Ndi Odu Ukara Emi Edikemede Ndikara Isọn̄ Emi ke Nsinsi?​—Nso ke Bible Etịn̄?

Ukara ke ofụri ererimbot ẹdu ke ndutịme. Idem ke ndusụk idụt oro etiede nte ukara mmọ afiak ọfọn ekpri, isisụk ikokop ndiọi mbụk iban̄a mbon pọlitịks, election emi owo mînamke ọfọn, mbon pọlitịks ndin̄wana ke otu idemmọ, ye mbon obio ndisiak en̄wan ye ukara.

Edi Bible etịn̄ ke odu ukara emi mînyeneke mfịna ndomokiet. Ekeme ndidi omokokop aban̄a ukara oro. Enye ke Jesus Christ eketịn̄ aban̄a ke akam Ọbọn̄.

• “Mbufo ẹbọn̄ akam ntem, ndien, ẹte:‘Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.’”​—Matthew 6:9, 10.

Nso ke Bible etịn̄ aban̄a Obio Ubọn̄ oro?

Obio Ubọn̄ oro edidu ke nsinsi

Obio Ubọn̄ oro odu ke heaven akara isọn̄.

• Jesus okokot ukara oro “obio ubọn̄ heaven.” (Matthew 4:17; 5:3, 10, 19, 20) Oro akanam enye ọdọhọ ete: “Obio ubọn̄ mi idịghe ubak ererimbot emi.”​—John 18:36.

Obio Ubọn̄ oro ayada itie ukara owo.

• Bible ọdọhọ ete: “Obio ubọn̄ oro. . . ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.”​—Daniel 2:44.

Owo idikemeke ndisobo Obio Ubọn̄ oro sia Jesus Christ edi Edidem esie.

• Bible ọdọhọ ete: “Ukara esie edi nsinsi ukara emi mîdibehe ifep, obio ubọn̄ esie onyụn̄ edi obio ubọn̄ oro owo mîdisoboke.”​—Daniel 7:13, 14.

Obio Ubọn̄ oro ayanam emem ye ifụre odu ke isọn̄.

• Bible ọdọhọ ete: “Kpukpru owo ẹyetie ke idak vine ye idak eto fig mmọ ke emem, ndien idụhe eke edinamde ndịk anam mmọ.”​—Micah 4:4, Good News Translation.

Kpep n̄kpọ en̄wen ban̄a Obio Ubọn̄ oro

Ini Jesus okodude ke isọn̄, enye ekesida ini esie “ọkwọrọ eti mbụk obio ubọn̄.” (Matthew 9:35) Enye ọkọdọhọ n̄ko ete:

• “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”​—Matthew 24:14.

Mfịn, ẹkwọrọ eti mbụk Obio Ubọn̄ emi ke se ikande idụt 240. Imoyom fi etiene edikpep n̄kpọ en̄wen en̄wen aban̄a ukara emi ye nte ekemede ndibọ ufọn ukara oro.

Mbọk se vidio emi Nso Idi Obio Ubọn̄ Abasi?