Ezayíi
16 Sɛ́ agbo ɖé dó acɛkpatɔ́ to ɔ tɔn
sín Sɛ́la gbɔn gbětótló mɛ,
yi vǐ nyɔ̌nu Sinyɔ́ɔ tɔn sín só ɔ jí.
2 Xɛ e è nya sín adɔ̌ tɔn mɛ é ɖɔhun ɔ,
mɔ̌ wɛ vǐ nyɔ̌nu Mɔwábu tɔn lɛ́ ná cí ɖo tɔgbotɛn Aanɔ́ni tɔn lɛ́.
3 “Ðe wě xá mɛ, wa nǔ sɔgbe xá gbeta ɔ.
Blǒ bónú yɛtɛn towe ní cí zǎn ɖɔhun ɖo hwemɛ cíɖíɖí.
Hwlǎ mɛ e fúnfún kpé lɛ́ é, bo ma flú mɛ ɖěɖěe ɖo hinhɔn wɛ lɛ́ é ó.
4 Mɔwábu è, mɛ ce e fúnfún kpé lɛ́ é ní nɔ gɔ̌n towe.
Hǔzú bibɛtɛn nú yě, ɖó kúnsúdónúmɛtɔ́ ɔ wú.
Yadónúmɛtɔ́ ɔ sín xó ná fó,
nǔhɛngblé ná wá vivɔnu,
bɔ mɛ ɖěɖěe nɔ gbídí mɛ ɖěvo lɛ́ ɖó afɔ wú lɛ́ é ɔ, è ná sú kún yětɔn dó sín ayǐkúngban ɔ jí.
5 Énɛ́ gúdo ɔ, è ná ɖó axɔ́súɖuto ɖé ayǐ bo ná bló bɔ é ná lí dǒ sɔgbe xá wǎnyíyí e ma nɔ sɛ do ǎ é.
Mɛ e ná jínjɔ́n jí ɖo goxɔ Davídi tɔn mɛ é ná nɔ gbejí;
é ná ɖɔ hwɛ jlɔ́jlɔ́, bo ná yá wǔ bló bɔ nǔjlɔ́jlɔ́wiwa ná tíin.”
6 Mǐ se xó dó goyíyí Mɔwábu tɔn wú, é nɔ yí go tawun.
Mǐ se xó dó éɖée e é nɔ sɔ́ su é, goyíyí tɔn kpó majijɛ tɔn kpó wú;
amɔ̌, xó tɔn tófwé lɛ́ ná ná nǔɖé ǎ.
7 Énɛ́ wú wɛ Mɔwábu ná dó gbɛvíhan ɖó awě e xo è é wú;
yě bǐ ná dó gbɛvíhan.
Mɛ ɖěɖěe è xo lɛ́ é ná ná alě ɖó vǐwun sínsɛ́n sín gatóo Kíi-Alɛsɛ́ti tɔn lɛ́ wú.
8 Ðó vǐwungbo Hɛcibɔ́ni tɔn lɛ́ mlú ɖa,
vǐwuntín Sibúma tɔn lɛ́ lɔ mlú ɖa,
acɛkpatɔ́ akɔta lɛ́ tɔn gbídí ala tɔn vɔvɔ cɛ́cɛ́ lɛ́* ɖó afɔ wú;
yě hun káká yi Yazɛ́ɛ;
yě ɖi ga káká yi gbětótló mɛ.
Ala tɔn lɛ́ vun bo yi káká xu ɔ kɔn.
9 Énɛ́ wú wɛ un ná y’avǐ dó vǐwuntín Sibúma tɔn jí, lěe un y’avǐ dó Yazɛ́ɛ jí gbɔn é ɖɔhun.
Hɛcibɔ́ni kpó Eleále kpó è mi, un ná sɔ́ ɖasin ce dó fá mi,
ɖó xó e sú wɛ è ɖe dó alǔun mɛ sín atínsínsɛ́n mitɔn kpó nǔkúnyiya mitɔn kpó tamɛ é wá vivɔnu.*
10 È ɖe awǎjijɛ kpó xomɛhunhun kpó sín atínsínsɛ́ngbo ɔ mɛ,
bɔ awǎjijɛ sín han ɖě, alǒ xósúsú ɖě ɖo vǐwungbo lɛ́ mɛ ǎ.
Vǐwunlitɔ́ ɖě sɔ́ nɔ li vǐwun ɖo vǐwunto lɛ́ mɛ ǎ,
ɖó un ko bló bɔ xósúsú ɔ nɔ te.
11 Énɛ́ wú wɛ un nɔ ɖo sísɔ́sísɔ́ wɛ ɖo xomɛ dó Mɔwábu tamɛ,
lěe agǐdigbo nɔ ɖo nǔ ɖɔ wɛ gbɔn é ɖɔhun,
bɔ wǔ kú mì tawun ɖó Kíi-Alɛsɛ́ti wú.
12 Ényí Mɔwábu tlɛ nɔ zán éɖée vún ɖo vodúnxwé ɔ, bo nɔ lɛ́ yi xo ɖɛ ɖo sinsɛnxɔ tɔn mɛ ɔ, é ná ná nǔɖé ǎ.
13 Xó e Jexóva ɖɔ dó Mɔwábu wú jɛ nukɔn é nɛ́. 14 Din ɔ, Jexóva ɖɔ: “Ðo xwe atɔn vlamɛ ɔ, ɛɛn, jokóxotɔ́ e è yí é sín xwe lɛ́ ɖɔhun* ɔ, hunnyahunnya alɔkpa lɛ́ bǐ ná bló bɔ Mɔwábu sín susu ná bú, bɔ mɛ e kpo lɛ́ é sín kɛ́n ná hwe tawun, bo ná lɛ́ sɔ atɛ́n ǎ.”