Nte Ubon Fo Ẹben̄e Idem Ndibọhọ?
1 Mme ntịn̄nnịm ikọ Bible oro ẹsude ẹnen̄ede ẹwụt ke utịt ererimbot emi enen̄ede ekpere. Mme n̄kpọ oro ẹtịbede ke ndiọkeyo emi nnyịn idude mi ebiet se iketịbede mbemiso Ukwọ. (Matt. 24:37-39) Noah ọkọbọhọ nsobo akani ererimbot oro sia ‘enye akasan̄ade ye Abasi.’ (Gen. 6:9) Anaedi Noah ama ekpep ubon esie usụn̄ Jehovah koro mmọ n̄ko ẹma ẹbọhọ. Didie ke nnyịn ikeme ndikpebe Noah nnyụn̄ mben̄e idem nte ubon ndibọhọ utịt idiọk editịm n̄kpọ emi?
2 Ọkwọrọ Edinen Ido: Noah ama aka iso anam utom ke n̄kpọ nte isua 40 esịm 50 nte “ọkwọrọ edinen ido.” (2 Pet. 2:5) Edide mme ọsọn̄ibuot angel oro ẹkekabarede ẹdi mme owo ẹma ẹsisịn udọn̄ ẹnọ mmọ m̀mê ikesisịnke, mme mbọhọidụn̄ Noah ẹma ẹsisak enye nsahi ke ntak utom ukwọrọikọ esie. Nnyịn imesiwak ndisobo nsahi ye unana udọn̄ ke an̄wautom, emi owụtde ke utịt editịm n̄kpọ emi asan̄a ekpere. (2 Pet. 3:3, 4) Nte ededi, ediwak owo itiehe nte mbon eyo Noah, mmọ ke ẹnyịme ukwọrọikọ nnyịn, ke ẹnyụn̄ ‘ẹbụn̄ọ ẹdụk’ esop Jehovah. (Isa. 2:2) Nnyịn idinyan̄a ‘idem nnyịn ye mmọ emi ẹkopde uyo nnyịn’ n̄kukụre edieke ikade iso ikwọrọ ikọ. (1 Tim. 4:16) Edi akpan n̄kpọ didie ntem mme ete ye eka ndikpep nditọ mmọ ke ikọ ye ke edinam mban̄a ntak anade ẹsọsọp ẹnam utom ukwọrọikọ!—2 Tim. 4:2.
3 “Ntem” ke Enye Anam: Noah ye ubon esie ẹkebọhọ koro mmọ ẹma ẹtịn̄ enyịn ẹnam item Jehovah. (Gen. 6:22) Edi akpan n̄kpọ nnyịn n̄ko ‘ndinyịme ndikop item’ oro otode Bible ye ofụn emi anamde akpanikọ. (Jas. 3:17) Ikpọ nditọ ke ubon kiet ẹti nte ete mmọ ekesidade mme ekikere oro esop Jehovah ọnọde esịn ke edinam. Ke uwụtn̄kpọ, enye ama esinịm ukpepn̄kpọ ubon kpukpru urua onyụn̄ ada ubon esie ọwọrọ an̄wautom kpukpru utịturua nte esop Abasi ọdọhọde ẹnam. Enye ama esidomo ndisan̄a ye kiet ke otu nditọ esie ke an̄wautom ke urua kiet kiet. Enye ndika iso nnam “ntem” ama enen̄ede otụk nditọ esie, ndien mmọ mbitiokiet ẹma ẹkpon ẹnyụn̄ ẹkabade ẹdi mme anam-akpanikọ asan̄autom Jehovah.
4 Utịt editịm n̄kpọ emi edidi ke mbuari. (Luke 12:40) Ebede ke ndikpebe Noah nnyụn̄ mbuọt idem man inyene edinyan̄a, nnyịn ye ubon nnyịn iyenen̄ede iben̄e idem.—Heb. 11:7.