Ezayíi
15 Hwɛ e è ɖɔ dó Mɔwábu é ɖíe:
Ðó è sú kún dó nú Áa Mɔwábu tɔn ɖo zǎn ɖokpó mɛ wútu ɔ,
é cí xwíí.
Ðó è sú kún dó nú Kíi Mɔwábu tɔn ɖo zǎn ɖokpó mɛ wútu ɔ,
é cí xwíí.
2 É hun káká yi xwé ɔ gbe,* bo lɛ́ yi Dibɔ́ni,
ɛɛn, káká yi vodúnxwé lɛ́ bo ná y’avǐ.
Mɔwábu nɔ dó gbɛvíhan dó Nɛbo jí, bo nɔ lɛ́ dó dó Mɛdéba jí.
È xwlɛ́ ta nú mɛ lɛ́ bǐ, è kpa atán nú mɛ lɛ́ bǐ.
3 È dó ati ɖo ali tɔn lɛ́ jí.
Yě bǐ nɔ dó gbɛvíhan ɖo xɔ yětɔn lɛ́ ta kpó tokplétɛn yětɔn lɛ́ kpó;
yě nɔ jɛ te kpó avǐ kpó.
4 Hɛcibɔ́ni kpó Eleále kpó sú xó;
è se gbe yětɔn ɖo káká Yaxási,
énɛ́ wɛ zɔ́n bɔ sɔ́ja Mɔwábu tɔn lɛ́ ɖo xó sú wɛ magbokɔ.
É* ɖo sísɔ́sísɔ́ wɛ.
5 Ayi ce nɔ sú xó dó Mɔwábu tamɛ.
Mɛ tɔn e ɖo hinhɔn gbɔn gbějá gbějá wɛ lɛ́ é hɔn bo yi káká Sowáa kpó Egláti-Celecíya kpó.
Ée yě ɖo kpó fán wɛ xwe Luxíti sín kpó jí é ɔ, yě ɖo avǐ ya wɛ;
ée yě xwe Holonayímu é ɔ, yě sú xó tlílí, ɖó awě ɔ wú.
6 Ðó Nimulímu sín sin lɛ́ mɛ bǐ;
gběhan mǔ xú,
gběhan sɔ́ ɖe ǎ, gběhan mǔ ɖě sɔ́ kpo ǎ.
7 Énɛ́ wɛ zɔ́n bɔ nǔ e kpo ɖo sɛxwetɛn nú yě lɛ́ é kpó dɔkun yětɔn lɛ́ kpó ɔ, è ɖo yě bɛ́ yi wɛ;
yě ɖo tɔdo* pepliyéetín lɛ́ tɔn ɔ d’asá wɛ.
8 Ðó è nɔ se xósúsú sín gbe ɖo Mɔwábu gbé ɔ bǐ jí.
Gbɛvíhan ɔ hun káká yi Eglayímu;
Gbɛvíhan ɔ hun káká yi Beɛ́ɛ-Elímu.
9 Ðó sin Dimɔ́ni tɔn lɛ́ gɔ́ nú kanjɔ,
bɔ un lɛ́ ɖó awě ɖěvo lɛ́ ɖo sɛxwetɛn nú Dimɔ́ni:
Un ná sɛ́ kinnikínní ɖé dó mɛ ɖěɖěe ná gán ɖo Mɔwábu lɛ́ é,
kpó mɛ ɖěɖěe ná kpo ɖo to ɔ mɛ lɛ́ é kpó.