Nɔ dó nukún tan Biblu tɔn lɛ́ mɛ kpɔ́n

Nǔ e jɛ nǔgbó lɛ́ é sín tan gěgé ɖo Biblu mɛ, bo nɔ kplɔ́n nǔ tají lɛ́ mǐ. Ényí mǐ nɔ dó nukún tan énɛ́ lɛ́ mɛ kpɔ́n ɔ, mǐ sixú mɔ nukúnnú jɛ nǔ e mǐ xa é mɛ hú gǎn, bo lɛ́ ɖu le tɔn hú gǎn. Nǔ e sixú d’alɔ we bɔ a ná dó nukún tan Biblu tɔn lɛ́ mɛ kpɔ́n é ɖé lɛ́ ɖíe.

• Nɔ xa dó jǐ. Biblu xixa dó jǐ sixú d’alɔ we bɔ a ná kpé wú bo dó nukún nǔ e ɖo jijɛ wɛ lɛ́ é mɛ kpɔ́n hú gǎn. Ényí mi ɖo Biblu xa wɛ ɖo xwédo mɛ ɔ, mi sixú bló bɔ tan ɔ lɛ́ wá gbɛ gbɔn azɔ̌ ɖiɖe nú mɛ e ɖo xwédo ɔ mɛ lɛ́ é ɖokpó ɖokpó bónú yě ná xa nǔ e mɛ e xó tan ɔ ɖɔ lɛ́ é ɖɔ é gblamɛ.

• Nɔ dó nukún nǔ lɛ́ mɛ kpɔ́n. Tɛ́n kpɔ́n bo nɔ mɔ nukúnnú jɛ linlin mɛ e xó tan ɔ ɖɔ lɛ́ é tɔn kpó lěe nǔ cí nú yě é kpó mɛ. Ði kpɔ́ndéwú ɔ, nɔ kan nǔ élɔ́ lɛ́ byɔ́ hwiɖée: ‘Étɛ́wú mɛ e xó tan ɔ ɖɔ é, alǒ ɖɔ lɛ́ é ka ɖɔ xó, alǒ wa nǔ gbɔn mɔ̌? Ényí nyi wɛ ɖo ninɔmɛ énɛ́ mɛ ɔ, linlin tɛ́ un ka sixú ko ɖó, alǒ nɛ̌ nǔ ka sixú ko cí nú mì?’

• Nɔ ɖe desɛ́ɛn. Ényí desɛ́ɛn tan Biblu tɔn lɛ́ tɔn e a nɔ ɖe lɛ́ é ná bo ma tlɛ xlɛ́ ɖɔ a nyí desɛ́ɛnɖetɔ́ alɔsekpɛ́nnánɔ ǎ ɔ, mɔ̌ wiwa sixú d’alɔ we bɔ a ná dó nukún nǔ lɛ́ mɛ kpɔ́n hú gǎn, bo lɛ́ flín yě hú gǎn.