ɖé mɛ bo tínmɛ nǔ e wú batɛ́mu bíbló ɖo tají tawun é. (Mɛ. 2:38, 40, 41) Mɛsɛ́dó Pɔ́lu wlán ɖɔ “nǔkplɔ́nmɛ e kunkplá batɛ́mu vovo lɛ́ . . . é” ɖo “nǔkplɔ́nmɛ nukɔntɔn ɖěɖěe kunkplá Klísu” lɛ́ é mɛ. (Ebl. 6:1, 2) Nǔkplɔ́nmɛ nukɔntɔn lɛ́ mɛ wɛ nǔkplɔ́nmɛ e kunkplá batɛ́mu é ɖe có, é ka ɖo tají ɖɔ mǐ ní mɔ nukúnnú jɛ mɛ ganjí. Aniwú?

2. Étɛ́wú mǐ ka ɖó ná ɖó nukúnnúmɔjɛnǔmɛ e gɔ́ngɔ́n é dó batɛ́mu wú?

² Ényí dodónu xɔ ɖé tɔn syɛ́n ganjí ɔ, xɔ ɔ lɔ nɔ syɛ́n ganjí, mɔ̌ ɖokpó ɔ, ényí mǐ mɔ nukúnnú jɛ nǔ e batɛ́mu nyí é mɛ ganjí ɔ, nǔɖiɖi mǐtɔn ná syɛ́n. Ényí gǎn dó wɛ mǐ ɖe bá bló batɛ́mu, alǒ mǐ bló din é ɔ, xwe ko jɛ wɛ ɔ, mǐ ɖó hudó nukúnnúmɔjɛnǔmɛ énɛ́ tɔn. Énɛ́ wú ɔ, ɖo xóta élɔ́ mɛ ɔ, mǐ ná ba xósin nǔkanbyɔ́ élɔ́ lɛ́ tɔn: Étɛ́ ka nyí tínmɛ batɛ́mu tɔn? Étɛ́ batɛ́mu klisánwun tɔn ka nɔ byɔ́? Étɛ́wú mǐ ka ɖó ná bló batɛ́mu ɖo nyǐkɔ Tɔ́ ɔ, Vǐ ɔ kpó gbigbɔ mímɛ́ ɔ kpó tɔn mɛ?

TÍNMƐ BATƐ́MU TOWE TƆN

3. Étɛ́ batɛ́mu ka nɔ te ná?

³ Batɛ́mu blóbló nɔ xlɛ́ mɛ lɛ́ bǐ ɖɔ è yí gbe nú nǔgbó e kunkplá Jexóva Mawu kpó Klísu kpó é, bɔ hwɛ mɛtɔn lɛ́ vɛ́ nú mɛ lobɔ è húzú gbɛzán mɛtɔn bá dó sɛn Jexóva. É nɔ lɛ́ xlɛ́ ɖɔ è yí gbe ɖɔ Jezu gblamɛ wɛ Mawu gbɔn bo hwlɛ́n mǐ, bɔ è ko xo ɖɛ sɛ́ dó Mawu bo ɖɔ ba e ba wɛ è ɖe vɛ́návɛ́ná bo ná wa jlǒ tɔn alɔ ɖo alɔ mɛ xá tutoblónúnǔ tɔn é n’i. Ée è dó akpá énɛ́ n’i, alǒ sɔ́ mɛɖée jó n’i bo bló batɛ́mu gúdo é ɔ, è nɔ wlí ali e nɔ kplá mɛ yi gbɛ mavɔmavɔ mɛ é.

4. Étɛ́ nylɔ̌ e è nɔ nylɔ́ mɛɖé dó sin mɛ bǐ mlɛ́mlɛ́ é ka nɔ te ná? (Kpɔ́n ɖiɖe ɔ lɔmɔ̌.)

⁴ Hwenu e a ɖo batɛ́mu bló wɛ é ɔ, è nylɔ́ we dó sin mɛ bǐ mlɛ́mlɛ́ bo lɛ́ ɖe we sín mɛ,a cí nǔ ɖɔ a kú bɔ è ɖi we bo lɛ́ fɔ́n we sín kú wɛ ɖɔhun. (Sɔ́ jlɛ́ dó Kolósinu lɛ́ 2:12 wú.) Batɛ́mu nɔ xlɛ́ ɖɔ a bló hǔzúhúzú tají tají lɛ́ ɖo gbɛzán towe mɛ. Gbɔn nɛ̌ é? Hwenu e a yi sin ɔ glɔ́ é ɔ, a xlɛ́ ɖɔ émí ko ɖó nǔ gbɛ alɔkpa e émí nɔ zán ɖ’ayǐ é nu. Bɔ ée a tɔ́n sín glɔ́ é ɔ, a xlɛ́ ɖɔ bɛ́ sín din ɔ, jlǒ Mawu tɔn wiwa wɛ ná ɖo tají ɖo gbɛzán émítɔn mɛ.

5. Étɛ́ wú è ka sixú sɔ́ gǎn e dó wɛ a ɖe bá dó ɖo gbesisɔmɛ nú batɛ́mu é jlɛ́ dó? Aniwú? (1 Piyɛ́ɛ 3:18-21)

⁵ Xa 1 Piyɛ́ɛ 3:18-21. Ðo ali ɖé nu ɔ, mǐ hɛn ɔ, mǐ ná sɔ́ gǎn ɖěɖěe dó wɛ a ɖe cóbá ɖo gbesisɔmɛ nú batɛ́mu lɛ́ é jlɛ́ dó gǎn ɖěɖěe Nɔwée dó cóbó gbá tɔjíhún ɔ é wú. Ényí din wɛ a jɛ nǔ kplɔ́n dó Jexóva wú jí ɔ, azɔ̌ e ɖo nukɔn nú we é sixú hu ado nú we, bo tlɛ sixú cí tɔjíhún e Nɔwée gbá é ɖɔhun nú we. É ka byɔ́ ɖɔ a ní dó gǎn énɛ́ lɛ́ bǐ dóó a? Ganjí. Étɛ́wú mǐ ka ɖɔ mɔ̌? Lin tamɛ dó Nɔwée jí. Mawu ɖésú wɛ ɖó jlɛ̌ tɔjíhún ɔ tɔn nú Nɔwée, bɔ Nɔwée ɖó ná xwedó tlélé bá dó gán ɖo Sinvɔgbɛ ɔ sí. Nǔɖiɖi e Nɔwée ɖó nú Mawu é kpó alɔ e Mawu dó è é kpó zɔ́n bɔ é se tónú bo gbá tɔjíhún ɔ. Nɔwée ɖɔhun ɔ, a hɛn ɔ, a ná kpé wú bo ná bló nǔ e ‘Mawu ɖɔ lɛ́ é bǐ pɛ́pɛ́pɛ́.’—Bǐb. 6:22.

6. Ali tɛ́ nu batɛ́mu ka sixú hwlɛ́n we ɖe?

⁶ Ðo wěmafɔ 21​gɔ́ ɔ mɛ ɔ, mɛsɛ́dó Piyɛ́ɛ wlán ɖɔ batɛ́mu ɖo “mi hwlɛ́n wɛ.” É ɖo wɛn ɖɔ, é kún nyí nylɔ̌ e è nylɔ́ mɛɖé dó sin mɛ kpowun é wú wɛ mɛ ɔ ná gán ó, mɔ̌ jɛ́n é ma ka nɔ lɛ́ klɔ́ hwɛ lɛ́ ǎ é nɛ́. Hun Jezu tɔn kɛ́ɖɛ́ jɛ́n sixú súnsún hwɛ mǐtɔn lɛ́. (1 Jaan 1:7) É ɖo mɔ̌ có, batɛ́mu blóbló ɖo tají tawun ɖó Jexóva wɛ byɔ́ mǐ ɖɔ mǐ ní wa mɔ̌, bɔ mɔ̌ wiwa nɔ xlɛ́ ɖɔ mǐ ɖo “ayixa mímɛ́ ɖé” byɔ́ ɛ wɛ. Jexóva ka ná ná nǔ e mǐ byɔ́ ɛ é mǐ kpó xomɛhunhun kpó. Lěe batɛ́mu nɔ “hwlɛ́n” mǐ gbɔn é nɛ́.

NǓ E BATƐ́MU KLISÁNWUN TƆN NƆ BYƆ́ É

7. Nɛ̌ nǔ lɛ́ ka ɖó ná yi gbɔn ɖo batɛ́mu blóbló hwenu?

⁷ Gbɔn vo nú mɛ nylɔ́nylɔ́ dó sin mɛ bǐ mlɛ́mlɛ́ ɔ, Biblu sɔ́ ɖɔ nǔ káká ɖé dó batɛ́mu wú ǎ. Nǔ ɖo mɔ̌ có, Mawuxówéma ɔ d’alɔ mǐ bɔ mǐ tuun lěe mǐ ɖó ná wa nǔ gbɔn ɖo batɛ́mu domɛ é. Ði kpɔ́ndéwú ɔ, nǔgbódodó Biblu tɔn lɛ́ nɔ d’alɔ batɛ́mublótɔ́ lɛ́ bɔ yě nɔ tuun lěe yě ná sɔ́ nǔ gbɔn é, bo nɔ lɛ́ d’alɔ nǔkpɔ́ntɔ́ lɛ́ bɔ yě nɔ tuun walɔ e yě ná zán é. (1 Kɔ. 14:40; 1 Tim. 2:9) Hwɛhwɛ ɔ, mɛxó agun tɔn ɖé wɛ nɔ bló batɛ́mu nú mɛ. Mǐ nɔ lɔn bo nɔ mɔ mɛ ɖěɖěe ɖó wǔjɔmɛ énɛ́ lɛ́ é dó mɔ mɛ nukúnɖéjí ǎ. (1 Kɔ. 1:14, 15) Ényí mɛ e wá do tɔn mɛ lɛ́ é sukpɔ́ kpó é gbɔ kpó ɔ, énɛ́ nɔ ɖe nǔɖé kpo ɖo batɛ́mu ɔ wú ǎ.—Mɛ. 8:36.

8. Étɛ́ lɛ́ è ka nɔ kanbyɔ́ mɛ ɖěɖěe jló ná bló batɛ́mu lɛ́ é? Aniwú? (Mɛsɛ́dó 2:38-42) (Kpɔ́n ɖiɖe ɔ lɔmɔ̌.)

⁸ Biblu xlɛ́ ɖɔ mǐ ɖó ná ɖɔ nǔɖiɖi mǐtɔn “sín xó ɖo agbawungba, bo ná mɔ tɛn dó gán.” (Hlɔ̌. 10:9, 10) É nyí hwenu e mǐ ɖo wɛn ɔ jlá mɛ ɖěvo lɛ́ wɛ é kɛ́ɖɛ́ wɛ mǐ nɔ wa mɔ̌ ǎ, mǐ nɔ lɛ́ wa mɔ̌, ɖo tají ɔ, hwenu e mǐ bló batɛ́mu é! Hwɛjijɔ énɛ́ wú wɛ è nɔ kan nǔ we byɔ́ mɛ e jló ná bló batɛ́mu lɛ́ é. Nukɔntɔn ɔ: “A ka ko lɛ́ kɔ sín hwɛ towe lɛ́ gúdo, bo zé hwiɖée jó nú Jexóva, lobo yí gbe nú hwlɛngán sín ali e é hun gbɔn Jezu Klísu jí é a?” Nǔkanbyɔ́ énɛ́ nɔ dɔn ayi mɛ e jló ná bló batɛ́mu é tɔn yi nǔ e é ko wa, bo ɖo gbesisɔmɛ bá bló batɛ́mu é jí. Nǔ ɖokpó ɔ wɛ Piyɛ́ɛ ɖɔ nú ahwan ɔ ɖo Pantekótu hwenu. Nǔkanbyɔ́ wegɔ́ ɔ wɛ nyí: “A ka mɔ nukúnnú jɛ wú ɖɔ batɛ́mu towe ná xlɛ́ ɖɔ a nyí ɖokpó ɖo Kúnnuɖetɔ́ Jexóva tɔn lɛ́ mɛ ɖo kɔnɖókpɔ́ mɛ kpó tutoblónúnǔ Jexóva tɔn kpó a?” Nǔkanbyɔ́ énɛ́ nɔ flín mɛ ɔ ɖɔ é d’akpá bo ná xwedó ali e Jexóva nɔ xlɛ́ mɛ gbɔn tutoblónúnǔ tɔn jí é, bo ná sɛn Jexóva ɖo kpɔ́ xá nɔví súnnu kpó nɔví nyɔ̌nu kpó tɔn lɛ́. Nǔ ɖokpó ɔ wɛ mɛ e bló batɛ́mu ɖo Pantekótu hwenu lɛ́ é lɔ wa ɖo batɛ́mu yětɔn gúdo. (Xa Mɛsɛ́dó 2:38-42.) Mɛ ɖěɖěe ɖɔ ɛɛn sín ayi mɛ nú nǔkanbyɔ́ we énɛ́ lɛ́ é jɛxá bá bló batɛ́mu.

9. Afɔ tɛ́ lɛ́ mǐ mɛ ɖokpó ɖokpó ka ɖó ná ɖe cóbɔ nǔ mǐtɔn ná nyɔ́ Mawu nukúnmɛ?

⁹ A sixú ko nɔ zán gbɛ ɖagbe ɖó bǎ ɖé mɛ, bo tlɛ sixú nɔ ma hu hwɛ syɛ́nsyɛ́n ɖě kpɔ́n cóbó wá kplɔ́n nǔgbó ɔ. Alǒ bóyá xwédo klisánwun tɔn ɖé mɛ wɛ a su ɖe, bɔ mɛjitɔ́ towe lɛ́ wɛ d’alɔ we bɔ a yí wǎn nú Jexóva. Ðěbǔ wɛ é ná bo nyí ɔ, é ka lɛ́ byɔ́ ɖɔ hwɛ towe lɛ́ ní vɛ́ nú we, nú a ní bló batɛ́mu cóbɔ nǔ towe ná nyɔ́ Mawu nukúnmɛ wɛ a? Ganjí. Ðó mǐ bǐ wɛ ɖu hwɛhuhugú bo jɛ zɔ nú Mawu. (Ðɛh. 51:7) Amɔ̌, ényí mǐ wá kplɔ́n bo tuun Jexóva ganjí ɔ, mǐ nɔ sɔ́ jlǒ tɔn wiwa ɖó tɛn nukɔntɔn ɔ mɛ ɖo gbɛzán mǐtɔn mɛ. Ényí mǐ wa mɔ̌ ɔ, mǐ nɔ kpé wú bo nɔ dó gǔdo gbɛ alɔkpa e mǐ nɔ zán ɖ’ayǐ é, bo nɔ jɛ gbɛ e nyɔ́ Tɔ́ mǐtɔn jǐxwé tɔn ɔ nukúnmɛ é zán jí. Mǐ wa mɔ̌ gúdo ɔ, mǐ hɛn ɔ, mǐ ná bló batɛ́mu.—Mɛ. 3:19.

10. Ényí a ko bló batɛ́mu ɖo sinsɛn ɖé mɛ kpɔ́n ɔ, étɛ́ a ka ɖó ná lɛ́ wa?

¹⁰ Ényí a tlɛ ko bló batɛ́mu ɖo sinsɛn ɖěvo mɛ ɔ, a ɖó ná lɛ́ bló batɛ́mu hwɛ̌ cóbó ná húzú Kúnnuɖetɔ́ Jexóva tɔn. Aniwú? Ðó a ko mɔ nukúnnú jɛ nǔgbó e kunkplá Jexóva Mawu kpó Jezu kpó é mɛ ganjí ǎ. Gɔ́ ná ɔ, ényí a tlɛ ko xo ɖɛ bo sɔ́ hwiɖée jó nú Mawu ɔ, a ko ɖó nukúnnúmɔjɛnǔmɛ e sɔgbe é dó nǔ e jlǒ Mawu tɔn wiwa nyí é wú ǎ. Hwenu e mɛsɛ́dó Pɔ́lu xo go mɛ ɖé lɛ́ ɖo Efɛ́zi bɔ yě ko bló batɛ́mu ɖ’ayǐ, bo ma ka ɖó nukúnnúmɔjɛnǔmɛ e yě ɖó ná ɖó dó nǔkplɔ́nmɛ klisánwun tɔn lɛ́ wú é ǎ é ɔ, é d’alɔ yě bɔ yě lɛ́vɔ́ bló batɛ́mu.b (Mɛ. 19:1-5) Égbé ɖésú ɔ, cóbónú Jexóva ná yí gbe nú batɛ́mu mɛɖé tɔn ɔ, mɛ ɔ ɖó ná ɖó nukúnnúmɔjɛnǔmɛ e sɔgbe é dó jlǒ Mawu tɔn wiwa wú.

“ÐO NYǏKƆ TƆ́ Ɔ, VǏ Ɔ KPÓ GBIGBƆ MÍMƐ́ Ɔ KPÓ TƆN MƐ”

11. Étɛ́ ka nyí tínmɛ è ní bló batɛ́mu “ɖo nyǐkɔ Tɔ́ ɔ, Vǐ ɔ kpó gbigbɔ mímɛ́ ɔ kpó tɔn mɛ” tɔn? (Matíe 28:18-20)

¹¹ Jezu ɖe gbe ɖɔ è ní bló batɛ́mu nú mɛ “ɖo nyǐkɔ Tɔ́ ɔ, Vǐ ɔ kpó gbigbɔ mímɛ́ ɔ kpó tɔn mɛ.” (Xa Matíe 28:18-20.) Étɛ́ ka nyí tínmɛ tɔn? Ðo Biblu mɛ ɔ, xókwín “nyǐkɔ” ɔ nɔ dó gesí mɛ alɔkpa e mɛɖé nyí é hwɛhwɛ. É sixú lɛ́ dó gesí tɛn e mɛ mɛ e ɖó nyǐkɔ ɔ é ɖe é alǒ acɛ e é ɖó é. Hǔn, ényí mǐ wa nǔɖé “ɖo nyǐkɔ” mɛɖé alǒ nǔɖé tɔn mɛ hǔn, gbe yí nú acɛ e mɛ ɔ alǒ nǔ ɔ ɖó é wɛ mǐ ɖe nɛ́. (Sɔ́ jlɛ́ dó Matíe 10:41 wú.) Mǐ ní gbéjé lěe a sixú tuun tɛn e mɛ Tɔ́ ɔ kpó Vǐ ɔ kpó ɖe é, gɔ́ nú acɛ e yě ɖó é gbɔn é kpɔ́n. Énɛ́ gúdo ɔ, mǐ ná ɖɔ xó dó azɔ̌ e gbigbɔ mímɛ́ Mawu tɔn nɔ wa é wú.

12. Nɛ̌ mǐ ka nɔ bló batɛ́mu ɖo nyǐkɔ Tɔ́ ɔ tɔn mɛ gbɔn? (Nǔɖexlɛ́mɛ 4:11) (Kpɔ́n ɖiɖe ɔ lɔmɔ̌.)

¹² Ðo nyǐkɔ Tɔ́ ɔ tɔn mɛ. Mǐ yí gbe ɖɔ Jexóva wɛ nyí Tɔ́ mǐtɔn jǐxwé tɔn ɔ, alǒ Mɛ e ná gbɛ mǐ é. Mawu Nǔbǐwúkpétɔ́ wɛ é nyí, bo dá nǔ lɛ́ bǐ. (Xa Nǔɖexlɛ́mɛ 4:11.) Mǐ tuun ɖɔ é wɛ nɔ se ɖɛ, bɔ mǐ nɔ vo fɛɛ bo nɔ zán nyǐkɔ tɔn kpó sísí kpó hwenu e mǐ ɖo ɖɛ xo sɛ́ dó è wɛ é, kpó hwenu e mǐ ɖo xó ɖɔ nú mɛ ɖěvo lɛ́ dó wǔ tɔn wɛ é kpó. (Ðɛh. 65:3) Amɔ̌, nǔ e batɛ́mu blóbló ɖo nyǐkɔ Tɔ́ ɔ tɔn mɛ byɔ́ é bǐ nɛ́ ǎ. Ði kpɔ́ndéwú ɔ, mɛ e ɖo tó ɖó Piyɛ́ɛ wɛ ɖo Pantekótu hwenu lɛ́ é ko tuun nǔ ɖé lɛ́ dó Jexóva wú, amɔ̌, yě ɖó ná lɛ́ tuun ɖɔ Jezu Klísu kɛ́ɖɛ́ jí jɛ́n Jexóva nɔ gbɔn dó ná gbɛ mavɔmavɔ mɛ.—Hlɔ̌. 5:8.

13. Nɛ̌ mǐ ka nɔ bló batɛ́mu ɖo nyǐkɔ Vǐ ɔ tɔn mɛ gbɔn? (Kpɔ́n ɖiɖe ɔ lɔmɔ̌.)

¹³ Ðo nyǐkɔ Vǐ ɔ tɔn mɛ. Mǐ nɔ yí gbe ɖɔ Vǐɖokpónɔ Mawu tɔn wɛ Jezu nyí. Jezu wɛ nyí “ali ɔ,” ɖó é wɛ nyí mɛ ɖokpó e jí mǐ bǐ sixú gbɔn bo zun xɔ́ntɔn ɖagbe xá Jexóva é. (Jaan 14:6) Jezu wɛ nyí mɛ ɖokpó é kú dó ta mǐtɔn mɛ bónú mǐ ní dó sixú mɔ gbɛ é. Nǔ énɛ́ lɛ́ tuuntuun nɔ sísɛ́ mǐ bɔ mǐ nɔ xwedó kpɔ́ndéwú tɔn ɖo gbɛzán gbe bǐ gbe tɔn mǐtɔn mɛ, é nyí ɖo batɛ́mu mǐtɔn hwenu kɛ́ɖɛ́ ǎ. (1 Jaan 2:6) Ði kpɔ́ndéwú ɔ, mǐ nɔ jlá wɛn ɔ kpó kanɖódónǔwú kpó éɖɔhun, bo nɔ lɔn nú nǔ ɖěbǔ nɔ dɔn mǐ dó gúdo ǎ. (Luk. 4:43) Mǐ tlɛ nɔ ɖo gbesisɔmɛ bo ná dɛ ɖo yadónúmɛ nu bá dó sɛn Mawu kpó gbejíninɔ kpó. (2 Tim. 3:12) Ðó Jezu wɛ “nyí ta nú agun ɔ” wútu ɔ, mǐ nɔ ɖó sísí n’i bo nɔ lɛ́ hwíhwɛ́ mǐɖée dó mɛ ɖěɖěe é sɔ́ ɖó nǔ lɛ́ nu, bɔ yě nɔ kpé nukún dó ahwanvú tɔn lɛ́ wú é glɔ́ kpó xomɛhunhun kpó.—Efɛ́. 4:8, 11, 12; 5:23.

14. (a) Nɛ̌ mǐ ka nɔ bló batɛ́mu ɖo nyǐkɔ gbigbɔ mímɛ́ ɔ tɔn mɛ gbɔn? (Kpɔ́n ɖiɖe ɔ lɔmɔ̌.) (b) Batɛ́mu ɖěvo tɛ́ lɛ́ mɛ e gbigbɔ sɔ́ lɛ́ é ka nɔ bló? (Kpɔ́n gbǎví “Batɛ́mu ɖěvo lɛ́ nú mɛ e gbigbɔ sɔ́ lɛ́ é.”)

¹⁴ Ðo gbigbɔ mímɛ́ ɔ sín nyǐkɔ mɛ. Mǐ nɔ yí gbe nú nǔgbó e kunkplá gbigbɔ mímɛ́ ɔ é. É nyí gbɛtɔ́ ǎ, é ka lɛ́ nyí Atɔnɖobǔ sín akpáxwé ɖé ǎ, loɔ, hlɔ̌nhlɔ́n e Mawu nɔ sɔ́ dó w’azɔ̌ é wɛ. Mǐ tuun ɖɔ gbigbɔ mímɛ́ wɛ d’alɔ gbeyíɖɔ lɛ́ kpó bibluwlántɔ́ lɛ́ kpó, énɛ́ wú ɔ, mǐ nɔ xa Biblu ɔ hwɛhwɛ bo nɔ xwedó nǔkplɔ́nmɛ tɔn lɛ́. (2 Pi. 1:20, 21) Mǐ nɔ lɛ́ nyi alɔ nú hwɛ syɛ́nsyɛ́n huhu bónú énɛ́ ní ma zɔ́n bónú gbigbɔ mímɛ́ ɔ gɔn azɔ̌ wa dó mǐ jí alǒ dó agun ɔ jí ó.—Efɛ́. 4:30.

15. Étɛ́ mǐ ka ɖó ná kan ɖ’é jí bá wa?

¹⁵ Ényí Klisánwun e ko bló batɛ́mu é wɛ a nyí hǔn, kú d’é jí bá mɔ nukúnnú jɛ “nǔkplɔ́nmɛ e kunkplá batɛ́mu vovo lɛ́ . . . é”c sín akpáxwé lɛ́ bǐ mɛ, bo zán gbɛ e sɔgbe xá akpá e a dó nú Jexóva bo sɔ́ hwiɖée jó n’i lobo bló batɛ́mu é. Nú a ma ka ko bló batɛ́mu ǎ ɔ ka lo? Nǔɖé wɛ ka ɖo dindɔn we dó gǔdo wɛ vlafo a? Xóta e bɔ d’é wú é ná ɖɔ xó dó lěe a sixú kpo ɖo gǎn dó wɛ bá jɛxá batɛ́mu gbɔn é jí.