Jelemíi
28 Ðo xwe énɛ́ ɖokpó ɔ mɛ, ɖo axɔ́súɖuɖu Judáa xɔ́sú Sedesiyási tɔn sín bǐbɛ́mɛ, ɖo xwe ɛnɛgɔ́ ɔ sín sun atɔ́ɔ́ngɔ́ ɔ mɛ ɔ, gbeyíɖɔ Hananíya Azúu ví gabawɔ́ɔnnu ɔ ɖɔ nú mì ɖo xwé Jexóva tɔn gbe ɖo vɔ̌sánúxwlémawutɔ́ lɛ́ kpó togun ɔ bǐ kpó nukɔn ɖɔ: 2 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: ‘Un ná wɛ́n agbanhɛnkpo Babilɔ́nu xɔ́sú ɔ tɔn. 3 Ðo xwe we* vlamɛ ɔ, un ná lɛ́ kɔ nú xwé Jexóva tɔn sín nǔzínzán ɖěɖěe Babilɔ́nu xɔ́sú Nabukodonɔzɔ́ɔ bɛ́ sín fí yi Babilɔ́nu lɛ́ é wá fí.’” 4 “‘Un ná lɛ́ kɔ nú Jekoniyási Yexoyakímu ví, Judáa xɔ́sú ɔ, kpó Judáa sín mɛ ɖěɖěe yi kannumɔgbénu ɖo Babilɔ́nu lɛ́ é bǐ kpó wá fí,’ wɛ Jexóva ɖɔ, ‘ɖó un ná wɛ́n Babilɔ́nu xɔ́sú ɔ sín agbanhɛnkpo.’”
5 Énɛ́ gúdo ɔ, gbeyíɖɔ Jelemíi ɖɔ xó nú gbeyíɖɔ Hananíya ɖo vɔ̌sánúxwlémawutɔ́ lɛ́ kpó mɛ e ɖo te ɖo xwé Jexóva tɔn gbe lɛ́ é bǐ kpó nukɔn. 6 Gbeyíɖɔ Jelemíi ɖɔ: “Amǐ!* Jexóva ní bló mɔ̌! Jexóva ní bló bónú xó e a ɖɔ ɖ’ayǐ lɛ́ é ní jɛnu! É ní lɛ́ kɔ nú xwé Jexóva tɔn sín nǔzínzán lɛ́ kpó mɛ e ɖo kannumɔgbénu lɛ́ é bǐ kpó sín Babilɔ́nu wá fí! 7 Amɔ̌, kɛnklɛ́n ɖótó xó élɔ́ e ɖɔ dó tó towe mɛ wɛ un ɖe, bo lɛ́ ɖo ɖiɖɔ dó togun ɔ bǐ sín tó mɛ wɛ é. 8 Sín hwenu línlín ɖíe ɔ, gbeyíɖɔ e jɛ nukɔn nú mì lɛ́ é kpó éé jɛ nukɔn nú we lɛ́ é kpó nɔ ɖɔ ɖɔ ahwan, awěxomɛ kpó jɛmɛjí* kpó ná wa nǔ dó to gěgé kpó axɔ́súɖuto ɖaxó ɖaxó lɛ́ kpó wú. 9 Ényí gbeyíɖɔ ɖé ɖɔ ɖɔ fífá ná tíin, bónú gbeyíɖɔ énɛ́ sín xó jɛnu ɔ, è ná tuun ɖɔ Jexóva wɛ sɛ́ gbeyíɖɔ énɛ́ dó nǔgbó nǔgbó.”
10 Ée gbeyíɖɔ Hananíya se mɔ̌ é ɔ, é ɖe agbanhɛnkpo ɔ sín kɔ nú gbeyíɖɔ Jelemíi, bo hɛn wɛ́n. 11 Énɛ́ gúdo ɔ, Hananíya ɖɔ ɖo togun ɔ bǐ nukɔn ɖɔ: “Nǔ e Jexóva ɖɔ é ɖíe: ‘Mɔ̌ wɛ un ná wɛ́n Babilɔ́nu xɔ́sú Nabukodonɔzɔ́ɔ sín agbanhɛnkpo sín kɔ nú akɔta lɛ́ bǐ ɖo xwe we vlamɛ gbɔn.’” Bɔ gbeyíɖɔ Jelemíi wlí ali tɔn ɖidó.
12 Ée gbeyíɖɔ Hananíya wɛ́n agbanhɛnkpo ɔ sín kɔ nú gbeyíɖɔ Jelemíi gúdo é ɔ, Jexóva ɖɔ nú Jelemíi ɖɔ: 13 “Yi ɖɔ nú Hananíya ɖɔ: ‘Nǔ e Jexóva ɖɔ é ɖíe: “A wɛ́n agbanhɛnkpo e è sɔ́ atín dó bló lɛ́ é, amɔ̌, agbanhɛnkpo e è sɔ́ gan dó bló lɛ́ é wɛ ná jɛ tɛn yětɔn mɛ.” 14 Ðó nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Un ná sɔ́ agbanhɛnkpo e è sɔ́ gan dó bló é dó kɔ nú akɔta énɛ́ lɛ́ bǐ, bónú yě ná sɛn Babilɔ́nu xɔ́sú Nabukodonɔzɔ́ɔ, bɔ yě ɖó ná sɛn ɛ. Un tlɛ ná ná ɛ gběkanlin lɛ́ lɔ.”’”
15 Énɛ́ gúdo ɔ, gbeyíɖɔ Jelemíi ɖɔ nú gbeyíɖɔ Hananíya ɖɔ: “Hananíya è, kɛnklɛ́n, ɖǒtó! Jexóva sɛ́ we dó ǎ, amɔ̌, a bló bɔ togun élɔ́ ɖeji dó adingban wú. 16 Énɛ́ wú ɔ, nǔ e Jexóva ɖɔ é ɖíe: ‘Un ná ɖe we sín ayǐkúngban ɔ jí. Xwe élɔ́ mɛ ɔ, a ná kú ɖó a sísɛ́ togun ɔ bɔ é fɔ́n gǔ dó nyɛ Jexóva jí wútu.’”
17 Énɛ́ ɔ, gbeyíɖɔ Hananíya kú ɖo xwe énɛ́ mɛ, ɖo sun tɛ́nwegɔ́ ɔ mɛ.