April

Sɛ yebotum enya Jesus no honam na no bɔgyaa no do mfaso a, ɔsɛ dɛ yenya gyedzi wɔ no werdam afɔrbɔ no mu. (Eph. 1:7) Hɔn a Jesus frɛɛ hɔn “nguan fofor” no, sɛ wɔkɔ Ewuradze Ewimbir Edzidzi no ase afe biara a, wonndzi paanoo no na wɔnnom wenyin no so bi, na ɔyɛ no kwan do so. (John 10:16) Naaso wonya Jesus Christ no honam na no bɔgyaa no do mfaso. Ntsi sɛ wonya Jesus no werdam afɔrbɔ no mu gyedzi a, nna ɔkyerɛ dɛ woridzi no honam na wɔronom no bɔgyaa no. (John 6:53) Naaso hɔn a wodzi paanoo no na wɔnom wenyin no bi no, wɔyɛ dɛm dze kyerɛ dɛ wɔka apam fofor no ho, na wɔwɔ enyidado dɛ daakye wobedzi adze wɔ ɔsor Ahendzi no mu. Dɛm ntsi, dɛ yɛka hɔn a wɔasera hɔn no ho anaadɛ yɛka nguan fofor no ho no, ohia paa dɛ yenya werdam afɔrbɔ no mu gyedzi kɛse, na sɛ yɛyɛ dɛm a, yebenya onnyiewiei nkwa. w24.12 13 ¶14, 16

Aber a Jesus dze Ewuradze Ewimbir Edzidzi no risi hɔ no, ɔdze paanoo a ɔnnkawee maa n’asomafo no na ɔkaa kyerɛɛ hɔn dɛ ogyina hɔ ma ne nyimpadua. Afei ɔdze wenyin no maa hɔn, na ɔkaa dɛ ogyina hɔ ma ‘bɔgya a wɔdze reyɛ apam no.’ (Mark 14:​22-25; Luke 22:20; 1 Cor. 11:24) Jesus frɛɛ dɛm apam yi apam fofor. Jehovah nye ‘sunsum afamu Israel fie’ no nkotsee yɛɛ dɛm apam yi. Dɛm Israel fie yi gyina hɔ ma hɔn a wɔnye Jesus bɔbɔ mu edzi adze “wɔ Nyankopɔn n’Ahendzi no mu” no. (Heb. 8:​6, 10; 9:15) Asɛm a Jesus kae wɔ Ewuradze Ewimbir Edzidzi no ase no, nna ɔfa “nguankuw ketseaba” no ho. Hɔn a wodzi kan a nna wɔwɔ dɛm kuw kakraba yi mu nye n’asomafo anokwafo a nna wɔnye no wɔ dan mu hɔ no. Dɛm kuw yi nye hɔn a wɔnye Jesus bedzi adze wɔ sor no. w24.12 11 ¶9-10

Woyii Jesus mae, wɔkyeer no, wɔhyehyɛɛ no ahorba, wotwaa asɛm too no do, wobuu no kumfɔ na wɔyɛɛ no ayakayakadze so kaa ho. Afei, asogyafo dze no kɔr beebi a woboku no no, na wɔbɔɔ no asɛndua mu. Jesus miaa n’enyi faa dɛm atseetsee yi nyina mu. Aber a Jehovah hun dza nna wɔdze reyɛ Jesus no, ɔyɛɛ no yaw paa. Yaw a Jehovah faa mu no dze, nna ɔkyɛn Jesus nedze no mpo. Jehovah yɛ tum nyina wura, ntsi nkyɛ obotum agye Jesus naaso ɔannyɛ. Ebɛnadze ntsi a? Ɔnnyɛ biribiara o, ɔyɛ ɔdɔ ntsi a. Jesus no wu afɔrbɔ no yɛ adanse tsitsir a ɔkyerɛ dɛ Jehovah dɔ wo paa. Ɔwodze hwɛ o, Jehovah faa yaw pii mu. Siantsir no ara nye dɛ, ɔpɛ dɛ ɔgye wo fi bɔn na owu mu. (1 John 4:​9, 10) Nokwasɛm nye dɛ, ɔpɛ dɛ ɔboa hɛn mu biara ma yedzi bɔn do konyim! w24.08 6 ¶13-14

Sɛ yɛdwendwen yaw a Jehovah faa mu ana orutua werdam no ho a, ɔbɛma yɛatse mbrɛ Jehovah si dɔ hɛn no ase yie paa. Satan se Nyankopɔn no somfo biara nnyi hɔ a ɔbɔkɔ do edzi no nokwar aber a oruhu amandze no. Naaso Jehovah maa kwan ma Jesus hun amandze ansaana oruwu ama obiara eehu dɛ sombo a Satan abɔ no nnyɛ nokwar. (Job 2:​1-5) Jesus n’atamfo dzii no ho fɛw, asogyafo hwee no, na wɔbɔɔ no asɛndua mu. Afei, Jehovah no Dɔba no wui yayaayaw. Iyi nyina nna Jehovah n’enyi tua. (Matt. 27:​28-31, 39) Nkyɛ Jehovah botum etwa amandze a nna Jesus ruhu no nyina do. (Matt. 27:​42, 43) Naaso sɛ Jehovah dze noho gyee asɛm no mu a, nkyɛ hɛn nsa rennka werdam no. Na sɛ ɔbaa no dɛm so a, nkyɛ yennyi enyidado biara. Ntsi Jehovah maa kwan ma ne Ba no faa atseetsee mu kesii dɛ owui. w25.01 22 ¶7

Nna ɔyɛ Nisan 16, 33 H.B. Nna Jesus n’esuafo no werɛ ahow. Afei so nna wɔabɔ hu. Nna hɔn mu beenu efi Jerusalem na wɔdze hɔn enyi akyerɛ Emmaus. Ɔbarimba bi bɔtoo hɔn wɔ kwan do, na ɔnye hɔn bɔɔ mu nantsewee. Esuafo no kaa awerɛhosɛm a nna wɔato Jesus no kyerɛɛ no. Afei ɔbarimba no nye hɔn bɔɔ nkɔmbɔ bi a nna hɔn werɛ rimmfir da. ‘Ɔhyɛɛ ase fii dza Moses na nkɔnhyɛfo nkaa no nyina kyerɛwee’ no do kyerɛkyerɛɛ siantsir a nna ɔsɛ dɛ Messiah no hu amandze na owu no mu. Aber a mbarimba baasa no dur Emmaus no, ɔbarimba a ɔbɛkaa hɔnho no maa wohun dɛ ɔno nye Jesus a Nyankopɔn enyan no efi ewufo mu no. (Luke 24:​13-35) Ndafua 40 a otwa tun a Jesus dzii wɔ asaase yi do no, oyii noho edzi kyerɛɛ n’esuafo no mpɛn pii. Dɛm mber no mu no, Jesus hyɛɛ n’esuafo a nna hɔn werɛ ahow na hɔn akoma so etu no nkuran. Dza ɔyɛe no maa hɔn enyi gyee na wɔdze akokodur kaa Nyankopɔn n’Ahendzi ho asɛmpa kyerɛɛ nkorɔfo na wɔkyerɛkyerɛɛ hɔn. w24.10 12 ¶1-3

Sɛ wɔwo abofra a, ɔnyɛ dɛn ara a obenyin, naaso ɔnntse dɛm wɔ yɛnye Jehovah ntamu anyɛnkofa no mu. Sɛ Christiannyi bi noho botum akokwaa a, ɔmmba ara kwa. Dɛ nhwɛdo no, enuanom a nna wɔwɔ Corinth no gyee asɛmpa no dzii, wonumaa hɔn, wonyaa sunsum krɔnkrɔn, na wosuaa pii fii dza ɔsomafo Paul dze kyerɛkyerɛɛ hɔn no mu. (Andw. 18:​8-11) Naaso mfe pii wɔ hɔn enuma ekyir no, nna hɔn mu pii da ho ara yɛ mbɔtoaba wɔ Jehovah no som mu. (1 Cor. 3:2) Sɛ hɛnho botum akokwaa a, ɔsɛ dɛ yedzi kan nya ɔpɛ dɛ yɛbɛyɛ ndzɛmba a ɔbɛma hɛnho akokwaa. Hɔn a ‘wɔpɛ ntsetsekwaadze,’ kyerɛ dɛ, hɔn a wɔpɛ dɛ wɔkɔ do yɛ mbofra wɔ Nyankopɔn no som mu no, hɔnho runntum nnkokwaa da. (Mbɛ. 1:22) Yɛmmpɛ dɛ yɛyɛ tse dɛ hɔn a wɔayɛ mpanyimfo naaso wɔ da ho ara pɛ dɛ hɔn awofo sisi gyinae ma hɔn no. Mbom hɛnankasa na ɔsɛ dɛ yɛbɔ mbɔdzen dɛ yɛbɛma yɛnye Jehovah ntamu ebusuabɔ no mu ayɛ dzen. Sɛ erobɔ mbɔdzen dɛ ebɛma woho akokwaa a, bɔ mpaa serɛ Jehovah dɛ ɔmma nya ‘ɔpɛ nye ahoɔdzen a edze bɛyɛ.’—Phil. 2:13. w24.04 4 ¶9-10

Jehovah ma yehu mbrɛ osi tse nka wɔ hɔn a obu hɔn atsɛn no ho. (Ezek. 33:11) Jehovah rennsɛɛ nyimpa bi korakora gyedɛ oehu dɛ ɔwɔ siantsir papabi. Ehumbɔbɔr ahyɛ Jehovah ma, na aber biara a ohu dɛ ohia dɛ ɔda no edzi no, ɔyɛ no dɛm. Hɔn a worinnya owusoɛr no, ebɛnadze na yenyim fa hɔn ho? Hɔn mu kakraabi na Bible no ka hɔn ho asɛm. Jesus maa ɔdaa edzi dɛ Judas Iscariot rinnya owusoɛr. (Mark 14:21; hwɛ John 17:12 na no ho nkyerɛkyerɛmu no so.) Siantsir nye dɛ, nna onyim paa dɛ Jehovah Nyankopɔn nye ne Ba no mmpɛ dza ɔreyɛ no, naaso ɔhyɛɛ da ara yɛe. (Hwɛ Mark 3:29 na no ho nkyerɛkyerɛmu no.) Afei so, Jesus kaa dɛ nyamesom mpanyimfo a wɔtaan n’enyi no rinnya owusoɛr. (Matt. 23:33; hwɛ John 19:11 nye kasafua “nyimpa” no ho nkyerɛkyerɛmu no.) Bio so, ɔsomafo Paul bɔɔ kɔkɔ dɛ awaafo a wonnu hɔnho no rinnya owusoɛr.—Heb. 6:​4-8; 10:29. w24.05 4 ¶10-11

Sɛ yɛkɔ do takyer Jehovah ho na sɛ Satan tu n’enyi si hɛn do dɛ dɛn ara mpo a, dza obotum dze ayɛ hɛn no renntsena hɔ afebɔɔ. (1 John 3:8) Jehovah no wiadze fofor no mu no, ɔbɔkɔ do abɔ n’anyɛnkofo anokwafo ho ban efi biribiara a ɔbɛsɛɛ wɔnye ne ntamu no ho. Afei so, obeyi owu efi hɔ korakora. (Nyi. 21:4) Ɔyɛ hɛn dɛw paa dɛ yɛabɔsoɛ Jehovah ne ntamadan mu. Nokwasɛm nye dɛ, yebotum nye no enya ebusuabɔ daa. (Ezek. 37:27) Naaso sɛ yɛpɛ dɛ yɛkɔ do tsena Jehovah ne ntamadan no mu a, ebɛnadze na ɔsɛ dɛ yɛyɛ? Sɛ ekɔ obi ne fie a, ɔsɛ dɛ ihu dza nyimpa no pɛ dɛ eyɛ nye dza ɔmmpɛ. Hɛn so, yɛpɛ dɛ yehu dza Jehovah hwehwɛ fi hɔn a wɔpɛ dɛ wɔtsena ne ntamadan no mu no hɔ. Ɔdɔ a yɛwɔ ma Jehovah no kenyan hɛn ma yɛyɛ dza yebotum biara dze ‘sɔ n’enyi koraa.’ (Col. 1:10) Ɔnnsɛ dɛ hɛn werɛ fir da dɛ yɛdze obu kɛse bɛma Jehovah aber nyina. Obu a ɔtse dɛm no bɔboa hɛn amma yaannyɛ biribi a Jehovah kyir. Yɛpɛ dɛ yɛbrɛ hɛnho adze na yɛnye Nyankopɔn nantsew aber nyina.—Mic. 6:8. w24.06 4 ¶8-9

Jehovah kaa kyerɛɛ Abraham dɛ ɔmfa ne ba Isaac mbɔ afɔr mma no. Bi a dza Jehovah kaa kyerɛɛ no dɛ ɔnyɛ no haaw no na ɔmaa ɔyɛɛ basaa. Naaso, nna ɔayɛ krado dɛ obetsie no. Aber a ɔyɛɛ dɛ oruboku ne ba no ara na Nyankopɔn kaa kyerɛɛ no dɛ ongyaa. Naaso, Abraham n’asɛm no ma nyimpa a wɔgye Nyankopɔn dzi no nyina hu nokwasɛm tsitsir bi. Ɔno nye dɛ, nna Jehovah so ayɛ krado dɛ daakye ɔdze nankasa no Dɔba no bɔbɔ afɔr ama hɛn osiandɛ ɔdɔ hɛn paa. (Gen. 22:​1-18) Mfe pii ekyir no, Jehovah dze Moses Mbra no maa Israelfo no. Dɛm Mbra no mu no, nna ɔsɛ dɛ Nyankopɔn no nkorɔfo no dze mbowa ahorow bɔ afɔr dze pata hɔn bɔn. (Lev. 4:​27-29; 17:11) Afɔr ahorow a nna wɔbɔ no maa ɔdaa edzi dɛ, nna Jehovah bɔbɔ afɔr kɛse bi daakye. Nna dɛm afɔrbɔ no bɛgye adasamba efi bɔn mu. Nyankopɔn maa no nkɔnhyɛfo no kae too hɔ dɛ, asenyi a wɔahyɛ no ho bɔ no bohu amandze na woeeku no. Ekyir yi, ɔbɛdaa edzi dɛ Nyankopɔn no Dɔba no nye dɛm asenyi no. Nna Jehovah dze nankasa no Dɔba no bɔbɔ afɔr dze agye adasamba efi bɔn na owu mu. Na woara so ka ho bi!—Isa. 53:​1-12. w24.08 4 ¶7-8

Sɛ ekenkan Bible no a, bɔ mbɔdzen fa dza ekenkan no bɔ wo bra. Sɛ ekenkan Nyankopɔn n’Asɛm no a, bisa woho dɛ: ‘Mibesi dɛn dze dza makenkan yi ayɛ edwuma ndɛ anaa daakye bi?’ Ɔwodze ma yɛmfa no dɛ erekenkan asɛm a ɔwɔ 1 Thessalonicafo 5:​17, 18. Sɛ ekenkan wie a, ibotum egyina kakra, na adwendwen mpɛn dodow a ebɔ mpaa nye nsɛm a eka wɔ wo mpaabɔ mu no ho. Afei so, ibotum adwendwen ndzɛmba a Jehovah ayɛ ama wo a w’enyi sɔ no ho. Ibotum mpo dze esi w’enyi do dɛ, ebɛda Jehovah ase wɔ ndzɛmba ebiasa bi a ɔayɛ ama wo no ho. Dza ɔwɔ mu nye dɛ, sɛ edze ber kakraabi mpo dwendwen dza akenkan no ho a, ɔbɛma ayɛ Nyankopɔn n’Asɛm no tsiefo nye ne yɛfo. Na sɛ da biara ekenkan Bible no, edwendwen ho, na edze dza isua fi mu no yɛ edwuma a, ɔbɛma asom Nyankopɔn yie. w24.09 4-5 ¶9-10

Jehovah bɔɔ hɛn wɔ kwan soronko bi do. Ɔwɔ mu, sɛ nkorɔfo kyɛ hɛn adze a hɛn enyi gye, naaso sɛ yɛkyɛ nkorɔfo adze a, hɛn enyi gye paa. Sɛ yɛboa hɛn nuanom Christianfo a, ɔma hɛn enyi gye. Na sɛ wɔkyerɛ dza yɛayɛ ama hɔn no ho enyisɔ a, ɔma hɛn enyi gye paa. Naaso, sɛ wɔkyerɛ dza yɛayɛ ama hɔn no ho enyisɔ o, sɛ wɔannkyerɛ ho enyisɔ o, hɛn enyi botum agye osiandɛ yenyim dɛ yɛayɛ dza ɔfata. Mma wo werɛ mmfir dɛ, biribiara a edze bɛkyɛ no, ‘Jehovah botum ama wo dza ɔdɔɔ so sen dɛm.’ (2 Mber. 25:9) Asɛm no ara nye dɛ, yerunntum nnkyɛ adze nnkyɛn Jehovah. Na sɛ Jehovah nankasa so tua hɛn kaw a, enyigye dze, yɛbɛfa no kwa. Dɛm ntsi, hom mma yensi hɛn bo dɛ yɛbɔkɔ do ara esuasua hɛn sor Egya a ne tsirmu nnyɛ dzen no. w24.09 31 ¶20-21

Jehovah wɔ ehumbɔbɔr nye ayamuhyehye. (Ndw. 103:13; Isa. 49:15) Ɔma hɛn asɛm yɛ n’asɛm; sɛ yedzi yaw a, noara so dzi yaw. (Zech. 2:8) Ɔfa hɛn nyɛnko, na ɔmma ɔnnyɛ dzen mma hɛn dɛ yɛbɔtwe abɛn no. (Ndw. 25:14; Andw. 17:27) Afei so, ɔbrɛ noho adze. Bible no ka dɛ: ‘Ɔbɔ no mu adze hwɛ ndzɛmba a ɔwɔ sor na ase, ɔma ɔbɔbɔnyi do fi huntuma mu.’ (Ndw. 113:​6, 7) Suban ahorow a ɔyɛ fɛw a hɛn Nyame kɛse wɔ yi, ehwɛ a ɔnnsɛ dɛ ɔka hɛn ma yɛhyɛ no enyimnyam anaa? Yɛhyɛ Jehovah enyimnyam osiandɛ yɛpɛ dɛ nkorɔfo so hu no. Nyimpa pii nnyim nokwasɛm a ɔfa Jehovah ho. Ebɛnadze ntsi a? Siantsir nye dɛ, Satan akeka atorsɛm a ɔyɛ hu afa Jehovah ho dze efura dɛm nkorɔfo yi hɔn adwen enyi. (2 Cor. 4:4) Satan adaadaa nkorɔfo ma wɔagye edzi dɛ sɛ wɔyɛ Jehovah bɔn a, ɔremmfa nnkyɛ hɔn da, Jehovah nndwen nyimpa ho, na afei so, wiadze yi mu haw no mu fa kɛsenara fi Jehovah. Naaso hɛn dze, yenyim hɛn Nyankopɔn no ho nokwasɛm! Yeenya hokwan dɛ yɛbɔboa nkorɔfo ma woeebohu nokwar a ɔwɔ asɛm no mu, na sɛ yɛyɛ dɛm a, ɔbɔboa hɔn ma woeebohu Nyamekor a Jehovah yɛ na wɔaahyɛ no enyimnyam.—Isa. 43:10. w25.01 3 ¶6-7

Ɔmmfa ho dɛ nna Jesus yɛ Nyankopɔn ne Ba a bɔn biara nnyi no ho, na ɔyɛɛ anwanwadze akɛseakɛse mpo no, Satan maa nkorɔfo kekaa atorsɛm pii faa no ho. Dɛ nhwɛdo no, nyamesom mpanyimfo no kaa kyerɛɛ nkorɔfo dɛ Jesus nam “mbɔnsam hɔn panyin” do na otu mbɔnsam. (Mark 3:22) Aber a woridzi n’asɛm no, nyamesom mpanyimfo no bɔɔ no sombo dɛ ɔaka ebususɛm, na wotutui guu nyimpadodow no asomu dɛ wɔmma wonku no. (Matt. 27:20) Ekyir yi, aber a Christianfo no reka asɛmpa no, hɔn atamfo ‘kenyaan amanamamfo no, na wɔmaa wonyaa Christianfo no ho adwembɔn’ na wɔsoɛree tsiaa hɔn dzendzenndzen. (Andw. 14:​2, 19) December 1, 1998 Ɔweɔn-Aban no kyerɛkyerɛɛ Asomafo Ndwuma 14:2 no mu dɛ: “Aber a Jewfo asoɛrtsiafo no poow asɛm no, wɔamma annso hɔ ara, mbom no wɔhyɛɛ ase sɛɛ Christianfo no hɔn dzin, na wɔbɔɔ mbɔdzen dɛ wɔbɛma Amanamamfo no so enya Christianfo no ho adwembɔn.” Ndɛ na ndɛ nyina, Satan da ho ara ‘redaadaa wiadze nyina.’ w24.04 11 ¶15-16

Sɛ obi botum atsena ase daa a, onngyina ber a dɛm nyimpa no bowu no do. Jehovah dze, ɔyɛ Ɔtsɛmbuafo a asɛm biara nnyi n’atsɛmbu ho. Sɛ ɔka dɛ obi edzi fɔ a, oedzi fɔ na ɔka dɛ edzi bem so a, ɔyɛ nokwar. (Ndw. 33:​4, 5) Ntsi yebotum enya awerɛhyɛmu dɛ ‘asaase nyinara Ɔtsɛmbuafo’ no bɛyɛ dza ɔtsen aber nyina. Bio so, yebotum aka dɛ, sɛ obi benya hokwan atsena ase daa a, onngyina beebi a ɔtse do. Jehovah rummbu nyimpa ɔpepem pii a osian beebi a nna wɔtse ntsi woennya hokwan anntse Ahendzi ho asɛm no atsɛn dɛ wɔyɛ “mpɔnkye” da. (Matt. 25:46) Asaase nyinara Ɔtsɛmbuafo a ɔtsen no dwen dɛm nkorɔfo yi ho kyɛn hɛn koraa. Yennyim mbrɛ Jehovah bɛdandan ndzɛmba wɔ ahohiahia kɛse no mu. Bi a sɛ Jehovah wosow noho dze tsew ne dzin ho ma amanaman nyina hu a, ɔno bɛma binom esua no ho adze, wɔaagye no edzi, na woeekegyina n’afa.—Ezek. 38:16. w24.05 12 ¶14-15

Jehovah n’asomfo dze, hɔn enyi gye ho dɛ wɔbɔboa hɔnho. (2 Cor. 8:4) Naaso ɔtɔ da a, ɔsɛ dɛ wonya akokodur ansaana woetum ayɛ dɛm. Dɛ mfatoho no, sɛ ɔko si a, asafo mu mpanyimfo nyim dɛ enuanom behia nkuranhyɛ, na bi a wobehia Bible nye Bible ho nwoma ahorow. Bi so a wobehia edziban, ntar, beebi a wɔbɛda nye ndzɛmba afofor bi so. Asafo mu mpanyimfo dɔ hɔn nuanom Christianfo, ntsi sɛ ɔsɛ dɛ wɔdze hɔn nkwa to esian mu dze boa hɔn mpo a, wɔayɛ krado dɛ wɔbɛyɛ dɛm. Mber a ɔtse dɛm mu no, no ho behia paa dɛ yɛyɛ kor. Sɛ Bethel dze akwankyerɛ bi ba a, bɔ mbɔdzen fa yɛ edwuma. (Heb. 13:17) Ɔsɛ dɛ asafo mu mpanyimfo taa susu atoyerɛnkyɛm ho nhyehyɛɛ a wɔayɛ wɔ hɔn asafo mu no ho. Afei so, dza ahyehyɛdze no aka dɛ yebotum ayɛ wɔ atoyerɛnkyɛm ber mu no, ɔsɛ dɛ wɔtaa susu ho. (1 Cor. 14:​33, 40) Nya akokodur naaso hwɛ woho yie. (Mbɛ. 22:3) Ansaana ebɛyɛ biribi no, dwen ho yie. Mma nnyɛ biribi a ɔdze wo nkwa bɔto esian mu. Fa woho to Jehovah do. Nya awerɛhyɛmu dɛ aber a eroboa enuanom no, ɔbɔbɔ wo ho ban. w24.07 4 ¶8; 5 ¶11

Nna Ɔhen David nyim Jehovah yie ntsi ɔdze noho too no do. Mber ahorow bi a nna Ɔhen Saul na David n’atamfo binom repɛ no eku no no, David bɔɔ Jehovah mpaa na ɔserɛɛ no dɛ ɔmboa no. Nyankopɔn tsiee David ne mpaabɔ no na ɔgyee no. Ekyir yi, David kaa dɛ: ‘Jehovah tse ase!’ (Ndw. 18:46) Nna David repɛ akyerɛ dɛn? Bible ho nhwehwɛmu nwoma bi ka dɛ, nna David pɛ dɛ ɔkyerɛ dɛ ɔwɔ Jehovah mu ahotodo dɛ “ɔyɛ nyame a ɔtse ase a otwitwa gye no nkorɔfo aber nyina.” Dza David faa mu wɔ n’asetsena mu no maa ohun dɛ Nyankopɔn tse ase. Iyi maa osii no bo dɛ ɔbɔkɔ do ara asom Jehovah na oeyi no ayɛw. (Ndw. 18:​28, 29, 49) Sɛ yɛgye to mu dɛ Jehovah yɛ Nyankopɔn tseasefo a, ɔbɔboa hɛn ma yɛdze ahokeka aasom no. Afei so, ɔbɔboa hɛn ma yeetum egyina ɔhaw ahorow a yebehyia no ano, na yaakɔ do ara ayer hɛnho wɔ no som mu. Bio so, ɔbɛma yeesi hɛn bo dɛ yɛbɔkɔ do ara abɛn Jehovah. w24.06 20 ¶3-4

Ebɛnadze na yebotum esua efi krataa a ɔsomafo Paul kyerɛwee kɛmaa Thessalonicafo no mu? Sɛ yɛtse asɛm bi na ɔnye dza yeesua efi Bible mu no nnhyia anaadɛ yɛtse dɛ wɔrekeka nsɛm bi a ɔnnyɛ nokwar koraa fa Jehovah Adasefo ho a, ɔsɛ dɛ yɛhwehwɛ mu yie. Mber bi a abɛsen kɔ no, hɛn atamfo a nna wɔwɔ Soviet Union no dze krataa bi kɛmaa enuanom, na wɔmaa ɔyɛɛ tse dɛ mbrɛ krataa no fi hɛn wiadze nyina edwumayɛbea tsir. Nna krataa no rehyɛ enuanom binom nkuran dɛ wɔntwe hɔnho mfi ahyehyɛdze no ho na wɔnkɛtsew kuw fofor. Nna krataa no tse dɛ mbrɛ ofi ahyehyɛdze no hɔ. Naaso enuanom anokwafo no amma iyi anndaadaa hɔn. Wohun dɛ nsɛm a nna ɔwɔ krataa no mu no, nna ɔnye dza woesua no nnhyia. Ndɛ so, ɔtɔ da a hɛn atamfo fa intanɛt anaa sohyial media do keka nsɛm bi a ɔbɛma hɛn adwen mu ayɛ hɛn konsee anaa hɛn mu apaapaa. Wɔka dɛ, ɔsɛ dɛ ihu nkwan bi ne fibea ana aka ahwɛ. Ntsi Christianfo dze, sɛ yɛtse asɛm bi anaa yɛkenkan biribi a, yɛdze toto dza yeesua dada no ho hwɛ dɛ ɔyɛ nokwar ansaana yeedzi ekyir. Sɛ yɛyɛ dɛm a, yɛremma kwan ma biribiara ‘nndan hɛn adwen ntsɛm.’—2 Thess. 2:2; 1 John 4:1. w24.07 12 ¶14-15

Gyinae a nyimpa sisi nyinara, dza ohia wɔ mu paa nye dɛ obi behyira noho do ama Jehovah na ɔaabɛka n’asomfo ho. Dɛm gyinae no na Jehovah pɛ dɛ obiara si. Ebɛnadze ntsi a? Ɔpɛ dɛ obiara fa no nyɛnko ama wɔaatsena ase daa. (Deut. 30:​19, 20; Gal. 6:​7, 8) Naaso, Jehovah nnhyɛ obiara dɛ ɔnsom no. Ɔama obiara kwan dɛ onsi dza ɔpɛ dɛ ɔyɛ ho gyinae. Naaso sɛ Christiannyi bi a woenuma no yɛ bɔn a no mu yɛ dur bi so ɛ, ebɛn asɛm bɔto no? Sɛ oennu noho a, ɔsɛ dɛ woyi no fi asafo no mu. (1 Cor. 5:13) Naaso sɛ woyi ɔdzebɔnyɛnyi no fi asafo no mu mpo a, Jehovah hwɛ kwan paa dɛ ɔbɛsan aba ne nkyɛn bio. Nokwasɛm nye dɛ, Jehovah maa ne Ba no bowui maa hɛn ama oeetum dze ndzebɔnyɛfo a wonu hɔnho no hɔn bɔn akyɛ hɔn. Hɛn Nyankopɔn a ɔdɔ hɛn no reserɛ hɔn a wɔayɛ bɔn no dɛ wonnu hɔnho.—Zech. 1:3; Rom. 2:4; Jas. 4:8. w24.08 14 ¶1-2

Aber a ɔsomafo John kyerɛɛw ne krataa a otsia ebiasa no, nna nyimpa binom retserɛw ator nkyerɛkyerɛ mu. Afei so nna wɔdze mpaapaamu reba asafo no mu. Naaso, nna binom so da ho ara “nam nokwar no mu.” Dɛm enuanom yi tsiee Jehovah na ‘wɔnantsewee dɛ mbrɛ n’ahyɛdze no tse.’ (2 John 4, 6) Ɔnnyɛ John nkotsee na dɛm Christianfo anokwafo yi maa n’enyi gyee, na mbom wɔmaa Jehovah so n’enyi gyee paa. (Mbɛ. 27:11) Ebɛnadze na yebotum esua efi asɛm yi mu? Sɛ yɛkɔ do dzi Jehovah nokwar a, hɛn enyi bɛgye na afofor so enyi bɛgye. (1 John 5:3) Sɛ yehu dɛ dza yɛreyɛ no ma Jehovah n’enyi gye a, ɔma hɛn so hɛn enyi gye. Sɛ Jehovah hu dɛ yɛatwe hɛnho efi ndzɛmba a obotum asɔ hɛn ahwɛ ho, na yɛdze nokwardzi robɔ hɛn bra a, ɔma n’enyi gye. Ɔma abɔfo a wɔwɔ sor no so enyi gye. (Luke 15:10) Hɛn so, sɛ yehu dɛ hɛn nuanom Christianfo dze nokwardzi rosom Jehovah a, ɔma hɛn enyi gye. (2 Thess. 1:4) Afei, sɛ woyi Satan no wiadze bɔn yi fi hɔ a, hɛn enyi bɛgye na hɛn akoma so bɔtɔ hɛn yamu osiandɛ yedzii Jehovah nokwar kesii ase. w24.11 12 ¶17-18

Mber tsentsen ahen na ɔsɛ dɛ edze w’enyi to famu hwɛ obi ansaana ase no pɛ? Sɛ efa nyimpa no nyɛnko nda ebien anaa ebiasa bi pɛ na edze kɔto n’enyim dɛ epɛ no a, bi a obotum enya adwen dɛ eper woho wɔ ndzɛmba ho. (Mbɛ. 29:20) Naaso, sɛ ema ɔkyɛr so a, bi a obotum enya adwen dɛ w’adwen nnsi wo pi anaa innyim dza epɛ, nkanka aber a nyimpa no so ehu dɛ w’enyi gye no ho no. (Ɔsɛnk. 11:4) Kaa dɛ, ansaana ebɛse nyimpa no pɛ no, ɔnnsɛ dɛ inya adwen dɛ dɛm nyimpa no ara na ebɔwar no. Naaso ɔsɛ dɛ wankasa egye to mu dɛ ayɛ krado dɛ ebɔwar, na dɛm nyimpa no yɛ obi a isusu dɛ obotum ayɛ wo kun anaa wo yer. Naaso, sɛ ɔyɛ ɔwo so na ehu dɛ obi n’enyi gye wo ho na ɔpɛ dɛ ohu wo yie so ɛ? Sɛ w’enyi nngye nyimpa kor no ho a, bɔ mbɔdzen fa wo ndzeyɛɛ kyerɛ no ma onhu no pefee dɛ w’enyi nngye no ho. Ɔrennyɛ papa dɛ ebɛma nyimpa no enya adwen dɛ bi a obotum nye wo anantsew aber a inyim paa dɛ biribi a ɔtse dɛm runntum nnyɛ yie.—Eph. 4:25. w24.05 22-23 ¶9-10

Hɔn a wɔasera hɔn ampaara ampaara na wodzi Jehovah nokwar no na Jesus bɛfa hɔn akɔ sor Ahenman no mu. Christiannyi biara a wɔasera no a oenntum annweɔn no, sɛ wɔroboaboa “hɔn a woeyi hɔn no” ano a, wɔremmfa no nnka ho. (Matt. 24:31) Naaso ɔsɛ dɛ Nyankopɔn n’asomfo a wɔwɔ enyidado dɛ wɔbɛtsena asaase yi do no nyina so tsie Jesus no kɔkɔbɔ yi. Ɔsɛ dɛ hɛn nyina kɔ do weɔn na yɛkɔ do ara so dzi Jehovah nokwar kesi ase. Yeebohu Jehovah yie, dɛm ntsi yɛgye dzi paa dɛ ɔbɛyɛ dza ɔtsen aber biara. Dɛm ntsi sɛ Jehovah dze no sunsum krɔnkrɔn no sera n’asomfo anokwafo pii wɔ hɛn aber yi do kyɛn ber biara a abɛsen kɔ a, yɛmma ɔnnhaw hɛn. Jesus yɛɛ mfatoho bi faa habanwura bi a ɔbɔɔ edwumayɛfo bi paa ma wɔkɛyɛɛ edwuma wɔ ne wenyin haban mu no ho. Mfatoho no mu no, ɔkaa asɛm bi faa edwumayɛfo a wɔbɔɔ hɔn paa wɔ dɔn a otsia dubiako no mu no ho, na ɔsɛ dɛ yɛma dɛm asɛm no tsena hɛn adwen mu. (Matt. 20:​1-16) Hɔn a wɔkɛyɛɛ edwuma wɔ haban no mu ekyir yi nye hɔn a wɔhyɛɛ edwuma no ase anapatutuutu no nyina nyaa akatua kor. Dɛm mfatoho yi ma yehu dɛ, ɔmmfa ho ber a wɔdze sera obi no, sɛ ɔkɔ do dzi nokwar kesi ase a, obenya no sor akatua no. w24.09 24 ¶15-17

Mbrɛ Jesus sii yɛɛ n’adze aber a wɔnye no enndzi no yie no dze, asɛm biara nnyi ho, ntsi yebotum esuasua no. Nkorɔfo pii nye no enndzi no yie koraa. Nna n’ebusuafo binom mpo ka ho. N’ebusuafo a nna wɔnngye no nndzi no kaa dɛ ɔabɔ dam. Nyamesom mpanyimfo no so bɔɔ no sombo dɛ ɔnye esunsum fi bɔ mu yɛ edwuma. Afei so, Rome asogyafo no sereew no, wɔboor no na ewiei koraa no, wokum no. (Mark 3:​21, 22; 14:55; 15:​16-20, 35-37) Naaso ɔmmfa ho dza wɔdze yɛɛ Jesus nyina no, ɔannyɛ bi enntua hɔn kaw. Ebɛnadze na yebotum esua efi dza ɔyɛe no mu? (1 Peter 2:​21-23) Yebotum esuasua kwan a Jesus faa do yɛɛ n’adze aber a wɔnye no enndzi no yie no. Nna onyim aber a ɔsɛ dɛ ɔyɛ dzinn nye aber a ɔsɛ dɛ ɔkasa. (Matt. 26:​62-64) Nna hɔn a wɔsoɛr tsia no no ka nsɛm a ɔnnyɛ nokwar fa no ho, naaso ɔnnyɛ aber nyina na oyii hɔn ano. (Matt. 11:19) Aber a oyii hɔn ano no so, ɔannhyehyɛ hɔn ahorba anaa oennhunahuna hɔn. w24.11 4-5 ¶9-10

Fa no dɛ edze adze bi a ɔyɛ fɛw na mfaso wɔ do akyɛ obi a epɛ n’asɛm paa. Sɛ ɔdze w’akyɛdze no kesie beebi na ɔto n’adwen mu a, ebɛtse nka dɛn? Ekyingye biara nnyi ho dɛ ɔbɛyɛ wo yaw. Naaso sɛ ɔkyerɛ dɛ n’enyi sɔ w’akyɛdze no na ɔdze dzi dwuma a, ɔbɛma w’enyi agye paa. Dɛm asɛm yi fa Jehovah ho dɛn? Hɛn ntsi na Jehovah maa ne Ba no bowui. Ntsi sɛ yɛkyerɛ ɔdɔ a Jehovah ada no edzi akyerɛ hɛn nye werdam no ho enyisɔ a, ɔma n’enyi gye paa. (John 3:16; Rom. 5:​7, 8) Sɛ yɛannhwɛ no yie a, ber rokɔ do no yebegyaa dɛ yɛrekyerɛ werdam no ho enyisɔ. Ɔbɛyɛ tse dɛ mbrɛ yɛdze Nyankopɔn n’akyɛdze yi akɔto beebi. Ɔbɛyɛ hɛn dɛw dɛ hɛn nsa aka akyɛdze no, naaso ɔbɛyɛ tse dɛ mbrɛ yɛdze akɛhyɛ beebi a hɛn enyi mpo rommbɔ do. Naaso sɛ yɛmmpɛ dɛ biribi a ɔtse dɛm besi a, ɔsɛ dɛ yɛtaa yɛ ndzɛmba a ɔbɛkyerɛ dɛ hɛn enyi sɔ dza Nyankopɔn na Christ ayɛ ama hɛn no. w25.01 26 ¶1-2

Sɛ onua bi botum abɛyɛ asafo mu panyin a, ɔnnsɛ dɛ ɔyɛ obi a ɔbaa gyedzi no mu nnkyɛree. Dɛm asɛm yi nnkyerɛ dɛ ɔsɛ dɛ eyɛ obi a wonumaa wo akyɛr paa. Naaso, ɔgye ber ana etum abɛyɛ Christiannyi a woho akokwaa. Sɛ ibotum abɛyɛ asafo mu panyin a, ɔsɛ dɛ isuasua Jesus na ebrɛ woho adze. Afei so, sɛ innyaa hokwan bi wɔ asafo no mu a, ɔnnsɛ dɛ ema ɔhaw wo. (Matt. 20:23; Phil. 2:​5-8) Sɛ etakyer Jehovah ho, edze ne mbra yɛ edwuma, na itsie akwankyerɛ biara so a ɔnam n’ahyehyɛdze no do dze ma no a, ɔbɛkyerɛ dɛ idzi Jehovah nokwar. Bible no ka no pefee dɛ ɔsɛ dɛ asafo mu mpanyimfo tum kyerɛkyerɛ. Iyi kyerɛ dɛ ɔsɛ dɛ ihu bagua mu ɔkasa ma paa anaa? Oho. Asafo mu mpanyimfo pii wɔ hɔ a, sɛ ɔba no bagua mu ɔkasa a, wɔnnyɛ adze papa. Naaso, wotum kyerɛkyerɛ yie wɔ asɛnka mu na wotum so hyɛ enuanom nkuran aber a wɔakɛsera hɔn no. w24.11 23 ¶14-15

Sɛ ekenkan asɛm bi wɔ Bible no mu na enntse ase a, yɛ ho nhwehwɛmu. Afei dza ibohu no, ofi anapa araa kesi ewimbir no, dwendwen ho hwɛ dɛ ebɛnadze na ɔkyerɛ wo fa Jehovah, Jesus nye ɔdɔ a wɔwɔ ma wo no ho. (Ndw. 119:97) Sɛ erekenkan biribi anaa ereyɛ nhwehwɛmu na ennsua biribi fofor biara mpo a, mma mma w’abaw mu mmbu. Kwan bi do no etse dɛ obi a ɔrohwehwɛ sika kɔkɔɔ. Hɔn a wɔhwehwɛ sika kɔkɔɔ no dze abotar yɛ hɔn edwuma no. Ɔtɔ da a ɔsɛ dɛ wɔdze ndɔnhwer anaa nda pii hwehwɛ sika kɔkɔɔ no ansaana bi a woenya ketseketse bi mpo. Naaso ne nyina mu no wɔmmpa abaw, osiandɛ sika kɔkɔɔ ketseketse bi a wobenya no som bo ma hɔn. Akoradze a yenya fi Bible mu no som bo sen sika kɔkɔɔ koraa. (Mbɛ. 8:10) Ntsi ɔyɛ a sie abotar, na nhyehyɛɛ a edze kenkan Bible no so, bɔ mbɔdzen ara dzi do.—Ndw. 1:2. w25.01 25 ¶14-15

Sɛ obi yɛ adze ma ɔyɛ hɛn yaw a, Jehovah pɛ dɛ yɛdze nyimpa no no bɔn kyɛ no. (Ndw. 86:5; Luke 17:4; Eph. 4:32) Obi botum aka asɛm bi anaa ɔayɛ biribi ma wɔayɛ hɛn yaw paa nkanka aber a dɛm nyimpa no yɛ hɛn nyɛnko berɛbo anaa hɛn busuanyi no. (Ndw. 55:​12-14) Ɔtɔ da a, yaw a ɔtse dɛm no tse dɛ mbrɛ wɔawɔ hɛn sekan. (Mbɛ. 12:18) Ɔba no dɛm a, ɔyɛ a nna yɛpɛ dɛ yɛyɛ hɛn adze tse dɛ gyama hwee nnsii. Naaso sɛ yɛyɛ dɛm a, ɔtse dɛ mbrɛ obi awɔ hɛn sekan na yeegya sekan no ahyɛ mu. Dɛmara so na sɛ obi yɛ adze ma ɔyɛ hɛn yaw na yɛyɛ hɛnho dɛ hwee nnsii a, hɛnara na yeruku hɛnho. Sɛ obi yɛ adze ma ɔyɛ hɛn yaw a, bi a hɛn bo bofuw. Bible no mpo ma yehu dɛ sɛ hɛn bo fuw a ɔnnyɛ bɔn. Naaso, ɔsan so bɔ hɛn kɔkɔ dɛ ɔnnsɛ dɛ yɛdze ebufuw no hyɛ hɛn mu kyɛr. (Ndw. 4:4; Eph. 4:26) Ebɛnadze ntsi a? Osiandɛ mpɛn pii no, adze papa biara mmfi ebufuw mu mmba. (Jas. 1:20) Ntsi ɔsɛ dɛ ekaa dɛ, sɛ obi yɛ adze ma ɔyɛ wo yaw a, wo bo botum efuw. Naaso, dɛ edze ebufuw no bɛhyɛ wo mu anaa ibeyi efi wo mu no dze, ɔwɔ woara wo nsamu. w25.02 15 ¶4-6

Mfatoho bi a Jesus yɛe no ma yehu dɛ sɛ obi boaboa sika ano gu hɔ na ɔnnyɛ “ɔdzefo wɔ Nyankopɔn n’afamu” a, onnyim nyansa. (Luke 12:​16-21) Obiara nnyim ɔkyena asɛm. (Mbɛ. 23:​4, 5; Jas. 4:​13-15) Osiandɛ yɛyɛ Christ n’ekyirdzifo ntsi, yehyia ɔhaw fofor bi so. Jesus kaa dɛ sɛ yɛpɛ dɛ yedzi n’ekyir a, ɔsɛ dɛ yɛyɛ krado dɛ ‘yebegya’ dza yɛwɔ nyinara hɔ. (Luke 14:33) Christianfo a wɔtsenaa ase wɔ asomafo no aber do a nna wɔwɔ Judea no dze enyigye gyaa dza nna wɔwɔ nyinara hɔ. (Heb. 10:34) Ndɛ so, osiandɛ yɛmmfa hɛnho nnhyehyɛ amanyɛsɛm mu ntsi, enuanom pii hɔn egyapadze efi hɔn nsa. (Nyi. 13:​16, 17) Ebɛnadze na wɔaboa hɔn ma woetum egyina dɛm ɔhaw yi ano? Bɔ a Jehovah ahyɛ dɛ, “Mirinngya wo da, eso meremmpa wo dabiarada” no, wɔgye dzi paa. (Heb. 13:5) Yɛyɛ dza yebotum biara ama yeetum ahwɛ hɛnho daakye, naaso sɛ biribi a yɛnnhwɛ kwan to hɛn a, yɛwɔ awerɛhyɛmu dɛ Jehovah bɔhwɛ hɛn. w25.03 29 ¶13-14

Jehovah nyim dɛ yehia mboa ama hɛnho akokwaa. Dɛm ntsi ɔama hɛn ahwɛfo nye akyerɛkyerɛfo wɔ Christianfo asafo no mu a wɔayɛ krado dɛ wɔbɔboa hɛn ma ‘yeenyin ewie’ wɔ Nyankopɔn no som mu, na “yeedu Christ amayɛ esusudze no pɛn do.” (Eph. 4:​11-13) Afei so, Jehovah dze no sunsum krɔnkrɔn no boa hɛn ma yenya “Christ adwen.” (1 Cor. 2:​14-16) Bio so, Nyankopɔn maa wɔkyerɛɛw Nsɛmpa anan no mbrɛ ɔbɛyɛ a ɔbɔboa hɛn ma yeehu mbrɛ nna Jesus si susu ndzɛmba ho, ɔkasa na ɔyɛ n’adze aber a nna ɔreyɛ no som edwuma wɔ asaase yi do no. Sɛ isuasua mbrɛ nna Jesus susu ndzɛmba ho na ɔyɛ n’adze no a, ibotum abɛyɛ Christiannyi a woho akokwaa. Naaso, sɛ hɛnho botum akokwaa a, ɔsɛ dɛ ‘yegya Christ ahyɛsesɛm no,’ kyerɛ, Christianfo mfitsiase nkyerɛkyerɛ no. w24.04 4-5 ¶11-12

Yesisi gyinae da biara da. Gyinae ahorow no bi wɔ hɔ a, ɔnnyɛ dzen koraa dɛ yebesisi. Bi tse dɛ edziban a yɛpɛ dɛ yedzi no anapa anaa ber a yɛpɛ dɛ yɛdze da. Naaso gyinae no bi so wɔ hɔ a, ɔnnda famu dɛ yebesi. Gyinae a yebesi no bi botum aka hɛn apɔwmudzen nye hɛn som. Afei so, obotum ama yɛnye hɛn ebusuafo enyi aagye anaa hɛn werɛ ahow. Yɛpɛ dɛ yɛnye hɛn ebusuafo nya gyinae biara a yebesi no do mfaso. Naaso dza ɔkyɛn ne nyinara no, yɛpɛ dɛ yesisi gyinae a ɔbɛma Jehovah n’enyi agye. (Rom. 12:​1, 2) Sɛ yebotum esi gyinae pa a, adze a ohia paa a ɔsɛ dɛ yɛyɛ nye dɛ yebohu asɛm no n’enyi do yie. Ebɛnadze ntsi na iyi ho hia? Fa no dɛ obi a ɔyar paa ekohu dɔkta bi. Ehwɛ a, dɔkta no bɔsoɛr ara ama no edur aber a orinndzi kan nnhu dza ɔyɛ nyimpa no anaa orimmbisabisa no nsɛm biara a? Ɔrennyɛ biribi a ɔtse dɛm koraa. Ntsi woara so, sɛ ibotum esi gyinae pa a, ɔsɛ dɛ idzi kan hu asɛm no n’enyi do yie. w25.01 14 ¶1-3

Ebɛnadze na yenyim fa ehumbɔbɔr a Jehovah da no edzi no ho? Ebɛnadze na Jehovah ayɛ dze ada no edzi dɛ ‘ɔmmpɛ dɛ obiara bɛsɛɛ’? (2 Pet. 3:9) Hom mma yɛnhwɛ mbrɛ Jehovah daa ehumbɔbɔr edzi kyerɛɛ nyimpa binom a wɔyɛɛ bɔn akɛse no. Sɛ yɛhwɛ Ɔhen David a, ɔyɛɛ bɔn akɛse toatoaa do. No mu bi nye dɛ ɔfaa banyin bi ne yer, na ɔmaa wokum banyin no so kaa ho. Naaso David nuu noho, dɛm ntsi Jehovah hun no mbɔbɔr na ɔdze no bɔn kyɛɛ no. (2 Sam. 12:​1-12) Ɔhen Manasseh so yɛɛ ndzɛmba bɔn pii wɔ n’asetsena mu. Ɔmmfa ho bɔn akɛse a ɔyɛe nyina ekyir no, onuu noho na Jehovah so hun no mbɔbɔr na ɔdze no bɔn kyɛɛ no. (2 Mber. 33:​9-16) Dɛm ahemfo beenu yi hɔn asɛm no ma yehu dɛ aber biara a Jehovah hu dɛ ɔsɛ dɛ ɔda ehumbɔbɔr edzi no, ɔyɛ dɛm. Jehovah benyan nkorɔfo a wɔtse dɛm, osiandɛ wɔgyee too mu dɛ wɔayɛ bɔn akɛse na wonuu hɔnho. w24.05 4 ¶12