Ẹkûkpa Mba Ndikwọrọ Ikọ
1 Nnyịn imekeme ndikere ndusụk ini ke imesikụre efakutom nnyịn ndien ndien inyụn̄ ikwọrọ ikọ ọyọhọ ọyọhọ, edi ke mme owo isinyeneke udọn̄. Kpa ye oro, nnyịn imenyene nti ntak ndika iso n̄kwọrọ ikọ.—Matt. 28:19, 20.
2 Nte Ntiense: Jesus ama ebem iso etịn̄ ete ke edikwọrọ Obio Ubọn̄ edidi akpan ubak idiọn̄ọ “utịt editịm n̄kpọ emi” ye nte ke ẹdikwọrọ enye “nte ntiense ẹnọ kpukpru mme idụt.” (Matt. 24:3, 14) Ke ini mme owo ẹkụtde nnyịn ikwọrọde eti mbụk Obio Ubọn̄, emi esinọ okopodudu ikọ ntiense. Ke ima ikọnyọn̄, ndusụk owo ẹkeme nditịn̄ n̄kpọ mban̄a nnyịn ke anyan ini, idem ọkpọkọm mmọ ikakpan̄ke utọn̄ inọ nnyịn. Ndifiọk ntak oro nnyịn isiwọrọde an̄wautom an̄wam nnyịn ndika iso n̄kwọrọ ikọ. Nnyịn ndinọ ikọ ntiense nnyụn̄ ntọt mme owo mban̄a nsobo oro edidide osu ntịn̄nnịm ikọ Bible onyụn̄ enem Jehovah esịt.—2 Thess. 1:6-9.
3 Oyom Ime: Sia odude ediwak n̄kpọ emi ẹkemede ndiwọn̄ọde ntịn̄enyịn mme owo nnyụn̄ nda ini mmọ, oyom nnyịn ime ime ke ini idomode ndin̄wam owo aka iso enyene udọn̄. Ẹma ẹsika ufọk mma kiet kpukpru urua ke ofụri isua kiet mbemiso enye enyịmede ndiyak Mme Ntiense ẹdụk ufọk esie ẹdinyene nneme Bible ye enye. Enye ama enen̄ede ama se enye okokopde tutu enye enyịme ukpepn̄kpọ Bible onyụn̄ ọtọn̄ọ ndidụk mme mbono esop, ndien ibịghike ọdọhọ ke ikpama ndina baptism.
4 Nte mme idaha ererimbot ẹkpụhọrede, ntre n̄ko ke mme owo ẹsikpụhọde. Idahaemi, ediwak mbon oro mîkakpan̄ke utọn̄ inọ nnyịn ke ini edem ẹkeme ndinyịme ndikop etop idotenyịn oro nnyịn itan̄ade. Idem ọkpọkọm owo kiet kpọt enyịme etop Obio Ubọn̄, ukeme oro nnyịn ikesịnde itatke-tak.
5 Ediwak owo ke ofụri ererimbot ke ‘ẹseme ẹnyụn̄ ẹtuan̄a ẹban̄a kpukpru mbubiam ido emi ẹnamde.’ (Ezek. 9:4) Se nnyịn ikụtde owụt ke mbon oro ẹnyenede eti esịt ke ẹnyịme etop Obio Ubọn̄. (Isa. 2:2, 3) Mmọdo, ẹyak nnyịn ikûkpa mba ndikwọrọ ikọ, edi ẹyak ika iso ‘ndibụk eti mbụk eti n̄kpọ.’—Isa. 52:7; Utom 5:42.