Asɛm a Solomon kae yi ma yehu dza obotum ato Jehovah n’asomfo nyina. Obi botum ayɛ bɔn kɛse bi na ekyir yi oeenya adwen dɛ ɔannhyɛ da ara. Obotum mpo aka dɛ, “Mennhu dza ɔyɛe, m’enyi baa moho do no nna mayɛ bɔn.” Naaso ekyir yi, sɛ ɔdwen asɛm no ho yie a, bi a obohu dɛ anamɔn ahorow bi a otutui no na ɔmaa ɔkɛyɛɛ bɔn no. Bi a ɔkɛfaa hɔn a hɔn suban nnyɛ nyɛnko, ɔdze biribi a ɔmmfata gyegyee n’enyi, ɔhwɛɛ ndzɛmba ahorow bi a ɔmmfata wɔ intanɛt do anaa ɔkɔr mbea ahorow bi a ɔmmfata dɛ Christiannyi kɔ. Bi so a nna oegyaa mpaa bɔ, ɔnnkenkan Bible no, ɔnnkɔ asafo nhyiamu anaa ɔnnkɔ asɛnka. Ebɔhwɛ mu paa no, nna n’asɛm no akɛyɛ tse dɛ aberantsɛ a Mbɛbusɛm nwoma no ka no ho asɛm no. Ɔnnyɛ dɛ dɛm nyimpa no soɛree ara na ɔkɛyɛɛ bɔn no, mbom anamɔn ahorow bi a otutui no na ɔmaa ɔkɛyɛɛ dɛm. Ebɛnadze na yebotum esua efi asɛm yi mu? Ɔnnyɛ bɔn nkotsee na ɔsɛ dɛ yɛtwe hɛnho fi ho, mbom biribiara a obotum asɔ hɛn ahwɛ no so, ɔsɛ dɛ yɛtwe hɛnho fi ho. Nna dɛm esuadze yi ara na Solomon pɛ dɛ yɛhyɛ no nsew.—Matt. 5:​29, 30. w24.07 16 ¶10-11

Ebɛnadze nye dɛm akoradze no? Ɔno nye Ahendzi asɛmpaka edwuma a ɔgye nkorɔfo nkwa no. (2 Cor. 4:1) Na ebɛnadze so nye dɛtse awendze no? Ɔno so gyina hɔ ma Nyankopɔn n’asomfo a wɔka asɛmpa no kyerɛ afofor no. Paul n’aber do no, nna eguadzifo dze ndzɛmba bi a ɔsom bo tse dɛ edziban, nsa na sika hyɛ kutu mu dze tu kwan. Dɛmara na hɛn so, Jehovah dze asɛmpa a ɔsom bo no ahyɛ hɛn nsa dɛ yɛnkɛka nkyerɛ nkorɔfo. Ntsi Jehovah bɔboa hɛn ma yeenya ahoɔdzen na yaakɔ do aka asɛmpa no. Ɔtɔ da a, nyimpa ho suro ntsi yɛbɛtse nka dɛ worinntsie hɛn wɔ asɛnka mu. Naaso yebesi dɛn edzi suro a ɔtse dɛm do? Aber a wɔhyɛɛ asomafo no dzendzenndzen dɛ mma wɔnnka asɛmpa no, wɔamma asɛm a wɔkaa kyerɛɛ hɔn no ammbɔ hɔn hu ma woenngyaa asɛmpa no ka. Mbom wɔbɔɔ mpaa serɛɛ Jehovah dɛ ɔmboa hɔn ma wɔnkɔ do mfa akokodur nka n’asɛm no. Amonmu hɔ ara na Jehovah buaa hɔn mpaabɔ no. (Andw. 4:​18, 29, 31) Woara so, ɔtɔ da na sɛ nyimpa ho suro hyɛ wo do a, ɔyɛ a serɛ Jehovah dɛ ɔmma ɔdɔ a ewɔ ma nyimpa no nyɛ kɛse mbrɛ ɔbɛyɛ a irunnsuro dɛ ebɛka asɛmpa no akyerɛ hɔn. w24.04 16 ¶8-9

Osiandɛ yɛdɔ Jehovah ntsi yɛyɛ biribi dze tsew ne dzin ho. Atorsɛm a Satan aka dze egu Jehovah ne dzin ho fi no, yɛpɛ dɛ obiara hu dɛ ɔnnyɛ nokwar. (Gen. 3:​1-5; Job 2:4; John 8:44) Sɛ yɛnam asɛnka mu a, yɛayɛ krado dɛ yɛbɛka Nyankopɔn ho nokwasɛm akyerɛ obiara a obetsie no. Yɛpɛ dɛ obiara hu dɛ Nyankopɔn no su tsitsir nye ɔdɔ, na kwan a ɔfa do dzi tum no yɛ papa na asɛm biara nnyi ho. Afei so, yɛpɛ dɛ wohu dɛ n’Ahendzi no beyi amandzehu nyina efi hɔ na ɔbɛma adasamba asomu adwe hɔn na hɔn enyi aagye. (Ndw. 37:​10, 11, 29; 1 John 4:8) Sɛ yɛka dɛm nokwasɛm yi a ɔfa Jehovah ho no kyerɛ nkorɔfo a, nna yɛretsew ne dzin ho. Afei so, ɔma hɛn akoma tɔ hɛn yamu, osiandɛ yenyim dɛ dzin a ɔda hɛn do no ho edwuma ara na yɛreyɛ no. w24.05 18 ¶12