Jelemíi

27 Ðo axɔ́súɖuɖu Judáa xɔ́sú Yexoyakímu Joziyási ví ɔ tɔn sín bǐbɛ́mɛ ɔ, Jexóva ɖɔ xó élɔ́ nú Jelemíi: 2 “Nǔ e Jexóva ɖɔ nú mì é ɖíe: ‘Sɔ́ nǔ nú kan ɖé lɛ́ kpó agbanhɛnkpo ɖé lɛ́ kpó bo bɛ́ yě dó kɔli mɛ. 3 Énɛ́ gúdo hǔn, sɛ́ yě dó axɔ́sú Edɔ́mu tɔn, axɔ́sú Mɔwábu tɔn, axɔ́sú Amumɔ́ɔ ví lɛ́ tɔn, axɔ́sú Tíi tɔn kpó axɔ́sú Sidɔ́ɔn tɔn kpó, gbɔn wɛndótɔ́ ɖěɖěe wá Judáa xɔ́sú Sedesiyási gɔ́n ɖo Jeluzalɛ́mu lɛ́ é gblamɛ. 4 Ðe gbe élɔ́ nú gǎn yětɔn lɛ́ gbɔn yě jí:

“‘“Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe; nǔ e mi ɖó ná ɖɔ nú gǎn mitɔn lɛ́ é ɖíe: 5 ‘Nyiɖésúnɔ wɛ zán hlɔ̌nhlɔ́n ce ɖaxó ɔ kpó alɔ ce e ɖo dlɛ̌ndlɛ́n é kpó dó bló ayǐkúngban ɔ, gbɛtɔ́ lɛ́ kpó kanlin e ɖo ayǐkúngban ɔ jí lɛ́ é kpó, bo ná mɛ e jló mì é.* 6 Bɔ din ɔ, un sɔ́ to énɛ́ lɛ́ bǐ dó alɔ mɛ nú mɛsɛntɔ́ ce Babilɔ́nu xɔ́sú Nabukodonɔzɔ́ɔ; un tlɛ ná ɛ gběkanlin lɛ́ bónú yě ná sɛn ɛ. 7 Akɔta lɛ́ bǐ ná sɛn é kpó vǐ tɔn kpó, kpódó vǐvú tɔn kpán káká jɛ hwenu e to éɖésúnɔ tɔn sín hwenu ná wá é, ɛɛn, hwenu e akɔta gěgé kpó axɔ́sú nukúnɖéjí lɛ́ kpó ná sɔ́ ɛ dó ɖó kannumɔ yětɔn é.’

8 “‘“‘Ényí akɔta ɖěbǔ alǒ axɔ́súɖuto ɖěbǔ gbɛ́ ɖɔ émí kún ná sɛn Babilɔ́nu xɔ́sú Nabukodonɔzɔ́ɔ ó, bo gbɛ́ ɖɔ émí kún ná dó kɔ Babilɔ́nu xɔ́sú ɔ sín agbanhɛnkpo glɔ́ ó ɔ, un ná zán hwǐ, adɔ kpó jɛmɛjí* kpó dó dɔn tó nú akɔta énɛ́,’ wɛ Jexóva ɖɔ, ‘káká jɛ hwenu e un ná zán alɔ tɔn dó sú kún yětɔn dó é.’

9 “‘“‘Énɛ́ wú ɔ, mi ma ɖótó gbeyíɖɔ mitɔn lɛ́, amɔɛkantɔ́ mitɔn lɛ́, dlɔ̌tínmɛtɔ́ mitɔn lɛ́, majíkiblótɔ́ mitɔn lɛ́ kpó azětɔ́ mitɔn lɛ́ kpó, éé nɔ ɖɔ xó élɔ́ nú mi lɛ́ é ó: “Mi ná sɛn Babilɔ́nu xɔ́sú ɔ ǎ.” 10 Ðó adingban ɖó nú mi wɛ yě ɖe ɖo gbeyíɖɔzɔ́ yětɔn kɔn, bɔ énɛ́ ná zɔ́n bɔ è ná bɛ́ mi yi fí e lín dó to mitɔn é, bɔ un ná fúnfún mi kpé lobɔ mi ná dɔn.

11 “‘“‘Amɔ̌, akɔta e ná dó kɔ Babilɔ́nu xɔ́sú ɔ sín agbanhɛnkpo glɔ́ bo ná sɛn ɛ é ɔ, un yí gbe bɔ é ná cí* ayǐkúngban éɖésúnɔ tɔn jí,’ wɛ Jexóva ɖɔ, ‘bo ná lɛ, lobo lɛ́ nɔ jí.’”’”

12 Gɔ́ ná ɔ, un ɖo nǔ ɖokpó ɔ ɖɔ nú Judáa xɔ́sú Sedesiyási wɛ: “Dǒ kɔ axɔ́sú Babilɔ́nu tɔn sín agbanhɛnkpo glɔ́ bo sɛn é kpó togun tɔn kpó, énɛ́ ɔ, a ná nɔ gbɛ. 13 Étɛ́wú è ka ɖó ná sɔ́ hwǐ, adɔ kpó jɛmɛjí kpó dó hu hwi kpó togun towe kpó lěe Jexóva ɖɔ ɖɔ é ná nyí gbɔn nú akɔta e ma ná sɛn axɔ́sú Babilɔ́nu tɔn ǎ é? 14 Mi ma ɖótó gbeyíɖɔ e nɔ ɖɔ nú mi ɖɔ: ‘Mi ná sɛn Babilɔ́nu xɔ́sú ɔ ǎ’ lɛ́ é sín xó ó, ɖó adingban ɖó nú mi wɛ yě ɖe ɖo gbeyíɖɔzɔ́ yětɔn kɔn.

15 “Ðó un sɛ́ yě dó ǎ,” wɛ Jexóva ɖɔ, ‘amɔ̌, yě nɔ ɖó adingban ɖo gbeyíɖɔzɔ́ yětɔn kɔn ɖo nyǐkɔ ce mɛ, bɔ énɛ́ ná zɔ́n bɔ un ná fúnfún mi kpé bɔ mi ná dɔn, midɛɛ lɛ́ kpó gbeyíɖɔ e nɔ wa gbeyíɖɔzɔ́ dó ta mitɔn mɛ lɛ́ é kpó.’”

16 Un ɖɔ nú vɔ̌sánúxwlémawutɔ́ lɛ́ kpó togun élɔ́ bǐ kpó ɖɔ: “Nǔ e Jexóva ɖɔ é ɖíe: ‘Mi ma ɖótó gbeyíɖɔ e nɔ wa gbeyíɖɔzɔ́ dó ta mitɔn mɛ lɛ́ é sín xó élɔ́ lɛ́ ó: “Éɖíe! Zaanɖé din ɔ, è ná bɛ́ xwé Jexóva tɔn sín nǔzínzán lɛ́ lɛ́ kɔ wá sín Babilɔ́nu.” Ðó adingban ɖó nú mi wɛ yě ɖe ɖo gbeyíɖɔzɔ́ yětɔn kɔn. 17 Mi ma ɖótó yě ó. Mi sɛn Babilɔ́nu xɔ́sú ɔ, énɛ́ ɔ, mi ná nɔ gbɛ. Étɛ́wú toxo élɔ́ ka ɖó ná húzú aglingbigba? 18 Amɔ̌, ényí gbeyíɖɔ jɛ́n yě nyí, bɔ xó Jexóva tɔn ɖo nu yětɔn hǔn, yě ní kɛnklɛ́n sa vo nú Jexóva ahwankpá lɛ́ tɔn ɖɔ è ní ma bɛ́ nǔzínzán e kpo ɖo xwé Jexóva tɔn gbe lɛ́ é, éé kpo ɖo axɔ́sú Judáa tɔn sín xwégbe* lɛ́ é kpó éé kpo ɖo Jeluzalɛ́mu lɛ́ é kpó yi Babilɔ́nu ó.’

19 Ðó Jexóva ahwankpá lɛ́ tɔn ɖɔ xó dó dotín lɛ́, Xu ɔ,* kɛkɛ́ví lɛ́ kpó nǔzínzán e kpo bɔ è jó dó nyi toxo élɔ́ mɛ lɛ́ é kpó wú. 20 Hwenu e Babilɔ́nu xɔ́sú Nabukodonɔzɔ́ɔ bɛ́ Judáa xɔ́sú Jekoniyási Yexoyakímu ví ɔ, gɔ́ nú Judáa kpó Jeluzalɛ́mu kpó sín mɛ nukúnɖéjí lɛ́ bǐ sín Jeluzalɛ́mu yi kannumɔgbénu ɖo Babilɔ́nu é ɔ, é bɛ́ nǔ énɛ́ lɛ́ ǎ; 21 ɛɛn, nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ dó nǔzínzán e è jó dó nyi xwé Jexóva tɔn gbe, bo jó dó nyi Judáa xɔ́sú ɔ sín xwégbe* lobo jó dó nyi Jeluzalɛ́mu lɛ́ é wú é ɖíe: 22 ‘“È ná bɛ́ yě yi Babilɔ́nu, bɔ yě ná nɔ fínɛ́ káká jɛ hwenu e un ná sɔ́ ayi ɖó yě jí é,” wɛ Jexóva ɖɔ. Énɛ́ gúdo ɔ, un ná bɛ́ yě lɛ́ kɔ bo ná lɛ́ sɔ́ yě ɖó nɔtɛn élɔ́.”’”