Ntak Emi Isifiakde Ika Ndien Ndien
1. Nso mbụme ke ikpobụp iban̄a utom ukwọrọikọ nnyịn?
1 Ke ediwak ebiet, imesikụre efakutom nnyịn ndien ndien. Imesifiak ika kpa ukem ufọk oro ikọkwọrọde ikọ, okposụkedi ekemede ndidi enyeneufọk ama ọdọhọ ke imọ inyeneke udọn̄. Ntak emi nnyịn isifiakde ibịne mbon oro mîkenyeneke udọn̄ ke etop nnyịn?
2. Nso idi ata akpan ntak oro anamde ika iso ikwọrọ ikọ?
2 Ima Oro Imade Jehovah ye Mme Owo: Ata akpan ntak oro anamde ika iso ikwọrọ ikọ edi ima oro imade Jehovah. Ọdọn̄ nnyịn ndika iso nsian mbon en̄wen mban̄a akwa Abasi nnyịn. (Luke 6:45) Ima oro imade Jehovah anam nnyịn inịm mme ewụhọ esie inyụn̄ in̄wam mbon en̄wen ẹnam kpasụk ntre. (N̄ke 27:11; 1 John 5:3) Idịghe nte mme owo ẹnamde n̄kpọ edinam nnyịn ika iso inam utom emi. Idem ke ini ẹkekọbọde mme Christian ke akpa isua ikie, mmọ ẹma ẹka iso ẹkwọrọ ikọ ye “unana edikpa mba.” (Utom 5:42) Edieke mme owo mîmaha ndikpan̄ utọn̄, utu ke ndiyak oro anam idem emem nnyịn, oyom nnyịn ika iso ikwọrọ ikọ, ke ntre iwụtde adan̄a nte imade inyụn̄ ikponode Jehovah.
3. Didie ke ima oro imade mme owo edin̄wam nnyịn ika iso ikwọrọ ikọ?
3 Ntak en̄wen oro anamde ika iso ikwọrọ ikọ edi ima oro imade mbọhọidụn̄ nnyịn. (Luke 10:27) Jehovah iyomde owo ndomokiet atak. (2 Pet. 3:9) Idem ke mme efakutom oro ẹsikwọrọde ikọ ndien ndien, nnyịn imesikụt mbon oro ẹyomde ndinam n̄kpọ Jehovah. Ke uwụtn̄kpọ, ke isuo Guadeloupe, emi owo kiet ke otu owo 56 ẹdide Mme Ntiense Jehovah, isua oko owo 214 ẹkena baptism. Se ikperede ndisịm owo 20,000 ẹkedụk Editi, emi ọwọrọde ke otu owo 22 ke isuo oro, kiet ama odụk!
4. Didie ke mme efakutom ẹsikpụhọde?
4 Mme Efakutom Ẹsikpụhọde: Imesikụt mbufa owo ke efakutom nnyịn ke ini ke ini. Ke ini ifiakde ikọkọn̄ usụn̄ufọk oro owo mîkamaha ndikpan̄ utọn̄, owo en̄wen—eyedi owo oro akanam mîkopke etop nnyịn—ekeme ndiwọrọ ndi ndikpan̄ utọn̄. Mîdịghe imekeme ndikụt mbufa mbon oro ẹwọrọde ẹdidụn̄, emi ẹnyenede udọn̄. Nditọ oro mme ete ye eka mmọ mîsimaha mmọ ẹkpan̄ utọn̄ ẹsikọri ẹwọrọ owo ẹnyụn̄ ẹkpọn̄ ufọk. Utọ mbon oro ẹkeme ndima ndikop etop Obio Ubọn̄.
5. Nso ikeme ndinam mme owo ẹnen̄ede ẹyom ndikpan̄ utọn̄?
5 Mme owo n̄ko ẹsikpụhọde. Ini kiet, apostle Paul ekedi “osụn̄i isụn̄i ye andikọbọ ye owo emiom.” (1 Tim. 1:13) Kpasụk ntre, odu ini oro ata ediwak mbon oro ẹnamde n̄kpọ Jehovah mfịn mîkesinyeneke udọn̄ ke akpanikọ. Ndusụk mmọ ẹma ẹsikam ẹbiọn̄ọ mbon oro ẹtan̄ade eti mbụk. Nte mme idaha ererimbot ẹkpụhọrede, ndusụk mme andibiọn̄ọ m̀mê mbon oro mîkesinyeneke udọn̄ ke akpanikọ ẹkeme ndiyom ndikpan̄ utọn̄. Mbon eken ẹkeme ndinen̄ede nnyene udọn̄ ke ẹma ẹkesobo ọkpọkpọ mfịna, utọ nte ke ini owo akpade ke ubon mmọ, ke ini ẹsiode mmọ ke utom, ke ini okụk ananade mmọ, m̀mê ke ini udọn̄ọ.
6. Ntak oyomde ika iso isịn ifịk ikwọrọ ikọ?
6 Editịm n̄kpọ emi enen̄ede ekpere utịt esie, edi utom edikwọrọ ikọ ye edikpep owo n̄kpọ ke ọkọri. (Isa. 60:22) Ntre, nnyịn iyaka iso ndisịn ifịk n̄kwọrọ ikọ inyụn̄ idomo ndinyene in̄wan̄-in̄wan̄ edu. Owo en̄wen oro nnyịn idisobode ekeme ndikpan̄ utọn̄. Ẹyak nnyịn ika iso ikwọrọ ikọ! ‘Ke ndinam emi, nnyịn iyanyan̄a idem nnyịn ye mmọ eke ẹkopde uyo nnyịn.’—1 Tim. 4:16.