Jezu wɛ nyí Vɔ̌sánúxwlémawutɔ́ ɖaxó wǔvɛ́sexámɛtɔ́ mǐtɔn

1-2. (a) Étɛ́wú Jexóva ka sɛ́ Vǐ súnnu tɔn dó ayǐkúngban ɔ jí? (b) Étɛ́ jí mǐ ka ná ɖɔ xó dó ɖo xóta élɔ́ mɛ? (Eblée lɛ́ 5:7-9)

É KO bló xwe 2000 mɔ̌ din bɔ Jexóva Mawu sɛ́ Vǐ e vɛ́ n’i hú gǎn é dó ayǐkúngban ɔ jí. Étɛ́wú? Nǔ e wú wɛ lɛ́ é ɖokpó wɛ nyí ɖɔ é ná hwlɛ́n gbɛtɔ́ lɛ́ sín hwɛhuhu kpó kú kpó sí, bo jlá nǔ e Satáan hɛn gblé lɛ́ é ɖó. (Jaan 3:16; 1 Jaan 3:8) Jexóva lɛ́ tuun ɖɔ nǔ e Jezu ná mɔ kpɔ́n hwenu e é ná nyí gbɛtɔ́ bo ɖo ayǐkúngban jí é ná sɔ́ nǔ n’i hú gǎn bɔ é ná húzú Vɔ̌sánúxwlémawutɔ́ ɖaxó e nɔ se wǔvɛ́ xá mɛ, bo nɔ lɛ́ nyɔ́ xomɛ é nú mǐ. Jezu jɛ azɔ̌ énɛ́ wa jí hwenu e é bló batɛ́mu ɖo 29 H.M. tɔn é gúdo.a

² Ðo xóta élɔ́ mɛ ɔ, mǐ ná ɖɔ xó dó lěe nǔ e Jezu mɔ kpɔ́n ɖo ayǐkúngban jí lɛ́ é d’alɔ ɛ bɔ é húzú Vɔ̌sánúxwlémawutɔ́ ɖaxó wǔvɛ́sexámɛtɔ́ ɖé gbɔn é jí. É ɖo tají ɖɔ mǐ ní mɔ nukúnnú jɛ énɛ́ mɛ, ɖó énɛ́ tuuntuun ná zɔ́n bɔ ɖɛ xixo sɛ́dó Jexóva kpó vǐvɛ́ xá ɛ kpó ná bɔ wǔ nú mǐ hú gǎn, tají ɔ, hwenu e wǔ kú mǐ ɖó nǔwanyido mǐtɔn lɛ́ wú é.—Xa Eblée lɛ́ 5:7-9.

VǏ VÍVƐ́ MAWU TƆN WÁ AYǏKÚNGBAN JÍ

3-4. Hǔzúhúzú tají tɛ́ lɛ́ Jezu ka ɖí xwi xá hwenu e é wá ayǐkúngban jí é?

³ Mɛ gěgé sín ninɔmɛ ko húzú kpɔ́n; é sixú nyí tɛn sisɛ sín xwé e è yí wǎn ná é gbe bo jó xwédo mɛtɔn kpó xɔ́ntɔn mɛtɔn lɛ́ kpó dó. Hǔzúhúzú mɔ̌hun lɛ́ sixú vɛ́ wǔ. Amɔ̌, gbɛtɔ́ ɖě ɖí xwi xá hǔzúhúzú alɔkpa e Jezu ɖí xwi xá lɛ́ é ǎ. É wɛ nyí vǐ gbigbɔ tɔn Jexóva tɔn nukúnɖéjí hú gǎn ɔ ɖo jǐxwé. Jexóva yí wǎn n’i b’ɛ nɔ ɖo awǎjijɛ mɛ hwebǐnu ɖó é nɔ w’azɔ̌ xá Tɔ́ tɔn tlɔlɔ wútu. (Ðɛh. 16:11; Nǔx. 8:30) Amɔ̌, Filípunu lɛ́ 2:7 ɖɔ ɖɔ é “jó nǔ e é ɖó é bǐ dó” kpó jlǒ kpó, bo jó tɛn nukúnɖéjí e mɛ é ɖe ɖo jǐxwé é dó bo wá nɔ gbɛ ɖo gbɛtɔ́ hwɛhutɔ́ lɛ́ tɛ́ntin ɖo ayǐkúngban jí.

⁴ Lɛ̌ lin tamɛ dó xwe nukɔntɔn ɖěɖěe Jezu bló ɖo ayǐkúngban jí lɛ́ é jí. Xwédo wamamɔnɔ ɖé mɛ wɛ è jí Jezu ɖe, lěe vɔ̌ kléwún e mɛjitɔ́ tɔn lɛ́ sá hwenu e è ji i é xlɛ́ gbɔn é. (Lev. 12:8; Luk. 2:24) Ée axɔ́sú nyanya Elódu se jiji Jezu tɔn sín xó é ɔ, é tɛ́n kpɔ́n bá hu i. Bo ná dó hwlɛ́n Jezu gán ɔ, xwédo ɔ yi ba bibɛtɛn ɖo Ejípu nú hwenu ɖé. (Mat. 2:13, 15) Ninɔmɛ e mɛ Jezu nɔ ɖo ayǐkúngban jí é gbɔn vo bǐ mlɛ́mlɛ́ nú éé mɛ é nɔ ɖo jǐxwé é!

5. Étɛ́ Jezu ka mɔ ɖo ayǐkúngban jí? Nɛ̌ nǔ e é ɖí xwi xá lɛ́ é ka sɔ́ nǔ n’i nú Vɔ̌sánúxwlémawutɔ́ ɖaxó sín azɔ̌ tɔn gbɔn? (Kpɔ́n ɖiɖe ɔ lɔmɔ̌.)

⁵ Hwenu e Jezu ɖo ayǐkúngban jí é ɔ, é nɔ mɔ bɔ mɛ lɛ́ nɔ ɖo wǔvɛ́ se wɛ. É ɖo wɛn ɖɔ é tuun nǔ e mɛvívɛ́ mɛtɔn kú dó mɛ nyí é, b’ɛ ɖo wɛn ɖɔ kú tɔ́ ɖo tɔ́ domɛ tɔn Jozɛ́fu tɔn lɔ ɖ’é mɛ. Ðo sinsɛnzɔ́ Jezu tɔn hwenu ɔ, é mɔ gudunɔ lɛ́, nukúntɔ́nnɔ lɛ́, sékúnɔ lɛ́ kpó mɛjitɔ́ e vǐ kú dó lɛ́ é kpó bo se wǔvɛ́ xá yě. (Mat. 9:2, 6; 15:30; 20:34; Mak. 1:40, 41; Luk. 7:13) Nǔgbó wɛ ɖɔ hwenu e é ɖo jǐxwé é ɔ, é ko nɔ mɔ mɛ lɛ́ bɔ yě nɔ ɖo wǔvɛ́ se wɛ. Amɔ̌ din ɔ, ɖó é nyí gbɛtɔ́ bo ɖo ayǐkúngban ɔ jí wútu ɔ, ali vo nu wɛ é nɔ mɔ wǔvɛ́ e gbɛtɔ́ lɛ́ nɔ mɔ é ɖe. (Eza. 53:4) É hɛn ɔ, é ná mɔ nukúnnú jɛ lěe nǔ nɔ cí nú gbɛtɔ́ lɛ́ ɖo ninɔmɛ vovo lɛ́ mɛ é mɛ kpó lě do yě nɔ se wǔvɛ́ sɔ ɖó tagba gbɛ mɛ tɔn lɛ́ wútu é kpó mɛ bǐ mlɛ́mlɛ́. Gbɛtɔ́ bǐ ɖɔhun ɔ, nǔ nɔ ci kɔ nú Jezu lɔ; é lɔ nɔ nɔ aluwɛ mɛ bɔ wǔ nɔ lɛ́ kú i.

NǓ MƐ ÐĚVO LƐ́ TƆN NƆ ÐU AYI MƐ NÚ JEZU

6. Étɛ́ xógbe nǔjlɛ́dónǔwú tɔn gbeyíɖɔ Ezayíi tɔn lɛ́ ka kplɔ́n mǐ dó wǔvɛ́sexámɛ kpó xomɛnyínyɔ́ kpó Jezu tɔn wú? (Ezayíi 42:3)

⁶ Ðo sinsɛnzɔ́ Jezu tɔn hwenu ɔ, é nɔ se wǔvɛ́ xá mɛ ɖěɖěe ma ɖó gǎn ɖé ǎ lɛ́ é kpó mɛmaɖómɛɖé lɛ́ kpó tawun. Mɔ̌ e é wa é zɔ́n bɔ nǔɖɔɖayǐ ɖé jɛnu. Ðo Nǔwlánwlán mímɛ́ Ebléegbe tɔn lɛ́ mɛ ɔ, hwɛhwɛ wɛ è nɔ sɔ́ mɛ ɖěɖěe ɖó nǔɖiɖi syɛ́nsyɛ́n nú Jexóva lɛ́ é jlɛ́ dó jikpá e è hú sin ná ganjí é, alǒ atín e yi ji bo dó ɖɔ do ganjí lɛ́ é wú. (Ðɛh. 92:13; Eza. 61:3; Jel. 31:12) Amɔ̌, è nɔ sɔ́ mɛ ɖěɖěe ma ɖó ɖɔxátɔ́ ǎ lɛ́ é kpó mɛ e è wa nǔ agɔ xá lɛ́ é kpó jlɛ́ dó zogbɛ́nkan e ja cící gbé é wú. (Xa Ezayíi 42:3; Mat. 12:20) Mawu sɔ́ dó ayi mɛ nú gbeyíɖɔ Ezayíi b’ɛ zán xógbe nǔjlɛ́dónǔwú tɔn énɛ́ lɛ́ dó ɖɔ wǎnyíyí kpó wǔvɛ́sexámɛ kpó e Jezu ná ɖe xlɛ́ mɛ ɖěɖěe mɛ ɖěvo lɛ́ nɔ mɔ ɖɔ yě kún hwɛ́n nǔɖé ó lɛ́ é sín xó ɖ’ayǐ.

7-8. Nɛ̌ Jezu ka bló bɔ nǔɖɔɖayǐ Ezayíi tɔn jɛnu gbɔn?

⁷ Wɛnɖagbewlántɔ́ Matíe zán xógbe Ezayíi tɔn élɔ́ lɛ́ dó Jezu wú: “É ná gbídí fántín e ko tɔ é ɖěbǔ ǎ, é ka ná cí zogbɛ́nkan e ko ɖo azɔ si wɛ é ɖěbǔ ǎ.” Mɛ ɖěɖěe mɛ ɖěvo lɛ́ nɔ wɔn ya ná bɔ yě sixú cí fántín e ko tɔ é ɖɔhun é, alǒ mɛ ɖěɖěe ma sɔ́ ɖó nukúnɖíɖó ɖě ǎ bo cí zogbɛ́nkan e ɖo azɔ si wɛ, bɔ ɖo malínmálín mɛ ɔ, é ná cí é ɖɔhun lɛ́ é wɛ Jezu bló nǔjíwǔ tɔn ɖé lɛ́ ná. Nya e gudu kpé wǔtu tɔn bǐ é ɖé ɖo mɛ énɛ́ lɛ́ mɛ. É ka ko ɖó nukún ɖ’ayǐ ɖɔ è ná gbɔ azɔn nú émí bɔ émí ná nɔ kpɔ́ xá xwédo émítɔn kpó xɔ́ntɔn émítɔn lɛ́ kpó wɛ a? (Luk. 5:12, 13) Nya e kú tó bo ma sixú nɔ ɖɔ xó ganjí ǎ é lɔ ɖo yě mɛ. Dǒ nukún lěe nǔ ná ko nɔ cí n’i hwenu e é nɔ mɔ bɔ mɛ ɖěvo lɛ́ nɔ ɖo xó ɖɔ ɖó kpɔ́ wɛ bɔ éyɛ́ ma ka sixú nɔ se ɖě ǎ é mɛ kpɔ́n. (Mak. 7:32, 33) Amɔ̌, din ɔ, é sɔ́ ɖo mɔ̌ ǎ.

⁸ Ðo Jezu sín hwenu ɔ, Jwifu gěgé nɔ ɖi nǔ ɖɔ mɛ ɖěɖěe nyí azinzɔnnɔ alǒ ɖó wɔ̌n ɖo wǔ lɛ́ é ɔ, hwɛ e yěɖésúnɔ alǒ mɛjitɔ́ yětɔn lɛ́ hu lɛ́ é sín sin sún wɛ yě ɖe mɔ̌. (Jaan 9:2) Nǔ énɛ́ e yě ɖi nǔ ná é zɔ́n bɔ azinzɔnnɔ lɛ́ alǒ wɔ̌nɖowǔnánɔ lɛ́ nɔ mɔ ɖɔ émí kún hwɛ́n nǔɖé ó. Amɔ̌, Jezu gbɔ azɔn nú yě bo d’alɔ yě bɔ yě mɔ ɖɔ nǔ émítɔn nɔ ɖu ayi mɛ nú Mawu. Gǎnjɛwú tɛ́ énɛ́ ka ná mǐ?

9. Nɛ̌ Eblée lɛ́ 4:15, 16 ka xlɛ́ ɖɔ Vɔ̌sánúxwlémawutɔ́ ɖaxó mǐtɔn nɔ se wǔvɛ́ xá gbɛtɔ́ hwɛhutɔ́ lɛ́ nǔgbó nǔgbó gbɔn?

⁹ Xa Eblée lɛ́ 4:15, 16. Mǐ sixú kú d’é jí ɖɔ Jezu ná nɔ se wǔvɛ́ xá mǐ hwebǐnu. Étɛ́ ka nyí tínmɛ énɛ́ tɔn? Mɛ e nɔ se wǔvɛ́ xá mɛ é ɔ, mɛɖé wɛ é nyí bɔ wǔvɛ́ e se wɛ mɛ ɖěvo ɖé ɖe é kpó lěe nǔ cí n’i é kpó nɔ sísɛ́ ɛ b’ɛ nɔ wa nǔ. Xókwín Glɛ̌kigbe tɔn e è tínmɛ dó “se wǔvɛ́ xá mɛ” é sín tínmɛ wɛ nyí è ní sɔ́ mɛɖée ɖó mɛ ɖě ɔ sín tɛnmɛ bónú lěe nǔ cí n’i é ní cí mɔ̌ nú mɛ lɔ. (Lɛ̌ kpɔ́n Eblée lɛ́ 10:34, fí e Pɔ́lu zán xókwín Glɛ̌kigbe tɔn ɖokpó ɔ ɖe é.) Nǔjíwǔ Jezu tɔn lɛ́ sín tan xlɛ́ lě do wǔvɛ́ e se wɛ mɛ ɖěvo lɛ́ ɖe é nɔ byɔ́ lanmɛ n’i sɔ é. É nɔ gbɔ azɔn nú mɛ lɛ́ ɖó é ɖó ná wa mɔ̌ kpowun wútu ǎ. Nǔ yětɔn nɔ ɖu ayi mɛ n’i dó nǔjɔnǔ mɛ b’ɛ nɔ ba ná d’alɔ yě. Ði kpɔ́ndéwú ɔ, hwenu e é gbɔ azɔn nú gudunɔ ɔ é ɔ, é hɛn ɔ, é ná ko nɔ zɔ bo bló nǔjíwǔ ɔ, amɔ̌, nya ɔ sín nǔ blá wǔ n’i b’ɛ ɖ’alɔ wǔ tɔn, bóyá azɔn nukɔntɔn e mɛɖé ɖ’alɔ gudunɔ énɛ́ wú kpɔ́n é nɛ́! Jezu kplá nya tókúnɔ ɔ jɛ zɔ nú ahwan ɔ kpó xomɛnyínyɔ́ kpó bo gbɔ azɔn n’i. Gɔ́ ná ɔ, hwenu e Falizyɛn ɖé mɔ xó ɖɔ dó nǎwe e hwɛ tɔn lɛ́ vɛ́ ná bɔ é kun ɖasin kɔn nyi Jezu sín afɔ lɛ́ jí bo sɔ́ ɖa tɔn lɛ́ dó súnsún ná é wú é ɔ, Jezu jɛ hun dó nǎwe ɔ jí syɛ́nsyɛ́n. (Mat. 8:3; Mak. 7:33; Luk. 7:44) Jezu nɔ hɔn nú mɛ ɖěɖěe wɔ̌n ɖo wǔ ná lɛ́ é alǒ hu hwɛ syɛ́nsyɛ́n lɛ́ é ǎ. É nyɔ́ wa ɔ, é nɔ yí yě bo nɔ xlɛ́ ɖɔ émí yí wǎn nú yě. Mǐ sixú kú d’é jí ɖɔ é nɔ se wǔvɛ́ xá mǐ lɔmɔ̌.

VƆ̌SÁNÚXWLÉMAWUTƆ́ ÐAXÓ MǏTƆN SÍN KPƆ́NDÉWÚ XWIXWEDÓ ÐO ÉGBÉ

10. Étɛ́ lɛ́ mǐ ka sixú zán ɖo égbé dó d’alɔ tókúnɔ lɛ́ kpó nukúntɔ́nnɔ lɛ́ kpó ɖo gbigbɔ lixo? (Kpɔ́n ɖiɖe lɛ́ lɔmɔ̌.)

¹⁰ Ðó mǐ nyí ahwanvú gbejínɔtɔ́ Jezu tɔn lɛ́ wútu ɔ, mǐ nɔ tɛ́n kpɔ́n bo nɔ yí wǎn nú mɛ ɖěvo lɛ́, nǔ yětɔn nɔ ɖu ayi mɛ nú mǐ, bɔ mǐ nɔ lɛ́ se wǔvɛ́ xá yě éɖɔhun. (1 Pi. 2:21; 3:8) Nǔgbó wɛ ɖɔ mǐ sixú gbɔ azɔn nú tókúnɔ alǒ nukúntɔ́nnɔ ǎ, amɔ̌, é ɖo wɛn ɖɔ, mǐ hɛn ɔ, mǐ ná d’alɔ mɛ mɔ̌hun lɛ́ ɖo gbigbɔ lixo. Ði kpɔ́ndéwú ɔ, wěma jínjɔ́n Biblu jí lɛ́ ko tíin din dó tókúnɔgbe 100 jɛjí mɛ. Gɔ́ ná ɔ, bo ná dó d’alɔ mɛ ɖěɖěe ma nɔ mɔ nǔ ganjí ǎ lɛ́ é ɔ, wěma e ɖo nukúntɔ́nnɔ lɛ́ sín nǔwlánwlánlɔ jí lɛ́ é ko tíin ɖo gbe 60 jɛjí mɛ, bɔ video ɖěɖěe è nɔ tínmɛ nǔ e ɖo jijɛ wɛ ɖo yě mɛ lɛ́ é ɖe é ko tíin ɖo gbe 100 jɛjí mɛ. Nǔ énɛ́ lɛ́ nɔ d’alɔ tókúnɔ lɛ́ kpó nukúntɔ́nnɔ lɛ́ kpó bɔ yě nɔ sɛkpɔ́ Jexóva kpó Vǐ tɔn kpó.

11. Nɛ̌ tutoblónúnǔ Jexóva tɔn ka nɔ ɖe xlɛ́ ɖɔ mɛ e gosín akɔta lɛ́ bǐ mɛ lɛ́ é sín nǔ nɔ ɖu ayi mɛ nú émí Jezu ɖɔhun gbɔn? (Mɛsɛ́dó 2:5-7, 33) (Kpɔ́n ɖiɖe lɛ́ lɔmɔ̌.)

¹¹ Tutoblónúnǔ Jexóva tɔn nɔ dó gǎn syɛ́nsyɛ́n bá dó d’alɔ gbɛtɔ́ e gosín akɔta lɛ́ bǐ mɛ lɛ́ é. Flín ɖɔ ɖo fínfɔ́n sín kú Jezu tɔn gúdo ɔ, é gba gbigbɔ mímɛ́ kɔn nyi mɛ jí bónú mɛ e kplé ɖo Pantekótu sín xwe zán gbe lɛ́ é bǐ ná dó sixú se wɛn ɖagbe ɔ, mɛ ɖokpó ɖokpó “dó gbe éɖésúnɔ tɔn mɛ.” (Xa Mɛsɛ́dó 2:5-7, 33.) É nɔ xlɛ́ ali tutoblónúnǔ ɔ, b’ɛ nɔ sɔ́ nǔ nú wěma jínjɔ́n Biblu jí lɛ́ dó gbe 1000 jɛjí mɛ; gbe énɛ́ lɛ́ ɖé lɛ́ tíin bɔ mɛ kwínwe ɖé jɛ́n nɔ dó. Ði kpɔ́ndéwú ɔ, gbe ɖé lɛ́ tíin bɔ mɛ kpɛɖé kpowun jɛ́n nɔ dó ɖo totaligbé Amɛlíka tɔn kpó tofɔligbé Amɛlíka tɔn kpó. É ɖo mɔ̌ có, wěma kpó video kpó mǐtɔn lɛ́ ko tíin ɖo gbe énɛ́ lɛ́ 160 jɛjí mɛ bónú mɛ gěgé ná dó sixú se wɛn ɖagbe ɔ lěe é nyɔ́ bló gbɔn é. Wěma kpó video kpó mǐtɔn lɛ́ lɛ́ tíin ɖo Romani-gbe 20 jɛjí mɛ. Mɛ e nɔ dó gbe mɔ̌hun lɛ́ é afatɔ́n mɔ̌kpán ko yí nǔgbó ɔ.

12. Alɔ tají ɖěvo tɛ́ tutoblónúnǔ Jexóva tɔn ka nɔ dó mɛ?

¹² Gɔ́ nú gǎn mɔ̌hun lɛ́ e tutoblónúnǔ Jexóva tɔn nɔ dó bónú wɛn ɖagbe ɔ ná dó gba kpé é ɔ, é nɔ lɛ́ hɛn sɔ mɛ ɖěɖěe wú adla j’ayǐ wa nǔ dó lɛ́ é. Bo ná dó kpé énɛ́ wú ɔ, nɔví afatɔ́n mɔ̌kpán nɔ sɔ́ yěɖée jó, bá dó d’alɔ nɔví súnnu kpó nɔví nyɔ̌nu kpó yětɔn e ɖo hudó mɛ lɛ́ é. Tutoblónúnǔ ɔ nɔ lɛ́ d’alɔ bɔ è nɔ gbá fí e è ná sɛn Mawu ɖe b’ɛ ɖo jlɛ̌ jí lɛ́ é bónú mɛ lɛ́ ná dó sixú kplé bo kplɔ́n nǔ dó wǎn e Mawu yí nú yě é wú d’é jí.

VƆ̌SÁNÚXWLÉMAWUTƆ́ ÐAXÓ MǏTƆN SIXÚ D’ALƆ WE

13. Ðɔ ali e nu Jezu nɔ d’alɔ mǐ ɖe é ɖé lɛ́.

¹³ Ðó Jezu wɛ nyí lɛ̌ngbɔ́nyitɔ́ ɖagbe mǐtɔn wútu ɔ, é nɔ sɔ́ ayi ɖó hudó gbigbɔ tɔn mǐ mɛ ɖokpó ɖokpó tɔn jí. (Jaan 10:14; Efɛ́. 4:7) Hweɖélɛ́nu ɔ, ninɔmɛ gbɛ mɛ tɔn lɛ́ sixú zɔ́n bɔ mǐ ná cí zogbɛ́nkan e ɖo azɔ si wɛ é alǒ fántín e tɔ é ɖé ɖɔhun. Lanmɛzɔn syɛ́nsyɛ́n ɖé, nǔwanyido ɖé alǒ tagba e sixú ɖo mǐ kpó nǔɖitɔ́ hǎtɔ́ ɖé kpó tɛ́ntin é sixú zɔ́n bɔ awakanmɛ kú mǐ tawun. É sixú vɛ́ wǔ nú mǐ bɔ mǐ ná mɔ nǔ zɛ wǔvɛ́ e mɔ wɛ mǐ ɖe din é wú bo sɔ́ ayi ɖó nukúnɖíɖó sɔgúdo tɔn mǐtɔn jí. Amɔ̌, flín ɖɔ Jezu ɖo nǔ e mɛ gbɔn dín wɛ a ɖe din é mɔ wɛ bo mɔ nǔ jɛ lěe nǔ cí nú we ɖo ayi gɔngɔn towe mɛ é wú. Wǔvɛ́sexámɛ nɔ sísɛ́ Jezu b’ɛ nɔ wa nǔ dó ta towe mɛ. Ði kpɔ́ndéwú ɔ, hwenu e gǎn vɔ ɖo wǔ we é ɔ, é hɛn ɔ, é ná zán gbigbɔ mímɛ́ dó ná hlɔ̌nhlɔ́n we. (Jaan 16:7; Ti. 3:6) Gɔ́ ná ɔ, Jezu hɛn ɔ, é ná zán súnnu e “nyí nǔníná lɛ́” é kpó nǔɖitɔ́ hǎtɔ́ towe ɖěvo lɛ́ kpó bɔ yě ná dó wǔsyɛ́n lanmɛ nú we dó nɔ gǔdo nú we bo lɛ́ d’alɔ we.—Efɛ́. 4:8.

14. Ényí awakanmɛ kú mǐ ɔ, étɛ́ mǐ ka sixú wa?

¹⁴ Ényí awakanmɛ kú we hǔn, flín ɖɔ Jezu wɛ nyí Vɔ̌sánúxwlémawutɔ́ ɖaxó mǐtɔn, bo lin tamɛ dó lěe énɛ́ kan we gbɔn é jí dó nǔjɔnǔ mɛ. Flín ɖɔ é kún nyí ɖɔ é ná sɔ́ gbɛ tɔn dó xɔ gbɛ nú mɛ kɛ́ɖɛ́ wú wɛ Jexóva sɛ́ ɛ dó ayǐkúngban ɔ jí ó, loɔ, bónú é ná lɛ́ kpé wú bo mɔ nukúnnú jɛ tagba ɖěɖěe gbɛtɔ́ hwɛhutɔ́ lɛ́ nɔ ɖí xwi xá lɛ́ é mɛ ganjí wú wɛ. Ényí awakanmɛ kú mǐ ɖó hwɛhuhu, alǒ gǎnmaɖó mǐtɔn lɛ́ wú ɔ, Jezu nɔ ɖo gbesisɔmɛ bo ná d’alɔ mǐ “ɖo hwetɔnnu.”—Ebl. 4:15, 16.

15. Nǎ kpɔ́ndéwú e xlɛ́ lěe è sixú d’alɔ mɛ e ko jɛ zɔ nú lɛ̌ngbɔ́kpó Jexóva tɔn é ɖé b’ɛ ná lɛ́ kɔ wá agun ɔ mɛ gbɔn é tɔn ɖé.

¹⁵ Jezu nɔ lɛ́ d’alɔ togun tɔn b’ɛ nɔ dó gǎn bo nɔ ba mɛ ɖěɖěe ko gosín lɛ̌ngbɔ́kpó Jexóva tɔn mɛ lɛ́ é mɔ, bo nɔ lɛ́ d’alɔ yě. (Mat. 18:12, 13) Kpɔ́n nǔ e jɛ dó Stefanob jí é. È ɖe è sín agun mɛ é ɔ, é ko bló xwe 12 cóbɔ é wá gbeta ɔ kɔn bá yi kplé. É ɖɔ: “É bɔ wǔ nú mì ǎ, amɔ̌, un ba ná sɛn Jexóva ɖó kpɔ́ xá nɔví súnnu kpó nɔví nyɔ̌nu kpó ce lɛ́. Mɛxó agun tɔn ɖěɖěe mɔ mì lɛ́ é bló bɔ un mɔ ɖɔ xwé wɛ un wá. Hweɖélɛ́nu ɔ, linlin un hwɛ́n nǔɖé ǎ tɔn nɔ lɛ́ wá xwetɔ́n, bɔ un nɔ ba ná jó gbe. Amɔ̌, nɔví lɛ́ nɔ flín mì ɖɔ Jexóva kpó Jezu kpó ba ɖɔ nyi ní ma jó gbe ó. Hwenu e è yí mì dó agun mɛ é ɔ, agun ɔ blěbú yí nyi kpó xwédo ce kpó, kpó akpakpa sɔ́ mɛ kpó. Nukɔnmɛ ɔ, asi ce yí gbe nú Biblu kplɔ́nkplɔ́n bɔ égbé din ɔ, xwédo ɔ blěbú ɖo Jexóva sɛn wɛ.” Ényí Vɔ̌sánúxwlémawutɔ́ ɖaxó wǎnyíyínɔ mǐtɔn mɔ bónú è dó alɔ e sín hudó mɛ ɖěɖěe hwɛ yětɔn lɛ́ vɛ́ ná é yě bónú yě lɛ́ kɔ wá agun ɔ mɛ ɔ, é nɔ víví n’i kpɔ́n!

16. Étɛ́wú é ka su nukún towe mɛ ɖɔ a ɖó Vɔ̌sánúxwlémawutɔ́ ɖaxó wǔvɛ́sexámɛtɔ́ mɔ̌hun?

¹⁶ Hwenu e Jezu ɖo ayǐkúngban jí é ɔ, é d’alɔ gbɛtɔ́ gěgé hwenu e jɛxá dó é. Égbé ɔ, mǐ sixú kú d’é jí bǐ mlɛ́mlɛ́ ɖɔ é ná nɔ d’alɔ mǐ hweɖébǔnu e mǐ ɖó hudó tɔn dó é. Ðo gbɛ yɔ̌yɔ́ e jawě zaanɖé din é mɛ ɔ, é ná d’alɔ gbɛtɔ́ tónúsetɔ́ lɛ́ bɔ yě ná jɛ yěɖée sí bǐ mlɛ́mlɛ́ sín nǔ e hwɛhuhu nɔ wa dó mɛ wú lɛ́ é bǐ sí. É su nukún mǐtɔn mɛ tawun ɖɔ wǎnyíyí kpó nǔbláwǔkúnúmɛ kpó ɖaxó sísɛ́ Jexóva Mawu mǐtɔn bɔ é sɔ́ Vǐ tɔn b’ɛ nyí Vɔ̌sánúxwlémawutɔ́ ɖaxó wǔvɛ́sexámɛtɔ́ mǐtɔn!