July

Jehovah n’asomfo binom wɔ hɔ a, mpanyinyɛ ntsi, wonntum nnyɛ pii wɔ no som mu. Binom so dze, yarba retseetsee hɔn, na binom so edzi dzɛm. Iyi ntsi bi a wɔbɛtse nka dɛ wɔnnsom bo mma Jehovah. Ntsi bi a wobebisa dɛ, ‘Moho da ho ara hia Jehovah anaa?’ Obi a ɔkyerɛɛw Ndwom 71 no, nna noara so wɔ ɔhaw a ɔtse dɛm. Ntsi ɔbɔɔ mpaa dɛ: “Sɛ m’ahoɔdzen sa a, mma mmpa me.” (Ndw. 71:​9, 18) Ɔwɔ mu dɛ nna ɔdwontofo no n’ahoɔdzen rokɔ famu dze, naaso nna ɔgye dzi paa dɛ sɛ ɔkɔ do dze nokwardzi som Jehovah a, ɔbɛkyerɛ no kwan na ɔaaboa no. Hɔn a mpanyinyɛ na yarba nyina ekyir no wɔreyɛ dza wobotum biara dze asom Jehovah no, n’enyi sɔ hɔn mbɔdzembɔ no. (Ndw. 37:​23-25) Sɛ wo mfe akɔ enyim a, mbrɛ Jehovah si hu wo no, bɔ mbɔdzen dɛ ibohu woho dɛmara. Osian mpanyinyɛ ntsi bi a w’apɔwmudzen nnyɛ papa, naaso Jehovah botum aboa wo ma aakɔ do dze nokwardzi asom no. (Ndw. 92:​12-15) Mma mmfa dza inntum nnyɛ no sesei no nnhaw woho, mbom no fa w’adwen si dza itum yɛ no do. w24.10 28 ¶14-16

Christianfo a hɔnho nnkokwaae no, sɛ wohyia tsebea bi na ohia dɛ wosusu Bible mu afotusɛm ho na wɔdze yɛ edwuma a, mpɛn pii no ɔyɛ dzen ma hɔn dɛ wɔbɛyɛ dɛm. Sɛ Bible mu mbra pɔtsee bi nnyi hɔ a ɔfa hɔn tsebea no ho a, bi a hɔn mu binom benya adwen dɛ wobotum ayɛ dza wɔpɛ biara. Bi a afofor so bɛpɛ dɛ wɔhyehyɛ mbra ma hɔn aber a mbra biara ho nnhia. Dɛ nhwɛdo no, ɔbɛyɛ dɛ nna Christianfo a wɔwɔ Corinth no pɛ dɛ ɔsomafo Paul ka kyerɛ hɔn dɛ wobotum edzi edziban a wɔdze abɔ afɔr ama abosom anaa worunntum nndzi. Naaso Paul annka dza ɔsɛ dɛ wɔyɛ no annkyerɛ hɔn. Mbom no, ɔmaa wohun dɛ obiara wɔ tsibowa na afei so, hɔn mu biara wɔ ‘hokwan’ dɛ ɔyɛ dza ne tsibowa bɛma no kwan. Ɔnye hɔn susuu afotusɛm a nna ɔwɔ Kyerɛwnsɛm no mu no ho. Nna dɛm afotusɛm yi bɔboa hɔn ma woeesisi gyinae a ɔremma hɔn tsibowa nnhaw hɔn, na ɔronnto afofor so fintsidua. (1 Cor. 8:​7-9) Nna Paul roboa Corinthfo no ma woeehu mbrɛ wobesi dze Kyerɛwnsɛm no esisi gyinae na nnyɛ dɛ wɔbɛma afofor esisi gyinae ama hɔn. Afei so, nna ɔrema woehu dɛ ɔnnsɛ dɛ aber biara wonya mbra pɔtsee bi ansaana woehu dza ɔsɛ dɛ wɔyɛ. Dza Paul yɛe no, nna ɔroboa hɔn ma wɔaabɛyɛ Christianfo a hɔnho akokwaa. w24.04 5 ¶14

Jonah n’aber do no, Ninevehfo no nyaa hokwan sesae. Afei so, kaa dza Jesus kae faa ‘atsɛmbu wusoɛr’ no ho no. Ɔkaa dɛ ‘hɔn a wɔyɛɛ dza omuo no’ so bɔsoɛr. (John 5:29) Iyi ma yehu dɛ, ɔbɛyɛ dɛ enyidado bi wɔ hɔ ma nyimpa binom a nna wɔwɔ Sodom na Gomorrah no so. Obotum aba dɛ hɔn mu binom botum enya owusoɛr, na yebenya hokwan akyerɛkyerɛ hɔn Jehovah nye Jesus Christ ho adze. Jehovah nye nyia ‘ɔhwehwɛ akoma mu, na ɔsɔ nyimpa ne tsirmu adwen hwɛ’ aber nyina. Dɛm ntsi wɔ owusoɛr a ɔbɛba daakye no mu no, dɛ mbrɛ Jehovah yɛ no aber nyinara no, ‘obotua obiara kaw dɛ mbrɛ n’akwan tse.’ Sɛ Jehovah hu dɛ ɔsɛ dɛ ɔda ehumbɔbɔr edzi a, ɔbɛda no edzi naaso sɛ ohu dɛ no ho nnhia dɛ ɔyɛ dɛm a, ɔrennyɛ. Dɛm ntsi, ɔnnsɛ dɛ yenya adwen dɛ nyimpa bi rinnya owusoɛr, gyedɛ yenyim dɛ Bible no aka biribi a ɔtse dɛm. w24.05 5-6 ¶15-16

Ofi tsetse nyina, sɛ Nyankopɔn dze edwuma bi a ɔyɛ dzen hyɛ n’asomfo nsa a, ɔnam ne nsɛm do hyɛ hɔn dzen ma wotum yɛ edwuma no. Ɔwodze ma yɛmfa nkɔnhyɛnyi Jeremiah dɛ nhwɛdo. Aber a Jehovah kaa kyerɛɛ Jeremiah dɛ ɔnkɛka ɔno Jehovah n’asɛm nkyerɛ nkorɔfo no, nna ɔmmpɛ dɛ ɔkɔ. Jeremiah kaa dɛ: “Minnyim kasa: osiandɛ meyɛ abofra.” (Jer. 1:6) Naaso ebɛnadze na ɔboaa no ma onyaa akokodur? Asɛm a Nyankopɔn kaa kyerɛɛ no no na ɔhyɛɛ no dzen. Ekyir yi, Jeremiah kaa dɛ: “Nna ɔyɛ m’akoma mu dɛ ogya a ɔredzɛw a wɔatow mu wɔ me mbiew mu, na mahom do akyɛr na maberɛ.” (Jer. 20:​8, 9) Ɔwɔ mu dɛ nyimpa a Jeremiah kaa asɛm no kyerɛɛ hɔn no enntsie dze, naaso asɛm a nna Jehovah dze asoma no no hyɛɛ no dzen ma ɔkɔr do kae. Nyankopɔn n’Asɛm hyɛ Christianfo so dzen. Ɔsomafo Paul kaa dɛ sɛ enuanom no nya nokwar nyimdzee a, ɔbɔboa hɔn ma ‘wɔaanantsew dɛ mbrɛ ɔfata wɔ Jehovah n’enyim’ na ‘wɔaakɔ do asow edwuma pa nyina mu aba.’—Col. 1:​9, 10. w24.04 14-15 ¶2-4

Aber a nna David ne ba Adonijah pɛ dɛ osi noho hen no, Ɔsɔfopanyin Abiathar kɛtaa n’ekyir. Naaso Zadok dze ɔannyɛ dɛm, mbom ɔkɔr do dzii Jehovah nokwar. Nna David nyim dɛ Zadok dze, obedzi no nokwar aber nyina. Ntsi aber a pɔw a nna Adonijah abɔ no bɛdaa edzi no, David kaa kyerɛɛ Zadok, Nathan, na Benaiah dɛ wonkesi Solomon hen. (1 Ahe. 1:​32-34) Jehovah n’asomfo anokwafo binom tse dɛ Nathan nye afofor a nna wɔtaa Ɔhen David n’ekyir a Zadok nye hɔn bɔe no, ɔbɛyɛ dɛ ɔboaa no paa. Bi a iyi na ɔhyɛɛ no nkuran na ɔboaa no ma ɔkɔr do dzii Jehovah nokwar no. Aber a Solomon bɛyɛɛ ɔhen no, ‘ɔdze ɔsɔfo Zadok hyɛɛ Abiathar n’ananmu.’ (1 Ahe. 2:35) Ibesi dɛn esuasua Zadok? Sɛ obi a epɛ n’asɛm paa gyaa Jehovah som a, ɔwodze kɔ do ara som no. (Josh. 24:15) Jehovah bɛhyɛ wo dzen na ɔbɛma wo akokodur ma eetum akɔ do edzi no nokwar. Ntsi bɔ no mpaa da biara na enye n’asomfo anokwafo mbɔ. Nya awerɛhyɛmu dɛ Jehovah n’enyi sɔ wo nokwardzi no paa, na obotua wo kaw.—2 Sam. 22:26. w24.07 6-7 ¶16-17

Ndwom 15:2 ka obi a ɔyɛ Nyankopɔn ne nyɛnko ho asɛm dɛ, “ɔnantsew tɔɔtsenn [anaa noho nnyi asɛm], na ɔyɛ ndzeyɛtsenenee.” Nkasafua “ɔnantsew” nye “ɔyɛ” no ma yehu dɛ ɔyɛ biribi a ɔsɛ dɛ yɛkɔ do yɛ. Naaso, yebotum ayɛ nkorɔfo a ‘asɛm nnyi hɛnho’ anaa? Nyew. Ɔwɔ mu, nyimpa biara nnyi hɔ a bɔn nnyi noho, naaso sɛ yɛyɛ dza yebotum biara tsie Jehovah a, obobu hɛn dɛ ‘asɛm biara nnyi hɛnho.’ Sɛ yehyira hɛnho do ma Nyankopɔn na wonuma hɛn a, nna afei na yɛahyɛ ase nye Nyankopɔn refa nyɛnko. Sɛ yɛhwɛ Bible mu a, yehu dɛ sɛ nna obi yɛ Israelnyi a, ɔno ara kɛkɛ nnkyerɛ dɛ obotum abɔsoɛ Jehovah ne ntamadan no mu. Nna binom bɔ Nyankopɔn ne dzin anaa wɔsom no, naaso nna wɔnnyɛ no “nokwar anaa tsenenee mu.” (Isa. 48:1) Israelfo a wɔpɛ dɛ wofi hɔn akoma nyina mu som Jehovah no, nna ɔsɛ dɛ wohu dza ɔpɛ na wɔyɛ. Ndɛ so, sɛ yɛpɛ dɛ yɛnye Jehovah nya anyɛnkofa a no mu yɛ dzen a, ɔnnyɛ dza ohia ara nye dɛ wobonuma hɛn na yɛnye Christianfo asafo no abɔ, mbom ɔsɛ dɛ yɛkɔ do “yɛ ndzeyɛtsenenee.” w24.06 9 ¶4; 10 ¶6

Ebɛn ndzɛmba ahorow na Jehovah dze akyɛ hɛn? Hom mma yensusu no mu bi ho. Jehovah dze dza yehia wɔ asetsena mu no ma hɛn. Ɔnnyɛ aber nyina na ɔma hɛn nsa ka ndzɛmba a ɔbɛma hɛnho atɔ hɛn wɔ asetsena mu, naaso dza yehia no dze, ɔdze ma hɛn. Dɛ mfatoho no, ɔma hɛn nsa ka dza yebedzi, dza yɛbɛhyɛ, nye beebi a yɛdze hɛn tsir bɔto. (Ndw. 4:8; Matt. 6:​31-33; 1 Tim. 6:​6-8) Jehovah hwɛ hu dɛ hɛn nsa bɛka ndzɛmba a yehia wɔ asetsena mu. Naaso ehwɛ a, osiandɛ ɔyɛ n’asodzii ara ntsi na ɔyɛ dɛm anaa? Ɔnntse dɛm koraa! Ɔwodze ma yɛnhwɛ asɛm a Jesus kae wɔ Matthew 6:​25, 26. Jesus reka nnoma ho asɛm no, ɔkaa dɛ: “Wonndua aba, wonntwa na wɔmmboaboa ano so nngu adzekoradan mu.” Naaso, hwɛ asɛm a ɔkae toaa do. Ɔkaa dɛ: “Hom Egya a ɔwɔ sor no hwɛ hɔn.” Afei, Jesus bisaa dɛ: “Hom nnsom bo koraa nnkyɛn hɔn anaa?” Esuadze a ɔwɔ asɛm yi mu nye dɛn? Sɛ Jehovah hwɛ mbowa dze a, nna ɔno yebotum enya awerɛhyɛmu dɛ ɔbɔhwɛ hɛn so! Egya pa biara dɔ n’ebusua na ɔhwɛ hɔn yie, na dɛmara so na osiandɛ Jehovah dɔ hɛn ntsi ɔma hɛn nsa ka dza yehia.—Ndw. 145:16; Matt. 6:32. w24.09 26-27 ¶4-6

Asafo mu somfo yɛ onua bi a sunsum krɔnkrɔn no boa asafo mu mpanyimfo ma woyi no. Ɔyɛ ndwuma ahorow bi a no ho hia dze boa asafo mu mpanyimfo wɔ asafo no mu. Dza ohia asafo mu asomfo paa nye dɛ wɔnye Jehovah ntamu bɛyɛ kama. Nokwasɛm nye dɛ, wɔdɔ Jehovah na wɔdze n’Asɛm so bɔ hɔn bra. Afei so, wɔdɔ hɔn nuanom Christianfo paa. (Matt. 22:​37-39) Onua bi a woenuma no besi dɛn abɛyɛ asafo mu somfo? Bible no ka suban ahorow a ɔsɛ dɛ onua bi da no edzi ansaana oetum abɛyɛ asafo mu somfo ho asɛm. (1 Tim. 3:​8-10, 12) Sɛ epɛ dɛ ebɛyɛ asafo mu somfo a, sua dɛm suban ahorow yi ho adze na bɔ mbɔdzen dɛ ebɛda no edzi. Naaso, ɔsɛ dɛ idzi kan hu siantsir a epɛ dɛ ebɛyɛ asafo mu somfo no. w24.11 15 ¶4-5

Binom se wɔakenkan Bible no mpɛn pii. Naaso awerɛhosɛm nye dɛ, dza Bible no ka no mpo wɔnngye nndzi na akantam wɔdze abɔ hɔn bra. Naaso hɛn Jehovah n’asomfo dze, yɛnntse dɛm koraa! Yɛbɔ mbɔdzen dze afotusɛm a ɔwɔ Bible mu no bɔ hɛn bra. Naaso ɔnnyɛ aber nyina na ɔyɛ mberɛw dɛ yɛbɛkenkan Nyankopɔn n’Asɛm no na yɛdze no mu nsɛm no aabɔ hɛn bra. Bi a ɔyɛ dzen ma hɛn dɛ yɛbɛgye ber akenkan Bible no. Anaa bi a yɛdze hɛn Bible akenkan no tu mbirika ma ɔno ntsi yenntum nndwendwen dza yɛkenkan no ho yie. Anaadɛ bi a nsesa a ɔsɛ dɛ yɛyɛ no dɔɔ so ma yennhu beebi mpo a yɛnhyɛ ase mfi. Enyigyesɛm nye dɛ, ɔmmfa ho dza ɔma ɔyɛ dzen ma wo dɛ ibenya Bible no do mfaso biara no, ibotum ayɛ ho biribi. Jehovah botum aboa wo ma eedzi dɛm haw no do. Ntsi hom mma yensi hɛn bo dɛ, yɛdze Nyankopɔn n’Asɛm no bɛyɛ edwuma. Asɛm no nye dɛ, sɛ yɛkenkan Nyankopɔn n’Asɛm no, na yɛdze no mu nsɛm no bɔ hɛn bra a, hɛn enyi bɛgye paa.—Jas. 1:25. w24.09 7 ¶15-16

Sɛ awerɛhosɛm bi to hɛn a, Jehovah nam no sunsum krɔnkrɔn no do kyekye hɛn werɛ. Sɛ erefa ɔhaw kɛse bi mu a, ibotum efi w’akoma mu aka ho asɛm akyerɛ Jehovah wɔ mpaabɔ mu. Ibotum nye no aka ho asɛm mpɛn dodow biara a epɛ. (Ndw. 86:3; 88:1) Kɔ do serɛ Jehovah dɛ ɔma wo no sunsum krɔnkrɔn no. Nya awerɛhyɛmu dɛ Jehovah rummbu n’enyi nngu w’ebisadze no do da. Irihyia ɔhaw kɛse bi ma w’abaw mu ebu anaa? Sunsum krɔnkrɔn no botum ahyɛ wo dzen ma aakɔ do dze nokwardzi asom Jehovah. (Eph. 3:16) Ebɛnadze na ɔsɛ dɛ eyɛ aber a aserɛ Jehovah dɛ ɔmfa no sunsum krɔnkrɔn no mboa wo no? Yɛ ndzɛmba ahorow a ɔbɛma enya Nyankopɔn no sunsum krɔnkrɔn no. Dɛm ndzɛmba no bi nye dɛ ebɔkɔ asafo nhyiamu nye asɛnka. Kenkan Bible no da biara da na dwendwen ho, na iyi bɔboa wo ma eenya Jehovah n’adwen wɔ ndzɛmba ho. (Phil. 4:​8, 9) Sɛ erekenkan Bible no a, nyimpa ahorow a hɔnho asɛm wɔ mu no, ɔyɛ a hyɛ ɔhaw ahorow a wohyiae no nsew, na dwendwen mbrɛ Jehovah boaa hɔn ma wotumii gyinaa ano no ho. w24.10 9 ¶12-14

Jehovah na ne Ba no dɔ nyimpa, na dɛmara na hɛn so yɛdɔ nyimpa. (Mbɛ. 8:31) Hɔn a ‘wonnyim Nyankopɔn’ na ‘wonnyi enyidado biara’ no, hɔn asɛm yɛ mbɔbɔr paa. (Eph. 2:12) Ɔhaw a dɛm nkorɔfo yi hyia wɔ asetsena mu no, ɔtse dɛ mbrɛ wɔatɔ amona bi a no mu dɔ mu. Naaso yɛwɔ ahoma a yebotum dze eyi hɔn efi mu. Ɔno nye Nyankopɔn n’Ahendzi ho asɛmpa no. Ɔdɔ na ayamuhyehye a yɛwɔ ma dɛm nkorɔfo no kenyan hɛn ma yɛyɛ dza yebotum biara ka asɛmpa no kyerɛ hɔn. Dɛm asɛmpa a ɔsom bo yi botum ama woeenya enyidado na obotum ama hɔn asetsena so eetu mpon. Afei so, obotum ama woeenya enyidado dɛ hɔn nsa botum aka “nokwar nkwa no” anaa daa nkwa wɔ Nyankopɔn no wiadze fofor no mu. (1 Tim. 6:19) Afei so, ɔdɔ a yɛwɔ ma nyimpa no kenyan hɛn ma yɛbɔ hɔn kɔkɔ dɛ wiadze bɔn yi n’ewiei abɛn. (Ezek. 33:​7, 8) Yɛpɛ dɛ yɛma wohu dza obesi wɔ ahohiahia kɛse no mu. Ɔno nye dɛ wɔbɛsɛɛ ator som na ɔno ekyir no wobeyi dɛm wiadze bɔn yi efi hɔ wɔ Amagedon.—Nyi. 16:​14, 16; 17:​16, 17; 19:​11, 19, 20. w24.05 16-17 ¶8-9

Ɔsomafo Paul hyɛɛ Christianfo no nkuran dɛ ‘wongyaa biribiara nhyɛ Nyankopɔn n’ebufuw nsa.’ Sɛ wɔnye wo enndzi no yie na igyaa asɛm no mu ma Jehovah dɛ nankasa ndzi ho dwuma wɔ ber a ɔfata mu a, ɔkyerɛ dɛ egyaa biribiara ahyɛ Jehovah n’ebufuw nsa. Aber a wɔnye onua bi a wɔfrɛ no John enndzi no yie no, ɔkaa dɛ: “Nna ɔsɛ dɛ mehyɛ moho do paa amma maannyɛ biribi a ɔmmfata. Nokwasɛm nye yi, nna ɔnnda famu. Naaso, Romefo 12:19 boaa me ma minyaa abotar tweɔɔn Jehovah.” Sɛ wɔnye hɛn enndzi no yie na yɛtweɔn dɛ Jehovah bɛyɛ ho biribi a, ɔboa hɛnara. Mpɛn pii no, sɛ yɛyɛ dɛ hɛnankasa bɛyɛ dza woesi no ho biribi a, obowie ase no nna wɔakɛfa ɔhaw na dadwen abɔto hɛn do. Ntsi na ɔsɛ dɛ yegyaa asɛm no mu ma Jehovah no. Jehovah pɛ dɛ ɔboa hɛn. Ɔtse dɛ mbrɛ ɔreka akyerɛ hɛn dɛ, ‘Minyim dɛ wɔnye wo enndzi no yie. Naaso ɔwodze gyaa asɛm no mu ma me, na mara mibedzi ho dwuma.’ Jehovah ahyɛ bɔ dɛ obotua hɔn a wɔnye hɛn nndzi no yie no kaw. Sɛ yɛgye dɛm bɔhyɛ yi dzi a, ɔbɛma yeegyaa asɛm no mu ama no na yeenya awerɛhyɛmu dɛ nankasa bedzi ho dwuma wɔ kwan a ɔfata do. w24.11 6 ¶14-15

Ɔnnsɛ dɛ yɛma asetsena mu ndzɛmba yɛ adze tsitsir wɔ hɛn asetsena mu. Ɔsomafo Paul sii dɛm asɛm yi do dua aber a nna ɔrekyerɛw krataa akɛma Christianfo no. Ɔkaa nsɛm ahorow bi a osisii wɔ Israelfo no abakɔsɛm mu. Bi nye dza osii wɔ beebi a ɔbɛn Bepɔw Sinai no. Ɔsomafo Paul bɔɔ hɔn kɔkɔ dɛ, ‘ɔnnsɛ dɛ wɔma hɔn kɔn dɔ ndzebɔn dɛ mbrɛ Israelfo no hɔn kɔn dɔe no.’ (1 Cor. 10:​6, 7, 11) Edziban a nna Israelfo no pɛ ntsi, wobuu anwanwadze a Jehovah yɛe maa hɔn no dɛ “ndzebɔn.” (Nka. 11:​4-6, 31-34) Afei so, aber a wɔrosom sika nantwiba no, wodzidzii, wɔnomee na wɔgyee hɔn enyi. (Ex. 32:​4-6) Nna ɔrennkyɛr ma wɔaasɛɛ Jerusalem nye n’asɔrfie no wɔ afe 70 H.B., ntsi Paul kyerɛɛw dɛm asɛm no dze bɔɔ Christianfo a nna wɔwɔ hɔ no kɔkɔ. Hɛn so yɛtse ewiei mber no mu na ɔrennkyɛr ma Jehovah aasɛɛ dɛm wiadze bɔn yi. Dɛm ntsi ɔsɛ dɛ yɛfa Paul n’afotu no enyibersɛm. w24.12 6 ¶13

Jehovah yɛ ‘enyigye Nyankopɔn’ ntsi ɔpɛ dɛ hɛn so, hɛn enyi gye. (1 Tim. 1:11) Ɔakyɛ hɛn ndzɛmba pa pii a ɔma hɛn enyi gye wɔ asetsena mu. (Jas. 1:17) Dɛm akyɛdze yi mu kor nye awar. Sɛ banyin na basia bi war a, wɔhyɛ bɔ dɛ wɔbɔdɔ hɔnho, wɔbɛda obu edzi akyerɛ hɔnho, na obiara rinnsi ne nyɛnko famu. Sɛ wɔkɔ do ara ma ɔdɔ a ɔwɔ hɔn ntamu no mu yɛ dzen a, ɔbɛma hɔn enyi agye paa. Awerɛhosɛm nye dɛ, ndɛ awarfo beberee hɔn werɛ efir ntam a wɔkae wɔ hɔn ayeforhyia da ase no. Osian iyi ntsi, hɔn enyi nngye wɔ hɔn awar mu. Ebɛn kwan do na Jehovah pɛ dɛ okun nye ne yer tsena? Jehovah aka akyerɛ kunnom dɛ ɔsɛ dɛ wodzi hɔn yernom nyi. Sɛ yebu obi a, yebedzi no nyi. Ntsi sɛ okun bi bu ne yer a, obedzi no nyi na ɔaayɛ no berɛberɛ.—1 Pet. 3:7. w25.01 8 ¶1-2; 9 ¶4-5

Yebotum aka dɛ, krataa a ɔsomafo Paul kyerɛwee kɛmaa Hebrewfo no boaa hɔn ma wosiesiee hɔnho maa ahohiahia a nna ɔrobobɔ ba no. Paul hyɛɛ no nuanom no nkuran dɛ, wɔngye ber nsua Kyerɛwnsɛm no ama wɔaatse ase yie. Sɛ wɔyɛ dɛm a, nna ɔbɛma wɔahyɛ nkyerɛkyerɛ a obotum ama hɔn gyedzi aayɛ mberɛw no nsew, na wɔaatwe hɔnho efi ho. Afei so ɔhyɛɛ hɔn nkuran dɛ, wɔnhyɛ hɔn gyedzi mu dzen, mbrɛ ɔbɛyɛ a wɔdze Jesus nye hɔn a wodzi ndzɛmba enyim no hɔn akwankyerɛ bɛyɛ edwuma ntsɛm. Bio so ɔmaa wohun dɛ, sɛ wobu nsɔhwɛ a wohyia no dɛ ɔyɛ kwan a hɔn Egya a ɔdɔ hɔn no refa do dze atsetse hɔn a, ɔbɛma woemia hɔn enyi egyina ano. Hom mma yɛmfa afotu a ofi Bible mu yi nyɛ edwuma. Sɛ yɛyɛ dɛm a, ɔbɛma yeemia hɛn enyi egyina ɔhaw ahorow ano dze ekodu ewiei.—Heb. 3:14. w24.09 13 ¶17, 19

Bible no ma yehu dɛ werdam yɛ biribi a wotua dze pata obi anaa wotua dze siesie nkorɔfo ntamu. Ntsi nna Jehovah botum afa werdam no do ama adasamba nsa aka dza wɔahwer no. Ebɛnadze ntsi na yɛreka dɛm? Dɛ mbrɛ yeebohu no, aber a Adam na Eve yɛɛ bɔn no, hokwan a nna wɔwɔ dɛ wɔbɛtsena ase daa no bɔɔ hɔn na wɔbɛyɛɛ nyimpa so a bɔn wɔ hɔnho. Ntsi nna ɔsɛ dɛ werdam no bo no nye dza Adam na Eve hweree no no bo yɛ pɛ. (1 Tim. 2:6) Dɛm ntsi nna ɔsɛ dɛ obi a obotua werdam no yɛ ɔbarimba bi a (1) bɔn biara nnyi noho; (2) obotum atsena ase daa wɔ asaase yi do; na (3) ɔayɛ krado dɛ obowu na ɔdze no nkwa aabɔ afɔr ama hɛn. Ndzɛmba ebiasa bi na ɔmaa Jesus tumii tuaa werdam no. Ɔno nye yi: (1) Nna bɔn biara nnyi noho, kyerɛ dɛ, “ɔannyɛ bɔn.” (1 Pet. 2:22) (2) Osian iyi ntsi, nna obotum atsena asaase do daa. (3) Nna ɔayɛ krado dɛ obowu na ɔdze no nkwa aato hɔ ama hɛn.—Heb. 10:9. w25.02 4-5 ¶11-12

Ma ɔntsena w’adwen mu dɛ Jehovah dɔ wo na ɔpɛ dɛ ebɛka n’ebusua ho. Sɛ epɛ dɛ inuma naaso ndzɛmba kor anaa ebien bi mma inntum nnuma a, kaa dɛ Jehovah da ho ara dɔ wo. Jesus kaa kyerɛɛ n’esuafo binom dɛ: “Sɛ hom wɔ gyedzi a ne kɛse tse dɛ sinapi aba a, nkyɛ hom bɛka akyerɛ bepɔw yi dɛ, ‘Tutu fi ha kɔ noho,’ na obotutu, na biribiara nnyi hɔ a hom runntum nnyɛ.” (Matt. 17:20) Hɔn a Jesus kaa dɛm asɛm yi kyerɛɛ hɔn no, nna wɔnye no anantsew mfe kakraabi pɛ, ntsi nna wonnyi gyedzi kɛse. Naaso Jesus maa wonyaa awerɛhyɛmu dɛ sɛ wonya gyedzi kɛse a, Jehovah bɔboa hɔn ma woeetum etutu ɔhaw akɛse a wɔayɛ tse dɛ mbepɔw no ase. Na Jehovah bɔboa woara so ma eetum ayɛ dɛm! Sɛ ihu dɛ ndzɛmba ahorow bi botum esiw w’enuma ho kwan a, yɛ ho biribi ntsɛmara. Hyira woho do ma Jehovah na ma wonnuma wo. Gyinae a ɔkyɛn biara a ibotum esi ara nye no! w25.03 7 ¶18-20

Sɛ yɛkaa dɛ Nyankopɔn tseasefo no ayɛ krado dɛ ɔbɔboa hɛn a, ɔbɛma yeetum egyina ɔhaw biara a yebehyia no ano. Sɛ yɛdwendwen ndzɛmba ahorow bi a Jehovah ayɛ no dada no ho a, ɔbɔboa hɛn ma yeenya no mu ahotodo kɛse. (Isa. 37:​17, 33-37) Afei so, nsɛm nye video ahorow a ɔwɔ jw.org wɛbsaet no do a ɔma yehu mbrɛ Jehovah roboa hɛn nuanom a wɔwɔ hɔ ndɛ no, ibotum akenkan anaa ahwɛ bi. Bio so, ibotum akaakaa mbrɛ Jehovah esi aboa wo mber bi a abɛsen kɔ no. Sɛ Jehovah nnyɛɛ biribi a ɔyɛ nwanwa mma wo a, mma ɔnnhaw wo. Ebɛnadze ntsi a? Osiandɛ Jehovah ayɛ ndzɛmba pii dze aboa wo wɔ w’asetsena mu! Bi mpo nye dɛ ɔaboa wo ma abɛyɛ ne nyɛnko. (John 6:44) Ntsi serɛ Jehovah dɛ ɔmboa wo ma kaa mber bi a otsiee wo mpaabɔ, ɔdze mboa a ihia maa wo ber a nna woho akyer wo paa, anaa otwitwae gyee wo aber a nna irihyia ɔhaw kɛse bi no. Sɛ edwendwen nsɛm ahorow a ɔtsetse dɛm ho a, ɔbɛma enya ahotodo kɛse dɛ Jehovah bɔkɔ do ara aboa wo. w24.06 21 ¶8

Bi a yeesi hɛn bo dɛ yɛrennyɛ biribiara a ɔbɛma yɛatwe hɛnho efi Jehovah ho dze, naaso yɛyɛ nyimpa yi ara dze, ɔnyɛ dɛn ara a biribi botum asɔ hɛn ahwɛ ma yaayɛ bɔn. (Rom. 7:​21-23) Sɛ yɛannhwɛ no yie a, biribi botum asɔ hɛn ahwɛ aber a hɛn enyi nnda, na bi a ɔbɛyɛ dzen ama hɛn dɛ yɛbɛyɛ dza ɔtsen. Naaso, sɛ yɛpɛ dɛ yedzi Jehovah na ne Ba no nokwar dze a, ɔsɛ dɛ yɛdze Jesus n’afotu a ɔno nye dɛ ‘yɛnhwɛ yie na yaannkɔ nsɔhwɛ mu’ no yɛ edwuma. Hɛn nyina, biribi botum asɔ hɛn ahwɛ ma yaakɛyɛ bɔn. Naaso, ɔsor dza obotum asɔ hɛn mu biara ahwɛ. Nyimpa binom wɔ hɔ a, bɔn akɛse na ɔsɔ hɔn hwɛ. Binom so wɔ hɔ a, ndzeyɛɛ bi a no ho nntsew anaa wiadze no nsusui na ɔsɔ hɔn hwɛ. Dɛ mfatoho no, bi a binom wɔ hɔ a, ɔsɛ dɛ womia hɔn enyiwa hyɛ hɔnho do paa na wɔaammbɔ edwaman. Binom so wɔ hɔ a, ɔsɛ dɛ wɔhwɛ yie na wɔaammfa hɔnho annhyɛ ndzeyɛɛ ahorow bi a no ho nntsew mu. Dɛm ndzeyɛɛ no mu bi nye dɛ obi bɔhwɛ ponografi anaadɛ obi bɔtwetwe ne banyin anaa ɔdze ne nsa anaa biribi bɛhyehyɛ n’ase ma noho asen. Binom so wɔ hɔ a nyimpa ho suro, ahomemado, ebufuw anaa biribi fofor na ɔretseetsee hɔn. w24.07 14 ¶3; 15 ¶5

Sɛ asafo mu mpanyimfo anngye ɔbarimba bi a oenu noho ampa no ammba asafo no mu bio a, obotum ama ɔatse nka dɛn? Anaadɛ sɛ ɔsan ba asafo no mu bio, na enuanom no amma oennhu dɛ wɔdɔ no a, ehwɛ a n’enyi bɛgye a? Oho. Iyi botum ama ‘awerɛhow dodow’ amen no. Obotum ama oenya adwen dɛ orunntum nnsom Jehovah bio. Afei so, mbɔdzen a ɔrobɔ dɛ obesiesie ɔnye Nyankopɔn ntamu bio no mpo, n’abaw mu botum ebu ma oeegyaa. Dza ɔma asɛm no yɛ hu mpo nye dɛ, sɛ enuanom a wɔwɔ asafo no mu no ammfa ɔdzebɔnyɛnyi a oenu noho yi no bɔn annkyɛ no a, hɔnankasa nye Jehovah ntamu anyɛnkofa no so botum asɛɛ. Ebɛnadze ntsi na yɛreka dɛm? Siantsir no nye dɛ sɛ wɔammfa annkyɛ no a, ɔbɛkyerɛ dɛ worusuasua Satan a ne tsirmu yɛ dzen na onnyi ehumbɔbɔr no, na mbom ɔnnyɛ Jehovah a ɔdze ndzebɔnyɛfo a wonu hɔnho no bɔn kyɛ hɔn no. Ɔba no dɛm so a, nna wɔrema kwan ma Abɔnsam afa hɔn do ebu ɔbarimba no abaw mu ma oeegyaa Jehovah som.—2 Cor. 2:​10, 11; Eph. 4:27. w24.08 17 ¶7, 10-11

Christ Jesus dze hyɛɛ mbarimba binom so nsa dɛ wɔmboa asafo no wɔ kwan fofor do. Jesus maa asafo mu mpanyimfo a nna wɔwɔ Jerusalem no somaa Paul, Barnabas, nye enuanom afofor dɛ wɔnserasera asafo ahorow no dɛ ahwɛfo akwantufo. (Andw. 11:22) Ebɛnadze ntsi a? Nna asafo mu asomfo nye asafo mu mpanyimfo hyɛ asafo ahorow no dzen. Nna dɛm edwuma yi ara so na ahwɛfo akwantufo no bɛyɛ. (Andw. 15:​40, 41) Amansin do ahwɛfo nntsena fakor. Hɔn mu binom twa kwan tsentsenntsen ansaana woetum akɛsera asafo ahorow no. Dapɛn biara amansin do ahwɛfo ma ɔkasa ahorow, wɔkɛserasera enuanom no hyɛ hɔn nkuran, wɔnye akwampaafo yɛ nhyiamu, wɔnye asafo mu mpanyimfo so yɛ nhyiamu, na wɔyɛ asɛnka nhyiamu so. Afei so, wosua ɔkasa ahorow a wɔbɛma no yie, na wɔyɛ ɔmansin na ɔmantɔw ehyiadzi ahorow so ho ntotoe. Bio so, wɔkyerɛ adze wɔ akwampaafo skuul, na wɔyɛ nhyiamu tsitsir bi ma akwampaafo a wɔwɔ hɔn mansin no mu no. Bethel dze dwumadzi ahorow bi so hyehyɛ hɔn nsa, na ɔtɔ da a ɔsɛ dɛ wodzi bi ho dwuma ntsɛm. w24.10 21-22 ¶12-13

Asɛm a ndɛ daa asɛm yi gyina do yi, Jehovah na ɔdze hyɛɛ nkɔnhyɛnyi Jeremiah n’ano dɛ ɔnka. Ɔsomafo Paul risi asɛm a nkɔnhyɛnyi Jeremiah kae no do dua no, ɔkaa dɛ: “Mennkɛkaa hɔn bɔn bio.” (Heb. 8:12) Naaso dɛm asɛm no koraa, ɔkyerɛ dɛn ankasa? Sɛ Bible no dze kasafua “kaa” dzi dwuma a, ɔnnyɛ aber nyina na ɔkyerɛ dɛ obi bɔdwendwen biribi a woesi ho anaa ɔbɛkaa biribi kɛkɛ. Obotum so akyerɛ dɛ obi bɛyɛ biribi afa dza woesi no ho. Nsɛmbɔndzinyi no a nna wɔasɛn no dua do wɔ Jesus ne nkyɛn no serɛɛ no dɛ: “Jesus, sɛ eba w’Ahenman mu a, kaa me.” (Luke 23:​42, 43) Nna ɔnnyɛ dza nsɛmbɔndzinyi no pɛ dɛ ɔkyerɛ nye dɛ sɛ Jesus ba n’Ahendzi mu a ɔndwendwen no ho ara kɛkɛ, mbom nna ɔpɛ dɛ ɔyɛ biribi dze boa no. Jesus so tsiee n’adzeserɛ no na ɔmaa ohun dɛ daakye obenyan no. Ntsi sɛ Jehovah ka dɛ ɔnnkaa hɛn bɔn bio a, dza ɔkyerɛ nye dɛ ɔdze akyɛ hɛn korakora na orinngyina do mmfa nntwe hɛn aso. w25.02 10-11 ¶14-15

Nokwasɛm nye dɛ, sɛ yehu Jehovah no suban ahorow no yie, dza ɔabɔ ne tsirmu dɛ ɔbɛyɛ, dza ɔpɛ nye dza ɔmmpɛ a, ɔno kyerɛ dɛ yɛwɔ ntseasee ankasa. Dɛm ntsi bisa woho dɛ, ‘Osian dza minyim fa Jehovah ho ntsi, ebɛn gyinae na misi a ɔbɛma n’enyi agye?’ (Eph. 5:17) Ɔtɔ da a, osiandɛ yɛpɛ dɛ yɛsɔ Jehovah n’enyi ntsi, gyinae bi a yebesi no bɛma hɔn a wɔbɛn hɛn no atse nka dɛ yɛama hɔn nsa esi famu. Bi a awofo bi a wɔwɔ adwen pa bɛhyɛ hɔn ba basia dɛ kyenkyen ara a ɔnwar banyin bi a ɔwɔ sika anaa obotum etua sika kɛse dze ayɛ no ho adze. Naaso ebɔhwɛ mu no, nna dɛm banyin no mpo nnyer no ho wɔ Jehovah no som mu. Ɔyɛ nokwar dɛ wɔbɛpɛ dɛ banyin a ɔbɔwar hɔn ba no tum hwɛ no yie dze, naaso asɛm no nye dɛ, woana na ɔbɔboa hɔn ba no ma ɔaasom Jehovah yie? Jehovah n’adwen wɔ asɛm yi ho nye dɛn? Yebohu no wɔ Matthew 6:33. Dɛm kyerɛwsɛm no tu Christianfo fo dɛ ‘wɔnkɔ do nhwehwɛ Ahendzi no kan.’ Ɔwɔ mu dɛ yedzi hɛn awofo nyi na yebu hɔn a yɛnye hɔn tse hɛn mpotamu no dze, naaso dza ohia hɛn paa nye dɛ yɛbɛma Jehovah n’enyi agye. w25.01 17 ¶9-10

Ndɛ so, osian asɛmpaka edwuma a yɛreyɛ no ntsi, nkorɔfo pii soɛr tsia hɛn. Dɛm ntsi yehia Jehovah no mboa ama yeetum dze nsi akɔ do aka asɛmpa no. (Nyi. 12:17) Ebɛnadze ntsi na ibotum enya awerɛhyɛmu dɛ Jehovah bɔboa wo? Hwɛ mpaa bi a Jesus bɔe a wɔayɛ ho kyerɛwtohɔ wɔ John tsir 17 no. Jesus serɛɛ Jehovah dɛ ɔnhwɛ n’asomafo no do, na Jehovah so tsiee dɛm ebisadze no. Asomafo Ndwuma nwoma no ma yehu mbrɛ Jehovah sii boaa asomafo no ma wɔkɔr do dze nsi kaa asɛmpa no ɔmmfa ho dɛ wɔsoɛree tsiaa hɔn no. Jesus ne mpaabɔ no mu no, ɔsanee so serɛɛ Jehovah dɛ hɔn a wɔbɛgye asɛmpa a asomafo no bɛka no edzi no, ɔnhwɛ hɔn so hɔn do. Na ɔwoara so ka dɛm nkorɔfo no ho. Ndɛ na ndɛ nyina Jehovah da ho ara ritsie dɛm mpaabɔ no. Na dɛ mbrɛ ɔboaa asomafo no, ɔbɔboa woara so. (John 17:​11, 15, 20) Aka kakra ma dɛm wiadze bɔn yi aba n’ewiei, ntsi bi a ɔbɛyɛ dzen ama hɛn paa dɛ yɛbɔkɔ do dze nsi aka asɛmpa no. Naaso yebotum enya awerɛhyɛmu dɛ yebenya mboa a yehia ama yeetum akɔ do aka asɛmpa no.—Luke 21:​12-15. w25.03 18 ¶13-14

Nyankopɔn n’asomfo botum dze enyigye ‘atow ndwom’ osiandɛ hɔn enyi sɔ ndzɛmba a Jehovah yɛ ma hɔn no. Nokwasɛm a ɔhyɛ hɛn gyedzi dzen nye bɔhyɛ ahorow a ɔwɔ Nyankopɔn n’Asɛm mu a ɔkyekye hɛn werɛ, nye hɛn enyidado a osi pi a Christ no werdam afɔrbɔ no ama yeenya no ma yenya “akoma mu enyigye.” Sɛ yɛbɔ dɛm ndzɛmba yi ho nkɔmbɔ a, ɔma hɛn enyi gye paa! (Ndw. 34:8; 133:​1-3) Ɔdɔ na koryɛ a ɔwɔ Jehovah n’asomfo mu no yɛ su etsitsir ebien a ɔda edzi wɔ sunsum afamu paradise no mu. Dɛm su a ɔka hɛn bɔ mu yi ma yehu mbrɛ asetsena bɛyɛ wɔ wiadze fofor no mu no enyi do kakra. Osiandɛ dɛm aber no, ɔdɔ na koryɛ a ɔbɛtsena Jehovah n’asomfo ntamu no bɛkyɛn dza yehu no ndɛ no mpo. (Col. 3:14) Obiara a ɔpɛ dɛ onya enyigye nye akomatɔyamu ankasa no, ɔsɛ dɛ ɔba hɛn sunsum afamu paradise no mu. Ɔmmfa ho adwen a wiadze no wɔ wɔ Jehovah n’asomfo ho no, yɛwɔ dzin pa wɔ Jehovah n’enyim na hɛn nuanom so gye hɛn to mu.—Isa. 65:15. w24.04 21 ¶7-8

Ebɛnadze na hɛn nyina botum ayɛ dze aboa Christianfo a wɔpɛ dɛ wɔwar no? Kwan kor nye dɛ yɛbɔhwɛ nsɛm a yɛka kyerɛ hɔn no yie. (Eph. 4:29) Yebotum ebisa hɛnho dɛ: ‘Hɔn a wɔpɛ dɛ wɔwar no, midzi hɔn ho fɛw anaa? Sɛ muhu dɛ onua bi a ɔnnwaree nye akyerɛbaa bi a ɔnnwaree robɔ nkɔmbɔ a, minya adwen dɛ wɔpɛ hɔnho anaa?’ (1 Tim. 5:13) Afei so, ɔnnsɛ dɛ yɛma Christianfo a wɔnnwaree no tse nka dɛ osiandɛ wɔnnwaree ntsi wɔnnka nyimpa ho, wɔatɔ mu, anaa wonnyim hwee. Ndzɛmba pa a Christianfo a wɔnnwaree reyɛ wɔ asafo no mu no, sɛ yɛbɔ mbɔdzen kamfo hɔn wɔ ho a, innhu dɛ ɔbɔboa paa a? Sɛ yenya adwen dɛ onua nye akyerɛbaa bi war a, ɔbɛyɛ kama paa so ɛ? Bible no tu hɛn fo dɛ ɔnnsɛ dɛ yɛyɛ biribi a ɔbɛhaw afofor. (Rom. 15:2) Enuanom a wɔnnwaree pii wɔ hɔ a, wɔmmpɛ dɛ obi bɔhwehwɛ okun anaa ɔyer ama hɔn, na ɔsɛ dɛ yɛgye to mu na yɛtse hɔn ase. (2 Thess. 3:11) Binom so bɛpɛ dɛ afofor boa hɔn. Naaso sɛ wɔnnkaa nnkyerɛɛ hɛn dɛ yɛmboa hɔn a, ɔnnsɛ dɛ yɛyɛ biribi a ɔtse dɛm.—Mbɛ. 3:27. w24.05 24-25 ¶14-15

Yebotum ehyia ɔhaw mpofirmu wɔ wiadze a yɛtse mu yi mu. Iyi botum ama asetsena mu aayɛ dzen ama hɛn ma yaayɛ basaa anaa obotum mpo asesa hɛn asetsena koraa. Yɛda Jehovah Nyankopɔn ase paa dɛ ɔama yeehu dɛ wɔ mber a ɔtse dɛm mu no, yebotum akɔ no hɔ akɔhwehwɛ mboa. Aber biara a Jehovah bɔboa hɛn no, ɔma yenya awerɛhyɛmu dɛ ‘Jehovah tse ase!’ (Ndw. 18:46) Aber a David kaa dɛm asɛm yi no, owiei ara pɛr na ɔdze toaa do dɛ Nyankopɔn yɛ ‘no botantsim.’ Ebɛnadze ntsi na David dze Jehovah totoo ɔbotan a nkwa nnyi mu ho? Bible no dze Jehovah toto “ɔbotan” ho mbrɛ ɔbɛyɛ a yebotum atse no suban ahorow bi a ɔwɔ no ase yie. Sɛ yɛhwɛ Bible no mu a, yebohu dɛ mpɛn pii no, sɛ nna Jehovah n’asomfo riyi no ayɛw dɛ ɔnye nyame biara nnsɛ a, wɔka no ho asɛm dɛ ɔyɛ ɔbotan. Deuteronomy 32:4 nye beebi a odzi kan wɔ Bible no mu a wɔaka Jehovah ho asɛm dɛ ɔyɛ “Ɔbotan.” Aber a Hannah robɔ mpaa no, ɔkaa dɛ “ɔbotan bi nnyi hɔ a ɔtse dɛ hɛn Nyankopɔn.” (1 Sam. 2:2) Habakkuk so kaa dɛ Jehovah yɛ ‘no botan.’ (Hab. 1:12) Obi a ɔkyerɛɛw Ndwom 73 no so kaa dɛ Nyankopɔn yɛ ‘n’akoma no botan.’ (Ndw. 73:26) Afei, Jehovah nankasa so mpo kaa noho asɛm dɛ ɔyɛ ɔbotan.—Isa. 44:8. w24.06 26 ¶1, 3

Israel ahemfo a wɔyɛɛ dza Jehovah pɛ no, wofii hɔn akoma nyinara mu soom Jehovah. Bible no ka Josiah ho asɛm dɛ: ‘Ɔhen biara enndzi n’enyim a ɔtse dɛ ɔno a ɔdze n’akoma nyinara, na ɔnye ne kra nyinara danee baa Jehovah nkyɛn.’ (2 Ahe. 23:25) Solomon a ekyir yi ɔyɛɛ bɔn no so ɛ? Bible no kaa no ho asɛm dɛ nna ‘n’akoma nndzi mu.’ (1 Ahe. 11:4) Ɔhen Abijam so enndzi Jehovah nokwar. Bible no ka no ho asɛm dɛ: ‘N’akoma enndzi mu wɔ Jehovah ne Nyankopɔn enyim.’ (1 Ahe. 15:3) Sɛ Bible no dze kasafua “akoma” dzi dwuma a, mpɛn pii no, ɔkyerɛ mbrɛ obi si tse ankasa. Obotum ayɛ dza nyimpa no n’enyi gye ho, dza ɔdwendwen ho, mbrɛ osi yɛ n’adze, no suban, dza otum yɛ, dza okenyan no ma ɔyɛ biribi, anaa dza ɔdze esisi n’enyi do. Sɛ wɔka dɛ obi efi n’akoma nyinara mu rosom Jehovah a, ɔkyerɛ dɛn? Obi a oefi n’akoma nyinara mu rosom Jehovah no, ɔnnyɛ dɛ obiara rosom Jehovah ntsi na ɔno so rosom no bi. Mbom ɔsom Jehovah osiandɛ ɔdɔ no paa na obu no, na ɔyɛ dɛm no nkwa nda nyinara. w24.07 21 ¶4-5

Jehovah yɛɛ ntotoho bi so a ɔma yɛtse mbrɛ osi pepa hɛn bɔn no ase. Ɔkaa dɛ: ‘Mebɛpepa wo mbrato tse dɛ mbrɛ mununkum akata do na wo ndzebɔn tse dɛ mbrɛ mununkum kumbɔɔ akata do.’ (Isa. 44:22) Sɛ Jehovah dze hɛn bɔn kyɛ hɛn a, ɔtse dɛ mbrɛ ɔdze mununkum kumbɔɔ akata do. Sɛ ɔyɛ dɛm a, bɔn no yew korakora; yennhu no bio. Dɛmara na Jehovah so nnhu no bio. Ebɛnadze na yesua fi dɛm ntotoho ahorow yi mu? Sɛ Jehovah dze hɛn bɔn kyɛ hɛn a, ɔnnsɛ dɛ yɛma hɛn tsibowa kɔ do ara bu hɛn fɔ. Jehovah dze ne Ba Jesus Christ no bɔgyaa no apepa hɛn bɔn korakora. Sɛ Jehovah yɛ dɛm a ɔtse dɛ mbrɛ yɛannyɛ bɔn no mpo. Iyi ma yehu dɛ sɛ yɛyɛ bɔn na yenu hɛnho na Jehovah ka dɛ ɔdze akyɛ hɛn a, nna ɔdze akyɛ hɛn korakora. Afei so, sɛ ɔyɛ dɛm a, ɔma yɛnye no ntamu yɛ kamakama bio. Bio so, sɛ Jehovah ka dɛ ɔdze hɛn bɔn akyɛ hɛn a, ɔnnsɛ dɛ yɛma hɛn tsibowa kɔ do ara bu hɛn fɔ. w25.02 10 ¶11-14

Sɛ obi yɛ bɔn wɔ asafo no mu a, Jehovah hwɛ kwan dɛ asafo mu mpanyimfo a wobeyi hɔn dɛ wɔmboa no no bɔkɔ do ara ahwɛ ma asafo no ho aatsew. (1 Cor. 5:7) Na mpanyimfo no so pɛ dɛ wɔyɛ dza wobotum biara dze boa obi a ɔayɛ bɔn no mbrɛ ɔbɛyɛ a obonu noho. Dɛm ntsi sɛ wɔroboa obi a, wɔwɔ awerɛhyɛmu dɛ nyimpa no bonu noho. Ebɛnadze ntsi a? Osiandɛ wɔpɛ dɛ wosuasua Jehovah, Nyankopɔn a ɔwɔ ‘ayamuhyehye nye ehumbɔbɔr no.’ (Jas. 5:11) Dɛmara na ɔsomafo John so yɛe. Nna ɔdɔ no nuanom Christianfo no, ntsi ɔkyerɛɛw dɛ: “Me mba nkakraba, merekyerɛw iyinom abrɛ hom ama hom aannyɛ bɔn. Na sɛ obi yɛ bɔn a, yɛwɔ ɔkasamaafo a otwitwa gye hɛn wɔ Egya no nkyɛn, ɔno nye Jesus Christ, ɔtseneneenyi no.” (1 John 2:1) Naaso, awerɛhosɛm nye dɛ, ɔtɔfabi a Christiannyi bi a ɔayɛ bɔn no runnu noho. Sɛ ɔba no dɛm a, ɔsɛ dɛ woyi no fi asafo no mu. w24.08 25 ¶19-20

Bi a ebɛyɛ dɛ edze dza itum yɛ no rototo dza afofor tum yɛ ho. Naaso ɔnnsɛ dɛ eyɛ dɛm! Ebɛnadze ntsi a? Osiandɛ Jehovah mmfa hɛn nntoto afofor ho. (Gal. 6:4) Dɛ mfatoho no, Mary dze ngo huahuam bi a no bo yɛ dzen paa kyɛɛ Jesus. (John 12:​3-5) Naaso, okunafo hianyi no dze nkapɛrmba ebien a ɔnnsom bo ahen biara yii ntoboa wɔ asɔrfie hɔ. (Luke 21:​1-4) Naaso, Jesus ammfa Mary anntoto okunafo hianyi no ho, mbom ohun dɛ hɔn beenu no nyina yɛɛ biribi dze kyerɛɛ dɛ wɔwɔ gyedzi. N’Egya Jehovah so, biribiara a yɛyɛ ma no no, sɛ ɔyɛ hɛn dɛ osuar koraa mpo a, n’enyi sɔ paa osiandɛ onyim dɛ yɛdɔ no na yɛwɔ no mu gyedzi. Ɔtɔ da a, hɛn nyina adwen mu tum yɛ hɛn konsee. Naaso, Nyankopɔn n’Asɛm Bible no botum aboa hɛn ma yeedzi do. Sɛ ɔba no dɛm a, ɔremma ennyɛ basaa, na mbom ɔbɔboa wo ma eesi w’adwen pi. Jehovah nyim wo yie paa. N’enyi sɔ ndzɛmba a edze abɔ afɔr mbrɛ ɔbɛyɛ a edze no som bedzi kan wɔ w’asetsena mu no, na ɔahyɛ bɔ dɛ obotua wo kaw. Jehovah dɔ n’asomfo anokwafo nyina na ɔdwen hɔn ho so. w24.10 25 ¶3; 29 ¶17-18